***الفصل السادس عشر***













فاطمة تمشي متجهة لسيارة منصور قالت وهي تفتح الباب وتركب:
-تأخرت عليك؟

منصور يحرك السيارة:
-لا والله ماتأخرتي..........وش هذي الأكياس الي معتس؟

فاطمة:
-بما إن المستشفى هذا مايمنع الأكل الخارجي سويت لمشاعل حلا وأخذت قهوة وشاهي

منصور:
-كفو يابنت فارس.... ومشاعل تستاهل أكثر... بس أنا خبري إن الي مريضين باالمرارة المفروض مايشربون قهوة؟

فاطمة:
-مهوب شرط إني لما جبتها تشربها مشاعل... يمكن عندها عمتي نورة ومجموعة حريم عشان كذا فضيحة أدخل عليهم ويديني خالية

منصور:
-صحيح صادقة الله يخليتس لي

إستحت فاطمة وسكتت
إلتفت منصور لها بإبتسامة:
-قولي ويخليك لي أو تسلم أو جعلك تحيا قولي أي شي لاتستحين.

فاطمة:
-...............

ضحك منصور
((عجبتة هاالإنسانة حياها وأسلوبها وذرابتها وكل شي فيها قبل كان يحس نفسة مغصوب عليها بما إن أبوة أجبرة يخطبها لكن الحين حس إنة مايقدر يعيش بدونها
تذكر قولة تعالى:
{وعسى أن تكرهوا شيئا وهو خيرا لكم}..........))

وصل منصور للمستشفى نزلت فاطمة والأغراض هو شالها

سأل الرسبشن عن رقم غرفة مشاعل وجاوبوة

وصلو الغرفة حط منصور الأغراض عند الباب وقال:
-إدخلي وشوفي إذا فية حريم ولا.. لا عشان أسلم عليها

فاطمة:
-طيب

دخلت فاطمة الغرفة وشافت مشاعل قدامها
فاطمة بصرخة فرح:
-شعولة

مشاعل تفاجأت بوجود فاطمة :
-فطومة

أسرعت فاطمة تحظن مشاعل وهي تبكي:
-شعولة ياقلبي أشتقت لتس

مشاعل:
-وأنا بعد إشتقت لتس

فاطمة:
-إعذريني ياقلبي والله مادريت إلا البارح قد الزيارة إنتهت

مشاعل تمسح دموع فاطمة:
-عاذرتس ياحياتي أنا طيبة الحين شوفيني بخير الحمد لله ...قولي لي وش أخبارتس بعد العرس؟ منصور كيفة؟

إبتسمت فاطمة:
-الله يخلية لي فديتة.....يوووة نسيت قال لي إنة بيسلم عليتس أنادية؟

مشاعل:
-باالرغم من إني منحرجة بس نادية خلية يسلم

طلعت فاطمة ونادتة كان واقف ورا الباب:
-السلام عليكم

مشاعل ووجهها أحمر:
-وعليكم السلام

منصور:
-وش أخبارتس طيبة؟

مشاعل:
-الحمدلله

فاطمة بإبتسامة:
-وجهتس مشرق يعني متعافية إنشالله

منصور:
-إنشالله إنها متعافية تقومين بالسلامة

مشاعل:
-الله يسلمك













####
في بيت مطلق

محمد وأمة في المجلس يتقهوون

وضحى:
-متى تنتهي إجازتك؟

محمد يتعدل في جلستة يرفع ركبتة اليمنى ويسند يدة فوقها:
-تنتهي بعد عشرة أيام... إنتي تدرين إني أخذتها قبل الزواج بإسبوعين

وضحى:
-إية أدري.

دخلت مها وبرقعها في يدها وجلالها على كتوفها:
-السلام

الإثنين:
-وعليكم السلام

وضحى:
-هلا وغلا ببنتي تعالي إجلسي

وأشرت على مساحة صغيرة بينها وبين محمد

تقدمت مها وجلست بينهم
مد محمد يدة خلف مها على كنب الجلسة الأرضية
حست مها بقشعريرة في جسمها بلعت ريقها بصعوبة وقالت بإتسامة تخفي إرتباكها:
-وش علومتس ياعمة؟

وضحى:
-فديتتس يامي والله إني بخير وعافية

مها:
-الحمد لله

محمد بنظرة هادية وبرود يخفي إبتسامة:
-ماتبين قهوة؟ ترى هذي قهوة الوالدة لاتفوتتس

مها تمد يدها للدلة وتصب في الفنجال:
-مايحتاج أنا خابرة قهوتها

محمد:
-لو أقول لتس سوي قهوة بتسوين مثلها؟

مها:
-أكيد لا

محمد:
-إنتي سوي قهوة وأنا بقرر من الأفضل

مها:
-مع إني متأكدة إن قهوة عمتي أفضل

وضحى:
-لاتسوين نفستس بريئة تراني أكثر من مرة أروح لبيتكم وأذوق قهوتس......

