-|[ الحب / دموعٌ قاسية ونواحٌ صامت..! ]|-

أكمل وصف لهم ..
بأن عواطفهم .......!
ألوانها لا هي من ألوان الطيف،
وكلماتها، لا تنتمي لمستنقع البشر،
وأحاسيسها، عنيفة حتى الموت،
ودموعها، أقرب للانتحـــار،
ومشاعرها، ملتهبة كالبركان،
وواقعيتها، أشبه بالجليد،
وقوتها، من الحب، والحبْ، والحب ..
×
×
×
نفس الوصف كان يستدعي لقاء سعيد بـ ريم ..
اللقاء اللي ختمه كل الطرفين بدموع غزيرة ..
حتى ميثا ..
حتى سارة ..
يلسوا يصيحون بحسرة ...
ماعرفوا نوعية الحوار اللي استوى بين ريم وسعيد ..
لكنهم عرفوا شي واحد ..
"فشلت خطتهم" ..
×
×
×
في سيارة ريم ..
ريم طايحة ع السكان وتصيح بقوة ..
تصيح بشكل محد يتخيله ..
منهارة ..
وحاسة بألم غريب ..
ذاك الألم اللي لا يمكن لـ بشر انه يوصفه ..!
س ع ي د ..
رااااااااااح نهائياً عن حياتها ..
وشو اليديد دامها عارفة هالشي وعارفة انهم بيفترقون ؟
ليش مستغربة ؟
وليش مستنكرة هالشي ؟
لأنها عرفت ان سعيد يحبها مثل ما هي تحبه ؟؟
أو لأن الحياة .... برهنت لها انها ممكن تنحب ..
مب بس تحب ..........!
×
×
×
كانت عيونه حمرا وواضح عليه انه صاح وايد ..
دخل السيارة بشموخ ..
حرك سيارته وميثا تطالعه بقلق ..
تأملت ويهه المتألم ..
نزلت دموعها بقوة ..
سعيد يحبها وميت عليها ومستحيل يتقبل غيرها ..
لكن شو الفايدة ؟؟
شو الفااااااااااااااايدة ؟؟
العقل يرفض مثل هالحب ..
حب بدون نهاية مقنعة ؟؟
مستحيل ....
تكلم سعيد بصوت حزين : ميثا ارجوج لو شو يستوي ما تطرين هالسالفة لـ حد .. انسي ريم .. وانسي كل شي يانا منها..
ميثا بغصة : بس انته تحبها ..
سعيد وهو يعض شفايفه بقهر : أحبها بس الدنيا كلها رافضتنها .. شو الفايـدة ..!!
ميثا نزلت دموعها : تحدى الدنيا كلها عشانها ..
سعيد : بتحدى الكل .. إلا حارب يا ميثا .. إلا حـارب ...............!
لمعت عيونه بـ لمعان غريب جداً ..
ماله أي تفسير أبداً لـ ميثا ..
بس فسرته حسب توقعها إن سعيد مستعد يموت بس عشان يعوض حارب المرارة اللي عاشها معاه قبل ...!
|[]|
ومع مرور الأيـام ..
في شقة ريم ..
سارة وهي تطالع ريم مستغربة : انتي بلاج صاحية ؟
ريم : شو بلايه بعد ؟
سارة : مب لازم تسيرين اليوم سوق الاسهم لاحقة ..
ريم بجمود : تبيني عيل أحكر عمري ؟ خلني أجابل شغلي ..
سارة بحنية : حبيبتي قولي لي شو استوى هاك اليوم ويا سعـ........
قاطعتها ريم بعصبية : سارة هالموضوع انسيه خلاص ما في أي رابط يجمعني بـ سعيد .. انسي انسي ..!!!
سارة بإحباط : اف منج ..
قطع كلامهم رنة موبايل سارة ..
شهقت سارة وهي تجوف المتصل : لحقي أحمد متصل ..!!
ريم عقدت حياتها : ردي عليه ..
سارة برعب : مابا ما فيه ..
ريم بإصرار : ردي عليه ووقفيه عند حده ..
سارة : بحطه ع السبيكر ..
×
×
×
أحمد : ألو ..
سارة : الو نعم ؟
احمد : ساعة لين ما تردين ؟
سارة وهي خايفة شوي : خير اخويه بغيت شي ؟
احمد باستهزاء : اخوج ؟ هـه حلوة هاي ..
سارة وهي تجوف ريم تأشر لها بكلمة : فكني شو تبا ؟
احمد : وصلتج ورقة طلاقج ؟
سارة بعناد : هي وكان احلى يوم في حياتي ..
احمد بنبرة عصبية : صج والله ؟؟ حتى انا حسيت انه هم وانزاح ..
سارة بقهر : بس وين بتروح من ربك يوم انك جتلت اللي في بطني ؟؟ الله يمهل ولا يهمل ..
احمد طنشها : سمعي .. انا ياي بس احذرج واقول لج اني بتزوج واباج تقطعين صلتج فيه ..
سارة بسخرية : صج والله بالبركة .. الله يعينها .. ما قلت لي منو ؟؟
احمد : ممثلة مشهورة تسواج وتسوى عشرة من طوايفج ..
سارة : هـه .. ما يهمني كلام الحثالة أمثالك .. نعم شو تبا ؟
احمد : ابتعدي عن حياتي ..
سارة : انته اللي ابتعد ..!
احمد بكره : ببتعد .. بس مالج عندي شي ..
سارة : هـه .. حتى لو عندك شي انا ماباه ..
احمد : اذا جي عيل اتفقنا ...
سارة : بس تذكر ان حسبي الله عليك دنيا وآخرة في اللي سويته فيني وفي ريم ..
احمد : سيري لاااا ..
وصك في ويهها ..
سارة بقهر : طاعوا صك في ويهي..
ريم : خله يولي .. ما عليج منه الخبيث ..
سارة : حسبي الله عليه ..!! المهم ارتحنا منه ..
ريم : الحمدلله ..
سارة : ريم شو رايج بالمؤخر مالي وفلوسج وفلوس الشقة ناخذ لنا بيت يديد ..
ريم بألم : بيت يديد ؟ ليش ؟
سارة : احس جو الشقة يخنق .. ولا شو رايج ؟
ريم وهي تتذكر سعيد فهالشقة بألم : لا .. خلنا على جي فترة لين ما أيمع مبلغ أحسن وعقب الله كريم ..
سارة : اللي تجوفينه ..!!
|[]|
أم راشد بمفاجأة : ماشاااا الله ..! مبروووووووك تستاهلووون ..
أم ناصر ابتسمت بخبث لـ لطيفة اللي وقفت مبلمة من الخبر : اقولج روحه نقى البنية عيبته ..
ام راشد تطالع ام محمد: وقوم منو خطبوا دانة ؟
ام محمد : هم نفسهم اللي خطب عندهم ناصر .. هو الاصل ان الولد خطب دانة .. وناصر جاف اخت الولد وخطبها ..
لطيفة باصطناع : وبتسوون عرس واحد ؟
ام ناصر : مادريبها ام محمد جان تطيع ..
ام محمد : افا عليج هذا عرس ولدج وانتي أولى تقررين.. وبعدين انتي فصلي وانا ألبس ..
ام راشد بفرحة : الله يوفقكم يا ربي .. يتهنون ان شـا الله ..
×
×
×
ومع مرور الوقت ..
ام ناصر : انا بترخص الحينة .. مواعدة ام العروس الحين .. يلا عيل اسمحولي ..
ام راشد : يالسة بعدج ..
ام ناصر : ما عليه اليايات أكثر وانتي بعد تعالي عندنا .. واسمحيلنا جان زعلناج في يوم ..
ام راشد بتأثر : مسموحة فديتج .. ولا والله فـ حياتي ما شليت عليكن انتن خواتي ..
ام ناصر : تسلمين والله .. ها ام محمد مب ياية ويانا ؟
ام محمد بنظرة خبيثة : لا محمد ولدي بيمر ..
ام ناصر بغيرة : هيه الحين من رد محمد من السفر وانا مسوتلي بو لباس ..
ام راشد : الهرررم رد من السفر ولا يا يسلم على خالته ؟
ام محمد بابتسامة : ولا يهمج بقوله ينزل يوم بيمر عليه ..
ام راشد : ان شـا الله ..
×
×
×
بعد ما ظهرت ام ناصر .
ام راشد تطالع لطيفة: وينها مرت اخوج طولت ؟
لطيفة : توني اتصلت بها تقول أخروهم لين الحين ما دخلوهم حق التطعيم ..
