تسلمين ياعسل ع البااارت الحلو
كسرت خااطري جواهر
وهالفيصل يقهر وش يبي منها
بأنتظااارك البارت القادم

السلام عليكم ورحمة الله وبركاتة

ياهلا وغلا بنت البدو ياهلا فيك فبيت الكل ليلاس

رواية روووعه حيييل ومشوقه بقوووة

تمنيت اني مااكتشفتها الا الخميس الجاي علشان اعرف وش بيصير وبرضوا بنفس الوقت تمنيت اني كنت معك من البدايةاحترت بصراحهوش اكثر شي تمنيتة

جواهر- بنت طيوبة حيييل وباين فعلا انها ماتعرف شي برا محيطها قهرتني بمواقف كثيييير كانت تنصاع لفيصل وتطيعه طاعه عمياء , حلو بعد انها مابينت لة انها من ضمن الاشياء اللي خلتها ماترفع السماعه انها وثقت بكلامة لها

فيصل – يشدني كبرياءة حيل بس لوين بيوصل معها
اذا هو ي مايقول بيرجعها ليش شرا لهاملابس اللي خايفه منة انه بدون لايدري يعلق نفسة فيها وياخوفي يفوق لها الشي وهي عنده ومابعد رجعها وقتها يمكن يقسى عليها يا بالحكي او بالفعل وبيطول مده جلوسها عنده

سعود – امحق ولد خال ياحلالاة تكفيخك وتسطيرك عشان تعرف ان عند الله حق وش ذنب الشايب يوم تجي وتطول لسانك جعل لسانك القص والله ان جواهر صادقه ضاقت الاهو يوم تبغى امها تجبرها الحمدلله انها ما خذتة ولا كان راحت فيها هالمريض

ناصر – الله يقومك بالسلامة يارب وترجع لبيتك ومرتك وبناتك وتطمن على جواهر

بارك الله فيك وفي قلمك بنوتة عساك على القوة دائما يارب

الله يعطيك الف الف الف عافية
لاهنتي ولاجف قلمك
بانتظاااااااااااارك بشوووووووووووق

رومنسية زمانها

*****الفصل الخامس******












بعدما قامت جواهر من النوم صلت الظهر وأفطرت لبست ثوب وسيع بيج فية رسمات باالبني.

جلست على كرسي تمشط شعرها الي يصل لأسفل ظهرها

سمعت دق خفيف على الباب
وقفت وجمعت شعرها أخذت الشيلة ولفتها على راسها
فتحت الباب

دخلو عليها مجموعة البنات
إبتسمت جواهر وقالت:
-إنتو جيتو؟ من متى؟


قالت الي كاشفة وجهها:
-هذا بدال ماتقولين حياكم الله... عاش من شافكم... تقولين متى جيتو؟


ضحكت جواهر:
-ههههههههه لاتواخذيني ياختي... بس إستغربت من متى وإنتو هنا؟

قالت أم لثامة:
-تونا الحين جينا.... زهقتي هنا؟


قالت جواهر:
-أكيد زهقت.


قالت أم لثامة:
-صدقيني لو إني منك مازهقت... كل البنات يتمنون يجون مكانك.


غيرت جواهر الموضوع:
-على فكرة أنا ماأعرف أسمائتسن(أسمائكن)... تجون وتروحون ونسولف مع بعض بس ماأعرفها


قالت الي كاشفة وجهها:
-أنا خلود... أنا رئيسة البنات.. رئيسة الوجية السمحة الي قدامك..
وهذي مريم أم لثامة.. وهذي ياسمين.. وهذي حصة وهذي الحيوية إسمها بشاير


قالت جواهر:
-عاشت الأسامي.... بس إنتو وش تسوون هنا؟

قالت خلود:
-إحنا نجي هنا عشان شغل خاص


قالت جواهر وهي حابة توصل لشيئ الي تبي تعرفة:
-شغل؟وش نوعية شغلتسن (شغلكن)؟

ردت خلود:
-خاص صدقيني ماأقدر أقولك.


أصرت جواهر إنها تعرف وش يخبية فيصل:
-قولي ياخلود عادي.
‏





-قالت لك خلاص... يعني مستحيل تقولك.


إلتفتو البنات كلهم للمتكلم
كان فيصل واقف عند الباب بثوبة الأبيض وشماغة...... وعينة مانزلت عن جواهر

أما مريم أول ماشافتة شهقت وحطت يدها على فمها وشهقتها شدت إنتباة جواهر الي طالعت فيها بعدين لفت لفيصل الي يطالع فيها بحدة فكرت جواهر
(وش فية اليوم يطالع فيني تسذا[كذا] وكني ذابحتن لة أحد)

كمل فيصل وقال:
-يالله ياخلود تعالي إنتي والبنات للمكتب

طلع وأول وحدة طلعت مع الباب كانت مريم وتبعوها البنات.

