مبدعه دائما بنوتة

جواهر حييييل تقهر غلط كبيراللي سوتة بس ظرب فيصل لها قوووية صراحه مهما غلطت ماتستاهل هالضرب كلة هذا وهو يحبها اجل قهرووووني الاثنين
ــــــــــــــــــــ
سارة وفهد يارب من هالحال واردى ان شاء الله تتعلق فية وزود تستاهل
ــــــــــــــــــــــــ
محمد ومها شئ يقهر الظلم بس من جد عجبني مو قفها وعجبني احساسها لة وحتى وهي زعلانة
ــــــــــــــــــــ
حصه وش هذا الوجه الجديد النسواان ان كيدهن عظيم وش وراها الحية الرقطاء


يسلموووووبنوتة لاهنتي وعساك على القوة يارب
منتظرينك قلبوووو تقبلي مروري السرررريع
دمتي بودوالله يوفقك بأمتحانتك

رومنسية زمانها

الله يعطيك العافية ...........

بارت رائع صراحة حصة تبي تصطير ....


مها فرحت لها رجوع محمدلها...............


جواهر ييييييييييييييييييييييياحرام.......

السلام كيف الحال ياحبايبي اتمنى لكم قرائة ممتعة ونرحب بانظمام سينشي لنا
دمتن بود

**الفصل الخامس والعشرون**






كانت جواهر منسدحة على سريرها و أثار الضرب واضحة عليها مخلفة إنتفاخات وإحمرار في وجهها وجسمها

طرى في بالها أهلها
(أمي وأبوي وسارة ومشاعل وش قاعدين يسوون الحين؟ أكيد أبوي عند حلالة وأمي زايرة وحدة من جاراتها وسارة تنظف البيت ومشاعل عند زوجها آآآه ليتني أقدر أدق عليتس يا مشاعل وأقول لتس عن معاناتي بس المشكلة إني أنا الغلطانة... خلني أدق على بيت هلي يمكن أرتاح إذا سمعت صوت أمي)

إلتفتت لتلفون أخذتة ودقت رقم بيت أهلها

صوت سارة البعيد أحيا ألآم عميقة في قلبها

سارة:
-الو

جواهر:
-سلام

سارة عرفت صوت جواهر :
-وعليكم السلام هلاوالله وش أخبارتس؟

جواهر وهي تلمس كتفها الي يوجعها بسبب الضرب:
-الحمدلله بخير أنتي وشلونتس وأبوي وأمي وشخبارهم؟

سارة:
-كلنا بخير وصحة وعافية منتي بناوية تزورينا؟

جواهر:
-متى ماكتب ربي

سمعت جواهر صوت دق خفيف على الباب وقالت لسارة:
-سارة لحظة بس

وإلتفتت على الباب:
-مين؟

دخلت الخدامة:
-ماما في يبغى عشا؟

هزت جواهر راسها:
-لا مالي نفس ماأبي عشا

الخدامة:
-طيب

وطلعت

كملت جواهر:
-أمي وينهي؟

سارة:
-زايرة جارتنا أم مسلط

سكتت سارة شوي ثم قالت :
-جواهر إنتي وش فيتس؟

جواهر:
-وش فيني؟

سارة:
-صوتتس متغير إنتي مريضة؟

جواهر والعبرة تخنقها:
-لا لا مافيني إلا العافية يالله سلميلي على أبوي وأمي طيب

سارة بتشكك:
-طيب إنشالله

جواهر:
-مع السلامة

سارة:
-مع السلامة

ردت جواهر السماعة مكانها وضمت رجولها على صدرها وبدت تبكي

بعد دقايق سمعت صوت الباب يفتح بقوة رفعت راسها وشافت فيصل والغضب باين علية لصقت جواهر في السرير من الخوف

فيصل:
-قومي تعشي

جواهر بإرتباك:
-ما...ما...أبي...عشا

تكتف فيصل:
-ولية إنشالله ماتبين؟

جواهر:
-مالي...نفس

فيصل:
-إسمعي ياجواهر لاتسوين نفسك مظلومة وبريئة؟ قومي تعشي وخلي عنك الأمور التافهة

جواهر بكت:
-فيصل والله مالي نفس آكل

عقد حجاجة ثم سحب غطا السرير ومسك يدها ووقفها:
-لاتحاولين تكسبين عطفي ورحمتي

توجة بها لطاولة الطعام وجلسها جنبة ثم جلس غرف لها في صحنها من بعض الأطباق:
-إكلي

مسحت جواهر دموعها لكنها مازالت منهمرة:
-فيصل والله ماأقدر

ضاقت عيونة وتصلب فكة وهو يشوف آثار ضربة فيها:
-غصبتيني ياجواهر على إني أسوي أشياء ماهيب من أسلوبي وأفعالي عشان كذا تحملي النتيجة إكلي صحنك ولا تبقين فية شي.... أمس كلة والغدى اليوم ماأكلتي شي وتقولين مالك نفس وشلون هذا؟

