&....الجزء الثالث....&
لاجيــت انـا بـ سامــحــك ..
تبكي { الجــــراح / مـاودهــا
", مشتــاق ", ودي اصــافحك
وعيـــت يــــدي لا أمــدهــا ....
نزل طارق من الدرج ولقى أخته جالسه عند التلفزيون :مساء الخير
جوري :هلا والله
طارق : أنا طالع ..تبين شئ ؟
جوري : سلامتك
طلع طارق ورجعت جوري تشوف فلم هندي كانت تتابعه
,,,,,,,,,,,,,,,,,,,
نزل مصعب من سيارته اللي كان يقودها بسرعة جنونية
طول الطريق وهو يفكر بأمه وشلون رفع صوته عليها
وليش ماحاسب على كلامه قبل يقوله ..!
دخل الاستراحة وجلس مع الشباب لكن الضيق باين على ملامحه ..
قام وطلع عن الغرفه اللي كلها فوضى وضحك محتاج يجلس بمكان هادئ لقى طارق عند الباب بيدخل
طارق : هلا والله
مصعب فتح سيارته ومارد عليه
طارق : ياهووو نحن هنا
حرك السيارة بسرعة ورجع البيت وطارق دخل الاستراحه وفكره مشغول بمصعب
دخل الصالة مالقاها راح لغرفتها لقاها على مصلاها رافعه ايديها بخشوع تدعيله ولأخوه
وقف لين حست بوجوده قرب منها حب راسها
مصعب :تقبل الله
أم خالد بابتسامه أم حنونه : منا ومنك يمه ليش رجعت بدري
مصعب : ماطاوعني قلبي تنامين وأنتي زعلانه علي
أم خالد : مقدر ازعل عليك لكني شلت بخاطري .. ياولدي أنت تدري أني مالي ذنب باللي صار أبوك هو اللي عافني
مصعب : طيب ليش تزوجتي بعده وشردتينا
نزلت العجوز راسها بأسى تتذكر حياتها عشان تقولها لولدها بالتفصيل لأن هالموضوع أول مره ينفتح
مصعب : يمه لما جيتي ماحبيتي تقولين شئ بس أنا اللحين ابي أعرف كل شئ
تكلمت أم خالد وكأنها تشوف حياتها قدامها : أنا تزوجت أبوك وكان زواج تقليدي
كان أبوك جاف بمعاملته معي وقاسي بليلة زواجنا قالي :أنا ماتزوجتك ألا عشان تخدميني وبس..
من ذيك الليلة ماتت أحلامي كان يصبحني بخناق ويمسيني بضرب كان يشرب ويجيب أخوياه السكارى معه أحيانا
لكني كنت أقفل على نفسي وهم اللي يتمشون بالبيت _وهلت دموعها_ جلست سنه ماحملت
بعدها صرت ماأشوف أبوك الا بالأشهر وبعدأربع سنين حملت وكنت أنت أول ضناي
وبعد ما كملت سبع شهور حمل جاب لي طفل صغير رماه علي
وتذكرت ذاك اليوم لما دخل زوجها البيت يصرخ
أبو خالد : تعالي ياحيوانه
طلعت أم خالد من المطبخ تركض وتفاجأت بطفل عمره مايتجاوز الـ ثلاث سنين
شكله يكسر الخاطر يصيح ويناظر ابوه برعب ومن شافها ركض لها ضمته وهو يبكي
أبو خالد : هذا ولدي خالد امه ماتت ربيه انتي
أم خالد تعودت على قسوته : وش اسمك حبيبي
: أبي ماما .. وين ماما
أم خالد : ماما راحت عند ربي فالجنة
خالد يبكي : وينها الجنة وديني لها
وكملت ..ضميته وسميت نفسي باسمه وأبوك طلع من عندي وماعاد شفته
كان كل كم شهر يرسل لي مصروفكم لين كبرت أنت وصار عمرك 4سنين وبعدها انقطعت أخباره وجو خالات خالد خذوه مني عشان ورث أمه تذكر يامصعب
مصعب بحزن : وأذكر أنك مامنعتيهم وتركتيهم ياخذون أخوي
أم خالد : ماكان بيدي حيله مالي عزوة ولا لي سند ولا عندي اللي أصرف منه عليكم قلت خالاته الله معطيهم ومابيقصرون معه
