~~ الجمعه " الظهر " ~~
~~ بيت فالح ~~
:
:
فالح ينسدح على السرير بالعرض ويصوت : هيااااااااااااا
ياهياااااااااااااااااااا
يجي نصور يركض : بابا ماما تعثل عبود وث تبي ؟
فالح : زين يا سكرتير الماما تعال امش على ظهري
فرح نصور يركب السرير بصعوبه شوي لأنه عالي وينقز على ظهر فالح
فالح :آآآآآآآآآه يا بوك قلت أمش مهوب انقز
نصور وهو مواصل المشي وشوي ينقز : ذين , بابا ابي الوح عند ددي
فالح : زين بوديك العصر , بس قم من ظهري كسرتني
نصور ينقز : ذين بث وين تكثل بثوف
فالح يضحك : وانت كل شي تبي عليه دليل , امش خلنا نروح لـ أمك
نصور : لا لا انا بثوف الكتون في التفثون
:
:
~~ غرفة نصور وعبود ~~
ملاصقه لـ غرفة فالح ولها باب جانبي يفتح على الغرفة وباب على الصالة
فالح يفتح الباب الجانبي بشويش ويراقب هيا وهي تنوم عبود
فالح بــهمس: اخلصي وتعالي سوي لــ ظهري مساج
هيا وهي تلحف عبود : مانيب مسويه لــك شي لين يرقد نصور
فالح رافع حاجبه : وليه ان شاء الله ؟!!, وش دخل نصور في الموضوع ؟ وإذا سويتي لي وهو واعي ولا حتى قاعد عندنا
وش يمنع !!؟
هيا تــلف عليه :
أولاً :المساج عندك ممكن يقلب شي ثاني
ضحك فالح : وش اسوي إذا لمسه منس تشفيني وغمزه لها وتوه بيكمل قطعت كلامه هيا
اللي أحمرت من نظراته وماتبي نصور يفجأهم وأبوه متهور بحركه من حركاته
ثانياً ولدك قليل الأدب يسولف عند الناس
ويقول وش شاف في البيت ووش يسوون أبوه وأمه
فالح : يعني وش سولف به وضحي أكثر
هيا تعلمه بالسالفة
يلف فالح لـ نصور اللي داخل من باب الصالة وشكله متروع : تعال , متى سألتني وقلت لك ذا الشيء
نصور يبلع ريقه من الخوف : هاه , بابا أنا ثألتك اول هاه ليه اللدال يبوث المله "المره" منا ويأشر على شفته
انت هاه دلت لي هاه لأنه ذوذها
فالح بــهدوء رغم انه ماسك ضحكته على ذا البزر الفضيحه :
زين بس انت تقول للناس انك شايفني انا وأمك
صدق ذا الشي ؟ ومتى ؟
نصور يبعد شوي : ذين أدول لك بث ماتضلبني أنت ولا ماما
فالح يطالع هيا بمعنى أيه : زين ماراح أضربك
نصور يقعد على سريره متربع :
أول أنا تنت حايف في الليل وديت علفتكم وثفتكم بث انتوا ما ثفتوني
هيا وهي مرعوبه انه شاف أكثر من اللي قاله وبهدوء عكس الإعصار الغاضب في داخلها :
وعقب وش سويت ؟
نصور يهز كتفوه : ما ثويت ثي
هيا : يعني بس هذا اللي شفته
يأشر برأسه أيه
ترتاح هيا : زين أنا كم مرة قلت لك أذا أنا وبابا في الغرفه ما تدخل لين ادق الباب
فالح وهيا يحاولون يفهمونه لكن نصور يشوف نفسه ماسوى شي غلط
ليه يقولون له انه غلطان وليه يقولون له قليل ادب
ويمنعونه يدخل غرفتهم
فالح راح للغرفه وترك هيا تكمل مع ولدها
: اسمع وعدناك مانضربك بس مهوب معناه انك ما راح تتعاقب
فاهم
نصور بعصبيه: ماما حلاث مالح ادول ثي ذين وما ابي علفتكم ذين
هيا تمط أذنه بشويش: لا عاد ترفع صوتك
وعقاب لك محروم من فلم الكرتون اللي تحبه
وكبت العابك كله ترتبه وافتحت الكبت ونثرت اللي فيه
بروح عند أبوك وبرجع لك عقب ساعه تكون خلصت فاهم
ولو بكاء أخوك دق الباب ونادني فاهم << رغم انها مشغله الجهاز
بس تبي تفهمه أنك لو بغيتنا ضروري لاتسوي فيها زعلان وماتجي
:
:
بـــعد فترة ..