ام محمد : حليلها بتطعم الولد ؟
لطيفة ابتسمت مجاملة : هي .. وعاد اونه البجر مهتمين اثنيناتهم وسايرين خخخ..
ام راشد : اسميج انتي حق التعليقات يالسة ..
لطيفة : هههههههههه ..
ام محمد : لا عاد ام راشد كله ولا لطيفة ..
لطيفة افتشلت ..
ام راشد : ليش عاد ؟؟ تبدين بنت اختج على اختج ؟
ام محمد : لا والله بس أبدي خطيبة ولدي وام احفادي إن شا الله على أي حد ثاني ..
احترق ويه لطيفة ...
ام راشد بابتسامة : حق منو من عيالج ؟؟ لا تقوليلي حق محمد ؟
ام محمد : والله انه روحه من رد قال انه يباها ..
افتشلت لطيفة من الخاطر ونشت من مكانها وقلبها يدق ..
محمد يباني ويخطبني ؟؟
تجاهلت كلامهم وهم يلسوا يضحكون على نشتها وفسروها مستحى ..
فعلاً كانت مستحية بس خايفة بعد ..
تذكرت حوارها من فترة ويا راشد يوم كانوا في المطعم ..
×
×
×
راشد بجدية : يمكن أقدر أساعدج ..
لطيفة بصوت مهزوز : ماظني ..
راشد : تكلمي لا تتمين جيه ..
لطيفة بحزن : مابا أتزوج سعيد ..
راشد باستنكار : سعيد ؟ قصدج سعيد ربيعي ؟؟
هزت لطيفة راسها بإيجاب ..
راشد : بس هو ما خطبج عشان تتزوجينه ..!!
لطيفة بوزت : امه لمحت لي انها تباني له ..
ابتسم راشد : حركااااات ..
لطيفة نزلت دموعها : راشد انا مابا هالانسان تعرف شو اخاف منه ؟؟ يسبب لي رعب غريب ..!!
راشد استغرب : ليش كل ها ؟؟
لطيفة : من قالت امه هالكلام لي وانا خايفة انه يستوي جد .. مستحيل أقبل فيه مستحيل ..
راشد : لطيفة انتي جايفة عليه شي ؟؟
لطيفة باندفاع : هي ... يحب وحدة ثانية ..
راشد عقد حياته : معقولة ؟؟
لطيفة : هي .. (صاحت) مابا آخذ واحد يحب وحدة ثانية مابا ..
راشد يحاول يهديها : خلاص اهدي .. ما بيستوي الا الخير .. وجانه يا حزتها ترومين ترفضين محد بيغصبج ..
لطيفة بتفاؤل : صج ؟؟
راشد : هي .. ومثل ما ردينا ناصر نرده ... ليش تحبين تصيحين دوم انتي هههههههههه ؟؟
لطيفة : انته دب والله دوم تحب تعاير ..
راشد : خخخخخخخ ..
×
×
×
ما تنكر انها حبت سعيد أو بالأحرى طول الفترة اللي طافت اعجبت فيه وتمنته زوج ..
لكن اللي جافته في العرس مب هين ..
كان يطالع الممثلات ويعرفهن ..
مستحيل ترضى بواحد وصل لهالعلاقات لو شو وصل اعجابها به ..
وفكرت بـ محمد ..
خريج الطب اللي ياي من فترة جريبة للبلاد ..
شاب طموح..
على اللي تذكره انه كان خلوق وما في منه ..
لكن عيبه اخته دانة الملسونة....
تذكرت انها بنت خالتها ومستحيل تضرها خاصة انها بتتزوج ..
بس يمكن الموضوع مب جد ..
أرخت راسها وهي تدعي ان ما يستوي شي جد إلا إذا كان لهم نصيب فـ بعض ..
|[]|
ياخي انته وينك ؟؟
ربيع : ههههههه انا ياي اجازة اسبوع البلاد وراد مرة ثانية ..
تفاجئ حميد : معقولة ؟
ربيع : هي والله ما اقص عليك ..
حميد : وشو عندك في بلاد برع ؟
ربيع : ما دريت اني اكمل دراستي ؟؟
حميد بمفاجأة : ماشا الله زييييين .. بس كيف رضيت تدرس بعد هالفترة كلها ؟
ربيع : هلي طلبوا مني هالشي وما اقدر اردهم ..
حميد : يلا زين الحمدلله المهم تيسرت امورك ..
ربيع : الحمدلله .. تعال خبرني انته عن اخبارك ؟ بعدك بطالي ؟
حميد : ههههه خبرك عتيج انا الحين موظف في شركة وراتبي الحمدلله زين ..
ربيع : الحمدلله ..تصدق يمكن مجابلنا لبعض كان هو ويه النحس في حياتنا .. ولا جوف من تفارجنا كل واحد توفق..
حميد : ههههههههههه لاحظت توني هالشي ..
ربيع وهو يحط ايده ع جتف حميد : يلا بالبركة وعقبال ما تعرس ونحضر عرسك ..
ابتسم حميد بدون تعليق ..... !!
|[]|
ومـرت الأيـام ..
والشهـور ..
لتمر سنة على أبطالنا ..
سنة كاملة كنا بعاد عنهم ..
في هالسنة ...
استوت أحداث مهمة ..
منها :
×
حمل جمانة ..
اللي طير حارب من الفرحة وزاد تعلقه بجمانة ..
اهتم بها ..
واهتمت هي فيه ..
وحسوا إن مافي أحلى من الحب بعد الزواج ...
يكون هو الحب اللي لا شوائب ولا تناقض فيه ..
×
خطوبة ميثا من فيصل أخو دلال ..
خبر مفاجئ صح ..
لكن القسمة والنصيب فوق أي شي ..
من بعد لقاء دلال بـ ميثا في المطعم وهي حاطتنها في بالها ..
خاصة ان فيها كل المواصفات اللي طلبها فيصل ..
وفيصل على انه ما كان مقتنع بذوق دلال وانه يخطب قبل لا يجوف ..
تخبل ع ميثا ..
واسره حياها ..
وملامحها المميزة ..
نسيتوا انها اخت حارب وسعيد ^.* ..
بس اتفقوا انه يحيرها لين ما هو يرتب أموره عدل ..
ولين ما ميثا تكبر وتعقل شويه >> حلوة هاي خخخ ..
×
ملجة لطيفة بـ ولد خالتها محمد ..
×
زواج سـارة ........!!!!!!!!
×
سعيد × ريم = لا جديد أبداً ..
|[]|
بعد مرور السنة المليئة بالأحداث ..
ميثا بفرحة : ألف ألف ألف مليون بليون ترليون مليار بليار مبرووووووك ..
حارب شق الحلج : بنت صح ؟
ميثا : هيييييييه .. تهبل تهبل حارب والله ع صغرها بس كوبي بيست انته ..
حارب وهو ياي بيدخل : خلني اسير اجوفها ..
ميثا زخته : اقول استريح حرمتك رقدت على طول ههههههه .. ايلس بشر سعيد وعقب يصير خير ..
×
×
×
ولدت جمانة أخيراً ..
ويابت بنت لين الحين ما رسوا على اسم معين لها ..
×

حارب وهو يصك عن سعيد : مستانس اكثر عني ..
ميثا بفرحة : من حقه استوى عم ونااااسة .. اخبرك بسير اجيك جان دخلوها الغرفة الخاصة ولا بعدها ..
×
×
×
في الغرفة .. / أخيراً ..
حارب بإبتسامة حب لـ جمانة : مبروك علينا ..
جمانة وهي مستحية من وجود ميثا وعمتها ام حارب : الله يبارك فيك ..
ام حارب : ها شو نويتوا تسمونها ؟؟
جمانة ابتسمت : شو رايك حارب ؟
حارب : انتي شو رايج عمري ؟؟
ميثا وهي تضحك : عمري ها ؟ ههههههه .. انا من رايي تسمونها ستارة ..
حارب : سمي بنتج هالاسم لا تقربين صوب بنتي ..
ام حارب : بدوا بدوا هههههههه ..
ميثا : طاعوا .. انزين شو تبا تسميها ؟
حارب بتفكير : شيخة ؟
ميثا : لاااااا .. شيخة ربيعتي ..
حارب : فاطمة ..
ميثا : لاااااا .. فاطمة بعد كانت ربيعتي..
حارب : ميثا ..
ميثا : لااااااا والله ؟؟ لو سمحت بلا تقليد لا تاخذون اسمي انا ابا اكون مميزة ..
ام حارب : ربي يعين فيصل ..
ميثا بدلع : يتمناني أصلاً ..