كملت وضحى وهي توقف:
-يالله بروح لغرفتي أرتاح

مها:
-وين ياعمة توني جالسة؟

وضحى:
-جسمي تعبان

مها:
-سلامتتس يالغالية

وضحى:
-يالبى قلبتس يمي ويسلمتس يالله أترخص

إلتفت محمد على مها:
-جزاتس الله خير

مها مستغربة:
-على أيش؟

محمد:
-على إنتس جبتي لي كيس الأدوية البارح

إنقلب وجة مها أحمر لما تذكرت إنة طلب منها تنام جنبة:
-حصل خير.......وش كنت تحس فية البارح؟ خوفتني

سحب يدة من وراها وتغيرت ملامح وجهة:
-كنت أحس بشوية صداع

رفعت مها حجاجها بستغراب:
-بس علبة الدوا الي أخذت منها حبتين مهيب ببندول كان إسمها..........

قاطعها محمد:
-أقول مها خليتس بشغلتس أنا فيني ظغط وسكر عشان كذا آكل حبوب

وقف ومشى..........كان بيطلع بس كأنة تذكر شي وقال:
-ولا واحد من هلي يدري إني آخذ حبوب لظغط أو السكر .... وبما إنتس زوجتي أتمنى إنتس تعتبرينة سر بيني وبينتس وماتطلعينة لحد فهمتي

مها بشك:
-أنشالله

هز راسة وطلع


















####
في بيت ناصر

تلفون البيت يدق

أسرعت نورة لة وردت:
-الو

هي طبعا كانت متأكدة إنة ناصر وكانت تدري إن مشاعل في هااللحظة في غرفة العمليات

ناصر:
-هلا يام مشاعل

نورة:
-هاة وش أخبار مشاعل؟

ناصر:
-إنتهت العملية وهي الحين بخير توها صاحية من البنج

نورة:
-ياقلبي عليها هي تتوجع الحين؟

ناصر:
-تقول إنها ماتحس الحين بوجع

بكت نورة:
-الحمدلله والله إني من اليوم أحاتيها

ناصر:
-تعوذي من الشيطان بنتتس مافيها إلا العافية.....يالله أنا بروح لها بشوف وش تبي

نورة:
-سلملي عليها

ناصر:
-يبلغ.....يالله مع السلامة

نورة:
-مع السلامة











####
في قصر فيصل

في وضي يتفرجون على التلفزيون
ضي:
-أنا عجبني تصميم الفستان العنابي بس مشكلتة عاري

في:
-تقدرين تقولين للمصمم يضيف حركات علية يستر بها جسمك

ضي:
-بس خفت إن موديلة يخرب

في:
-ماراح يخرب بس يكون في علمك إن الفستان الي معك الحين أفضل من العنابي

ضي:
-أمي تقول نفس كلامك وعلى كل حال أنا مرتاحة الحين في الي معي

في:
-بيت فيصل الي يبنية خلص؟

ضي:
-إية خلص والأخ قاعد يأثثة

في:
-سمعت أمي تقول إن البيت في مدينة المزروعة

ضي:
-إية في مدينة المزروعية بس تبين الصدق موقعة حلو عشان يسهل علينا الطريق لجينا بنروح لهم

في:
-إية والله إنك صادقة

فجأة

قطع عليهم صوت نغمة جوال

في:
-هذا جوالي

وقفت وأخذتة من على الطاولة وإنصدمت لما قرت إسم المتصل:
-مين تتوقعين ياضي؟

ضي:
-وش دراني؟ ردي قبل لينقطع

في:
-هذي أفنان

ردت:
-الو

أفنان:
-مرحبا

في:
-أهلين أفنان

أفنان:
-كيفك فيفي؟

في:
-تمامو إنتي كيفك؟

أفنان:
-تمام.... فيفي ممكن أسألك سؤال؟

في:
-تفضلي

أفنان:
-الحين فيصل جاد بزواجة؟

في:
-فيصل حدد زواجة وعزم كل من يعز علية وفي النهاية تسأليني إذا هو جاد!

أفنان بصدمة:
-فيصل حدد زواجة؟

في:
-في٢٩ نهاية الشهر هذا

أفنان:
-أبي أفهم هو لية إختار ها القروية؟

في تحاول تغيض أفنان:
-ياربي عليها تجنن ياليتك شفتيها ياأفنان أحس إنها الوحيدة الي تناسب فيصل

أفنان بقهر:
-أقول أكلمك بعدين

في بإبتسامة:
-اوكي

أفنان:
-باي

في:
-مع السلامة

حطت في الجوال على الطاولة وهي ميتة ضحك:
-هههههههههه جننتها ياضي جننتها

ضي:
-وش كانت تبي؟

في وهي مازالت تضحك:
-ههههههههههه تسأل إذا فيصل كان جاد بزواجة

الثنتين:
-ههههههههههه















####
في بيت فارس

عبدالرحمن جالس في المشب والضو (النار) قدامة

كان تفكيرة سارح لبعيد يفكر في مشاعل
(الحمدلله على كل حال.... تمت العملية وإرتحت.... ماتدرين وش صار فيني يامشاعل لما دخلتي المستشفى؟ النوم جافاني والسهر أتعبني آآه متى تطلعين باالسلامة ويزفونتس لبيتي وأرتاح أنا وياتس)