تدخل هيا الغرفة تتفجأ
باللي مجهز شنطته [ الشنطه اللي تحطها هيا لـ عيالها اذا بيروحون بيت جدانه ]
ويدعس ثيابه بدون ترتيب ويحط فلم الكرتون اللي يحبه داخلها
ودموعه اربع اربع
هيا كسر خاطرها ماتحب تشوفه يبكي
نصور عنده عزة نفس كبيره بس لازم يتعلم صدق تحس إنها هي وفالح الغلط عليهم أكبر , تقرب منه : نصور وش فيك ؟
تفاجأت بـ الهجوم مسح دموعه وبزعل : أنا حلااااااااااااااااااااث ما أبيتم ويشهق
أنا موولدتم انا بلوح عند ددي
انتوا ويشهق تله اتهاوثوني وادولن انا عليل أدب حلااااث انا ما ابيتم بلوح عند ددي وعند تكي هم بث يحبوني انتي وبابا تحبون عبود انا حلاث ما ابيتم انتوا ماتبوني حلاث انا بعد ما أبيتم
هيا تحاول تضمه لكنه ايتفلت منها
انا ما ابيث لوحي عني
يدخل فالح على صوت نصور الباكي المجروح في كبريائه كيف ينهان
: وش فيكم ؟
نصور يركض لـ أبوه وبزعل : بابا انت ثح دلت بتوديني عند ددي العثر حلاث اللحين العثر ابي الوح عندهم
ينزل فالح لـ مستواه : زين يابابا بوديك لأني وعدتك بس ليه الشنطه
هنا نصور دموعه تنزل بصمت يمسحها : ويأشر على امه ثحبت ويأشر على اذنه وحلبت ألعابي وماحلتني اسوف الكتون ليث انا مو ولدتم؟
حلاث أنا ما ابيتم ابي ددي وصاح صياح يقطع القلب
يضمه فالح : أنا ابو ناصر ولا يهمك نوديك بيت جدك بس ترجع معي يأشر براسه المدفون في صدر أبوه بمعنى لا
فالح :زين اخليك الليله تنام عندهم بس بكره أخذك لأني ما اقدر اعيش من دونك انت ولدي الغالي
يبعد وجهه عن صدره ويمسح دموعه : ولا عاد اشوفك تبكي إذا عندك شي تعال قوله لي مهوب أنت رجال
يأشر براسه ايه
فالح :خلاص تعال وكلمني
وأمك حتى لوضربتك هي تحبك
هنا لف نصور وجهه بزعل
فالح يلف وجه نصور له : أمي وأنا صغير لما اغلط تضربني وماكنت ازعل
يلف له نصور بتعجب كيف ابوه ينضرب : ددوه تعلف تدلب
يكمل فالح :وحتى تركي بعد اضربته وما زعل مثلك
هنا حس نصور بتعجب أكبر : والله بابا ددوه تدلب تكي
حس فالح انه جذب انتباه نصور خصوصا بسيرة حبيبة تركي
يوقف فالح : نصور بروح أصلي العصر وارجع القاك جاهز ونكمل سوالف الرياجيل بروحنا في السياره ولا رحنا بيت جدك اسأل جدوه عن اللي قلت لك
نصور بفرح :ذين
يركض يسحب شنطته من جنب أمه
وهو عافس وجهه بزعل منها
تمسكه تضمه وتمثل البكاء: نصور لاتخليني
نصور يبعد عنها ويركض للباب وقف ولف عليها شافها راسمه الحزن على وجهها : حلااااث لا تبتين بديكم بكره
ويروح تحت ينتظر رجعت ابوه
:
:
:
~~ بيت أبو فالح ~~
~~ المقعد ~~
أم فالح وأبو قالح يتقهون فهد منسدح على الكنب ولاف غترته على وجهه وتركي يقرأ مجلة علميه وثامريشوف التلفزيون
يدخل نصور يركض لجده : أنا ديت
ويسلم عليهم
وعقب يركض يسحب شنطته اللي حطها أبوه عند الباب
يضحك ثامر على شكله : وش ذا الشنطه ؟
