احساسي يكفيني
تسلميين غلآآي على مرورك ،، أعتز بتواجدك صدقاً.. لاحرمتكِ

Jawhara
شككرا من الاعماااق على تفاعلك يا مبدعة ، ردودك وعباراتك مدهشة ، مبهجة !! .... لا حرمت منك غاليتي ،، ودي لكِ


نوف بنت نايف
فرحت والله بوجودك معنا من جديد وسأنتظر آرائك القيمة دوماً .. لا حرمت روعتكِ

زارا
الصراحة كل اللي بقوله لك غاليتي هالمرة .. إني أحيانا أكون متشوقة احط الجزء عشان أقرأ ردك.. شكري لك لا يعد .. لا حرمتكِ أبدا .....

عمر همس الدموع
متابعتي الغامضة والتي لا تفصح عن نفسها كثيرا .. إلا أنه يكفيني تواجدك عن أية كلمات..صدقاً ..شكرا لك

رومنسية زمانها
متابعتي الرائعة ، وقارئتي الحنونة .. لا يكفيك شكري .. أحببت وجودك ولا أتخيل متابعتي بدونه .. لا حرمت منك ..


وقار الصمت
تبهجني متابعتك غاليتي .. بس توقعاتك اجرامية ... !!
امتناني العميق لك على تواجدك ..



شبيهة القمر
قمر ليلاس .. مرحبااا بك ، لتواجدك سحر عجيب ، منعش .. لا اعرف له سراً .. شكري الخاالص لك عزيزتي .. لاحرمت منكِ ..

النصف الآخر
الله يسلمك يالغلا ، اشكرك على لطفك الدائم ... فرحتي أعظم برؤيتك من جديد ياغالية .. لاحرمت روعتك ..

ألما
انتي العسل والله .. تمريين دائما مثل النسمة ، خفيفة ولكن أثرها دائما رائع ..شكري لك

أم الجمايل
يا أهلا بك من جديد غاليتي .. سررت لابعد حد برؤيتك بعد الغيبة .. والله يبارك في عمرك اشكرك على تهنئتك اللطفيفة .. لا حرمت من تواجدك ..

عيوني تذبح
حيااك الرحمن وبيااك .. ان شاء الله ما اخليكم تنتظرون ابد دام في استطاعتي .. شكري لك يا غالية ..


ساعة بلا عقارب
اهلا بمن انارت متصفحي من جديد .. لا تتخيلين سعادتي عندما أرى ردك ..انت الاروع والله ... امتنااني العمييق لك غاليتي ..

.
.

يتبع

اسمحولي يا جماعة الخير .. رجعت اقرأ البارت في وضع معاينة المشاركة ولقيت فيه أخطاء ، برجع أصلحها الحين وبعدها أنزله ... ما بي أسهركم بس ،، ممكن تفتحون بكرة وبتلقونه ان شاء الله .. واللي بينتظر حياه الله .. المعذرة مجددا ...

الفصل الثالث والثلاثين
.
.
تحرك بأقصى سرعة عنده ، وصعد للشقة وهو يحس بقلق فظيع وخوف ما قد حس فيه من قبل .. خوف على سامي ،، وصية سالم له ..!!
دق باب المصعد بيده وهو يحس انه صاير أبطىء من الطبيعي ..! مو متخيل شلون كان بيخليه وهو وصية اخوه له .. يبعد بهالبساطة .. !!
زفر .. ! اهم شي الحين يكون بخير .. وبعدها بيشوف أي حل ولا إنه يبعد .. !!
كل هالخواطر مرت بذهنه بصورة سريعة ..
واول ما انفتح باب المصعد وصله صوت بكاء سامي ،وفي ثانية كان واصل للشقة وهو ينادي نايف بصوت مرتفع ..وقبل ما يدخل شاف نايف بوجهه وهو حامل بيده سامي اللي صوته تقطع من البكاء ..ناوله لفياض بربكة وجزع ..
فياض حمله وهو يضمه له ويحاول يهديه ..وسأله : ايش صاير ... ووين أمه ؟؟
نايف التفت لداخل الشقة وهو مو قادر يتكلم : ما ادري إن كانت حية أو ميتة !
فياض تقدم بخطوات مترددة ومشى وراه وحواجبه تنعقد من شوفة الدم اللي انتشرت بقعه على الارض .....
نايف دخل للغرفة وانحنى على جسدها الملقى بالارض يحاول يجس النبض من رقبتها لأن معصمها كان مدمي تماماً .. ويدها الثانية مازالت مرتخية قبضتها على سكين حااد ..
فياض تقدم خطوتين للداخل وتراجع بعدها وهو يقول بصدمة : يا ربيــه ........!!
ابتعد أكثر بسامي وهو يقول لنايف بعدم تصديق : الاسعاف ....اكيد على وصول .... ! وش مسوية بعمرها....... المجنونة ؟؟؟؟
نايف يتحرك معه للخارج وهو يقول بهلع : ما فيها نبض .. اخاف ماتت .. فياض وش هالمصايب اللي تنزل علينا وحدة ورا الثانية ..
سكت ..وكمل بعصبية : هالمسكين ولدها ما فكرت فيه ؟؟؟
فياض كان ملتزم الصمت وهو يحاول يستوعب الاحداث اللي يمرون فيها ..
وصلت الاسعاف بعد دقيقة وحملوها للمستشفى على وجه السرعة بعد ما فشلوا في اسعافها في الحال ..
نايف استعلم عن المكان اللي بينقلونها فيه .. ونزل مع فياض اللي نام سامي على كتفه بعد ما يأس من البكا وهدأ ، وركبوا السيارة ..
فياض كان ساكت طول الوقت ..
وما تكلم إلا بعد فترة : نايف روح للبيت اول .. بنزل سامي عند ديما وبعدين نروح للمستشفى ..لاننا يمكن نطول هناك ...
نايف غير وجهته وهو يقول بأسى: هالمجنونة ..!! شلون تقتل نفسها وتترك ولدها اللي المفروض تعيش عشانه .. لمين تاركته بالله؟؟
فياض بهدوء عشان ما يصحي سامي : الله ياخذها .. أحسن خلها تولي .. احنا أولى منها فيه .. أنا كنت حاس والله وما كنت متطمن لها .. !!
وكمل بعد لحظة :يعني يا نايف تخيل لو سواتها ذي كانت بفرنسا .. من وين كنا راح نعرف ..؟؟ ووش كان بيصير لسامي ؟؟ زين منها انها استعجلت وانهت الموضوع هنا ...........!!
نايف بلهجة قوية مريرة : اسمعني يا فياض .. هالولد ماله غيرنا .. من يوم ورايح نحطه بعيوننا ولا يبعد عنا أبد .. حتى لو قامت امه سليمة ماتاخذه ...!! عجثتي ..!!
فياض وهو يغمض عيونه براحة ...هذا اللي كان يبيه من البداية.. قال بهدوء : وهذا اللي بيصير يا نايف.. ان شاء الله !!