ماقدرت جواهر تطالع فية لكنها إكتفت بأكل مافي صحنها

أما فيصل قاعد يطالع فيها وعينة ماغمضت عنها وصحنة ماحرك فية شي

سمع نغمة جوالة ورد:
-الوهلا

أمة:
-هلابك يابوي أنت وشخبارك؟

فيصل بإبتسامة:
-بخير عساك بخير أنتي وخواتي وشلونكم؟

هند:
-الحمدلله بخيروعافية جواهر عساها مستانسة وبخير؟

فيصل ينقل نظرة سريعة لجواهر:
-الحمدلله بخير

هند:
-متى ناوي تجي عندنا؟

فيصل:
-بعد بكرة إنشالله وش رايك؟

هند:
-في أي وقت تجي حياك الله يابوي

فيصل:
-الله يحييك كيف الجو عندكم؟

هند:
-لنا أربعة أيام والبرد مهاجمنا لدرجة إن الموية مثلجة

فيصل:
-ماشالله ثلج حمستيني أجيكم وأشوف جوكم أجل نتقابل إنشالله

هند:
-إنشالله سلملي على جواهر وإنتبة على نفسك ولاتهلكها بكثرة الشغل

فيصل:
-أبشري

هند:
-كيف أوصيك على نفسك وجواهر عندك؟ يالله يابوي مع السلامة

فيصل:
-هلا والله مع السلامة

رد الجوال في جيبة وطالع في جواهر الي تاكل غصب عنها بهدوء:
-جهزي نفسك بعد بكرة بنروح للوالدة إنشالله

هزت جواهر راسها وهي مازالت منكستة

فيصل:
-الجو بارد أخذي معك ملابس سميكة

جواهر:
-إنشالله

وقف ومشى نادتة جواهر:
-فيصل

إلتفت لها

جواهر:
-فيصل انا غلطانة وأعترف إني أخطأت بس سامحني الله يخليك سامحني

ضاقت عيونة يفكر ثم قال:
-ماضنتي بقدر أغفر خداعك لي ياجواهر

صد عنها وراح أما جواهر وقفت وركضت لغرفتها تبكي بحسرة ودموع الندم تغطي خدودها







##
في بيت فارس

دخلت مها ووراها محمد شافتهم وضحى ومدت يديها في الهوى لمها:
-ياهلا ياهلا ومرحبا ببنتي

ركضت لها مها وإرتمت بحضنها وباست راسها:
-هلا فيتس ياعمة

وضحى:
-كذا يعني تركتي البيت ونسيتينا

مها:
-لا والله ياعمة مانسيتكم

وضحى:
-لو تدرين يامها وش سويتي في محمد؟ صرنا ماعاد نشوفة إلا قليل

محمد بإبتسامة:
-خلاص يمة لاتفضحينا

وضحى:
-أتمنى إنك عرفت قيمتها

محمد بضحكة:
-ههههههههههه الله يهديتس يمة تراها زوجتي وأكيد لها قيمة عندي

دخلت فاطمة ببرقعها وجلالها والدهشة باينة في صوتها:
-مها!

وقفت لها مها وسلمت عليها
فاطمة:
-إشتقت لتس يالخاينة وشلونتس؟

مها:
-بخير الحمدلله وأنا بعد إشتقت لتس إنتي وشلونتس والبيبي وشخبارة؟

فاطمة:
-كلنا طيبين الحمدلله

وضحى:
-مها يمي روحي لغرفتتس وبدلي ملابستس العشا بيجهز الحين

مها:
-إنشالله

محمد:
-أبوي وينة؟

وضحى:
-في المشب مع منصور

محمد:
-أجل أنا رايح عندهم

راحت مها لغرفتها وبدلت ملابسها ثم طلعت وجلست عند عمتها وفاطمة وتعشو
وبعد العشا جلسو يسولفون ويضحكون واليل سرى

إستاذنت منهم وضحى وراحت تنام

وكملت فاطمة ومها السهرة بالضحك والسوالف طالعت مها في الساعة وشافت إنها 12

مها:
-يالله يافطوم إعذريني صاحية من الصبح عشان الكلية ومانمت والحين بروح أنام

فاطمة:
-روحي إرتاحي...... بكرة بتداومين؟

مها:
-إنشالله

فاطمة:
-تصبحين على خير

مها:
-وإنتي من هلة

دخلت مها غرفتها وقررت تاخذ شور قبل ليجي محمد

أخذت معها منشفة وقميص النوم ودخلت الحمام

بعد دقايق طلعت ووقفت قدام المراية تطالع في وجهها لمحت شي غريب وراها إلتفتت وشافت محمد جالس على السرير

مها:
-خوفتني دخلت الغرفة فاضية والحين شفتك

محمد بإبتسامة:
-بسم الله عليتس

إلتفتت مرة ثانية للمراية وفلت شعرها الطويل

جاها صوت محمد الهامس:
-إشتقت لتس

قرب محمد منها وحظنها ذابت مها في أحظانة وماقدرت تقول شي

محمد يرفع راسها لة:
-مها ردي علي قولي أي شي

مها:
-وأنا بعد أشتقتلك أكثر

حظنها محمد بقوة لصدرة وحست مها إنها إرتفعت عن الأرض ومافتحت عيونها إلا وهي على السرير.........