حارب : بسير اقول له انه غبي يوم بغى يحيرج له ..
ميثا : لو سمحت عن الغلط هو مب غبي .. بس الغبي هو اللي يقول عنه غبي ..
جمانة : ههههههههههه ودرتوا اسم البنية ورديتوا تضاربتوا ..
ميثا : خخخخ .. خلني اجوف سعيد شو اقتراحه ..
×
×
×
سعيد : أختار لها اسم ؟
ميثا : هي ..من زمان قايلين لهم انها بنت وما اختاروا لها اسم ..
سعيد : رغد .. رهف .. سعد ..
ميثا : هههههههههه سعد عاد ؟؟
سعيد : شدراني بكم حد قال لج اني لجنة اختيار اسماء المواليد ؟
ميثا : يلا عااااد ..
سعيد : ماعرف ..
ميثا : شو احلى اسم عندك ؟؟
سعيد وهو مب مستوعب : ريم ..
شهقت ميثا وكلهم طالعوها .. من فشيلتها ضحكت : ههههههههه تبا تفضحنا سعيد الله يهديك ؟؟
سعيد بقفطة : ايه لا ما كنت اقصد ..
ميثا بخبث : هي ما تقصد ..
سعيد عصب : اقول صكي لأصك في ويهج ..
ميثا : هههههههههه اوكي جاو ..
×
×
×
بعد ما صكت عنه ..
حارب : ها شو قال وضحكتي جي ؟؟
ميثا تورطت : ها ؟؟ مممم لا يقول سموها على اسم المستشفى ...
ام حارب : الحمدلله والشكر تخبلتوا انتوا ؟
ميثا : خخخخخخ
حارب : لقيتها ..
كلهم : شووو ؟؟
حارب : نسميها قلب دبي ..
ام حارب : ويييييه محلاة هالاسم .. ولا شو رايج يا قلب دبي ؟
قلب دبي : تتشرفون بإسمي بس حرام لا تعقدون البنية بإسم مركب ..
حارب : لا أنا حالف ما نسميها الا قلب دبي ..
قلب دبي : اقول لا تتفلسف بكتب غصبن عنك مهرة .. متفقين من بداية القصة لا تخل الشروط الحين ..
حارب : خخخخ .. انزين نرجع للقصة .. خلاص عيل نسميها مهرة ..
جمانة صدت على ميثا : ها ما عندج ربيعة بهالاسم ؟؟
ميثا بتفكير : لا الحمدلله احمدوا ربكم .. فرجت ...
|[]|
في البيـت اليـديد ..
ريم : ماشا الله والله أدبج سالم وخلاج تدخلين المطبخ ..
سارة بوزت : جب .. أنا أصلاً مادري كيف رضيت .. يختي احبه وما اروم أرد له طلب ..
ريم ابتسمت لها : الله يهنيكم يا رب .. اصلاً انتوا تستاهلون بعض ..
سارة بكوميدية : آه ياني .. تتزكري أول حاجة حصلت لما آبلنا بعض ؟؟
×
×
×
خلال السنة اللي طافت قررت سارة تشتغل في احدى الدوائر الحكومية ..
على ان سارة كانت ام لسانين .
بس كان الكل وياها وتسولف ويا الكل وتأقلمت وياهم ...
والأحلى ان الكل عاملها كأي إنسانة ولا جنها مثلت قبل ..
في هالفترة كانوا ايونها مراجعين من برع الدائرة ..
وكان دايماً يجوفها ..
ومعجب فيها خاصة انها كانت مرحة مع الكل ..
وتوطدت العلاقة يوم عن يوم بدون ما يكون فيها علاقة بالتلفون او شي ..
مجرد انه سأل عنها وخذ معلومات عنها ..
" سالم " عرف انها كانت تمثل قبل ..
بس ما همه هالشي كثر ما همه يدور الشي اللي فقده في زواجه السابق ..
واللي كسر كل شي فيه ..
ذاك الزواج الغريب اللي أحبط كل شي فيه ..
وفوق ها طلعت حرمته ما تبا اتيب عيال ..
ولقاها شرات الصفعة له ..
لكنه طلقها ..
ويمكن لقى في سارة شي نحن ما لقيناه فيها ..
ومع الأيام وضحت له سارة شروطها ..
وانها ما بتتزوجه الا وريم ساكنة وياهم ..
ريم رفضت هالشي ..
لكن سالم تفهم الوضع ..
وكان عنده بيته خلى الطابق اللي فوق فيه كله لـ ريم ..
واللي كرامتها ما سمحت لها الا انها تدفع له مبلغ ضخم كأنها مأجرة البيت منه ..
والطابق الوسيع اللي تحت له هو وسارة ....
×
×
×
ريم : اسمع صوت سيارة .. وصل ريلج يلا انا سايرة فوق ..
سارة : وليش تستحين منه تراه شرات اخوج ..!!
ريم : ما استحي منه بس انتوا توكم معرسين ولازم تاخذون راحتكم ...
سارة : عن الحركات هو أصلاً يتضايج اذا عرف انج مب ماخذة راحتج بسبته ..
ريم وهي تسحب الصينية المتروسة اكل لها : استسمحي لي منه والله بعدني ما تعودت ان شـا الله مع الايام يمكن . .يلا جاااااو ..
×
×
×
مـر الوقت وسارة تظهر الفطاير من الفرن ..
ما وعت إلا باللي يهمس لها في إذنها : مسـاء الورد ..
ابتسمت سارة بدلع : مساء المسك والعنبر ..
سالم وهو يشم ريحة الاكل : يا سلام شو مسوية ؟
سارة : خفايف حق العشا .. جوف ترى ان كان مب حلو تراني بعدني اتدرب ..
سالم : ولا يهمج حياتي .. بصبر لين ما تسوين لي غوزي عادي عندي ..
سارة : غوزي ؟؟ ههههه احلم انته شو وراك ..
سالم : لا ما بحلم انتي اكيد بتسوين لي وجريب بعد ..
سارة وهي حرانة من جو المطبخ : يصير خير ..!!
|[]|
في بيت أم حارب ..
ام حارب : وايد أجوفكم ماخذين مقلب بـ عماركم ..!!
ميثا بدلع : والله انا الكل يشهد ع جمالي واني اطيح الطير من السما ..
سعيد : لا يعني نحن الخسّف مثلاً ؟؟
حارب : لا قصدها ان الجمال كله فيها نحن ما خذنا شي ..
سعيد وهو ميود ضحكته : يمكن تقصد انها خذت جمال ابوها ..
ميثا : شو يضحك ويا هالويه ؟؟
سعيد بعبط : يعني ابوج اسمحي لي مب لين هاك الزود شكله عادي ..
ام حارب : ويييييه مااااالت وايد ماخذين مقلب في عماركم .. تتحسبون ابوكم كان حلو ..؟؟؟(تطالع سعيد وحارب)..
ميثا : وييييه ظهر الحق ظهر الحق..
ام حارب : ولا انتي حتى مب من زين ابوج .. اصلاً انتوا ظاهرين حلوين عليه ..
سعيد يعايب على ميثا : وييييه زهر الهك زهر الهك ..
ميثا : زهر الهك في عينك انزين ؟؟ قلت ظهر الحق ؟؟
حارب : هههههههههههههههههه قوية سعيد قوية ارحمها ..
سعيد : ما تستاهل رحمة هاي .. لسانها هالطول انا لازم أحذر فيصل من الحين ..
ميثا بدلع : عادي حذره ما يهمني ..
سعيد : ع طاري الحذر صح .. حبيت ابشرج (يطالع ميثا) ولو ان لسانج طويل .. ان فلوسج اللي استثمرتها تضاعفت ثلاث مرات يمكن الحمدلله ..
ام حارب بمفاجأة : والله صج ؟؟ شقايل ؟؟
سعيد بفخر : تحيدون يوم قلت لكم اني ابا بيتنا الجديم ؟؟
حارب بعدم تصديق : سويت فيه مشروع ؟؟
سعيد : تقريباً ..
ام حارب : شو مشروعه ؟
سعيد : درست في الجامعة عن تخصص الميكانيكا كـ بداية بس .. وعرفت ان هالتخصص مطلوب وبقوة في دبي .. فقلت ليش ما أفتح ورشة ويكون الموقع فريجنا الأولي ؟؟
حارب بامتعاض : بس الارض صغيرة ..
سعيد : بفلوس امايه اللي استثمرتها قبل اشتريت الأرض التجارية اللي وراه .. وبنيت الورشة ... والحمدلله التجارة ماشية وكل يوم يزيدون الزباين.. ..