.
.
.
.
.

فتحت الباب مبتسمة .. واختفت ابتسامتها ليحــلّ محلها الدهشة من شوفتها لسامي النائم على كتف فياض اولاً ، ولرؤية ملامح فياض المتأزمة ثانياً ..
سكتت تنتظر منه توضيح ..ونظراتها المتسائلة تنطق بدلا عنها ..
قال وهو يتخطاها ويمشي لغرفة النوم : بنومه عالسرير .. انتبهي له عبال ما أرجع ..
كمل بهمس وهو يحطه عالسرير ويغطيه برفق : أمه تعبانة بالمستشفى .. حالتها صعبة ..
ووصل لعند باب الجناح .. والتفت عليها ..
كانت تهز راسها بالإيجاب مع كل كلمة ..
سألته لحظتها بقلق : وش فيها أمه ؟؟
قال وهو يمسح على شعرها بعجل و بابتسامة خفيفة : لا تشيلين هم .. خلي جوالك جنبك بكلمك عليه واعلمك باللي يصير ..
قالت وهي تودعه بابتسامة قلقة : طيب ..
واختفى من قدامها ..
سكرت الباب والتفتت متجهة للغرفة ..
يا ذالصغير ........اشتاااقت له كثيير ..!!!
دخلت على اطراف اصابعها .. واستلقت على السرير جنبه وهي تتأمل ملامحه البريئة باشفاق ..
بالأمس فقد أبوه وتيتم...
اليوم وش بيكون مصيره ؟!!
.
.
.
.
.
.

طلع لهم الدكتور ومعه ممرضتين من قسم الطوارىء اللي دخلوها فيه ..
تكلم الدكتور مع نايف وفياض وقال الهم انهم باليااالله لحقوا عليها لان نبضها كان مررة ضعيف ..
وانها مو بس حاولت تقطع عروقها ، طلعت ماخذة كمية كبيرة من الادوية المختلفة واللي سببت لها حالة مرضية حادة ..
سألهم عن علاقتهم فيها وإن كانت تمر بأية حالات نفسية أو ظروف مؤلمة وقالوا له عن حادث سالم ..
قال انهم لازم يسوون لها غسيل معدة وينظفون جسمها من المواد المركزة اللي دخلته ، وينقلون لها دم بدل اللي فقدته .. وبكذا راح تطول عندهم بالمستشفى ..
شكروه وطلعوا بعد ما انهو كل الترتيبات اللازمة لبقاءها بالمستشفى ولعلاجها فيها ..
الاثنين كانوا منقهرين منها عالآخير .. لكن بنفس الوقت حالتها كانت مثيرة للشفقة ..
مسكينة وحالها حال الانسان الكافر اللي لا يأس من دنيته ظن إن الراحة في الموت ..!
.
.
وقف نايف السيارة قدام البيت وظل بمكانه ما تحرك ..
فتح فياض الباب ورجع يلتفت على نايف الشارد ..
ناداه بهدوء : نايف ؟؟
نايف التفت عليه بسرحان : هلااا ؟؟ همممم ..
فياض يسأله : وش فيك ؟
نايف ينزل ويسكر بابه : ولا شي .. انا بطلع ارتاح .. وانته بعد ..ولا تنسى تطمني على سامي ..
فياض : تصبح على خير ..
.
.
.
.





دخل للجناح وهو يشوفه مظلم ما عدا من إضاءة الردهة الخفيفة .. تذكر انه ما اتصل على ديما مثل ما وعدها .. مشى بخفة وألقى نظرة على الصالة الفاضية ،، ومنها لغرفة النوم .. وبدون ما يفتح النور ،، لمح ديما وسامي اللي متوسطين السرير ..
ابتسم بارهاق والتفت على الدولاب ياخذ ملابسه وبدل ، ورجع يلتفت عليهم بتعب ..
فوت موعده اليوم بالمركز بسبب الأحداث الجنونية اللي ما كانت بالحسبان ..
لكن يتعوض إن شاء الله ... أهم شي ان اليوم انتهى بسلام إلى حد ما... إلى حد ما !!!
اقترب من السرير وهو يناظر بديما اللي نايمة على جنبها و كعادتها شعرها منثور وراها بأريحية ،وسامي مقابلها نايم على ظهره ..
حك راسه بحيرة .. وين بيناام وهم متوسطين السرير بهالشكل ..؟
تقدم منهم بشويش وسحب اللحاف اللي كان مثني عالطرف وفرده يغطيهم فيه .. حاول يقيس المساحة الفاضية بجانب ديما وهو يزيح شعرها برفق ويستلقي عليها ومابينه وبين ديما شي تقريبا ..
.. ولولا انه كان بيمووووت من التعب ماكان عرف ينام وهو قريب منها ويستشعر انفاسها بهالشكل ،،، فكر يحتضنها مثل امس بس خاف يقلق نومها ، واعدل عن الفكرة وهو يغمض عينه يستجلب النوم لها ...

