كاتب الموضوع :
ضجة الصمت
المنتدى :
القصص المكتمله من وحي قلم الاعضاء
الفصل الخامس عشــر
صارت الساعة 8 الصبح وفياض مارجع
ظنت انها راح تكون مرتاحة اكثر لعدم وجوده لكنها للاسف كانت محتاارة وقلقة من اختفاءه .. واحد يغيب طول الليل عن بيته ولحد ما اشرقت الشمس ما رجع وش معناها ؟؟
دقت على عايض بالاخير ...
في الجهة الثانية كان عايض بمكتبه وسمع جواله.. رد على ديما اللي كان نفسه يسأل عنها بس كان منتظر تمر فترة اطول على زواجها ..
: السلااام عليكم ..اهلييين بالغااالية والله
ديما : وعليكم السلام ورحمة الله
عايض باهتمام : كيفك ديما ؟؟
ديما : الحمد لله انا بخير .. انته كيفك ؟؟
عايضببطىء وهو يراقب مساعده اللي دخل الغرفة ويأشر له : الحمد لله... انا تمام ..
ديما : وكيف الشغل وياك ؟؟
عايض : هذااني بالدواام .. الحمد لله الشغل تمام ..
ديما حست عنده احد .. قالت: مشغوول ؟؟
عايض حس ةدها تقول شي : لا بس ..بعد شوي عندي اجتمااع .... في شي صاير ؟؟ كيفك وكيف فياض ؟؟
ديما : الحمد لله .. امم عايض ..
عايض قال بهمس وهو يأشر للرجال ينتظره : خمس دقايق وجايك ...
ورجع يكلم ديما : ايواا .. معاكِي
ديما : شكلك مشغول .. خلاص مو مشكلة اكلمك بعدين
عايض : طيب .. ايش كنتي بتقولين؟؟
ديما واقلعت عن فكرة اخباره : مو مشكلة بقولك بعدين لما تفضى..
عايض بنبرة منخفضة : اوكي ..معليش حبيبتي يبوني ضروري الحين.. اول ماخلص بكلمك ..
ديما : ان شاء الله .. مع السلامة ..
عايض : في امان الله ..
سكرت بإحباط وهي تلعب بجوالها بتوتر .. وين ممكن يكون رااح وتركها حتى بدون ما يقول او يوضح بكلمة .. جلست تحسب الساعات من اول ما خرج .. تقريبا اكثر من 10 ساعات مرت على خروجه..
زفرت .. ايش تبين منه ؟؟ شوي وتلقينه راجع ويجثم على انفااسك مرة ثاانية بكلامه وتحركاته .. بس ممكن يكون صار له شي جااايد .. وشلون تتأكد من العكس؟؟
راحت للغرفة وبدلت ملابس النوم بتي شيرت اسود بناتي طويل يشبه القميص الين ركبتها عليه ورود بيضاء .. ومن تحته بنطلون ابيض ضيق .. ملابس ساترة مريحة ..
و دخلت للمطبخ واخرجت اشياء من اللي شروها بالامس وسوت لها فطور او غدا ما تدري .. المهم انها ما اكلت أي شي من اللي سوته بالاخير..
.. مر الوقت وصارت الساعة 12 .. طلعت للصالة ..لبست جلال الصلاة والنقاب من فوقه وخرجت من الجناح ..
ماكانت فيه اي سيارات في الحوش ...يعني ما في مانع تتمشى شوي .. تتنفس وتشم هوا تحت بدال هالحبسة ..
نزلت للطابق الارضي وبدأت تستكشف المكان .. فيه غرف لاول مرة تشوفها وتدخلها .. حتى المطبخ اول مرة تشوفه .. بس غريبة الشغالة ما كان لها وجود ..!!
للحظة خاافت وهي تكتشف انها لحالها في هالبيت بكبره ..واللي كان في منطقة منعزلة شوي عن البيوت الثانية ..
