**الفصل الثلاثون***







في بيت منصور

صحت مها من النوم وهي تسمع تأوهات وصوت أحد يتألم

جلست على السرير وطالعت في الساعة شافت إنها 1

قامت وفتحت الباب بشويش شافت فاطمة تمشي في الصالة والتعب باين عليها

مها:
-فاطمة وش فيتس؟

فاطمة بصوت كلة تعب:
-شكلي بولد

مها:
-والله؟ قومي خلينا نروح المستشفى

فاطمة:
-أمي تقول لي إمشي قبل لتروحين المستشفى

مها:
-إنتي كلمتي أمتس؟

فاطمة:
-إية توني الحين مسكرة منها

تقدمت لها مها ومسكتها وصارت تمشي هي وياها
إلين قالت فاطمة بتألم:
-خلاص مانيب قادرة أستحمل بنادي منصور يوديني

مها:
-وأنا بلبس عباتي بروح معتس

دخلت فاطمة على منصور ونادتة:
-منصور قوم

منصور يتقلب على السرير:
-هاه خليني أبي أنام

فاطمة:
-منصور قوم أنا بولد

فز منصور جالس:
-هاة وش قلتي؟

فاطمة:
-ودني المستشفى خلاص مانيب قادرة أستحمل

وقف منصور:
-يالله يالله مشينا

ركب منصور السيارة أما مها ساعدت فاطمة بركوب السيارة وركبت هي في السيت الخلفي

وصلو المستشفى وجلسو فاطمة على كرسي متحرك حتى دخلوها غرفة الكشف ومن هذي الغرفة الى غرفة الولادة

في كل ثانية ودقيقة يدعي منصور ومها لفاطمة

المستشفى هذا هو نفسة الي محمد فية كانت أمنية مها إنها تروح لة بس هذا الوقت ماهوب وقت زيارة

قطع على مها حبل أفكارها طلوع الدكتورة المبتسمة

منصور:
-هاه يادكتورة بشري؟

الدكتورة:
-إنت قوزها(جوزها=زوجها)؟

منصور:
-إية

الدكتورة:
-مبروك قت(جت) لك بنت زي الأمر(القمر)

منصور بفرحة:
-بنت؟ أنا جتلي بنت؟ الحمدلله مشكورة يادكتورة

الدكتورة:
-الشكر لله

مها:
-مبروك يامنصور

منصور:
-الله يبارك بعمرتس

مها:
-خلاص الحين فاطمة بأمانتهم إنت روح لبيتك وإرتاح وأنا ودني لبيتي

منصور:
-يالله إمشي..... بدق على أهلها وهلي وأبشرهم







‏##
في اليوم التالي

كان ناصر في خيمتة في البر يسوي قهوتة وشاهية

وقفت عندة سيارة فارس الي نزل منها

فارس:
-سلام

ناصر:
-هلا حياك الله إقلط

فارس وهو يجلس بجنبة:
-الله يحييك

ناصر:
-على البركة ماجاكم

فارس:
-الله يبارك بعمرك

ناصر:
-هي جابت بنت؟

فارس:
-إية والله

ناصر:
-ماشالله تبارك الرحمن تتربى في عز أهلها

صب ناصرالقهوة في فنجال فارس

فارس:
-وش الموضوع الي مناديني علية؟

ناصر بعد صمت طويل قال:
-سارة إنخطبت

فارس الكلمة عجزت لتطلع من فمة:
-إن...إنخطبت؟

ناصر:
-إية خطبها نايف ولد عم فيصل وبيجون يوم الأربعاء عشان يشوفون وش قررت البنت علية

فارس:
-البنت درت؟

ناصر:
-أنا قلت لأمها وهي بتقول لها

فارس:
-وش السواه الحين مع فهد؟ الولدمتعلق فيها ودايم يسألني عنها

ناصر:
-وأنا بصراحة أبيها لفهد مابيها لغيرة

فارس:
-إذا ماوافقت على نايف زوجناها فهد وإذا وافقت وش بنسوي ماراح نغصبها على شي ماتبية