حارب وعيونه تلامع : والبيت ؟
سعيد ابتسم : البيت مثل ما هو .. بس بتعديلات مني ..
حارب بأمل : يعني أروم أسير له ؟
سعيد بإبتسامة صافيه : بتنور البيت بوجودك ...
نش حارب صوب سعيد وحظنه : والله كبرت في عيني يا اخوي .. ظهرت أحسن مني في وايد أشيا ..
دمعت عين ميثا : لا تصيحوني ايييييه ..
ام حارب صاحت خلاص : الله لا يفرقكم ان شـا الله .. نشي ميثو احضنيهم بعد عشان ما تفترقون ثلاثتكم ..
رفع حارب نفسه عن سعيد اللي كان يبتسم بحب لميثا ..
فج ايديه عشان يستقبل حضن ميثا الصياحة ..
ركضت صوبه وحضنها بقوة وهي تصيح ..
ما تدري ليش صاحت ..
بس اللي تعرفه شي واحد ..
سعيد توفق في كل شي ماشا الله ..
إلا بـ حب ريم ....!!!

-|[ الحب / لا يضاهي حب ابنة عم الياسمين ]|-

كلهم يصيحون وجالبين المكان مناحة ..
وبعد مرور الوقت ..
دخلت جمانة وهي مصدومة ان كلهم يصيحون : بسم الله عمتي شو استوى ؟
ام حارب وهي تمسح دموعها : ماشي تأثرنا شوي .. مهرة رقدت ؟
جمانة : هي توها .. (وهي تطالع ميثا) شو استوى ؟
ميثا وهي تمسح دموعها الثايرة : ريلج الهرم حضن سعيد وتأثرنا للمنظر ..
ابتسمت جمانة بحب لـ حارب ..
بس ما كملت ابتسامتها الا والجهاز اللي شالتنه يظهر صوت مهرة وهي تصيح ..
جمانة بتعب : هاي شكلها ما تبا ترقـد ..
وسارت عنهم ..
حارب كان يطالع خطواتها وهو مبتسم وراضي شكله ..
ما حس إلا بـ سعيد وهو يسوي حركات لـ امه وميثا اونه يعني متخبل ع حرمته ..
ومن صد عنهم لاحظت ميثا ويه سعيد المتألم ..
مشى لـ برع وظهر ..
تذكرت ميثا ألم سعيد تجاه ريم ...!!!
ولا إرداياً نطقت : حارب تحب جمانة انته ؟؟
حارب تفاجئ : معقولة أكرهها ؟؟
طالعت أمها بتوسل ..
ام حارب فهمتها : قصدها اختك ان تحس انها شي مهم في حياتك ؟؟
حارب ابتسم بأمل : أصلاً جمانة ومهرة هم الشي الوحيد اللي يهمني في حياتي ..
ابتسمت ميثا لـ أم حارب ..
واللي بادلتها الابتسامة بتفاؤل ...
معقولة في أمـل ؟!
|[]|
في بيت أم راشد ..
يالسين في الصالة ..
راشد .. ودلال .. ولطيفة اللي يالسة صوب تليفون البيت وتسولف ..
ام راشد طبعاً مقرها الدائم صوب منصور حفيدها ..
الفلم كان حلو ..
بس تأمل دلال كله انصب تجاه راشد ..
الحب اللي ما اكتمل الا بالزواج منه ..
والصعوبات اللي مرت فيها خلال هالزواج ..
كل هالأشيا ما تحسسها إلا بشي واحد ..
السعادة والرضا ..
الحمدلله ..الحمدلله يا رب انك عطيتني على قد نيتي ..
يا رب سخر راشد لي ولولدي ..
وابعدنا عن الحرام .....
طالعها راشد بإبتسامة : لهالدرجة أنا وسيم ؟
دلال بحب : اتشك بوسامتك ؟
راشد : لا من خذتج وانا احس اني أحلى واحد فهالدنيا ..
دلال ابتسمت : ايه لازم مو بعل دلال ؟
راشد : فديت الواثقين بس ..
دلال : ايه واثقة ..
راشد بخبث : خلي الثقة صوب دلول انتي مب قدها ..
دلال بتأنيب : آنا مو قدها ؟ هين حبيبي آنا مو قدها .. زين زين نشوف ..
راشد ابتسم لها بحب : فديتج والله محد يسواج فهالدنيا ..
دلال : حتى انت يا بعد عمري ..
ما انتبهوا الا لـ لطيفة وهي تعلق : يا سلام ع الرومانسييييية كلها ..!!!
دلال تقفطت : يه مو كنتي تتحجين ع التلفون ؟
لطيفة تحرك حواجبها : هي بس صكيت من جفت البلابل المغردة تسولف ..
دلال بإحراج : آسفين والله ..
راشد : ليش تتأسفين الأخ محمد مب مقصر مشبعنها رومانسية ..
استحت لطيفة : رشود عن البياخة ..
راشد : انزين انزين انا بايخ استويت .. (نش من مكانه) آاااااه اقولج بس تبين حفاظات للديناصور ولدج ؟
دلال بوزت : ولدي مو ديناصور ..
راشد : ههههههه اقصد القمر ولدج ؟
دلال : ايه جذي احسن .. ايه بس حفاظات ولا تنسى المناديل معاهم ..
راشد : اوكي يلا بسير ..
دلال : الله يحفظك ..
×
×
×
دلال : ها لطوف اش رايج بمحمد ؟
استحت لطيفة : والله ماشي منه .. طيب ويحبني ..
دلال : تحسين انج تحبينه ؟
لطيفة بحيا : لازم أجاوب ؟
دلال : مو لازم تجاوبين لاني قارية بعيونج هالحب له ..
لطيفة : هههههههه دبة ..
دلال : ههههههههههه .. زين بسألج ما كلمتي ميثا ؟
لطيفة : لا والله بس المسجات بيننا .. بعدين هي خطيبة اخوج مب خطيبة اخويه انا ..
دلال : ههههههههههه خله يملج عليها بعدين ازعجها ..
لطيفة : ههههههه اخوج نكتة من جافها حجزها ..
دلال : اي لاني قعدت ازن على راسه وهو شافها استخف بعد ماشا الله عليها تهبل ..
لطيفة : ربي يهنيهم ان شـا الله ..
|[]|
في إحـدى مولات دبـي ..،
أم حارب : ميثا ..
ميثا وهي تطالع أمها بقلق : ها امايه ؟
ام حارب بهمس : وينها ربيعتج ؟
ميثا ع نفس الهمس : قلتلها صوب هاك المحل اللي اتفقنا عليه ..
طالعهم سعيد بشك : بلاكم تتصاصرون انتوا ؟
ام حارب : سلامتك بس أسألها عن المحل أخافها ما تندل وينه ..
ميثا وهي تطرش المسج : هي خلاص جريب نحن ..
×
×
×
مـر الوقت ..
رن موبايل ميثا برنة وحدة بس حسب الإتفاق ..
زخت ميثا سعيد من إيده ..
وغمزت لأمها : سعيد تعال جوف هالبدلة ..
×
×
×
في نفس المكان ...
ريم وهي تتأمل البدل : من متى انتي تلبسين جيه ؟؟ (تطالع سارة بشك) انتي شو عندج من الصبح تضحكين وزاخة الموبايل ؟؟
سارة وهي ميتة من الضحك : ماشي ههههه .. سالم يالس يطرش مسجات تضحك ..
ريم : اجوف ..
سارة : ما يخصج أسرار زوجية ..
ريم وهي تأشر بإيديها : ماااالت ع الأسرار اونج عاااااااد ..
سارة : اعترفي انج غيرانة مني ..
ريم وهي تضحك بسخرية : ههههههاي لا تعليق ..
سارة : جب جب .. اصلاً الجمال جمال الروح
ريم ابتسمت وهي تحرك جتوفها : انا ما قلت شي انزين ؟ هههههه
×
×
×
وقف يتأمل صاحبة أجمل صوت سمعه في حياته ..
ونقاشها البريء ويا سارة ..
تجمدت الأزمنة حواليه ..
واختفى كل شي عن عينه إلا ويه ريم ..
الويه اللي له أكثر من سنة وهو غايب عنه ..
حس بقشعريرة غريبة وهو يجوفها ....
الله يا الدنيا ...ريـم ؟؟
لحظة ..
التفت صوب ميثا بشك ..
بس ميثا هزت جتوفها بإبتسامة خبيثة ..
بس استبعد انها تكون مدبرة السالفة خصوصاً ان امه بعد وياهم ....
ما قطع عالم الأحلام إلا صوت أمه وهي متجهة لـ ريم وسارة ..
