كاتب الموضوع :
ضجة الصمت
المنتدى :
القصص المكتمله من وحي قلم الاعضاء
الفصل السادس والعشرين
في باحة الفندق الأمامية الواسعة ،،
انحنت عشان تشيل شنطتها ، لكن يده تمتد بسرعة وتسبقها وتشيلها ،، تقدمها بالمشي إلى الليموزين اللي وقفت تنتظرهم عشان تنقلهم للمطار ..
في الطريق وبعد دقاائق من ركوبهم ..
التفت وهو يقول : في أماكن كثير فاتتك هنا ..بسما أمدانا هالمرة ..
كانت سرحانة تتأمل الشوارع المزدحمة .. التفتت بصمت عليه ..ومن دااخلها تمنت بالفعل لو طولوا شوي .. هالهدوء والراحة الساائدة بينهم تحسها مرتبطة بتواجدهم هنا .. ماتدري إذا راح يستمر الوضع بينهم على ما هو عليه إذا رجعوا أو لا .. تتمنى .. لكن .. ما تدري ليه مازالت حااسة بالقلق !؟
كمّل وهو يشوف شرودها : ان شاء الله نجي مرة ثانية .. بالمستقبل ..
سكت شوي وهو يشوفها تلتفت عليه ..
أضاف بتردد : ولاّ ..؟
همست : إن شاء الله ..
حست وكأنه يسألها بعبارة صريحة ..
"راح يكون فيه مستقبل لنا .. صح ؟!"
وياليتها تدري .......
.
.
.
.
.
.
.
.
أخذ رقم عمه أبو خالد .. وزوج خالته منها .. شاف إنه من واجبه يحاول يقدم له أي نوع من المساعدة دام رااح يتوااجد قريب منه .. يعزم عليه يجلس في بيته أو حتى يدله على أفضل الفنادق .. أي مسااعدة .. المهم إنه يحس نحوهم بامتنان عميق من يوم ما وقفوا بجنب ديما وقت ما كان في قمة الحيرة والحاجة لهم ..
ومع هذا فهذي خالته اللي ما قدم لها شي بحيااته بالمرة ... لبعدها عنهم ... فرصة مناسبة لرد الجميل ..
رفع جواله بتصميم واتصل على عمّه .. أبو خالد ..
.
.
.
.
.
.
.
.
.
.
.
.
واقف عند باب العيادة ياخذ نفس من بعد ركضه السريع قبل ثانيتين .. سحب نفس عمييق ودخل ..
ألقى التحية على الدكتور الستيني الجاالس ورا مكتبه الكبير ، ولف الغرفة بنظرة شاملة.. فيها مجموعة من الأسرة المحاطة بالستاائر اللي تحافظ على خصوصية المرضى ..
إحساس قاله إن سلمى ورى واحد منهم ..
التفت على الطبيب وهو يسأله بلهجة سريعة : اتصلت بي قبل دقيقة ..أين هي الآنسة سلمى ..؟
وقبل ما ينطق الدكتور بأي حرف .. انفتحت الستارة الأقرب لنواف بحركة سريعة مفاجئة ، لدرجة إنه تراجع لورا خطوات قبل ما يستوعب المخلوقة اللي قدامه ..
اقتربت منه بهلع وهي تقول بانجليزية متقنة : ماذا حدث لوليــد ؟!!!!
للتو مو فاهم .. الحين هذي هي نفسها سلمى .. قريبة وليد ..؟!!.. شلوووون ؟؟ وشكلها ............!!
عادت سؤالها بخوف وهي تقترب أكثر : أنتَ نواف ؟؟ أين وليــد ؟!!
بلع ريقه وهو يقول بالعربي : وليـ ــد .. وليد بخير !
اقتربت اكثر وصار ما يفصلها عنه الا خطوتين .. قالت بلهجة غير منتظمة : وإذا هو بخير .. ليش جيت بداله .. وليش قلت انه مسوي حاادث ؟!!
نواف تراجع لورا اكثر والتفت على الطبيب اللي يناظرهم بترقب وقال : عذراً .. سنذهب الآن .. شكراً لك ..
ورجع يلتفت على سلمى : من فضلك تعالي معي ..
ومشى بسرعة بدون ما يفسح لها مجال للرد .. طلع من العيادة بخطوات سريعة مندفعة ..
رفعت حواجبها بدهشة وهي تحاول تجاري خطواته ونادته أكثر من مرة : .. وين وليد ؟؟ وين بتروح .. بتاخذني له ؟؟؟؟ نوااااااف ... ؟؟ وقف شوي ..!!!! تعبت وأنا أركض ورااك ..!!
