كاتب الموضوع :
اديم الليل
المنتدى :
الارشيف
الفـــــــــــــــــــــصل الثانـــــــــــــــي
(الحب الحقيقي : هو أن تحب الشخص الوحيد القادر على أن يجعلك تعيسا)
فـــي حـــــي الـ (.................)
وفي بيت من افخم البيوت الي هو بيت خالد آل .............
} ~
صاحت عليه.. لأجله بكت..حنت إليه.. بقلبه حكت ..
تمشي على مر الزمن تحيأ على ذكراه!!
صار السهر هو الدمع حزناً على فرقاه..
آآآآآآآآآآآآآه
حبه كبير في قلبها .. حبه ربى مع دربها ..
اصبح امل لأجله تعيش اصبح رجا ..
{~
ناظرت سارا بالورد الي قبالها في حديقة بيتهم الواسعه الي مايسكنه الا هي وابوها
ومربيتها اللبنانيه سعاد (اللي تناديها سارا نانه) اللي تولت رعايتها بعد ماتوفت امها
وعمرها 6 سنوات وهي سارحه بخيالها وتحاور نفسها ..
( معقوله مرت سنه من تركنــــــــــــــي !!؟ )
كل مااتذكر الي صار احس كأنه امس نفس الوجع ونفس الالم الي احسه
يحترق داخلي وللحين اشتاق له واتأمل انه ممكن يرجع لي احيانأ احس نفسي
مجنونه اني فرحانه انه ماطلقني على الاقل يظل زوجي واسمي مرتبط باسمه
آآآآآآآآآآآآآآآآآآآآآه ليتني اقدر انساه بس الظاهر ان ذا الامر مستحيل رغم كل محاولاتي
للحين يتملكني نفس الشعور اني له من قبل لاانولد .........)
طلّع سارا من تفكيرها العميق وتأملاتها صوت ديمه وهي تحاكيها
ديمه : سارا سارا صار لي ساعه احاكيك وماتردين علي ؟؟؟؟
ناظرتها سارا بعدم تركيز وهي ترد : اسفه ديمه ماكنت معك
ديمه : سارا معقوله للحين تفكيرين فيه بعد الي سواه كله !!!؟؟؟؟؟؟
سارا : ديمه بليز مابي احكي بالموضوع
ديمه : بس ياسارا مرت سنه كامله وانتي للحين تفكرين بـــ (........)
قاطعتها سارا قبل لاتكمل : بليز لاتذكرين اسمه
كانت سارا تحاول تخفي مشاعرها عن الكل وتتصرف كأنها نست الموضوع
بس مجرد ماتكون وحيده ماتقدر تسيطر على دموعها الي دايم تغلبها ....
ديمه وهي تناظرها بحزن : طيب ..اوكي انا الحين استأذن منك ماما تنتظرني في البيت
اشوفك مره ثانيه قلبووو
وقفت سارا مع ديمه تودعها ...
ــــــــــــــــــــــــــــــــــــــــــــــــــ ــــــــــــــ
مشت ديمه وركبت سيارتها الاودي مع سايقها الخاص متوجهه لبيتها الي مايبعد
كثير عن بيت سارا بحكم انها ساكنه بنفس الحي ......
فكرت ديمه بصديقتها العزيزه وبمعانتها تذكرت كيف كانت حالتها طول السنه الي فاتت
(اول الايام ماكانت تنام ولاتاكل وحابسه نفسها بغرفتها ورافضه تحكي مع اي احد
حتى معها هي ...
وابوها كان متحطم عليها مره من بعد ماتعرض لهبوط شديد بالضغط يوم زواجها
تذكرت انها كانت تنام عندها احيانا وتتألم على حالتها الي تصعب حتى على العدو
كانت اذا نامت تصحى مفزوعه وهي تناديه مايتركها وتبكي بكى يقطع القلب
وديمه تحضنها وتبكي معها وهي تسمعها تردد انها تحبه وماتبيه يتركها وترتجف وهي
تبكي
ومن قل الاكل والنوم مرضت سارا واظطرو يدخلونها المستشفى لين تحسنت حالتها
شوي ..