×
×
×
ام حارب بتمثيل : انا هالويوه مب غريبة عليه .. يا ربي وين جايفتنكم ..
سارة وهي تكمل التمثيلية المتفق عليها : أم حارب ؟؟ هلا هلا هلا وغلاااااا .. عاش من شااااافج ..
صدت ريم صوبها بإبتسامة ..
ولاحظ الكل تلاشي ابتسامتها من جافت سعيد واقف وقفته المايلة ويطالعها بتمعن ..
ارتبكت بشكل مب طبيعي ..
نزلت راسها وسلمت على أم حارب ..
أم حارب بتعمد : تعالي سارة براويج شي من جفته قلت ها لج .. (سحبت ميثا) تعالي انتي بعد ..
وتموا سعيد وريم مجابلين بعض بحيرة ....!!
ونظراتهم متعلقة ببعض ..
وكل واحد لسان حاله يردد كلمات .... وكلمات ..!!
×
×
×
سعيد بنبرة دافية : شخبارج ؟؟؟
انتفضت ريم من نبرته الهادية : بخير ..... الحمدلله ..!!
سعيد ارتبك وهو يجوف امه وميثا وسارة يراقبونهم من بعيد ويضحكون : شكلها خطة مدبرة ان نجوف بعض ..
ريم نزلت راسها بإحراج : حسيت من جفتك انهم دبروا هالشي ..
سعيد بإبتسامة : بس كيف اقنعوني واقنعوج ؟؟
تكتفت ريم بحيرة : مادري ..
سعيد ابتسم لها : شكله الله رايد لنا نكمل بعض .. ولو ان المصادفات ما يمعتنا .. عندج هاييل (أشر على امه وميثا وسارة) مساندين لنا ولقصتنا اللي لازم تكتمل ..
ريم ضاع عنها الكلام : انا ما كنت ..... (سكتت) ..
سعيد وهو يحس بشي غريب : اعرف من غير ما تقولين .. (بجدية) وين ساكنة ؟
ريم طالعته بمفاجأة ..
سعيد : طول السنة اللي طافت وانا كنت ادورج في شقتج بس ما لقيتج ..
ريم بحيا : سكنت ويا سارة وريلها ..
سعيد : ماشا الله هاي كم ريل تاخذ كل سنة ؟؟
ابتسمت ريم بمرح : مادريبها ..
سعيد طالعها بنظرة جادة بعد ما ابتسم : انا بيي أخطبج .. وبحدد العرس في أجرب وقت ... موافقة ؟؟
تدخلت أم حارب اللي دمعت عينها : تسألها بعد كل هالفترة اذا موافقة ولا لا ؟
سارة : اقولك موافقة ولو بيدها بتقولك تعال تزوجني الحين .. هههههه ..
ميثا وهي تضرب سارة ع جتفها : ايه حرام احرجتي خطيبة اخوووويه ..
ابتسمت ام حارب وطالعت ريم وتمعنت في سعيد ....
صدقها ميثا يوم قالت لها ان سعيد يعشق ريم ..
وحبه لها مب أي حب فهالدنيا .....!!
ميثا يوم انها فاتحتها من فترة طويلة عن موضوع حب سعيد لريم ..
ما استساغت الفكرة ..
خاصة ان ريم كانت ممثلة ..
بس مع الوقت .. حست بسعيد اللي كان كل ما ييلس روحه تلاحظ حزنه وحيرته ..
ومع حنة ميثا اللي حلفت لها إن ريم التزمت والله هداها ..
ما كانت فاهمة شي واحد بس..
وهو سر رفض سعيد انه ياخذها اذا ما وافق حارب ..
فسرت الشي ان حارب بيرفض ان سعيد ياخذ ممثلة ..
لكنها ما عرفت العلاقة بين حارب وريم قبل ..
ولا اكيد مستحيل كانت بتشارك في مثل هالخطط..
تنهدت ....
وهي تجوف الفرحة الغريبة اللي ملت ويه سعيد ..
ما عبر بها لكن عينه اللي كان تطالع ريم بعدم تصديق تدل على أشياااا وايدة ......!
|[]|
في بيـت عم حميد ..
حميد : سكتي بنتج والله انها حشرة ..!!
جمانة وهي تهدي بنتها : بنتي أنا حشرة ها ؟ عيالك ان شا الله يظهرون لك قرون ..!
حميد : هههههههههه بعد عمرٍ طويل ..
جمانة بجدية : ليش مب ناوي تعرس ؟
حميد برفض : في هالوقت لا .. انا الحين أبني بيت يلمني ويلم مريوم لين ما تعرس .. والأهم من هذا طموحي الحين مب الزواج .. أبا أقنع أميه ترد البلاد وتعيش ويانا .. شو حلاة الحياة بدون الأم ؟
جمانة بتأثر : والله وكبرت يا حميد .. توقعتك بتتزوج عقب بتبني البيت ..
حميد : مابا أذل خواتي لـ عم ظالم ..
جمانة ابتسمت : فديتك والله ...
حميد انحرج : بس عاد .. انزين وينه حارب ؟
جمانة : قال من بيوصل هني بيتصل .. (رن موبايلها) ولد حلال .. (ردت ع التلفون) ألو .. هلا وغلا .. خلاص اوكي 5 دقايق وبييك ..
بعد ما سكرت ..
جمانة : يلا مريوم انا سايرة ..
مريم : تمي انا ملانة ..
جمانة : تبين ريلي يطلقني .. زين مستحمل اني كل يومين ياية عندكم ..
حميد : هي والله هههههه .. صح تعالي سعيد شخباره ؟؟
جمانة : يسلم عليك .. حارب يقول انه فتح كاراج ..
حميد : هي ويا ويهه .. عرف يختار المشروع الصح ..
جمانة : يعني هو اللي يصلح السيايير ؟
حميد : لا يايب عمال يصلحون .. بس هو أحياناً يشرف ع هالسوالف ..
جمانة : ايـوا .. انزين اسمح لي لازم اسير ... يلا مع السلامة ..
حميد : اتريي هاتي بنتج وين ترومين تشلين كل هالاغراض ..
×
×
×
في السيـارة ..
حارب بفرحة : الكاراج شغله تماااااام والله صج صج أبدع سعيد ..
جمانة : يعني مكان بيتكم استوى الكاراج ؟
حارب : لا .. البيت مكانه .. تخيلي نفس الشي بس صبغه وغير الأثاث ووسعه شوي .. بس حجرنا شرات ما هي..
جمانة : والله كشخة .. يبالك توديني يوم واحد ..
حارب : أكيد ولا يهمج ... (رن تلفونه) أوه اميه .. (رد ع التلفون) هلا امايه ..
×
×
×
ام حارب : هلا والله .. وينك انته ؟
حارب : في الدرب .. شحقه ؟
ام حارب : عندي لك بشارة ..
حارب ابتسم : خير إن شـا الله شو استوى ؟
ام حارب : سعيد نوى يعرس ..
حارب وهو متفاجئ : والله صج ؟؟ مبروووووووووك ..
ام حارب : هي يلا استعيل وتعال ..
حارب : منو بياخذ ؟؟
ام حارب : انته تعال وبتعرف .....
×
×
×
في بيت أم حارب .....
كلهم كانوا يالسين وفرحانين ..
دخل حارب وهو يبارك لـ سعيد : بالبركة بالبركة .. اخيراً ما بغيت ؟
سعيد : دامك قدوتي لازم أظهر عليك وما أملج بسرعة ..
حارب : ههههههههه .. انزين منو بتاخذ ..
سعيد تغير ويهه ..
سكت شوي ..
عقب طالع حارب بنظرة غريبة : ريم ..
انصدم حارب : نععععععععععععععععععععععم ؟!!!!! رييييييييييم ؟؟؟
ام حارب تغير ويهها : شبلاك ؟؟
حارب بعصبية : وما حصلت غير ريم ؟؟
جمانة تدخلت : منو ريم ؟؟
حارب طنش جمانة وطالع سعيد باحتقار : وبكل قواة عين تبا تاخذها ؟؟
ميثا تدخلت : حارب شبلاك انته .. من حقه سعيد انه يعيش حياته مثل ما انته عايش ويا حرمتك ..
جمانة بتوسل : منو هاي ريم ؟؟
ام حارب : ويديه حارب بلاك شو ياك ؟؟
حارب بغيظ : ها الانسانة ما تدخل هالبيت فاهم ؟؟
سعيد طالعه بسخرية : اوكي مثل ما تبا ..