نصور ببرأه : هادي سنطتي بنام عندتم
فهد بتأفف : وش ذا الازعاج ؟ وش مجيبك اليوم يانويصر اليوم جمعه إجازة يعني نرتاح منك , ويقوم يسلم على فالح
نصور يقعد بين جده وجدته : انا ديت بيت ددي وبدعد عند ددي
مث عند فحد
تركي يمد يده لـ نصور : تعال عندي بتنام مع تركي وش رأيك؟
ينقز بفرح
نصور يلف يشوف حد منتبه له شاف أبوه يسولف مع جدانه وفهد رجع ينام
: تكي أنا ديت عندتم هاه عثان انا ذعلان على بابا وماما
ويتعبر وتتجمع الدموع في عينه
تركي يشيله ويوديه معه فوق
تركي وهو يرقى الدرج :وليه زعلان ؟
نصور بعيون دامعه: أدول بث ما أدول لبابا
يوعده تركي
ويكملون مشي لغرفته
~~ غرفة تركي ~~
تركي أنب نصور على انه يتلصص على أمه وأبوه
وعيب ينقل الكلام ولو انه فرحان باللي قاله لـ موضي
وطبعاً نصور أي كلام يقوله تركي صح وغيره لا
تركي بحذر : نصور تحب موضي ؟
نصور وهو يلعب في عطور تركي : ثرت أحبها عثان هي ثارت عروثت تكي
ويكمل سوالف معه وكل شوي يدخل أسم موضي يبي نصور يسولف عنها
~~ العصر " المسيان "~~
~~ خيمة بيت عوجان ~~
البيت خالي مافيه إلا أم عوجان وأمل وسلطان
قاعدين حول الدوه وسلطان يسولف لـ جدته عن المطر اللي نزل على الشمال ويحاول فيها يوديها ثاني يوم اتفرج تمشي بس في السياره وهي معيه
سلطان يـلف لـ أمل : ولا عليس أمر صبي لي حليب
تصب له
وتصب لـ أمها فنجال منه: يمه ذوقي حليب غنم بالزنجيل مثل ماتحبين
ام عوجان سافهتها سلطان يغمز لـ أمل وياخذ الـ فنجال ويمده لها: أن ماشربتي منه مانيب شارب وأنا خاطري فيه
تاخذه منه
أمل بـ بنبرة عتب : الله يسامحس ماتاخذينه من بنتس الوحيدة الصغيره
وتاخذينه من ولد ولدس
يدخل في ذا الوقت محمد
من عند الباب : عمه تكفين جويع خلي حد من ذا الخدامات تسوي لي عيشه خفيفخه
أمل بحنان : تعال ياقلبي شف حرارة الفطاير جاهزة لعيونك
تلتفت له العجوز : وش قومك ماتغديت من متنك ماتاكل عيش ولا صالونه
يضحك سلطان : ماعليس منه لو انه جويع وقتها كان ماخلا لنا شي في الصحن تلقينه ماكل له شي هنا ولا هناك
محمد سافهه وياكل ويأشر لـ أمل صبي لي حليب ولا شاي
سلطان يجر منه المله : اشوف عطني منها شهيتني ولو أن بطني متروس
تضحك أمل وهي تتفداهم
تلتفت لـ أمها شافتها مبتسمه قربت منها وهي تمد لـها فطيرة صغيره : يمه تبين وحده خابرتس تحبين السبانخ
ادز يدها أم عوجان : ما أبي منس شي .
أمل بــحزن : يمه تكفين لا تزعلين علي تمسك يدها تبي تحبها لكنها ماخلتها جرت يدها منها
أم عوجان : لــو أنس تبين ارضاي كان وافقتي
أمل تنظر لــ هذه الكبيرة التي هدها المرض والحزن
تعلم أنها تخشى عليها من جبروت أخوتها ولكنها خااااااااائفة من الإقدام على تجربة جديدة وبالأخص أنه لم يتزوج وقد قارب الأربعين
فقد يعني ذلك أن له مغامرات نساااائية او سهرات ليليه كــعوجان أو ......