حست جواهر بشعور غريب صورة مريم وشهقتها في بالها
(لية أفكر فيهم؟ كيفة هو وياها)


وقفت وقالت:
-لازم أعرف وش نوعية شغلهم.

فتحت الباب بهدوء وطلعت تمشي على رؤوس أصابعها وصلت المكتب وسمعت فيصل يقول:
-أبيكم تكونون متماسكين أوكية؟


بعدين سمعت همهمة وكأنة يتكلم برموز

حاولت تقرب وتلصق إذنها على الباب عشان تسمع أوضح
بس تعلق طرف جزمتها (وأنتو كرامة) بطرف السجاد وكانت بتطيح على الأرض لكنها تمسكت بعروة الباب وطلع صوت...

توقف الصوت في المكتب
خافت ورجعت بتهرب بس فية يد مسكتها وثبتتها في مكانها
إلتفتت شافت وجة فيصل عند وجهها بعدت راسها عنة ويدة مازالت قابضة على يدها
قال وعيونة كأنها تقدح شرر:
-وش قاعدة تسوين؟


الخوف أخرسها الكلمات بصعوبة تخرج من فمها:
-أنا..........

فيصل:
-كنتي تتجسسين علينا؟صح؟

ردت جواهر:
-لا

قرب منها أكثر وقال:
-وش سمعتي؟

صدمها قربة منها ورجعت لورى حتى لصقت باالحيط قالت:
-ماسمعت شي


مسك شعرها بعد ماطاحت عنة الشيلة وإنتثر على ظهرها:
-أنا ماقلت لك لاتتدخلين في شي من خصوصياتنا؟ الحين روحي لغرفتك وبعد الأجتماع بتناديك الخدامة لي أوكية؟


هزت راسها بصعوبة لأنة كان ماسك شعرها بيدة ومثبت راسها كانت في يدة مثل العصفور:
-إنشالله


فك شعرها ودفها بعيد عنة
وهي أغتنمة الفرصة وهربت لغرفتها














####
في بيت أبو سعود
‏
أبو سعود وهو معصب:
-فشلتنا حسبي الله عليك رايح لناصر وسابة هو وبنتة في بيتة وماقدرت أحد
‏

سعود وهو يتحسس مكان الضربة في وجهة:
-يبة المفروض إنك ماتهاوشني لأني أخذت حقي

‏
أبو سعود:
-أي حق؟ أنت ووجهك البنت وانفضحت تروح تزيد على أهلها فضيحتهم؟

‏
أم سعود:
-بس حتى لازم ولدي ياخذ حقة
‏

إلتفت لها أبوسعود وهو معصب:
-إنتي إسكتي..ماحدن خرب الولد إلا إنتي
‏

بلعت أم سعود لسانها وسكتت
‏

كمل أبوسعود:
-وأنت أبيك الحين تروح لناصر وتستسمح منة
‏

زفر سعود بعصبية:
-منيب مستسمح منة لو على قص رقبتي
‏

وقف أبوسعود:
-والله وكبرت وطول لسانك
‏

وقف سعود مثلة:
-روحة لناصر مانيب رايح عشان كذا لاتغصبني
‏

وطلع من البيت
‏

إلتفت أبوسعود على حرمتة:
-شفتي؟ عاجبتس الحين سوات ولدتس؟ حسبي الله ونعم الوكيل فشلتوني بين الناس
‏

صدت عنة أم سعود وسكتت











#####‏#
كانت في غرفتها ويدها على قلبها خايفة من الي بيصير

دق الباب

وعلا طول لفت شيلتها على راسها وطلعت

شافت الخدامة تحاول جاهدة إنها تفهمها بس هي مايحتاج تفهم لأنها عارفة وشهولة الخدامة تدق باب غرفتها

دقت باب المكتب ودخلت كاالعادة


وقفت عند المكتب وهي منزلة نظرها للأرض.


أما هو يطالع فيها من أول مادخلت وعينة مانزلت عنها
سند ظهرة على الكرسي
(لاوالله ياجواهر مسويتلي فيها نفسك ذكية...
بس تصدقين تكسرين الخاطر...
أنا أوريك الحين من هو الذكي)


فيصل:
-مارديتي علي وش سمعتي؟

جواهر:
-ماسمعت شي.

رفع حجاجة:
-لااااا.مهوب علي هذا الكلام... قولي وش سمعتي مدامني أكلمك باالطيب ولا إستعملت معك طريقة ثانية.


تغرقت عيون جواهر باالدموع:
-سمعتك تقول لهم لازم تكونون متماسكين... بس والله هذا الي سمعتة.