وقف واشاح بوجهه للجهة الثانية عشان ما يناظرها: بوصلك لبيتك وأروح أشوف وليد بالمستشفى..
شحب وجهها وهي تكرر : المستشفى ؟!!!
قال وهو يرفع جوال وليد ويمده لها : هذا جواله خليه معك ..
والتفت يكمل مشي .. ركضت وراه ولفت وهي توقف قدامه وتقاابله ..
قالت بهلع : الله يخلييك قولي وش فيه ؟انته ما تعرف انا وليد شو بالنسبة لي .. اذا صار له شي انا بموووت !!
نواف بصدمة وهو يتراجع شوي عشان ما يصطدم فيها : ما صار له شي كايد .. اصابة بسيطة بس ان شاء الله هو بخير ..
تنهد وهو يشوفها تناظره بشك .. واتصل على ماجد بحركة سريعة عشان يتطمن منه على وضع وليد ويطمن هالطفلة المرعوبة عليه ..
زفر وهو يسمع الرنين على الطرف الثاني بدون ما يلقى رد .. والتفت على سلمى وتفاجأ بانها تناظر بالارض قاعدة تنتظره وهي تحرك يدها بتوتر .. غصبن عنه .. غصبن عنه تأمل بشكلها .. وخاطب نفسه بحنق ..هذي ويييين وليد عنها ؟؟ وشلون يخليها تلبس اللي هي لابسته ..؟! كاشفة شعرها .. تنورة قصيرة ..!! بلوزة أقصــر ...!!!
ومو بس شكلها ... حتى كلاامها .. ولاا الأجانب أهل البلد .. لو ما يعرف اسمها ويعرف انها قريبة وليد .. كان ما شك بأنها أجنبية ... ماتعرف تقول كلمتين عربي مثل الناس .. أما بالإنجليزي ..فتنطق كل حرف بطلااقة ..
انتبه على صوت ماجد على الطرف الثاني : نعم .. الوو ؟؟
نواف : أهلاً ماجد .......... طيب و كيفه وليد الحين ..؟
رفعت سلمى راسها بترقب ..
نواف : آهااا .. الحمد لله .. ومتى بيطلع ؟
شافت نواف يبتسم براحة وابتسمت شبه ابتساامة..
نواف : آهاا أنا نص ساعة أو ساعة بالكثير وأجيكم .. انت بأي مستشفى ؟؟ ... خلاص ان شاء الله .. مع السلامة ..
ما أمداه يحط الجوال بجيبه إلا وسلمى ناطة قدام وجهه :وش قالك ..وش فيه وليد ؟؟
قال : رضوض بسيطة في ذراعه وكسر في رجله راح يجبسونه له .. ويطلعونه..
كشرت بوجهها وهي تفكر بكآآبة : ليه كل هذا ...؟؟وش ذا الحادثة وكييف صارت له ؟؟
التفت بضيق وهو يقول :والحين اسمحي لي بوصلك للبيت وبروح أشوفه ..!!
سلمى باعتراض : أنا مستحييل أروح البيت الحين .. إما توديني لعنده أو أنا بروح لحالي ... لازم أتطمن عليه بنفسي ..
نواف وهو يتقدمها ويمشي : أنا بوديك .. وليد ائتمني عليك وما يصير أخليك لحالك .. وأنا أصلاً رايح له عشان أتطمن عليه أنا بعد ..!
ابتسمت براحة وهي تمشي وراه وتتأمل في طوله ومشيته السريعة وخطواته المتباعدة ..
.
.
.
.
.
.
.
.
.
.
.
في جناح فندقي واسع .. اقتربت من أبوها اللي جلس على الكنبة ، الريموت بيده والتلفزيون مفتوح عالاخبار .. والجوال عند اذنه..
كانت سامعته من دقيقة وهو يتكلم .. وتحاول تسمع أي كلمة منه تأكد لها إن المتصل هو نفسه عاايض .. لكن ما غير سامعته وهو يرفض ويشكر أي مبادرة من الطرف الثاني ..
سكر أبوها بعد عبارات طويلة من الشكر والامتنان .. والتفت عليها وهو يشوفها شاردة وتفكر ..
قال : هذا ولد خالتك متصل .. أمك علمتهم إنا وصلنا ..
خلود بإحبااط : لااااه .. شفت يبااا .. فاتني أفااجأ ديماا ..لو انك خليتني اكلمها !!
أبوها بضحكة : مافي فايدة .. الله العالم متى بتخلين عنك حركاات البزارين ذي .. ما صار شي ... كلميها .. كلميها .. ولا توجعين راسي كل شوي ..
