السلام عليكم ..

ياحيا الله عمة الغالين ..الحمد لله على السلامه وان شاء الله اخر الغيبات يااارب

الاوراق اليوم بدت تدب فيها الحياة ..وخاصه ان السر اللي كان محيرنا من تمنع غانم

من الزواج انكشف الا انفك بعد ..>>الحمد لله والله يكفينا شر من فيه شر

بس ياترى بتقول ام خالد لغانم على السحر اللي لقته او لا...؟؟؟؟او بتعتبره شر وزال ؟؟؟؟

غانم وتفكيره اللي بدا يمشي بالطريق الصح اللي عجزنا واحنا نقوله يمين يفتر شمال ..

الحين امل على اليمين وغانم بالاتجاااه الصح ...يالله عاد ترى طولتها ياغنوم تعبنا

من كثر مانلمح لك ..بس مااقول الا الله يطول بعمر هالفهد ..اللي اختصر علينا الطريق

وجابها من اخرها ههههه...

جينا للجراااح هذا انسب لقب لتروك الدب الحين ماتقول لي وش عندك على هاليتيمه

تجرحها قدامنا وفي وجهها قلنا مايخالف بس تاصل انك تسبها في ظهرها

...لا ...احنا مانرضى عليها ..ولا نرضاها لك ..

بس عندي احساااس انه ماقال كلمه سب يمكن انه قال

(ان فيه واحد يبي يخطب موضي وانا قلت انت رجااال والنعم )..وبكذا انطعنت موضي

في الصميم ..وتبخر حب الطفوله اللي كانت تحلم فيه ..وش رايتس امل توقعي صح ..!!!


اموله تسلم يدياتس على هالاوراق اللي تقطر ذهب ..بس طالبتس قولي تــــــــــم ..

لاتقطعين فينا ..

الله يخليتس ..القصه تخبل بس نفقد المتعه من يوم تغيبين ...

يالله امول نشوفتس بالورقه القادمه عن قريييييب ياعمة اغلى وحده بالنت

كل ابووه وامه ...

اهلين والله ما كنت ناويه اقراءها الا اذا خلصت من كثر ما اقراء بالروايات وبعدين يقطعون فينا اذا تعلقنا فيها


وكنت مخزنتها عندى لحد ماتكتمل واقراءها بس ما جانى صبر



وقريتها بجد روعه كل ورقه نقطفها منك احلى من الى قبلها


غانم وامل

تركى وموضى

نجلاء واتوقع فهد


ساره وراشد


هذا توقعاتى لهم



نستناك يالغاليه سلام من النصف الاخر

السلام عليكم ورحمة الله وبركاته..
وآخيرا خلصت كل الورقات
يعطيك العافيه بجد قصه رووعـه تسلم الانامل ..

ام خالد..الحمدلله لقوا السحر والشيخ ابطله لكن من الي مسويه لهم ويكرهم
حسبي الله على كل السحرهـ ..بس ليه غانم بذات وختى يتمى لها الموت جعله يموت هو ولاهي. بس السحر كيف وصل بيتهم ومن حطه تحى الشجره هذا كيد واحد قريب منهم لكن من..!!

موضي..الله يعينهااا صدق الوحده تذبح لا أم واخوان اوخوات يسلونها حتى لو راحت بيت اهلهاا وجلست معاهم هذا مايغني عن وجود الام والاخوان..بس شنو قال تركي خلاها تنجرح ويمكن ماقال شي كبير في حقها لكن هي حساسها ..

امل..صارت حديث الكل والفضل يعود لفيصل الى خلا الكل يثني على اخلاقهااا وادبهاا وخلا ناس تتحسر عليهاا وناس حابه تكتشف من هذا الي احتلت قلوب الكل..!!