.

.

.

.

ماسك الجوال بيده ويضغط على زر – الاعلى – مرة و- الاسفل - مرة..
وكل ما جا على رقم وليد يرجع ينزل بالارقام ويبعد عنه ..
بالاخير زفر وضغط على رقم وليد بمجازفة وقلبه يخفق من التوتر .. !
وليد بعد فترة : السلاام عليكم .. اهلااااااا نواف ..اخبارك؟؟
نواف : وعليكم السلام .. مرحبا وليد ..انا بخير الحمد لله ... آآآ .. بغيت اقولك إني .. آآ أبغى أكلمك بموضوع .. همممم ... متى تفضى ؟؟؟؟
وليد : حياك الله انا فاضي اليوم كله .. متى ما بغيت تقابلنا ..
نواف : والله ؟؟ تمااام .. حتى انا فاضي اليوم كله ..
وليد : اجل شووف في مقهى قريب منك اسمه .... بنزل الحين من البيت واذا وصلت عنده دقيت لك ..
نواف : اوكييه .. انتظرك..
.
.

بعد ما التقى الاثنين .. وجلسوا ...
وليد بتساؤل : خير يا نواف .. أحس عندك شي تبي تقوله .. ؟؟
نواف وفي سره يدعي " ياااااارب ما أتفشل !!"
قال بربكة شبه واضحة : آه .. بصراحة أنا عارف يمكن أصدمك شوي بطلبي .. بس أنا فكرت بالموضوع ولقيت إن أنسب طريقة إني أصارحك ..
وليد وهو يتابعه باهتمام : أيوآآ ؟؟
نواف : بغييت مم.. بغيت أتقدم لأختك سلمى ...... آآ ..
وليد يحرك حواجبه بدهشة ألجمته ..
نواف ويقول بسرعة وبتفصيل: وليد أنا عارف إن توه عهالكلام وإني للحين ببداية دراستي ولا أسست نفسي و ان ما معي حق افكر بهالمواضيع الحين .. بس الصراحة أنا خايف ان الفرصة تضيع من يدي .. وقلت لو أبادر ولو بخطبة بس ..
وليد ويده تحت ذقنه ويسمع نواف بتركيز : مممم .. نواف بس الـ ..!!
نواف يقاطعه من الارتباك : عارف .. يمكن تقول إني صغير وإني للتو تفكيري طاائش ومن هالكلام .. بس والله اني افكر بالموضوع بجدية وبعديين أنا المفروض الحين اكون ثالث سنة بالجامعة لا تنسى اني متأخر سنتين وعمري الحين واحد وعشرين سنة .. وأصلاً آآ .....
وليد يقاطعه بابتسامة : نواف ..هدي أعصابك .. واسمعني .. !
نواف يبتسم باحراج ويقول : آسف ... عاد اعذرني من الحمااس والربكة .. ما تتخيل شلون ترددت الااف المرات قبل اكلمك بالموضوع ..!!
وليد بتفكير وبجدية : نواف انا الصراحة اعزك كصديق واخ واشهد بأخلاقك العالية وشهامتك .. بس الموضوع الصراحة صعب إني أتقبله .. أولا انت توك ببداية حياتك ويمكن تغير رايك بعدين ... و حتى سلمى عنيدة وغالبا ما تتبع هواها بدون تفكير .. فما أدري إن كان الصح إني أمشــّي هالموضوع أو لا ... لكن عالعموم أنا مستحيل أردك لأن بالنسبة لي إنت من الناس اللي ممكن أئتمنهم عليها طول العمر ..شوف أنا بكلم سلمى واشوف وش رايها .. بس على شرط لو وافقت .. وطبعا ما ظن بتوافق يعني حبيت اقولك عشان ما تتحمس كثير ..لو صاار فشرطي انها راح تبقى خطبة بس الين ما تخلص دراستك او يحين الوقت المناسب للاستمرار في الموضوع بحيث تكون مطمن الحين انك حجزتها .. وان ماوافقت فبيكون كذا انتهى الموضوع ... .. وش رايك؟؟
نواف يهز راسه بفرحة حقيقية : ما ادري وش اقولك .. مشكوووور يا وليد .. ما قصرت .. مررررة شكررا .. !!
وليد : وطبعا بعيدها لك من الحين عشان ما تنصدم بعدين .. سلمى عنييدة وماظن بتوافق .. فأتمنى هالشي ما يأثر عليك من أي ناحية ..
نواف بابتسامة : لا تخاف .. أنا جاهز لتقبل الرد مهما كان نوعه ..
وليد بابتسامة صادقة : ان شاء الله خير ..اتمنى لك كل خير يا نواف ..والله ..
.
.
.
.

