كاتب الموضوع :
اديم الليل
المنتدى :
الارشيف
الفصــــل الســـادس عشـــر
___________________________
استقام طلال بعد مانزل من السياره اللي توقفت امام برج اوكسوالشهير ..
توجه للفت وضغط على زر الدور الثامن حيث مطعم اوكسو تاور اللي كان
مقرر يتعشى فيه ..
بعد فتره من وقوفه داخل اللفت بصمت ...
حس ان البنتين اللي كانوا يشاركونه اللفت يناظرونه بتركيز شديد ...
وانجذاب لشكله الملفت بملامحه العربيه الجذابه واللي ماقلت هيبتها ابد
حتى مع لبسه اللي يحاكي لبس الاجانب ببدلته الرسميه بالون الاسود
من (valentino)
مع قميص بالون الابيض تعلوه ربطة عنق بالونين الاسود والرمادي ..
يغطيها معطفه الطويل بالون الاسود ..
استمرت نظرات البنتين موجهه لطلال اللي تجاهل وجودهم وظل مركز نظراته
على البوابه قباله لين شافها تتوقف عند الدور الثامن اللي هو مقصده وتنفتح بهدوء ..
طلع من اللفت بخطوات ثابته بدون مايلتفت للخلف وتوجه للمطعم ..
وقف بالمدخل وعطى معطفه للويتر وكان على وشك يتبعه لطاولته لما لفت نظره
المحامي اللي يتابع المسائل القانونيه له واللي كان موجود بنفس المطعم ..
حانت منه التفاته عرضيه للشخص اللي معه وبالحظه هذي ماقدر يتحرك من مكانه
وظل يناظر بالشخص اللي جالس قبال المحامي اللي مابعد انتبه لوجوده ..
ناظر فيها بذهول وكان متأكد انها هي نـــدى حتى لو انه ماشاف وجهها الا انه يقدر
يتعرف عليها بين مليون وحده ...
رجع يناظر المحامي بـ انهبار وهو يفكر كيف ماعرف انه ابوها ...!!!
تذكر انه مافكر ابد يقرا الاسم الكامل للمحامي اللي بيرافقه لان باله كان مشغول
طول الوقت وكانت المره الاولى اللي يقابله شخصيا فما فكر انه هو نفسه
المحامي عبدالله الـ .... ( ابو ندى) ..
لاحظ انو ابو ندى انتبه لوجوده وابتسم له بادله الابتسامه بهدوء وهو يحاول
يرجع ملامحه للبرود تقدم من طاولتهم عشان يسلم على ابوها اللي وقف
لما صار طلال قريب من طاولتهم سلم عليه طلال ..
واستمر الحكي بينهم للحظات حس خلالها بنظرة ندى اللي رفعت راسها
بشكل مفاجأ وشافته ..
توقع نظرات الذهول منها الا انه مافكر يلتفت لجهتها ابد وبعد ماسلم على ابوها
تبع الويتر لطاولته ...
جلس وهو يبتسم بهدوء لان طاولته لحسن الحظ كانت بموقع يسمح له انه
يشوفها بوضوح ..
ناظر بمظهرها الساحر اللي افتنه من اول مره شافها فيها ...
ومافاته الارتباك اللي كان مسيطر على ملامحها وهي ترد على اللي يقوله ابوها
وهي تتجنب انها تناظر بـ اتجاهه ...
ظل يناظر فيها طول الوقت ومابعد عيونه عنها ابد وهو يراقب كل حركه
تصدر منها وكل تغير يعتلي ملامحها ..
تأمل بصمتها وحكيهابـسرور ... وهو يحس ان الوقت يمر بسرعه كبيره
وهو وده لوانه يتوقف عند هذي اللحظه ومايتحرك ابد ..
لاحظ ابوها اللي وقف فجأه وابتعد عن الطاوله وشافها ترفع نظرها له
وتبعده بسرعه كبيره ..
ندى اللي كانت حاسه انها محاصره بنظرات طلال اللي ظل يناظرها طول الوقت
توترت اكثر لما ترك ابوها الطاوله وماعاد فيه حاجز تحتمي فيه من نظراته
اللي تربكها ... كانت خايفه تلتقي نظراتها بنظراته وماتقدر تبعدها ..
طلال وهو مستمر بنظراته لها لاحظ انها ترفع يدها عشان تستدعي الويتر
اللي لبى ندائها بسرعه الا انه وقف بالجهه المقابله لها بحيث حجبها
عن عيونه لاحظ ان الويتر ظل واقف قبالها لدقايق بعدها ابتعد وهو مبتسم
وتفاجأ لما وقف الويتر قباله وهو مبتسم وفي يده منديل يمده له ..
خذ المنديل منه بـ استغراب وابتسم لما قرا العباره اللي كانت مكتوبه عليه
كانت كاتبه كلمتين فقط ....
( لا تنـــــاظرني )
ناظرت فيه ندى وهو منزل راسه ويقرا اللي كتبته له على المنديل ومرتسمه
على شفايفه ابتسامه هاديه ..
