كاتب الموضوع :
dali2000
المنتدى :
القصص المكتمله
البارت الخامس والاربعون
وتركت السماعه على اذني .. مابي صوته يضيع .. مسكت صدى صوته لآخر لحظه .. وربي أحبه ..
اليوم الي بعده باليل .. وبعد جميع محاولات الاقناع اقتنعت ماما اطلع انا وليلى الفيصليه .. كان يوم الجمعه .. جالسين نسولف انا وياها بقسم العوايل
ليلى:بس مدري ما استلطفهاا
قلت وانا آكل البطاطسه:لا بالعكس انا من اشد معجبين اوبرا
ليلى:كوووبرا وانتي الصادقه
ضحكت وقلت:مدري من تحبين انتي
ليلى:سيوفي
قلت بنص عيون:سرقتي الدلاعه حقتي
ليلى ترمي علي منديل:وجع
قلت وانا اضحك واتهزا:يؤ عورتيني ..
دون مقدمات سمعت صوت بزر يناديني التفت لقيت ابراهيم بوجهي وماد يده:شجن اهلييين
طالعته وانا متنحه شوي .. ابراهيم ؟؟ وش يسوي هنا هذا .. مديت يدي وانا مستغربه:هلا
رفعت عيوني شوي لقيت عبدالله يتنهد:معليش عالمقاطعه بس برهوم الدوب ماقدر يمسك نفسه
ابرهيم:خييير ابي اسلم على شجن انا وش فيها .. اهلين ليلى
ليلى تمد يدها:هلا هيموو
انا كنت اطالع عبدالله وداخله عالم ثااني .. هو صحيح اني اكره مالي اذا شفت ولد لابس وردي .. مع انه لوني المفضل بس ما احسه يجي عالرجاجيل .. بس كان مرررره لابق له الوردي .. اول مره اشوفه لابسه .. وبعدين لون بشرته الاسمر الي مدري من وين جا صراحتن .. مخليييه انسان ثاني .. مخليه احلا بواااجد .. وحتى قصّة شعره تغيرت .. هو تقريبا شكله كله تغير
عبدالله:يلآ آسفين
ليلى:لا شدعوه .. اصلا وش جابكم قسم العوايل ..؟!
عبدالله:قسم العزاب فيه ناس تدخن وانا خايف على المملوح برهوم .. وبعد عشانه يبي الالعاب ومابي اصير بعيد عنه ...
تنهد:والمشكله هنا زحمه
ابراهيم يشد بلوزة عبدالله:عبود عبود طيب يلا بروح العب ..
ليلى قامت فجأه:خلاص برهوم تعال انا اوديك الالعاب ... عبدالله انت اجلس هنا مع شجن لحد ما تفضى لكم طاوله ..
وعطتني نظره مع ابتسامه سريعه وراحت مع ابراهيم الي ما صدق عمره
انا انهبلت .. وش تستهبل ذي .. ناديتها بس مشت ولا ردت .. وعبدالله ظل واحد ويطالع ابراهيم مع ليلى وهو مبتسم .. انا رفعت عيوني اطالعه .. يؤ بيجلس معي .. ياااربي ليلى مو وقتها .. جلس عبدالله مكان ليلى قدامي ويطالع يدينه الي عالطاوله .. وانا اطالعه بنص عيني مابيه يلاحظ
عبدالله:ابي اقولك شي
يوم تكلم انا مدري وش صاار لي ماعرفت اجمّع .. حسيت بحراره بجسمي غريبه .. اختبصت:هاه .. قول .. عادي
عبدالله رفع عيونه وطالعني وياليته ما رفعهم .. جت عيني بعينه ما قدرت اتحمل نزلتها بسرعه .. ونبضات قلبي كل مالها وتقوى
عبدالله:آآ ... الدفتر حقي عندك ..؟!
رفعت راسي بصدمه .. ارتبكت .. يؤ وش اقول له الحين ... تلعثمت ما عرفت ارد .. بس هو قاطعني وهو يضحك على خفيف:قالت لي الخدامه ...
انا حاولت ابرر:انا .. وش اسمه .. آآ
عبدالله رفع حاجب وابتسم:حطي عينيك بعيني طيب
انا توهقت .. خلاص بصيح .. جسمي كله ينتفض مدري وش صار لي .. رفعت عيوني بشويش .. وطالعته .. ابتسامته كانت مره جذاابه .. وشكله وهو رافع حاجب مخليه شي ثاني .. ياربي انا اول مره بحياتي اشوف عبدالله ..؟
عبدالله:شفيك .. هه حطي عينك بعيني ..