ام حارب طالعته بمفاجأة : لحظة لحظة .. مب يعني اني سجلت البيت بإسمك انك تسمح لنفسك تتحكم منو يدخل ومنو يظهر منه ..
حارب انحرج : اسمحيلي امايه .. بس هالانسانة اللـو......
قاطعه سعيد بعصبية واضحة : جااااااااااااااااااب .. حدك عاد ولا انك تسبها فاهم ؟؟
بدى قلب ميثا وام حارب يدق بقوة ..
حارب بصوت متفاجئ من ردة فعل سعيد : تضاربني عشانها يا سعيد ؟؟ من الحين ؟؟ من الحيييييييين ؟؟
سعيد وهو يتنفس بقوة طالعه بقهر : من البداية وانا ساكت وما قلت شي .. (بصوت ضعيف) ماعرف سبب رفضك بس.. (صوته بدى يميل للصياح) أنا أحبها .. تراني عندي مشاعر مب مثل ما انته دوم تردد وكتبت في مذكراتك .. (طالعه حارب بصدمة وهو تدمع عيونه) أهنيك انك قدرت تمسكني من الايد اللي تعورني .. ما بتزوجها خلاص ارتاح.. بس أرجوك لا تمسها في شرفها تراها أشرف عني وعنك .. ما ضرت حد مثل ما نحن ضريناها ....
حارب هدى : سعيد اصبر ..
تحرك سعيد فوق بانهزام ..
وميثا تصيح بحسرة ..
ام حارب الحيرة احتلت كل شي فيها طالعت حارب بعصبية : انته ليش جي ؟!!
جمانة حطت بنتها ع القنفة ويلست تتنفس باضطراب : حارب ليش ما تباه يتزوج اللي اسمها ريم ..
نزل حارب راسه بدون ما يتكلم ..
جمانة بغصة : انته تحبها ؟؟
ام حارب بصدمة : شووو يحبها ؟؟ لا جمانة مب جي السالفة .. ريم هي نفسها الممثلة المعتزلة ريم .. وحارب رافض ان سعيد يتزوجها لانها كانت ممثلة ..
جمانة طالعته بتمعن : لحظة لحظة .. وانا كنت مذيعة ليوم واحد اشحقه خذتني عيل ؟
حارب : انتي غير وهي غير ..
جمانة طالعته بعصبية : مافي شي غير بس رفضك ماله مبرر .. البنت الله هداها الحمدلله .. ليش انته مصر على الرفض؟؟
حارب نزل راسه : ماباه يتبهدل في حياته ..
تكلمت ميثا بعصبية وهي تصيح : الا ما تباه يستانس في حياته .. انته اصلاً اناني وطول هالوقت كنت تمثل دور الاخو الطيب الحنون الرومانسي وانته اصلاً حقود .. حاقد على سعيد لانه لقى الحب اللي قدر يغيره لشخصية خلت الناس كلهم يحبونها ..
حارب : ميثا اسكتي ..
ميثا ودموعها تنزل : لا ما بسكت .. اخويه حياته تنهدم والسبة انته ..
حارب بعصبية : خله يعرس انا شو يخصني ..
ميثا بقهر وهي تصيح : تعرف انه مستحيل يعرس إلا إذا انته وافقت ..
حارب : انا مب موافق ..
ميثا انفجرت فيه ويلست تصارخ : عندك حرمة وبنت شو تبا بعد ؟ مستكثر ع الولد يعيش حياة سعيدة ؟؟ انته ليش جي قلبك أسود ؟؟
ام حارب : ميثا سيري فوق .. (بحزم) ما يخصج في هالسالفة ..
جمانة كانت تطالع حارب بصدمة ..
وكلام ميثا صدمها اكثر ..
×
×
×
بعد ما هدى الجو شوي يوم سارت ميثا ..
ام حارب : حارب قول لي الصج ليش ما تبا سعيد ياخذ ريم ؟
انحرج حارب وما تكلم ..
جمانة : جايف شي ع البنية ؟؟
حارب : لا ..
جمانة : عيل شو ؟
حارب : مب قادر اتقبل فكرة وجودها ويانا ..
جمانة بألم : قصدك فكرة وجودها كمرت اخو لك ..
ام حارب عصبت : جمانة اعقلي وسيري حجرتج .. نحن نبا نحل المشكلة ما نبا مشاكل ثانية ..
نشت جمانة بعصبية بعد ما طالعت حارب بنظرة حادة ..
وتحركت من مكانها ..
ام حارب بعد ما اختفت جمانة عن عينها : انزين .. قول لي .. شو السالفة ؟
حارب تلوم :انتي ما تعرفين السالفة ؟
ام حارب : اي سالفة ؟؟
حارب : سعيد ما قال لج أصلاً شو السالفة ؟؟
ام حارب : سعيد ما قال لي .. ميثا قالت لي كل شي ولو ان ميثا ما خبرتني جان سعيد لين هاليوم ما كان بيتحرك..
حارب : قالت لج اني كنت معجب في ريم قبل و... (ما قدر يتكلم) ..
ام حارب : كنت معجب في ريم اوكيه كـ ممثلة .. بس سعيد حبها بعد ما اعتزلت .. وحبها عشان يتزوجها وانته اللي رفضت..
سكت حارب وردد في خاطره ان السالفة صعبة .. صعبة وايد ..
ام حارب : ليش سكت قول شي ..
حارب بحزن : ما عندي شي .. نزلتوا هيبتي جدام حرمتي واخترب كل شي ... شو اقول بعد ؟
ام حارب طالعته بعصبية : محد نزل من هيبتك .. انته اللي شرشحت سعيد وبينت نفسك في دور الظالم ..
حارب : بس انا مب قادر اتقبل زواج سعيد منها ..
ام حارب : مب انته اللي بتتزوجها عشان تتقبل .. هو حر انته شو يخصك ؟؟
حارب وفي باله شي واحد : وينها ميثا ..
ام حارب : ليش ؟؟
حارب بغصة : محد بيقنعني غيرها ..
×
×
×
مـر الوقـت ..
ونزلت ميثا وويهها وارم من الصياح ..
خلتهم ام حارب روحهم ..
حست ان السالفة فيها إنّ .. بس ما تكلمت ..
وسارت عنهم ..
حارب : وبتمين مبوزة جيه لين متى ؟
ميثا بقهر : شو تباني أقول ؟
حارب بتوسل : ميثا انا مب مقتنع ان اخويه يتزوج وحدة كنت احبها ..
ميثا بعصبية : بعدك تحبها ؟؟
حارب برفض: طبعاً لا ..
ميثا : عيل خلاص شو المشكلة ؟
حارب وهو يحاول يدور له عذر : المشكلة ان هي ما تناسب سعيد ..
ميثا باستهزاء : عاد قلنا كنت ترمسها بس مستحيل تكون محلل نفسي تعرف شو اللي يناسب سعيد ..
حارب : بس سعيد ما بيموت لو ما خذها ..
ميثا بغيظ : وانته بعد ما بتموت لو هو خذها ..
حارب برفض : ماقدر ماقدر ..
ميثا بتوسل : حارب اسمعني والله حرام اللي تسويه فيه .. سعيد من زود حبه لك بيفرط في حبه الوحيد اللي هي ريم..
حارب بغصة : وانا ما كسرت خاطرج كوني انا اللي حبيتها وسعيد صرقها مني و...
قاطعته ميثا : حارب لا تفتح صفحات جديمة .. اللي استوى شي مقدر ومكتوب .. وانته ما حبيتها مثل حب سعيد لها .. وبعدين انته الله عوضك بزوجة مافي مثلها وانته روحك قلت.. ليش تخرب حياتك عشان وحدة قلتلها انك تعتبرها مثل اختك ...؟؟
حارب : بس مب شرط اذا يحبها لازم ياخذها ..
ميثا : علاقة يتوجها الحلال أحسن من شي بالحرام صح ولا لا ؟؟
حارب برفض : ريم ما تنفع كزوجة ..
ميثا عصبت : وانته شدراك ؟؟ انته ما تحس ؟؟ ما تحس بمعاناة سعيد يالظالم وهو يصيح ليل ونهار يباها بس مراعي مشاعرك انته ؟؟ هو ما كان بيعبر لولا نحن اللي جبرناه وفهمناه انك موافق ..
حارب : انا ما قلت اني موافق ..
ميثا : ما قلت بس قلت ان جمانة ومهرة هم اهم شي في حياتك ..
سكت حارب ..

ما كان عنده شي يقوله ..
ميثا بتوسل : الله يخليك حارب لا تخرب فرحة الولد مسكين من متى وهو يتريى يوم يفرح فيه وكسرت خاطره ..