غانم..الخواطر الي قراهاا خلت الفضول يشتغل عنده .. وهو شك انها أمل لكن حاب يتاكد ..واذا تاكد يمكن يعارض ينشرهم لهاا يمكن غيره او يحب يسمع من امل نفسهاا انه تبي تنشرهم وكذا يتوهق فهد لان من نفسه متليقف..

ام فيصل..حسبي الله عليهاا كل هذي غيره من امل تخليه تطق ولدها بدون رحمه ..يااااارب زدهااا غيره وبطت كبد من امل لين تنفقع مرارتهاا وتموت..

تركي..عاجبني هالرجال هههههههه<<ليكون زارا حاجزته ترى بذبحهااا
كل حركاته وتصرفاته تدل على انه معجب في موضي.لكن هو خايف تكون نفس اول دبااا اتمنى تطلع في وجه تروك وابي اشوف وش بيسوي

في الانتظار غاليتي بكل شوق
دمتي بحفظ الرحمن

السلام عليكم ورحمة الله وبركاته

مســــائـــكــم ورد وود

لكل من مر هنا بين وريقاتي المتواضعه لــكم مني أرق تحيه
وتقدير لـلوقت الذي أمضيتوه هنا

ولكل من خـط حــرفـاً أجل تقدير ,,
أسعدكم الله كما أسعدتموني بتعليقاتكم الرقيقه

ردود الورقه 7

زار
جاكلين
سارونه الــحلوه
شـفى 2002
دفى الكون
النبع الصافي

نورتوا وريقاتي واتمنى ان تكون هديتكم اعجبتكم


ردود الورقه الـ8

جودي1
شفى 2002
زارا
Emomsa
نجد العذبة
بنوتة الكويت
نجمه بعيدة
شمعة الدار
اشتكي صمتي
عطر الأماكن
سنين عمري
شبيهة القمر
النصف الآخر


تشرفت وريقاتي بمروركم جميعاً
واتمنى استمرارية تواجدكم فهي منكم ولكم ..
لكم الحق في ان تعتبوا لـ عدم ردي على كل منكم على حدى ولكن كلكم تعلموا حالة يدي فأنا ادخر قوتي لطباعة الوريقات لكم
لكن هذا لا يعني ان لا تتحفوني بتعليقاتكم وتوقعاتكم

نلتقي بأذن الرحمن يود الجمعه صباحاً مع الورقه الـ 9

الـــسلام عليكم ورحمة الله وبركاته

مسائكم نــور وســـرور
يفترض أن موعدنا غــداً ولكن لأني لاأضمن دخولي غداً

فـ أن استبق الموعد خيرٌ من تأخيره

فتفضلـوا بــقراءة الورقه 9

إهــــداء لــلـحبيبة زارا

أمل تلحف وجهها وادز موضي بظهرها : خيره أكيد في الأمر خير خلينا انور ونعين خير بدال الطلعه في ذا البرد لـ مزرعتهم, يا الله تصبحين على خير

تلف عليها موضي ...وترجع تضمها من وراء تدري انها ماتحب ذا الحركه : وانتي من اهل الخير يا حبي

تدفها امل بقوه ..: انقلعي وش ذا الحركات

تضحك موضي ..وهي تلف عنها : ههههههههه يختي استانس لا نرفزتس

:

:

وتنام أعيون العباد ورب العباد عينه لا تنام

:

:

:

~~ قسم المجالس [المقلط] ~~

:

:

ثامر وعايض راقدين في طرف المقلط

متخالفه روسهم على واحد من المساند

تركي متلثم بغترته ومتلحف بالفروه

:

:

فتح عيونه وعقد حواجبه مستغرب من المكانه ..

...يتنهد من أقصى جوفه ...وترجع به الذكرى لسنين وراء..

توعى من نومه .. يشوف تركي وسالم راقدين

والمكان غريب ..مهوب مجلسهم ولا هيب غرفته ..استقعد يبي يسترجع وش صار وليه ذا الثنين معه ؟!!!!

ووين أمـــل ؟!!!

