]****الفصل الحادي عشر****













بعد رجوع الشباب من بيت أبوسعيد بعد ملكة محمد
عبدالرحمن:
-مبروك يامحمد


محمد وهو عاقد حجاجة:
-الله يبارك بعمرك


منصور وهو مبتسم:
-عقبال إنشالله أشوفك باالبشت وداخلن على حرمتك


هز محمد راسة وفكرة سارح لبعيد


عبدالرحمن:
-فهد تأخر كنت أبية يحظر الملكة


منصور:
-هو قال إنة بيروح لعمي ناصر وبعدها لواحد من أصدقاة


عبدالرحمن:
-عمي ناصر قال إنة مر علية........ بس تأخر الولد أدق علية ويطلع لي الجوال مقفل


محمد:
-تلقاة الحين سالي مع أخوياة وفضت بطارية الجوال


دق جوال عبدالرحمن:
-هذا رقم غريب........... الو


الصوت الآخر:
-السلام عليكم


عبدالرحمن:
-وعليكم السلام


الصوت:
-ياخي أبي أسألك إنت تعرف فهد بن فارس ال......؟


عقد عبدالرحمن حجاجة:
-هاالله هاالله أنا أخوة عسى ماشر؟


سكت الصوت لدقايق ثم قال:
-فهد في المستشفى صار لة حادث


عبدالرحمن مصدوم:
-أيش؟


الصوت:
-هو حاليا في العناية المركزة


عبدالرحمن:
-في أي مستشفى؟


محمد ومنصور بعد ماسمعو كلمة مستشفى إستعدلو في جلستهم والدم توقف في عروقهم


رجع عبدالرحمن الجوال في جيبة وفز واقف


وقفو لة محمد ومنصور وقالو بصوت واحد:
-عبدالرحمن وش فيك؟


عبدالرحمن بإرتباك وقلق:
-فهد في المستشفى


الإثنين:
-أيش؟ وش فية؟


عبدالرحمن وهو يطلع بسرعة:
-إمشو معي وأقول لكم
‏









####
فيصل جالس في مكتبة ويقلب الأوراق في يدة دق الباب


رفع فيصل نظرة دخل علية فالح:
-السلام


فيصل وهو ينزل الأوراق من يدة:
-وعليكم السلام.... وش سويت؟


فالح:
-سوينا مثل ماقلت لنا فتشنا الشقة بس مالقينا فيها أثر لهم


ضرب فيصل بيدة على الطاولة:
-ولا أثر ؟كيف مالقيتو أي أثر؟


فالح:
-وكأن الأرض إنشقت وبلعتهم


فيصل بعصبية:
-هذي الأمور ماتمشي علي.......... طلعوهم من تحت الأرض


هدأ فيصل أعصابة وكمل:
-غيرة وش سويتو؟


فالح:
-سألنا صاحب الشقق وقال إنة أجر هذي الشقة لرجال عزوبي


فيصل:
-طيب؟


فالح:
-ويقول إن هذا الرجال العزوبي كل يوم يجيب معة مجموعة رجاجيل ومايطلعون من الشقة إلا على أذان الفجر


فيصل وهو يتقدم في كرسية:
-ماقال لكم صاحب الشقق وش إسم الرجال العزوبي؟


فالح:
-إسمة بدر عبدالعزير ال....... بس أتوقع إن إسمة أو البطاقة الشخصية مزورة


فيصل:
-وش الدليل؟


فالح:
-في الشقة الي قبضنا فيها على وليد وخوية كان إسم الرجال عبدالمجيد سالم ال......... وحصلنا على البطايق المزورة في حوزة وليد وفي الشقة هذي بإسم ثاني


إستند فيصل في جلستة وهز راسة:
-يصير خير يافالح


فالح:
-تامر بشي ثاني؟


فيصل:
-أبيكم تراقبون جميع الشقق في المنطقة


فالح:
-إنشالله











##‏##
وصل عبدالرحمن ومعة محمد ومنصور للمستشفى


شاف عبدالرحمن الدكتور يطلع من غرفة فهد الي أعطاة الرسبشن رقمهاركض لة ومسكة


عبدالرحمن بإرتباك وخوف:
-تكفى يادكتور علمني وش في أخوي؟


الدكتور:
-أخوك مش في حالة خطيرة جدا لكن إحنا خليناة في العناية عشان نقدر نراقب حالتة ونتأكد من سلامته