ما أنكر استخرت وارتحت بس بعد خايفه
يقطع تفكيرها سلطان
: أمــل
أمــــــــــــــــل
تنتبه : لبيه , وش فيك الله يهديك تصارخ
أم عوجان بضيقه : قومه يوم أنس ماتسمعين لو أنس معنا كان انتبهتي له وهو له ساعة يمد لس البيالة وانتي في هوجاسس
تبتسم أمل : فديت بنت مبارك "ام عوجان" اللي ضايقه على بنيتها ودنقت حبت رجلها
زين يمه امهليني الليله بس اصلي استخاره وبكره اقولس رأيي
ام عوجان : أبيس توافقين عليه وتعبر وتمسح دمعتها بطرف ملفعها
يابنتي والله من خوفي عليس وهذا سلطان يمدح الرجال ولا فيه عذروب
سلطان يتدخل : والله يــا أمل مابه حد نشدته وذمه وكلمت ثلاثه يشتغلون معه وبرتب مختلفه كلهم يمدحون أخلاقة وطيب فعله
حتى حارس المبنى يمدح تواضعه معه
يتدخل محمد : والله ياعمه لو تشوفين كيف عيال اخوانه يبجلونه مهوب بس يحترمونه لو يزعل على واحد منهم تقولين ميت لهم واحد ولا طايح في مصيبه من قد ماهو غالي عندهم
يقطع عليه سلطان : وتراه خوي أخوس تركي القريب ويعرف خفاياه كلها وأن كان تركي فيه عذروب فـهو كنه أياه
أمل في خاطرها : حتى عايض كان رفيق تركي ولا عرف بالخافي عنه
واستمرت معلقة المدح في غانم من أم عوجان واحفادها
:
:
~~ يوم السبت ~~
~~ بيت ابو سعد ~~
مع بداية شروق الشمس
موضي في حوش البيت لابسه قبعه شتويه وسكارف ملفوف على رقبتها
وبيدها كوب كرك سااااااخن
تتمشى بين الورود اللي ماليه بها المساحه الجانبية للحوش وما تبان لـ غرفة السواق
وشجرتي السدر العملاقتين تتوسطان المساحه لتفرد كل منهن فروعها المليئة بالاوراق فمكونه مظله طبيعية لكراسي الخيزران أسفلها
يصل لـ تيلفون موضي مسج
من أمل
" إذا واعيه كلميني يامدام تركي "
تتصل
امل : السلام عليكم , صباح الورد ياوردة تركي
موضي تلوي بوزها : وعليكم السلام , وصباحس أحلى من الورد ولا عاد تطرين علي اخوس الشين من صبح خليني استمتع بصباحي عادني ماجيته لاحقه على تعكير المزاج
امل تضحك : بنشوف يامويضي والله ان تموتين هذا اذا ما انتي ميته في دباديبه
موضي وهي تقعد على واحد من الكراسي : عشتوا عسى ماشر وش شايفه اخوس لايكون توم كروز ولا مهند
أمل : الله يلوع كبد العدو وش ذا التشبيه اسم الله على اخوي إلا أزين منهم وأرجل منهم
موضي بتأفف : زين خلينا من سيد زمانه ما اعتقد متصله عشان تعددين لي مناقب عنتر قصد تركي
أمل وهي تفصخ جلال صلاتها بعد ماصلت صلاة الشروق : ايه ياقمر تذكرين الدكتورة ناديه رفيقة خالتي ام سعد " أم موضي "
موضي تحاول تتذكر : ايه اللي في الاستشارات العائليه
زين ذكرتيني بها والله من زمان مانشدت منها وهي ماقصرت مع أمي يوم توفى سعد وحتى معي يوم توفت أمي وغصتها العبرة
أمل ماتبي موضي تسترسل في الذكريات الحزينه : موضي بقول لس شي بس لا تضحكين
ضحكت موضي : ههههه زين بضحك قبل ينفع
امل تبتسم : الله يعين تركي عليس
موضي بتحذير : وش قلنا لا تخليني اسبه ولا تدرين جعل ربي يرزقس بواحد مثله غثيث
تضحك امل : شكل ربي استجاب لدعوتس , وعلى الطاري ترى تركي يقول قولوا لموضي تضعف ههههه يحسبس للحين دبه مايدري انس مودعه المتن من عمرس 15 " تدري أن موضي انتفخت من الضيقه على تركي "
المهم يقول لس مهوب مستعد يخلص راتبه على كرشس
