[ مساء// صباح ] الــورد
أحبتي ..اخياتي الصغيرات عمراً والكبيرات قدراً..
اتقدم بخطى متعثرة خجلى..
لـ أضع بين أيديكم سطور متواضعه لـ أقصوصة ..اتمنى ان تنال إعجابكم ..
لا تبخلوا علي بـ إنتقادكم قبل مدحكم ..
:
:
إهــــــداء
(1)
لحبيبتي ..اختي الصغيره وابنتي الكبيره ..
لـ من قرأت سطوري قبل ان تظهر للعلن
لـ من اصرت وطالبتني باكمالها وإظهارها للنور
ابنة اختي الغاليه " ن "
(2)
لــ الحبيبتان ..
المشاكستان ..صاحبات أغرب عداوه في الحياه
زارا & فروحه
همسه " فروحه ..هي ..المساند الثاني والمشجع لـ ولادة ابنتي بين يديكم "
(3)
لـكل بنات الــ مقلط ..
أمنياتي للكل بقراءة ممتعه ومشوقه
:
:
:
:
[[ وريقات.. ألمـ .. تـنبض.. بـ الأمل ]]
لـ اجل طلب الغاليه ..مذهله...وعشان راحتكم احبتي ...بحط لكم روابط الوريقات ..
الورقة الأولى وريقات الم تنبض بالأمل
الورقه الثانيه وريقات الم تنبض بالأمل
الورقه الثالثه وريقات الم تنبض بالأمل
:: الــ ورقة الأولى ::
~ ~ مــواقـف ’’’ لاتنسى ~~
إذا لم تستطع أن تنظر أمامك لأن مستقبلك مظلم
وإذا لم تستطع أن تنظر خلفك لأن ماضيك مؤلم
فانظر إلى الأعلى تجد ربّـــــــك... تجاهـــك
إبتسم.. فهناك من..
يحبك.. يعتني بك.. يحميك
ينصرك.. يسمعك.. يراك
إنه.. الله
ما أخذ منك إلاّ ليعطيك
وما أبكاك إلاّ ليضحكك
وما حرمك إلاّ ليتفضل عليك
وما ابتلاك إلاّ لأنه يحبك
:
:
:
~~ الساعه 10 الصباح في مكتب شركة الـ ...للتجاه والمقاولات ~~
يا الله وش السواة اللحين انا اجلت سالفة العرس بكل الطرق وعمري قده بيصك الاربعين ومالقيت لي حل والعجوز جننتني ببكاها ..[ تذكر شكل امه وجدته ]
السلام عليكم ..يا الله صبحهن بالخير ..
ويدنق غانم على راس جدته وأمه
وينتبه لعيون أمه اللي محمره وجدته تمسح عيونها بطرف ملفعها ..
قبل لا يقول لهن شي التفت على شاشة التلفزيون قال اكيد سامعه لها قصيد وجر صوت وهيضها شاف القناه على الجزيره مهيب على الواحه ولا الساحه << يا الله سترك من بكاهن على ذا الصبح
جر دلة القهوه من يد امه قال افا وانا ولد راشد تصبينها علي لا انا اللي اقهويس انتي والشيخه ام راشد
ويمد الفنجال لجدته ثم لامه
اقول يا أم راشد علامها عويناتس انتي وام خالد عسى مابه خلاف
هنا انفجرن الثنتين يبكن
ارتاع غانم ما عرف يسكت من فيهن قام وحب راس الثنتين وايدينهن قال افااااا ياذا العلم وش فيكن يا تاج راسي ليه وش الجاري
امه وهي تناشق وتمسح خشيمها بطرف جلالها تبي تعرف ليه انت السبب << تغير وجه غانم وبهت لونه...ولاعاد ثبت في باله موضوع اللي ممكن يسوي بهن كذا..ثم
رد بصوت ثقيل وجاد ...وش العلم يمه ...كملت الجده اليوم الفجر اخوك خالد جا عليه ولد وسماه غانم قطع عليها وهو يبارك بفرحه لكن كلمت جدته جمدته وجمدة الفرحه /
كل اخوانك شفنا عيالهم حتى اخوانك وخواتك اللي اصغر منك وانت قد الشيب خاط عارضك ولاهامك شي تبي تسوي مثل جار عمك اللي كلاه الخلا ولا نفعه لا ولد اخو ولا ولد عم تدري وش قومه قومه يومنه خبل همل عمره ولا اعرس يجيب له ولد ولا بنت يقوم فيه ولا يرد عليه الصوت
قام غانم وهو متكدر من ذا الاسطوانه اللي ماتنتهي وتزيد مع قدوم أي مولود لاخوانه ولا حتى لعيال عمه
امه تناظره بعين رجاء
الله يرضى عليكن ماله داعي ذا الحزن والبكاء وعيال خالد وعامر عيالي ..
