كاتب الموضوع :
ضجة الصمت
المنتدى :
القصص المكتمله من وحي قلم الاعضاء
.
.
.
بعد سنة
.
.
.
ام سلمى اول ماعرفت إن نواف موجود في السعودية صممت توصل له ،،خصوصا بعد ما واحد من اقاربها اللي تعزهم اعترف لها إنه كان خاطره في بنتها ،، وحست بإنها مقهوورة من نوااف كثيير ومن تعلق سلمى فيه ..
وبالفعل وصلت لرقم تليفونه وطلبت منه يترك سلمى وأوهمته إن سلمى تغيرت وإنها قاعدة تفكر تتراجع وتفسخ الخطوبة ..
نواف كان مصدوم من كلام ام سلمى واستأذن وليد في إنه يتواصل مع سلمى .. واتفق على إنه بيزورهم وبيطلب يتكلم معها ..
وبالفعل زارها بدون موعد مسبق بعد ما تأكد إن أمها بعيد عنها ..
طبعا سلمى اول مادرت إن نواف ببيتهم كانت بتجن من الفرحة من إنها أخيراً بتشوفه بعد هالمدة الطويييلة ...
لكن ما أمدا فرحتها تكتمل لما قابلها ،، إلا وهومفاجئها بكلامه ،
أخبرها فوراً بإن لها كامل الحرية في إنها تختار اللي يريحها ...
لكنها عصبت لأقصى درجة لانها كانت تظن بنفس الوقت إنه هو اللي غير رأيه ويبي يتركها ..
قال كلامه ووقف بنيته يتركها ويمشي ، لكنها استوقفته بوقوفها المفاجىء ..
وصراخها عليه : أكرهـــك !!! بعد كل هالوقت اللي انتظرتك فيه تجي تقول هالكلمتين وتمشي ؟؟؟؟ عموماً أنا برتاح أكيد وأنا عارفة إنك كنت اول من غير رأيه .......... وإييييه .. لا تروح ... في غرض عندي لك .. لازم تسترجعه قبل ما تروح .. ومابيظل لك عندي شي ابددا ..ابدااا ... تفهم ؟؟؟
رفع حاجبه مستغرب من عصبيتها وصراخها و دموعها اللي نزلت وهي طالعة من المكان وحاولت تخبيها بحجابها ..
جلس على الكرسي وهو يفكر بموقفها الحين ،،، وبكلام امها .. معقولة تكون ضاحكة عليه ، وإن سلمى الحين صارت تظن إنه هو اللي أخلف وعده ؟؟
ومع فهمه لكل شيء ، وقف بسرعة وهو مصدووم .. وصار يتحرك في الغرفة بتوتر مو عارف إذا بتنزل مرة ثانية له او لا .. ضروري يفهمها كل شي ... !!
وجاته الفكرة .. وسحب على طول ورقة وقلم من المكتبة اللي كانت قدامه .. وبدأ يكتب لها رسالة يوضح لها كل شي فيها ..
دخلت فجأة عليه ورمت له علبة الطقم اللي اهداه لها ..
وكانت بتلف وتطلع لولا انه استوقفها : سلمى ..
ناظرت بالورقة اللي يكتب فيها ببرود ..
قال وهو يمد لها الورقة : انتي فهمتيني غلط .. اقري هذي وبتفهمين ..
اخذتها منه وطلعت ..
اما هو فطلع من البيت وهو يتصل على وليد ويشرح له اللي صار ..
وقال بعدها بجدية : وليد ...إن ربي أحيانا .. بالاجازة الجاية.. أبي أملك على سلمى !!
.
.
.
قرت الورقة ودمعت عينها وهي تضحك .. فرحانة لأنها فهمت غلط ،،
لكن لما تذكرت امها واللي سوته عبست ..
رجعت تقرا اخر سطر كاتبه وهي تبتسم ..
" وياويلك إن ماوافقتي تكون ملكتنا بالاجازة الجاية ...."
.
.
.
.
.
.
دخل للشقة وألقى السلام وهو يدورها بعينه .. واول ما سمعت صوته راحت له ..
