هذه الورقه
إهــــــــــداء
لكل من رد على الـورقه السـ7ـابعة
~~ الــورقة الـثــ 8 ــامنة ~~
~~ بذور عشق من خيال سطور ~~
~~ مجلس مزرعة أبو فالح ~~
ابو سعد ..: ذا الخبلان قد قيلت لهم لكنهم ما يقبضون العلوم , قل يابوي وذا الـ 4000 ريال لك أن كانه صح
فيصل يقعد بين تركي ومحمد ..:الحل أن الرجال ياخذ كف ولده المولود ويشبر بها كفل الخروف وبكذا بيزيد طول كفل الخروف عن سبعة أشبار
الشيبان ينادون فيصل عندهم يحب ابو سعد خشمه ويعطيه الـ 4000 ريال
أبو راشد ..: إيه هذا الرجال اللي يفطن في العلوم والله يحمي اللي علمتك
عامر بن راشد : وش بتسوي بـ 4000 ريال ..
الكل توقع انه يقول بشتري لي بلاي ستيشن جديده ولا بطبطه ولا ...
لكن الكل انصدم لـما سمع
فيصل : بساهم في مشروع شراء مسجد قد قالت لي عمـ وسكت
مايبي يقول الاسم ..
وحكى لهم قصة المسلمين اللي في إحدى مقاطعات الولايات المتحدة المشهورة بكثرة اليهود واللي صعبة عليهم الحصول لـرخصة مسجد فاشتروا مطعم بالأقساط وحولوا الدور الأول لـ مطعم والدور الثاني لـ مسجد لكنهم ما اقدروا يكملون مبلغ شراء ذا المطعم
:
:
الكل يدعي لـ فيصل ولـ عمته
واثنين يفكرون في تلك العمة
واحد يعض أصابع الندم وآخر يفكر بهذه الأمل التي أثرت على هذا الطفل لـ يكون تفكيره أبعد عن تفكير من هم في عمره
لو كان عندها أطفال وش ممكن يكونون؟ هذا وهو ولد أخوها صار
كذا !!كيف لو ولدها؟
والله انه محظوظ اللي بتكون من نصيبه
اممم طيب ليش ما ....وانتبه لـ عايض السرحان < مع الناس بالجسم وعقله سرح بعيد >......لا لا لا مالي فيها حاجه
وتستمر السوالف
~~ مطبخ مزرعة ابو فالح ~~
:
:
موضي تذوق من كل شي وهيا تهاوشها
مويضي وجدري بدال ما تعاونين تبلعين
موضي تمثل الصدمه : أنا حراااااام عليس وتنادي افزعوا لي من هيا ضربتني واطردتني من المطبخ
وضحه اللي تعتبر موضي بنتها تلتفت لـ هيا : يا هيا الله يهديس وش فيس على موضي ..والله إنها ماتستاهل انس تهادينها ..
موضي من وراء وضحه تحرك حواجبها لـ هيا ..بمعنى حره موتي
هيا ..وهي تعطي الخدامه الصينيه توصلها للسواق يوديها للمجلس : اقول يا وضحه يعني أنتي مصدقه ذا الهيسه اللي وراس
موضي تمثل الزعل ..لكن يقطع تمثيلها رنين تيلفونها بأسم خزنتي
خزنه بصوت واطي : موضي فديت قلبس انا متوحمه في ورق عنب أمل تكفيني حطي لي في صحين قبل يودونه كله للمجلس
تضخك موضي ..: ابشري ولو اني داريه انس خراطه ومابه وحام ولا هو وحام كرشتس الحلوه وتسكر وهي تتفدى بنت عمه القريبه من قلبها
:
:
~~ الساعه 10:30~~
تعشوا الجماعة واللي سرى لبيته ولي ظل سهران في المجلس مع الشباب
~~ سيارة نايف ~~
نايف يسوق ومعه أخته خزنه يردها معه لبيتها
خزنه وهي حاضنه بنتها النايمه : هاه نيوف منتب ناوي تعرس ؟
نايف يتفادى شاحنه ماره جنبهم مسرعه ثم يخزها بطرف عينه : وش نيوفه شايفتني بزر ..
