_______________________


استمرت سارا تناظر بالعنود والحيره متملكتها من الشعور الغريب اللي حسته

من حكيها ونظراتها ظلت واقفه بمكانها لفتره وبعدها انتبهت للعمه مشاعل وهي

تدعوها للجلوس جلست بالصوفا المقابله لهم بهدوء ..

العمه مشاعل وهي توضح لسارا اللي ماكانت عارفه انو فهـد له خاله

قالت بلطف : مضاوي هي خالة فهـد الوحيده وعندها طلال الكبير وهو قريب من

فهـد مره ودوم معه الله لايخليهم من بعض ..

واشارت للعنود وهي تكمل : والعنود بعد طلال والصغيره حلا تدرس بالجامعه

وتو تزوجت من فتره بسيطه الله يوفقها ..

ابتسمت سارا باادب وهي تقول : امين

العنود اللي كانت مستمره بالسكوت من بداية الحوار وتناظر بسارا ببرود

وجهت لها الحكي بنبره متعجرفه : خاله مشاعل تقول انو فهـد تزوجك السنه اللي

فاتت .. غريبه ماكلمنا عنك ابد ومااظن انك كنتي معه وهو مسافر معقوله

تاركك طول السنه اللي فاتت وانتوا في بداية زواجكم !

العمه مشاعل انصدمت من اسلوب العنود المستفز وكانت على وشك ترد عليها

الا ان سارا سبقتها بالرد ..

سارا بنبره واثقه يشوبها غرور : فهـد كان مظطر يسافر عشان اشغاله مثل ماانتي

عارفه وموضوع انه ماقال لكم عن زواجنا انا فهمت من عمة انو انتو كنتوا مسافرين

وقتها وفهـد حبيبي ماكان يبي يأجل زواجنا اكثر من كذا .. بس انه تفاجأ انه

مظطر يسافر بعد زواجنا على طول وسبب اني ماسافرت معه اعتقد انو هذا

شي خاص فينا انا وزوجي ومافي داعي اذكره لك ..

العمه مشاعل ابتسمت لسارا براحه لانها قدرت ترد على اسلوب العنود

المستفز ..

اما العنود فكانت محترقه من الغيظ اولا لانها ماتوقعت سارا بتكون بهذا الشكل

وانصدمت بجمالها وثانيا من ردها حيث انها حكمت عليها من مظهرها انها

بتكون في منتهى الرقه والضعف وبتقدر تحرجها بهذا السؤال وماراح تقدر

ترد عليها ...

العمه مشاعل وهي تحاول تلطف الاجواء وجهت الكلام للعنود بهدوء

العمه مشاعل وهي تناظر ساعتها : الغدى بيكون جاهز بعد شوي العنود راح تتغدين

معنا اكيد ..

العنود وهي تحاول تجاوب بهدوء : لا اسمحيلي ياخاله مره ثانيه ان شاءالله ..

العمه مشاعل : براحتك حبيبتي ..

وقفت العنود بسرعه وطلعت من الغرفه بسرعه ترافقها العمه مشاعل وتوجهوا للباب

سارا اللي وقفت بمجرد ماوقفوا عشان يطلعون الا انها مافكرت تطلع معهم ..

وظلت واقفه بمكانها تاخذ نفس عميق تحاول فيه تهدي نفسها بعد اسلوب العنود

المستفز لها ..

ناظرت الغرفه بشرود وهي تتسأل عن السبب ورا نظرات العنود الغريبه

واسلوبها الاستفزازي مع انها المره الاولى اللي يتقابلون فيها ..

قررت تصرف تفكيرها عن الموضوع وان كان فيه سبب فعلا ورا تصرفات العنود

اكيد الايام بتكشفه لها ..

توجهت للباب وتفكيرها مشتت وكانت على وشك تطلع من الغرفه لما صدمت

بفهـد اللي كان بيدخل الغرفه بنفس الوقت ..

رفعت سارا نظرها والتقت عيونها بعيون فهـد وتجمدت اطرافها وماقدرت تبعد

عيونها اللي اسرتها عيونه ...

بعد فتره بسيطه حستها سارا دهر حاولت تبعد عنه الا ان يدينه شدتها اكثر

لما حاولت تبعد وقربتها منه ...

سارا بتوتر : فهـد

كان الرد الوحيد من فهـد هو اشتداد نظرته ويدينه اللي كانت محاوطتها

بعدها تغيرت نظرته للبرود وبعد يدينه عنها بدون مايقول شي وتوجه للطرف الثاني

من الغرفه ..