قال وهو يطالعها بحدة عشان يشوف ردة فعلها للكلام الي بيقولة:
-تدرين؟.... لو إن الي سامع واحد غيرك كان قطعت لة إذنية.


رفعت راسها وقالت تترجاة:
-أنا آسفة كنت مارة وسمعتكم صدفة.


إبتسم فيصل:
-محد عارفك أكثر مني ياجواهر.......ماكنتي مارة كنتي جاية تتجسسين بقصد.


نزلت راسها لأن ماعندها شي تقولة:
-صحيح


كسرت خاطرة قال بحنية:
-زين إنك إعترفتي..... تبين ترجعين لهلك ياجواهر؟


فتحت جواهر عيونها مهي مصدقة الي تسمعة:
-بترجعني لهلي؟


إبتسم وقال:
-إية.... بس بشرط


تحمست جواهر أهم شي يرجعها لهلها وماعليها من الشرط:
-قول شرطك وأنا راضيتن فية.


عقد حجاجة:
-لاتستعجلين أتوقع إن شرطي مايعجبك... ولو إنها وحدة غيرك بتفرح فية.


ترددت بعدين قالت:
-قول شرطك


تقدم على الكرسي وحط يدية على المكتب وطالعها بنظرة ثابتة يشوف ردت فعلها:
-شرطي إنك تتزوجيني..... وتجيبين لي وريث يعني هذا زواج مصلحة إنتي أكيد بتستفيدين من لقب الشيخة وماراح أقصر معك بشي وأنا أستفيد منك بوريث يحمل إسمي؛؛؛ تجلسين معي ياجواهر من بداية زواجنا الين تحملين وبعدها ترجعين لهلك ويصير الي يربطني فيك هو الطفل وبس...


إنصدمت جواهر
(هذا غبي ولا يستغبي من صدقة يبيني أتزوجة صحيح إنة جمال ومال ومنصب بس أنا وين وهو وين) قالت:
-إنت وش قاعد تقول؟


قال ببرود وهو يرجع يسند ظهرة:
-إلي سمعتية... وإذا ماعجبك شرطي تقدرين ترفضين


جواهر:
(لااااا.هذا أكيد ماعندة مشاعر يبيني أوافق واتزوجة وإذا حملت أعطية ولدي. صحيح إني عشت معة تحت سقف واحد بس ماعمري فكرت بهذا الشي)

قالت:
-لية أنا باالذات؟ كثر الله البنات.


قال وهو يتمني إنها توافق:
-لو إنك ماجيتي هنا ماكان طلبت منك الزواج.


سكتت ونزلت راسها:
-طيب فرضا لو رفضت أتزوجك وبغيت أروح لهلي وش بتقول؟


قال:
-ماراح أغصبك على شي ماتبينة


قالت:
-طيب أنا ماأبي أتزوج بس بترجعني لهلي؟

عقد حجاجة وضاق صدرة:
-صحيح إني أول مرة أطلب يد وحدة لزواج بس إستغربت إنك ترفضيني لأن أغلب البنات هن الي يطلبوني أتزوجهن... بس على العموم برجعك لهلك لكن أبيك تفكرين أكثر وماتجاوبيني الحين


حست بشعور غريب من جوابة ماتدري هل إنهم بيتفرقون أو إنها بترتاح منة هزت راسها:
-طيب أنا بفكر بس أتوقع إن جوابي مهوب متغير


كانت بتطلع بس ناداها:
-جواهر؟

إلتفتت علية:
-نعم


قال وهو يتنهد بعصبية:
-عندك هناك في القرية جوال؟


قالت وهي مستغربة من سؤالة:
-لا......عندنا هناك عيب على البنت تشتري جوال وهي ماتزوجت

هز فيصل راسة وسكت وصد عنها

أما جواهر طلعت ودخلت غرفتها جلست على سريرها تفكر
(أعوذ باالله من الشيطان أنا لية أفكر فية المفروض إني أستانس لما رفضتة)


إنسدحت على سريرها تفكر
سمعت دق على الباب بعدين دخلت الخدامة ومعها صينية عليها أطباق الغدا

عرفت جواهر إنة معطيها وقت وحب إنها تختلي بنفسها عشان تفكر


وماحب يظغط عليها تتغدا معاه













‏####
في المستشفى
‏
نورة وبناتها الثنتين داخلين على ناصر الي كان جالس على سريرة وباين في ملامحة العافية