وبعدها صارت تطلع من غرفتها بس ماتحكي كثير اغلب وقتها ساكته وتفكر
وماترضى انو احد يحكي عن الي صار قدامها ..
اقنعها ابوها تسافر معه تغير جو وسافرت معه بس حالتها ماتحسنت كثير..)
وصلت ديمه لبيتها وحصلت امها تنتظرها ماكان عند ام ديمه (نوره ) غيرها
ام ديمه مره تحبها ومدلعتها لانها وحيدتها وهي مره مهتمه بشكلها وللحين جميله
وشكلها اصغر من سنها ....
تشتغل مديره مدرسه ابتدائيه وتهتم كثير ببيتها وزوجها .....
وابو ديمه (سعود) الي هو رجل اعمال ومشارك
لابو سارا في بعض اعماله وتربطهم صداقه ....
ام ديمه : هلا حبيبتي ديمه بشريني كيفها سارا؟؟؟
ام ديمه مره كانت تحب سارا وتعتبرها مثل بنتها لانها صديقة ديمه من كانو صغار
ديمه : احسن بس بليز ماما ادعي لها وربي انو حالتها تحزن
ام ديمه : الله يعينها ويطلعها من الي هي فيه يارب ...
ديمه : امين
طيب ماما اخليك بروح ارتاح شوي ...
ام ديمه : الله معك حبيبتي
راحت ديمه لغرفتها الي يغلب عليها اللون البنك لانها مره تحبه ويدخل معه اللون
البيج بشكل متناسق وتزين الغرفه بعض العاب ديمه من كانت صغيره لانها مره متعلقه
فيها ومحتفظه فيها ... وتملى الرفوف صورها هي وسارا من كانو صغار وصورهم لما
يسافرون مع بعض لان اغلب سفراتهم تكون سوا من كثر ماهم متعلقين في بعض ......
تمددت ديمه على سريرها الواسع وهي تفكر في صديقتها وتدعي لها من قلبها
ــــــــــــــــــــــــــــــــــــــــــــــــــ ـــــــــــــــــ
في بيـــــــــــت خالد آل ........
كانت سارا جالسه على طاولة الطعام الفخمه الي من خشب السنديان تتغدى مع ابوها
وهي ساكته ........
ابو سارا قال وهو يناظرها : سارا كيفك اليوم ؟؟؟
ابوها كان مررررررره يحس بالذنب من الي صار لها ومتألم على الحال الي هي فيه
ويحاول يطلعها منه بأي طريقه بس ماقدر .......
ردت سارا وهي تحاول تبتسم لبوها الي يسألها ذا السؤال كل يوم من سنه : الحمدالله
بابا تمام ....
رد عليها ابوها : بندر ولد عمك سألني عنك اليوم ويسلم عليك
ردت سار: الله يسلمه ..
ورجعت تسكت ....
وهي تفكر بـ بندر(<- بندر ولد عم سارا عمره 26 سنه يشتغل مع ابوها... طوله
متوسط وبشرته حنطيه وعيونه لونها بني غامق وشكله مملوح بشكل عام )
وش كثر كان طيب معاها لما كانت مسافره مع ابوها اسبانيا ..
عشان يغيرون جو كان هناك وحاول يطلعها من حالة الاكتئاب الي هي عايشتها
كان دايم يصر انها تطلع وماتحبس نفسها في الفندق..
هي كانت حاسه انو بندر,, يميل لها من زمان وقبل كانت تستلطفه وكان في امكانيه
انها توافق عليه لو تقدم لها ..
بس بعد ماقابلت (...........) تغير كل شي حاولت كثير تتجاوب مع محاولات بندر انه
يطلعها من الحزن الي عايشته وانها تميل له بس ماقدرت مع انها دايم كانت تناظر فيه
وتفكر في رقته في التعامل معها ..