قطع علية سيل أفكارة أبوة لما دخل

فارس:
-السلام

عبدالرحمن:
-وعليكم السلام

فارس:
-الحمدلله على سلامة مشاعل

عبدالرحمن:
-إية والله........يبة أنا كنت خايف أفقدها

فارس:
-تعوذ من إبليس إنت عارف إن عمليتها سهلة

عبدالرحمن:
-عارف يبة بس قلبي مين يقنعة

فارس بإبتسامة:
-عندي لك إقتراح وأتمنى يعجبك

عبدالرحمن:
-إنشالله يعجبني

فارس:
-البارح قاعد أطرح أفكار عن زواجك بعدما تطلع مشاعل باالسلامة

عبدالرحمن:
-طيب؟

فارس:
-عبدالرحمن وش رايك لو نلغي حفل الزواج؟

عبدالرحمن بصدمة:
-أيش؟

فارس:
-شكلك مافهمتني... أناقصدي نزفها لك بدون حفل بما إنكم أول الخاطبين في العايلة وإلى هاالحين ماتزوجتو عشان كذا بعدماتتعافى مشاعل نجيبها عندك وش قلت؟

عبدالرحمن بإبتسامة:
-والله إنها فكرة ماهيب شينة... وإذا كان عمي موافق وهي موافقة توكلنا على الله

فارس:
-يصير خير ياولدي أنا بكلم عمك ناصر وبرد لك خبر

عبدالرحمن:
-طيب













####
حصة في الصالة تتقهوى هي وفهد:
-رحت للمستشفى عشان يغيرون الجبيرة؟

فهد:
-موعدي بعد يومين وبغيرها.........يمة أبي أقول لتس شي.
٠حصة:
-قول...... وش الي بيمنعك؟

فهد:
-يمة بعدما أخلص من هذا الترم في الكلية أبي أكمل أدرس باالخارج

حصة:
-أيش ولية ماتدرس هنا؟

فهد:
-يمة الشهادة في الخارج أفضل من شهادة الدراسة هنا

حصة:
-فهد الدراسة في الخارج غربة

فهد:
-بيروح معي خويي علي وإنشالله ماأحس باالغربة

حصة:
-عطني وقت أفكر

فهد:
-يمة الله يخليتس أبيتس تقنعين أبوي

حصة:
-خلني الحين أقنع نفسي بعدين أشوف

فهد:
-وش تشوفين الله يهديتس؟

حصة:
-أقولك خلني أقنع نفسي

فهد:
-طيب بس لاتطولين










####
في المستشفى

مشاعل جالسة بهدوء على سريرها

دخل عليها ناصر وعلامات الفرحة بادية علية:
-أبشرتس

مشاعل بإبتسامة:
-بأيش يبة؟

ناصر:
-كتب لتس الدكتور خروج

مشاعل:
-صدق؟ أخيرا برتاح من الجلسة هنا

ناصر يضحك:
-ههههههههههه قولي الحمدلله .....إسمعي أنا بروح أخلص أوراقتس ولما أجيتس ألقاتس جاهزة طيب؟

مشاعل:
-أبشر

طلع ناصر وواجة في طريقة عبدالرحمن متجة لة
سلم عبدالرحمن على عمة:
-السلام

ناصر:
-هلا وعليكم السلام

عبدالرحمن:
-وين رايح؟

ناصر:
-عندي لك بشارة

عبدالرحمن:
-بشارة! وش هي؟

ناصر:
-أنا رايح الحين أخلص أوراق مشاعل لأن الدكتور كتب لها خروج

عبدالرحمن فتح عيونة لآخرها:
-صدق ياعمي؟

ناصر:
-إية والله صدق

عبدالرحمن:
-الله يبشرك باالخير... عطني .......عطني الأوراق

ناصر:
-لية؟

عبدالرحمن:
-بروح أخلصهم وأجيك... ولا عليك أمر خل مشاعل تجهز........ من جابك للمستشفى أنا خبري إن سيارتك مخبطة(مخبطة=فيها علة تمنعها تمشي)

ناصر:
-مطلق هو الي جابني عشان عندة شغل قريب من هنا وقلت لة يوصلني على دربة وبيجي بعد شوي عشان ياخذنا

عبدالرحمن:
-كيف ياخذك ياعمي وأنا موجود؟ بدق الحين على جوالة وبقولة إني باخذكم معي