دقائق و سمعت صوت سيارة تدخل الحوش وقدرت تلمح سوادها من شباك الصالة ، ركضت بسرعة للدرج ..
شكله رجع ، اللي استوعبته .. انه بخير وما فيه شي .. أجل وين كان كل هالوقت ؟؟
ما كانت تبيه يشوفها تحت ..و مالها نفس تواجهه او تحتك معه بأي كلام ..
تنهدت وهي تدخل الجناح بتوتر وتسكره مثل ما كان .. ومشت للغرفة وهي تتنفس بسرعة من الركض على الدرج .. وصعدت على السرير تبي تسوي نفسها نايمة ...هي اصلا من الفجر ما نامت .. لكن فجـــــــــأة .. حست بعموود من النار يخترق قدمها اليسرى .. وما حست بنفسها الا وهي تطلق صرخة قصيرة مدوية من الصدمة والألم .. !!!!!!!!!!!!!!
.
.
.
.
.
.
.
.
.
.
.
صعد الدرجات وهو تقريبا مو شايف قدامه .. تعبان وفيه نوم وارهااق سيطر على كل خلية في جسمه .. فتح الجناح ودخل ..وبتلقائية رمى شنطة المحمول على الكنب في الصالة ورمى بجسمه على الكنبة المجاورة .. غمض عيونه بارهاق ، والصداع المؤلم يرج رااسه رج.. فتح جيب الشنطة اللي بجنبه يدور حبوبه .. طلعها وقبل لا يخرج الحبة سمع صوت صرخة .. ايقظت كل خلاياه مرة وحدة ..
ركض للغرفة وهو ينادي بخوف : ايش صار ؟؟؟؟ ديماااا ؟؟
دخل وشافها جالسة على طرف السؤرير ومادة رجولها وهي ماسكة قدمها وهي تتلوى من الالم ، قرب ولمح نقاط من الدم متناثرة على السرير .. هااااله المنظر وركض بسرعة ناحيتها .. وشاف بوضوح.. قطعة زجاج بحجم الاصبع مغروسة في قدمها من اسفل وهي تحاول تشيلها باضطراب ..
امسك يدها بحزم وابعدها وهو يقول : اتركيها .. لا تحاولين تشدينها ..
نزلت يدها اللي ترتجف وطالعت فيه بعيون دامعة وكأنها تطلب منه يساعدها وتستنجد فيه .. قطب حواجبه وهو يفكر بحل سريع ومناسب .. وراح لدولابه ..فتحه و سحب شماغ من شماغاته البيضاء ...وبقوة قطعه وشقه لنصفين ..
راح لعند ديما اللي كانت ماسكة رجلها ومغمضة عيونها الدامعة بألم .. وامسك قدمها المصابة .. انتفضت وقدمها تصلبت من الخوف والالم ..
قال بجدية : اتركي لي رجلك .. وخلك مغمضة لا تطالعين فيها ..
غمضت عيونها اكثر وضمت يدينها مع بعض باستسلام ورجولها ماهي راضية تثبت من الالم .. ثبت فياض رجولها بيده ..ولف الشماغ من تحت رجلها وباطراف اصابعه التقط الزجاجة وسحبها وهو يراقب التواء ملامح ديما بوجع ..
قال : خلاص شوي وتطلع .. اصبري ..
تأوهت بالرغم من محاولاتها لكتم ألمها .. حست وهو يسحب الزجاجة كأنه يقطع رجلها تقطيع
.. فتحت عيونها بعد شوي لما حست بزوال الزجاجة ..
رفعها فياض قدامها وهو يقول بعجب: من وين جات هذي .. ما اكبرها ؟؟!!!
رماها في السلة بجنب السرير ..ولف الشماغ بقوة حوالين قدمها اللي بدا الدم ينزل منه اكثر ..
قال لها بتأكيد وهو يلفه بإحكام حول رجلها لفة ثانية : لا يخوفك منظر الدم .. ترا علامة زينة انك تشوفين الدم بعد خروج الزجاج .. هذا معناه مافي شي دخل جسمك ..