‏
ركضت لة سارة واستولت على حضنة طبعا مع شوية دموع وجلست عن يمينة


ومثلها مشاعل الي جلست عن يسارة

قال وهو مبتسم:
-مين جابتسن(جابكن)؟


سارة:
-عمي فارس


نورة واقفة عند الباب كانت طوال الوقت قلقانة علية بس أول مادخلت مع الباب وشافتة طيب وبخير حست باالراحة بعد ماكانت متوترة
قال ناصر:
-تعالي يأم مشاعل وش فيتس واقفتن عند الباب؟


تقدمت تمشي وجلست قدامة والعبرة خانقتها وهي ماسكة يدة:
-الله يخليك لنا ولا يحرمنا من شوفتك
‏

إبتسم ناصر:
-ويخليكم لي يأم مشاعل أنا بدونكم مسوى ولا حاجة
‏

بكت نورة:
-لماقال لي فارس إنك باالمستشفى خفت إني أفقدك جعلني ماأفقدك
‏

ناصر:
-فديتتس بس لو ربي يرد لي جواهر كان أرتحت
‏



مسحت مشاعل دموعها الي إنهمرت لأنها تأثرت بدموع أمها وقالت وهي مبتسمة:
-يبة جواهر كلمت أمي وتقول إنها طيبة وجاية قريب


فتح ناصر فمة من الفرحة وماقدر ينطق بكلمة
أخيرا قال:
-صدق؟ جواهر كلمت؟


سارة:
-والله صدق


ناصر وهو متقطع من الوناسة:
الله يبشركم باالخير... وماقالت لتس كيف ضاعت؟


نورة:
-ماوضحت لي ومافهمت كل الي فهمتة إنها كانت ضايعة ولقاها واحد وساعدها


ناصر:
-ولية ماجابها لنا؟


نورة:
-أقولك مافهمت شي بس أهم شي تطمنت إنها بخير


هز ناصر راسة يحاول يخفي دمعتة الي خانتة:
-صحيح أهم شي إنها بخير












####‏#
في العصر بعدما صلت جواهر
لبست شيلتها وطلعت من غرفتها عشان تسلي نفسها
أول ماطلعت صادفت فيصل وهو يمشي بتجاهها مستعجل وحجاجة مازال عاقد وكأنة شايل هموم الدنيا على ظهرة:
-مشغولة ولا فاضية؟


رفعت حجاجها وردت:
-مافية شي يشغلني


لف نظرة عنها وقال بدون نفس:
-جيتك بنفسي عشان تفهمين علي ولا لو إني أرسلت الخدم كان مرت علينا سنتين ومافهمتي


حطت جواهر يدها على خصرها وقالت وهي عاقدة حجاجها:
-وش شايفني غبية؟


إبتسم غصبا عنة من شكلها وحركتها وقال:
-لاااااا محشومة يابنت الناس.

جواهر:
-طيب وش بغيت؟


رجع فيصل خطوة لورى مستغرب من كلمتها وعقد حجاجة مرة ثانية:
-إنتي متى بتتأدبين وتعرفين تتكلمين بحترام؟


إنحرجت جواهر وسكتت
كمل وقال:
-إسمعي بعد دقايق بيجون هنا عيال عمي أنا علمتك عشان تاخذين حذرك لأنهم إذا جو مايخلون مكان في القصر
إلا ودخلوة وهذا شي أكيد لأن البيت بيتهم... إسمعي أبيك تروحين لجناحي لين مايروحون عيال العم


ردت جواهر:
-أيش؟ تبيني أدخل جناحك؟


قال:
-وش فية جناحي؟ على الأقل تجلسين فية أفضل من إنهم يدخلون عليك في غرفتك...... ولاتنسين إن غرفتك قريبة من الباب الخارجي بعكس جناحي الي بأقصى القصر


ردت جواهر وهي باين عليها الملل:
-طيب متى هم بيجون؟


طالع فيصل في ساعتة وقال:
-خلاص أتوقع الحين إنهم عند الباب... يالله إدخلي الجناح


جواهر:
-طيب إنشالله


مشت جواهر وتبعها
وقفت عند باب جناحة
وقف قدامها وهو يفتح لها الباب وقال بدون نفس:
-إدخلي والله العظيم مهوب ماكلك جناحي.


صدت عنة ودخلت
شافت الفخامة في كل شي كانت قدامها الصالة الكبيرة بألوانها العنابي والذهبي وقفت دقايق تطالع فيها وهي مفهية؛

قال فيصل لها:
-خلي التأمل لبعدين.. وانتبهي لحد يدخل عليك..


