اولاً..
بصراحهـ كلامكـ بجد صحانيـ..
ممكنـ لأنيـ طمعتـ شويـ بالردود..
بسـ هذيـ اولـ روايهـ ليـ..
بسـ كلامكـ فتحـ ليـ ابوابـ كثيرهـ..واسعدنيـ بحقـ..
واستنتاجكـ جداً رائــــعـ..
خلانيـ اتحمسـ اكثر..
وبصراحهـ الروايهـ لسى ما كملتها..
بسـ انا ما نزلتها إلا وانا واثقهـ انيـ راحـ اكملها..
واوعدكـ انـ هالمنتدى راحـ يشهد على نهاية هالروايهـ..
كلـ السالفهـ انيـ كنتـ محتاجهـ دعمـ..
ويشهد اللهـ انـ ما شجعنيـ غير(بوحـ قلمـ)..
بسـ انا طموحهـ وكنتـ محتاجهـ لأكثر..
بسـ ع العمومـ نصيحهـ جداً رائعهـ..
وافادتنيـ وماراحـ انساها بأذنـ اللهـ..
اختكـ/صموتـ..(ولصمتـ معانيـ كثيرهـ)

بصراحهـ استنتاجكـ بدا يخوفنيـ..
كلـ الليـ اقدر افيدكـ فيهـ,,
راحـ يكونونـ هناكـ ابطالـ محددينـ يعنيـ مو الكلـ..
يعنيـ القومـ الليـ انا مجمعتهـ ماراحـ اتكلمـ عنهمـ كثير هع هع هع..
بسـ زيـ ما قلتـ فيـ البدايهـ راحـ اعطيـ للجميعـ حقهـ..
وجلالـ..
تابعيـ الروايهـ وراحـ تعرفينيـ بعدينـ..
(معلومه:جلالـ مو عمهمـ)..
اما الليـ فيـ البدايهـ..
فالمريضـ هو احد ابطالـ روايتيـ..
اما منـ ناحيتـ انكمـ راحـ تتعلقونـ فيهـ..
هذا الشيـ راجعـ لكمـ..
اما هلالـ..
فراحـ اوعدكمـ بشخصيهـ رائعهـ تغطيـ على شغلهـ خخخخخخخخخخخخخ
بدر..
قصتهـ راحـ توضحـ معـ البارتياتـ الجايهـ..