نواف من بعد ما ترك وليد ، اسرع بالاتصال بحماس على نايف .. اخوه وعزوته .. مايصح انه يؤجل او يخبي عنه خبر مثل هذا ..
حتى ولو كان قبل ما يتلقى الرد ومش ضامن سلمى وتفكيرها .. بيقول له عشان عالاقل يدعي له بالتوفيق في هالموضوع ..
نايف رد بعد فترة :السلااااااام عليكم .. آآآهلاا نواف .. اخبارك يالحبيب ؟؟؟؟؟
نواف : الحمد لله بأفضل حاال .. انتـه اخبارك واخبار فياض .. و....سالم ؟؟
نايف بعد لحظة صمت : الحمد لله .. كلنا بخير .. بشر عنك ؟؟ اخبار الدراسة والحياة عندك ؟
نواف : الحمد لله ماشي الحال .. الاوضاع مستقرة ..
نايف : آهااا .. الحمد لله ..
نواف : عندي لك خبر .. بس اوعدني قبلها انك ماتتسرع وتحكم علي غلط ..
نايف بنبرة واضح فيها الهم : حتى أنا عندي لك خبر مهم .. بس ابدأ انت قول اللي عندك ..
نواف بدهشة : لا والله ماني بقايل الا يوم تقول انت .. اخباري مو مهمة بس صوتك هذا يقول ان الخبر اللي عندك خبر خطييير ؟؟؟
ويعقد حواجبه وهو يستدرك انه من فرحته ما استوعب صوت اخوه المهموم : نايف في شي مستوي ؟؟ خبرني ؟؟
نايف يغمض بقوة : نواف ..... سالم .. مات ... !
نواف يده تجمدت عالتليفون ..
قال باستنكار : نـ ...نايف ..؟؟ وش قاعد تقول ؟؟ شلون ؟؟ شلون يمووت ؟؟سالم .. شلون؟؟
نايف : بحادث قبل ايام ..
وكمل بقلق على اخوه المصدوم : نواف انا ما كنت ناوي اعلمك .. بس ماقدرت اخبي عليك اكثر من كذا .. ادعي له بالرحمة والمغفرة .. و..
نواف يقاطعه بذهول : نايف .. انا.. انا حتى ماشفته .. اخر مرة كلمني كلمته ببرود .. مع انه كان .. كان مررة مهتم فيني .. انا حتى شكله .. ما اذكره .. امنيتي كانت. كانت ارجع واشوفه بيوم من الايام .. و...
صار يبكي فجأة وصوته انقطع .. ونايف ناداه بقوة اكثر من مرة وهو ندماان انه قال له ..
نواف بعد لحظات بصوت مبحوح : نايف .. بسكر واكلمك بعدين ..
نايف : لا تسكر نواف .. نواااا .....
سكر الخط بوجهه .. نايف مسك راسه بندم .. وهو يتمنى لو ما قال له شي!!
رجع يتصل عليه وما حصل رد .. اتصل على صديقه ايمن اللي قال له ان نواف برا البيت ومارجع .. قال له عن اللي صار وطلب منه يطمنه عليه اذا عرف مكانه اواذا رجع للبيت ..
.
.
.
.
نواف كان واقف تحت المبني اللي فيه شقتهم هو وايمن ، ويفكر بسالم اللي ماعرفه يوم بحياته الا يوم كان صغير ..وملامحه بالكاد يسترجعها ..
إالا إنه أخوه الاكبر ...وتكفي مكالماته له بعد عودته المفاجئة .. واهتمامه وخوفه وشوقه لرؤيته وحنانه الغريب عليه .. واللي خلاه متعلق بأمل إنه بيرجع في اقرب اجازة ويشوفه .. لكن .. قدر الله وماشاء فعل ..!!!
ما درى انه متأثر لهالدرجة بفقده إلا الحين ..!!
صعد للشقة بخطوات مهدودة من الخبر .. رفع جواله واتصل على نايف .. وطمنه على نفسه وقال له انه هدأ .. وسأله عن اللي صار بالظبط .. وعن ولد سالم ومصيره...،،، و نسى تماما الخبر اللي كان بيقوله لنايف واللي كان قلبه مشتعل حمااس له قبل شوي ...،، وكل تفكيره صار مع مصيبة فقدهم سالم ..

,
,

.
.
.
.
.
.


صحت من النوم على دغدغة مزعجة في وجهها ،
فتحت عينها ببطىء وهي تناظر اليد الصغيييرة اللي قاعدة تشد بانفها وتتلمس وجهها بخفة ..
مدت يدها بابتسامة وابعدت يده وهي تقرب راسها منه وتبوس خده الصغير ..
قالت بهمس وصوتها مبحوح من النوم : صحيييت ياقلبي ..؟؟
كانت نايمة على جنبها .. وجات بتتحرك والنوم مازال عالق بجفونها وبراسها ،، وحست بثقل على السرير من وراها ..
التفتت وفتحت عينها وهي تشوف فياض مستلقي وراها بالظبط وغارق في النوم .. تركت جسمها يسترخي ببطىء على ظهرها وهي تحبس انفاسها ..
تعلق سامي بذراعها وهو يصدر اصوات مزعجة .. وماصدقت انه ابتعد عنها شوي وتحركت بسرعة وهي تنزل من السرير ،،
التفتت على فياض تشوف اذا حس فيهم ، وشافته يتقلب على ظهره ، زفرت بارتياح وانحنت على سامي وشالته بحضنها وطلعت فيه للصالة ..
شافت شنطة حريمي كبيرة بالصالة ، حطت سامي من يدها وتركته عالكنب وراحت لها فتحتها، وكانت مثل ما توقعت فيها اغراض سامي اللي الظاهر امه مخصصتها له وجابها فياض امس.. طلعت منها بعض وجبات الاطفال الجاهزة في قنينات زجاجية ، وجلست وبجنبها سامي تقرأ اللي مكتوب عليها ..

.
.

فتح عينه بعد ما طلعت من الغرفة مع سامي .. وتنهد ..
سحب نفس عميق وقام من مكانه ،،
شوي وكان مبدل وماسك جواله يتصل على نايف اللي كان تارك له رسالة قصيرة ....
.
.
.

، على الجانب الآآخر ، نايف جاه اتصال بعد الفجر بشوي من المستشفى ، لأن الرقم اللي مع المستشفى كان رقم نايف ، وقالوا له يجي ضروري ..
ماحب يصحي فياض بهالوقت ويزعج اهله .. وراح وهو يخمن السبب .وانصدم لما قالوا له ان فابيان أفاقت لدقائق معدودة حاولت فيها تؤذي نفسها بكل شي موجود جنبها بالغرفة بالرغم صعوبة الحركة في وضعها وشبه استحالتها ، إلا إنها كانت في حالة جنونية ،،..
طلبوا منه للضرورة يوصف لهم احداث الاربعة أيام الماضية عشان بيعرضون حالتها على الطب النفسي ..
خرج من عندهم وهو يخبط كف بكف ..وترك رسالة لفياض يتصل فيه لما يصحى ..