ظلت هي واقفه بنفس المكان عاجزه تتحرك خطوه وحده ..

دخلت العمه مشاعل الغرفه بدون ماتلاحظ شي من شحنات التوتر اللي ماليه الجو

العمه مشاعل بحنان : فهـد راجع بدري اليوم ليت دوم ترجع بدري كذا ..

فهـد وهو مبستم : ماهوب بيدي يالغاليه كل شي تلخبط بغيبتي وكل الاشغال

تتطلب حضوري ..

العمه مشاعل : الله يعينك ياقلبي .. الغدا جاهز خلونا نتغدا دامك جاي بدري

توجهوا لغرفة الطعام وجلسوا يتغدون بهدوء وسارا كانت ملتزمه الصمت

والعمه مشاعل تحكي مع فهـد اللي كان يرد بااختصار اغلب الوقت ..

لين قاطعهم رنين جواله اللي على اثره ترك فهـد الطاوله وتوجه لمكتبه بسرعه ..

العمه مشاعل : الله يعينه شغله ماخذ كل وقته ..

هزت سارا راسها بصمت ..

بعد فتره كانت سارا جالسه مع العمه مشاعل بالصالون بعد ماانتهوا من الغدا

سارا بلطف : عمة

العمة مشاعل : هلا قلبي

سارا : اليوم توصل اغراضي راح تجيبهم مربيتي نانه سعاد وحبيت اسألك اذا

مافي مانع تسكن نانه سعاد معنا لاني متعوده عليها مره واعتمد عليها في كل

اموري ..

العمه مشاعل بحنان : اكيد ياقلبي البيت بيتك .. اسألي فهـد ومااظن انه يخالف

ابتسمت سارا بجمود وهي تفكر وش راح يكون رد فهـد ...




________________


في بيت فيصل الـ...


كانت حلا جالسه بتوتر على كرسيها يمين فيصل على طاولة الطعام ..

ونظراتها تدور حول باقي الاشخاص على الطاوله كان الكل مجتمع على الغدا

الجده هيلين اللي ماتنزل للدور الارضي الا نادرا كانت جالسه قبال فيصل

بالطرف الثاني من الطاوله بينما لانا جالسه على يساره ومشعل اللي فضل

الجلوس بجانب حلا وتخلا عن مكانه المعتاد بجانب لانا ..

كان فكرها مشغول بالجانب اللي اكتشفته من شخصية فيصل من دخلت لبيته

دوم كانت عارفه انو شخصية فيصل قويه وكانت تلاحظ في الماضي انه مايتردد ابد

في قرارته اللي يتخذها ولا يرجع بكلمته اللي يقولها ..

لكنه اغلب الاحيان كان مغرقها بحنانه وحبه وعمرها مااختبرت قوة شخصيته

وسيطرته عن قرب ..

الا انها من سكنت بيته لفت انتباهها هذا الشي بقوه مو بس عليها هي كان يشمل

كل سكان البيت اللي يبدون له الاحترام الشديد وكل اللي يقوله يعتبر اوامر بالنسبه لهم

حتى جدته اللي لاحظة اهتمامه الكبير فيها وحبها الشديد له الا انها ايضا

ماتختلف عن الباقين في احترامها الشديد له وافتخارها الكبير فيه ..

ايضا مشعل اللي يعامله فيصل معامله خاصه ويهتم بكل اموره ومشعل متعلق فيه

بشكل كبير بس بنفس الوقت يحترمه بشكل اكبر ويعتبره المثل الاعلى له ..

كان الهدوء يعم الطاوله الا ان قطعه صوت مشعل ..

مشعل بتساؤل : حلا ليه ماتاكلين ؟

حلا ردت عليه بحنان وهي تبتسم : بس انا اكل حبيبي

مشعل بعتب : لاانا شفتك تحركين الاكل بصحنك وماتاكلين ..

وكمل بشقاوه : مثلي اذا ماعجبني الاكل وتقولي ماما هيلين لاتلعب بالاكل ....

ولمعت عيون مشعل وهو يقول :

صح اذا ماهو عاجبك ... اكلي نفس اكل فيصل هو اكله غير ..

ردت عليه لانا وهي تناظره بحده : مشعل ا..

قاطعها صوت فيصل اللي قالها ببرود : لانا خلي مشعل على راحته

وكمل وهو يلتفت لمشعل : صح اللي قلته انا اكلي غير لان حلا هي اللي مزينته ..