وتسأل نفسها ليه ماتقدر تحبه مثل ماهو يحبها!!!!؟؟؟؟؟ ومع ذلك
ماحصلت اي جواب ........!!
سوا انو قلبها مانبض الا لشخص واحد ..
ــــــــــــــــــــــــــــــــــــــــــــــــــ ــــــــــ
فــــي حــــــي الــ (...............)
في بيت طلال آل ..........
كان بيت كبير مره وفخم يدل على الذوق الرفيع ..
وكان ساكن فيه .....
ام طلال (مضاوي) <- ام حنونه تحب عيالها مره وبنفس الوقت اجتماعيه ودايم تحب
تختلط بالناس وتحب الثقافه ومره علاقتها قويه مع عمة ولد اختها ( مشاعل )
وتربطهم صداقه من زمان ....
(العنود ) <- اخت طلال عمرها 25 سنه متخرجه وجالسه في البيت مع امها
تحب الحفلات والطلعات مره .. مملوحه شعرها اسود قاصته فيكتوريا
وبشرتها سمرا وعيونها بني غامق وطويله وجسمها حلو ومره مهتمه بنفسها
وبشكلها لانو يغلب على طبعها الغرور ...
(حلا )<- اخت طلال الصغيره عمرها 20 سنه شكلها كيوت مره وجذابه بشكلها
الطفولي طولها متوسط وحلو
وشعرها يوصل كتفها ومدرجته وبشرتها بيضا وعندها غمازه وحده بخدها
اليمين وعيونها عسلي مثل اخوها تحب الهبال والوناسه ومره طيوبه تدرس
في الجامعه تخصص إداره أعمال....
جلست ام طلال ( مضاوي ) في صالون بيتها الواسع الي يضم ارقى الاثاث
الي بعضه من اماكن مختلفه من العالم لان ام طلال تحب تهتم بديكور بيتها
وتجدد فيه على طول ناظرت في البرواز القريب منها واللي يضم صوره
زوجها المتوفي ابو طلال (محمد) اللي توفى بعد ماولدت بنتها حلا بثلاث شهور
وترك لها مسؤليه تربيه عيالها الثلاثه الي حاولت انها تربيهم احسن تربيه
وكبرو ورفعو راسها طلال الي تحسه سندها وفخرها مسك شركة ابوه
بعد ماتخرج من اداره الاعمال واشتغل فيها ونجح وتشارك مع ولد خالته
وصديقه العزيز الي ورث شركات ابوه ومصانعه الي تركها له بعد ماتوفى
بحادث هو وامه وهو صغير ......
قطع الصمت الي كانت جالسه فيه دخول بنتها حلا بهبالها المعتاد وهي تجلس جنبها
وتحضنها
وهي تقول : ماما وش فيك جالسه لحالك ؟؟
ردت عليها : ابد بس العنود طالعه مع وحده من صاحبتها وانتي كنتي نايمه وطلال
ياقلبي عليه للحين مارجع من السفر
حلا: الا صحيح ماما ماقال متى بيرجع ؟؟
ام طلال : الا قال على الاسبوع الجاي بيرجع ان شاءالله
حلا : ماراح يرجع معه ولد خالتو ؟؟؟
ام طلال : والله مدري ياحلا بس اظن عنده اشغال كثيره تشغله والله حتى عمته
ياقلبي عليها منشغل بالها عليه ...
حلا : بس هو صار له سنه مارجع ؟؟؟
ام طلال : الله يرجعه بسلامه
حلا : امين مشتاقه لطلال وحشني موووووووت
ام طلال : وانا اكثر والله... الله يرده لنا سالم
حلا : امين
ام طلال : وانتي بشري عن دراستك عساك مركزه فيها ؟؟؟
حلا ترد باستهبال : ماما ماسمعتي الحكمه وش تقول ...؟؟
ردت ام طلال : لاوش تقول ياعبقرية زمانك ...؟؟
حلا وهي مشخصه : طنش تعش تنتعش... يسلم لي قايلها والله
ام طلال : لاوالله انتي بدون حكمك ذي وبالدف تنجحين اجل معها وش بتصيرين
..!!؟؟
حلا وهي تمثل انها متحطمه: افا ياماما هذا وانا مفتخره فيك عند خوياتي واقولهم ماما
ديمقراطيه ماتحبطني ابد طلعتي من جنبهاااا .....