راقبت يده وهو يربط الشماغ ربطة اخيرة ..
قال وهو يناظرها بقلق : تبين نروح المستشفى ؟؟ مع انه خلاص العملية انتهت ..
هزت راسها بلا وقالت :لا .. مافي داعي ..
قال بشك: تعورك ؟؟
قالت بصوت خافت : اقل عن قبل..
قال بدهشة حقيقية : إلا .. وشلون انجرحتي ؟؟؟من وين جاتك هالزجاجة ؟؟
قالت بتوتر وهي تمسح عيونها : اه .. قبل .. قبل ايام طاح مني كاس وانكسر ..نظفته بس .. يمكن هذا باقي منه ..
قال : اهاا ..انتبهي و نادي الشغالة بعدين تعيد تنظيف الارضية .. يمكن باقي قطع صغيرة ما تبان ..
قالت : طيب ..
وناظرت السرير وقالت فجأة بقلق وهي تشوف الدم اللي ترك بقع على الملاءة الفخمة : السرير ...!!!
فياض بابتسامة : ما صار شي .. اهم شي سلامتك ..
سكتت وهي تناظر رجولها .. وقالت فجأة لما استوعبت انها ملفوفة بشماغه :و شمااغك ...؟؟
قال بسرعة : فدااك ..
ما تدري ليه حست بغصة فحلقها من كلمته .. وحاولت تنزل من السرير وتبتعد ..
قال باستنكار: كيف بتمشين على رجلك وهي كذا .. انتظري عالاقل لين يوقف الدم ..
قالت : ماصارت تألمني زي اول ..
قال : ارجعي ارتاحي وين رايحة ؟؟
ترددت وهي واقفة على بعد خطوتين منه .. فعلا ما تدري وين رايحة .. بس لانها عارفة انه راح يبدل الحين اكيد ! .. واكيد يبي الحمام ، فما تبي تجلس وهي عارفة انه راح يطوّل بالغرفة .. لكنها رجعت للسرير بتردد وهي تعرج بسبب الالم .. وجلست على طرفه وهي ترفع رجلها المصابة .. تجاهلت مراقبة فياض لها .. صارت مطمنة نسبيا من ناحيته من بعد اخر كلام له معها .. الشي اللي للحين محيرها وتتمنى يقول لها عنه .. وين كان طول الليل ؟؟ بالرغم من كل شي من حقها تعرف .. خصوصا ان كانت ناوية تستسلم لوضعها معه ..
لكن بالاخير ظلت ساكتة وما جاتها الجرأة تتكلم .. شافته يقوم من مكانه ويروح للحمام .. اعطت الغرفة ظهرها وجلست على السرير بالعكس تجنباً لشوفته .. وتذكرت الاكل اللي سوته .. اكيد ما رح يطلعون عشان رجلها .. !!
اول ما طلع وهو مبدل ملابسه .. التفتت عشان تقول له عن الاكل .. شافته يمسك راسه بألم وهو يتسند على الدولاب .. قطبت حواجبها باستغراب وقلق .. وبدأ الشك يدخل قلبها .. يمكن فيه شي ؟؟ عشان كذا من امس ما رجع ... ؟؟ شكله تعبان وكأنه بينهار بأي لحظة من التعب .. رجعت تدير ظهرها له لما التقت بنظراته ..
خرج من الغرفة وراح لحبوبه اللي تركها .. راح للمطبخ واخذها مع الموية ، والتفت على ريحة الاكل البسيطة اللي وصلته من الاوعية المتغطية .. رفع الغطا عنها وشاف الاكل اللي سوته ديما .. ابتسم وراح للغرفة .. كانت مسندة ظهرها على ظهر السرير ومادة رجلها قدامها .. اول ما شافته داخل ويبتسم اعتدلت بتوتر ..
قال باستفسار : انتي عاملة حسااابي بالاكل اللي بالمطبخ ؟؟
قالت بارتباك : ااااا .. ايه ..