ناصر:
-خلاص الي تشوفة

رجع ناصر لمشاعل الي كانت جاهزة
مشاعل:
-هاه يبة خلصت؟ نطلع؟

ناصر عارف إنة لو ذكر لها عبدالرحمن بتتوتر:
-باقي على الأوراق شوي

مشاعل:
-طيب وين هي الأوراق؟

ناصر:
-عندهم بيخلصونها وينادوني

مشاعل:
-إشتقت لأمي وخواتي حتى بيتنا وكل شي فية

ناصر:
-محدن بيلومتس... أنا بطلع بشوف أوراقتس خلصت ولا..لا

طلع ناصر وشاف عبدالرحمن متجة لة:
-يالله ياعمي خلصت الأوراق

ناصر:
-نمشي؟

عبدالرحمن:
-هالله هالله أنا أحتريكم في السيارة

ناصر:
-خلاص

دخل ناصر عند مشاعل:
-يالله يمي مشينا

وقفت مشاعل قال ناصر:
-تقدرين تمشين ولا أساعدتس؟

مشاعل وهي تلبس برقعها:
-لا يبة أقدر أمشي الحمدلله

لبست عباتها وأخذت شنطتها الصغيرة الي فيها ملابسها وطلعت

ولما أقبلو على البوابة الخارجية قالت مشاعل:
-يبة وين سيارتك؟

ناصر:
-ماجبتها... إمشي معي

ولما وصلو للسيارة كانت مشاعل بتتكلم بس فمها من الصدمة عجز ليفتح ورجولها عجزت تتحرك

شد ناصر يدها:
-إمشي وش فيتس وقفتي تراه زوجتس مهوب غريب؟

حاولت تحرك رجولها وأخيرا مشت

توجة ناصر للباب وفتحة ركبت مشاعل وسكر الباب وراها
كانت جالسة وكاتمة أنفاسها المتسارعة

عبدالرحمن وقلبة يرقع طبول خصوصا لما شافها متجهة للسيارة والحين راكبة وراة:
-الحمدلله على سلامتتس يامشاعل

مشاعل:
‏-.............

ناصر:
-إعذرها مستحية

إبتسم عبدالرحمن وكمل يمشي

وطبعا طوال الطريق السوالف كانت بين ناصر وعبدالرحمن

أمامشاعل ساكتة وتحاول ترفع نظرها وتشوف عبدالرحمن بس ماقدرت

وصلو أخير للبيت
نزلت مشاعل بسرعة وتوجهت لباب البيت أولا لأنها مشتاقة لأهل بيتها وثانيا بسبب عبدالرحمن

فتحت باب البيت ودخلت وتوجهت بسرعة لصالة شافت نورة مقابلها شالت برقعها عن وجهها وركضت لأمها

نورة بصدمة:
-مشاعل؟

دخلت جواهر وسارة على صوت نورة واندهشو لماشافو مشاعل
وتوجهو لها يحضنونها

نورة:
-ماكنا متوقعين إن اليوم بيكتب لتس الدكتور خروج

جواهر:
-كنا متوقعين إنتس بتطلعين بكرة

مشاعل:
-أبوي مثلكم كان فرحان لمابشرني

نورة:
-توة الحين يرتاح قلبي

مشاعل تبوس خد أمها:
-فديتتس أنا

ناصر وهو يدخل:
-وش رايكم بهذي المفاجئة؟

نورة:
-هذي أحلى مفاجئة الله يخليك لنا

ناصر يجلس بجنبهم:
-ويخليكم لي أنا من لي غيركم

نورة:
-من جابكم؟ مطلق؟

ناصر:
-وصلنا عبدالرحمن والله إنة أجودي ماقصر

نزلت مشاعل راسها بحيا

نورة:
-إية والله إنة مايقصر

دق تلفون البيت

قال ناصر:
-سارة يمي قومي ردي

سارة:
-إنشالله يبة

توجهت لتلفون ورفعت السماعة:
-الو

الشخص:
-السلام عليكم

سارة:
-وعليكم السلام مين معي؟

الشخص:
-أبوك ناصر موجود؟

سارة:
-إية موجود مين أقول لة؟

الشخص:
-قولي لة فيصل...........

***الفصل السابع عشر***












توجهت سارة لتلفون ورفعت السماعة:
-الو

الشخص:
-السلام عليكم

سارة:
-وعليكم السلام مين معي؟

الشخص:
-أبوك ناصر موجود؟

سارة:
-إية موجود مين أقول لة؟

الشخص:
-قولي لة فيصل.