ام طلال : لاوالله ينقالك مررره متحطمه اقول وراه ماتفارقيني بالسعى
حلا: طفشتي مني ماما خلاص ولايهمك افارقك طيراااان
وراحت غرفتها وهي طايره على قولتها ...
ناظرت ام طلال بنتها وهي تروح وهي مبتسمه وتقول في قلبها الله لايحرمني
من خفة دمها ......
ــــــــــــــــــــــــــــــــــــــــــــــــــ
في مكان ثــــــــــــــــــــاني
في مطعم فدركرز في الراشد جلست العنود مع صديقتها رغد
بعد ماخلصو من الشوبنق ...
رغد: العنود ماقلتي لي مابعد رجع ولد خالتك من السفر ؟؟؟؟؟
العنود بحزن : لامابعد تخيلي يارغد صار له سنه مسافر ومارجع
رغد: طيب يمكن يرجع قريب
العنود : ان شاءالله يارغد تدرين وش كثر تعني لي رجعته
رغد : للحين تحبينه ومافقدتي الامل !!؟؟
العنود : ايه للحين احبه ولاراح افقد الامل لين يصير لي لحالي
رغد : العنود ولامره فكرتي انو ممكن تكون في وحده بحياته ؟؟
العنود ترد وهي معصبه : وش الي يخليك تقولين كذا ؟؟
رغد : مدري بس فكره خطرت على بالي..
العنود : ريحينا من افكارك الي تجيب المرض
رغد : طيب لو فيه وش راح تسوين !!؟؟
العنود بغرور: اولا انا واثقه انو مافيه ولو فيه مستحيل اسكت لها وبخلي حياتها
جحيم لين تبعد عنه والافضل لها ماتوقف بوجهي
رغد سكتت وهي تناظر بالعنود تعرفها عنيده ومغروره ومستحيل تتنازل
بسهوله.. وبنفس الوقت ماتلومها على محبتها لولد خالتها هي شافته مره بس
وخقت ..( انسان اذا شفته مره صعب تنساه لان ملامحه تنطبع في الذاكره
موبس عشان مظهره المميز بسبب تأثير شخصيته الي تحسسك بالهيبه
وهالة الثقه بالنفس الي تحيط فيه تجبرك تناظره بااعجاب وتسكت اذا حكى )
العنود : رغد وش فيك ساكته ؟؟؟
رغد : ابد ماطفشتي ماودك نمشي الحين ؟؟
العنود : اوكي قومي نطلع
وطلعو ثنتينهم متوجهين لسيارة العنود اللكزس وبعد ماوصلت العنود رغد
لبيتها رجعت هي لبيتها .....
ــــــــــــــــــــــــــــــــــــــــــــــــــ ــــــ
} ~ صاحبــــــــــــــــــــي بمـــــــــــوت من كثر الحنين .,!
في بيت خالد آل ...........
في غرفه سارا الي يتوسطها سرير ملكي له ستاند من المخمل العنابي الي يكون
مضغوط بشكل ( xxx ) بحجم متوسط وموزعه .
ومغطى بمفرش بيج فخم بقماش مفرغ بشكل زخارف انيقه ومرتبه ..
وجدار الغرفه مغلف بورق جدران مزخرف ..
