السلام عليكم ورحمة الله وبركاته
صباحكم رضى ورحمة من المولى
ورقة اليوم اسمحوا لي ان اهيدها للغاليه
فروحه
وخصوصا انها تتعلق ببطلها غانم << فروحة ترضيه لس يالزعلانه
:
:
~~ْْْْ الورقة الـرابـ14ــة عــشــرة ~ْ~ْْ:
:
||| تــــــــوتــــــر |||
:
:
~~ يوم الأثنين " الظهر " ~~
~~ غرفة غانم ~~
:
:
على سريره ايتقلب ماجاه نوم
يشوف الساعة باقي وقت على صلاة العصر
يبتسم وش سويتي فيني يـأمل !؟
معقولة حبيتس قبل ما أشوفس !؟
ياخوفي لا عشت معس يطلع كل اللي قيل عنس تمثيل قدام الناس
لالا مهوب معقول !! الواحد بيمثل فتره بس مهوب على طول
يتذكر كلام جمله
غانم: أوصفيها لي
جمله وهي تقعد جنبه : للحين ماصارت مرتك كيف أوصفها
غانم يطالعها بـطرف علينها : إذا لي حق بشوفه شرعيه بس وش أنسوي بأهلنا أللي كلش عيب ومايصير اتكشف على بنات الناس
أخلصي علي ولا طرشت على نجول توصفها لي
جمله : زيـــــــــن الله يعين أمل عليك
شعرها كستنائي كثيف وطويل
غانم :يعني إلى وين ؟
جمله : آخر مره شافته نجول تقول تحت ركبتها
غانم مهوب مصدق يحس انها تبالغ : يمكنها قصيره عشان كذا تقولون تحت الركبه
تضحك جمله : يعني كم اتوقع طولها؟
غانم مهوب فايق لـ التخمين : جمله بتحاكين ولا لا
جمله : زين , طولها اتوقع 168 سم يعني حروتها لنها أطول مني
وجسمها مشاءالله ملفوف وعليها معزل يجنن
وبياضاها حلو يعني بلون نجول تقريباً أذا مهوب أفتح شوي
:
ينتبه من تفكيره على صوت آذان العصر ينقز بفرحه
إن الوقت عدى وجا العصر
:
:
~~ نفس الوقت غرفة سلطان ~~
يلعبون بـالسوني" مبارة كرة قدم "
محمد : سلطان ياخي سكوت أبوي على ان الرياجيل بيجونا ذا الليل
ولا اعترض ولا سوى فلم مع جدتي
مايشككك انها بيسوي مصيبه !؟
سلطان وهو يسدد هدف على فريق محمد : يعني وش ممكن يسوي ؟
قل توقعك
محمد وهو يصد هجمات سلطان : ياخي عطني فرصة أسجل قول وسط ضحك سلطان عليه , شوف ما أتوقع مايواجهم يعني مهوب مسوي حركات أفلام ويطلع من البيت قبل يجون
بس ممكن يقول البنت عيت وحنى محنا بقادرين نكذب أبونا قدام الناس
سلطان يهز رأسه بمعنى كمل
محمد وهو يزم شفايفه بتفكير : ممكن يقول انها مخطوبة وماتجوز خطبه على خطبه
وش السواة ياسلطان ؟
سلطان يحذف يد السوني وبهمس: الحل ياخوك اللي سويته أنا وإخوانها من الرضاع
وبتشوفه لـ جاوا الجماعة المغرب
محمد بهمس مماثل لهمسه: يعني منتب معلمني ؟
سلطان يـأشرله على الباب ففهم محمد أن ممكن أمه اتنصت وتخرب كل شي
فلازم يحذرون
:
:
~~ نفس الوقت بيت سعيد بن علي ~~
:
شيما تسكر التيلفون بعد ما انهت مكالمتها مع أم عوجان
تماضر بفرحه : يمه صدق عموه بتتزوج
شيما اتنهد : أن شاء الله يتم ولا يخرب ابوس ولاعمس الموضوع
تماضر تنطفي الفرحه في عيونها : يمه ليه ابوي وعمي ماراح يتممونه!!؟