حارب وهو يحس بحيرة : صعبة يا ميثا والله صعبة ..
ميثا : حارب الصعب صج هو انك تهدم حياتك عشان وحدة ما تعتبرك الا مثل اخو ..
سكت حارب ...
وسرح في أفكاره اللامتناهية ..
معقولة ...؟
م ع ق و ل ة ؟
|[]|
من كثر ما يحس انه مينون ..
لبس كندورته ونقز من دريشة غرفته عشان محد يعرف انه ظهر ..
ركب سيارته وحركها بقهر ..
طول الدرب وهو يفكر بتناقض ..
مب عارف يسب نفسه ولا يسب منو بالضبط ؟؟
ما كان حاط في خاطره ان حارب رفض لانه حط عمره مكانه ولقى ان هالشي وايد صعب ..
تنهد وهو يردد ان ماله نصيب في ريم أبداً ..
×
×
×
ع الساعة 3 الفليل قرر يرد البيت ..
لانه متأكد ان هالحزة محد يكون واعي ..
رد البيت وقفل البيبان وسار حجرته ..
دخل حجرته اللي حسها باردة ..
فتح الليتات وتفاجئ بالعايلة الكريمة كلها ع شبريته ..
ام حارب وميثا وحارب ..
استانس ع وجود حارب وهو يضحك ..
بس تكلم بجمود : شوي شوي شبريتي ما تتحمل أوزان ثقيلة ..
ميثا : حليلي انا روحي معصقلة القائمة ما تشملني اكيد ..
ام حارب : ههههههه .. انا اسوي رجيم ..
حارب : يعني انا المصيبة وانا مادري ؟؟
طالعه سعيد بدون تعليق ..
ولـ لحظة حسوا ان الجو توتر ..
تكلمت ميثا : سعيد يوم عرسك انا بختار تصميم الكوشة ..
سعيد بسخرية مملوءة بالمرارة : يوم عرسي ؟؟ هـه ..!!
حارب : هي ليش مب ناوي تعرس ؟
سعيد بلا مبالاة كمل مشيه صوب غرفة تبديل الملابس : لا غيرت رايي للأبد ..
حارب : بس تراني وافقت ..
صد سعيد عليه وهو رافع حاجب واحد : سبحان الله مغير الأحوال ..
ام حارب : خلاص حارب حس انه غلطان وانه ما يخصه يتدخل في أمورك ..
حارب : كفاية حرمتي شكت فيني تتحسب ان لي علاقة قبل بـ ريم ..ذلتني لين ما رضت ..
طالعه سعيد باستنكار ..
حارب يغمز له ان امه ما تدري ..
ميثا : انزين حارب انته شو بتسوي حق عرس سعيد ؟
حارب : بسوي اللي ما يتسوى ..
ام حارب : ههههههههه ..
×
×
×
مر الوقت بهدوء ..
ظهرت ميثا ووراها ام حارب يرقدون ..
طالع حارب سعيد اللي تم جامد طول ما كانوا يسولفون ..
حارب : بلاك يالمعرس ؟
سعيد بجمود : ماشي ..
حارب بنبرة مختلفة : ادري انك مستغرب التغير اللي ياني .. بس انا فكرت بعقل .. دام ان ريم حبتك وانته تحبها.. وانا جفت حياتي ويا جمانة .. ليش أرفض ؟؟ الموضوع صعب كان عليه في البداية بس الحين تغير كل شي ..
سعيد : بس الموقف يخليني أتأكد ان بيي اليوم اللي بتلومني فيه ..
حارب : هاي حياتك يا سعيد وانا ما يخصني فيها .. كفاية معاناة طول هالسنين اللي قبل .. وانته من حقك تعيش بدون هم وغم وبدون ما تيود مشاعرك .. صدقني ريم هي اختي اللي مستحيل بسببها أغار منك لانك خذتها .. هي مب لي .. الله رايد ان ما نكون لبعض ..
سعيد عقد حواجبه : احلف ان هالكلام من خاطرك مب تمثيل ؟
حارب : والله العظيم .. (تجدم صوب سعيد) انته اخويه الصغير اللي مهما ازعجني في يوم بتم احبه ..
ضحك سعيد : وانته الاخو القدوة والسند اللي في حياتي ما بكرهه لو حتى ضرني ..
حارب : خشمك يا ريال ..!!!
×
×
×
هل للسـعـادة نهاية في قصتنا ؟
|[]|
دقات قلبها شوي شوي تتزايد ..
ومع ذلك تحس انها ملكة ..
اليوم عرسها ..
عرسها وعرس شيخ الشباب سعيد ..
أخيراً ..
بعد سنتين من الكفاح بتتزوجه ..
خطبها على سنة الله ورسوله ..
وحدد العرس اللي تأخر كم شهر عشان تتجهز عدل حسب اوامر الكل ..
امه ما رضت انهم يملجون إلا في نفس هاليوم ..
يوم العرس ...!!
ابتسمت للكاميرا وهي في غرفة التجهيز ..
وياها تعليق من سارة : أخاف الغزالة تطير اليوم وتتحول لغزال بابا نويل .. هاهاهاااي ..
ميثا : ههههههههه ايه كله ولا مرت اخويه فاهمة ؟؟
سارة : مالت .. ذليتينا تراج انزين .. وينها مرت اخوج الثانية دمها اخف عنج ..
ميثا : ههههههههه جب انزين .. جمانة في القاعة تجابل المعازيم ههههه غربلتها امايه ..
سارة : يالفضيحة انتي بعد سيري شو تتريين ؟؟
ميثا : أسلم ع الناس ليش ؟؟ مخطوبة الحمدلله .. (تذكرت) اوه صح خلني اسير اسلم على اخت خطيبي ..
سارة : عدال (تعايب عليها) ختيبي ههههههههه ..
ميثا غيظت : جب ..
ريم بتوسل : سارة قولي حق المصورة بس تصوير والله تعبت ..
سارة تطالع المصورة : اقولج .. صوري صوري ع رااااااحتج .. there is enough time until the (zaffa)...
ميثا باستهزاء : until the زفة ؟ ههههههههههه مالت ع الانجليزي بس ..
سارة : ربي يعينج يا ريم على اخت ريلج الكريهة هاي ..
ميثا : هههههههههههههههههههههههه .. ريم حبيبتي صح خلني اخبرج .. انتي سمعتي الزفة قبل صح ؟
ريم : هي ..
ميثا : تمي واقفة عند الباب بيكون في عرض لـ صورج (تغمز لسارة) وبتوقفين انتي لين ما يخلص وعقب بتمشين..
ريم بخوف : اخاف اطيح ..
سارة : الحمدلله والشكر واقفة مكانج شو يطيحج ..
ريم : خلاص اوكي الله يعين .. بس وقفي صوبي عن أنسى ..
ميثا تحرك حواجبها : افا عليج ولا يهمج ........
|[]|
أ خ ي ر اً ..,،, ..
انفتح باب القاعة ...
بإضاءة مسلطة على عروس الليلة ..
بإبتسامة قلقة .. وخايفة ..
دخلت القاعة وحسب أوامر ميثا تمت واقفة داخل المدخل اللي مسواي ع نفس ديزاين الكوشة ..
المدخل كان كله بورود ياسمين ريحتها تبعث الراحة في النفس ..
حتى مسكة ريم كانت ياسمين ..
تمت واقفة داخل المدخل والإضاءة عليها ..
أشرت لها ميثا انها توقف ...
وتفاجأت ريم .. بصوت وصورة اللي معروض على شاشة العرض الكبيرة والموزعة في القاعة كلها ..
×
×
×
كان سعيد .. ظاهر في شاشة العرض ..
وهو يقصد بـ قصيدة هزت مشاعرها هز ........
لا إرادياً وقفت وهي مميلة راسها وتتأمل التسجيل اللي هو فيه ....
×
×
×
بـ لحن مميز ....
سعيد بصوت واثق :
يابنـت عـــم الياسـميـن ....
يزيد اللحن ويزيد صوت سعيد المتناغم قوة :
يابنـت عـــم الياسـميـن
........ يابنت خــال الأغنيات!
فكرت أجيك بدمعتيـن
........أْودمع تين من ثـْـمـرات
ويتحول الصوت لـ صوت حنون :
أنا أحبك كل حيـــن
........ والحيـن احبك لـ الممات!
وبإبتسامة ذوبت كل اللي في القاعة :
تفضلي عقب الحنين:
........قلب ٍ على قيـد الحيــاة!