يختلط فيه اللون البيج والذهبي والارضيه مغطيه بالباركيه (الخشب) باللون البني
المحروق والتسريحه من الخشب البيج بزخارف ناعمه وانيقه والكرسي من الخشب
البيج وداخل فيه الزخارف نفسها الي على التسريحه ومبطن بالمخمل العنابي
والستاير لونها عنابي تمتد لين الارضيه وفي جانب الغرفه جلسه مكونه من صوفا بيج
وكرسين تتوسطهم طاوله صغيره وغرفة الملابس يفصلها عن الغرفه باب من الخشب
لونه بيج يتماشى مع اللوان الغرفه وفي الجانب الثاني من الغرفه باب زجاجي يتخلله
خشب يؤدي الى الشرفه الي تحتوي على كرسي هزاز من القش بشكل ارجوحه معلقه
بعصى حديديه تمتد بشكل مقوس وتنتهي بارضيه مدوره اسفل الارجوحه المصنوعه
من القش ....
جلست سارا على سريرها الواسع تناظر بصوره بين يدينها تجمعها مع حبيبها وزوجها
الي تركها بيوم زواجهم جلست تتأمل بالصوره وكيف حاضنها فيها من الجنب ماسك
خصرها بين يدينه الثنتين ومسند كتفها على صدره ومعطي للكاميرا جانب وجهه بس
وهو يناظرها ومقرب وجهه من خدها وهي تبتسم وبعيونها بريق السعاده مررت
اناملها على الصوره وهي تحس بالدموع تملى عيونها الذهبيه وتفكر وش كثر كانت
مبسوطه وهي بذا الصوره وماكنت تدري بالي راح يصير بعد كذا ومع ذلك تتمنى لو
انها تقدر ترجع تعيش نفس اللحظه من جديد تستشعر كل نفس فيها وتحس بكل ضحكه ..
ضحكتها بذاك اليوم وتسرق كل لحظه تقدر تناظره فيها بحب وتصدق انه هو بعد
يبادلها نفس الحب .....
هو صدق قالها انها ماراح تشوفه بعد ذاك اليوم وفعلا
ماشافته مره ثانيه وبعدها عرفت من ابوها انه سافر لان ابوها حاول انه يطالبه بطلاق
ولاقدر يلقاه وحاول يرفع عليه قضيه يطالبه فيها انه يطلقها فيها بس ماقدر لانه مارجع
وهي رفضت واقنعت ابوها انها ماتبي السالفه توصل للماحكم مع انها تدري بينها وبين
نفسها ان اخر شي تتمناه انها تتطلق منه يكفيها انو للحين يعتبر زوجها وماتبي ترتبط
بغيره ...!
نانه سعاد : يابنتي لهلأ عم بتفكري فيه؟ عزبتي حالك من التفكير!
سارا نزلت دموعها بدون ماتحس وقربت منها نانه سعاد تحضنها وهي على طول
ضمتها بقوه تحاول تهدي الوجع الي تحسه داخلها ...
نانه سعاد : ابكي يابنتي ابكي وطلعي يالي جوات ائلبك عرفانه انك عم تتعزبي
وماتشكي لحدا ..
سارا بصوت باكي متألم : تعبانه يانانه مرررررره تعبانه واحس بوجع كبير بقلبي
نانه سعاد: سلامة ائلبك يائلبي ياريتك تنسيه وترتاحي ..
سارا : آآآآآآآآآه يانانه ياليت بيدي والله كنت شلته من قلبي وعقلي بس غصب عني
مشتاقه له كثيييييييييير يانانه ودي بس اشوفه حتى لو مايبيني بس
اشوفـــــــــــــــــــــه
حتى لو من بعيـــــــــــــــــــــد
نانه سعاد : الله يسامحه على الي عمله فيكي لك لو يلف الدنيا مابيلئى وحده تحبوه
متلك..
استمرت دموع سارا ونانه سعاد حاضنتها وتهديها لين نامت غطتها وطلعت من الغرفه
بعد ماطفت النور ....
ــــــــــــــــــــــــــــــــــــــــــــــــــ
وهي طالعه شافت ابو سارا وهو جاي ويناظر بغرفة سارا
سألها: وينها سارا ؟؟؟
ردت نانه سعاد: هلأ بس نامت
سألها : كانت تبكي ؟؟؟
سكتت نانه سعاد وماردت
قال ابو سارا بألم : آآآآآآآآه لو اشوفه كان ذبحته بيدي ولااشوفها بالحاله ذي
نانه سعاد: الله يسامحه
مشى ابو سارا بالممر الطويل متوجه لغرفته وهو متألم من حال بنته الوحيده
ومهوب قادر يسوي لها شي يخفف من المها ...