طالعته بصعوبه وانا عاقده حواجبي:وشو ..؟!
عبدالله بصوت زي الهمس:يفداك الدفتر والله .. ليش خايفه ..
انا ماعرفت وش اسوي بعمري .. خلاص بصيح فشيله .. :مو خايفه عادي .. انا اخذته عشان
قاطعني:شجن أحبك
عند هالنقطه بالذات ما اقدر اوصف شعوري وش كان .. ولا اقدر اصوّر حجم الصدمه الي انصدمتها .. ولا شي ..! كل الي اقدر اقوله اني حسيت شوي وبيغمى علي من كثر ما جسمي ينتفض .. ليش ..؟ مدري ..!
كنت فاتحه فمي على خفيف واطالع عبدالله ... كان يطالعني .. كانت عيني بعينه .. ما قدرت اتكلم او اسوي اي شي ثاني .. كل الي حسيت بس مجرد دمعه صغيره نزلت على خدي .. مدري وش سببها
مسك المنتديل ومسحها:آسف
اخذت المنديل من يده وكورته بيدي وانا اناظر الطاوله : لا ... عادي
كنت اتكلم بطريقه غريبه .. منصدمه ... بديت استوعب .. ابتسمت .. وابتسامتي ما كان بهواي .. كانت غصبن عني .. رفعت راسي اطالعه
عبدالله: تكلمي ..!
اخذت نفس عميق:عادي .. وش اقول ..
عبدالله ابتسم:قولي زي الي انا قلته ما دامه باين ..
ارتبكت اكثر:وش الي باين ..؟!
عبدالله ضحك .. وانا حسيت اني بمكاني ماني قادره اتحرك ولا اسوي شي.. بس اضغط على المنديل الي بيدي اكثر .. حسيت بقلبي ينبض اقوى واقوى واقوى .. بطني خلاااص يعورني مره مدري وش السبب .. شعووور مزعج مره مزعج تمنيته يروح عني ..
حسيت ريقي ناشف واني اتنفس بسرعه .. ليش كذا هذااا ..!؟ هو اصلا وش قصده باللي باين ..لحظه اصلا هو يحبني ..؟!
ماعررررفت اسوي اي شي تفكيري توقف ..
ليلى جت:عبــــــــــــــدالله
التفت بسرعه :وشووو ..!
ليلى:ابراااااااهييييم طااااااح .. رووح شوووفه مدري شفيه
طالعت عبدالله وهو يركض للالعاب وليلى تلحقه .. والناس متجمعه هناك وانا بس بمكاني .. جالسه واطالع .. حطيت يدي الثنتين على الطاوله وحطيت راسي فوقهم .. اطالع السيارات تحت تمشي .. تنهدت بفرحه .. دموعي نزلت بهدوء .. يحبني ..؟! عبدالله يحبني ..؟! عبدالله قال : احبك ..؟ ماني مصدقه
انا بحلم .. حلم من روعته ما اقدر اصحى منه .. غمضت عيوني بشويش .. اخاف لو ما غمضتهم اقوم من هالحلم .. تعرفون شلون الواحد يتحقق له حلم .. كيف الواحد يحس بالامان فجأه .. يحس انه مهم بهالدنيا لشخص واحد على الاقل .. كيف شعور الانسان لمن يحب .. وينحب ..؟ لمن يحس ان الدنيا هاذي كلها ما راح تكفيه من كثر ماهو سعيد ..
شعور يتعدى الوصف .. ما تعبر عنه اي كلمات .. لان الحب بكل بساطه شي غير مفهوم .. شي ماله وصف ولا له مثيل .. شعور غريب .. جميل انك تحب شخص وتهتم له وهو يبادلك هالشي .. جميل انك عارف انو فيه شخص يخاف عليك .. يعيش دنيته عشانك .. شخص يحبك ..
عبدالله .. يحبني ..؟! شي ماهو معقول .!
جت ليلى وجلست:تخيلي ابراهيم طااح .. يابعد عمري جلس يصيح صياح ماهو طبيعي وعبدالله أخذه المستشفى رجله تعوره
رفعت راسي:ما يشوف شر
ليلى:وش فيييك ..؟!
ابتسمت لها وعيوني مليانه دموع:مافي شي
ليلى:وش سويتوا انتي وعبدالله ..؟
طالعتها ببرود .. لا .. مو ببرود .. كنت فرحانه .. من كثر فرحتي طالعتها من غير ما ارد ..
ليلى:شجووووووون وش فيييك انتي بعد ..؟!