البارت الثالث
الجزء الأول
اما فوق..
وكانت الساعه تشير الى 9:30م
سمر وهي تسلم في الصلاه وتلتفت وراها:
يا هلا ياهلا تو ما نورت الغرفه..
ابتسمت ياسمين:يا هلا فيك اخبارك سمروه
سمر وهي تسفط جلالها:انا اللي اسألك انتي اخبارك..
ياسمين:اممممم تمام..
سمر:دوووم..
ياسمين: وياك اقول سمر..
سمر وهي تجلس قبالها على كرسي التسريحه:هلا
ياسمين:القيم بوي عندك..
سمر:ايه ليش..
ياسمين:ابي العب فيها حرام..
سمر وهي عاقده حواجبها:لا مو حرام بس خلاص انتي كبرتي وش تلعبين..
ياسمين تتأفف:ااااااف كافي سجى مستلمتني..
سمر:وش مسويه بعد..
ياسمين:قولي وش ما سوت تناديني للمطبخ تقول تعالي تعلمي شلون تسوين قهوه لرجلك ما بقى الا هذا انا الشاي ويادوب تبيني مره وحده قهوه..
سمر وهي مو مستغربه حركت اختها:ما عليك منها خوذي القيم بوي تلقينها وراك..
التفتت تبي تاخذها الا ويدق تلفونها
<<<الراسبه<<خخخخخ تقصد نرجس
:هلاااااااا وغلاااا بالراسبه هههههههه
:عمى انقلعي كل ما دقيت ذكرتيني
:هههههههه وش اسوي اسمك كذا مسجل عندي..
:سمسم واللي يعافيك غيريه جبتيلي المغص فيه..
:مو مهم اخبار امي عساها بخير..
:امممم تمام (ابعدت عن السماعه وكانت تكلم شخص عندها)الو سمسم
:معاك مين عندك..
:مين غيرها اكيد ريموه النشبه
:يوووه يا عمري اعطيني ايها..
:سماسم اوريك يالوصخه اجل انا تضحكين علي وما تجبين لي اللي وعدتيني فيه..
:ههههههه يا حليلك ما نسيتيه..
:لا لا شلون انسى حلالي جيبيه ولا والله لا اوريك وما تشوفينه..
:طيب بسم الله بجيبه(تقصد دبدوب كبير حق ريم اخذته ياسمين بدون لا تدري لأنه عاجبها)..
:ايه اشوى طيب ما تبين تجين؟!!
:الا والله بقول لعماد وراح اجي بكره ان شاء الله..
:اهااااا ايه ايه خوذي نرجس..
:هلا ياسمين ههههههه كشفتك..
:هههههه بجيبه بكره لا جيت اقول نرجس عماد يناديني بروح اشوف وش يبي باااي..
:باااي
سكرت منها ونزلت راسها تناظر بجوالها وكأنها سرحت..
سمر:سمسم ليش قلتي ان عماد ناداك..
ياسمين وهي ما زالت منزله راسها:مدري فجأه حسيت بضيقه..
سمر بقلق:وش فيك..
ياسمين وهي قايمه: مو مهم بروح انام احس اني تعبانه..
سمر وهي مستغربه تقلب مزاجها:اوكي..
----------------------
اما عند لميا
الساعه 10 مساء
ولما كانت تمشي وتنادي عليها فجأه وقفت وتطالع منصدمه..
:قمـــــــــر..
التفتت قمر للميا :وش تبين..
لميا كانت منصدمه من اللي تشوفه قمر وعليا وعبود راكبين سياره خربانه بس مو هينا المصيبه المصيبه ان قمر راكبه بحضن عبود:قمر ووجع تعالي هنا..
قامت قمر وهي مخترعه::عادي كنت العب ما سويت شي وش فيها معصبه::قربت قمر منها:نعم..
مسكتها لميا مع اذنها:لا والله تعالي معي البيت وعلمك عليا تعالي..
قمر كانت تتألم من مسكتها:ااااي لميا وخري عني اوجعتيني والله ما سويت شي انا قلت لمي بلعب..
لميا ولا كأن احد يكلمها سحبتها من اذنها للبيت وعليا تمشي وراها مخترعه اما عبود فكان فاتح فمه ومستغرب..
لميا وهي تدخل البيت:ادخلي يا قليلة الأدب اجل جالسه بحضن الولد!!
قمر وهي تبكي:والله ما كان في مكان وعليا عيت تركبني بحضنها وعبود هو اللي قالي..
لميا:انطمي والله ان وجهك مغسول بمرق تيوس يالتيسه..
قمر وهي تمسح دموعها بكم بلوزتها:لميااااا والله لا اعلم امي لا تقولين لي تيسه التيس ولد وانا بنت<<احلفي خخخخخخ..
لميا:مو مهم تعالي والله لا اخلي امي توريك الشغل..
ّّ{لا تسألوني بعدها وش صار لانها اخذت من امها
ضرب نساها الأسبوع اللي راح كله}
------------------------------
في بيت ابو باسل..
فيصل جالس وهو يفكر الحين شلون ادق عليها وانا ما عندي رقمها ااااااااااف اجل بروح بكره للجامعه وبشوفها اممممم اكيد بعرف شكلها(ابتسم)فديتها بس..
جلس على هالحاله نص ساعه تقريباً..
--------------------
في بيت ام عماد
الساعه 10:30م
راح عماد فوق عشان يبدل ملابسه ويستنى ياسمين متى تجي..
دخل الغرفه واستغرب ضوها مطفى اتجه لزر اللمبه وشغلها وما انتبه لنايمه ع الكنبة الغرفه..
اخذ ملابسه وراح لغرفة ملابس ولبس بجامه وطلع وهنا انتبه لها وقف يطالعها مستغرب(هي قايله لي بتروح لسمر وشكلها بتطول بس وش جابها الحين امممم لا يكون سمور مزعلتها يووووه مين بيراضيها الحين) اتجه لها وكان يبي يشيلها ويحطها ع السرير بس بهذي الحظه فتحت عيونها وهي تطالعه مستغربه: متى جيت؟!!
عماد: الحين بس انتي ليش نايمه هنا..
ياسمين وهي تجلس وتفرك عيونها: امممم ولا شي بس كذا..
عماد عرف ان فيها شي:سمور مضايقتك بشي؟!!
ياسمين:لا لا بس انا حسيت اني بنام وجيت هنا..
عماد وهو متاكد انه مو سبب جيتها:ورده حبيبتي قولي في شي مضايقك..
ياسمين تكلمت لأنها محتاجه تقول لأحد باللي تحس فيه: بصراحه ايه ..
عماد وهو يجلس بجنبها:وشو..
ياسمين:ما ادري هالأيام احس بضيقه مو طبيعيه تجيني كذا فجئه..
عماد: اممممم متى بالضبط تحسين فيها..
ياسمين: لما اصلي احس اني مكتومه ولما اتكلم كثير مدري مدري احس اليوم كله متضايقه..
عماد: تقولين اذكار الصباح والمساء؟!!
ياسمين:امممم لا..
عماد قام وهو ماسك يدها ومتجه للسرير نومها بجهتها وهو نام بجنبها وكان حاضنها:شوفي من اليوم بنقراء الأذكار انا وياك إذا نسيت ذكريني وانا بعد(التفت لها لأنه حس انها هاديه بغير العاده ولقاها بسابع نومه تنهد) ياربي الى متى وهي كذا مو مهم بقراء انا عني وعنها..
وبداء يقرا ويمسح على راسها الى مانام..
--------------------------
في بيت ابو حسام..
الساعه 11:00 م
وبالتحديد بغرفة حسام..
:هلا حبيبتي..
:هلا فيك..
:اخبارك؟!!
:اممممم بخير..
:طيب ما تبين تسأليني عن أخباري!!
:.........
:فروحه حبيبتي تكلمي قولي شي..
:امممم وش اقول يعني..
:أي شي المهم تتكلمين..
:اقولك وش صار معاي اليوم..
:ايه المهم تكلمي..
:طيب اممممم اليوم اليوم(وبدت تفكر) ما صار شي..
:الحين صار لك ساعه احاسب عندك سالفه مو مهم فروحه تحبيني؟!!
:..........
:فروحه تكفين ردي..
بصوت يالله ينسمع:ايه..
:هههههههه فديتك بشوفك..
:لا لا قويه والله لو عرف هيثم لا يذبحني لا ما اقدر<<عرفتوا مين فروحه(فرح) بنت عمه ابو هيثم يكلمها من 6 شهور لما شافها بزواج يوسف وبدور ومن بعدها تقرب منها لما كلمها..
طق طق..
:اقول فروحه الباب يدق بكلمك بكره انتي روحي نامي وراك مدرسه..
:اوكي بااي..
:بايات..
بعد ما اغلق على انهاء المكالمه سرح وما انتبه الا على دقة الباب مره ثانيه..
حسام:ادخل..
دخلت عمشاء وهي مبتسمه:حسوووم..
حسام وعرف ان وراها شي:اخلصي..
عمشاء:امممم ابيك بكره تجي تاخذني من المدرسه تكفى بكره نطلع بدري وما يفتحون الباب الا الساعه 1:00 وحنى نطلع الساعه 12:00 ..
حسام: انتي قلتيها بنفسك ما يطلعون شلون اطلعك!!
عمشاء:هم ما يطلعونا الا إذا وحده يجي ابوها او اخوها ومعه بطاقته ويطلعون..
حسام:لا لا وش وراك حالك حال غيرك..
عمشاء بملل:ااااف كل ما صار عندنا حفل ونطلع بدري نقعد لما يفتح الباب وننشوي تحت الشمس حسووم تكفى..
حسام من اليوم وهي تجمع لحظه لحظه:طيب مين معاك بس انتي..
عمشاء وهي فرحانه لأنه بدى يقتنع على قولتها:لا معاي مزون وفرح وسمر وو بس هاه وش قلت؟
هو بس سمع فرح:اوكي خلاص بس هاه 11 القاكم جاهزين اوكي..
عمشاء وهي فرحانه:اوكي..
انسدح على ظهره وابتسم(والله وجا اليوم اللي اشوفك هههههه)..
--------------------
في بيت ابو سيف..
الساعه 12:00 م
نرجس ما نامت مع انها بتداوم بكره بس ما قدرت تنام..::يارب صبرني اموت واعرف ليش هالقرار ااااف طيب هو اكيد ما يبيها وهي واضح من ردت فعلها ياااارب والله صعبه بدر نصفي الثاني هو قالها قبل لا يروح اني انا نصفه الثاني لا لا ما اقدر اتخيل ما علي منها والله لو تتطلق ويروح مستقبلها بأسم مطلقه المهم يكون لي(تنهدت وحاولت تنام لأنها تعبااانه)::