إرتبكت سارة أصلا لأنها خافت من صوتة... صوتة يدل على الرجولة بكل معنى الكلمة

حطت السماعة ودخلت الصالة:
-يبة

ناصر:
-هلا يمي

سارة:
-الشيخ فيصل يبيك على الخط

وقف ناصر وتوجة لسماعة رفعها ورد:
-هلا

فيصل:
-هلا بك وش أخبارك؟

ناصر:
-بخير عساك بخير أنت وش علومك؟

فيصل:
-تسرك إنشالله وش أخبار بنتك مشاعل؟

ناصر:
-بخير الحمدلله مابها إلا العافية وابشرك طلعت اليوم من المستشفى

فيصل:
-صدق؟ الحمدلله على سلامتها

ناصر:
-الله مير يسلمك تراك عاد معزوم عندنا الزابلة

فيصل:
-الود ودي أجي بس عندي أشغال

ناصر:
-ترا إن ماجيت والله لأزعل عليك

فيصل:
-أفاااا عاد كل شي ولا زعلك يابومشاعل أبشر إنشالله بحظر

ناصر:
-على خير أجل نتقابل بكرة إنشالله

فيصل:
-إذا كتب ربي يالله مع السلامة

ناصر:
-مع السلامة هلا












##‏##
في بيت فارس

حصة تقهوي فارس:
-عبدالرحمن وينة؟

فارس:
-أكيد عند مشاعل باالمستشفى

حصة زل لسانها ومادرت:
-هاالمشاعل نشبت لي في ولدي وهو غبي بس يتبعها

فارس عقد حجاجة:
-إنتي وش تقولين؟ مشاعل زوجتة ومن حقة يجلس عندها في المستشفى مثل مايبي ومحدن لة كلمة علية حتى أنا ياأبوة ماتدخلت فية عشان كذا إمسكي لسانتس ولا قطعتة لتس

حصة حست باالإحراج:
-ماهوب قصدي كذا يابوعبدالرحمن

فارس:
-أنا فاهمن قصدتس زين ياحصة وأبيتس تتعدلين من زمان بس ماشفت نتيجة

دخل عليهم عبدالرحمن:
-السلام

الثنين:
-وعليكم السلام

فارس:
-حياك يابوي تعال تقهوى

عبدالرحمن:
-الله يحيك أبشر

فارس:
-كنت أحسب إنك عند مشاعل في المستشفى

عبدالرحمن:
-أنا كنت عندها

فارس:
-غريبة راجع اليوم بدري

عبدالرحمن بإبتسامة:
-اليوم الدكتور كتب لها خروج

فارس:
-والله؟

عبدالرحمن:
-إية والله... وهذاني وصلتها لبيتها اليوم

حصة في سرها:
(قطيعة تقطع هاالمشاعل حسبي الله عليها هاوشني فارس والسبب هي)

فارس:
-بعدي ولدي الله يجزاك الف خير بيضت وجهي

عبدالرحمن:
-وجهك أبيض من قبل يالغالي.














##‏##
في بيت ناصر

المجلس ممتلي باالرجاجيل
وعبدالرحمن يقهويهم ويساعدة فهد

فيصل يجلس كاالعادة في صدر المجلس ويكلم منصور الي جالس بجنبة:
-وش أخبار الزواج معك يامنصور؟

منصور:
-تمام أقول عجل بس وقدم عرسك

ضحك فيصل:
-ههههههههه الود ودي أقدمة اليلة بس هالأمور مهيب بيدي

منصور:
-إية والله إنك صادق

إلتفت فيصل لمحمد:
-وش آخر المستجدات في شغلك؟

محمد:
-حاليا أنا في إجازة

فيصل:
-لا؟ ومتى تخلص الإجازة؟

محمد:
-بعد إسبوع

فيصل:
-عاد هالأسبوع في نظرك بيصير كأنة يوم

محمد:
-الله يعين

في الجهة الأخرى من المجلس

فارس:
-ناصر أبي أقول لك شي وأتمنى إنك توافق

ناصر:
-قولة يافارس

فارس:
-وش رايك نزف مشاعل على عبدالرحمن بدون حفل زواج؟

ناصر:
-كيف يعني؟

فارس:
-هم أول العيال خطبو وإلى هالحين ماتزوجو الوقت راح وحنا لازم نساعدهم يعني بيكون عشى عايلي وعبدالرحمن ياخذ زوجتة ويروحون

ناصر:
-بصراحة عجبتني الفكرة والي تقولة تراة من صالحهم أنا بشاور أمها وبرد لك خبر

فارس:
-على خير إنشالله

فيصل يدق جوالة طلعة وقرى الإسم كانت أمة تدق علية
وقف وقال:
-أستاذنكم يالربع عندي مكالمة

طلع ووقف عند مدخل البيت وكان بيضغط الزر الأخضر لكن فية حرمة دخلت مع الباب الخارجي وتوجهت لمدخل الحريم

صد فيصل عنها لكن قلبة فزوالتفت للحرمة

شافها تشيل برقعها وهي بتدخل

قال بصوت قصير:
-جواهر؟

حست جواهر وهي تمشي بزول رجال

إلتفتت وشافت فيصل يطالع فيها
إنصدمت لثواني لما تلاقت نظراتهم

نظرة فيصل الباردة الحادة تخترق عيون جواهر العسلية الهادية

رفعت جلالها على وجهها

قال فيصل:
-وش أخبارك ياجواهر؟

ترددت جواهر شوي خافت إن أحد يجيهم:
-تمام

فيصل:
-وينك؟ ماعاد لك شوفة أخيرا صدتك؟

جواهر وهي تتخصر:
-مافية شوفة إلا.........