لاحظت انه دنق وكتب شي على المنديل نفسه ورفع يده للويتر اللي قرب منه
بسرعه وعطاه المنديل وهو يحكي معه بهدوء ..
شافت الويتر وهو يتقدم لها ويمد لها المنديل بـ ابتسامه مؤدبه خذته منه
بهدوء وقرت اللي اكتبه لها واعتلت ملامحها الحده لما قرت الكلمات اللي صاغها
بخط انيق ...
( واذا قلت لا )
ناظر فيها طلال بـ ابتسامه واسعه وهو يلاحظ انفعالها وهي تكتب ..
وبعد لحظه وصله ردها ...
( ليـــه !!! )
شافته يكتب رده بشكل سريع وهو للحين مبتسم ولما وصلها الرد كانت
متلهفه تقراه ...
( لان اللي يبعد عينه عن نظر عينه مجنون )
انتظر ردها بترقب وكان ردها هو ...
( بليز لاتحطني بموقف محرج مع بابا )
لما وصله ردها شافته يقراه وهو يرفع حاجبه وبعدها دنق يكتب على المنديل ..
بعد ثواني كانت تقرا رده اللي كان ...
( طيب موافق بس بشرط اشوفك بكره )
اعتلا العبوس ملامحها بشده ونزلت يدها تكتب بسرعه ..
( وقــــــــح )
شافته يضحك بقوه لما قرا ردها ورجع يكتب لها وهو للحين مبتسم الا ان ابوها
رجع قبل لاتعرف وش كان رده ظلت متوتره طول الوقت لين انتهوا من العشا ..
وقفت مع ابوها بعد مادفع الحساب وتوجهوا للباب ..
ظلت تنتظر الويتر اللي راح يجيب معطفها وابوها بعد يرد على جواله اللي رن
وفضل انه يبتعد عشان يقدر يحكي براحته ...
ندى اللي ظلت تنتظر الويتر وفكرها مشغول بطلال وكيف تفاجأت بشوفته
كانت تظن انها بتهرب من وجوده اذا سافرت ولقته قبالها ...
حست فجأه بشي دافي يهبط على كتوفها واكتشتفت انه ماكان الا معطفها
لفت بقوه تناظر بالشخص اللي كان واقف وراها ويده للحين على المعطف
فوق كتفها ...
تجمدت اطرافها للحظه وتاهت عيونها بعيون عسليه ناعسه حست انها
تأسرها بنظراتها ...
ماوعت من شرودها الا لما حست بيده اللي دست المنديل بيدها بنعومه
وهو يهمس لها برقه : بنتظرك ..
وبعد عنها بهدوء وبخطوات ثابته وهي مستمره تناظره وتتسائل بذهول كيف تكون
خطواته ثابته بهذا الشكل في حين تحس هي انها بصعوبه قادره توقف بثبات
والارتجاف مسيطر على كل اطرافها ...
بعد لحظات رجع ابوها اللي اول ماشافته يقرب دست المنديل بحركه سريعه
بشنطتها ومشت معه متوجهين للفت اللي نزلهم للدور الارضي ..
كانت ترد على ابوها بـ اختصار وترجع للسكوت اللي التزمته اغلب الوقت
اللي استغرقه منهم رجوعهم للفندق ...
توجهت لغرفتها بعد فتره من وصولهم للجناح وطلعت المنديل من شنطتها
بسرعه وهي ترمي شنطتها على التسريحه مشت لسرير وهي تقرا المكتوب عليه
جلست على طرف السرير بدون شعور وعيونها مشدوده للي تقراه ..
كان كاتب لها المكان والزمان اللي يبي يشوفها فيه لكن ماكان هذا الشي
اللي خلاها تنبهر...
اللي ابهرها وزاد دقات قلبها هو الكلام اللي كان كاتبه تحته ....
كان كاتب ....
الوعد باكر ..
و لو تأخرتي ... لا يجي باكر
ما أبي باكر بدونك
احبسي الفجر فـ عيونك
و إن أشغل طيفي ظنونك
واعديني بعد باكر ...
أنا ظلي تحت شمسك
و لو تغــيـــبي ما هو ظلي ..
و انتي اسمك في حياتي
يهمسه بعضي لكلي ..
آه يا ضعفي و غروري
اعدلي فيني و جوري
و اصدقي .. راعي شعوري
و واعديني بعد باكر ..
هذا وجهك في عيوني
ما رسمته لا وربي ..
و اللي يصرخ في ضلوعي
هذا صوتك ماهو قلبي ..
آه يا شمعة وجودي ..
اشعلي نارك في عودي..
اهجري قلبي و عودي
و واعديني بعد باكر ..
__________________
تمدد طلال بـ استرخاء على سريره والابتسامه تنور ملامحه ...
كان يفكر كيف انه قرر يبعد عنها وجابها القدر عنده بدون تخطيط منه ..
ابتسم من جديد وهو يتذكر انه كان ناوي يتركها تفكر براحتها بس الحين
مستحيل يضيع فرصته بعد ماصارت قريب منه ..