التفتت علية:
-هاه؛؛؛ طيب

سكر الباب وطلع
أول مادخل المجلس شاف عيال عمة الثلاثة عبدالله وبندر ونايف









####
جواهر في جناح فيصل
كل شي قدامها ياخذ العقل


إنتبهت إن أغلب الصور المعلقة للصقور بأنواعها

جواهر:
(شكلة يحب القنص
آآآآآه ودي أشوفةوهو يقنص)


فتحت أحد الأبواب الموجودة
شافت غرفة نوم كبيرة ووسيعة لونها بني وبيج يتوسطها سرير يكفي عايلة كاملة

دخلتها وشافت على الكومدينو عطورات فاخرة وعدة أشياء ظرورية


أخذت واحد من العطورات وشمتة
(آآه يدوخ هذا أتوقع إلي تعطر بة يوم نروح السوق؛؛؛لو كان عندي أخو ماشترى هاالعطورات الغالية)
‏

فتحت درج الكومدينو شافت ساعة فخمة وغالية مرمية بإهمال في الدرج ومعها عدة
أوراق وميداليات مرميات بنفس الأهمال


كانت جواهر بتسكر الدرج بس لمحت شي مكتوب في بطن الساعة


المفروض إن جواهر ماتعبث في ممتلكات الغير؛؛؛ بس ذبحها الفضول


أخذت الساعة وقرت
[إلى فوفو حبيبي منA‏]


حست جواهر بشي غريب تحرك في مشاعرها هل هي تغار أو تستحقرة


جواهر وهي تبتسم بس مو من قلب:
-وين الي قبل شوي خاطبني؟ ولا أنا ضحية جديدة لة؟


ردت الساعة مكانها وسكرت الدرج بعصبية

طلعت وراحت لصالة شغلت شاشة البلازما الضخمة

وجلست على كنبة عريضة تطالع التلفزيون

بس تفكيرها مع فيصل
[وش فية علي يكلمني من دون نفس؟
يمكن لأني كسرت كبريائة........بس ماأدري لية أنا أفكاري متضاربة أبية وماأبية
يارب ساعدني]
















###‏#
في بيت فارس
‏
فاطمة وحصة يتقهوون قالت حصة:
-وش أخبار دوامتس اليوم؟
‏

فاطمة:
-مثل كل يوم مافية شي جديد
‏

حصة:
-والي تقولين عنها إنها أختتس ماساعدتس؟
‏

فاطمة:
-مين قصدتس مشاعل؟ ماقصرت من الصبح وأنا وياها نتساعد خصوصا الحين فصل أول متوسط أشغب فصل في المدرسة باالرغم من إنهم خمس طالبات بس


حصة:
-أشتكن عليهن عند أهلهن


فاطمة:
-ماخلينا شي ماسويناة بس ماش مايفيد......... يوووة ذكرتيني يمة
‏

حصة:
-بأيش ذكرتس؟
‏

فاطمة:
-متواعدة أنا وبنات عمي إني أجيهم في بيتهم بعد مايرجعون من زيارة أبوهم


حصة:
-لا منتي برايحة
‏

فاطمة بقهر:
-لية يمة؟
‏

حصة:
-بس لأني ماأبيكم تختلطون ببنات ناصر


فاطمة:
-يمة أنا......


قاطعتها حصة:
-أنا قلت لا يعني لا


دخل عليهن عبدالرحمن ووراة فهد


قال عبدالرحمن:
-وش فيكم؟


وقفت لة فاطمة وهي تبكي:
-أنا أبي أروح لبيت عمي ناصر وأمي عيت (رفضت) كذا بتفشلني أمي عندهن لأني متواعدة معهن


مسح عبدالرحمن على راسها وقال:
-بس؟ هذا الي مزعلتس روحي إلبسي عباتس وروحي لبيت عمي


كانت فاطمة بتمشي بس وقفها كلام أمها
حصة:
-عبدالرحمن أنا عييت عليها


عبدالرحمن وهو يوجة كلامة لفاطمة:
-روحي إلبسي عباتتس وأنا بتفاهم مع الوالدة

راحت فاطمة تلبس عباتها مثل ماقال لها سعود


كمل سعود كلامة:
-لية تمنعينها من إنها تروح لبيت عمها؟


حصة:
-ماأبيها تختلط في بنات عمها


عبدالرحمن بعصبية:
-وش الي ينقصهن بنات العم؟


حصة:
-ينقصهن كثير


طلعت فاطمة وهي لابسة عباتها وجاهزة


هزعبدالرحمن راسة وقال لفاطمة:
-روحي يافاطمة الله يستر عليتس


طلعت فاطمة

أما فهد قال:
-لية كذا تكسر كلمة أمي يا عبدالرحمن


عبدالرحمن:
-أنت كلمة توديك وكلمة تجيبك خلك على راي ثابت أتوقع لو أمي تقول لك لاتتزوج سارة كان ماتزوجتها


قال فهد وهو منكس راسة:
-أمي أدرى بمصلحتي


ولع عبدالرحمن نار من القهر:
-وش سالفتك؟ أنت أدرى بمصلحتك أكثر من غيرك...... أنا شكلي بنجن عندكم خلوني بس أطلع










#####‏#
في المجلس قاعد فيصل يتوسط عيال عمة


[عبدالله: ولد عم فيصل الكبير(محمد)؛؛؛ عمرة35 سنة؛؛ متزوج وعندة 7 ؛؛؛ ثلاث بنات وإربعة أولاد.؛؛ يسمونة أبوسلطان نسبة الى ولدة الكبير...
هوايتة: البر والقنص.