.
.
.
.
.
سكر من نايف وطلع للصالة يشوف الازعاج اللي صاير برا ، وشافها قاعدة متربعة وهو بحجرها وقاعدة تحاول تأكله وهو ماسك بشعرها المفتوح ويلعب فيه شوي ويشد فيه ..
كانت عاقدة حواجبها وتحاول بيد تفك شعرهاا منه وباليد الثانية ماسكة العلبة الزجاجية ..
قرب منهم وهو يبتسم : صباح الخير
رفعت عينها له بابتسامة مشرقة : صباح النور ..
وسحبت شعرها بقوة من يد سامي وهي تسأل فياض : كيفك الحين ؟
جلس بجنبها باسترخاء : الحمد لله .. وش فيه الاخ مسوي ازعااج عالصبح؟
اشرت على اكله : ترا فتحت الشنطة واكلته من هذا ..
اعتدل وهو يقرب من العلبة اللي بيدها ويقرأ اللي عليها ..
التفتت عليه محتاسة وهي تقول برجاء : فياض امسكه شوي لو سمحت .. قطع لي شعري!
قرب منها وشاله وهو يجلسه على رجله ..
اعتدلت ديما وعدلت بيجامتها وجمعت شعرها على جنب وهي تخن ان شكلها صار لا تحسد علييه .. وكل كلامها امس لنفسها ذهب ادراج الرياح ،،
رجعت تأكله وهو على رجل فياض ..
فياض بهدوء : تو نايف كلمني .. يقول امه صحت الفجر وحاولت تؤذي نفسها مرة ثانية ..
تركت الملعقة وهي تناظره بصدمة ..
كمل : بيعرضون حالتها على طبيب نفسي ..
هزت راسها بفهم : الله يشفيها .. لهالدرجة حالتها صعبة ؟؟
قال : شكلها بتطول بالمستشفى ... ممم .. أفكر أخلي سامي معنا .. حتى لو أمه تعالجت .. ما أبيه يبعد عنا ..أويسافر معها ..
قالت : بس ..هذي أمه؟؟ اكيد بتاخذه معها ؟؟
هز راسه : سالم موصيني فيه كثيير .. ونايف امس قال نفس الشي .. إنا نخلي سامي ويانا ..
ناظرها بتركيز وهو يقول : وش رايك .. نخليه معنا..؟؟ انا وانتي ..؟؟ على طول؟ توافقين ؟؟
قالت بدهشة :آآ ... تسألني ...أنا ؟
هز راسه بتأكيد ..
قالت بربكة : طبعا موافقة ..بس .. بس أمه .. أكيد بترفض ..!!
قال بعدم اقتناع : لا بترضى أكيد .. صدقيني ..و خصوصا بعد اللي صار معها ..
سكتت وهي تشوفه واثق من كلامه .. ورجعت تناظر بسامي اللي استرخى وهدأ عن حركاته وهو بحضن فياض ..
قربت الملعقة من فمه ببطىء، بس شكله شبع وما رضى ياكل زيادة .. تركتها عالطاولة .. وناظرت بفياض الشارد بطرف عينها ..
قالت تقطع صمته : ممم.. فياض ؟
التفت عليها بابتسامة .. وعاجبه مبادراتها وندائها له باسمه باريحية ..صار شي عادي وتعودت عليه .. !
قالت : أبي أشتري أشياء لسامي .. وش رايك ؟
قال : حتى انا فكرت بهالفكرة .. طيب ،وش ببالك بالظبط تبين نشتريه ؟؟
قالت بتفكير :يعني العاب واغراض له .. ما ادري بالظبط بس محلات الاطفال فيها شغلات كثيرة ..
قال بتأييد : أجل قومي اجهزي وخلينا نطلع الحين ..
سألته باندهاش : منت برايح الشغل ؟
قال : لا أنا معتذر من أمس ..
قالت وهي تقوم من مكانها بحماس : آآهاا .. طيب.. بلبس بسرعة وأجي ..
.

.

.

.