تأملها وهي في فستانها البيتي الاخضر ..
وقرب وهو يقرصها مع انفها : موقلت لك اليوم البسي احمر ..
رفعت عينها بملل : يكفييي احمر .. حرام عليك كرهتني في هاللون ..!!
قال : انتي جبتيه لنفسك من اول مالبستيه هذاك اليوم ...
قالت وهي تزفر: لو كنت ادري ماكان فكرت البسه بحياتي أبد .....
التفت عليها وهو معصب : وش قلتي ؟؟
خوفته نظرتها و قالت بابتسامة مهدئة: مو قصدي ...
مسكها من كتوفها ومشاها قدامه للغرفة وهو يقول بعصبية مصطنعة: لو ماكان لبستيه بحياتك ابد .. ماكنا تزوجنا .. هذا قصدك ؟؟
هزت راسه بلا : انت عارف مو هذا قصدي ..
قال وهو يوقفها قدام الدولاب : ما اعرف شي ..
وفتحه وهو يطلع لها قميص على مزاجه .. ومده لها بدون ما يحكي..
اخذته منه وهي تبتسم بصبر: حاااضر .. حاااضر ..حاااضر ..
ماقدر يتصنع اكثر وابتسم .. واول ما رفعت عينها له كشر بسرعة ..
ضحكت عليه يعني إنها فاهمه لعبه عليها .. وابتعدت وبيدها الفستان ..
شدها يرجعها مكانها ودفها قدامه على الدولاب وهو يقول في اذنها: فديييت الضحكة أنا ..
.
.
.
.
.
حط راسه على المكتب قدامه وصدااع مزعج يتردد فيها ..
رن جواله ورد عليه بآلية : آلووو..
وصله صوت ديما : هلا حبيبي .. وينك تأخرت اليوم ؟؟
قال وهو يمسح على راسه : نامت ؟؟
ضحكت وهي تقول : إيه .. الأمن مستتب .. يالله تعال .. لا تقول توك بالشغل ؟؟
ابتسم وهو ينزل درجات السلم : أنا في الطريق ..
وصل للبيت اللي من بعد زواج نايف وانتقاله منه وهو فاضي عليهم ..
دخل وشاف ديما تمشي بعجل باتجاه إحدى الغرف اللي صدر منها صوت بكاااء الطفلة ..
تنهد وهو يكلم نفسه : بديينااا !!!!
دخل وراها وشافها وهي تحملها من السرير وتهزها شوي عشان تسكت ..
مد يده لديما عشان تعطيه اياها ..لكنها ناظرته بشك ومارضت ...
اخذها منها بصعوبة ووقفت وهي متكتفة تناظر وش بيسوي في البنت..
نزلها فياض عالسرير وبدأ يكلمها بصوت عالي : ترااك زودتيها ومصختيييها يابنت النااس.. لما اقول لك تستكتيين تسكتيين على طوول فاااهمة ؟؟ يكفيني امس مانمت بسبتك ،، ماااصااارت هذي!!!
دفته ديما بعيد عنها وهي تشوف البنت انفجرت من البكااا وكأنها فهمت إن أبوها قاعد يهزأها ..
قالت له وهي تاخذها بحضنها : حرااام عليك ياشريير .. شف كيف تأثرت ....؟؟
ظل ساكت شوي وماقدر بالاخير يستحمل صوت بكائها .. حن عليها وقام ياخذها من ديما ويحطها بحضنه ..
جلست ديما بجنبه عالكنب وهي تناظره وهو يحاول يراضيها ..
وابتسمت وهي تشوفها اخييييراً تسكت ..
التفت عليها بابتسامة : ما اصدق .. سكتت !!!
اسندت راسها على ذراعه وهي تقول : طالعة بكاااية ..
ناظرها بنص عيين : على ميين ما أدري !!
اعتدلت وهي تقول باستنكار : ياسلاام .. وش قصدك ؟؟
قال بثقة وهو يناظر بنته : عليك طبعاً ..