‏##
في بيت فيصل

فتح فيصل بهدوء باب غرفة جواهر وشافها غارقة في نوم عميق

قرب منها وشاف التعب باين عليها

فيصل:
-إنتي الي جنيتي على نفسك ...وإنتي الي حديتيني أقسى عليك ...كرهك لي وحبك لسعود هو الي يخليني أعذبك معي... للأسف ياجواهر إنك ماراح تعرفين شعوري إتجاهك ولا راح تقدرينة

تحركت جواهر وهي في عز نومها ببرائة لكن البرائة هذي إثارة في نظر فيصل الي عض على شفتة وطلع







‏##
في شقة محمد

طلع محمد من الحمام بالمنشفة الي تلف خصرة والموية تقطر من كل جزء في جسمة والغضب باين علية

إلتفت على مها الي نايمة بكل هدوء تأفف ثم توجة للصالة وجلس فيها وراسة بين يدية

محمد:
-أنا غبي غبي بلحظة ضعف وحدة خربت كل مخططاتي آآآه يامها خربت حياتس معي ماأبي أموت وإنتي متعلقة فيني أو يصير بيني وبينتس رابط الولد خلاص هذي أول مرة وآخر مرة

محمد ماكان يدري إن مها كانت حاسة بخروجة من الحمام وجلوسة في الصالة كانت واقفة تشوفة من ورى الباب والندم باين علية

واقفة ودموعها تهل على خدودها:
-أدري إنك يامحمد متحسف وندمان على إنك تسرعت وأدري إنك لو الود ودك تنشق الأرض وتبلعك ولاتشوفني وأدري إنك تعتبر نفسك غلطان بس أتمنى تعدي الأمور على خير

إنسحبت مها بكل هدوء لسريرها عشان محمد مايشوفها وهي تجر خلفها آمالها الخايبة







‏##
في اليوم التالي

كانت مشاعل ترتب غرفتها
وفي إنهماكها بالشغل حست بوجع غريب في بطنها

جلست على السرير وهي حاطة يدها على بطنها المنتفخ
لكن الوجع في إزدياد... في هذا الوقت خافت مشاعل إن الي في بطنها يطيح وخصوصا إنها في نهاية شهرها الخامس

زاد الألم ومشاعل ماقدرت تنادي أو إنها توقف وبدت تبكي

دخل عبدالرحمن:
-السلا.......

وإنصدم لما شافها تبكي مشى بسرعة وجلس بجنبها:
-مشاعل وش فيتس؟

مشاعل تزيد في البكي وهي تتأوة

عبدالرحمن بخوف:
-مشاعل تكلمي قولي لي وش فيتس؟

مشاعل:
-بطني ماني قادرة أستحمل ودني المستشفى أخاف الولد صار فية شي

عبدالرحمن إرتبك ماعرف وش يسوي أخيرا أخذ عبايتها ولفها عليها ثم رفعها بين يدية وطلع

ركبو السيارة ومشو وفي خلال دقايق وصلو المستشفى

بعد الكشف والنتايج قالت الدكتورة:
-مافيش حاقة(حاجة) تخوفك ياسيدة مشاعل القنين(الجنين) تمام وفقر الدم عندك كويس ويمكن الألم الي حسيتي بية يكون سببة التعب والإرهاق حاولي ترتاحي وتبعدي عن التعب طيب؟

مشاعل:
-طيب

الدكتورة:
-خلي طعامك يكون مفيد أكثر من إنو يكون دسم وإشربي الحليب وهذا أهم عنصر والمفروض إن المرأة الحامل ماتنساهوش ونامي كويس وماتسهريش لأن السهر بيتعب قسمك(جسمك) وبتحسي بالضعف

مشاعل:
-إنشالله

الدكتورة:
-ربنا يسهل عليك مع ألف سلامة ياحببتي

مشاعل:
-مشكورة

طلعت مشاعل وراحت للإنتظار عشان عبدالرحمن الي كان جالس

أول ماشافها قام وجاها يمشي:
-هاه وش صار؟

مشاعل:
-تقول إن الجنين طيب وفقر الدم عندي مرتفع بس الآلآم الي حسيت فيها كانت بسبب التعب والإرهاق