لانا ناظرت حلا بذهول وهي تسألها : حلا انتي تعرفين تطبخين !؟

احمرت وجنتين حلا وهي ترد : لا انا ماكنت اعرف بس الحين احاول اتعلم

وكملت واحمرار وجنتينها يزيد : عشان فيصل ..

لانا بغرور : بس انتي مو مظطره تطبخين الطباخه موجوده والخدم موجودين

الجده هيلين بحده : ولماذا ليست مظطره انسه لانا !؟

والتفت لحلا وهي تقول بحنان وهي مبتسمه :

انتي محقه ياعزيزتي اذا كانت الزوجه تحب زوجها فأنها تفضل ان تكون مسؤله

عن جميع شؤنه وهذا ماكنت افعله انا ايضا مع زوجي الحبيب ميشيل ..

انا سعيده لان حفيدي تزوج من فتاه تحبه لشخصه لا لنقوده ..

شكرتها حلا وهي تبتسم بخجل الا ان ابتسامتها سرعان ماذبلت لما التقت نظراتها

بنظرات فيصل الساخره ...

انتهوا من الغدا وفيصل توجه لمكتبه وحلا تفاجأت بالجده هيلين اللي صرفت

مرافقتها وطلبت من حلا تساعدها تروح لجناحها ..

مسكت حلا يبد الجده وتوجهوا لدرج ومشعل ماسك يد الجده هيلين من الطرف الثاني

ويحكي معها بحماس ...

دخلت حلا جناح الجده هيلين للمره الاولى وتوجهوا لغرفة الجده اللي كانت

جدرانها مغطاه بورق الجدران المووج بالون السماوي والاثاث بالون الابيض

اشارت لها الجده انها تاخذها للطاوله اللي بزاوية الغرفه ..

جلست الجده وطلبت من حلا تجلس قبالها بينما جلس مشعل بالكرسي الثالث

اللي يتوسطهم ..

سمعت الباب يندق باادب بعدها دخلت مرافقة الجده جانيت شايله بيدها صنية

الشاي نزلتها على الطاوله بهدوء ...

ناظرتها الجده وهي تبتسم : كما تعرفين نحن الانجليز لانستطيع ترك عادة

التحدث حول كوب من الشاي ..

ابتسمت حلا وهي ترد عليها : ومن يستطيع لومكم فالشاي الانجليزي مشهور

بجودته ...

الجده هيلين : هذا لطف منك ياعزيزتي ..

كملت وهي تبتسم لها : يمكنك التحدث معي بالغه العربيه ..

ناظرتها حلا بفضول : تستطعين تحدث العربيه ياجده !؟

رد عليها مشعل بسرعه : ايوه ماما هيلين تقدر تتكلم عربي

الجده هيلين بحده وهي تناظر مشعل : تحدث بالانجيلزيه ياولد

مشعل : بس انتي سمحتي لحلا تحكي عربي ..

الجده هيلين : سمحت لها هي فقط انت تعرف اني لااسمح لك بالتحدث بالعربيه

معي حتى اتأكد من اتقانك للانجيليزيه ..

مشعل بتبرم : طيب

رجعت الجده تناظر حلا بلطف : كما قال ميشيل انا استطيع التحدث بالعربيه فقد

تعلمتها من زوجي الراحل ميشيل وتعبت كثيرا حتى تعلمتها ..

حلا : اللغه العربيه لغه صعبه اذا حاولنا تعلمها بدون معرفه سابقه لها ..

الجده هيلين : انتي محقه ياعزيزتي لكني حرصت على تعلمها بشكل كبير فهي

لغة القرآن الكريم الذي يجب علي كمسلمه قرأته والتدبر فيه ..

كملت الجده وهي تبتسم :

اظن انك تتسألين لماذا لااتحدث بها بمااني تعلمتها اليس كذلك !

حلا وهي مبتسمه : اكيد حابه اعرف اذا مايضايقك ياجده ..

الجده هيلين : ناديني ماما هيلين كما يفعل الجميع كلمة جده تجعلني اشعر بااني هرمه

الوحيد الذي يناديني بها هو فيصل كما تعرفين ولم استطيع اقناعه منذو كان صغيرا

ان يناديني ماما هيلين ...

حلا بلطف : اجل بناديك مثل ماتحبين ماما هيلين ..

الجده هيلين وهي سارحه باافكارها : لطالما كان يشبه جده في كل شي منذ كان صغيرا

لاازال اتذكره عندما كان في الثامنه من عمره يقول لي بكل ثقه انه كبر

على منادتي ماما هيلين ولم يعد يناديني بعد ذلك اليوم الا بالجده ..