تنهدت بفرحه:ليلى .. نرجع البيت ..؟
ليلى:لالالا .. وش صااار قولي لي .. فيه شي صاااير ..!
كنت ابتكلم ابقول بس حسيت اني مخنوقه .. بس بنفس الوقت فرحانه .. ماعرفت احكي .. تنهدت وقمت:لولا برجع البيت ..
مشيت وما عطيتها فرصه .. كانت ابتسامتي شاقه وجهي ماني قادره اتحكم بنفسي .. كنت امشي بسرعه تقريبا مابي ليلى تجيني .. فجأه ضربت بشي .. التفت بسرعه اعتذر:اوو آسفه ..
الولد الي ضرب فيني:لا عادي ..
كان بيكمل طريقه بس انا وقفت اطالع .. استوعب .. !! .. وهو مشى خطوتين ووقف مكانه والتفت بسرعه .. ثواني كنا نناظر بعض
فجأه تكلم:شجن
انا بلعت ريقي .. يااااسر ..؟! لا هذا الانسان اخس انسان عرفته بحيااااتي مو لازم اكلمه .. مشيت ولحقني:شجن .. شجن اصبري بحاكيك حقول لك حاااجه ..
انا كنت امشي ابي ابتعد عنه .. وش يبي فيني هذا الحقير .. مسك كتفي:اصبري
انا انهبلت .. وش يبي هذا يلمسني .. التفت وانا معصبه:خير لا تلمسني وش تبي انت
ياسر:اصبري ابغى احاكيييك
صرخت بوجهه بخوف ابيه يروح عني:مابي احاكيك انا.. غصب هو ..
تلفت حولي بسرعه ورحت للسكيورتي:لووو سمحت شوف هذا يلحقني ومد يده بعد قليل الادب .. بعده عني
السكيورتي يأشر على ياسر الي واقف وعلى وجهه علامة استفهااام:هذا ..؟!
انا:اييه ..
السكيورتي جلس يطالعه:ابشوفه الحين لا تشيلين هـ
انا ما انتظرته يكمل مشيت بطريقي .. مو وقته هذا جاي .. انا فرحااانه .. يااربي احس رجولي ماهي شايلتني من الفرحه بعد .. طلعت من الفيصليه اناظر الشارع .. ما دقيت عالسواق يجي .. !!
اخذت نفس عميق .. مو لازم ادق عليه .. مشيت وابتعدت عن الفيصليه .. وجمبي طريق الملك فهد والسيارات تمر بسرعه وانا اطالعها ومستانسه .. طبعا من غير ما ادقق على سيارات الشباب الي تمر وتعلق بخمس ثواني سريعه .. ما اهتميت .. مشيت لحد فندق الخزامى الي جمب الفيصليه .. جلست هناك ودقيت عالسواق يجيني
اول ما رجعت البيت رحت غرفتي .. انسدحت عالسرير وحطيت وجهي عالوساده بفرحه .. يالله مبسووطه مره .. يحبني ..؟! مااااني مصدقه .. مسكت كاميرتي بحماس وجلست اتفرج على صور عبدالله .. مع كل صوره نبضات قلبي تقوى .. هذا اعز انسان عندي بالدنيا .. الانسان الوحيد الي فهمني .. وو .. وحبني ..! .. لحد الحين ماني قادره استوعب .. اتذكره وهو يقولها .. يالله ..!
افتح الباب وتحركت من مكاني بروعه:شجون
اخذت نفس عميق:ماما روعتيني
ماما:تعشيتي ..؟
قمت وحضنتها بقوه:مااااامااا اموووت فيك وربي
ماما:وانا بعد .. وش فيك
عطيتها بوسه كبيره:فديييييتك
ماما:وش فيييك مصخنه ..؟
طالعتها بعلامة استفهاام:ماما انا انسانه سعيده ..بس .. وبعدين حرام احبك يا احلى شي بالدنيا
ورجعت احظنها ..
ماما:وانا احبك بعد .. طيب يلا انزلي تقهوي معي انا وابوك ..
طالعتها بفرح:من عيووووووني بس اغير ملابسي اوكي
ماما تطلع وتسكر الباب:يلا اسرعي
غيرت ملابسي ونزلت تحت .. كنت انزل من الدرج بشكل جنوني كأني طفله صغيره تركض تبي تلحق على مجموعة حلويات راح تخلص بعد دقايق ..! نزلت وبست راس بابا:هلا والله ..
بابا ابتسم:هلا بك ..
تربعت:شلون بااااباا اليوم ..؟
بابا:بخير وانتي .. طالعه من الصبح مشالله ..