ناصر:
-هذا الي أنا خايف منة خوفي إنها توافق

دق جوال فارس

شاف فارس إسم فهد في شاشة الجوال

فارس:
-وكأنة حاس

فارس:
-الو

فهد:
-السلام

فارس:
-وعليكم السلام هلا يابوي

فهد:
-هلابك وشلونك؟

فارس:
-بخير أنت وشلونك؟

فهد:
-تمام الحمدلله

فارس:
-هاه متى ناويين تجون؟

فهد:
-يوم الإثنين إنشالله

فارس كان ودة يقول لة عن سارة بس ماقدر:
-إنشالله..... الله يوصلكم لديرتكم وأهلكم سالمين غانمين

فهد:
-آمين يالله سلملي على من تواجة

فارس:
-أبشر يابوي الله يحفظك

فهد:
-مع السلامة

فارس:
-هلا والله







‏##
في اليل الساعة11

فزت أم سعيد من النوم والتفتت شافت أبوسعيد مانام

ابوسعيد:
-بسم الله عليتس وش فيتس؟

أم سعيد:
-حلمت حلم أعوذ بالله من الشيطان

أبوسعيد:
-إنفثي عن يسارتس وغيري جهت نومتس

سوت أم سعيد مثل ماقال لها زوجها ثم سالت دمعتها لاشعوريا على خدها:
-ياسعيد وينك الحين؟

صد عنها أبوسعيد لأنة مايبي يشوف دمعتها وقال في نفسة:
(لوتدرين يأم سعيد بإنة يجي بين كل فترة وفترة عند باب بيتنا وش كان سويتي؟ والله إن ذيك العيون مانسيتها ولادقيقة وأنا عارف إنة ولدي سعيد بس هو الي يتهرب مننا ولا يبينا وأنا أدري إن معة عصابة وإنة رأيسهم والشرطة والمباحث تدور علية بس وش أقول؟ ماباليد حيلة)







‏##
كان فيصل نايم وفي عز نومة صحى على نغمة جوالة

شغل نور الأبجورة وجلس وهو يتأفف فتح الجوال:
-الو هلا فالح

فالح:
-السلام

فيصل:
-وعليكم السلام

فالح:
-أبشرك

فيصل:
-بأيش؟

فالح:
-لقينا العصابة في شقة من الشقق وصار تبادل إطلاق نار بينها وبين الشرطة وقضينا على كل أفراد العصابة

فتح فيصل عيونة وصحصح:
-صدق؟ قول والله؟

فالح:
-والله

فيصل:
-وتعرفتو على الجثث؟

فالح:
-لا ماقدرنا لأن البيت إحترق وحترقت معة الجثث بس على كل حال أظمن لك عدم نجاتهم

فيصل:
-بعدي..... كثر الله من أمثالكم و جزاكم الف خير

فالح:
-وياك..... يالله تبي شي؟

فيصل:
-سلامتك

فالح:
-فمان الله

فيصل:
-هلا والله

رد فيصل جوالة على الكومدينو وإبتسم:
-وينك عني ياجواهر ؟لو تدرين بهذا الخبر المفرح بس إنتي وين وأنا وين آه يعني لو أقول لك أني أحبك يمكن تلتفتين لي شوي ويمكن تحبيني ولوسعود الحين بين يديني كان ذبحتة عشان تهتمين فيني شوي







‏##
في المستشفى

دخلت مها على فاطمة

مها:
-سلاااااااام

فاطمة:
-وعليكم السلام أهلين كيف جيتي؟

جلست مها جنبها:
-كنت في بيتي ودق علي منصور عشان يجيبني للمستشفى أشوفتس .......إنتي وش لونتس الحين؟