قطع على جدته قبل اتكلم ...يا الله يالشيخات انا ظاهر للمكتب تامرني بشي قالن بصوت واحد تدري وش اللي نبيه << ابتسم غانم بوجع وقال بخاطره وانا وش ابي بذا الكلمه والله اني جبت لراسي الوجع الله يعين
قالت امه والله ياغانم لوتبي عبده ولا هوليه انا راضيه بس تعرس ..هنا انفجر غانم من الضحك قال افااا يا ام خالد ارخصتي بي ...ثم كمل بعد ما تنهد بوجع ..وانتي اللي عيتي على اللي بغيتها ...دنقت امه وهي تبكي .. حب يدها وقال ماعاش من ينزل دمعتس قومي فديتس انتي وامي سارا اوصلكن على دربي لمرة خالد ومنها ابارك لخالد
ردة ام راشد وهي ضايقه احر ماعندهن ابرد ماعنده ...مانيب رايحة معك ..افااااا ام راشد حمسانه ...قعد جنبها وقام يغط رجيلاتها ثم دنق يحبها قال يمه الله يرضى عليس خلي مني الزعل وابشري انتي وام خالد باللي يرضيكن
انتبه من تفكيره ... آآآآآآآآه اللي يرضيهن صعب ...ولا احد بداري بعلتي ...مسح وجهه وتعوذ من الشيطان ..وهو يتمتم يا الله إنك تفرجهامن عندك ..لا إله إلا انت سبحانك إني كنت من الظالمين ..
والتفت على الانتركم يكلم السكرتير يجيب له ملفات المناقصه الجديده
ورجع التهى بشغله لعل وعسى ينسى او يتناسى مثل كل مره ..
:
:
:
:
:
~~ مدرسة ...الثانويه ...غرفة المدرسات ~~
أمل فاتحه اللاب توب تعدل بعرض الدرس ومنيره جنبها تسولف كعادتها عن بيتها وعيالها وتشتكي وأمل مصغيه لها مع ترتيبها لدرسها
شوي ونطت هيا على مكتب أمل وهي تضحك تقول امل تكفين ما عورس راسس وهي تغمز لها وتشر على منيره براسها << امل حطت يدها على قلبها تقول عمى يعمي عدوس روعتيني ولفت على منيره اللي تناظر هيا بغضب وشوي تقوم تكفخها قربت منها وحبت خشمها تقول لا فديت منور ماتزعجني خصوصا لسولفة عن صفوي ومغامراتها لبى قلبها..لوت هيا اثمها وهي تقول الله لنا يعني انا اطلع منها وتنتبه على منيره تلعب لها حواجبها وتشر براسها ايه اطلعي منها نطت هيا وصارت بينهم وقالت لا وانا بنت ابوي اللحين املوه رفيقتي من حنى بزران وتجين تاخذينها مني بارده مبرده يا الله الخلا يامنور ..
أمل تضرب هيا على كتفها تقول ابي اعرف اللحين ماعادس بزر تنطين من الطاولات مايسوى علينا انس مدرسة رياضه الله يعين ابو ناصر عليس
ردة هيا ماعليس ابوناصر عاجبه ولا وازيدس انط انا واياه كل صبح العبه رياضه فتحت امل عيونها بروعه وهي تقول انتي ماتستحين على ذا الحكي .....هههههههههههههههههه منيره وهيا ميتين من الضحك على شكل امل اللي مستحيه من مجرد ذكر وحده منهم لزوجها ولا لسوالفهم معهم
ترفع منيره يدها وهي تقول يا الله يا امل جعل دور ذا اليوم تبشريني بملكتس على اللي يستاهلس وتكمل بصوت واطي وتفتكين من الهم اللي اشوفه بعيونس حتى لو ماتكلمتي
ضحكت أمل بوجع وقالت الحمدلله خليها على ربس ..والرزق بيد الرزاق مهوب بيد البني آدم ...وقفت مع رنة الجرس وهي تقول زين با الله جننتنّي وانا ماخلصت عرض موضي بتاكل قلبي ذا اللحين يا الله بقوم لثالث جعل مابه ثالث ..وشلة اغراضها متجه لمعمل العلوم ..