تحرك شوي وهو يبتسم بثقة :
لاتبعدين وتتـركيـن :
........ وجهـي ورى غابـة شتات
مرة أحبك :مرتيـن
........ ومرات أحبك : أخُريات!
مد ايدينه بشكل رومانسي :
تطفـّـلي بين اليدين
........ يديني اوطـان النجـاة !
موتي على ذراع الظنين
......... وميـلادك انفاس الممات
وكأنه يأشر على نفس المكان اللي واقفة عليه لأنها مجابلة الشاشة :
أنا يسّاريّ اليميـن!
......... وانتـي دعُـاء الأمهـات!
مملؤء مندنيا ودين
...... وصوتي مْن سجود وصلاة
أوراقي: بيوت الأنين
.......... واحيان:"حُفاة ٍ عـُراة"
دمعت عيون ريم يوم لمحت غمزته وهو يكمل بثقة :
بكرة ليا ذابت سنين
.......... واغتال الاحباب الشمات
بـ اموت والشعر الحزين
........... يبقى على قيـد الحياة
بصوت حزين :
............. يبقى عناقـيد الحياة
............يبقى عنا قـيدالحياة!
.............يبقى عناقـيدالحياة
ابتسم بثقة :
...........يبقى على قيد الحي:آت!
......................................*بندر المحيا
×
×
×
ما حست إلا واللحن يختفي،
وتصفيق كل اللي في القاعة جنهم كانوا يالسين في أمسية شعرية ..
حست إن الإضاءة الملونة تزايدت في كل أنحاء القاعة ..
وفجأة هدت ..
ومن بعدها حست إن الإضاءة اختفت ..
ظلمت القاعة وقلبها يلس يدق ..
شو استوى ؟؟؟
جافت سارة بعباتها وشيلتها ..
والكل متغطي ...!!
أشرت لها ميثا تلف ..
كانت عيونها تلامع من التأثر وما خف بريقها ..
زاد البريق شوفة سعيد ..
وهو مايل نفس الميلة يترياها تطالعه ..
ابتسم بحب لها..
ومشى صوبها وهو زاخ وردة ياسمين..
حطها ع شعرها ..
وهمس لها بكلمة حسستها بحرارة غريبة ..
حرارة الحب ؟
يختلف الحب اللي يتوج بحلال عن أي حب ثاني ...
مسك إيدها بحب وهو يطالعها ..
وحست بالزفة وهم في نص الكوشة بس ..
قلبها كان طاير من الفرحة...
ولشدة الفرحة حست انها تبا تضحك بصوت عالي ..
يلست ويا سعيد ع الكوشة شوي ..
وما حست إلا بسعيد وهو يهمس لها : قومي نظهر ...
ريم بحيرة : بس تونا داخلين ..
سعيد يغمز لها : مجابل العذال ولا تجابليني ؟؟
ريم بحب : أكيد مجابلك انته ..
نش سعيد وساعد ريم تنش وياه ..
تلاحقوا عليهم ام حارب وسارة وميثا وهم توهم بينزلون ..
ام حارب بخيبة امل : كفاية اني وافقت تدخل وياها .. بعد ما تتم ؟؟ حشى حتى العشا ما نزل بعده ..
سعيد وهو صايبنه حفوز : العرس لكم خلوا المعاريس يتهنون ..
انحرجت ريم وهي تضحك ..
سارة : حشى ما بتطير ان شـا الله بتجابلون بعض لين ما تلوع جبودكم ..
سعيد : اقول خلج عند ريلج احسن لج ..
سارة طالعته وهي مبلمة من القفطة
ميثا : هههههههه قفطها .. انزين حرام ع الاقل قصوا الكيكة ولا شربوا العصير ..
سعيد يغمز لميثا : خلي هالمراسم كلها لـ عرسج انتي وفيصل .. يلا حياتي (وهو يطالع ريم بهيام) نسير ؟
ريم هزت راسها بإيجاب ..
تحركوا ..
وعيون كل اللي في القاعة تطالعهم ...
العرس الغريب اللي الكل رمس عنه شهور ..
واللي مستحيل يتكرر مثله ..
قلب ..
أو بالأحرى قلبين ..
حبوا بعض حب عادي ..
لكن الحرمان ..
والرفض ..
والغموض ..
كانوا أهم الأسباب لـ تقوية هالحب بأواصر غريبة ..
الكل حسد ريم على رومانسية سعيد ..
لكن سعيد مب شخص كامل ..
ولكل شخص عيوب ..
وحتى ريم ..
لو كانت ملكة جمال..
ترى فيها عيوب ..
لاحظناها مثل ما لاحظنا عيوب سعيد ..
لكن النهاية هي اللي تهمنا ..
اللقاء الخيالي بين شخصيات قصتنا ..
اللقاء المصيري ..
اللقاء اللي يخلينا نتأكد إن الحب ..
فوق أي شي إلا إرادة رب العالمين .......!
×
×
×
صوب البحر ...
بعد ما ظهروا من القاعة لحقتهم المصورة وهي معصبة ..
وطبعاً حلفت عليهم يتصورون .. طبعاً خايفة ان عدد الصور يقل فيدفعون الجيمة أقل ..
فـ غصبتهم يتصورون ..
وظهرت خاطرها ان خلت إدارة القاعة اييبون العصير وقطعة من الكيك لين الغرفة ..
وعلى طول انطلقوا بعد ما بدلت ريم فستانها للبحر ...
سعيد : أخيراً ؟
ريم ابتسمت : تصدق احس اني أحلم ..
سعيد : حتى أنا .. أحس ان بعد كل اللي استوى تزوجنا ..
ريم وهي ساندة راسها على جتف سعيد : الحمدلله ..
سعيد ابتسم لها : حياتي تحبيني ؟
ريم بصوت آسر : وتشك فهالشي ؟
سعيد تنهد : طبعاً لا .. بس أبا حبي يزيد عن حبج ..
ريم بحيا : مستحيييييييل ..
سعيد : اصلاً انا احبج قبل ما تحبيني ..
شهقت ريم : والله ؟
سعيد : والله .. من كنتي ممثلة وأنا معجب فيج .. ويمكن على اني فسرت انتقامي منج هو الدافع اني اكلمج .. لكن اكتشفت اني جنيت ع نفسي وحبيتج اكثر جي ...
ريم : بس ليش كنت تبين العكس ؟
سعيد : الظروف خلتني جيه ..
ريم : كنت تقهرني بغموضك ..
سعيد : هههههههههه كله من قلب دبي هي اللي ما كانت تخليني أعبر عن مشاعري..
ريم : الله يسامحها بس ..
قلب دبي : احمدوا ربكم عطيتكم ويه وزوجتكم .. مالت ..
سعيد وريم : هههههههههههههههههههههههههه ..

وبجذي نختم قصتنا ..
اللي عرفتوا فيها معظم نهايات أبطالنا ..
يا بنت عم الياسمين ..
القصة اللي تعبتني وتعبت مخي المسكين ..
كتبتها وانا في ثورة وتمرد على حروفي ..
ما كتبتها لان في بالي فكرة معينة ..
كتبتها لان في مشاعري كبت غريب ..
وحبيت أظهره في القصة ..
فـ وزعت مشاعري الثايرة في القصة ..
غموض سعيد كان مني وبدرجة فظيعة.. واسإلوا "B" عن غموضي ^.*..
سذاجة حارب كانت بعد مني ..
حب ميثا المينون لأهلها .. هذا بعد مني .. أموت ولا حد يدوس أهلي على طرف ...!!
وعصبية جمانة ..
حزن وتعاسة لطيفة الموسمية ..
عبط فيصل ..
إجرام أحمد ..
تناقض سارة ..
تهور حميد ..
كلهـا كانت مني ..
أتمنى بس ان القصة تكون حازت ع رضاكم ..
واسمحولي إذا كانت النهاية مب مرضية للكل ..
من حبي لـ لطيفة ما بغيتها تعاني وتتزوج سعيد ..
ومن حبي لـ ريم ما حبيت أخلي حياتها بكبرها أحزان ..
ومن حبي لـ سارة فكيتها من أحمـد ..
ومن حبي لـ حميد ما زوجته ..خله يستوي ريال قد المسؤولية أول عقب لاحق ع الهم ..
ومن حبي لكم خلصت القصة قبل رمضان خخخ ..
دعواتكم ان ربي ييسر لي أموري ..
ويحقق لي كل أمنياتي ..
وأتمنى بس أعرف رايكم ..
يهمني رايكم وايد ***52*** ..
وسامحوني ع القصور ....
اختكم : *قلب دبي* ..
21 / أغسطس / 2009م