فاطمة:
-الحمدلله بخير...... يامها جبت لي بنوتة أمورة تهبل

مها:
-ماشالله بيجيبونها لتس؟

فاطمة:
-إية بعد شوي

مها:
-هاه وش بتسمينها؟

فاطمة:
-نفسي في إسم شهد

مها:
-حلو إسم شهد المهم تتربى في عزكم

دق منصور الباب:
-أدخل؟

فاطمة:
-إدخل

منصور:
-سلام

الثنتين:
-وعليكم السلام

منصور:
-مها محمد جاي هنا للمستشفى ويبي يكلمتس

مها:
-طيب

وقفت وراحت تمشي حتى دخلت غرفة محمد

مها:
-مرحبا

محمد بإبتسامة:
-مرحبتين هلا

مها تجلس بجنبة:
-وشلونك؟

محمد:
-بخير من يوم شفتتس

مها:
-عاد خلاص أنا مليت ماقال لك الدكتور متى تطلع؟

محمد:
-بعد يومين بالكثير

مها:
-يومين واجد

محمد:
-إشتقتي لي؟

مها:
-أكيد وهذي ماتحتاج سؤال

محمد:
-وش أخبار ولدي؟

مها بإبتسامة:
-كلنا بخير الحمدلله

محمد:
-ودي أطلع بسرعة من المستشفى وأروح للبيت............

إنقلب وجة مها أحمر من كلامة وضحك محمد








‏##
في بيت ناصر

دخلت سارة على خواتها وهي تتأفف

طالعت مشاعل فيها ثم كملت:
-بصراحة ودي أزور فاطمة بس ماأقدر

جواهر:
-وش الي بيمنعتس؟

مشاعل:
-إذا قلت لهلي بزور فاطمة قالو خلي رجالتس يوديتس وأنا ماأطيق أشوفة أجل وشلون بروح معة لفاطمة؟

طالعت جواهر في سارة:
-سارونة وش فيتس؟

سارة:
-إنخطبت

الثنتين:
-والله؟

مشاعل:
-ومين هو؟

سارة:
-نايف ولد عم فيصل

جواهر:
-نايف؟ غريبة؟ وش عندة الأخ؟ قال لي فيصل إنة كان شايل فكرة الزواج من راسة مرة وحدة

سارة:
-أنا ماأبية

مشاعل:
-أجل مين تبين؟

سارة:
-ماأبي أحد صحيح إنة حلو ومزيون بس ماأبية

جواهر:
-ليكون في بالتس ولد حصيصوة تبينة؟

سارة:
-طيب أنتو وش تبون؟ تبوني آخذ نايف؟

مشاعل:
-إية نايف أفضل لتس من عيال حصة..... الأخ غني وماعلية قاصر

سكتت سارة

جواهر:
-وش قلتي؟

سارة:
-أبي أفكر

سارة بالأصل ماتبي تفكر بس عشان تسكتهم لأن في بالها واحد مستحيل تاخذ غيرة حتى لو صارت عانس وحتى لو تزوج غيرها ماراح تاخذ غير فهد