بوزت بفمي بدلع وانا آخذ بيالة الشاهي من ماما:وش من الصبح حرام عليك
بابا:ترا سفرتك تأجلت شهر زياده
انا انهبلت:وشووو ..؟!
بابا:الفيزا ما طلعت .. الله يلعن ابليسهم يذلونا عليها ..
انا حطيت البياله بسرعه:بابا ليش شهر ..! انا كنت .. كنت مره متحمسه .. مفرووض انو اسبوعين بس ..!
بابا:وش نسوي عاد ..
انا:طيب وش فيييييزته هاذي الي تطلع بكل هالوقت ..!
بابا:يا بابا احنا سعوديين وهذا شي طبيعي ..
انا بإستنكار:وشووو ..؟!
بابا:بعد 11 سبتمبر صاروا كل السعوديين اراهابيين .. يلا الله يعين
انا تحطمت من جد .. وربي حرام عليهم .. من متى واحنا نستنى الفيزا .. تأففت بحزن
بابا يضحك:حتى السودان حاطه علينا فيزا ..
ضحكت غصب:ههههههههه
ماما:يلا كل تاخيره وفيها خيره .. اجل ابراهيم رجع ؟؟
بابا:ايه جابه عبدالله اليوم ..
اول ما جا طاري عبدالله اختبصت .. ورجع المغص الي ببطني وانا اتذكره اليوم .. قمت بسرعه عنهم مابي تزيد هالحاله فيني .. الشعور هذا غير انه حلو بس بنفس الوقت مزعج .. رجعت لغرفتي وحطيت راسي وانا احاول انام .. بس ما عرفت من كثر التفكير .. بس افكر به ماني قادره اغمض عيوني حتى .. وش هالحب ..!
الصباح قمت وانا متحمسه .. وفرحااانه مره .. رحت مع ماما السوبر ماركت وتقضيت معها مع انو اكره مالي المقاضي .. وجلست مع بابا عالنت وهو يفتح اشياااء تافهه بالنسبه لي .. مدري صرت اسوي اي شي عادي عندي .. من زود الفرحه الي فيني بلشت بعمري .. كنت مع بابا ورن جوالي .. انتضفت وتوهقت وما عرفت وش اسوي .. عبدالله داق .. قمت وعدلت بنطلوني وتنحنحت بصوتي بخوف مابي ابين لبابا شي
انا:آآ بابا .. ليلى تدق بشووف وش فيها اوكي ثواني وجايه ..
بابا مندمج:طيب طيب
طلعت بسرعه ورديت:الوو
عبدالله:اهلين
انا ابتسمت غصبن عني .. ياااربي احس اني ارتجف ليش مدري .. صرت اتنفس بسرعه حاسه اني مهما استنشقت هوا ما راح يكون فيه فايده ..
عبدالله:شلونك .. ؟؟
بلعت ريقي وقلت بإرتباك:طيبه وانت ..؟
عبدالله:انا بخييييير .. اقول شجن
انا:قول
عبدالله:زعلانه ؟؟
كبرت ابتسامتي غصبن عني وقلت بهمس مدري وش سببه:من ايش ..؟
عبدالله:من امس
انا قلبي صار طبول .. اف يا شين كذا :لآ .. ليش ازعل ..؟!
عبدالله:طيب .. نكمل نقاشنا ذيك اليوم ..؟
انا كنت احس بالـ ... الـ ..مدري ما اقدر اعبر ولا اقدر اوصف الشعور الي انا حسيت به .. احبه ويحبني كذا فجأه .. أخذت نفس عميق:وش نقاشه ؟
عبدالله:شجن انتي تحبيني ..؟؟؟ عادي قولي مافيها شي .. اذا كنتي ما تبادليني هالشعور ما راح ازعل
ابتسمت وقلت:وان كنت ابادلك اياه ؟؟
عبدالله بعد سكوت:طيب دقيقه بس
وسكر بوجهي .. وانا جلست اضحك ياااربي كيف كذا كل شي يصير بسرعه .. بابا ناداني .. تأففت مو وقته هذا وش يبي .. اذا كنت طفشانه وجيته يقول مشغول .. واذا كنت مشغوله يناديني .. رحت وانا مالي خلق:هلا
بابا:تعالي شوفي هالخبر معي
يااااااااربيه بابا والاخباار ..! الحين يبيني اقراه له عشانه ما لبس نظراته .. اف مو وقته .. انا وش حادني وخلاني اجلس معه من الاول .. رجع جوالي يدق:بابا بس دقيقه انا اكلم ليلى .. خل ماما تقراه لك
وركضت لبرا بسرعه ورديت:الو
عبدالله:انتي من جدك ..؟!