قطعت كلامها لأنها بكل صراحة جابت العيد

ضحك فيصل:
-ههههههههه صح صادقة مافية شوفة إلا بعد الزواج

حست جواهر باالإحراج وودت لو الأرض تنشق ثم تبلعها

فيصل:
-خلاص ماعاد باقي شي على الزواج وتصيرين لي

جواهر إنقهرت من كلمتة مو على كيفه يتملكني:
-تعرف وش الي ندمت علية؟ إني وافقت أتزوجك

عقد فيصل حجاجة وتمنى لو إنهم في بيتهم عشان يأدبها:
-نسيت إنك تبين سعود حبيب القلب... روحي روحي كملي دربك وعضي أصابع الندم لأنك ماأخذتي سعود

تركها وطلع يكلم أمة












##‏##
بعدما راحو الضيوف نادت نورة مشاعل وجواهر وجلست معهم

نورة:
-بناتي كل وحدة منكم مقبلة على الزواج مقبلة على حياة جديدة صدقوني تختلف عن حياتكم في بيت هلكم جواهر يمي مهرتس عندي وزواجتس قريب وإنتي إلى هالحين باقي لتس أغراض بكرة إنشالله نروح مع أبوتس ونتقضى لتس طيب؟

هزت جواهر راسها بحيا هي من لما إلتقت بفيصل قبل العشا وهي تفكر وش لون بتعيش معة بالرغم من إنها مشتاقة لة وللجلسة معة

كملت نورة:
-وإنتي يامشاعل اليوم عمتس فارس قال لأبوتس إنهم يبون يزفونتس على عبدالرحمن بدون حفل زواج

مشاعل بصدمة:
-أيش ؟لية شايفيني ذبيحة؟

ضحكت نورة:
-ههههههههه لايمي مهوب لهذي الدرجة كأنتس ذبيحة إتفقو يسوونة عشى عايلي بدال الحفل

مشاعل حست بخوف:
-يمة قولي لهم بعد زواج جواهر الحين مانيب متهيأة

نورة:
-كل عروس مهيب متهيأة لزواجها هذا شي طبيعي بنخلي التحديد لرجاجيل

مشاعل:
-يمة الله يخليتس مهوب الحين

نورة:
-بحاول في أبوتس بس ماضنتي بيوافق وإنتي إرضي بالي يقولونة طيب؟ ترا عبدالرحمن رجال طيب وحبوب وماقصر معتس لما مرضتي المسكين الود ودة لو يبني خيمة قدام المستشفى وأنتي ياجواهر ترا فيصل رجال أجودي والكل يمدحة وإنشالله ربي بيسعدكم















##‏##
في بيت مطلق

وخصوصا في شقة محمد

مها:
-حمودي وش سويت في بيت عمك ناصر؟

محمد ينزل الغترة والعقال على الكنب في الصالة:
-أولا لاتناديني حمودي وكأني ورع(بزر)

مها:
-خلاص ولايهمك يامحمد

محمد:
-الحمد لله إستانست وتعشيت عشى ممتاز

مها:
-جعلة بالعافية

محمد:
-الله يعافيتس... قومي عطيني كاس موية

مها:
-إنشالله

وقفت وتجهت لغرفة النوم فتحت الباب بسرعة ورجع الباب بمثل سرعتة على أصابع يدها صرخت من الألم وسحبت يدها بسرعة

إنتبة محمد لصرختها وأقبل عليها يمشي:
-وش فيتس؟

بكت وهي ماسكة يدها:
-يدي يدي سكر علي........

ماأمداها تكمل كلمتها إلا وهي طاحت على محمد

مسكها محمد بيديها ويضرب خدها بخفة كانت شفايفها الوردية متحولة الى الون الأزرق

ماعرف محمد وش يسوي بها:
-مها... مها قومي

رفعها من على الأرض بين يدية مثل الريشة وتوجة بها للصالة وحطها فوق الكنب:
-مها الله يخليتس قومي

دخل غرفة النوم بسرعة وصب لة كاس موية دخل الصالة ورش عليها شوية منة

شهقت مها طالعت في محمد ثم بكت

جلس محمد بجنبها ومسح على شعرها:
-قومي خوفتيني عليتس

جلست مها مستحية من محمد لأنها كانت منسدحة على الكنب وهو جالس بجنبها

رفعت نظرها لة ثم زادت في البكي

محمد:
-وش فيتس؟

مها تمسح دموعها بظهر يدها:
-يدي سكر عليها الباب

شافها وهي تبكي كسرت خاطرة منظرها مثل الطفلة الصغيرة الي ماتعرف وش تسوي لو واجهها شي

قال محمد عشان يطمنها وهو ماسك يدها:
-أشوف

كان كل أظفر من أصابعها لونة أسود كمل محمد:
-بسيطة آلآمها إنشالله تزول بس إكتشفت إنتس ماتستحملين

مها:
-الكل عارف إني ماأستحمل شي

محمد:
-الله يعينتس علي وتستحمليني

قربت مها منة ومسكت يدية بين يديها:
-أنا بستحمل كل شي منك يامحمد وبعدين أنا ماشفت منك إلا الخير