الجده هيلين بعد مااخذت نفس عميق : سأجيبك على استفسارك عن سبب استمراري

بتحدث بالانجيليزيه رغم فهمي للغه العربيه ...

السبب هو اني اردت المحافظه على الصله التي تربطني بموطني الاصلي

وتعوضني عن بعدي عنه ... فمهما احببت هاذهي البلاد ياعزيزتي الا انني ابقى

انجليزية الاصل يتملكها الحنين لبلادها معظم الاوقات ...

سكتت الجده والدموع تلمع بعيونها ..

مرت فتره من الصمت بينهم بعدها استأنفت حلا الحكي وهي تختار موضوع

عارفه انه بيرجع البسمه لوجه الجده هيلين ..

حلا بحنان : ممكن تحكين لي عن الجد مشعل ماما هيلين احب اعرف كيف كان منك ..

ابتسمت الجده وابتدت تتكلم عن زوجها المتوفي بحب واستمر الحديث

لفتره طويله وحلا تستمع لها بحماس ....

سكتت الجده وحانت منها التفافته للساعه اللي مقابلتها ورجعت تناظر حلا

وهي تقول بحنان : لابد اني اصبتك بالملل ياعزيزتي مضى على وجودك معي

ساعتان كاملتان ..

حلا : بالعكس انبسطت معك مره ماما هيلين ولاانتبهت لمرور الوقت

ابتسمت الجده وهي تشد على يد حلا اللي على الطاوله وقالت :

اشكرك ياحبيبيتي هذا لطف منك ... لكني اظن ان هناك شخص اخر قد شعر

بالملل من حديثنا ...

وناظرت الجده لمشعل واتبعت حلا نظراتها وشافت مشعل مسند يدينه على

الطاوله ونايم بهدوء وحطت يدها على فمها تكتم ضحكتها ...

رجعت حلا تناظر الجده : استأذنك الحين ماما هيلين عشان اخذ مشعل لغرفته

الجده بحنان : عزيزتي يمكنك ترك جانيت تأخذه لغرفته لاداعي لتتعبي نفسك

وقفت حلا وهي ترتب فستانها الشيفون الابيض تخلله زخارف بالون الكحلي

بقبه عاليه مثنيه واكمام طويله وطول يصل لمنتصف الساق ..

حلا : وليه نتعب جانيت وانا موجوده وماعندي مانع اخذه لغرفته ...

توجهت حلا لمكان مشعل وماحبت تصحيه من نومه ومدت يدينها بهدوء عشان

ترفعه عن الكرسي سندت راسه على كتفها ويدينها محاوطه ظهره ..

حاوطت يدينه رقبتها وهي شايلته ابتسمت لحركته واستأذنت الجده وطلعت

من الغرفه متوجهه لباب الجناح وطلعت منه بهدوء وهي تقفل الباب وراها

وبعدها التفتت للجهه الثانيه .. ولقت فيصل واقف قبالها ..

ناظرت فيه حلا باارتباك وهي تضم يدينها حول مشعل اكثر ..

بينما ناظر فيها فيصل بنظره غريبه عجزت تفسرها ..

كان فيصل يفكر كيف انها حيرته بهدوئها من سكنت معه في بيته .. وابهرته بحنانها

الشديد على مشعل مع انه ماشك بيوم بطيبة قلبها ..

لكن اللي معذبه ومحيره بشكل اكبر هو سبب خيانتها له كان دايم متأكد

من حبها الكبير له اللي دل عليه كل تصرفتها ليه فجأه تعترف انها خاينه ..!!!

ناظر بمشعل اللي كان مستغرق بالنوم بين يدين حلا مايدري ليه حس

فجأه بالغيره من اخوه الصغير لانه يقدر يكون قريب من حلا وهو مايقدر

قالها بحده : ليه شايلته انتي ؟

حلا بـ ارتباك : ماحبيت اخلي جانيت تشيله وتترك ماما هيلين لحالها

ومشعل خفيف مره ماراح اتعب اذا خذيته لغرفته ...

ناظر فيها فيصل بقوه لفتره وبعدها مد يدينه عشان ياخذ مشعل منها ..

انتفضت لما قرب منها عشان ياخذ مشعل ...

ناظرت فيه بحب كيف رفع اخوه بحنان شديد وهي تتسأل اذا كان بيعامل

ولدهم بنفس الطريقه ... الا انها سرعان مارجعت للواقع وهي تذكر

نفسها ان اخر شي يبيه فيصل انو يكون له ولد منها ...

تبعته بهدوء لغرفة مشعل وهو متجاهل وجودها تماما ....