وعن العرس , بعرس أن شاء الله ويتنهد من أقصى جوفه بهم ..الله يهدى اللي فركش علي الزواجه
إلا يا خزنه وش علوم موضي ؟ للحين تغلا ؟ ما أدري متى بتحن علينا بموافقتها
تنهدت خزنه اللي تحب موضي وكانت تتمناها لـ نايف بالذات أما خليفة فهي من أول المعارضين
ينتبه نايف لـ سرحان أخته عقب سؤاله عن موضي : وش فيس يابنت سعد ؟!!! عسى موضي مابها خلاف ؟
خزنه اتهز رأسها بلا : تدري والله موضي تكسر خاطري وتغصها العبره ,
وياليتها وافقت عليك .
بس وش نسوي بالهده اللي صارت قدامها وتضرب كتفه وأنت وأخوك ماتهاديتوا وتضاربتوا إلا قدامها !!! والله ما ألـومها يوم عيت منكم
نايف وهو يضحك على موضي اللي العبره خانقتها وهي تتكلم : فيه وحده عاقله تفرح أن خوانها ترفضهم بنت عمها , شوفي تفرحين برفضها لخلوف الخبل بنعديها لكن ترفضني أنا لالا ما اسمح لس ..لكن خزنه ما استجابت لـمحاولته لـ إضحاكها ..
خزنه وهي تمسح عيونها بطرف برقعها : موضي زاد غلاها عندي وعند أمي يوم قالت لي والله أني رفضتهم من خوفي عليهم مايهون علي يصير في واحد منهم شي وأنا السبب يكفي فقدت سعد وهم عندي مثل سعد ودمعت عيونها بدموع حب وخوف على بنت عمها
زفر نايف بضيق : تدرين يا خزنه أن أكبر سبب لرغبتي بالزواج من موضي عشان سعد وعشان عمي ما يقعد بروحه لـ وخذيتها بقدر آخذه عندي في بيتي ولا حتى أسكن عنده , عمي هده الحزن على ولده وعلى أم سعد وزاد عليه هم موضي وخوفه عليها.
حتى أبوي كلى قلبي , لكن العلة أخوس ذا اللي كل شوي ناط , وأنه بيذبح اللي بياخذها فضحنا في العرب , وليته كفوها والله مهوب يستاهلها وأنتي داريه بعلومه ..لو أني أضمن أنه بيصونها كان أنا أول من يوقف معه... يسكت لكن يكمل في خاطره [ بس ذي وصية سعد ما أقدر أخليها تنهان ولا تنظلم ] ويتنهد بحزن على فراق ولدعمه الحبيب لـ روحه الأخ اللي ماجابته أمه :الله يرحمك ياسعد
خزنه: إلا على الطاري كني سمعت عمتي أم عايض تقول إنهم ناوين يخطبون موضي لـ عايض
مسك نايف بريك ..ووقف على جنب
صرخت خزنه بروعه : وشــــفيــك يامــــــهبول تبي تذبحنا... اتلفت حواليهم نايف حرك تكفى يا اخوي ما أداني ذا الطريق مظلم ويخوف
يحرك نايف ومن دون إهتمام لـ ضيق وخوف خزنه : وش قلتي عايض بيخطب موضي؟؟
خزنه تحضن بنتها اللي قامت تبكي من الصوت العالي : إيه , تدري على أني فرحت لـ موضي إلا إني خايفه عليها أمل بنت علي مابه مثلها كاملة والكامل الله طلقها عايض عقب شهرين , خايفه على موضي تلقى نفس المصير
يعم صمت في السيارة لـ درجة إن خزنه أنعست ونايف ظل يفكر في حــل
يكون فيه وفـى بالوعد
وصــان الأمانة
:
:
:
الساعة 12:30
~~ غانم في غرفته ~~
:
:
:
غانم ..منسدح على جنبه اليمين ويقرا الملف اللي أعطاه إياه فهد من يومين ...
قرأ الخاطرة الأولى ... واستشف منها إن الكاتبة أنثى ...حساسة ...عاطفيه... مجروحة ...
الخاطرة الثانية ... يراها روح طفله في جسد أنثى مكتملة ...
القصيدة الثالثة ...يرى فيها شموخ روح
] ســـنــبــلة [
بالامس البعيد كانت بذرة بيد طفلة
سعيدة هي ...فخورة
تزرع بهمة
فتحفر حبا ,,
وتطبطب حنان ورقه...
كبرت الطفلة
ونمت بذرتها ...