قال بصدق : ما قصرتي .. مافيني حيل انزل بهالوقت ..
وراح لدولابه وهو يدور على شي معين .. بعد شوي تنهد براحة وهو يخرج مطهر كان يستخدمه قليل.. ورجع لديما ..
قال : وريني الجرح ...
رفعت قدمها باستسلام ..
فك الشماغ من عليها وقال : يمكن يألمك شوي .. بس لازم نطهر الجرح ..
صب عليه شوي من المطهر اللي احرقها .. عضت على شفاتها بألم .. ورجع ربط القماش عليه بقوة .. خلص وقام .. كلمة شكرا كانت بتطلع منها بس ما قدرت تطلعها ..
سألها قبل ما يطلع : اجيب لك تاكلين معي ؟
قالت بسرعة : لا ..
ناظرها بشك ..
قالت بتوضيح : مو جيعاانة ..
قال وهو يخرج : براحتك ..
خرج وراح يحط له من الاكل البسيط اللي سوته .. ولانه كان جيعان ما دقق بطعمه .. اسند رااسه على الكنب ومد رجوله عليه واغلق عينه .. واستسلم لنوم عمييق ..
.
.
.
.
.
.
دق على فياض اكثر من مرة .. لكنه مارد .. كالعادة اما يغلق جواله او ما يرد .. كان حاسس بقلق على ديما من اول ما سكر معها .. هي نادرا ما تفصح له بصراحة عن شي سواء كان مضايقها او مريحها ..عادتها ما تتكلم معه كثير .. واليوم بالذات حسها تبي تقول له شي .. ليته ما سكر معها .. !!
حاول يعيد الاتصال بفياض... يبي يروح لهم ويشوفها افضل .. بالتليفون كذا ما ينفع .. والمرة اللي فاتت ما طول الجلسة معهم عشان ما يثقل عليهم او يتسبب بأي حرج لهم ..
بالاخير يأس من فياض انه يرد عليه .. واتصل على ديما ..
ردت عليه بصوت مبحوح من النوم : اهلا عايض
قال : يا هلا والله .. يا اختي الحمد لله انك رديتي من اول مرة وريحتيني لا كان بتجيني عقدة .. اذاني زووجك من كثر ما اتصل عليه وما يرد !!!
قالت :هههههه .... ايش تبي منه ؟؟
قال : بسأله عنك ..كنت ناوي اجي اشوفك ..
قالت : انا بخير الحمد لله ..
قال : ايش كنتي بتقولين الصباح ؟؟
قالت : لا .. ماهو شي مهم ..
قال بشك : ديما كوني صريحة .. فيك شي ؟؟
قالت بتأكيد : لاء .. مافيني الا الخير
قال : اتمنى يكون كلامك صحيح .. وش فيه صوتك اجل ..
قالت : امم .. كنت نايمة!
قال بحرج : لا يكون اتصلت بوقت غير مناسب
قالت : لا لا .. شدعوة .. اتصل بأي وقت يريحك ..
قال : عاد مو تاخذين رااحتك وانتي تقولينها .. و وين فياض؟؟
قالت بارتباك: اه .. اظن انه ..نايم ..
قال : طيب لما يصحى قوليله عايض ريقه نشف وهو يتصل علييك .. خليه يتصل علي ..
قالت : ان شاء الله ..
قال : يللا نشوفك على خير ديووم ..
قالت : بإذن الله .. مع السلامة
.
.
.
فركت عيونها ولمت شعرها المبعثر على جنب ، وتحسست رجلها اللي مازالت ملفوفة .. قامت وراحت للصالة بخطوات بطيئة بسبب رجولها ..الساعة كانت 5 المساا .. وكانت ستااير الصالة المغلقة في هالوقت معطية الجو هدووء وعمق .. شافت فياض ممدد جسمه على الكنب ونايم بتعب ..
بالكنبة اللي جنبه كانت شنطته .. وتساائلت للمرة المئة عن سبب اختفااءه بالامس ..