منيره بهمس لـ هيا ..تدرين أمل رغم هالة السعاده اللي تحوط نفسها بها والابتسامه اللي ماتفارق محياها الا ان نظرتها كلها حزن ..ومع ذا عمرها ماردة احد جاها يشتكي ولا يطلب نصح آآآآآآآه جعل ربي يزول ذا الحزن تنهدت هيا آآآآآآآآمين تدرين ما ارتاحت لا وهي بنت ولا يوم اعرست وزود على ذا ترجع مطلقه عقب شهرين وكلن يحط اللوم عليها وهي ساكته ماتبي تذكر الرجال بشي لازين ولا شين
تدخل العامله الغرفه أبله هيا ..الاداره طالبتج ..قامت هيا وهي تتأفف ابي اعرف مابه إلا هيا بذا المدرسه يعطونها حصص أحتياط
~~ جامعة قطر ...قسم الأدارة والأقتصاد ... "الـكفتريا".. ~~
ريم ونوره قاعدات يفطرن ومها مقابلتهن تراجع من ملزمتها لأختبار مادة الاقتصاد ..
نوره تدرين البارحه سمعت امي تقول لأبوي كلام عن عمتي أمل يشيب الراس ردة نوره أأأأأأأأأحسن ليت الله يفك أمي منها دامها مضيقه على أمي ..ردة ريم بس والله انه حرااام اللي انقال وكان ودي إني طلعت وقلت لأبوي مهوب صدق اللي قالته أمي بس عقب قلت أمي بتضيع فيها وبـنـتشتت ...أيدتها نوره اااااشوى انس ماطلعتي كان بتغضب عليس أمي ولا أبوي سوى شي بأمي ثم بـتندمين طــول عمرس وتدرين عاد إن الأم رضاها وااااااجب وتمط الكلمه بدلع
انتبهوا على مها اللي نزلت ملزمتها وهي تقول أنتوا ماتخـافـون الله في عمتكم
وش ســوة لكم ولا وش ســوة لخالتي عشان تحـرش أخوها عليها
ماتخافون الله يبلاكم ..........ردة ريم بدفاع وهي تشر بالشوكه عليها وإنتي وش عليس منها عمتس ولا عمتنا ثم اللي أمي ماتحبه ماااااااانحبه قاطعتها مها هذا معناه انـس أمــعــه... تشر بأصبعها بكل قهر لها ..يعني أنتي با الله ماتشوفين اللي يصير وتدرين من الظالم ومن المظلوم عمتس اللي مثل البلسم قطعتها نوره وهي تحط رجل على رجل وتكتف ايدينها ..دلاله على عدم رضاها بكلامها وأنتي وش دراس بها ماعاشت معس ولا عاشرتيها
لا والله يانوريان نسيتي وش كانت تسوي لس وانتي بزر وحتى يوم كنتي بنفس المدرسه
كيف كانت تراعيس وتحل مشاكلس وبلاويس ..نسيتي ياريم يوم جيتيها وانتي نازفه من العاده ( الدوره الشهريه ) ولابه أحد يجي ياخذس للبيت ..تقاطعها ريم افففف منس اسكتي قالت لا مانيب ساكته لأني كنت موجوده وتمنيت عمتي مثل عمتس من غير قصور في عماتي.. تذكرين يوم لبستس عباتها وودتس لمعمل الخياطه ودخلتس الغرفه الصغيره وخذت منس تنورتس اللي كلها دم تقطر على كبر مقعدتس وحتى لبسس الداخلي الوصخ وراحت بها لمعمل التدبير تغسلها على يدها ولا تأففت منها ورجعت تكويها لس وش جزاها اللي حتى ماذكرته قدام أحد ولا انتظرت منس مدح ولا شكر لكن ما اقول إلا الله يعوضها خير وحسافه قعدتي معكن يالجاحدات وعادكن بتشوفن عواقب سكوتكن عن الحق
وقامت مها وهي ماتشوف الطريق وهي تستغفر ...