مشاعل:
-معتس كل الوقت تفكرين

قامت سارة بعد ماحست بالضيقة وشغلت التلفزيون وحطت على قناة قرآنية

وبعد دقايق إنتبهت سارة إن مشاعل بدت ترتعش وقالت بعصبية:
-سارة طفي التلفزيون

سارة:
-لية حرام إسمعي القرآن

مشاعل وهي توقف:
-إذا ماطفيتية أنا أطفية

وكانت بتروح لتلفزيون بس سارة منعتها

مشاعل صار جسمها يرتجف:
-وخري عني خليني أطفية

سارة:
-مشاعل وش صابتس هذا قرآن

صرخت مشاعل وحطت أصابعها في أذنيها عشان ماتسمع ثم طاحت على الأرض مغمى عليها

عم الهدوء في الغرفة يخترقة تلاوة حسنة لآيات القرآن

طالعت سارة في جواهر المصدومة ثم ركضت تنادي أمها

جلست جواهر عند مشاعل:
-مشاعل وش فيتس؟ قومي

جت نورة مستغربة:
-وش فيكم؟

سارة:
-صارخت ثم أغمى عليها

فتحت مشاعل عيونها بثقل وقالت:
-وش فيكم؟

إنصدمو الثلاثة:
-إنتي الي وش فيتس؟

جلست مشاعل:
-حسيت بحرارة في جسمي وبعدها مدري وش صار

نورة:
-ياخوفي صايبتس عين

جواهر:
-يمة حالتها قبل شوي ماهيب طبيعية

نورة:
-قومي ياسارة وجيبي عباية إختس بوديها المستشفى

مشاعل:
-ولية توديني أنا مافيني شي

نورة:
-قومي يمكن الولد فية شي







‏##
كان أبوسعيد جالس عند التلفزيون يتابع الأخبار

فجأة

سمع خبر يقول
(لقد تم البارحة تبادل إطلاق نار بين الشرطة والعصابة المطلوبة أمنيا قتل على أثرها جميع أفراد العصابة مع رأيسهم ونشكر الجنود العسكرية على مافعلتة من الجهود المبذولة للمحافظة على سلامة المواطنين وسلامة الدولة بعد الله سبحانة وتعالى)

بكى أبوسعيد:
-رحت ياسعيد ؟وش إستفدت من دنياك؟ لاشفت هلك وفرحتهم فيك ولالقيت من هجرك لهم سعادة لو تدري أمك عنك وش كان سوت؟ بس بخبي خبر وفاتك عنها عشان مايتقطع قلبها عليك آآه ياسعيد آه فنيت وفنى معك شبابك

دخلت أم سعيد مبتسمة:
-وهذي هي الشاهي والقهوة

مسح أبوسعيد دموعة بطرف شماغة وطفى التلفزيون وقام

أم سعيد:
-وين رايح؟

أبوسعيد عشان ماتشوف دموعة:
-بروح أجيب لي حاجة من السيارة وبجي







‏##
في بيت ناصر

دخلت نورة على جواهر في الغرفة:
-جواهر أبوتس يبيتس في المجلس

جواهر:
-ماقال وش يبي؟

نورة:
-روحي لة وشوفي وش عندة
قامت جواهر ودخلت المجلس بإبتسامة:
-هلا يب........

قطعت كلامها لأنها شافت إن أبوها معة أحد وإنصدمت لما شافت إنة فيصل

كانت بتطلع لكن وقفها صوت أبوها:
-جواهر إمشي تعالي تكلمي مع زوجتس

جواهر:
-مابيننا أي كلام

ناصر وهو يوقف:
-خلي عنتس الدلع وتعالي إجلسي رجالتس بيسافر اليلة ويبي يتكلم معتس قبل ليروح

طلع ناصر وسكر الباب وراة

إلتفتت على فيصل الي يطالعها بنظرات باردة

فيصل:
-تعالي إجلسي

جواهر:
-عاجبتني الوقفة كذا

وقف فيصل ومسك يدها وسحبها تجلس بجنبة وقال:
-خلي عنك حركات البزران وتكلمي مثل الكبار

سكت شوي ثم قال:
-أنا بسافر اليلة عبارة عن رحلة قنص و جاي عشان أتكلم معك كلمتين وبروح..... جواهر حنا تعبنا كل واحد من الطرفين عجز ليفهم الثاني والمشكلة مو في الفهم المشكلة في التكبر والعناد

جواهر:
-يعني وش المقصود؟

فيصل بإنكسار:
-يعني إذا إستمرينا مع بعض ماراح تتصلح الأمور صدقيني بتفسد...... يعني إذا إنتي ماتبيني أنا بأنسحب

جواهر غصت بريقها وماقدرت تبلعة ثم قالت:
-وبتروح تتزوج أفنان؟

فيصل:
-فهمتي الموضوع غلط هي تدق علي وأزعجتني حاولت أغير رقم الشريحة أكثر من مرة بس مازالت على إزعاجها

جواهر:
-طيب لية تقول لها أنا أحبك؟

فيصل يصر على أسنانة يحاول يتمالك نفسة من الغضب:
-جواهر أنا تعبت معاك ومن فهمك الغلط للموضوع إختصري المسافة إنتي تبيني ولا لا؟

جواهر:
‏-...........