______________




في بيت فهـد الـ ....


كانت سارا تمشي في الممر اللي في اخره يكون مكتب فهـد ..

كانت خطاوتها متمهله كأنها ماتبي توصل لغايتها الا انها وصلت في النهايه

رغم تمهلها وقفت قبال الباب ورفعت يدها تدقه بهدوء ..

وسمعت صوته يأذن لها بالدخول فتحت الباب ودخلت المكتب بصمت

وشافته يبحث بين مجموعه من الملفات بعد فهـد نظره عن الملفات لما لاحظ

سكوت الشخص اللي دخل المكتب ...

التقت نظرات سارا بنظرات فهـد اللي ناظرها بثبات ينتظرها تحكي ...

تقدمت سارا لمنتصف المكتب وهي تفكر كيف تبتدي بالحكي ..

سارا بنبره بارده : اليوم نانه سعاد بتجيب باقي اغراضي وانا حابه انها تبقى

معي هنا ..

فهـد ببرود : قصدك تبينها تسكن هنا في بيتي !؟

سارا بنبره جافه : ايوه

فهـد وهو يدور حول مكتبه ويستند على الطاوله من الجهه الثانيه مقابل سارا

بنبره ساخره : وماتظنين انك كبرتي على وجود مربيه تهتم فيك !؟

سارا بعصبيه : انت عارف انو نانه سعاد مو بس مربيتي ..

فهـد بحده : وانتي عارفه اني مااحب احد يفرض علي شي ..

سارا : بس انا ..

قاطعها فهـد : انتي جايه تفرضين علي وجودها ماانتي جايه تاخذين رايي

عشان كذا جوابي بيكون لا منيب موافق على انها تسكن معنا ..

سارا بقهر : بس هي ماراح تضايقك بوجودها ابد ..

فهـد وهو مبتسم ببرود : عارف انها ماراح تضايقني ..

سارا : طيب وش اللي يمنع انها تسكن معنا !؟

فهـد ببرود : مافيه شي يمنع انها تسكن معنا بس انا منيب موافق ..

سارا وهي تناظره بحده : اجل مافيه شي ننقاشه ..

ولفت متجهه للباب عشان تطلع من المكتب بس قبل ماتوصل الباب حست

بيد فهـد ماسكه عضدها وتلفها بقوه لناحيته ناظرته بقوه مع انها كانت مرتبكه

فهـد ونظراته الحاده تتأمل وجهها سألها بنبره هاديه ..

: ماراح تترجيني اوافق على سكنها معنا !؟

سارا وهي مستمره تناظر بعيونه بقوه قالت بنبره قاطعه : لا

فهـد ناظرها لفتره وبعدها ضحك : ههههه مااتذكر انك كنتي عنيــده كذا ...

سارا ابتسمت بسخريه : اتوقع فيه اشياء كثير ماتذكرها عني ..

فهـد قرب منها اكثر وحرك انفه على خدها بنعومه وهمس بااذنها بنبره

خافته : يمكن .. بس لاتخافين مانسيت كل شي ..

وبعد عن اذنها ونزل لشفايفها بسرعه وطبع عليها بوسه برقه متناهيه

بعد وجهه عنها وهو يحط يدينه على جانبي وجهها وقال لها ..

فهـد : امممم كان ودي انها تستمر اكثر بس مضطر اطلع الحين ..

بعدت عنه سارا بقوه بدون ماتناظر فيه واتجهت للباب وكانت على وشك تفتحه

لما نادها فهـد بهدوء ...

فهـد : سارا

وقفت تنتظره يكمل حكيه ..

فهـد : لاتنسين تقولين لسعاد تلم اغراضها عشان تجي تسكن معنا ..

التفتت سارا له بقوه وهي تناظره بعدم تصديق وبعدها ابتسمت وهي تقوله

: طيب

نزل فهـد نظره للملفات اللي تملى مكتبه يرتب اللي راح ياخذه معه منها

ويترك الباقي ...

سارا بلطف : فهـد

رفع نظره لها بسرعه بدون مايرد ..

كملت سارا بنفس النبره : ديمه بتمرني بكره عشان نروح مع بعض للجامعه

اذا ما تخالف ..

فهـد ببرود : لا ماعندي مانع ..

سارا ووجنتينها مورده : امممم لاتنسى تمسح فمك قبل لاتطلع ..

وطلعت بسرعه بدون ماتنتظر جوابه وسمعت ضحكته الجذابه لما قفلت الباب وراها

ابتسمت بخجل ومشت بسرعه متجهه للدرج ورقت لجناحهم ...