أما ريم ونوره ارجعن يفطرن ولا أثر فيهن كلام مها << دائماً اعتقادهن إن رضى الأم حتى لو فيه ظلم للغير أهم ...
:
:
:
:
:
~~ بيت عوجان ..ابومحمد ...~~
~ غرفة أم عوجان ~~
تدخل أمل جايه من دوامها وادنق على أمها المنسدحه بفراشها ..وهي تمسيها بالخير
أم عوجان تفز من هوجاسها " سرحانها " ..مرحبا وش وخرس يا أمل؟ ......ردة.. أمل والله قومي زحمة الطريق وفيصل الله يهديه جنني يبي يمر الدكان ..تدخل مريم ..إيه تعذري بولدي لا تأخرتي يعني انس البريئه ..سفهتها أمل وهي تقول لـ أمها... يمه بروح أبدل واريح قبل العصر تامرين بشي ..ايه خلي خديجة اجيني ..ردة.. ابشري ...ومريم محترق دمها من اسفهان أمل لها ...وطلعت قبلها صوب المطبخ ..أمل تمشي وتضحك في خاطرها الحمد لله سبحان اللي جعل الغنى غنى النفس
تدري أن مرة أخوها رايحه تخب تغرف الغداء لعيالها وتخش الباقي في حرارات وتوديها غرفتها عشان ماتخلي لها شي ههههههههههه الحمدلله ترفع نظرها فوق وهي تردد في نفسها يا الله انك تغنيني بحلالك عن حرامك ..وبفضلك عمن سواك
:
:
:
~~ مستشقى الولاده الدور الخامس الغرف الخاصه ~~
الوقت ..{المسيان} ...قريب المغرب ..
العامل يدق الباب تطلع له سوناتي وتاخذ باقة ورد على شكل قارب وبوسط القارب الكبير مثبته شوكولاتها من باتشي ...رفعه تطلب من خدامتها البطاقه لكن نجلاء نطت قبل سوناتي تشوف البطاقه ..{ مبروك عليكم قدوم غانم جعله يغنم الخير والله يرزقكم بره
غانم بن راشد}
يمه من عمي غانم لـبى قلـبـه الـزين والــغالي مايجي إلا من الــغالي ردة رفعه الله يكثر خيره مايـقـصر خـيـره عام الكل... ويسمعون دق على الباب وبدال مايشوفون مودمي يدخل عليهم إلا بعصى أم راشد تدف الباب بها ومن وراها أم خالد اللي ماجن الصبح من كثر بكاهن.....نجول تسلم على جداتها ...وتسند أم راشد وهي تقول لها جدوه عصاس المفتاح السحري هههه..طالعتها العجوز بنظرة نقمه ..يوم شافت العجوز مهيب متفيقه لتغليساتها..تداركت الموقف .. وحبت خشمها .. فديتس وفديت عصاس .... عقب ما ادخلن وسلمن قالن لرفعه تغطي غانم بيسلم عليس ...نطت نجلاء للباب تقول هلا والله بتاج راسي وعزوتي هلا بأبوي غانم ...ضمها غانم اللي عاد عيال خالد عياله قال لبى قلبس يانور عيوني ..وسلم على رفعه وهناها بالسلامه ...نجول جيبي غنوم ..ردة ابشر على خشمي ..... عليه الشحم... نجلا اتكلم الصغير وهي جايبته الله ياغنوم بتاخذ الغلا وبيطيح كرت نجول واخوانها عند ابوي غانم ضحك غانم قال غلاس ما احد يجاريه حب غنوم وسأل رفعه خالد أذن في أذنه قالت لا والله وصانا انه ما احد يذن في اذنه الا انت ..اذن في أذن سميه وأقام في الثانيه وحط ظرف في مهوده ثم قال لهم يا الله ارخصوا لي ..التفت على امه تبون ارجعل لكم اردكم ..؟...ردة أمه لا ياقلب أمك روح لأشغالك ومجلسك وبكلم رميش يجيب الموتر عادنا ريضين محنا براجعين ذا اللحين... رد اجل فمان الله ...