رفعت جوالها ترد على عايض وهي جالسة بالسيارة وسامي على رجلها ،،
سلم عليها وهي بالكاد عرفت تكلمه لان سامي كان يمد يده ويحاول يسحب الجوال منها كل شوي ،،
سألها عايض عن اللي قاعد يصير عندها، وقالت له باختصار ان سامي ولد سالم معها هي وفياض لفترة عبال ما امه تطلع من المستشفى ،،
بلغها ان ابو خالد كلمه اليوم وطلب منه انهم يسوون حفلة خطوبة عائلية خلال شهر ، وطبعا هذا كان تأكيد على موافقتهم عليه ..
ديما فحت له كثير وتمنت انه خلال هالشهر تتحسن الاحوال وان الايام تمر على خير لين ذاك الوقت ..
حكت لفياض باختصار عن اخبار عايض ، ونزلوا بعدها عند أحد المولات وفياض شايل سامي على كتفه ..
دخلوا محل من المحلات اللي كان مغري بالوانه الفسفورية الزاهية ومليان دباديب والعاب ،، جلسوا فيه حوالي ساعة كاملة وكل ما شاف فياض شي افترح على ديما ياخذونه لسامي ،
بالاخير كانوا ماخذين له مجموعة من الدباديب الملونة ومكعبات باحجام كبيرة تناسب سنه ومشاية بعجلات – حقت الاطفال اللي ما يمشون- عشان يجلس فيها ويتحرك وهم مطمنين عليه ما يطيح او يتضرر ..
كانوا طالعين ومتجهين لمواقف السيارات وأحد العمال شايل المشاية بعلبتها الكبيرة ويمشي وراهم ، وفياض معه الاكياس الكبيرة وديما حاملة سامي ..
بنتين كانوا ماشيين بمحاذاتهم ، ووحدة منهم تعلقت انظارها بفياض بشكل غريب ..
ديما انتبهت عليها لانها كانت متأخرة شوي بالمشي ،، وانقهرت منها من داخلها ،،
يعني اكثر من كذا وش تبي .. رجال ومعه زوجته وولد صغير .. يعني اللي ينفهم انهم أسرة في حالها .. وش هالسخآفة ؟؟
لكن تجمدت رجولها وهي تسمع البنت تهتف باسم فياض بصدمة ....
التفتت ديما عليها بحدة وهي مكذبة اذنها ..
لكنها سمعت البنت تقول : والله يا سماح هذا فياض ... وهذي اكيد زوجته .. بس ... مو معقولة .. هذا .. البزر ؟؟...... فياض عنده ولد ؟؟ ما أصدق ...!! اشـ . اشلون ؟؟
البنت الثانية :لاا اكيد انك مشبهة عالرجّال .. هذا فياض ؟؟ مستحييل .... متأكدة تقصدين فياض نفسه اللي كان خويّنا، و اللي كان يسهر ويانا في الـ.... ؟؟
ديما تحركت بصعوبة ما تبي احد ينتبه لتأثرها ..
حست بضيقة قوية واختناق ،، وعيونها امتلت دموع ..
ناظرت بفياض اللي سبقها بخطوات بتأمل،، ورجعت تحاول تتمالك نفسها ..
لااااء .. هذا شخص ثاني ..!! مختلف عن فياض الأولي .. !!!
مستحيل ترجع تفكر فيه مثل زمان ..
مو بعد كل اللي مروا فيه ...
لااا ...!!
عدلت من وضع سامي على ذراعها وتحركت بخطوات سريعة تبي تلحق فيه ..
تبيه يكلمها ، أو يناظرها بس ،، عشان تثبت أكثر على موقفها من الكلام الللي سمعته.. !!
وصارت افكارها تجذبها للجهتين .. مرة تفكر سلبيا ومرة ايجابيا ..
معقولة جلس مع هالاشكال ؟؟ معقولة سهر معهم؟؟ ... ويمكن .. عاشـرهــ ...... لااااااااااااا !!
غمضت عينها بقوة .. اعوذ بالله من الشيطاان .. حتى ولو .. تاب ..تاب ...تاااب .. !!!!
الله غفور رحيم .. وانا سامحته ..سامحته ... !!!
ارتحت له ...... ورضيت عنه .... و..
و....و........حبيــته ...حبيييييته ...من كل قلبي ... ولا وش اسمي هالمشاعر اللي صرت احس فيهن واللي ماعمري حسيت فيها من قبل ؟؟؟؟؟؟؟؟؟؟
ياربي لطفك ..ياربي !!
من وين طلعوا لي هالشيطانتين ...من وييين ... !!!!
افاقت من افكارها على صوته وهو يناديها بلطف : ديما ، يللا عطيني سامي واركبي..
كان فاتح لها باب السيارة ، ويمد يده عشان ياخذ منها سامي ..
تعلقت عينها بابتسامته الجذابة واللي تقطر طيبة وحنان ..
ورفعت عينها تلتقي بعينه بنظرة غريبة ... جذبته بس ما فهمها ... !
قال لها باهتمام :ديما فيك شي ؟
نزلت عينها ورفعت سامي له وهي تقول بصوت خافت : لا ..
ركبت وحط سامي على رجولها وسكر بابها ...
وصلوا للبيت ، وقال لها تسبقه عالجناح مع سامي وهوطلع الاغراض ..
راح بعدها فورا لصلاة العصر .. وهي حطت سامي عالسرير وشالت لبسها ببطىء وهي شاردة بتفكير عميق ..
قاطعها بكاء سامي .. قربت منه ،، وشمت ريحة غريبة .. اخذ منها عشر دقائق تقريبا عشان تكتشف ان حفاضته كانت مش نظيفة ..
جابت شنطته وبدلت له وغيرت ملابسه وهي تحاول تتناسى افكارها شوي .. وتهدآآ وتصفي ذهنها ... لكن بلا جدوى !!
حرب طاحنة تدور في مخيلتها ... !!
.
.
.