فتحت الباب بسرعه وبعدها قفلته وهي تستند عليه فكرت بذهول كيف

انو فهـد يقدر يعيشها اكثر من شعور بنفس الوقت ..

يوصلها لقمة الغضب والكره وبنفس اللحظه يحرك فيها اعذب المشاعر والاحاسيس

تنهدت بصوت عالي وبعدها اتجهت لجوالها عشان تحاكي نانه سعاد وتطلب

منها تستعد عشان تجي تسكن معها ...



_____________________


في وقت ثاني من اليوم

في بيت ندى


ناظرت ندى ساعتها وكانت تشير لـ 8 مساء تأففت بملل وناظرت

حولها بضيق كانت جالسه بصالون فلتهم لحالها تنتظر مشاري ولا ابوها

يرجعون عشان تلقى احد تحكي معه ...

فكرت تدق على حلا وتراجعت لما تذكرت انو ماصار لها فتره طويله من تزوجت

ويمكن تكون مشغوله ...

مدت يدها تعبث بعقد اللؤلؤ الطويل اللي لابسته على بلوزتها الشيفون المشمشيه

بقصة صدر نازله تضيق حول الصدر وتكون مزمومه من الوسط وتتصل فيها

اكمام واسعه توصل لمنتصف الزند .. وتتسع البلوزه بنفس الشكل من تحت

الصدر لمنتصف الفخذ وكانت لابسه معها بنطلون جينز سكني بلون فاتح ..

سمعت صوت الباب وهو ينفتح ويدخل منه مشاري اخوها ناظرته وهي تبتسم

بادلها مشاري الابتسامه وتوجه لصوفا اللي كانت جالسه عليها وجلس قريب منها

مشاري بنبره حنونه : كيفها احلى ندو ..!؟

ندى : ههههه بعيونك بس خيو العزيز ...

مشاري وهو يبتسم لها : وانا صادق مااظن فيه ندى احلى من ندى اللي قبالي ..

ومد يده يخربط شعرها اللي كانت رافعته بشكل مهمل وتاركه خصل منه

متناثره حول وجهها ...

ابتسمت له ندى بنعومه ..

سألها مشاري بنبره جديه : كيفك مع بدر !؟

ارتبكت ندى من سؤاله بس حاولت انها ماتبين ارتباكها ..

ردت وهي تبعد نظرها عنه : كويسه ..

رجع مشاري يسألها : ندى انتي مقتنعه بزواجك من بدر !؟

ندى وهي تلف جسمها عشان تواجهه وتثني سيقانها على الصوفا ..

ابتسمت وهي ترد في محاوله منها انها تقنعه بجاوبها : ايوه مقتنعه ..

مشاري وهو يناظرها بشك قالها بنبره حنونه : ندى اذا ماكنتي مقتنعه تأكدي

اني بوقف معك حتى لو كان بدر خويي ومكانته كبيره عندي انتي اختي

الوحيده وتهمني راحتك وسعادتك ..

ندى والدموع تلمع بعيونها ردت عليه بمحبه : الله يخليك لي .. صدقني مرتاحه

لاتشغل بالك ...

مدت يدها تمسح عيونها وتحاول تغير الموضوع ..

ندى بلطف : مشاري

مشاري : هلا

ندى بتردد : امممم انت منت متضايق عشان حلا ماوافقت عليك !

مشاري بعد مااخذ نفس عميق رد عليها بهدوء : اول ماقلتي لي ردها ماانكر

اني تضايقت ...

صعب على اي شخص انه ينرفض .. بس بعدها اقتنعت انو مافيه نصيب ..

وقلت الله يوفقها ..

مدت ندى يدها وشدت على يد مشاري وهي تبتسم له بمحبه ..

ندى بحنان : ويوفقك يارب بالي تستاهل طيبة قلبك اللي عمري ماشفت مثلها ..

مشاري : ههههه عشانك اختي تقولين كذا ..

ندى : اسأل اللي تبي وبيقولك نفس الحكي ..

مشاري : الا ماقلتي لي ليه جالسه هنا لحالك ..!

ندى : طفشت من الجلسه بغرفتي ومالي خلق اشوف الـ tv وقلت انزل تحت

انتظرك انت ولابابا عشان اجلس معكم ..

مشاري : خلاص دامك طفشانه انا عازمك على العشا في اي مطعم تختارينه ..

ندى وهي مبسوطه : وااااو من زمان ماطلعت معك دوم مشغول ...

مشاري وهو يبتسم : خلاص تجهزي ربع ساعه ونطلع ..