بندر: ولد عم فيصل الثاني (فهد)؛؛؛ عمرة32
متزوج وعندة 5 ؛؛؛ ثلاثة أولاد وبنتين يسمونة أبو فهد نسبة الى أبوة وأكبر أولادة؛؛؛
هوايتة: السفر
‏


نايف:ولد عم فيصل وأخو بندر عمرة30 سنة عزوبي وقدوتة في الحياة فيصل ومتى ماتزوج فيصل هو تزوج يسمونة أبوخالد نسبة الى إسم أحد أقرب أصدقائة الي توفى بحادث
هوايتة: الفروسية]


قال عبدالله أبوسلطان:
-ياأبو نواف؟


[المقصود فيصل يسمى أبونواف نسبة ألى أبوة]
إلتفت فيصل علية وأفكارة مسافرة لبعيد:
-هلا ياأبوسلطان.


قال أبو سلطان:
-تذكر آخر قصيدة قلتها لنا؟


فيصل تنهد عشان يزيل شوي من همومة:
-إية أذكرها... لها سنة.


أبوسلطان:
-إقصدها لنا... تراني أحب الشعر.


فيصل:
-وهذا شي واضح ياأبو سلطان لأن الي يحب البر يحب الشعر


إلتفت فيصل علا المقهوي الي جاي بتجاهة ويمد لة فنجال القهوة قال المقهوي:
-سم طال عمرك

أخذ فيصل الفنجال وقال وهو يبتسم:
-سم الله عدوك ياطلال ......عشت

إبتسم طلال
قال نايف:
-إشعر لنا يابونواف ولاتتهرب من الموضوع.


ضحك فيصل وزالت عقدة حجاجة:
-هههههههههههههههه ولية أتهرب يابوخالد إنت خابرني ماعلي من أحد.


قال بندر:
-بتقول القصيدة ولاشلون؟

إبتسم فيصل:
-أشوف صار فيها تهديد؟ على العموم لكم الي تبون....

بدا يقصد القصيدة وجواهر تطري في بالة وكأن الزمن أجبرة على كتابة القصيدة لهذي اللحظة


لاتجامل باالغلا قلبي

تجبر أحساسك علا حبي

الصراحة ياالغلا راحة

قول لو ماودك بقربي

أنت لك حالك ولي حالي

ووعدك ماينشغل بالي

لو نويت الصد والفرقا

يعوض الله غيرك بغالي

مانت أخر شخص في الدنيا

ولانت أول شخص يجرحنا

في المحبة يا بعد روحي

كم شقينا كم تعذبنا

بس علم قلبك القاسي

للخلايق ماانحنى راسي

الصراحة ياالغلا راحة

قول لو ماودك بقربي




-وسلامتكم

الكل:
-سلمت ودمت


نايف:
-من زمان عن جلسة القصيد ليتها تعود.


فيصل:
-يوم من الأيام أصير فية فاضي وأعزمكم في النايفة إنشالله
[النايفة: إسم لمزرعة فيصل سماها أبوة بهذا الإسم]


بندر:
-إنشالله


عبدالله:
-وش رايك تروح معنا لرحلة قنص؟


فيصل:
-ومتى ها الرحلة؟


عبدالله:
-متى ماكتب ربي وإحنا نويناها قريب


فيصل:
-يصير خير

قال نايف:
-وين فيصل الي حياتة البر...يحب القنص و الحصن والإبل والشعر وين راح كل هذا؟ بالله متى آخر قصيدة كتبتها؟


فيصل وهو مبتسم:
-من سنة... بس وأنا أخوك أيام قبل مهيب مثل الحين... الحين كبرنا وزادت أشغالنا الله لايشغلنا إلا بطاعتة


بندر:
-خلونا من سالفة البر وقولولة على الأقل يسافر


فيصل وهو يضحك:
-ههههههههه الحين يبوني أروح للقنص ورفضت بسبب الشغل
تبيني أنت أسافر؟


بندر:
-وش فية السفر يخليك تغير جو.


فيصل:
-شغلي أهم عندي من السفر.......ومتى ماتزوجت سافرت.