انا كانت ابتسامتي شاقه وجهي شقه مو طبيعيه حتى ابي امسكها ماني عارفه
عبدالله: هو انا كنت حاس بس .... احلفي ..!
انا ضحكت غصب:ههههه وش احلف ..؟!
عبدالله:قوليها
انا بديت ارتبك:وش اقول ..؟!
عبدالله:قولي والله العظيم احبك
انا ماعرفت امسك نفسي خلاص:عيب
وسكرت بوجهه وانا اضحك .. مدري وش فيني انهبلت .. احس بفرحه مو قادره اوصفها ابـــــدن ..
طن طن ... طن طن .. مسج .. فتحته بحماس (( عارف انك تستهبلين علي .. ما صدقتك ))
طلعت الساحه .. اتلفت حولي فيه احد ولالا .. فتحت مسجل الصوت وقلت بكل حماس:والله العظيييم احبــــــــك
وارسلتها له وسائط .. ثواني بس ودق .. وانا اناظر الجوال ومبتسمه وما رديت .. يمكن دق حوالي العشرين مره وانا سافهته .. أرد وش اقول .. ما قد تخيلت اني بستحي من عبدالله يوما من الايام
جا مسج .. فتحته (( عظم الله اجرك )) .. ارتعت .. وش يقول ؟؟ دقيت بسرعه وبخوف:وش صااار ..؟!
عبدالله:ههههههههههههههههههههه
انا استوعبت .. اللعاب كان يبيني ادق عليه اصلا .. قلت بقهر:سخيف
وصكيت بوجهه وقفلت الجوال .. حلو اني اتغلى عليه .. شعور جميل .. ركضت بسرعه ودخلت للمجلس:بابا بابا بابا بابا ..
بابا التفت:الحين جيتيني هاه
جلست جمبه بطريقه هبلا:يلالا وش اقرا لك ..
نمت ذيك اليوم احلا نومه بحياتي كلها .. اصلا باليالله نمتها كنت اتقلب وافكر واخترع مواقف على كيفي وكلشي .. مرت يومين وانا وياه مسجات هو يبيني ارد وانا بس اتغلى عليه .. كان الوضع عاجبني مره وعايشه بحلم مابي اصحى مننننننه ابدن
آخر مسج ارسله (( ردي ولا ترا بزعل ))
رديت عليه (( شفت غرفة ابراهيم ؟؟ ))
عبدالله (( ايه وش دخلني فيها ؟؟ ))
انا (( فيها جدار عليه برواز لونه احمر .. طق راسك فيه ))
عبدالله (( اطق راسي بالجدار هاه الشرهه علي انا ))
انا بعد ما قريت رده انفجرت ضحك ورديت (( هيه يا رمانه وعبودي زعلانه ))
عبدالله (( ايه زعلانه وتبي رضاوه بعد .. تجين بيتزا روما ؟؟ ))
انا (( لا شكرا ماني جايعه ))
دق عبدلله وعطيته مشغول
عبدالله (( ردي :@ ))
انا (( لا ))
دق وهالمره رديت بحماس
عبدالله:يوووه ما بغينا
انا كاتمه ضحكتي : ...........
عبدالله برجاء:تعااالي بيتزا روووما
انا:ليش ..؟!
عبدالله:عادي عزيمه ..
انا:اممممممم لآ
عبدالله بقهر:يووه ليييييش طيب ..
انا:ههه على شرط ..
عبدالله:من عيوني كل ما تامر عليه
انا انجرحت بس تكلمت:شفت شفت ..
قلت بدلع:يعني حالف تحرجني .. لا عاد تقول هالحكي وبجي
عبدالله:هههههههههه عاد انا وش قلت
انا:اففف عبدالله
عبدالله:طيب طيب خلاص اهم شي تجين .. لحظه وش قلتي انتي ؟؟
انا:قلت بجي بس لا تحرجني
عبدالله:هاه ؟؟
انا عصبت:عبــــــــدالله
عبدالله:هههههههههههههههههههه
سكرت بوجهه ورحت اتروش .. ولمن طلعت لقيت منه مسج (( الساعه 8 ان ما لقيتك بخلي اذني واذنيك اربع ))
انسدحت عالسرير بالروب حقي وحضنت شماغه .. ياااربي اموت فيه .. دخلت ماما
|
01-08-10, 09:53 PM
جديد مواضيع قسم القصص المكتمله
العرض العادي