~~ تحطيم روح ~~
واقفه بنص الصاله وهو طالع من قسم الغرف اللي تحت وهو يصرخ وعيونه تنطق بالشر وقفت بكل شموخ وقالت وش عندك قال انقلعي ولا اتّـكلمين على أمي ردة بكل هدوء وبصوت مليان ثـقـه لا تلعب دور البطل اعتقد إنها أمي مثل ما هي أمك فلا تسوي فيه الولد البار يمد يده بكل سطوه يبي يكفخها فصدت يده وقالت اتخسي وأنا بنت علي فـثار ولا عاد شاف قدامه ودزها بكل جبروت على الكرسي اللي قدامه وانهال عليها بالضرب بعقاله ورفسها برجله وهو يصرخ وكأنه كاتم من سنين ويبي يبرد حرته ..في اللي كااااااااانت الصدر الحنون له في ضيقه والبلسم لجروحه نسى أو تناسى لأنها ماعاد صارت على هواه اللي طامع بكل ما في يدها وما يرده شي عنه إلا قوة شخصيتها اللي يبي يحطمها ..يدخل سلطان ومحمد ويمسكون أبوهم وهم يهدونه وفيصل يجر عمته ويطلعها برى الصاله وخلاها بالمرر وهي تبكي نفسها وكرامتها اللي مرغها اللي المفروض يكون السند صار الجلاد جرت نفسها جــر وهي تدخل غرفتها ..خذت التيلفون تكلم اخوها الثاني لعل وعسى يوقف الكبير اللي انجـن عـند حده ...لكن جــات الــصدمه الاكـبـر وهو يرد على طلبها لفزعته... ماجاس حقس وتستاهلين يالكلبه ليه تمدين يدس عليه ما اضربس الا يوم حذفتيه باللي في يدس ومافاد دفاعها عن نفسها.... ردة بـصــوت مليان قهر وإحساس بالخذلان من اقرب الناس وهي تقول له ....مافزعت لي ياولد أبوي جــعـل ربي مايـفـزع لك ..سكرت عقب ما أبلعت غصتها وقالت مهوب أنا اللي تبكي ..توضت وصلة ركعتين وهي ساجده ...تدعي من قلب جريح من اقرب الناس لها
"اللهم إني أشكو إليك ضعف قوتي وقلة حيلتي وهواني على الناس أنت رب العالمين وأنت رب المستضعفين وأنت ربي، إلى من تكلني إلى بعيد يتجهمني أم إلى عدو ملّكته أمري، إن لم يكن بك عليّ غضب فلا أبالي رحمتك وسعت كل شيء ربي"
شوي الا الباب يدق ..قالت في خاطرها يا ربي اكفني شرهم بما شئت ..أول ما افتحت الا سعيد بوجها وخرت من الباب عشان يدخل ...وبكل ترفع وقسوه قال اسمعي ..أمي جنبيها ..ولا تتكلمين عليها ..ردة وأنا وشقلت أنا ماقلت لأمي شي اخوك اللي لعب براسها وكبر السالفه ..رد..مالي شغل فيكم وجعله يكسر ضلوعس مااااهميتيني واحمدي ربس متحملينس ولا أنتي ماأحد يبيس ..... حتى الرجل اللي خذاس عافس عقب شهرين .....بكل قوة ماتدري منين جاتها بس اللي هي واثقه إنها زادة ثقه بأن الله ماراح يخليها حتى لو تخلوا عنها كل اللي حواليها ...خير أن شاء الله .. أمي وبتكلم معها لأنها أمي مثل ماهي أمك... رد..بحده والله لو قالت ولا قال لي عوجان شي ازعلهم..منس .. إن اجي وافرم عظامس ردة سوى اللي تبي والله كفيل يرد عليك دامك مستضعفني فا الله بينتصر لي وماراح يخليني وهي تنظر له بنظره كلها ثقه وقوه ..إن غداً لناظره قريب ..ضحك بسخريه ..هه ما ادري منين جايبه ذا القوة ..ردة... من إيماني إن الله مايضيع الحق ...وقف وهي يقط عليها رزمة فلوس .." 16000ريال " هذا اللي كليتي قلبنا عليه ردة باالله من المجنون اللي يصدق أجار عماره في السد أغلى منطقه في قطر ..من 17 سنه لين اللحين بس ذا المبلغ..هه ليه مأجرينها بريال ..وإذا أنا طالبت طالبت بأن كل يأخذ حقه لـيـمتى وأخوك ياكل الإجار ولاعليه من غيره وأمي عشانه بكرها ساكته وتداريه ..... تلعثم وارتبك بس القسوه وحب النفس زين له الأعذار ورد لاتنسين الصيانه والتجديدات اللي سويناها وانتي وش يعرفس بذاااا الأمور ..قالت تكفى لا تحط اعذار مهيب معقوله والله لو انكم بانينها من جديد ما كان ذا الباقي من الاجار لا تحسب اني ما ادري بعمارتك انت واخوك اللي بنيتوها من اجار ذا العماره ...رد.... على تبن نسوي اللي نبي والعماره لي أنا واخوي وهذا من عندي واحمدي ربس لا أخذها بعد ....ويطلع وهو يصفق الباب ...تقعد وهي منهاره و تردد لا إله إلا الله سبحانك ربي إني كنت من الظالمين ..آآآه الله يسامحس يمه أنتي اللي حطيتيني في ذا المواقف ...وقويتيهم علي ..