ندى : اوك ..

ورقت لغرفتها بسرعه عشان تاخذ عبايتها ...

بعد ربع ساعه كانت مع مشاري بسيارته الـ escalade cadillac

ندى وهي تناظر الطريق انتبهت انو مشاري متوجه للراشد مول

ندى : مشاري ليه رايحين لراشد ..!

مشاري ابتسم : حاب اخذ لي بدل على ذوقك ..

بعد مادخلوا ندى ومشاري من البوابه ( 8 ) توجهوا لرباعيات اختارت ندى لمشاري

كذا بدله على ذوقها ...

بعد فتره كانت ندى واقفه تناظر بالتيشرتات بعد ماتركها مشاري عشان يقيس البدل

اللي اختارتهم .. سمعت صوت مألوف يناديها التفتت لقت بدر قبالها ..

بدر : هلا ندى ..

ندى باارتباك : اهلين بدر ..

بدر : كيفك !

ندى : كويسه وانت كيفك ..

بدر وهو مبتسم : تمام

ندى : امممم انا جايه مع مشاري هو راح للفتنج روم ..

بدر : ايوه شفته وقالي انه جاي معك ..

وكمل بجرائه : ماراح تختارين لي على ذوقك مثله ولا بس مشاري ..

ابتسمت ندى وهي منحرجه وردت عليه بـ ارتباك : امممم لاعادي اذا تحب اختار لك .

بدر بـ ابتسامه واسعه : اكيد احب ..

بنفس اللحظه اللي كانت فيها ندى تحكي مع بدر وتبتسم له بخجل كان طلال داخل

المحل يناظر حوله ببرود لين وصلت نظراته لمكان ندى وشافها مع بدر ...

ناظر فيهم بتمعن واعصابه تشتد وهو يلاحظ الشخص اللي تحكي معه ندى

واللي كان متأكد انو ماهوب مشاري اخوها اللي شافه من قبل وهو جاي ياخذها

في مره من المرات اللي كانت فيها زايره حلا اخته ...

احتدت نظراته وهو يلاحظ كيف يناظر فيها وهي تختار بين مجموعه من

التيشرتات حاول يسيطر على اعصابه قد مايقدر عشان مايسوي فضيحه

ويتضارب معه قدام الكل ...

اول مره بحياته يختبر شعور الغيره لقى نفسه مو بس غيران الا بيجن من الغيره

ومستعد يرتكب جريمه من دون حتى مايهتم انه بمكان عام وهو الي دوم يحتقر

الاشخاص اللي يثيرون المشاكل في الاماكن العامه ويتصرفون

بهمجيه بدون مايسيطرون على اعصابهم وانفعالتهم ...

بعد مرور لحظات حسها طلال كأنها دهر شاف الشخص يبعد عن ندى وبعدها

بدقايق يطلع من المحل وهو شايل معه كيس ..

رجع يناظر في ندى اللي اتجهت للطرف الثاني من المحل وتبعها بسرعه ..

ندى اللي كانت تناظر في الملابس وهي تفكر كيف الصدفه جمعتها مع بدر وهي

من فتره متجاهله اتصالاته وتتعذر دايما بالدراسه ..

حست فجأه بيد تقبض على يدها بقوه التفتت وهي تتوقع انه بدر رجع من جديد

ومستغربه جرائته المفاجأه ..

واصطدمت نظراتها بعيون طلال اللي تلمع بقسوه تبين غضبه الشديد ...

ندى بذهول : طـــلال

طلال بحده : من هو اللي كان معك !

ندى وهي مرتبكه : مشاري اخوي انا جايه معه ...

طلال بغضب مكتوم : ندى من اللي كنتي معه مشاري اخوك ماكان معك ...

ندى وهي للحين مرتبكه من ظهوره المفاجأ ومااستوعبت انه يقصد بدر

قالت بصوت مرتجف : طلال انا مدري عن مين تحكي ... مشاري اخوي في

الفيتينج روم والحين راح يجي يدور علي ماابيه يشوفني معك ...

ناظر فيها طلال بحده وبعدها سحبها معه وطلع من البوابه القريبه منهم وندى

للحين مصدومه من تصرافته وماهيب فاهمه ليه هو معصب كذا ...

ندى بخوف : طلال وين ماخذني اتركني ..

طلال بحده : ندى اسكتي ..

مشت معه لين وقف ودخل محل بعيد عن اللي طلعوا منه بمسافه وكان المحل اللي

دخلوه فاضي سحبها وراه لطرف الثاني من المحل ودفعها قدامه بحيث انو اللي يدخل

مايشوفها لانه واقف قبالها ومغطيها بطوله الفارع ...