خلود وهي تجلس على الكنب المقابل : الحين بكلمها ..طيب وعايض وش كان يبي منك ؟
أبوخالد : مصر إلا نجلس ببيته ..
خلود بدهشة : وشلون وحنا معك وهو بيكون موجود فيه ؟؟
أبو خالد : يبي يطلع منه ويتركه لنا ..
خلود : لااا شدعوة .. ليه كل هذا ..
ابو خالد بابتسامة : والله انه رجال اصيل وراعي شهامة ، بس قلت له انا وصلنا وحجزنا بالفندق خلاص ..
خلود وهي تشوف ساعتها : أهاااا ..زين الحمد لله .. بعدين بيتهم عرفناه وحفظنااه .. هنا الفندق حلو وتغيير جو ..
ابوخالد يهز راسه بتعجب من هالتفكير ..
قامت خلود وهي تمسك جوالها : أنا بروح اكلم ديما يبا ..
.
.
.
.
.
.
.
.
.
.
.
.
.
.
.
خيالات كثيرة مرت عليها في نومتها ،، لأوجه طاال ابتعادها عنها .. أمها .. أبوها .. صديقاات قديمات .. وحتى معلمات .. حست وكأنه شي يسحبها تدريجيا من اعماااق هالحلم الغرييب .. فتحت عينها بثقل .. والصوت بدأ يدخل بوضوح لمسامعها : ديمـــا .. ديمـــا ..
اعتدلت ببطىء وهي تقول بصوت هادي : نعــم ؟؟
فركت عينها وهي تستوعب وين هي .. وتذكرت رحلتهم الطويلة بدءاً من مطار القاهرة وصولاً إلى أرض المملكة ثم النوم اللي غلبها في السيارة اللي كان فياض موقفها من قبل سفرهم في مواقف المطار ..
مسح على راسه بتعب وهو يناظرها وهي تفرك عيونها الناايمة ونقابها طاايح جنبها وتجاوبه بصوت رايح من النوم وشكلها بالكااد مستوعبة هي وين ..
كان موقف السيارة قدام البيت ومن غير ما يتحرك من مكانه أو ينزل .. ينتظرها تقوم ..
مد يده للحزام الملفوف عليها وفكـّه.. ومع تكة الحزام وهو ينفك انتفضت وهي تعتدل بسرعة ..
قال بضحكة : وش فيك ..؟
قالت وهي تناظر قدامها وتشوف البيت : احم .. احنا وصلنا ؟؟
قال : من ربع ساعة ..
سكتت بحرج وكملت رفعت الحزام .. وسحبت شنطتها ونقابها اللي طاحوا بالارض ..
لبست نقابها بسرعة ونزلت تلحق فياض اللي سبقها ونزل عشان يطلع الشنط من ورا ..
أول ما دخلوا للبيت تفاجأ فياض بصوت جااي من الصالة .. استغرب لأنه من امس ويكلم ناايف وتليفونه يعطي خارج الخدمة ..
التفت على ديما وهو يقول لها : اسبقيني انتي.. انا شوي وأجيب الشنط وأجي ..
تراجعت ولفت تصعد الدرج .. والتفت هو على الصالة وهو ينادي نايف بصوت مرتفع ..
سكتت الأصواات .. وتقدم هو أكثر .. ودخل ..
.
.
صدمــــــــــة ...!!
هتف بكل ما للمفاجأة من معنى : سالـــــــــم !!!
.
.
.
.
.
واقف يناظر أخوه بذهول .. كم سنة مرت .. ست سنوات ...؟؟ ايه ستة ..!! من غير زيادة أو نقصان ... ما يدري وشو بالظبط اللي يحس فيه بهاللحظة .. ما تخيل أبداً يشوفه بهذي الطريقة المفاجئة .. بعد كل ذي السنوااات ...
كرر بذهوول وبابتسامة مضطربة : ســـالم ؟؟
اقترب سالم من مكاان وقوف فياض واحتضنه فجأة وهو يقول : ايه ساالم .. ما غيري... وش فيك مو مصدق ..؟؟.. كيفك فياض ؟؟والله اشتقت لك ... ولاخوانك ..
فياض تفاجأ من احتضان سالم له .. وشي بداخله اهتز بعنف .. اول مرة احد من اخوانه يحتضنه ..ويعبر عن اشتياقه له ..وهذا مو أي أحد .. سالم ..الغاااايب!!!
قال وهو يبعد عنه ويحاول يستوعب وجوده : انت وينك طول هالوقت ....؟؟ وليه ما بلغتنا برجوعك ..؟؟؟ وين كنت؟؟؟؟
سالم ساكت وهو يناظر ملامح اخوه بحنين ..