ليت ولدس يحط الفلوس في خير إلا يلعب بها شي في كاسه اللي مايفارقه في ليله والباقي في بطن مرته ..وعاده حاط عينه على راتبي وكل شوي يقول ليه راتبها لها لحالها ..الله يعين هذا وأنا شاريه سياره لأمي وحاطه درويل وخدامه وراتبي رايح على الاقساط ..آآآآآآه يا الله انك تفرجها من عندك ....
:
:
:
:
:
:
~~ بعد وقت ليس بالقصير ~~
تدخل على أمها الحجره " الغرفه" وهي على سجادتها وتسمعها تدعي يارب تفرجها لبنيتي وترزقها بالزوج الصالح ..وتبكي ..دمعت عينها لحال أمها المتناقض ..يعني أمها حاسه بظلمهم لبنتها بس ليه تسكت وما توقفهم عند حدهم ليه ...ليه تساعدهم عليها ...تسلم من صلاتها ..وتنتبه لـ أمل قاعده على طرف سريرها.. قربت لــ أمها ..وقعدت عند ارجيلها ..
شلونس يابنتي اربس ما استاجعتي ..ابتسمت أمل بوجع يمه الوجع اللي بقلبي اكبر من اللي في جسمي ..الله ..تقاطعها وتحط يدها على فمها عشان ماتكمل .. وتقول تكفين يابنتي لاتدعين عليه....ردة ابشري يمه ما اقول الا الله يفرجها ... بنتي سامحيني ..وتحط جلالها على عيونها و تبكي ..ردة وهي تبي تغير مزاج امها ..افاااا يا أم عوجان أنتي ما تطلبين السماح أنا اللي اقول لس ساااامحيني ..وتحب رجلها ويدها ..تدللي ياروح قلبي وتاج راسي ..تمسح على رأسها وهي تقول جعل ربي يرضى عليس يا أمل ويوفقس ويرزقس الرجل الصالح اللي يخلصس من ذا الهم ..يابنتي والله اني صرت بين نارين ..ولا يرضيس اخـلي اخوانس يتذا بحون عشانس وهم مهما كان اخوانس ولا لس بد منهم ..أمل ساكته تبتسم لامها و بخاطرها ....يمه عيالس ماهميتهم وكل واحد منهم مــان بوجودي عنده ...آآآآه طلعتيني من بيت أبوي عشان ولدس طمعس بأنه يأجره وفي الأخير حوله دكاكين وكلى الإجار ..ماكفته العماره ..وعيشتيني عنده وزود على ذا يبيني اصرف على بيته عشان يفتك..ههه وعياله يجمعون رواتبهم للسفرات واللي يبي يجمع مهر عروسه.. انتبهت من تفكيرها ...على هز كتفها ..بنتي وش فيس .. ابد سلامتس مافيني الإ العافيه ...تامريني بشي ..بقوم أكمل شغل المدرسه..ما يامر عليس ظالم قومي فديتس ..وسنعي شغلس اللي مغنيس عن الناس ..