قال بصوت عالي وهو للحين مبتسم :
يابعيد وجابك الله لين عندي وصلك ..
______________________
في صباح اليوم الثاني
في بيت فيصل الـ ..
ناظر فيصل بحلا اللي كانت نايمه بحضنه ويختلج بصدره مزيج من المحبه
والاسى ...
المحبه للانسانه المستكينه بين يدينه بضعف وانهاك ...
والاسى لانه يوم تحقق حلمه و قدر ينام طول الليل وهي بين احضانه
ماتحقق هذا الحلم الا وهي تعبانه وماهيب قادره تحس بشي من اللي يصير حولها ..
حس فيها تتحرك بين يدينه بـ انزعاج وملامحها يملاها العبوس ..
توقع انها تحلم باللي صار لها ..
فيصل بحنان وهو يمد يده لخدها : حلا حبيبتي تسمعيني ..!!
جاوبته بتمتمه ماقدر يفهمها ...
رجع يضرب خدها بخفه وهو يناديها بحنان ..
لين فتحت عيونها وناظرت فيه لفتره وهي للحين ترتجف ..
فيصل بمحبه : حلا حياتي انتي بخير انا معك ومنيب مخليك لاتخافين ياقلبي ..
تفاجأ وهو يشوف حلا تناظره بتركيز وهي تمد يدها وتحتضن خده برقه ..
حلا بنبره ذايبه : فيصل انا احبـــك ..
وبعدها امتلت عيونها بالدموع كأنها تذكرت شي كانت ناسيته نزلت يدها بندم
وغطت وجهها بيدينها وهي تقول بـيأس شديد ..
: بس انت ماتبيني ..
وكملت بنبره تفضح الالم اللي عانته : قلت انك بتعذبني واهنتني بكل الطرق
بس في كل مره كنت انسى الاهانه بمجرد مااشوفك قبالي وماعاد احس الا بقلبي
اللي وده يطلع من مكانه ويستقر بين يدينك وبعيوني اللي ماودها تشوف غيرك
وماتبي من الدنيا غير انها تضيع بعيونك ولساني اللي ماوده يردد غير احبك
ويديني اللي ودها تسكن بين يدينك ...
بس انت حققت اللي تبيه وعذبتني عذاب مااظن اني كنت بحسه وخليتني ابكي
بدل الدموع دم لما رفضتني ورميتني كني شي قذر مايستاهل منك انك تناظره ..
فيصل وهو يرجع يضمها بقوه وبعدها مد يدينه يبعد يدينها عن وجهها ويمسح
دموعها بحنان شديد وهو يقولها بعذوبه : وانا والله مت من ذاك اليوم اللي جرحتك
فيه وماعاد صار لايامي طعم ولا لون من يوم جفيتيني وحرمتيني حتى من
شوفة عيونك اللي تسوى عندي الدنيا ومافيها ..
حلا وهي تناظر بعيونه بألم : ليه جرحتني ..!!
فيصل برقه : جرحت نفسي قبل لااجرحك ولو اعتذار عمري كله مااوفيك حقك
ياقلبي .. بس وش اسوي لصار قلبي وعلقي خصمين مافيهم من يتنازل
الا بموت الثاني ..
حلا بلهفه : فيصل انت تحبني ..!!
فيصل وهو يلاحظ وجهها المحمر ورجفتها قالها بصدق : لو فيه من يحب
علته ودواه فهو انا .... ولو فيه من يحب عذابه وهناه فهو انا ...
ولو فيه من يحب عمره ومنتهاه فهو انا ... ولو فيه من يحب ضحكته وبكاه
فهو انا .....
ايه احبــــــــــــك ولو الغلا ينقاس كان عجز يقيس غلاك بقلبي ...
حلا بلهفه كبيره : وانا والله احبك وعمري ماخنتك ..
فيصل وهو يناظرها بتركيز شديد : حلا حياتي انتي تعبانه مره الحراره رجعت لك
من جديد لاتحكين بشي يتعبك ...
حلا بجزع : لاانا منيب تعبانه الله يخليك اسمعني انا والله ماخنتك انا ...
وقبل لاتكمل اللي كانت بتقوله فقدت الوعي لما رجعت حرارتها ترتفع
من جديد ...
ناظر فيها فيصل بألم وهو يفكر بالي قالته من شوي معقوله تكون صادقه باللي
قالته بس هي ماكانت بوعيها وماتدري وش تقول ...
مايقدر يقتنع بكلام قالته وهي تهذي مع ان الامل داعب قلبه للحظه الا انه
تراجع بقوه قدام واقع انها هي بنفسها اللي اعترفت له بهذا الشي وماهو احد غيرها
وش اللي بيجبرها تكذب عليه وتقول انها خانته وهي ماخانته ...
وظل فيصل على حاله تعذبه الشكوك والهواجس ومهوب عارف وش يصدق فيها ..
___________________________
|
22-11-09, 11:28 PM
جديد مواضيع قسم الارشيف
العرض العادي