راحت للمطبخ وشافت الاكل اللي مسويته تقريبا نصفه واكثر من نصفه مختفي .. ابتسمت .. ما تدري ليه ابتهجت .. يمكن لانه كان تعبان وتنااسب اللي سوته مع تعبه .. طلعت من المطبخ وجات بترجع للغرفة ، سمعت صوت من ورااها ،
لفت عليه وهو نايم بنفس وضعه .. حاولت تستوعب الصووت اللي يصدره .. وشكت في انها كلمااات .. جاها فضول تعرف وش قاعد يردد ... اقتربت شوي .. لكن ما سمعت شي .. ايش فيه ؟؟ حتى وهو ناايم غامض ومحيّر ؟؟
خافت تغامر و تقترب اكثر ... عشان ايش يعني ؟؟ من متى وهي تفكر فيه .. !!
لفت عشان ترجع.. بخطوات بطيئة ..و رغما عنها محبطة .. لكن سمعت اسمها فجأة او تهيأ لها .. ما تدري .. المهم انها لفت بسرعة وهي تدقق سمعها ..
" ديمااا .. ديمااا ..."
ليش يناديها ؟؟ اقتربت وهي مقطبة حواجبها بدهشة ... يمكن يحلم فيها .. او يمكن من تعبه يهذي .. ضاقت ملامحه بشكل واضح وبدأت تحس بحركته .. تراجعت شوي لورا وهي تراقب انفعالاته .. فتح عيونه ببطىء وهو يناظرها .. بعدم تركيز ..
قال : انتي ديماا ؟؟
تحمحمت بارتباك وهي مو عارفة كيف راح تبرر وقوفها هنا بهالشكل .. ما توقعت انه يصحى فجأة .. وخانتها شجاعتها وما لحقت تهرب ..
قالت : أيـ .. ـه ..
قال : كم الساعة ؟؟
قالت بعد ما طالعت ساعتها : خمس وربع ..
اعتدل وهو يفرك عيونه .. ورجع يطالع فيها ..
قالت بحرج : عايض ..يبيك تكلمه ..
قال باستفسار :ليه ؟؟ في شي ضروري ؟؟
قالت : لا ..
قال : كنتي بتصحيني ؟؟
قالت بتوتر : لاا ..
قال وهو يأشر على قدمها الملفوفة : وكيف رجولك ؟؟
قالت : طيبة .. ما تعورني ..
قال : اشوااا ..
وهز راسه وهو ياخذ جواله اللي على الطاولة ويفكه من الصامت .. شاف مكالمات كثيرة من عايض واصحاابه اللي كان معهم امس .. اتصل على عايض .. وديما كانت واقفة ما تدري ليه هي واقفة وماراحت للحين ..تراجعت اخيرا عشان تترك الصالة ، لكنه استوقفها
قال : تعالي اجلسي .. بشوف ايش يبي عايض ..
جلست بالكنبة البعيدة وهي تنشغل بقدمها .. فكت القماش من عليها ، وشفت اثار الدم فيه .. شافت اثر الجرح .. ما كان جرح عميق بس يمكن منظر الزجاجة هو اللي كان مكبر الموضوع .. شهقت شهقة بسيطة وهي تشوف يد فياض تمتد قريب منها ، شال الشماغ بعيد وهو يناظر الجرح ..
قال : لا تخافين جرح بسيط .. بس صعوبته في مكاانه .. بيصير صعب تمشين عليه ..
اومأت براسها ..
قال بتلقائية : اذكر مرة دخل مسمار طويل برجلي .. وما عرفنا نطلعه الا عند الطبيب ..
رفعت راسها تناظره .. وابتسم لها ..
قال : توني اذكر الحين وانا اشوف جرحك ..
مسح على الجرح بسرعة ..وارجع القمااش عليه ببطىء ..
قال : ما في داعي تربطينه بقوة .. بس انتبهي لا يتلوث ..