طلال بنفس النبره الحاده : ندى من اللي كنتي تحكين معه ؟

ندى بعصبيه : طلال عجزت افهم من تقصد قلت لك مشاري اخوي ..

طلال وهو يحاول يظبط اعصابه : ندى لاتختبرين صبري من اللي كان معك

من شوي ؟؟

ندى وهي تو تستوعب انه يقصد بدر ..

ردت عليه بقوه : مالك دخل ..

وحاولت تمر من جمبه عشان تطلع الا انه مسك ذراعها بقوه ورجعها قباله

طلال بحده : ندى انا سألتك سؤال وانتظر جوابك ..

ندى : وانا قلت لك جوابي ..

طلال : اها يعني ماراح تقولين لي من هو ..

ندى بثقه : ايوه

طلال وهو يمد يده ليدها مره ثانيه وكان على وشك يسحبها لما سألته وهي

تحاول تشد يدها من يده ..

ندى بخوف : وين بتاخذني ؟؟

طلال ببرود : ابد بسلم على مشاري اخوك وبالمره اخليه يشوفك معي ويدك

بيدي ونشوف وش راح يكون تعليقه ..

ندى بقهر : ماتقدر ..

طلال ببرود اكبر : جربيني ..

ندى : اترك يدي ..

طلال : مو قبل ماتقولين لي من اللي كان معك !

ندى بقلة حيله : بدر

طلال وهو يرفع حاجبه : من هو بدر !!

ندى بــ ارتباك : خطيبي ..

طلال وهو يشد على يدها بقوه : انتي جايه معه !!

ندى وهي تتألم من شده على يدها : لالالا هوجاي بالصدفه وشاف مشاري اخوي

في المحل وعرف اني معه وجا يسلم علي ...

طلال وهو للحين شاد على يدها : وليه كنتي تبتسمين له !!

ندى : طلال اتركني صاحب المحل يناظر فينا ...

طلال بحده اكبر : مايهمني .. ندى ان شفتك مره ثانيه معه بقتله تفهمين

ماقدرت ندى ترد لانو صاحب المحل قاطعهم ..

صاحب المحل : لو سمحت استاز ..

طلال بقسوه : خير

صاحب المحل : ازا بتريد اترك الانسه ائبل مااتصل بالهيئه ..

طلال وهو يرفع حاجبه بثقه : انا واقف احكي مع زوجتي مااظن ان الهيئه تخالف

هذا الشي ..

صاحب المحل ويلتفت لندى ويسألها : انسه الاستاز جوزك !!

ندى وهي خايفه يتصل بالهيئه اذا انكرت لقت نفسها تجاوبه بسرعه

: ايوه زوجي ..

صاحب المحل وهو منحرج : اسف على الازعاج

طلال ببرود : حصل خير

ورجع يناظر ندى وهو يقولها : قلبي خلينا نطلع من هنا ..

ندى اللي زادت نبضات قلبها لما نادها طلال قلبي ماقدرت تترك يده قدام

صاحب المحل اللي يناظرهم بـ استغراب واضطرت تطلع معه بهدوء وهي ماسكه يده

واول ماطلعوا من المحل حاولت تشد يدها مره ثانيه بس طلال ماتركها ..

لين صاروا قريبين من رباعيات ترك يدها بعد ماقالها بنبره قويه

: ماراح ننتهي هنا ياندى ..

ولف وراح من نفس الطريق اللي رجعوا منه ندى وقفت تناظر فيه لحظات وبعدها

لفت للجهه الثانيه راجعه لمشاري اخوها وهي تتسأل عن اللي قصده طلال

بجملته الاخيره ..

دخلت للمحل وهي للحين سارحه بـ افكارها لين سمعت صوت اخوها مشاري

وهي يحاكيها ..

مشاري : ندى وينك تعبت وانا ادق عليك وانتي ماتردين وين كنتي !!

ندى بـ ارتباك : سوري رحت اشوف المحلات الثانيه لما شفتك تأخرت وجوالي كان

سايلنت وماانتبهت انك دقيت ..

مشاري : اها طيب تبين شي ولا نطلع للمطعم ..

ندى اللي تحس انو ماعاد لها خلق تروح المطعم لكنها جبرت نفسها عشان

خاطر مشاري ردت : لا ماابي شي نروح المطعم ..

ركبت السياره مع مشاري وصوت طلال لما نادها قلبي للحين تحسه

يرن بـ اذنها ...

__________________