رجع من الصلاة وشافها تلبس سامي ملابسه ..
قرب وجلس قربها عالسرير وهو يسألها : وش رايك نحط العابه واغراضه بالغرفة اللي جنبنا .. وان شاء الله الخطوة الجاية بجيب له سرير فيها ...
رفعت عينها له بصمت ، وتغيرت نظراته للقلق وهو يشوف جمودها ...
ناداها بهمس: ديما ..؟
ظلت على صمتها ثواني ...
نطقت بعدها بلا شعور : فياض .. انته... كانت لك ..عـ ..علاقات ببنات .. من قبل؟؟
ناظرها بصدمة .. ،، من فتحها للموضوع اولا ...
ومن انقلاب حالها المفاجىء ثانيا ..
وما صدق .. !!
ما صدق انها لسا .. بعد كلللللل هذا .. لســا .. لسا .......!!!
معقولة .. ؟؟
معقووولة ؟؟
طيب .. لييييش ؟؟
ليش ؟؟؟ بعد .. بعد ......!!!
...... مو ناقص والله .. مو ناقص ..!!
لمح الدموع بعينها وقال بترجي : ديما ......!!
لعنت غباءها ألف مرة ... وهي تسمع نبرة الرجاء بصوته ..
كانت عارفة انها غبية .. وانها بتندم على سؤالها هذا ... بس ماقدرت ..
شعور خارق لتحملها طغى على تفكيرها كله بلحظة.. وفات أوان التراجع .....!!
ناظرها فياض بنظرات يأس واستجداء ...
نظرة الانسان اللي بنى قصر كبييييييير وتعب فيه وفجأة .. صار بمستوى الأرض ...!
نظرة اللي فقد الأمل نهائيا... !!
وفهمت اللي يفكر فيه ..
بس لاااااااا .. مو هذا قصدها ... ليش يفهمها غلط ..
قالت باعتذار وبنظرات دامعة : آســفة .. والله ما كان قصدي .. مو ..
قاطعها برجاء: ديما.. أنا غلطت بشي ؟؟ فهميني .. وش اللي صار في هالكم دقيقة اللي طلعنا فيهم .. والله مو فاهم شي .. لا تكوني انتي والزمن علي الله يخلييك مب ناقص ..
هي الشي الحلو اللي يدفععه للاستمرار بالرغم من كل الظروف الصعبة اللي تحف حياته .. العلاج .. الألم .. فاجعة سالم ومرضه .. وفقده له ... من كا بيهونها بعد الله سوى أمله الكبيير طوال هالايام فيها ؟؟؟؟؟
نزلت دموعها ندم .. واسرعت تحكي له عن موقف البنتين اللي سمعتهم ..
سكت يسمعها .. ومو عارف شلون يفسر كل هذا ؟؟؟؟
مد كفه لها وسحبها يجلسها بجنبه ..
ناظرها وهويقول : ديما أنا حكيت لك عن حياتي من قبل وكيف كانت ..فحتى لو سمعتي هالكلام وحتى لو صارت مواقف ثانية في المستقبل ،،، انا وانتي المفروض ما نلتفت للماضي بعد ما فتحنا صفحة جديدة .. وإلا مارح نقدر نستمر ..
هزت راسها ومسحت دموعها وهي تقول : عارفة ... بس ..
قال يحثها : بس ايش ؟
قالت تبرر بلهجة متقطعة من بين دموعها : ماكان هذا قصدي والله ..ما كان قصدي اللي فهمته .. .. أنا .. يوم سمعت كلامهم .. صرت اتخيلهم يوم كانوا وياك .. و... ما استحملت ... وسألتك بعدها هالسؤال ..
كملت بصدق : فياض .. أنا .. من جد أشوفك انسان ثاني .. واحس اني نسيت كل اللي صار زمان ...وأحس إني حابة أكمل حياتي معك .. و..
ناظر بعيونها اللي تشتت نظراتها في الارض ، وكلماتها تدخل قلبه وتمحي كل يأس حس فيه قبل ثواني ..
رفعت عينها له بتردد ، وألجمها الحياء ..
قالت عوضا عن الاسهاب في سرد أحاسيسها تجاهه : لا تفهمني غلط أرجوك ..
اقترب ببطىء وطبع قبله على جبينها وهو يقول :ريحتيني ....... والله ما تتخيلين وشلون حسييت قبل شوي .. وكأنا رجعنا لنقطة الصفر ..
غمضت عينها براحة ..
راحة لأنها قدرت توصله شي من احساسها وتطمنه ..
.

.

ثواني والتفتوا على سامي اللي نسوووه بالممرررررة ،،
ابتسم فياض وهو يقول : نام ؟!
رجعت تلتفت عليه وهي تبادله الابتسامة بأعذب منها ..


.
.
.
.



.
.
.
.

في طريقة يتبعها بعض الكتاب بعد الاجزاء .. وهي طريقة الاسئلة المشوقة للقادم ..
اسمحوا لي اتبعها هالمرة .. =)

-فياض وديما .....؟؟ ما جديدكما القادم ؟

-سلمى ... كيف سيفاتحها وليد .. وماستكون ردة فعلها ؟؟

-خلود ...... مازلنا لا نعرف عن مشاعرها شيئاً >_<..

-فابيان .. إلى أين ستصل حالتها ... ؟؟؟؟؟؟



.. اتمنى ما تقولوا البارت كان قصيير .. تأخرت يوم عليكم بسبب انه كان قصير كسابقه .. ولقيتني اليوم اكتب فيه اكثر مما مضى ....



شي ثاني .. ترا حاسة اني تسرعت بالبارت .. وفي احداث كنت ناوية أأجلها بس مدري ، قدر الله وحطيتها بهالبارت ......



وشي ثالث ..
ممكن تقولون ........ حرام عليكي ريحي اعصاب ديما وفياض كل يوم والثاني صايرة لهم مصيبة او حدث مفاجىء..
بس ارد اقولكم ضاقت فلما استحكمت حلقاتها .. فرجت وكنت أظنها لا تفرج ..... وبعدين ارجعوا لاسم القصة .. شيء من الأحزان ..!!!!
عاد أنا لما سميتها بهالاسم .. كنت ناوية تكون قصتي مأساوية بحق، بس والله ما قدرت .. ولقيتني اغير القصة تماما عن ما كنت مخططة له ..>> طيبة اختكم .. !!
.
.


كثر هرجي صح ؟؟ من يومين ما نمت مثل الناس فلا تلوموني ...
يللا اشوفكم على خير .. وبانتظار حضوركم بشوق ..