---------------------------
في الأرجنتين وفي ارض الفضه..
3/1/1428 هـ
الساعه 6 ص والجو باااارد<<بين السعوديه والأرجنتين 6 ساعات تماما..
حيث كان يطلق قدميه خارجاً على الأقدام من شقته الموجوده بـ حي Palermo : وهو حي سكني يمتلئ بالأشجار على جنبات شوراعه بالإضافة إلى المطاعم..
كان يتمشى هو وماجد وبهدوء:بدر..
بدر:هلا..
ماجد:ما ودك تقول وش اللي انت مقومني وجايبني هنا عشانه..
بدر تنهد:امس كلمني سكرتير المدير وقال لي ان ما بقى على انتهى الكورس غير ثلاث أسابيع..
ماجد عرف وش اللي شاغل باله شلون بيقضي حياته من بعد هالثلاث اسابيع:ويعني(كان حاب يستدرجه لأنه كتوم ويضيق بسرعه فحب يخليه يقول ويفضفض)
بدر:وين اروح اقصد وش اسوي بعدها..
ماجد:بسيطه بتصيرمعاك شهاده وما عليك غير انك تتوظف ..
ابتسم بدر: هذا اللي ناقص المحاماه بجهه وانا بجهه واتوقع انك عارف هالشي..
ماجد:طيب وش تبي تسوي..
بدر:مو هذا اللي شاغل بالي..
ماجد: تعال وانا اخوك قبل لا تبعد عن شقتك رح نام وارتاح ولا تنسى تراني موجود وبالخدمه وانت عارف ان بقالي 4 شهور يعني توني بكون معك ولا تشيل هم..
فترة صمت بين الأثنين وكانوا متوجهين لشقة بدر..
ماجد بعد تفكير:طيب انت الحين ليش ما ترجع لأهلك وقبل لا تقول شي انت عارف ان مستحيل الظفر ينشال من اللحم وهم اهلك بالنهايه ومهما سويت بيظلون اهلك..
بدر ما علق ودخل شقته:حياك..
ماجد وكان يناظر بدر بيأس:لا بروح انام تراك خرعت مرتي مقومني وماخذني هنا..
اكتفى بدر بابتسامه ياما كان يتمنى انه يحس بهالشعور
---------------------------
نرجع لسعوديه وللدفى..
وفي بيت ابو بدر..
وسن جالسه وهي تفكر::طيب يا اريجوه والله لا اوريك طيب طيب :: اخذت جوالها وفتحته لأنها مقفلته من يومين..
فجـــــــــــــــــــــــــــــــــأه
شهقت وهي ترمي الجوال بعيد عنها..