ــــــــــــــــــــــــــــــــــــــــــــــــــ
في مكــــــــــــــــــــــان يبعد عن المملكه الاف المسافات...
وتحديدا في عاصمة بريطانيا مدينه الضباب لنـــــــــــدن التي تزدحم طرقاتها
بالناس الذين يتدافعون للوصول الى وجهاتهم التي يقصدونها تحت ضوء الشمس
التي لاتلبث الا وتختفي فجأه خلف السحب منذرة بهطول المطر الذي يأخذ بالهطول
بغزاره رافعا سخط الناس الذين يسرعون بالتدافع تحت زخات المطر باحثين عن ملجأ
يحتمون به ..
من قطرات المطر التي تأخذ بتزايد في حين يندفع البعض الاخر للأسراع
الى وجهته محتميا تحت مظلته او قبعة معطفه .....
} ~
ابعد اقول انساك...... واقسى عساي اسلاك
لكن معاي القــاك ..... دايـــــــــــــم
والقى الالم كل الفصول ... ليل العنا بيا يطول
يافرحي ياهمي وجروحي... ياغلى من روحي لروحي
ماقدر على النسيان... ماقدر على النسيان
لاشفتـــــــك ...
انسى كل شي ... كل الي راح من الالم واللي جاي
} ~
في بنايه من البنايات الشاهقه التي تطل على انحاء لندن وقف بكل شموخ
امام النافذه الزجاجيه التي تمتد للارضيه التي يغطيها الموكيت الفخم الي تغوص فيه
الاقدام عند عبوره.. ناظر في المنظر الممتد قدام عيونه وتفكيره في مكان ثاني
ابعد كثير من المسافات الي يناظرها قدامه......
يتذكر صوتها وهي تقوله انها تحبه وماتقدر تعيش من دونه يتذكر عيونها
والدموع ماليتها,, العيون الي تسحره بلونها الذهبي الصافي ووجهها الي مايقدر ينساه
وكل ماغمض عيونه يحس انه يشوفه بكل جماله المبهر اللي كان يذهله ويخليه مايقدر
يبعد نظره عنها ابد حاول يشغل نفسه طول السنه الي فاتت عشان مايفكر فيها
بس دايم يلقى افكاره تاخذه غصب لها وكل ماقاومها اكثر كل ماسيطرت عليه بشكل
اكبر ...
سمع صوت الباب وهو ينفتح ...
دخل طلال ولد خالته مكتبه وهو يكلمه عن الشغل وماكان معه كان للحين سارح بخياله
كان يفكر فيها وش تسوي الحين وكيف مرت السنه عليها !!؟؟؟
طلال لاحظ صمته وعدم تركيزه وسأله بهدوء: تفكر فيها ؟؟؟؟
سكت ومارد عليه ..
طلال رجع يقوله : عرفت انها سافرت مع ابوها بعد ماسافرنا بفتره راحت اسبانيا
وقالو لي انو ولد عمها كان معها وكانت تطلع معه على طول ..
كان يسمعه وهو يحس انو دمه فاير من الي يسمعه وده يروح يذبحها ويذبح
ولد عمها لانه فكر يناظرها بس......
مايتحمل الفكره يحس وده يكسر كل الي قدامه اذا تخيلها مع احد غيره ....
كمل طلال: اتوقع انه يحبها واكيد ابوها بيساعده وبيوافق عليه
قاطع كلامه بحده : انت ناسي انها للحين زوجتي ؟؟؟؟
طلال وهو مستمر بالهدوء : لامانسيت بس مااظن ابوها يسكت كثير.
رد عليه وهوشاد يدينه : انا مايهمني يسكت ولامايسكت المهم انها زوجتي وتحلم تاخذ
غيري ..