مهوب هم مايبونها ومطينين عيشتها دوم خلاص يخلونها تعرس ويفتكون منها وهي والله اللي بتفتك منهم
شيما وهي رايحه للمطبخ : هذا تفكيرس أنت لكن هم مخوخهم مقلوبة الله يعين أمل ويفرج عليها
قومي معي أنسوي كم طبق حلو نوديه معنا يمكن جدتس يجونها حريم جماعة الخطيب وأمل ماتقدر تضيفهم والعله مريم يمكن تفشلها قدامهم
وبنروح لهم ولو أني ما أداني بيتهم ولاعيشته اللي من مال عوجان الحرام
تماضر بـ دفاع : يمه قولي مخلوط بحرام يعني حرام عمتي تاكل من عيشته وحتى عيال عمي
خلينا من عمس وعياله بنروح لهم حتى بقهوتنا وارب العله مريم تذلف أي مكان هي وبناتها
:
:
~~ العصر ~~
~~ بيت أبو فالح ~~
:
:
تركي اللي استئذن من دوامه بدري عشان يريح ومنها يتأكد من ترتيبات الخطه
يلف على أبوه اللي يتقهوى : يبه نبهت خوالي وعمي عشان نروح مع غانم اليوم
ابو فالح ينزل فنجاله : يابوك تراك جننتني كم مرة داق علي اليوم
ومذكرني , لا تحاتي قبل المغرب بيجون كلهم أبو سعد وأبو نايف وعمك حمد يتقهون عندي
وبنمشي كلنا سوى
يتنهد تركي ويتصل في فهد اللي للحين ماجاء من دوامه
: فهد بشر وش صار على الرجال ؟
فهد يركب موتره : ياخي الناس تسلم قبل
وعن الرجال ابشرك الأمور سهالات
طلع كلام سلطان صدق و له معاملتين وحده له والثانيه لولده قروض ماقروض في البنك بس في الفرع الثاني ومديره معصلق موضوعهم وكانت محتاجه دزة بسيطة
وسنعناها
تركي : يعني بيجي هو و ولده مع غانم وقت الخطبه
فهد ياخوك يمكن عقب ماخلص حاجته يقطك على حصى ولا يفتكر فيك
يضحك فهد : أجل انت ماتعرف أخوك , اسمع المعاملتين في درج مكتبي لو ماتمم اتفاقه هو الخسران
لا تنسى أنه مجرد جزء من الخطة
تركي : زين زين سكر خلني أكلم الشيخ يكون موجود عقب العشاء
فهد : زين وأنا برد على سلطان قد له وقت على الخط الثاني
سلام
:
:
~~ خيمة الحريم ببيت عوجان ~~
:
ام عوجان وشيما وأمل يسولفون وتماضر تقهويهم
أمل: توته ياقلبي خلي خديجة تنادي النوري ووريمي يقعدون معنا
تأشر لها على عيونها
امل تبتسم بحب لـ بنت اخوها : فديت عيونس
تطلع تماضر وتلف أمل على شيما
: أم علي وش قلتي على خطبة توته
شيما :والله انه ما ايتعيب ولا ينرفض بس يختي أمه عقرب
وأبوه ما ينقرب
أم عوجان بحكمه : يابنتي لاتخسرين الولد وماعليس من امه يسكن بروحه وتخلي جياتها لها رسميه ما له داعي قط الميانه بينهم
شيما : والله ما ادري يا يمه خليني أشاور عمري بعد ومابه اعجله البنت عادها ثانوية عامه وهو ماله سنتين مشتغل
أم عوجان : الله يكتب اللي فيه خير وصالح
تدخل عليهم تماضر ووجها منقلب أحمر
أمل مستنكره وشيما تسولف مع ام عوجان بهمس
أمل تقوم لـ تماضر : وش فيس ؟
تماضر تتمنى انها في بيتهم وتتخبى من الكل قلبها يرجف
من شوفته كيف وهي طايحه في حضنه
آآآآآه ياقلبي
أمل تهز كتفها : توته وش فيس وجهس مخطوف وساهمه؟