موضي ترفع حاجبها وبضيقه : وجــــع زين وعنادِ فيه بـاامتن ما أحد قال له يخطبني وتستدرك
وهي تتذكر جملة أمل الأولى وتنزل كوبها على الطاولة : صدق انخطبتي , آآآه يالخاينه ومخبيه علي , زعلاااانه منس
أمل تضحك وهي ترجع تنسدح على سريرها : ابي اعرف انتي بالعه راديوا , اسمعي
اخطبت العجوز ام راشد ومرة ولدها ام خالد بن راشد ال... عند أمي لـ ولد هم غانم
تقاطعها موضي : عم نجول بنت خالد
امل : ايه خليني اكمل يالملقوفه
تضحك موضي وتكمل : شكله عاجبس وتبين تمدحينه ههههه بس تدرين والله أن نجول تمدحه تقولين ابوها مهوب عمها
ادري متصله تاخذين رايي عني اقول لس يالهبله وافقي ولا تسوين لي حركات الافلام المصريه مدري السوريه
وانا تعقدت وخلاص مش عوزه اتقوز وخايفه اعيد التجربه
يعمي عيشي حياتس
تضحك أمل: زين يعني رايس اوافق ؟
موضي بــ أنفعال الفرحان : أكيــــــــــــــــــــــــــــــد
وافقي ياقلبي والالب داعي لك
أمل بلعانه : موضي تراه رفيق تركي يعني مثله
موضي : اجل لاتوافقين اكيد بيكون غثيث مثله
واستمرت السوالف والضحك بين الصديقتين وفي الاخير خذت امل رقم الدكتورة ناديه لـ شيءِ في نفسها
:
:
~~نفس اليوم الـساعه 10 صباحاً ~~
~~اتصال هاتفي بين الدكتورة ناديه وأمل ~~
بعد السلام والسؤال عن الاحوال
أمل بحرج : دكتوره ناديه ممكن اطلب منس طلب ويظل بينا
دكتوره ناديه بـود كبير فهي محبه لـ أمل : آمري يابنتي
أمل : أنا متقدم لي واحد الكل يمدحه وأنا ما أبي أعيد تجربتي السابقة وتنتهي بالطلاق لأسباب كان أهلي يجهلونها في المتقدم مثل اللي قبله رغم قرابة الأول والثاني اللي حالياً متقدم
دكتورة ناديه بــهدوء: والمطلوب
أمل : أنا اعرف من خلال كلامس عن الاستشارات العائليه انه من ضمن عملكم مساعدة البنات للسؤال عن المتقدم لو افترضنا احتاجت منكم خصوصا في مثل حالتي مطلقة وخايفه من الإقدام على حياة قد يكون مكتوب لها الفشل
دكتورة ناديه: طيب عطيني الأسم وبالكثير أسبوع ويكون عندك الخبر عنه بـأذن الله
أمل بـ رجاء : لا تكفين أبيه قبل, أمي مصره أوافق بناءً على مدح الناس للرجال وصفاته اللي عاجبتها
تكفين أبي سبب يمنع الزواج الكل يذكر لي أسباب للموافقه
دكتوره ناديه بتفهم: طيب أنتي عارفه اليوم إجازة يعني على الاقل 3 أيام وبحاول من اليوم اكلم أستاذ فيصل ال ..و....
وأن شاء الله مايقصرون ولا تخافين المواضيع عندنا سريه
امل بــ راحة : الله يجزاس خير يا دكتوره
دكتورة ناديه : أمل ممكن تقولين لي ليه تطلقتي ؟ ويخليس خايفه تعيدين التجربه
أمل بود وحذر: ليه ما اقدر أقول لأنه سبب يخصه وأنا ماأقدر أتكلم في شخص انتهت حياتي معاه وحقه علي اكتم ماكان بينا
اعجبت د.ناديه بـ ردها :طيب ليه خايفه؟
أمل بنبرة حزن وخوف: ما أدري أحس بخوف من إعادة التجربة وخايفه تنتهي نفس النهاية والناس ماترحم حتى لو كنت مقتنعه بأختياري للطلاق
واللي تطلق مره غير عن اللي مرتين صعبه
دكتوره ناديه بتفهم : اسمعي يـ أمل
المؤمن لا يقنط من رحمة الله وأكيد كان لك خيره في الزواج الأول وحتى الطلاق وإحنا البشر نعجز عن إدراك حكمة الله فيها
ولا يعني الفشل مرة معناه إننا ننزوي ونحبس أنفسنا لا بالعكس نحاول مرة ومرتين
إذا الكفار من أمثال ابراهم لنكون
اللي له تاريخ مع الفشل
*فشل في عمله عام 1831.