جلست أنا وياك لوحدنا محد يسأل عنا ولولا الله ثم اهل الخيركان متنا من الجوع
مصعب : وعشان كذا خليتي ابوي ياخذني وتزوجتي
أم خالد : تقدم لي رجال طيب من معارف جارتنا وخطبني كبير بالسن لكنه غني وهذا اللي خلاني أوافق
كنت أبيك تدرس بأحسن المدارس وما ينقص عنك شئ لكن أبوك لما درى هددني ولما تزوجت خذاك عشان يحرق قلبي عليك
وانقطعت عني أخبارك لين ذاك اليوم اللي كلمني فيه خالد
وجابني لهنا وجيت لقيت عيالي اللي تركتهم أطفال صاروا رجال ماكبروا قدام عيني
قرب منها مصعب وحط راسه على ركبها : أسف يالغاليه واوعدك لأعوضك عن كل اللي فات
’’’’’’’’’’’’’’’’’’’’’’’’’’’’’’’’’’’’’’’
وصلهم مشاري للسوق ونزلوا كلهم وكل واحد منهم له همومه
دخلوا السوق لجين وشوق حاولوا يتجاهلون اللي صار وغلا ظلت ساكته محد يدري شاللي يدور براسها
دخلوا كم محل وكانت شوق هي الوحيدة اللي اشترت راحوا للكافي يرتاحون
وأول ماجلسوا طلعت غلا جوالها وعيون الثنتين ترقبها بخفية
غلا :هلا ماما
أم بندر : هلا حياتي
غلا : ماما خلي السواق يجيني أنا بصحارى
أم بندر : ليه حبيبتي وين سواق خالتك
غلا : ماما شوق ولجو ماخلصوا وانا تعبانه ابي ارجع البيت
أم بندر :خلاص اللحين ارسله لك
غلا : اوكي .. باي
شوق : غلا انا اسفه
غلا ببرود مصطنع : على ايش؟
شوق : على ..امم مدري بس عن جد اسفه
لجين لفت على غلا ومسكت ايدها :بروح معك اللحين
شوق : انا ماخلصت
لجين بعصبية : مو لازم
غلا :لا مافي داعي خلك مع شوق
شوق ماكان لها وجه تقول شئ
لجين : ماراح اخليك
غلا : لو سمحتي لجو محتاجة اجلس لوحدي
لجين : بس انا محتاجه اجلس معاك
رفعت غلا راسها وشافت لجين تناظرها بنظرة ترجي
لجين : بليز غلا
غلا : براحتك
دق جوال شوق وكان مشاري
شوق :الو
مشاري :خلي السواق يجيبكم
شوق :لجين بتروح مع غلا بيت خالتي تقدر توديني البيت بعد نص ساعة
مشاري : ومن بيوديهم
شوق : سواق خالتي ..بتجي ولا لا
مشاري :أنا عند الباب اطلعي تبين اللحين ولا كيفك
شوق : اللحين أطلع
,,,,,,,,,,,,
طلعت شوق وركبت مع مشاري اللي ظل طول الطريق ساكت
ولجين راحت مع غلا وصلوا البيت وعلى طول على غرفة غلا
جلست لجين على السرير وغلا راحت تبدل ملابسها دق جوال غلا بنغمة مميزة كانت لتوأم روحها الجوري ..مشت غلا بكسل للتسريحه ورفعت الجوال
غلا :أهلين
مافاتت الجوري نبرة الحزن بصوتها لكنها قالت : هلا والله بالطش والرش والبيض المفقش
غلا :هههه _وبصوت باكي _ وحشتيني
الجوري : حياتي أنتي ..بالبيت ؟
غلا : ايه وعندي لجو
الجوري : جد والله ونااااااسه
غلا : شفيك تصارخين
الجوري : قومي جهزي القهوة ولا أقول بيبسي أحسن
غلا ببلاهة : ليش ؟
الجوري : لأني عشر دقايق وبكون عندك
غلا وتغير مزاجها : يابعدهم والله أني أحبك
الجوري : أقول لا يكثر ولاتجهزين شي انا عازمتكم
غلا : اوكي ننتظرك
الجوري : يالله باي
لفت غلا على لجين وشكلها تغير من الفرحة يكفي أنها بتشوف
جوري صديقة عمرها ..