السلااااااااام عليكم..
ضجووو .. وهـ بس الله يريح قليبتس مثل مااريحتي قليبي على هالبزر ساامي... وياليت مكمله هالراحه ومخليه امه تفطس ونرتاااااااح منهاا نهااائي .. والله انها مثل القطوو بسبعة اروااح.. اجل قاطعه يدها وزاارطه حبوووب تهد الفيل وللحين عايشه ؟؟ والله من حب الحيااة اللي فيها..>> عقب عيني هذي باذن الله انها تفطس ونخلص منها ونرتاح..هخهخهخهخه
شووفي بهالجزء اتووقع انه بيكوون فيه تطووووووور قووووووي وكبيييييير بين فيااض وديما وممكن يكون تطووور نهاائي بعلاقتهم كزوجين.. اتمنى انهم فعلاا يتقدموون خطوااااااات كبيره بزواجهم ويمكن وجود ساامي يسااعدهم على هالشي وخصووصاا ديما اتوقع وجود سامي بيشيل أي تووتر بااقي فيهااا..
نوااف : هل تسرعت بالخطبه؟؟؟؟ اتوقع ان المفاجأه بتكون بموافقه سلمى عليك.. ويمكن لما تواافق عليك بتقوووووول يااويلي ويلاااه وش هالورطه اللي ورطت نفسي فيهاااااااااا؟؟؟ وخصووووصااا ان مافيه احد من اهلك يدري عن هالموضوع.. ناايف القريب لك يمكن يهزئك لانك اتخذت خطووه مثل هذي بدوون ماتشااور احد؟ ويمكن بعد يقوولك ارجع اثاارينا مرسلين بزر مو رجال وفاهم ويعرف يتصرف ؟؟
يعني زواجك اتووقع انه يكوووووووون سري وهالشي لانك بتلااقي صعووبه بعدين بانك تبلغه اخوانك.؟؟ ويمكن نايف يزعل ويمكن فياااض يوقف معك ويواافق على هالزواج لانه مر بمرحله الضيااع بدوون مايعف نفسه عن الحرام وبيعتبر خطووه زواجك خطووه موفقه وبيباارك لك فيهاا لانه جرب الحرام وماايبيك تصير مثله وخصووصااا انه هنااك متووفر وبشكل كبيييييييييييير فيمكن يعتبر هالخطوه ايجاابيه منك ويسااعدك فيها ويخطب البنت لك من اهلهااااا..

ناايف : يااااا ابـــــــــــــــــعـــــــــــــــــــــــــدي والله بشبااااب بلاادي.. ايه اخيرااااا شفت مووقف يعجبني منكم.. اجل تبوون البزر يروح مع امه وتحوووس مريره هنااك بدون واالي ولاارقيب .؟؟. والحين الحرمه الله يقلعهاا منهااره نفسياا يعني بعد مستحيييييييل تقدر تاخذه وهي محااوله تنتحر مرتين وبيحولونها على الطب النفسي.. بس اللي ابي اعرفه هي لييش حااولت تنتحر هل اكتشفت مرض سالم؟؟؟ او هي مريضه بالايدز مثله وهالشي هو اللي خلاها تنهاااااااار وتحااول تنتحر؟؟؟
المهم يااناااايف انت رجالـ (ن) معجبني وخااااااطري ازووجك.. تدري عاد يمكن ان ضجوووو الله يعافيهاا غيرت الخطه وماارااح تخلي خلود لعاايض والبنت بترفض الزواج منه وهناا عاااااد بتفضى لك الساحه مع انك مااتدري عن هواااء داارها بس انا ادري وبحااول اجمعكم مع بعض >> اخــــس يالواااسطه القوويه والمياانه الاقووى اللي بيغيرون الاحداااااث عشاانتس..هخهخهخهخه

فياااااااض وديماااااااا : اتوووقع اتوووووووووقع ان الجزء الجااااااااااي باذن الله بيكوون فيه تقدم كبييييييييير وبيكون انقلااااااااااااااب قوووووي بعلاقتكم مع بعض..
والله رحمتك ياا فيوووضي وانت بغيت تنهاار لما شفت ديما وسمعت كلاامها وهي تسألك عن علاقاتك اللي قبل.. هههههههههه والله رحمتك وانت بغيت تنجلط من الخرررعه من هالسؤال؟؟ بس والله ماا الوومك لما قمت تذكر اياامك اللي قبل كيف كانت والحين كيف صاارت.. احسااااااااااس الاماان والرااحه احسااااس عمره ماينتعووض وهالشي مااا الوومك عليه لو فكرت انك مستحييل تتخلى عنه حتى لو على حسااااااب ديماااا..
لكن اتوقع ان وجوود ساامي بينكم بيخلي العلااقه بينكم اريح ويخف التووتر اللي بينكم ..

ضجوو ومشكووره على هالباارت الحلوو .. الصرااحه طووووووله معقوول لااهوو طويل مره ولاا هوووقصير.. بالنسبه لي باارت مرضيني..يعطيتس الف عاافيه عليه..
بس خااااااطري اشوووف ناايف اكثر بالاجزااء الجااايه احس انه شخصيه رهيبه بس دووره صغيييير وااجد.. ادري غثيييييتس بهالطلب بس ياا ختي شخصيته رووعه وتهببببببببببل وحرام شخصيه مثل هذي تكوون كومبااارس..هخهخهخه>> هااه عسى اشفقتي علي وبتخلين له دووور اكبر وتزوجينه خلووود ويفرحون قلبي..>>> انا لوو يصير هالشي ياا ضجووو لتس علي اسوووي دعاايه لقصتس الجاايه ان الله احياانا>> هااه من قدتس ولاا فيه أي كااتبه لقت حجز لدعاايه مجااانيه لقصه علمها عند الله..هخهخهخهخهخه

بالنسبه لاسئلتس

هههههههههههههههههه زارا قريت بدايت ردك عز الله فطست الحرمه

والله اني زيك مابي سامي يرووح معها ابد

عاد انا متاثره بلقصص الخياليه بقوه ان سالم للحين عايش

يعني هي تفطس من جه وسالم يرجع من جه

سلمى بتتشقق من الوناسه وبتوافق بس بتسوي ثقل وبتنصدم اول شي

يعطيك الف الف عافيه ضجوووي

وننتظرك بفارغ الصبر

جــ,ــ,ــودي