تماضر : هاه مافيني شي بس ريمي عيت تجي تبي تقعد على النت
والنوري تقول بتسبح وبتجي
أمل ما اقتنعت بكلامها بس عدتها لها
تلف لـ شيما : انتي وش عندس على ذا الحلويات اللي جايبتها
تبتسم شيما : يختي فرحانه لس ارب الخطبه تتم اليوم ولو تصير ملكه يكون أحلى وأحلى
أمل كانت مبتسمه بس لما قالت ملكه ارتعبت وبروعه : ليه العجله يختي ؟
أم عوجان: خير البر عاجله ودامس موافقه ليه التأجيل والولد ولدنا وعارفينه
أمل ما ارتاحت حست فيه مخطط في راس ذا العجوز وشكل شيما داريه به
وسليطين واللي هو وآمر به
لا يكون صدق
هاه لا لا أكيد هي بس أمنيات عند أمي وشيما
:
:
~~ بعد المغرب ~~
~~ مجلس بيت عوجان~~
:
المجلس مليان رياجيل غانم واخوانه وعمهم أبو هادي وغير عيالهم و وابو فالح واخوه وعيالهم وخوالهم
عوجان يرحب ويسهل بالحضور و متفاجىء من عدد الرياجيل اللي جايين
هذا جايب الجماعه كلهم عشان خطبه ياوالله اللي مكبر قدرس يا أمل
هه يحسبونهم بيحرجوني وأوافق لكن ماعليه , ويلف يطالع جهة اليمين يشوف تركي يسولف مع غانم وجنبه فهد أكيد خطط تريكي وفهيدان
عقب السوالف وجذب العلوم بين الحضور
أبو هادي خطب من عوجان بحضور سعيد وكل عيال إخوانها
محمد وسلطان متوقعين الرد سعيد متوتر وده يتم الموضوع عشان أمه ويتذكر كلام شيما اتق الله في ذا اليتيمه ولا تطاوع عوجان ودموع أمه
تركي ينغز فهد وبهمس : وين خويك ماجاء شفت قلت لك انت وسلطان أنه بينكبنا لكن أنتوا عيتوا لوني حابس عوجان كان أبرك
فهد بـهدوء رغم توتره يشوف سلطان هادي وهو يتكلم بالتيلفون بهمس : لا تستعجل ياخي كل شي عندك بضيقه خل الأمور ذي لي أنا وسلطان شفه هادي شكله مطمن يعني تطمن انشاء الله انه جاي
ينتبهون على رد عــوجان : والله يابوهادي اللي مثلكم ماينرد وشيباتك الغاليات أن البنت مخطوبة ولاتجوز خطبة على خطبة
تركي يتضرس وفهد يهديه: أصبر لاتخرب السالفه
غانم وأخوانه مستنكرين
أبو هادي بـهدوء وحكمة شايب خابز وعاجن الرياجيل : يــا أبوك أهلنا كلموا اهلكم ورحبوا ولانيب مكذبك لو كان به خطبه كان علموهم ولا عنونا
هنا اسقط في يد عوجان لكن الخبيث لقى له منفذ واهي
: الرجال كلمني والاهل مايدرون ولو اني داري بنية جيتكم كان علمتك ولا عنيتكم وهذا حنى كسبنا تشريفكم لنا وجمعا ذا الوجيه الطيبه وفي قلبه الودره
ابو فالح : اقول يا ابو علي من اللي خاطب عندك
عوجان بثقه مزيفه : شويمي بن مبارك
ابو نايف بستنكار : منهو خاطبٍ له أصغر عياله معرس وعنده ثنتين
غانم توتر ورجفة خفوق تخشى ضياع أمله في أمل أيعقل بعد هذه اللهفه وقبولها بي
ايتلاعب بنا هذا ,أي أخ هو!! وما بال الثاني صامت !! وكأنها لاتعني له اهو احترام أم خنوع لهذا المتمثل برجولة مزيفه
لـف لـ تركي بتوتر
: وش العلم؟ الرجال ذا وش يبي يوصل له ؟ ياخي عندي أحساس انه يساوم عليها !!