فيصل يوقف والعصبية باينة على ملامحة:
-أنا بعطيك وقت تفكرين وأتمنى إن ردك يرضينا كلنا

وطلع

جلست جواهر وحدها في المجلس هي تحبة وتموت فية لكن كبريائها هو الي يمنعها ولا وش معنى كل ماسألتة إذا يحب أفنان يتهرب عن الموضوع؟ وهذا الي يحرق قلبها ولا البعد مافكرت فية







‏##
وصلو فهد وعلي لديرة وكلن راح لهلة

في بيت فارس وخصوصا في المجلس

ناصر:
-حيالله ولدي

فهد:
-الله يحييك ياعم

مطلق:
-صار فراغ في المكان لما رحت

فهد بإبتسامة:
-تسلم

إلتفت فهد على عبدالرحمن:
-وش فيك؟

عبدالرحمن وهو متضايق:
-مافيني إلا العافية فرحان بشوفتك

بعد السوالف والضحك تعشو الرياجيل ثم كلن راح لبيتة








‏##
فيصل يركب الطيارة الخاصة مع ولد عمة أبوسلطان وبندر وبعض أصدقاهم هم طبعا قالو لنايف بس رفض بحجة إنة يوم الأربعاء بيروح مع أبوة يخطب

حس فيصل إن قلبة تقطع مليون قطعة لأنة قسى على جواهر بس غصب عنة لأن حياتهم صارت ماتنطاق شخصين يعيشون مع بعض والتفاهم منعدم بينهم وشلون بيكونون عايلة؟

أبوسلطان:
-وين سارح فكرك يابونواف؟

فيصل:
-قريب ماراح لبعيد

أبوسلطان:
-زوجتك وين هي؟

فيصل:
-عند أهلها

أبوسلطان:
-مادامها عند أهلها أجل لاتحاتي

هز فيصل راسة ثم سكت







‏##
في بيت فارس

كان فهد سهران عند التلفزيون
دخلت علية حصة:
-مانمت؟

فهد:
-لا ماجاني نوم وإنتي لية مانمتي؟

حصة:
-نمت بس إني حسيت بالضمى(العطش) وكنت بروح أشرب ماي بس شفتك في وجهي وحبيت أسولف معك

فهد:
-حياتس الله

حصة:
-فهد ماودك أخطب لك

فهد عقد حجاجة:
-ماأبي حاليا أتزوج

حصة:
-لية ليكون تنتظر بنت نورة لين توافق عليك؟

فهد:
-أنا ماقلت هذا الكلام

حصة:
-أجل وش قلت؟ بس يكون في علمك إن بنت نورة إنخطبت وبتوافق

فهد بصدمة:
-أيش وش قلتي؟

حصة:
-الي سمعتة خطبها نايف ولد عم فيصل وأكيد بتوافق علية لأنة حسب ونسب ومن عايلة غنية

فهد صار صدرة يعلو ويهبط من هول الصدمة:
-شكلتس تمزحين علي؟

حصة:
-ولية أمزح؟ وعشان تصدقني يوم الأربعاء بيجون ويخطبونها

فهد:
-لا لا مانيب مصدق سارة لي ماهيب لغيري

حصة:
-هذا بس في إعتقادك

صد فهد عن أمة ودخل غرفتة







‏##
في بيت ناصر

كانت مشاعل تصيح من الألم

نورة:
-إمشي أوديتس المستشفى

مشاعل:
-ماني قادرة أمشي

نورة:
-هذي والله البلشة سارة جواهر قومن وساعدوها توقف

الثنتين:
-إنشالله

جاهم ناصر:
-وش فيكم؟

نورة:
-مشاعل شكلها بتولد وماتقدر توقف

ناصر:
-أنا بوقفها

ساعدها ناصر توقف ثم مشى هو وياها حتى وصلو السيارة وركبو فيها ثم راحو للمستشفى

مرت ساعات طويلة ومشاعل ماولدت في النهاية طلعت الدكتورة تقول بإستعجال:
-وين ولي أمرها زوجها أو أبوها أو أخوها؟