قام يغسل وجهه ومع حركته توعى سالم وتركي

ينقز تركي ويوقف في وجهه وسالم قاعد في مكانه متوتر من اللي بيصير ..

تركي وهو صار على ضروسه : على ويـــــــن ؟؟

عايض يمسح وجهه بكف يده اليمنى ويدز تركي بيده اليسرى بشويش يبعده عن طريقه ..:بروح الحمام يعني وين بروح وانا توني قايم من النوم

يوخر تركي من دربه ويوصي سالم عليه ..

:

يطلع تركي لحارس المزرعه ....

آمره يسوي لهم فطور من الموجود ..ويسكر باب المزرعه ..ولو أحد أسأله من جيرانهم ما يعلم بوجودهم ...

:

:

عايض منشغل باله ومهموم ..حس أن سره انكشف ..

ينتظر حد منهم بس يسأله ..

تركي يبعد عن صنية الفطور ..ويتكي على مسند من المساند

وعينه على عايض ..: واللحين ياعايض ..أبي أعرف

وش أنت مسوي بأمل ؟

ووش الحال اللي عيناك عليه أمس ؟

:

عايض منزل عينه لكوب الحليب ..الفاضي ..يدور منفذ له ..عذر , كذبه تنجيه

ينتبه على صوت تركي ..

تركي اللي انتبه لسرحان : وعشان ماتدور كذبه ...وش سالفة الأبــرة والــبودره المنثوره مع اعواد المصاص ؟

:

:

عايض ضاقت به الوسيعه حذف الخبزه اللي في يده ..وضم اركبه لصدره : تبي تعرف المصيبه اللي أنا فيها ...ابشر بس تراني مانيب مطلق أمل ..

:

:

تركي وبكل ثقه ومن دون مايهتز فيه شعره : قل اللي عندك وعقب أقولك وش بتسوي بــ أمل

سالم يحط يده على كتف اخوه ..وكأنه يقول له أنا معك ...أنا سندك حتى لو أخطيت ..يلتفت عايض لـ سالم ..وينظر له بـنظرة شكر وامتنان

ياخذ نفس ويتنهد بألم ووجع ..: اسمعوا ..من ثمان شهور تملكت أمل وعقبها رحت انا وأنت ..[ يأشر على تركي ] مع عيال محمد بن هذال وجاسم بن ثاني للقنص ..تذكر ولا لا ..؟؟!!

تركي يهز له راسه بمعنى أيه ..

يكمل عايض وبنظره تبين عمق الوجع اللي يحس به : كنت توني ما خذ ترقيه عقب قضية التجار الباكستانيين اللي مسكتهم أنا وفريق العمل اللي معي وواحد من الباكستانيين شاب ابو 20 سنه وهو الرأس المدبر

أنّ حكم إعدام ..

المهم أن أبو الولد يشتغل طباخ عند أخو جاسم بن ثاني

ذا الطباخ راح معنا للقنص وكان إذا تذكر شوي ويشيلني من الأرض عشان يخدمني ويسوي لي القهوه ويشوي لي ....الخ

ويوم استاجع من شي تقول أبوي يمرضني ومايرضى حد يسوي لي شي

تدري ليه لأنه كان يبيني أوصل لـذي الحاله اللي أنت تشوفها

ومادريت اني وصلت للأدمان إلا عقب رجعتنا لما اتصل هو علي من المطار في طريقه للرجعه لـ بلاده وماعنده نيه يرجع لانه انتقم لولده وخلص مهمته

صرت ادور على الموزعين الصغار عشان اصبر عمري

ابي لي حل ولا قدرت اسوي شي وماكان عندي الشجاعه اقولكم

تركي وهو مازال على جلسته يأشر على عايض بيده اليمين : اسمع ياعايض ..بعرض عليك عرض ..ياتقبله ياتنفضح ويضيع منك القديم والجديد