ساق و ورق..
سنبلة جميلة
تقف شامخة بصمت...
تنتظر قطرات مطر
تروي عطش ايامها...
وايدي مزارع
تقطف برفق ينعانها...
طال الوقوف
والشموخ باق
صيف حارق
وخريف موحش
ثم شتاء بارد قارص
ليأتي المطر...
يصحبه رعد وبرق
وهي تقف ..
قد انحنى جزء من شموخها
بقليل من فرح
وامل بانه الفرج..
فكانت الريح ,,,, صرصرية
لا تبقي ولاتذر
تقتلع الشموخ ,,,, وتكسره
******
صباح يوم جديد
طفلة جميلة
تحمل بذور ندية
فتتبع خطى رفيقاتـها
تزرعها بروية...
بعد ان ينزع الفلاح بقايا لسنبلة ابية
كانت بالامس القريب هنا ....
:
:
الرابعة ..يرى روح عابده صابرة ...لديها دائماً أمل بان لابد للغيم أن ينجلي لتشرق شمس السعادة في حياتها..
~~ إلا الـشفقه ~~
لا لا تشفقوا
لا ترهقوا النفوسا
وتتكلفوا
مواساتي
**
فالحزن رفيقي
و الصبر زادي
وفؤادي حضن يأويني
**
مشاعري احلام
وخواطري تفسيرها
**
دموعي امل
وجفني سحاب يأويها
**
نبضي ايمان
يملأ فكري طمأنينة
**
ارجوكم لا تشفقوا
فلي ربي يكفيني
***
سرح غانم وراح فكره يرسم شكلاً خيالياً لمن قد تكون هذه السطور ..وشعر بـ انجذاب لمن خطت أناملها هذه الحروف المليئة بالمشاعر ..
والموحية بشخصية هادئة مطمئنه رغم ألـم جروحها التي تنزف بغزارة...
غانم في نفسه ...من ذا اللي كاتبه ذا القصيد ووش سبب جروحها وليه الناس يهاجمونها ...وليه مالها سند ...
معقولة ذي تكون رفيقه لـ فهد ..ولا حبيبه ...يهز رأسه لا لا مهوب معقولة ..
يرجع للملف ..على نية يكمل القراءة وعقبها يتصل لفهد ينشده منهي له ..ويريح باله من الهوجاس اللي ماله داعي ...
الخامسة قراها ...لكنه من الإحساس العميق اللي وصل له من استنجاد الشاعرة بنخوة ابن عمها خلاه يستقعد على حيله ويعيد قراءتها ..
يا ولـد عمي نخيتك .. والقصيد أسنده يمـك
عدّها نخوة حميّا .. عدّهـا نخـوة ميانـه
وأعرف إني لانخيتك فاض بالفزعات جمـك
وأعرف إنك ماتقول الراي إلا فـي مكانـه
إحتميني ياولـد عمـي إذا فعـلاً أهمـك
أوقف بوجه المواجع والظلايـم والمهانـه
زمني حد النجوم اللي عليها كنـت أزمـك
عالم الحرمـان هـذا ذلله وإقطـع لسانـه
عالم الخذلان هذا ذوّقـه لحظـات سمـك
عالم البهتـان والطغيـان ماعنـده أمانـه
بنت عمك ياولد عمي تراهـا بنـت عمـك
تارد الموت الحمر ماهي عن الوقفه جبانـه
دمي اللي في عروقي هو ترا من نفس دمك
دم نشمـيٍ إلامـن فـار مـادور معانـه
والجفـا لالـم خطواتـه طلبتـك لا يلمـك
الجفا كافر وأنا وإنته على نفـس الديانـه
إنخذلت بكل من حولـي وخذلانـي يعمـك
وإنطعنت بكل سكينٍ نـوت طعنـي خيانـه
طعنة الدنيا بجوفي عـن ندايـه لاتصمـك
طعنةٍ تثعل جروحـي ثـم تمثناهـا لعانـه
ياولد عمي نخيتك بنت عمك بنـت عمـك
عالم الخـذلان والنكـران ماعنـده أمانـه
غانم ....يتسائل معقوله ..تكون وحده من اهلي ومطرشتها لي مع فهد عشان تنخاني ؟؟!!
لكنه يستبعد ذا الفكره اللي من وجهة نظره غبيه
طيب معقوله ترتيب واختيارات القصايد والخواطر جاي صدفه ؟!!