فياض التفت ورا سالم وهو يلمح وللمرة الأولى الموجودين بالمكان .. شاف وحدة شكلها بالثلاثينات .. جالسة تراقبهم بتمعن .. وعلى رجلها طفل صغير ما يتجاوز عمره السنتين ..
سالم مازال يراقب انفعالات فياض الواضحة وهو محتار من وين يبدأ يشرح له ..
فياض بحيرة : مين .. مين هذوول ؟؟
سالم بابتسامة مالها معنى : زوجتي وابني ....
فياض بصدمة : انته ... تزوجت ؟!!!!
سالم يلتفت على المرأة الجالسة ..
فياض بتساؤل : فرنسية ؟!!!!
سالم وهو يقترب منها ويشيل الطفل الصغير من يدينها ويرجع لمكان وقوف فياض : هذا سامي .. بس يجي ناايف واشرح لكم كل شي ...
مشى سالم متجه للصالة اللي بمدخل البيت .. مشى فياض وراه وهو مازال تحت تأثير الصدمة ..
سأله : متى جيت بالظبط ؟؟
سالم : وصلنا من أيام .. وجيت هنا من ساعات ولقيت البيت فاضي .. وين رحتوا كلكم ...!!
فياض : نايف من أمس وما يرد يمكن مسافر لبلد قريب لأنه دايما يسافر عشان شغله .. و..... نواف سافر ..
سالم بدهشة : سااافر ..شلون؟؟؟؟
فياض : سافر يدرس ببريطانيا من بعد ما خلص مدرسته ..
سالم وهو يرجع يتأمل البيت ويحرك سامي الصغير ببطىء على ذراعه : شكلي بنصدم بتغييرات كثيرة صارت وأنا مساافر ..
فياض : مب سنة ولا سنتين .. هذي ست سنين كاملة .. ماعرفنا لك فيها عنوان ..!!
سالم ناظر الفراغ بنظرات مريرة ما فهمها فياض .. ورجع يناظر فياض بتساؤل : وانت وين كنت طول الوقت برا البيت !؟
فياض وهو يتابع تحركات الصغير العفوية على يد سالم : كنت مسافر لمصر في اجازة مع .......!!
سكت وهو يناظر سالم بتركيز ..وابتسم ..
سالم بدهشة : وش فيكم كلكم عالسفـر ..
فياض : نسيت أقولك إني .. تزوجت !
سالم وهو يفتح عينه عالآخر : تزوجت !!
فياض وهو يهز راسه بتأكيد ..
سالم بعدم تصديق : ابدا .. أبداً ما توقعتك تتزوج..!!
فياض : وعلى فكرة ..أستخدمنا جنااحك اللي فوق ..
سالم وهو يقترب من فياض بتسااؤل : فياض انت من جدك تزوجت ؟؟
فياض بتأكيد : ايه منت مصدق !!
سالم يهز راسه بعجب ..
فياض يسأله : ووين جلستوا الايام اللي راحت ؟؟
سالم : أجرنا شقة هنا مؤقتاً إلين ما ..
وسكت ..
فياض حس بأن سالم فيه شي .. نظرته المريرة وتحوله الغريب هذا ورااه شي كبيير ..
سأله : الين ما ايش؟؟ لا يكون بترجع تسافر ؟
سالم بابتسامة : لا .. مارح أسافر .. يمكن استقر هنا .. وللأبد !!!
فياض التفت على الصغير اللي يجذب انتباهه كل شوي بحركااته .. ورفع جواله يرسل لناايف رسالة يمكن لا فتح االجوال توصله ويستعجل بالرجعة او بالاتصال عليه ..
.
.
.
.
.
.
.
.
دخلت للجناح وهي تشيل نقابها وطرحتها وعبايتها وتجمعهم وتحطهم على الكنب ..
يالله .. اسبوع وكأنه شهر ... طويييل حيييييل كااان ..
دخلت لغرفة النوم وهي تفتح الأضاءة وتسمي بالله ..
فتحت الدولاب واخذت بيجاما قطنية سادة لاول مرة تلبسها ...وراحت للحمام تتسبح من بعد يوووم طوييل مرهق ..
لما خرجت توقعت يكون فياض طلع وجاب الشنط .. بس خابت توقعاتها وما شافته .. التفتت للسرير بتعب .. وتوجهت له وهي تلقي بجسمها المرهق عليه .. تلحفت وهي تفكر بفياض المسكين اللي راح يرجع ينام عالارض من الليلة ...!!
.
.
.
.
.
.
.
.