تركي بهدوء تحته توتر كبير : ماعليك منهم بيتم الموضوع ولانتب طالع الا متملك بعون الله
هنا رقص قلب غانم فرحاً بأن تكون له من الليله وليس مجرد خطبه ولكنه رجع وعبس بعد أن ركز في كلام عوجان للتملص من خطبتهم ولولا ان عمه واخوته فرحون بطلبه للزواج وموافقته لـهذه الفتاة وإحترامهم لـ سلطان المضيف لهم أكثر من أبوه فنعم الولد ولانعم لأبيه
يـأشرتركي لـ أبوه بـا أن تكلم ولا قل بنخيرها ونشوف رأيها
فهد يـطرش مسج لسلطان : الرجال ماجاء ؟
مسج سلطان
" لا تحاتي شوي ويدخل كان عندهم رياجيل وتوهم ظاهرين منهم "
تركي ماقدر ينتظر رد فهد
توه بيتكلم الا بفتحة الباب
...: السلام عليكم
:
:
~~ قبيل آذان العشاء ~~
في خيمة العجوز أم عوجان جوزة بنت سلطان وبناتهاوضحه ونوير وموضي
أمل فرحانه بجمعتهم : لا لا الليله غير عن كل الليالي الحبايب مجتمعين
وتلف لـ شيما : والله وجهس خير علينا ياأم علي جيتي وجونا كل الحبايب
وضحه بهمس لـ أمها : شوفي بنت شيما لو نأخذها لفهد تجنن زين وأدب وسنع
جوزة توها بترد إلا بدخلة ام راشد وام خالد وبناتها ونجول بنت خالد
يسلمون وامل تحس انها ماتت في ثيابها من الحيا أشرت لـ شيما بطلع مقدر أقعد الله الله في أمي
وطلعت معها موضي
:
:
~~ مجلس عوجان ~~
:
:
السلام عليكم السموحه يا جماعه تأخرنا عليكم
مبارك وهو يسند أبوه شويمي الشايب المتهالك والذي لا يستغني عن عصى خشبيه بالإضافه لـ عصى بشريه يستند عليها فكيف له بزواج جديد
عقب السلام
شويمي يلف لـ عوجان وسعيد : هاه ياعيال علي أربكم تممتوا للجماعة
عوجان بفرحه ظـآن إن شويمي جاي يعترض على الخطبه ويخلصه من الحرج من شيبان الجماعه فهو لايريد خسارة سمعته النيرة بينهم : مهوب أنا إللي أعود في كلمتي يا أبو مبارك وانت خاطبٍ قبله
شويمي بستنكار تمثيلي راااائع : أنـــــــــا !!! متى خطبت عندك ؟
عوجان تروع من رده
كمل شويمي :أن كان قصدك ضحكنا يوم أقول لك وش رأيك تجوزني فماعندك سالفة تقدم شيبة عاجز من شل ثوبه وترد
زينة الرجال غانم بن راشد والله لو انه خاطبٍ عندي ما أرده واملكه في الحال حتى دون شور البنت
هنا ارتاح الحضور
وعوجان اسقط في يده بس مازال هناك كرت سؤال البنت
: دام أبو مبارك حللنا من طلبه أجل يا أبو هادي ولا يهونون الحاضرين أمهلنا بس نشاور البنت
أبو هادي يمسح لحيته : على خير أن شاء الله ووقف ووقفوا عيال أخوه
اكرمك الله يا أبو علي
سلطان : والله ماتظهرون إلا متعشين
والعشاء مستوي
رغم اعتراضات الكل إلا أنهم رضخوا لـ طلب سلطان اللي حاسب حساب يقعدون يتعشون ويتم الموضوع اليوم
أبو فالح :ياولدي يامحمد شف لنا طريق بنسلم على بنتي قبل يذن العشاء
سعيد : أنا اللي بخاويك داخل ياأبو فالح حياك
ويخاونهم أبو سعد وأبو نايف وحمد بن فالح عمها بالرضاع
عوجان قاعد على نار متخوف من ذا السلام إللي ماجاء إلا اللحين ويشوف سلطان بنظرات ناريه لم ينتبه لها سوى تركي وغانم
يشعر بأن هذا الولد متآمر مع الكل عليه
رغم أنه يفترض به أن يفخر به
مبارك بن شويمي بجانب فهد وبهمس : هاه أربنا بيضنا الوجه
فهد ببتسامه جانبيه : بيض الله وجهك وبيض الله وجهي حضّر بكره الساعه 10 عند مدير بنكك بتلقى المعامله خالصه
:
:
يتبع
02-06-09, 09:40 AM
جديد مواضيع قسم الارشيف
العرض العادي