لكن الفرحه ماكملت صدمها شكل لجين جالسه على السرير وضامه رجولها بشكل يكسر الخاطر
بس ليه وجهها شاحب كذا قربت منها ورفعت راسها بحنان : لجو حياتي شفيك ؟
لفت لها وبنبرة عتاب : توك تسألين شفيني ؟
نزلت غلا راسها : سوري لجو بس ..وجود أخوك ماخلاني انتبه لك ..
لجو ياعمري لا تزيدين علي والله مو ناقصه مدري ألاقيها من مشاري ولا من ريان وآه من ريان
لجين : شفيه ريان
غلا : مو قادرة أحبه وهو اللي يموت بالتراب اللي امشي عليه
مو قادرة أحبه والمفروض اني ما افكر الا فيه موقادرة حتى أتقبل وجوده بحياتي
لجين : لهالدرجه تحبين مشاري
غلا بحزن : مو مهم ..
لجين بجدية: ألا مهم
تكلمت غلا بصوت مكسور وكل الذكريات تتصارع بذاكرتها وهي تحاول تبعدها : وتتوقعين 4 سنين حب بقدر أنساها بيوم وليلة
حاولت غلا تنفض الذكريات اللي براسها : تكفين لجو مالي خلق اقول شئ .... الحين قومي غسلي وجهك لأن جوري بالطريق
بس ترى الليلة بتنامين عندي
لجين : امممم اوكي بكلم امي واقول لها
غلا : مين قدي جوري بتجيني ولجو بتنام عندي
لجين : ههههههههه
,,,,,,,,,,,,,,,,
دخل ريان على أمه المطبخ وضمها من ورا : مساء الخير
أم ريان : ياهلا والله مساء النور
ريان : الحلوة شتسوي ؟
أم ريان : العشاء يعني وش بسوي أنت غريبه ما طلعت
ريان : قلت أمر عليك قبل ما أطلع
أم ريان : وهذاك شفتني يالله مع السلامة لا تشغلني
بعد عنها وسوى نفسه زعلان
ريان : أفا يا أم ريان هذا وأنا جاي أفضفض لك
فهاللحظه دخلت ريفان : ياشين اللي يتدلع على كبر
ريان :وياشين اللي يغارون
دق جوال ريان : هلا طارق
:عند الباب ؟ خلاص اللحين اطلع .. ماني مطول .. قلت لك اللحين
سكر الجوال ولف على أمه : شخبارك يمه
أم ريان : الحمد لله
ريان : وشخبار بيت عمي
ريفان : اها السالفة فيها بيت عمي
أم ريان : بيت عمك بخير .. يالله لا تأخر على خويك
ريان : عادي خليه شوي
ريفان : هههه أرحمك صراحة .. قول شعندك
ريان : يمه .. كلمتي مرت عمي عن موعد الزواج
أم ريان : قل كذا من اول أجل جاي تشوفني هاه
انحرج ريان : احم احم انا طالع تبون شئ
ريفان : هههههههههاااااي
ريان : ضحكتي بدون سنون
أم ريان : ماعليك منها ويوم الجمعة عزيمة ملاك بكلمها ان شاء الله
ركض وحب راسها : بعد عمري يمه بس لا يأخرون الزواج
ريفان :يابختك ياغلا
ريان : يمه شرايك نملك الاسبوع الجاي والزواج بعد شهر
أم ريان : اطلع اللحين لخويك وبعدين يصير خير
ريان : بس ...