عبدالرحمن وهو يركب السيارة:
-إنتي حتى إذا كنتي تعبانة تشتغلين إرحمي نفستس والي في بطنتس

مشاعل تعبس بملامح وجهها:
(ماتدري إن كل الأوجاع الي أحس فيها هي بسبب أمك الي ماترحم)







‏##
وصل فيصل ومعة جواهر لبيت أمة

هند بإبتسامة مشرقة بعدما سلمت عليهم:
-ياهلا ياهلا والله بعيالي

فيصل:
-هلا فيك يالغالية أنتو وشلونكم؟

هند:
-بخير يابوي(ثم إلتفتت على جواهر) وش أخبارك ياجواهر؟

جواهر بإبتسامة خجولة وآثار الكف كانت مختفية وماباقي غير الإحمرار البسيط الي قدرت تغطية بالمكياج:
-بخير الحمدلله

طالع فيها فيصل ببرود وكأنة يتمنى إنها لاتبتسم ولاتتكلم

قالت ضي:
-روحو إرتاحو في جناحكم قبل العشا لأن فية ضيوف بيجونا

فيصل:
-لية تكلفون على نفسكم ترانا مو مطولين الصبح إنشالله وحنا ماشين

هند:
-وش ذا الكلام يافيصل؟ غيباتك كثيرة وجياتك قليلة وماتبينا نعشيك عشى فخم؟

فيصل:
-مين عزمتو؟

هند:
-عمانك وخوالك وبناتهم

في:
-بصراحة قلت لها لاتعزمينهم بس أمي عنيدة الله يهديها

هند:
-في عيب

في:
-يمة مافية أحد غريب عشان تقولين لي عيب وجواهر تمون

فيصل:
-حنا بنروح نرتاح قبل العشا

طالع في جواهر نظرة سريعة وقام
فهمت جواهر إنة يقصد يالله قومي

تبعتة ودخلو الجناح كان الجناح فخم بكل معنى الكلمة
جلس فيصل على كرسي عند التلفزيون وجلست جواهر جنبة وقالت:
-فيصل أ........

قاطعها وهو يقول:
-إذا تبين ترتاحين ترا هذا باب غرفة النوم وإذا ماتبين ترتاحين ترا أنا أطلب الراحة

صد عنها وعدل جلستة في الكرسي وغمض عيونة

بعد نص ساعة فتح فيصل عيونة وماشاف أحد عندة عقد حجاجة وقام يبحث عن جواهر

شافها جالسة في غرفة النوم قدام المراية تحط مكياج خفيف ولابسة تنورة بيضا لنص الساق فيها نقش في أسفلها بالكحلي وبلوزة كحلية ورافعة شعرها بحركة عشوائية

بلع فيصل ريقة بصعوبة ثم مشى ودخل الحمام ياخذ شور سريع

بعد ربع ساعة كان فيصل لابس ثوبة الأسود وغترتة البيضا

توجة لجواهر وقال:
-خلصتي؟

هزت جواهر راسها بإية

فيصل:
-يالله إمشي

تبعتة جواهر وهم نازلين من الدرج سمعو أصوات الحريم الي تضحك والي تسولف

قال فيصل لجواهر:
-إدخلي من الباب هذا

وكان بيمشي لكن ضي الي طلعت من المجلس قالت:
-أوة فيصل لحظة

وقف فيصل:
-نعم

ضي:
-عماتي وخالاتي يبون يسلمون عليك

هز فيصل راسة:
‏-بسلم عليهم بعد العشا لأن الحين المجلس مليان رجاجيل وماعندهم أحد يضيفهم إنتي إدخلي ودخلي جواهر معك طيب؟

ضي بإبتسامة وهي تلتفت لجواهر:
-إنشالله.... أوة تهبلين ياجواهر ماشالله تبارك الرحمن عيني عليك باردة إمشي إدخلي وطيري العذال

دخلت ضي وهي ماسكة يد جواهر:
-يالله تعالي

دخلت جواهر وشافت إن المجلس ممتلي حريم وبنات
ضي تقول لعمتها:
-هذي جواهر مرت فيصل

العمة:
-ماشالله تبارك الرحمن كيف حالك ياجواهر؟

جواهر:
-الحمدلله بخير

سلمت جواهر على كل الموجودات ومن بينهم أفنان وأمها

كانت تحس بنظرات الحقد والحسد من بعض ونظرات الإعجاب من بعض لكنها على العموم إستمتعت بالسوالف مع في وضي
بعد العشا جلست جواهر شوي وهي تحس إن أفنان ودها تقول لها كلام لكن جواهر راحت لجناحها بعد ماراحو أغلب الضيوف

أخذت شور سريع ثم لبست بجامتها وطلعت للشرفة(البلكونة) العلوية.......