فز ناصر:
-أنا أبوها

الدكتورة:
-الحرمة حالتها خطيرة ولازم توقعون على أوراق العملية القيصرية

نورة:
-عملية قيصرية؟ لا دكتورة حرام عليتس

الدكتورة:
-حرام عليك إنتي إذا خليتها تتعذب أكثر..... إذا تبين الحرمة تعيش لازم توقعون على أوراق العملية

ناصر:
-خلاص يانورة أهم شي سلامة بنتنا ولا الولد غيرة ولد

راح ناصر مع الدكتورة

بعد دقايق شافت نورة من بعيد عبدالرحمن يمشي والقلق باين علية

إتجة عبدالرحمن لها:
-هاه عمة وش صار؟

نورة:
-الدكتورة تقول إن حالتها خطيرة ولازم يسوون لها عملية

إرتبك عبدالرحمن:
-وعمي وينة؟

نورة:
-راح يوقع أوراق العملية

عبدالرحمن:
-أنا بروح لة وبجي

بعد فترة غير طويلة جا ناصر وعبدالرحمن

نورة:
-وقعتو الأوراق؟

ناصر:
-إية وقعناها

جلسو الثلاثة على كراسي الإنتظار والثواني والدقايق تمر بسرعة

أخيرا طلعت الدكتورة:
-مبروك ولد

فز عبدالرحمن والضحكة تملى وجهة:
-صدق؟ أنا جاني ولد؟ ياعمي ولد

ناصر ونورة:
-مبروك

عبدالرحمن:
-الله يبارك بعمركم

إلتفت على الدكتورة:
-وش أخبار أمة؟

الدكتورة:
-الحمدلله صحتها كويسة

عبدالرحمن:
-الحمدلله على كل حال.........

.. يسلموووووووووووووو
على البارت
توقعت انو مشاعل..مسحورة
واكيد من ام عبدالرحمن
حرام عليها والله....
....ويارب يجيبون لها شيخ بعد ماولدت ويقرأ عليها
........
وبالنسبة لجواهر
هذي كلش ماتعجبني تصرفاتها
على طول هدت علية وشالت شلايلها وبتروح بيت اهلها
كاهو لما هي اكلت الحبوب من دون علمه
صدق مااعطاها فرصة تبرر مع انو كان ودها بفرصة
وهو شافها شوفة العين وهي تزط بهالحبوب
وهي شافته شوفة العين وهو يحاكي بالتلفون وسمعت غلط وفهمة غلط
اذا كبرت راسها هي اللي بتخسر فيصل

عواااااااااااااااااااااافي

السلام عليكم ورحمة الله وبركاته
يسلمو يدينك يالغلا
مشاعل اكيد مسحوره من ام عبدالرحمن سحر تفرقه عشان يطلقها
جواهر اتوقع تكون حامل
فهد ممكن يخطب قبل يجي نايف وابوه وساره توافق على نايف
كل التوفيق خيال حالمه

تسلمين فديتج عالبارت<< الفيس راعي الورود

البارت قبل الاخير<< فيس ما يحب هالطاري

فيصل وجواهر

بداية خيوط التفاهم.. فترة نقاهه لاعادة التفكير.. واعادة المياه لمجاريها

عبدالرحمن ومشاعل

سحر<< فيس كاشفنه حصة.. زين هلج حسو عليج.. ومبروووك ما ياكم<< فيس يبارك

سارة وفهد

دامج تبينه اشعنه هالمنكر اللي سويتيه<< فيس هاد عليها..اتوقع ان فهد يحجرها<< فيس يتوقع

مها ومحمد

الحمد لله على السلامة.. والله يقوم مها بالسلامه<< فيس راضي عن وضعهم

فاطمة ومنصور

الف مبروووك ما ياكم<< فيس مستانس على اسم بنتهم<< فيس يحب اسم شهد

نترياج فديتج<< الفيس راعي الورود