تقلب ايمن باانزعاج في نومه وهو يسمع دق متواصل على الباب .. احتاج لدقائق حتى يستوعب ويقوم بسرعة ويفتح لنواف اللي واصل حده من الغضب اليوم..!
نواف : حرااام علييك!!!! ساااااعة وأنا واقف وأدقدق عالباب ... الجيران سمعوني وانت ما سمعت .. !!
ايمن وهو شكله معتفس من النوم : اسف .. اسف والله .. تعرف انته نومي ثقيل ما حسييت ........ لحظة تعااااااال ... وين مفتاحك .. ؟؟
نواف بحدة وهو يسكر الباب : شكلي ضيعته او نسيته .. ما ادري ..
ايمن : آآه وشلون وليد ؟ وش صار معك ..
نواف باختصار : بخير ..
ايمن باستفسار : وشلون يعني بخير ..؟ طلعتوه من المستشفى ؟؟
نواف : وصلناه انا وماجد للبيت ورجعت ..
ايمن باهتمام :اهااا .. اهم شي انه بخير ..طيب .. انا بقوم انام والله حدي تعباان ..
نواف بعصبية وهو يبدل ويلبس تيشيرت بني خفيف على البرمودا رياضي : انت متى ناوي تراعي دراستك وتذاكر بذمة .. طول الوقت ما بين النوم واللااااب والسهر عالتلفزيون .. اللي يشووفك ما يقول انك نااايم امس من الساعة 9 وشبعاان نوم ..
ايمن : وانت اللي يشوفك ما يقول ان صديقك طلع من المستشفى بالسلامة .. شوف كيف حالتك حالة..اشوي والدخان بيطلع من آذانك ..... اذا عالدراسة فخلي نصاايحك بعيد عني .. انا دراستي مراعيها وبزيادة .. ومرااعيك لانك الحين معصب وما تدري وين تحط حرتك فيه وقااعد تحطها فيني وانا مالي ذنب .. ياخي هدي شوي الدينا لسا بخيروخل مزاجيتك هذي شوووي .. يالله تصبح على خير بروح انااام ..
نواف وهو مركز انظاره على الغرفة اللي دخلها ايمن من ثانية ..
رجع ايمن يطلع من الغرفة وكأنه نسى شي ..
قال : ايه ولا تنسى تصحيني الفجر لاني مارح اقوم على صوت المنبه الوااطي ذا ..
ورجع يدخل مرة ثانية ..
نواف ناظر نفسه بالمراية وتساااائل.. وش فيني مو على بعضي ؟؟
راح للغرفة ودخل وهو يناظر ايمن اللي نام وتلحف بدون ما يبين منه شي ..
قال بقهر وبصوت عالي وكنه يكلم نفسه : صافحته .. صافحته بكل بساااطة !!!
ايمن قام جالس وهو يناظر نواف بدهشة : بسم الله الرحمن الرحيم .. من اللي صاافح من ؟؟
نواف يكمل : صافحت مااجد .. اخته .. طلعت اخته .. مدري وشلون تاركها كذا .. هذي يبي لها إعادة تأهيييل .. إعادة تربية !! ما ينفع كذاااا ..!!
ايمن وهو يسكر عين ويفتح عين : نواف .. وش تحس به ياخووي؟؟؟؟؟؟؟
نواف يكمل :مخي.. مخي مو قااادر يفكر بشي ثااني .. اااااه ياا مخي ..
ايمن يقوم ويقرب من نواف ويمد يده لجبيينه وهو يقول : فيك حرارة اشوووف ؟؟ يمكن لقط لك عدوى من المستشفى ولا شي ؟؟
نواف يناظر ايمن فجأة ويهز راسه وهو يقول : وش حرااارته انت الثاني ؟؟ ابعد عني .. اقولك صورتها لاصقة بمخي ..
ايمن : لاااا .. شكلك محموووم من جد .. اسوي لك كمادات .. ؟؟ شوف انا رأيي تروح تتوضا وتصلي لك ركعتين وتنام ..
وكمل بصوت عااااالي :وتخليييييينيييي أنااااااااااااام أنا بعد !!
نواف يضحك فجأة : غربل الله ابلييسك .. روح نااام وفكني ..
ايمن يرجع يتلحف بالسرير وهو يهمس بينه وبين نفسه : والله وشكلك طحت يا نوااف ومحد سمى عليك !! مين ذي بس اللي قالبة رااسك فوق تحت بهالشكل !؟
.
.
.
.
يتبع ..
|
01-06-09, 01:04 AM
جديد مواضيع قسم القصص المكتمله من وحي قلم الاعضاء
العرض العادي