أم ريان : اشش اطلع لا تلطع ولد الناس عند الباب عيب عليك
طلع وريفان تضحك عليه
ولقى طارق عند الباب ومعه مصعب ركب ورا
مصعب : لا تو الناس قلت لطارق يمشي ويخليك بس دلخ وعلى باله طيب
ريان : آآآآآآآآآه
ظحكوا كلهم عليه وحرك طارق السيارة
طارق : لا هذي طالعه من قلب .. شفيك ياحسرة
ريان : وقسم بالله قهر محد حاس فيني .. كل ما قلت بتزوج قالوا يصير خير
مصعب : وش مستعجل عليه
طارق : والله مالومك
مصعب : الحمد لله الذي عافانا
ريان : اشوف فيك يوم يارب
طارق : آآآمين
مصعب : بالأحلاااااااااااااام ههههههاااااااي
,,,,,,,,,,,,,,,,,
دخلت جوري على غلا وهي بكامل اناقتها
الجوري : السلام عليكووو
قربت غلا وضمتها : وعليكم السلام وحشتيني موت
الجوري : وانتي أكثر ياقلبي .. شخبارك ووين لجين
غلا : أنا بخير ولجين داخل تعالي
دخلوا ((وكانت جوري جايبه معها ببسي وشوكولاتة باتشي مع فطاير وبطاطس وحب )) سلمت على لجين
غلا: جواره وش هالاكياس كل هذا بناكله
الجوري : انا عازمه نفسي على سهرة عندكم
غلا : الله يحييك
جوري : يقولون انه فيه فلم أمريكي رومانسي عالساعه 11 أنما ايه
لجين : ههههه حبيبتي انتي
دخلوا المجلس وخذتهم السوالف وقدرت جوري بروحها المرحة تغير مزاجهم المتعكر
الجوري : أقول لجينوه .. وكانوا جالسين عالأرض وتاركين الكنب
لجين وهي تاكل من الشوكولاتة: لجينوه بعينك يالدبا يالمعفنة
شهقت جوري ورمت الفطاير اللي بيدها بالصحن : أنا دبا ومعفنة يالشينة
غلا تاكل شيبس وتلعب بجوالها قالت تتطنز : لجين شينة حرام عليك
جوري : أقول لا يكثر وخلي سواقكم يجيب ببسي اللحين يجي الفلم
لجين : هيييه توك شاربه واحد كامل
جوري ناظرتها بنص عين : ممكن تنطمين
لجين وغلا : هههههههههه
غلا ودمعت عينها من الضحك : والله وسعتي صدورنا
الجوري : عشان تعرفين أني ماالعب ... أنتي لو شايفه أشكالكم اول مادخلت يمه منكم بغيت أهج بس مسكت نفسي
لجين زاد ضحكها :ههههه أجل مسكتي نفسك
الجوري : ايه وبقوة بعد .. قلت يابنت غمضي عيونك واقري على نفسك المعوذات ومابيصير الا الخير
غلا : وليه ان شاء الله شايفه شياطين
الجوري : الشياطين اسمح منكم اما انتم كنكم حفارين قبور من كوكب ثاني
لجين : يلا عاد عطيناك وجه
الجوري : شين وقواة عين ..اقول غلوه
غلا : شتبين ؟
الجوري : ارمي الجوال لا اكسره لك
غلا : أنتي شفيك علينا اليوم .. طاقه الميانه بزياده
لجين : بالله شتسوين بجوالك
غلا :يمه منكم هذاني قمت
وطلعوا على غرفة غلا وهم بالدرج
الجوري : أقول لجو .. وينها خطيبة أخوي
ليش ما جت معك
لجين : احنا مو مالين عينك
الجوري : لا بس ابي اكشخ عليها شوي اني حماتها
غلا : الله يخلف عليك امشي بس
وصلوا الغرفة طفوا الأنواروكملوا سهرتهم على الفلم
,,,,,,,,,,,,,,,,,
عالساعة 2 كانوا خالد وملاك يمشون بهدوء بأحد شوارع لندن
وايديهم متشابكة بشكل رومانسي
ملاك : حبيبي تعبت
خالد : شوي ونوصل .. شفتي اللوحه الحمراء اللي هناك
ملاك :وين؟
خالد :اللي بأخر الشارع ورفع يده يأشر عليها
ملاك بصوت باكي: بعيــــــده
خالد : ههههه تبيني أشيلك
ملاك : لا واللي يعافيك يكفي فشيلة العصر
خالد: ههههههه عادي زوجتي وحلالي
ملاك بحيا : بس مو قدام الناس
خالد : شسوي فيك كنتي خايفه تركبين اللعبه
ملاك : مو لازم نلعب
خالد : بالله عليك ماانبسطتي
ملاك وطلعت منها تنهيدة حب : كثيــــــــــــر ..تدري حبيبي
خالد :خير ياعمري
ملاك : مو قادرة أصدق أن مر على زواجنا شهر
خالد لف ايده على خصرها : وأحلى شهر بحياتي
ملاك بخجل :حتى أنا .. وصلنا
خالد : هههه جاك الفرج
ودخلوا كان المطعم هادئ والاضاءة فيه رومانسية جلسوا متقابلين على طاولة بزاوية بعيدة وطلبوا من العاملة تحط لهم حاجز ولما راحت شالت ملاك نقابها وطرحتها وكأنه اول مرة يشوفها مسك خالد ايدها وبنظرات حالمة ..