طلال : بس انت تركتها وش تبيها تسوي؟ تجلس تنتظرك !!
رد عليه بحده اكثر وملامحه متوتره : اللي يهمني انها لي وماراح تكون لغيري ولو
صار ذبحته قبل لاياخذها مني ..
طلال وهو يحاول يغير الموضوع : طيب .... ماراح ترجع معي الاسبوع الجاي ؟؟
رد عليه وهو للحين يحاول يسترد هدوء اعصابه :
لاماراح ارجع الحين مظطر اشوف المصنع الجديد الي ناوين نتعامل معهم
طلال : على خير ان شاءالله وعمتك كلمتها ؟؟؟
ابتسم وهو يرد : ايه كلمتها ومتاضيقه اني ماراح ارجع معك الاسبوع ذا ...
بس اقتنعت لما قلت لها اني مظطر اجلس فتره وراجع قريب وانت كلمت خالتي ؟؟؟
طلال : ايه وتسلم عليك
رد : الله يسلمها
طلال : اجل اخليك الحين بطلع اظبط اموري عشان الرجعه ...
وطلع طلال وتركه يرجع لافكاره وذكرياته وتخطيطاته الي ناوي عليها اذا رجع ...!
ــــــــــــــــــــــــــــــــــــــــــــــــــ
نرجع لأراضي مملكتنا الحبيبه
وتحديـــــــدا في بيت سعود ال ..........
جلست ديمه في غرفتها وهي رافعه جوالها عشان تدق على سارا دقت عليها
وهي تنتظر الرد ...
ردت سارا : اهلين ديمو
ديمه : هلا سار كيفك ؟؟
سارا : تمام ياقلبي وانتي كيفك ؟
ديمه : تمام ... اممم سارا ودي اطلب منك شي ..!
سارا : كم ديمو عندي امري ياقلبي ؟؟
ديمه : سارا انتي عارفه انو السمستر الجديد راح يبدا الاسبوع الجاي صح ؟
سارا : ايوه عارفه ..!
ديمه : وانا ابيك تداومين معي ياسارا ..
سارا : بس ياديمه ..
قاطعتها ديمه بسرعه : سارا الى متى وانتي حابسه نفسك ؟
سكتت سارا وماردت
ديمه باستهبال : وبعدين انا طفشت من جلست البيت تدرين اني اعتذرت السنه الي
راحت لانك مو معي والدراسه مالها طعم من غير سوسو حبيبتي
ابتسمت سارا وهي ترد : والله انا مدري من غيرك وش اسوي ..
ديمه : ابد بس بتطفشين وبتحوم كبدك وبتدورين في الشوارع و تقولين اريد حلا
سارا ضحكت على حكي ديمه
ديمه : تسلم لي الضحكه والله.. طيب وش قلتي نرجع لهم الدرسه والكرف ولاننثبر
في بيوتنا ..؟
سارا : ههههه لانرجع لهم الدراسه ازين من هم غيرها
ديمه : صح عليك هذا الحكي الي يعجبني..
اجل امرك الاسبوع الجاي ونروح سوا للجامعه اوكي ؟
سارا : اوكي .
ديمه : طيب سارا اخليك الحين بايو..
سارا : باي
قفلت سارا من ديمه وهي تفكر في الاسبوع الجاي وكيف راح تكون رجعتها للجامعه
؟؟!!
ــــــــــــــــــــــــــــــــــــــــــــــــــ
هل راح تستمر احزان سارا ؟!! وكيف راح تكون رجعتها للجامعه ؟!!
(......) وش راح تكون تخطياطته الي ناويها اذا رجع ؟!! وهل بيقدر ينفذها ؟!!
العنود وش راح تسوي اذا درت انو ولد خالتها متزوج سارا ؟! وهل بتسكت ولا بتكون لها ردة فعل ثانيه ؟؟
بندر وحبه لسارا هل بيجي يوم وتبادله الحب ؟!!
|
18-05-09, 10:41 PM
جديد مواضيع قسم الارشيف
العرض العادي