محمد:
-طيب وش صار لة باالظبط؟


الدكتور:
-الشخص الي جابة للمستشفى يقول إنة كان يمشى باسيارتة ورا سيارة فهد وفجأة طلعت في وجة فهد مجموعة من النياق وعشان مايصدم فيها لف بالسيارة لكنها إنقلبت


منصور:
-وش الأضرار الي تعرض لها؟


الدكتور:
-عندة كسر مع فك في يدة اليسرى وكمان ضربة في الراس قوية هي سبب وجودة في العناية المركزة عشان نتأكد من سلامة الرأس وعدم وجود نزيف وكمان بعض الرضوض في أنحاء جسمة


محمد:
-طيب هو كيف الحين؟


الدكتور:
-حالتة مستقرة وإنشالله مافيها مضاعفات وأنا عطيتة إبرة منومة عشان يرتاح


زفر عبدالرحمن وقال:
-ممكن دكتور نشوفة؟


الدكتور:
-أوكية ممكن بس واحد واحد وماتطولون عندة بالغرفة


عبدالرحمن:
-إنشالله


دخل عبدالرحمن على أخوة بعدما لبس ملابس الوقاية الخضراء


شاف فهد نايم على السرير وجميع الأجهزة موصولة إلية عن طريق أسلاك ملونة


جلس عبد الرحمن بجنبة على الكرسي وقال:
-شفت يافهد وش تسوي السرعة الجنونية؟ عاد أنا خابرك تحب السرعة............ أنا شايل الحين هم هلي كيف أعلمهم؟


تكلم فهد بصوت قصير ووقف عبدالرحمن عشان يسمعة
قال فهد:
-سارة سارة لية ترفضيني؟


هز عبدالرحمن راسة ورجع يجلس على كرسية:
-حتى وإنت مريض تنطق بإسمها هي ماتبيك لية إنت تفرض نفسك عليها؟














##‏##
أفنان تبكي عند أمها:
-ماما فيصل مايحبني بيتزوج القروية


أمها:
-ومين قالك إن فيصل مايحبك؟ هو يموت فيك ويمكن بنات هند يمزحون عليك.


أفنان وهي تمسح دموعها:
-لا ماما مايمزحون فيصل يحب القروية


أمها:
-قومي إغسلي وجهك وتعوذي من إبليس وقومي تغدي معي من يوم مارجعتي من بيت هند وإنتي ماطلعتي من جناحك وأثاري السبب هذا


أفنان:
-ماأبي أتغدى خلاص راح فيصل من يدي


أمها:
-إنتي ماتدرين يمكن فيصل أخذ القروية بسبب ضروف وبعدين بيطلقها


أفنان:
-كيف يعني؟


أمها:
-أنا أعلمك كيف بس إنتي تعالي تغدي معي











##‏##
في بيت فارس
بعد الغدى جلسو العايلة في المشب
حصة بقلق:
-فهد من أمس ماشفتة ماتدرون وين راح؟


نزل عبدالرحمن نظرة لفنجالة


قال فارس:
-عبدالرحمن أخوك وينة؟ من أمس أدق على جوالة ويطلع لي مقفل قلت يمكن رايح مع شلتة


عبدالرحمن وهو يحاول إن هلة يتقبلون الموضوع بهدوء:
-فهد طيب وبخير


فاطمة حست بشي:
-طيب هو وينة؟


عبدالرحمن وهو ينقل نظرة من واحد لواحد:
-فهد في المستشفى


الكل:
-أيش؟


عبدالرحمن بهدوء:
-صار لة حادث بس الدكتور يقول إنة طيب


بكت حصة بحسرة:
-حادث؟ وش الي صار فية من الحادث؟


عبدالرحمن وهو يخفي بعض الحقايق:
-إنكسرت يدة اليسرى بس


فارس:
-وحالتة بخير؟


عبدالرحمن:
-أنا دخلت علية البارح وكان طيب


حصة ببكاء:
-من البارح تدري ولا علمتنا إلا الحين؟


عبدالرحمن:
-وش تبيني أقول؟ الولد طيب ومابة إلا العافية إنشالله


وقف عبدالرحمن وطلع تبعتة فاطمة وهي تمسح دموعها وتنادية:
-عبدالرحمن


وقف وإلتفت لها:
-نعم


فاطمة:
-إنت متأكد إن فهد طيب وبخير ماتخبي عننا شي؟


عبدالرحمن:
-أنا قلت لكم دخلت علية البارح وكان نايم لأن الدكتور عطاة إبرة منومة


إبتسم عبدالرحمن وكمل:
-حتى وهو نايم ينطق إسم سارة


فاطمة:
-ريحتني ياخوي


دخلت عليهم فجأة حصة وهي تهاوش بصوت عالي وتبكي:
-أنا عارفة إن بنات نورة بيذبحون عيالي