إبتسم لها ومسح على شعرها:
-روحي نامي إرتاحي

مها:
-مافيني نوم أبي أسهر معك

محمد:
-مها لاتعصيني؟ روحي إرتاحي إنتي نسيتي قبل شوي إنة أغمى عليتس

مها تنشف دموعها بطرف أكمام بجامتها:
-ماعاش من يعصاك أبشر الحين أروح أنام

قامت ودخلت غرفتها

محمد يفكر:
(إحنا تونا في البدايات يامها مدري أنتي بتصبرين علي ولا.لا؟
لماشفتتس تبكين بغيت أستسلم وأخرب كل مخططاتي أنا مانيب خايف من شي قد مانيب خايف من برائتس الي بتوديني بداهية الله يهديتس يايمة ورطتيني وورطتي البنت معي)












##‏##
في شقة منصور

منصور منسدح على السرير وفاطمة ترتب الملابس في الدولاب

منصور:
-وش سويتي بعدمارحت؟

فاطمة:
-جلست عند عمتي شوي بعدين رحت أسوي العشاء

منصور:
-وش أخبار مرت محمد معتس؟

فاطمة:
-عسل والله لسانها ماينقط إلا بعسل

منصور:
-وإنتي بعد لسانتس عسل

إستحت فاطمة

منصور:
-ياحبي للي يستحون

فاطمة:
-منصور عاد خلاص

منصور يجلس على السرير:
-تكفين قولي منصور مرة ثانية

إبتسمت بخجل

وقف منصور من السرير وإتجة لها

رمت فاطمة الملابس من يدها وهربت

لحقها لأنها كانت بتطلع مع الباب بس وقفتها يدة الي مسكتها مع خصرها

فاطمة:
-بقول إسمك بس فكني

منصور:
-على قولة المثل (ماطاح فيها يامهذب راح) يعني مادامني مسكتتس والله مافكتس

فاطمة:
-منصور إستغفر ربك وفكني

منصور:
-مانيب تاركتس إلا إذا طاب خاطري.

قفل الباب باليد الثانية............












##‏##
في الصباح في بيت فارس

دخل فهد على أبوة وأمة وهم يفطرون:
-صباح الخير

الثنين:
-صباح النور

جلس فهد بجنب أمة وقال:
-هاه قلتي لبوي؟

حصة:
-ماعطيتني إنت وقت أقتنع فية

فهد:
-أقول يمة شكل دراستي الي درستها بتصير هباء منثور

حصة:
-فهيدان ووجع أنت وش تقول؟ تفائل بالخير

قطع عليهم فارس كلامهم:
-أنتو وش عندكم تهامسون لبعض؟

حصة:
-هاة؟ ولاشي

فهد:
-بصراحة يبة

فارس:
-قول

فهد:
-يبة أنا أبي أكمل دراستي في الخارج بعد ما أخلص هذا الترم

سكت فارس شوي يفكر

فهد:
-يبة وش قلت؟

فارس:
-إنت الحين في سنة رابع؟

فهد:
-إية خلصنا الترم الأول والترم الثاني بيبدأ بعد أيام

فارس:
-وفية أحد بيخاويك ولا أنت بلحالك؟

فهد:
-معي خويي علي

فارس:
-علي إلي أبوة عندة معرض سيارات؟

فهد:
-هالله هالله وصلت خير

فارس:
-علي والله إنة رجال أجودي عطني وقت أفكر وبرد لك خبر

فهد:
-طيب إنشالله












##‏##
الي كانت تتمناة مشاعل ماحصل لأنها الحين وفي أقل من نصف ساعة بيزفونها على عبدالرحمن

كانت لابسة فستان أحمر لأنها مامداها تشتري الفستان الأبيض

طبعا نورة كانت حاجزة كوفيرة قبل الدخلة بيوم

عملت مكياج لمشاعل مرة ناعم ورايق

وتسريحة أنيقة

دخلت عليها جواهر الي كانت لابسة فستان بنفسجي وأيضا بمكياج ناعم يناسب الفستان أماشعرها مسدول على كتوفها

جواهر:
-خلصتي؟

قالت الكوفيرة:
-أيوة خلاص

جواهر:
-يالله يامشاعل أمي قالت لي أوديتس لها عشان حريم عماني يبون يسلمون عليتس والله يعينتس على حصة

مشاعل:
-جويهروة خلاص إسكتي لاتخوفيني

إبتسمت جواهر:
-من أيش تخافين من حصة؟

مشاعل:
‏-............

دخلت سارة الي كانت لابسة فستان تركواز ومكياجها ناعم وشعرها مثل جواهر مسدول على كتوفها

سارة:
-وينكم أمي تنتظركم

مشاعل بإرتباك:
-ياحووول خلاص هذا أنا جيت

وقفت وقالت:
-تعالي جواهر خاويني

جواهر:
-يالله مشينا

طلعت مشاعل وخواتها لحريم عمانهم

حصة ساكتة وتحس إن النار مشتعلة فيها

أما وضحى:
-ماشالله تبارك الله وش هالزين وش هالحلا الله يوفقتس

مشاعل منحرجة ووجها منقلب أحمر

نورة:
-سارة يمي روحي جيبي عباة أختتس

سارة:
-إنشالله

مشاعل تعلقت بيد أمها:
-يمة مهوب الحين

نورة:
-أجل متى؟ يالله شوفي سارة جابت عباتس يالله إلبسيها

أخذت نورة العباة ولبستها مشاعل

نورة:
-الحين بيجيتس عبدالرحمن وتروحين معة لبيت فارس

مشاعل:
-يمة.......