:
:
:
~~ غرفة أمل ~~
منظمه جداً ..كل جانب فيها ينطق بشخصيه قـويه مفكره ومنظمه ..جالسه على كرسي مكتبها وتضيف الرتوش الأخيره ..لورشة العمل اللي كُلفت بها من توجيه العلوم لمدرسات ثالث ..للمنهج الجديد المطروح وكيف يتعاملون مع برامج الكمبيوتر لمجاراة بعض التجارب اللي مهيب متوفره أدواتها في المعامل ...وفي قمة تركيزها ما حست بنفسها وهي تفتح ملف ثاني خاص جداً [ أمـ مجروح ـل ] وتكتب بكل سلاسله ..ودون وعي..
ابــسألك يا دنيا...؟
ليــــه الأمانة بالقلوب في زماننا تحتضر ..!
وليــــه المحبة والمودة تنداس بأقدام البشر ..!
وليــــه الصداقـــة ذابلة ومن الخيانة لا مفر ..!
و لامن زرعــت الخيـــر في الدنيا يحاصرك الخطر ..! ..؟
ليــــه نلقى في زماننا جروح وأحزان وهموم ...!
ليــــه التفاؤل والفرح يبقى ثواني ما يدوم ..!
ليه العيون الخايفة ..!
وبعض المشاعر زايفة ..!
ابســـألك....ياادنيــــــــ ــاا..؟
ليــــه دايم ننتظر ...!لين آخر هالعمر .!
حتى الصبر
مل واختار السفر ..!
وما بقى إلا الهموم .
مكتوبة لك طول الدهر ..!
ابســـألك .. ... ياادنيــــــــاا ..؟
دامك الدنيـــا..ابسألك ..!!
يمكن ألقى منك جواب
أو يمكن بس أفهمك
أني تعبت من الهموم
وكل جرح من جروحي يعلمك ...!
انه تعود علـى العذاب
وابســـألك....ياادنيـــــــ ــاا ..؟
ليــــه في كل ابتسامة ألقى أمامي دموع ..!!
وكل دمعة من دموعي تطفي شمعة من الشموع ...!
وليــــه أرحل دام همي هو همي ...!
ما يتغير وما يزول ..حتى لو حل الفرح هو ثواني ما يطول.. .
ابســـألك.... ياادنيــــــــــاا..؟
دامك الدنيا....أكيد عندك جواب
لكل سؤال وكل عتاب ....!!
ابســــــألـــــــــــــــــــــــــك ... ؟؟؟؟؟
فهمينــــــــــــي.. !!!
بس سؤال وصارحيني.....كل الناس مثلي
أو أنا وحدي.....همومي تسري فيني
جاوبيني.. يا دنيـــــــــاا ...! ..
( ويبقى السؤال بلا إجابه ) لـيــه في كل ابتسامه ألقى دموع !!
:
:
آآآآه وش السواة كل ذا الضغوط منهم يبوني أوافق على الشيبه اللي هم فرحانين به مهوب حرام عليهم يبوني ادفن روحي مع شويمي بن مبارك ولا شلويح بن ظافر اللي محرول واللي ايتعكز له على عصى وعطره فقس من كثر الاوجاع ,,آآآه ولا اللي مايلبس حتى السروال من كثر الحكه ودوم هبابي ترفع عينها لفوق وبعين الرجا .....آآآآآآآآآآه يارب وش حيلتي غير اني ارجاك تخلصني من القوم الظالمين ... نزلت نظرها وبالها رجع لأسبوع مضى ..هه يوم قلت له بنتك عندك جوزها اياه قال بنتي بنت ولا أنتي مطلقه احمدي ربس ...ووافقي برضاس قبل.. اغصبس ..ردة تدري انك ما تقدر واني بفضحك لو سويتها ..ولا نيب ساكته لك كثر ماسكت وأنت داري بعلومك وسواد وجهك....رد بضيقه وخوف حد يسمعها على تبن ...يا الكلبه ..تعوذت من الشيطان شافت الساعه وحده الفجر ..قامت ..وهي تردد "اللهم أجرني في مصيبتي واخلُفني خيرا منها" وصلت ركعتين قبل تنام ..موكله أمرها للي بيده الأمر ..
:
:
:
12-12-08, 10:54 PM
وريقات الم تنبض بالأمل
جديد مواضيع قسم الارشيف
العرض العادي