قالت : طيب ..
رجع يمسك الجوال وهو يقول : الحين اخوك اللي مايرد .. شكله ينتقم مني عشاان ما رديت عليه ..
ابتسمت لا شعوريا وهي تتخيل اخوها مستحيل يسوي كذا
فياض لمحها تبتسم واتسعت ابتسامته ..
لف عليها بحذر وهو يقول : ياليت تظلين كذا على طول ..
مافهمت مقصده وبان على وجهها الاستفسار ..
قال يوضح لها : قصدي ..هادية .. ومرتاحة .. و تبتسمين ..
نزلت راسها بحرج .. ليه بدت تحس بكلماته تدخل بسهولة .. وتنطلي عليهااا .. كان هذا اصعب شي عليها .. او يمكن اسوأ شي .. ظلت ساكتة وهي عارفة انها مستحيل تقدر تهرب الحين من قدامه بدون عذر .. وانتظرت بفارغ الصبر عاايض يرد عليه عشان تتخلص من مراقبته ..
فياض كان لاول مرة حاسس برااحة عظيمة تدخل صدره .. حس بديما بدت تتقبله .. بدأ يشوف جزء من طبيعتها ولو شيء يسييير و شحيييح جدا .. لكن في أمل .. وعرف اخيراً وشلون يتعامل معها .. اكتشف في الايام الماضية اثر اذيته لها من قبل .. وعظمها .. وكل اللي هي محتاجته يحسسها بالاماان من ناحيته.. ولدهشته،، كان مستعد يصبر عليها ويتسناها تتقبله .. دامها راح تبقى جنبه بهذي الطريقة.. بهدوء ورااحة .. بدون خوف .. بدون نفور ..بدون كره .. ،،، او ..عالاقل مو بنفس الدرجة الساابقة .. !!
.
.
.
.
.
.
.
.
.
وقفت بالغرفة تبي تختار ملاابس مبهجة ، بيروحون لبيتها الحين .. عايض اقترح الفكرة واعجبتها وفياض تقبلها .. هي كانت تبي تاخذ باقي اغراضها اللي تركتها لما جات هنا ..
شافت بنطلونها الابيض اللي جااته بقع دم من الجرح ..
اختارت تنورة جينز سماوية وعليها بلوزة بيضاء بأكمام طويلة .. تجهزت ولبست عبايتها وخرجت للصالة تنتظر فياض اللي نزل من الجناح يكلم اخوانه يجون معه ..
.
.
.
.
.
.
.
السلام عليكم ورحمة الله وبركاته
أحبائي .. اول شي كيفكم ؟؟ ايش اخباركم ؟؟ اشتقت لكم
مممم اسفة اني ماقرأت ولا تعليق من التعليقات السابقة ..
بس فعلا النت عندنا مخترب ويقولون لنا انه في مشاكل متقلبة بالنت في المنطقة الشرقية هاليومين .. الله يجزيها خير جارتي ..
المهم .. ان شاء الله كما وعدتكم .. يوم الجمعة طبعا هو موعد اساسي .. لكن مافي مانع تنزل الاجزاء قبله اذا كتبتها ..
بالنسبة للتعليقات اعذروني اني مارح ارد عليها الحين .. مع اني متلهفة اقرأها وارد عليها .. ان شاء الله اول ما يتصلح النت
اتمنى تكون اعجبتكم الاجزاء وانها كانت عند حسن ظنكم .. وانها ماشية بوتيرة منطقية غير متسرعة ..
اخيرا اشكركم من كل قلبي على المتابعة
اشوفكم على خير
في امان الله
.
.
.
طلب خاص من المشرفات ياليت تعدلون هذا الرد على نفس منوال الردود السابقة او عالاقل تكبير الخط .. ما تمدتني والله مع الاستعجال ..وجزاكم ربي خير
|
15-03-09, 12:39 PM
جديد مواضيع قسم القصص المكتمله من وحي قلم الاعضاء
العرض العادي