عبدالله:
-إلا مهوب كنك مصختها يابونواف وماتزوجت؟


فيصل وشكل جواهر يرجع في بالة هز راسة بعصبية:
-مهوب الحين


بندر:
-متى؟ تبي لين يخط الشيب في راسك؟

فيصل:
-القصد مهوب كذا يابوفهد...


بندر:
-أجل وش السبب؟


فيصل:
-مالقيت الي تناسبني والي توافقني بتفكيري ولاتنسى يابو فهد إن أغلب وقتي أشغال والي أبي أتزوجها أبغاها تعرف هذي النقطة


أبوسلطان:
-بنات عمانك وخوالك كثار وكل وحدة تستاهلك يابو نواف


فيصل عبس بملامح وجهة لأن مايبي يتزوج غير جواهر:
-بنات خوالي وعماني فيهن خير وبركة بس حاليا خلوني عزوبي أحسن لي


نايف بأبتسامة:
-متى مافكرت تتزوج يابونواف علمني عشان أفكر بعدك

الكل:
-ههههههههههههههههههههه


ابوسلطان:
-إنت أبيك تعرس وقريب بعد....... ولاتتعذر مثل أبونواف في الشغل لان أغلب وقتك كلة في الحصن والفروسية


نايف وهو يضرب فخذ فيصل:
-أنا علمتكم مانيب معرس إلا إذا تزوج أبونواف... وبعدين أهرب من الوالد والوالدة عشان سالفة الزواج وتلحقوني بها هنا؟


فيصل كاالعادة يغير الموضوع إذا ماعجبة:
-تعرفون قرية الأحباب؟


الكل
-إية


فيصل:
-كيف أحوال أهلها؟ بصراحة أنا مريت عليها بس ماخالطت أهلها


ابوسلطان:
-ناس طيبين وأجواد وفيهم خير


فيصل وهو رافع حجاجة:
-كيف طبعهم؟


ابوسلطان وهو ياخذ من أصناف الحلا الي قدامة:
-تعجبك عاداتهم وتقاليدهم
رجاجيلهم إرجال بمعنى الكلمة
وبناتهم حشمة وحيا وأخلاق


فكر فيصل بجواهر
(ياناس لية أفكر فيها؟
خلاص البنت رفضتني بس حتى ماراح أتنازل عن شي أنا أبية)

إنتبة فيصل لدخول النادل الي ناداهم للعشا

وقف فيصل وقال:
-تفضلو على العشاء.... أنا عندي شغلة بسويها وأجيكم
‏
‏
طبعا عيال عمة راحو لغرفة الطعام الي يعرفونها بما إن جيتهم هذي مهيب الأولى
‏
‏

أمافيصل دق زر في جهاز قريب من غرفة الطعام وطلب من الخدم يرسلون عشا لجواهر
‏

طبعا القصر مليان خدامات من مختلف الجنسيات أما مجلس الرجاجيل والمقلط والأجزاء الخارجية فيدخلونها النوادل والبوديغاردات والسواقين عدا الأجزاء الداخلية لأن فيها الخدامات












##‏##
في بيت مطلق
‏
وضحى وهي توجة كلامها لمنصور:
-يمة منصور فديتك حاول في أخوك محمد إنة يتزوج


منصور:
-حاولت يمة والله حاولت بس هو رافض


وضحى:
-صحيح أنك الصغير وإنشالله لما ترجع جواهر بتتزوج أنت فاطمة بس أخوك هذا الي أكبر منك قاهرني


منصور:
-لو ودي كان ماملكت على فاطمة بس أبوي الله يهداة لما حاول في محمد إنة ياخذها والأخ رفض طحت أنا فيها


وضحى:
-أفاااا ياولدي زعلتني منك


منصور:
-هذي هي الحقيقة المشكلة إن أبوي خيرني بين فاطمة أو صيتة بنت إختتس


وضحى:
-وخترت أنت فاطمة.


منصور:
-أكيد فاطمة أفضل من صيتة بواجد


وضحى:
-والحين بتحاول في أخوك ولاشلون؟


منصور:
-بحاول وأمري لله


دخل محمد عليهم:
-السلام


الإثنين:
-وعليكم السلام


إبتسم محمد بستهزاء:
-ماجلستو هذي الجلسة إلا عشان تتباحثون في كيفية إني أقبل الزواج صح؟


منصور:
-صح....... وش الي يمنعك لاتتزوج؟ رجال ومتوظف وكل بنات الديرة يتمنون واحد مثلك


عبس محمد بملامح وجهة التعبانة وقال:
-طلبتك لاتفتح السالفة هذي معي مرة ثانية...... أنا تعبان وبروح أنسدح