ابتسمت باستنكار وسكتت وهي تاخذها منه ..
قال وهو يطبع قبلة على خدها ويقوم : فكي هالتكشيرة .. اصلا ياريتها تطلع عليك ..
قالت وهي تتبعه : وين رايح ؟؟مابتتغدا ؟؟
قال وهو يفرد اذرعته بتعب : مو الحين ... بروح انام شوي فووق وفي الدور الثالث تحسباً لو بكت مرة ثانية ..
ضحكت وهي تتبعه بانظارها وهو يصعد لفوق ..
والتفتت على بنتها وهي تحضنها بحب ..
.
.
.
.
.
.
.
النهــــــــــــــايــة
.
.
.
مرحبااً جميعاااً
بصراحة كانت ببالي مخططات كثيرة للنهاية مثل إني أخصص إهداء لكل متابعة لكن والله إن ظروفي وضيق وقتي ما يسمحون أبد ..
ياليت تقدرون هالشي وتثقون إني جداً أعزكم كل وحدة فيكم لها في قلبي حيز ومكاانة .. وخصوصا المتابعات المتواصلات على الدوام معي ..
ما أبي أذكر أحد وأنسى أحد .. أبي من أعمااقي أشكركم جميعاً على الدعم المتواصل ..واللي فعلاً يمكن ما أستحقه مقابل تقصيري معكم وتواااضع القصة ..
لكنكم أهل ليلاس فعلاً أثبتوا إنكم أهل للعطاااء والثقة ..ومن كل النواحي ..بوركتم وربي يزيدكم من فضله ..
سامحوني إذا بيوم قصرت إو جرحت أحد منكم ..
طبعا غير التأخيرااااااات المتواصلة والانقطاعات اللي صارت ، هذي لحالها مالي وجه اطلبكم تسامحووني عليها ..
في ثلاثة أشياء أبي أقولكم إياها في هالمناسبة ..
أولها سبب كتابتي للقصة .. لاني قد وعدت بإني بقوله ..
كل الحكااية إن فكرة القصة استنبطتها من قصة واقعية ، لكني غيرت من قصتي في المنتصف تقريبا تجنباً للمآآسي .. وعموماً أنا لما بديت فيها كان الغرض فقط تقضية وقت في شيء أحبه وأستمتع فيه ، لكني بدأت أشعر بالتزامي نحوها لما تعمقت فيها .. لكن عموما أنا ما تعمدت أتكلف بالاسلوب ابد وكتبت بالظبط ماكان يخطر على بالي .. فلا تحسبون علي الاسلوب او اللهجة او اختيار الكلمات لاني ماتعنيت في هالامور ..
أما بالنسبة للشي الثاني .. وهو بالنسبة للشعر الحر في بداية القصة ، هي خربووشة كتبتها يوماً ، وتفاجأت لما اختي قالت لي انها تكلمت مع وحدة ناشرتها بالمنتديات باسمها ومدعية بإنها لها .. عموما أنا ماحب انقل شعر بدون اسم كاتبته .. فحبيت أنوه على هالامر عشان محد يفكر إني أنا اللي ناقلتها منها .. وهي الله يسامحها خليها تاخذها وتنبسط فيها لانها مارح تضرني بشي ..
اما اخر شي بقولكم عنه .. فبعطيكم اسم قصتي الجديدة ... مدري إذا انتو راح تكونون متحمسين تتابعونها أو لا .. بس أتمنى فعلاً إنها تكون بنفس قوة شيء من الاحزان وأكثر .. بكل الاحوال ماظن راح أطرحها قريب إلا لما تكتمل فكرتها ..
عنوانها ..." غداً تشرق الشمس..! "
أتمنى ألقاكم فيها على خير
.
.
.
لن أقول ودااعاً بل إلى اللقاء ...
إلى اللقاء أحبتي ..
.
.
أختكم المخلصة
ضجة الصمت ..
|
27-02-10, 03:41 AM
وننتظر جديدك .....شكرااااا
جديد مواضيع قسم القصص المكتمله من وحي قلم الاعضاء
العرض العادي