نورة:
-أنا بروح معتس لين تدخلين غرفتس

طلعو برا وشافو عبدالرحمن كاشخ باالبشت وينتظر في السيارة

ركبت مشاعل في السيارة وتوجة ناصر لعبدالرحمن يوصية عليها

حرك عبدالرحمن باالرغم من البيت يبعد عنهم مسافة خمسة بيوت فقط

بعدما دخلو غرفتهم رجعت نورة لبيتها

مشاعل قلبها يرقع طبول

عبدالرحمن:
-مسا الخير

مشاعل:
-...............

عبدالرحمن:
-أخيرا يامشاعل شفتتس وصرتي لي.... تعشيتي؟

مسك يدها وسحبت مشاعل يدها منة بكل هدوء

عبدالرحمن:
-ماجاوبتيني تعشيتي؟

هزت مشاعل راسة بأية

قرب منها وقال:
-تراني بقرا عليتس لاتخافين زين؟

حط يدة فوق راسها وقرى عليها

بعدما إنتهى باسها على راسها

نزل بشتة وغترتة وحطهم فوق السرير

رفعت مشاعل راسها لة وطالعت فية لكن الحيا خلاها تنزل نظرها

إندهش عبدالرحمن لماشافها ماكان يتوقع إنها بهذا الجمال كلة

جلس جنبها ومسك يدها:
-مشاعل

رفعت مشاعل نظرها لة وتلاقت نظراتهم

عبدالرحمن:
-يالله سبحان من خلقتس

صدت مشاعل عنة ووقفت

عبدالرحمن:
-وين رايحة

مشاعل:
-...............

عبدالرحمن:
-بتغيرين ملابستس

مشاعل:
-إية

عبدالرحمن:
-فديت هالصوت... يالله أنا بطلع وإنتي غيري ملابستس

سكرت الباب وراة وحاولت تفتح سحاب الفستان بس ماقدرت

حاولت

وحاولت

بس عجزت

مشاعل:
-يالله وش أسوي الحين

جلست على طرف السرير ودها لو تبكي ماعرفت وش تسوي وقررت إنها تنام بفستانها لأن مافية حل إلا كذا بس عبدالرحمن دخل عليها

قال وهو عاقد حجاجة:
-ماغيرتي ملابستس؟

مشاعل:
-لا

عبدالرحمن:
-لية؟

بكت مشاعل:
-سحاب فستاني مايفتح

عبدالرحمن يجلس قدامها:
-أفااا وهذا الي مزعلتس؟ كان ناديتيني وأفتحة لتس

مسح دموعها بيدة وقال:
-تعالي أفتحة

ترددت مشاعل

قال عبدالرحمن:
-يابنت ماراح أسوي لتس شي بس تعالي أفتحة إذا كنتي تبين ترتاحين من الفستان

وقفت مشاعل ووقف عبدالرحمن وراها

حط يدة على ظهرها وحس بنعومة جسمها

لمت مشاعل شعرها فوق كتفها الأيسر

فتح عبدالرحمن السحاب ومرر إصبعة على طول عمودها الفقري

هربت مشاعل منة ووقفت بعيد
ضحك عبدالرحمن:
-ههههههههه خفتي لية تخافين أنا زوجتس؟

مشاعل بصوت رقيق:
-وين الحمام؟

عبدالرحمن:
-أول باب يقابلتس أول ماتطلعين

صدت فاطمة عنة وطلعت

توجة عبدالرحمن للسرير وإنسدح علية ثم نام..........

وااااااااااااااااو

يسلموووو.. يااقلبي باارتييين يجنوون

مير الله يعطيك العافيه

..مبروووك دحوووم. واخيرا مابغت شعوووله تجيه<<الله يوفقهم
فيصل..جوجو..عقباالكم والله يجمعهم

حموووود والله انه محيرني<<<الله يستر منه

افناانوووه بعد..بعدها عن فصووول وجوجو
....................

ودمتي ياقلبوو..ننظر البارت الجااي

••• ܓܨ•••
✖ •
يسلمووو مييييييير ع البارت
ياقمييييييييييييل عساتس ع القوة يارب
ابدعتي ..
واخيرا" شعوووله زفوها لدحووم
ميير يستاهل...فرحت له من قلــــب
وبرضوو فصوول
له له يالشيخ تعتقد انو جواهر تحووب
سعيدان تراك غلطان القلب مابه غييييييرك
^_^
بس دلع بناات ماتعرف هههههههه
وافنان..
الله يبعدها هالعذوول واكييد دورها مابعد يبدء
ولما يتزوج فيصل
بتطلع كثيير ^_*
مووفقة
كوماووو