إنصدم عبدالرحمن:
-إنتي وش قاعدة تقولين؟


حصة:
-سمعتك تقول لإختك إن فهد ينطق بإسم سارة.......... ماذبحة إلا سارة


فاطمة:
-يمة الولد حي وبخير لية تفاولين علية؟


حصة:
-فهد قطعت قلبة سارة وإنت ياعبد الرحمن محدن بذابحك إلا مشاعل طلقها قبل لتذبحك


عقد عبدالرحمن حجاجة وقال بعناد:
-إنتي شكلتس كبرتي بالسن وبديتي تخرفين مشاعل زوجتي وإن ذبحتني حلال عليها


وتركهم










##‏##
فيصل وهو يصحى من النوم
جلس على السرير :
-أعوذ باالله من الشيطان


مسح على شعرة بيدة أخذ الجوال ودق على أمة:
-الو


هند:
-هلا والله ياحياالله ذا الصوت


فيصل:
-الله يحييك وش علومك ياالغالية؟ وخواتي وش أخبارهم؟


هند:
-كلنا بخير دام إنك بخير إلا سويت أشغال زواجك؟


فيصل:
-ماعندي وقت ياالغالية حتى وقت الراحة ضيق عندي


هند:
-الله يكون بعونك طيب وش رايك نرتب أنا وخواتك الموضوع؟


فيصل:
-بصراحة ودي لكن إنتي تعرفين ترى زواجاتهم ماتصير إلا في بيوتهم لايعرفون دي جي ولا فنانة ولاغيرة وإن كثرو جابو طقاقة


هند:
-طيب إنت حدد متى الزواج وأنا بحجز لك الفندق ورحلة شهر العسل وشرايك؟


فيصل وهو مبتسم:
-الراي رايك يالغالية


هند:
-أجل إتفقنا يابوي


فيصل:
-أوكية ياالله مع السلامة


هند:
-مع السلامة


وقف فيصل أخذ المنشفة ولفها على خصرة ودخل الحمام














‏####
حصة وهي داخلة بيت ناصر معصبة وتهاوش وتتبعها فاطمة وتقول:
-يمة تعوذي من إبليس وخلينا نرجع لبيتنا


حصة:
-إسكتي إنتي ولاتتدخلين........نورة يانورة


أقبلت نورة عليهم مستفهمة:
-خير وش فيتس ياحصة؟


حصة:
-خير؟ أي خير الي تقولين عنة؟ولدي فهد صار لة حادث


نورة وهي تمسك يد حصة:
-دريت ياخيتي الله يكون بعونكم ويساعدة


إنفضت حصة يدها عن يد نورة:
-كل الي صار لولدي بسبة بنتتس سويرة


نورة:
-إنتي وش تقولين؟


حصة وهي تبكي:
-ولدي بغى يموت بسبتكم...... بناتتس مثلتس ثعابين


نورة:
-إحترميني ياحصة تراتس في بيتي


حصة:
-لية إنشالله بتطرديني؟


فاطمة:
-يمة خلاص عيب والله عيب


حصة:
-إنتي مالتس شغل إسكتي


أقبلت عليهم مشاعل ووراها جواهر وسارة


قالت حصة بإستهزاء:
-كملت والله........ لاتفرحين يامشاعل بخلي عبدالرحمن يطلقتس وبخطب لة ذيك البنت الي هي تستاهلة


مشاعل:
-على القوة ياعمة


حصة:
-لاتقولين لي عمة عمت عينتس........ وإنتي ياسارة لاتظنين إن فهد بيموت إذا ماأخذتس ترى بنات الديرة كثير


إبتسمت سارة وهي ساكتة


قالت نورة:
-خلصتي من كلامتس ولا باقي؟


حصة بقهر:
-الله لايبارك فيكم من عايلة بتذبحون علي عيالي


فاطمة:
-يمة خلاص


حصة:
-من كثر سيأتتس يانورة شوفي وش سوى فيكم ربي فضحكم في جواهر


عقدت جواهر حجاجها وقالت:
-إذا أمي ماتكلمت أنا بتكلم...... روحي لبيتتس ياعمة واتركي الناس بحالهم


حصة:
-تطرديني ياجواهر؟


جواهر:
-إفهميها مثل ماتبين إحترمتتس أكثر من اللازم بس إنتي ماتستاهلين إعذريني يافاطمة على الكلام الي أقولة لأمتس