انتهى
توقعاتكمـ للبارتـ الجايـ

يعطيك العافيه

بدر ماتوقع راح يلقونه بسهوله << احس بيصير مثل ماركو لما يدور على امه يمرون من نفس الشارع ولا يشوفون بعض وماركو وبدر كلهم بالارجنتين هع هع هع

يوسف وبدور اتوقع عدم تقبله لبدور لان القلب عن وحده ثانيه
ليش ماتكلمتي عنهم بالبارت هذا

حسام ابدا ماحبيته ماادري وشلون وتجرء وكلم بنت عمه

وهالمعقده لمياء ليش كبرتها وهي صغيره

لاا تتأخرين والله متحمسه

السلام عليكم..
هالجزء يخلي راسي بدأ يستقعد شووي.. الحين نرجس تحب بدر.. وبدر وعدها انه يكون لها.. يعني هو يحبها.. ودخلت اريج بالسالفه..والواضح ان اريج مقهووره من اللي صار لها.. طيب وش اللي صاار لها بالضبط؟؟؟ تبين الصدق ماااا ادري ليش عندي توقع ان سالفة اريج وبدر وراها نرجس...مع اني ماا ادري وش السالفه بالضبط .بس نرجس شكلها شريره.. او لئيمه.مع اننا ماشفنا منها شي كبير للحين بس مااحبيت هالنرجس..
عماد وياسمين.. وش ظروف زوجهم ؟ شكل عماد متوهق بياسمين .. وهالشي حسيته من كثر ماهو يردد انها تتصرف بمبزره.. وغير كذاا حسيته مجبور عليها او بالاصح متزوجها بدون اقتناع. وهالشي حسيته لما كانت بالجزء اللي فات تضمه وهو ماضمهابيديه. شكله يعاملها مثل اخت اكثر من زوجه.. وضعه غريب معها وخصووصا من جهته هو ؟؟ زواجه من ياسمين فيه إنّ بس وشي ماا ادري؟؟ ايه نسيت اقوول يضحكني لما يناديها ورده. هل عشاان اسمها ياسمين والا السالفه فيها ورده بس بشكل ثاني.. ؟؟؟
واعجبني لما قال لها انهم لازم يقرون اذكار الصباح والمسااء مع بعض... حسيت انه فعلاا يتعامل مع بزر مو مع زوجه.. بس وش هالضيقه اللي تجيها؟؟ هي بتستمر والا بس لانها تاركه الاذكار؟؟ والا البنت متعرضه لعين والا لسحر..>> هه ماعندي وقت دخلت كل ذولي مع بعض..هخهخهخه