سالم مراقب بتركيز لكل حرف ينقال وكل تعبير يصدر من الاثنين

عايض يأشر له كمل

تركي يزم شفايفه وبتفكير ...يعتدل بجلسته دلاله على أهمية الموضوع :

اسمع مستعد أساعدك تسافر تتعالج من إدمانك من دون ما أحد يدري

فرح عايض بس رجع يستفسر : كيف بطلع لي إجازه لى الفتره كلها وش العذر من الاداره

تركي يقطع كلامه : ماعليك ادبرها لا تنسى عمير رجل وضحه يقدر يخلصنا

بس بشرط ..أطــلق أمل لأنك مطلقها كذا ولا كذا ..

وحتى لو عييت بتخلع عمرها منك وعندها بينكشف المستور

ولا بلغت عنك اللحين وخليتك تخيس بالسجن وبعد بطلق أمل

يفز سالم ..: مهيب الهقوى بك ياتركي تبي تدخل عايض السجن

عايض يجر سالم ويقعده ويلتفت لـ تركي

: تركي انا شاري أمل وبتعالج وبرجع عايض اللي أنت خابره

تركي بتفهم لرجاء عايض : لا ياعايض عقب اللي شفته ما آمن عليها معك خلنا حبايب وطلقها بس مهوب اللحين ..

كأن عايض شاف أن فيه تراجع ..بس رجع تركي وطفى شرارة الأمل برجعة أمل له
تركي ...: شوف بدبر سالفة الاجازه في البدايه انها رحلة شهر عسل ..وبتروحون لندن عند فهد ..طبعا امل بتكون قدام العالم رايحه معك بس فعليا هي معي وكله عشان مانبي حد يتكلم فيها مهوب عشانك
ولا وصلنا هناك ...بوديك مصحه لمعالجة الادمان ..وقبل نهاية الاجازة بطلع لك إجازة مرافق مع واحد من شيبانا اللي كل سنه يتعالج واحد منهم في لندن ...ذا اللحين أنا رايح لعمير ..وانت جهز أغراضك ..
يلتفت لهم وهو عند الباب : بطرش وضحه بيتك تاخذ أغراض أمل فياليت تلم أبرك وخرابيطك مانبي فضايح
طلع سالم وراه عشان يوديهم معه البيت لانهم جايين في سياره وحده وهو شكله من الضيقه سج ..

يزفر عايض بضيق وهو يعض شفته ندم لكن مابه فايده من الندم ..يمسح على وجهه ويتعوذ من الشيطان

:

:

~~ مطبخ الـمزرعة ~~

موضي مسويه شكشوكه ..وترتب صينية الفطور لـ أبوها

وتكلم في التيلفون ..: يبه , فديتك تعال المقعد الداخلي ..عشان أفطر معك ما أعرف أفطر من دونك ..

:....

موضي بنبره حزينه : خلاص أبشر أنت وأبو فالح يجيكم الفطور ..

تسكر موضي وتلتفت لـ أمل : أموله وين الكرثي [ اللباء ] إللي طرشته أم خالد

أمل بأستغراب : ما ادري من أللي يقول أنها مطرشه شي

موضي وهي تطلع سماط [ سفره ] وشنطة الخبز : أبوي يقول الشايب أبو خالد جايبه معه وسواقه موصله للمطبخ

تطلع أمل تبي تشوف أذا به شي برى المطبخ مالقت شي

: تدرين موضي يمكن سواقهم حطه عند المجالس

بطرش الخدامه تشوف إذا به شي هناك

موضي تأشر برأسها بـ زين

وتكمل ترتيبها لـ صينية الفطور وزادت عليه بملة التمر عشان الكرثي

وحرارة القرص والبلاليط والعصيد

تتذكر موضي أدوية أبوها ..: أموله بجيب أدوية أبوي , أبو فالح له أدويه ؟,, أشرة لها امل بأيه , راحت ركض لـ داخل تجيبهم