خالد: ماكذب اللي سماك ملاك
ملاك حمرت خدودها : خالد
خالد : ياعيونه
ملاك : لا تناظرني كذا
خالد : ليش؟
ملاك منزلة راسها : بس استحي
خالد : فديت اللي يستحون
ملاك بدلع : خاااااالد
خالد : ياويل حالي خلاص اسف وش ودك تتعشين
ملاك : على ذوقك
بعد ما طلب العشاء ..
خالد : على فكرة رحلتنا بكرا
ملاك : بكلم أهلي يستقبلونا
خالد : لا أنا قلت لمصعب أخوي
ملاك : معليش كلهم يجون
خالد : براحتك
,,,,,,,,,,,,,,,
باستراحة الشباب كانوا مصعب وطارق يلعبون بلاي ستيشن
دق جوال طارق شاف رقم اخته وعطى ريان يلعب عنه
طارق :هلا والله
جوري : اهلين طروق متى بتجي
طارق ضرب جبهته : يوووووه نسيتك
الجوري بزعل:لا والله
طارق : خلك جاهزة ربع ساعه وأكون عندك
مصعب : قوووووووول هدف هدف ههههههههاااي
ريان : الله ياخذ هالحارس _ولف على طارق _ انت شهالفريق الغبي
طارق :غبي بعينك أنت ماتعرف تلعب
مصعب :يعني انت اللي تعرف موكأني جبت فيك هدفين
طارق تفشل :صدفه
مصعب :هههههههااااي تعال كمل بس
طارق :لا انا طالع .. الأهل يبوني
مصعب :ايه صرفها
طارق : اقول ضف وجهك ...وبصوت عالي ..مع السلامة شباب
الكل : مع السلااااامة
,,,,,,,,,,,,,,
الجوري تلبس عبايتها
غلا : ياشينك جوارة كان جلستي للفجر توها تحلى السهرة
الجوري : عشان تذبحني امي وتعلقني للكلابة
غلا : ياكذابة خالتي ماتسوي كذا
الجوري :أمزح بس خلاص تأخرت الساعة 2 ونص
لجين : نشوفك مرة ثانيه لا تقطعين
الجوري : ان شاء الله بزواج طارق وشوق
دق جوالها :هلا طارق اللحين اطلع .. يالله بنات مع السلامة
لجين وغلا :الله يسلمك
راحت جوري ودخلوا غلا ولجين الغرفة
لجين : تكفين غلا ابي بيجامة
غلا : من عيوني أبدل ملابسي وأجيب لك
رمت لجين نفسها عالسرير من التعب تنتظر غلا اللي طلعت من غرفة الملابس بعد دقايق ببيجامه قطنية رمادي ورمت على لجين البيجامة الزهر
وبعد عشر دقايق كانوا الثـنتين عالسرير
غلا : واللحين بتقولين لي شسالفتك ؟
لجين وتغيرت ملامحها:السالفة ومافيها أني حلمت حلم غريب
غلا : حلم ..! وشو هالحلم اللي قالب كيانك
لجين : قبل أمس لما نمت بالليل حلمت أني كنت باستراحتنا
وكلنا مجتمعين بغرفة الكبار والصغار فجأة
كلكم اختفيتوا لكني ما اهتميت قمت ابي اخذ جوالي من على الطاولة اللي بأخرها
ولماالتفت جهت الباب عشان اطلع شفت واحد ماأعرفه لكنه جميــــل جمال خرافي لابس ثوب
دخل الغرفه وكان يمشي مشية مصاصين الدماء يدينه مرتخيه حوله ويسحب رجوله
خفت منه وركضت على طول برى الغرفه ومشيت بسيب طويل ومظلم
ودخلت غرفة بنهايته وأنا مرتاحه أني قدرت اهرب منه لكني ماوصلت نص الغرف الا وحسيت بوجوده
لفيت وكان واقف عند الباب كنت خايفه ومرعوبة وبصعوبة قدرت امر من عنده واطلع برا
وبعدين نزلت من درج والتفت وراي كان واقف ويبتسم ابتسامة خبيثة
كانت لجين وهي تحكي الحلم لغلا ترجف وكأنها تعيش الحالة اللي عاشتها اول ماقامت ذاك اليوم
أطرافها بردت وجسمها كله ينتفض وعيونها لما سكتت بدت تدمع ..