حصة:
-طلع لتس لسان يابنت نورة عشانتس بتاخذين الشيخ فيصل


حست جواهر إن حصة لمست اللحم الحار = تعدت الحدود خصوصا إذا كانت هذي الحدود هي {فيصل}:
-روحي لبيتتس ياحصة


حصة وهي واصلة حدها من القهر:
-هين ياجويهروة تطرديني ؟ يكون في علمتس ترى عرستس منيب حاظرتة


وطلعت حصة


تقدمت فاطمة ومسكت يدين جواهر وهي تبكي قالت:
-إعذروني على هرج أمي والله إنها فشلتني وإني مستحية منكم


نورة:
-فديتتس يامي والله إننا عاذرينتس ولاتستحين إنتي عارفة أمتس


مسحت فاطمة دموعها ودموع جواهر الي نزلت على خدودها:
-لاتبكين ياجواهر إنشالله يتم زواجتس بفيصل وترتاحين من هرج الناس وأولهم أمي


هزت جواهر راسها ودخلت غرفتها


كان كل تفكيرها محصور بشخص واحد وهو {فيصل} قالت:
-وينك يافيصل؟ ليتك عندي وتساعدني في هذي الورطة الي أنا عايشة فيها ليتك تحس فيني وتحس بشعوري
‏











####
في الصباح في بيت مطلق


محمد وأمة جالسين يفطرون
قالت وضحى:
-محمد يابوي ترانا حددنا موعد زواجك إنت وأخوك


محمد وهو عاقد حجاجة:
-ومتى؟


وضحى وهي مبتسمة ومبسوطة:
-بعد إسبوعين وأتمنى إن فهد يطلع من المستشفى قبل زواجك


محمد:
-لية دايم تقررون قبل لتقولون لي؟


وضحى:
-إنت عارف أبوك هو الي قرر هذا القرار يقول عشان يكون زواجك وزواج منصور بيوم واحد لأن زواج منصور محدد من زمان


محمد بعصبية:
-وأنا وش دخلني بقرارات أبوي البنت الحين تلقينها مزنوقة الوقت مايساعدها تتقضى


وضحى:
-إحنا لما رحنا نخطب من عندهم قلنا إننا نبي الزواج بعد شهر


محمد:
-الى هذي الدرجة مستعجلين؟ والله حالة


وضحى:
-روح للخياط وفصل لك كم ثوب وإشتر لك بعض الأغراض ترى الوقت مثل ماقلت ضيق


محمد وهو يوقف:
-أنا وين وإنتي وين؟












##‏##
في بيت ناصر


سارة تسوي القهوة والشاهي ومشاعل تكنس الأرضية وجواهر تغسل الملابس ونورة تخيط بعض الأقمشة


نورة:
-يمكن بعد العصر أروح لبيت مطلق وأشوف وضحى بصراحة من زمان عنها


مشاعل:
-مشغولة بزواجات عيالها


جواهر:
-بصراحة إستعجلو بزواجهم وش يمديهم يخلصون من الأغراض


فجأة


دق الباب الخارجي


لحظة صمت عمت المكان قالت نورة:
-مين الحين جاي وناصر مهو في البيت؟


جواهر:
-بروح أفتح الباب


طلعت جواهر وتقدمت للباب الحديد وقالت:
-مين؟


الصوت الرجولي الغليظ بإبتسامة:
-عمي أبو مشاعل موجود؟


شكت جواهر باالصوت:
-لاوالله مهوب موجود رايح لحلالة مين أقول لة إذا جا؟


إتسعت إبتسامة الصوت الرجولي:
-قولي لة فيصل ..............

••• ܓܨ•••

يسلموو ع البارت
روووووعة

الله يصبرتس ع عمتس يامشاعل...اللحين بتحط حرتها فيتس اذا اعرستي ع ولدها عبدالرحمن
وحلو انو عبدالرحمن مايرضى عليتس ومتمسكن فيتس

..

وجواهر اللحين الشيخ فيصل
جاء لباب
بيتكم ونااسة اتوقع بخلك تفتحين الباب
مستحيل يرووح من غير مايشوفتس
خخخ

نحتري التكملة

يعطيك العافيه بنوته

اهلين تسلمين الى القصه رائعه

جواهر وفيصل ثنائى رائع فيصل بالمباحث واتوقع محمد له يد بالعصابه الى يدورون عليهم

عشان كذا مايبى يتزوج
يعجبنى عبدالرحمن وتفكيره
بنتظارك