ودخل غرفتة












######‏#
بعدما ودع فيصل عيال عمة الثلاثة
تذكر جواهر
(آووووة نسيت جواهر في جناحي
خلني أروح لها قبل تنجن علي ثم من يسكتها)



راح لجناحة وفتح الباب شاف الصالة فاضية وهادية


فتح باب غرفة الجلوس وشاف شي بعمرة ماخطر ببالة


جواهر نايمة علا الكنب على جهتها اليمنى وجهها لشاشة التلفزيون

وقف قدامها وهو يفكر:
(آآه ياجواهر لوإنك حلالي كان شلتك ووديتك في غرفتك أو على الأقل تلمس أصابعي ملامح وجهك)


جلس على ركبتة قدامها وهو يتأمل براءة وجهها وطريقت نومها العفوية


إلتفت لشاشة التلفزيون المشغلة أخذ الريمونت وطفى التلفزيون


وقف ودخل غرفت النوم وأخذ غطى مفرش سريرة
تقدم من جواهر وغطاها ب غطى المفرش


وقف دقايق يتأملها بعدين دخل غرفتة ينام
















######‏#
سمعت جواهر صوت المؤذن لصلاة الفجر وهي مازالت مغمضة عيونها حست كأنها في قالب من ثلج وإرتجاف جسدها يزيد
والجو بارد من دون مكيف
‏

شمت ريحة مهيب غريبة عليها
ريحة عطر رجالي فاخر يتغلغل في أنفاسها


فزت جواهر جالسة وتذكرت إنها مازالت في جناح فيصل
فتحت عيونها وهي تشوف غطا مفرش سريرة عليها

فكرت:
(ياويلي أثاريني نمت بدون لدري... وش ها الغباء أنام في جناح رجال غريب... الحين وش بيقول إذا شافني نايمة في جناحة؟ أكيد إستحى وراح ينام في مكان ثاني...... خلني أروح أرد الغطى على سريرة)


قامت جواهر وتعوذت من إبليس
وبكل ثقة فتحت باب غرفت نوم فيصل


إنصدمت باالي شافتة قدامها هذا الي ماكانت متوقعتة


شافت فيصل نايم على سريرة ولابس بنطلون بجامة كحلية بدون قميص وصدرة عاري نايم على ظهرة ويدةاليمنى ممدودة واليسرى فوق عيونة

أخرس جواهر المنظر
‏

أما فيصل حس بحركة عند الباب
هو كان سامع الآذان وبيقوم بس مغمض عيونة
لكن لماسمع صوت إنفتاح الباب فتح عيونة وإنصدم هو الثاني بشوفة جواهر قدامة قال بستغراب:
-جواهر؟


إنقلب وجة جواهر لعدة ألوان
سكرت الباب بسرعة ورمت الغطى عند الباب بدون شعور
وهربت لغرفتها

فيصل لبس قميصة بسرعة وطلع من غرفتة يدورها
بس لماشاف الغطا طايح عند باب غرفتة
إبتسم وأخذ الغطا ورجعة على السرير ثم دخل الحمام يتوضى



أما جواهر ماعاد لها وجة تقابل فيصل
قعدت على سريرها وهي تسب نفسها على غبائها وتهورها
وقفت تدخل الحمام عشان تتوضى وتصلي وتستغفر ربها













#####‏#
جواهر لمدة يومين ماالتقت بفيصل
عشاها وغداها يوصل لحدها
وأصلا من بعد الموقف ماقدرت تقابلة وتحط عينها بعينة


حاليا جواهر بحالة عذر شرعي يعني ماتصلي

هي صحيح تورطت لأن ماعندها المستلزم الشخصي


بس في النهاية إستفادت من وجود الخدامات لأنها لقت عندهن المستلزم الشخصي الي كانت تبحث عنة


اليوم جواهر تعبانة نفسيا وجسديا وهذا شي طبيعي
‏

طبعا بعد الفطور المعتاد ولكن ها المرة معة حليب باالقرفة لأن جواهر تفضل شرب القرفة بهذي الطريقة بس للأسف جواهر ماأفطرت وكتفت بشرب الحليب
‏

كانت لابسة ثوب سميك لأن الشتى بدأ عندهم لونة مموج باالأزرق والسماوي


دخلت الخدامة الروسية عليها وهي تحاول تفهم جواهر بلغة إنجليزية

أخيرا فهمت جواهر إن الخدامة تقصد إن فيصل يناديها
‏
طبعا جواهر ماكان لها خلق علية
بس لبست شيلتها على راسها وطلعت.......

يعطيك العافيه
روايه رائعه خيالييه الى حد ما ولكن هذا ما يميزها ويجعلنا نسمتع بقرءتها وان اكون من متابعيك ويشرفني ذلك
باتتظارك يالغلا
الف عافيه