أمل واقفة ما حست إلا باللي يحب رأسها

: صباح الخير يا وجه الخير

أمل أشرق وجها بأبتسامة لكنها تذكرت زعلها عليه فـ لفت وجها عنه بزعل : وعليكم السلام , صبحك الله بالنور

تركي يسحب كرسي : أفااااااا زعلانه هذا وأنتي مطوعه تهجرين أخوس المسلم

أمل تزل الحليب من المفواحه للزمزميه [ الدله ] : ماتعدينا الثلاث ليال وماهجرتك هذا انا أرد عليك ولو انك مزعلني

تركي يأكل من الشكشوكه: اممممممم الله ما أحلى نفسس في الطبخ يا أمل.... ومواصل الأكل [ محاولة لتضييع الموضوع ]

أمل تلف عليه وهي تضحك : مشكور على المدح وفيه العافيه بس ترى مهوب انا اللي مسويته

تركي ..يأشر بيده واللقمه في فمه مـــن اللي مسويه ؟

ما ردت عليه أمل فبلع اللقمة : أكيد وحده من ذا الخدامات وانتي غيرانه من مدحي لـ طبخها

ضحكت أمل ..وهي تشوف موضي من وراء تركي جايه بتدخل المطبخ لكنها ارجعت بسرعة من دون ماينتبه

تركي عاقد حجاجه :وش فيس ؟ من أللي دخل وطلع ؟

أمل ترتب أكواب الحليب وتعطيها الخدامة

: موضي

وقفت اللقمه في حلقه وطالعها : وش فيها موضي ؟

أمل وهي عند الباب ..: موضي اللي مسويه الشكشوكه وهي اللي دخلت وطلعت لما شافتك ..

كملت من دون ماتنتظر رده بروح أجيب أدوية خالي عبدالله

وخل السواق يودي الفطور لـ الشيبان في بيت الشعر

مع دخلة أمل للـ صاله إلا نصور يجركيسة الأدوية من الخدامة :أنا بعتيها تكي [ أنا بعطيها تركي ]

ويروح يركض

والخدامه وراه

يدخل لـ تركي أللي ترك الشكشوكه وخذاه التفكير في ذكرى لـ سعد

نصور ينقز جنب تركي : تكي أنا ديت , ويحب خشمه

ويشوف الصحن أللي كان ياكل منه : تكي هدا وس ؟ من سواه؟

تركي يشيله : هذا شكشوكه وموضي اللي مسويته

نصور الفتان وهو يذوق منها : أيه تكي مودي هاه ادول ان ثــاء الله تكي يذوعه

ليه هي ادول تذا هي ماتحب تكي !!؟

تركي يضحك ويضم نصور : ما أدري أسألها

وببراءة الطفوله : وانت تحب مودي ؟

وكعادة نصور يلقي بسؤال دون ان يهتم بالأجابة لا يعلم بأنه بهذا السؤال أدخل تفكير تركي بدوامه

:

:

:

بعد تلك الرحله بـ أسبوع

:

:

:

~~ الــســـاعة 4 الــعــصر~~

~~ مجلس أبو سعد ~~

أبو سعد متكي وجنبه ابو نايف وعايض قاعد على يمينه

وسالم مقابلهم ويصب القهوة

سالم يأشر لـ خاله أبو نايف بمعنى تكلم

ابو نايف يمد فنجاله لـ سالم ويلتفت على أبو سعد : اقول يا عبدالله

جايك أنا وعيالك عايض وسالم في حاجه عساك ماتردنا

ابو سعد بأهتمام ..: ابشروا بعزكم

ابو نايف : الله يديم عزك

يا أبو سعد أولدك عايض يبي بنتك موضي

يقطع كلامهم دخول

نايف على ذا الجمله ..: السلام عليكم

توقعاتكم يا حبايب

قـــراءة ممتعه