* فشل فيعمله مرة أخرى عام 1834.
* أصيب بصدمة عصبية نتيجة موتزوجته عام 1835، تطورت إلى انهيار عصبي عام 1836.
* فشلفي الانتخابات في سنة 1838.
* ثم مرة ثانية في عام 1846.
* ثم ثالثة في عام 1847.
* فشل في انتخابات النواب عام 1855.
* فشل فيأن يصبح نائب الرئيس عام 1856.
* فشل مرة أخرى فيانتخابات النواب عام 1858.
وبعد كل هذا السجلالعامر بالفشل انتخب إبراهام لنكولن رئيسًا للولايات المتحدة الأمريكية وعمره في الستين و لخص تجربته في النجاح والفشل بقوله:
[إنك لن تفشل إلا إذا انسحبت]
وتقولين بعدها يـا أمل تخافين تفشلين
طيب خلينا ناخذ مثل علمي بما انك مدرسة علوم
وهو ماذكره الإمام ابن الجوزي رحمه الله في صيد خاطره, في حوار طريف متخيلبين الماء والزيت، ذلك أنهما كلما اختلطا في إناء ارتفع الزيت على سطح الماء، فقالالماء للزيت منكرًا:
[لم ترتفع علي، وقد أنبّتُشجرتك ؟ أين الأدب ؟! فقال الزيت: لأني صبرت على ألم العصر والطحن، بينما أنت تجريفي رضراض الأنهار على طلب السلامة، وبالصبر يرتفع القدر]
فا مافيه نجاح يرتفع به الإنسان في الدنيا والآخرة، إلا إذا سبقهصبر على ألم عصر المحن وطحن والشدائد والإخفاقات، وأما من يريدون السلامة، فإنهمأبدًا يعيشون بالأسفل مع ذاك الماء
وصلتي للي أبيه يـ أمل
أمل براحه كبيره بعد النقاش المفتوح : الله يريحك مثل ماريحتيني
اسمحيلي دكتورة عطلتك وخذيت من وقتك
دكتوره ناديه : ولا يهمك ومعليش عطيتك محاضرة مصغرة
وتنتهي المكامله
امل أفضل حالاً وتشعر براحة اكبر
:
:
أمل بلغت امها بموافقتها وفي نفسها موافقه مبدئية ولو وصلني شي من د. ناديه برفض عند الشيخ حتى لو انحرج الكل أهم شي حياتي
أم عوجان بلغت أم خالد بموافقة الحريم لكن امرها عند اخوانها فـ دور الرياجيل اللحين
طلبت منها يعلمون أبو فالح ويكون مع العيال لاجاوا فوجوده خير وبركه وأم خالد ذكيه فهمت من تلميحها إن عوجان ممكن يعسر
:
:
أم خالد تبشر أم راشد بموافقة أمل
ومحزنه أنه الموافقه جاتهم وغانم توه رايح دوامه ولاهوب جايهم إلا يوم الأثنين
لكن ولا يهمك يـا عين أمك
تتصل بـ خالد : أبو راشد فديتك يوم الأثنين لاجاء غانم أبيكم في نفس اليوم تروحون تخطبون عند عوجان أخته أمل
خالد : وليه العجله خلي غانم يرتاح وثاني يوم نروح
ام خالد : ياولدي أنا ماهقيت على الله يوافق يعرس وهو متشفق ذا المره ومستعحل اخاف يهون عقب
خالد : ابشري
أم خالد : وفديتك لا تنسى علم أبو فالح وجوده خير وبركه
:
:
أم عوجان بلغت سعيد وعوجان
إن أم راشد دقت عليها تجس نبضهم إذا جاوا يخطبون عندهم
وانها رحبت بهم بس العلم عند إخوانها
:
:
عوجان في سيارته : إن كيدكن عظيم والله يمه طلعتي منتيب هينه
لكن أنا بوريكم عوجان وش بيسوي
هه تبينها تاخذ الطيار وترتاح لا ولاتحلم
مالها إلا شويمي
:
:
:
توقعاتكم ياحبايب
01-06-09, 10:33 AM
جديد مواضيع قسم الارشيف
العرض العادي