استغربت منها غلا ..قربت لها وضمتها بخوف وحيرة
غلا : بسم الله عليك ياحياتي ليش مكبرة السالفة
لجين :خايفه ياغلا خايفة
غلا : أن شاء الله خير بس أنتي هدي نفسك
لجين : اللي مجنني انه مو مرة وحده بس
غلا : شلون يعني ؟
لجين : صحيح أني قمت مرعوبه لكن قلت مجرد حلم
ولما رجعت من الجامعة أمس ونمت الظهر شفت نفس الشخص بنفس الغرفة كنت جالسة دخل علي وكان هالمرة طويل وملامحه مو باينه حيل أعطاني هدية كانت صندوق وفيه اشياء مادري وش هي
غلا بحماس :وبعدين
لجين :قال هذي غاليه حافظي عليها وطلع
غلا : غريبة !
لجين : حاولت ما أشغل نفسي بالتفكير
لكن لما نمت بالليل حلمت فيه مرة ثانية
غلا بذهول : بعد ..
لجين : وبنفس الغرفة جالسة ألعب مع بنوتة حلوة جاء أخذها مني بهدوء وقعد يلعب معها
غلا : طيب ماتذكرينه ..امممم تعرفينه طيب
لجين : بالحلم كنت أعرفه وكأنه قريب مني لكني أول مرة أشوفه
غلا :طيب فكري مايقرب لنا
لجين بتفكير: لا ...
غلا : طيب فسري الحلم
لجين :مستحيــــل
غلا :ليه
لجين : بس ما أحب
لجين حست أنها ارتاحت بعد ماقالت لغلا :اللهم اجعله خير
غلا : آآآآمين
سمعوا صوت المؤذن يردد عبارات تشرح الصدر وتنزل على الروح السكينة والراحة رددوا مع المؤذن وبعده الدعاء
لجين قامت جهة الحمام : قومي حبيبتي نصلي
قامت غلا تركض وسبقتها : بتوضى قبلك
لجين بعصبية : ياسخيــــفة ..لا تطولين
ورجعت تضحك على خبال غلا
دخلت أم بندر عليهم : ياللا بنات الصلاة
لجين : صباح الخير خالتي
أم بندر : صباح النور ياعمري قمتوا
لجين :لا سهرانين
أم بندر : الله يهديكم
طلعت غلا : هلا يمه وحبت راسها صباح الخير
أم بندر بابتسامة : صباح النور ..وش أخبار جمعتكم أمس عسى استانستوا
غلا : ايه يمه الحمد لله
أم بندر:وشلون جوري
غلا : تسلم عليك
أم بندر : الله يسلمها ...هاه لجو عسى ماغثتك غلا
لجين : لا شدعوى خالتي
أم بندر : قبل ماأنسى اليوم توصل ملاك وبنروح كلنا نستقبلها
غلا بفرحة: واحنا معكم
أم بندر :أن شاء الله
لجين : ههههههه شوي شوي لا تجيك سكتة من الفرحه
غلا : مو شغلك
أم بندر : ياللا صلوا وناموا
غلا ولجين : أن شاء الله
,,,,,,,,,,,,,,,,
وش رايكم بالجزء والغموض اللي بدا ينفك
توضحت بعض الأسرار وظهرت أسرار جديدة وشخصيات
ما راح أسئل أبيكم تعلقون مثل ماتحبون
** يوم الجمعه بالليل فيه 3 أجزاء
دمتم برضى الرحمـن
م
ح
ب
ت
ك
م
أنيـــ الورد ـــن
06-01-09, 06:09 PM
جديد مواضيع قسم الارشيف
العرض العادي