فيصل .. ياليت من يدخل عليك ويكفخك لين يشبع.. صحيح انك ثوور..
حسام وفرح: والله من قلت الادب فيك انت وبنت عمك..>> اقوول صموته واللي يسلم عمرتس طااالبتس .. لاعاد تقولين لها فرووحه.. ترى هالاسم اسم وحده غاااليه على قلبي مرره مرره مرره ومن اغلى البنات اللي عرفتهم في النت.. لاعااد تخلينهم يدلعونها فيه.. بيدلعونها يقولون لها فرحه.. بس فرووحه لأ لأ لأ.. هذا حصري لعدووتي الغاليه فروحة قلبي بنت زايد فديت رووحها .. ادعي ان ربي يوفق فروحة قلبي لان الحين عندها امتحانات.. عسى ربي يوفقها ياااارب ..
نرجع لفرح القصه.. شووفي وضعها مع حسام وضع لاا مسؤووول ابدااا.. يعني هو يحبها والا بس يقضي معها وقته.؟؟. وبعدين فيه سؤال سألته بالرد اللي فات وماجاوبتني عليه.. البنات يتغطون عن عيال عمهم.؟؟ لاني حسيت من الاحداث اللي راحت انهم مايتغطون عن بعض وخصووصاا بعد سالفه الثور مازن والبقرتين وضحى وعمشاء.. حسيتهم متخالطين مع بعض مرره.. بس سالفه حسام وفرح خلتني اشك باللي فهمته.. لانه يقول انه ماشافها الا بزواج يوسف ومن عقبها والاتصالات بينهم.. يعني شكله ماايعرف شكلها والحين من شاف شكلها اعجبته..؟؟ بس وش اآخر هالي يسوونه.. يعني وش القصد بيتزوجها والا الاهبل يعامل بنت عمه مثل البنات الغرب.؟؟؟

بدر: انت كل جزء ينضاف لك لغز اكبر من اللي قبله. ياا اخي يااحبك للغموض ..حتى مع نفسك ابدا ماتسولف ولاتفكر؟؟
. مطرود من اهلك وباجتماع اسري على قولة الغاليه بوح قلم كأنهم مجلس الامن هم وقراراتهم.. والسالفه فيها مس لشرف بنت عمك وانت اللي تتحمل هالشي؟؟ وطلعت متواعد مع نرجس انها تكون نصفك الثاني..
ومتغرب كل هالسنوات عشاان تدرس تخصص ماااا تدري عن شرقه من غربه..؟ ليش كل هذاااا؟؟؟
ممكن افهم ان الاسباب الاولى مالك يد فيها او انها صاارت غصب عنك بس انك تدرس تخصص بالاخير ماراح تستفيد منه اي شي ؟؟..صرااحه اشووف ان هالشي صعب على الواحد.. وخصووصاا ان يضيع كم سنه من عمره بتكون بلاا قيمه له.. ليش تسووي بنفسك كذاا ياا بدر؟؟ >> والله كل شووي اقول يااخوفي انك الشخص اللي بتموت اخر القصه....

نجي لاخر الجزء والمفاجأه اللي شافتها وسن بجوالها؟؟
يمكن اللي شافت اتصال ماردت عليه من بدر..؟؟ او رساله منه؟؟
على فكره باين ان اريج لها اعداااء كثير من البنات بالقصه وسن ماتحبها ونرجس تتحلف فيها.. ويمكن يكون فيه احد مو واضح للحين بالصووره..بس هل هم على حق في كرهها والا ظالمينها؟؟؟؟
صموته مشكووره على سرعه نزول هالجزء واتمنى انتس تنزيلين لنا بعد قريب.عشان نعرف وش هاللي وسن متخرعه منه..؟؟
بانتظااار القاادم اذا الله احيانا بشووق فلا تطولين علينا..