ومن من بناتنا اللي ممكن اتجرى وتنشر قصايدها ..؟؟ لا وفهد يتوسط لها ..!!!
غانم يمشي بتفكير في حجرته ويوقف عند دريشته المطله على البوابه الخارجيه
ويفكر من من الممكن تكون له ؟؟
واذا هي من بناتنا فو الله سنعك عندي يافهيدان
معاد الا هي ينشرن قصايدهن
:
:
يطرش مسج لـ فهد ..طرش لي اسم صاحب الملف ..
يرجع يقلب صفحات الملف يلفت نظره الاسم المكتوب آخر الصفحة
الأمـ روح ـل << ما حب فهد يسميها بأمل مجروح لأنها دائما يراها روح مليئة بالأمل رغم ظروفها القاسيه من أحب الناس لها.
هنا كأن أحد خبط غانم على راسه وش ذا لا يكون ذي أمل اللي ...!!!
رجع انسدح على سريره وقعد يربط بين كلام سالم له وبين تصرفات تركي واللي صار الليله بالمجلس ومدح جدته لـ بنت علي ..
:
:
~~ نفس البيت لكن في الغرفه أسفل غرفة غانم ~~
قلب موجوع وعقل أهلكه التفكير ..
من من الممكن يشاركه هذا الهم بل الهموم
تسترجع كلام حمزة
أم خالد بروعه وهي تحط يدها على صدرها : لي أنـــــــــــــا
حمزة ومازال مبتسم يبي يوصلها إحساس انه لا تخافين : ياعمه وش اللي يوجع الأم ويحرق قلبها
أم خالد بتفكير بقصده : مايحرق قلبها كثر ان عيالها يجري عليهم شي يوجعهم
حمزة وهو يعدل جلسته : وصلتي خير ياعمه..سكت شوي وكانه يبي يرتب كلامه
ياعمه ..تذكرين السنة اللي راح فيها عمي غانم لـ لندن يدرس
تأشر براسها أيه بمعنى كمل ..
صار حادث لـ عمي خالد وقعد في المستشفى حول شهر ونص من كسر الحوض
وعمي عامر صابه ورم سرطان في المريء لكن الله ستر وأحياه
وعمي غانم وحادث الطياره اللي كان يتدرب فيها وكان نجاته منها أعجوبة
وكملت أم خالد ..: وحريق المطبخ في بيتنا اللي في الريان ..و...لكنه قطعت كلامها وكأنها تبي تقطع سيل ذكرى حوادث تلك السنه الحزينه
:ياولدي يا حمزة وش جاب ذا الطواري لـ أمور ذكرها يجيب الهم والحزن
حمزة وهو مازال مبتسم وعيونه تلمع فرح : يا عمه هذا كله تواريخ مكتوبة باللي لقيته في جذور النخل ..
أم خالد تعقد حواجبه من تحت برقعها بتعجب
ياولدي أنت رحت لـ مطوع ولا لـ ساحر
ما يعرف منهو مسوى له إلا السحره ولا المطاوعه يقرون عليه ويفكونه بس
حمزة بتفهم لـ خوفها وبحماس إللي عنده سالفه ويبي يكملها : شوفي ياعمه اللي سوى العمل مايعرفه المطوع لكن الكلام المكتوب في العمل
القطع اللي فيه مسواه على عدد عيالس ياعمه
وأسمس في كل قطعه وفيها تكرار لكمة موت وكلام واجد شي فهمته وشي مافهمته بس الشيخ فهمني بحكم خبرته أن الاعمال مسواه لـ وحده أسمها نجلاء بنت جمله [ هذا اسم أم خالد وأمها ]
بس ياعمه تدرين وش أكثر قطعه فيها أعمال وطلاسم
أم خالد بترقب لـ شي كايد : أي واحد ..وكأنها داريه
حمزة بحزن : لـ عمي غانم
مكتوب ..
لا زواج ...
لا عيال ...
لا فرح ...
مـــوت ..
مــــوت ..
مــــــــوت
تنتبه أم خالد من تفكيرها وتقوم من فراشها إللي تحسه مثل الشوك ..من محاتاتها لـ عيالها
تفرش سجادتها اللي توها طاويتها لكنها تشعر بحاجه ملحه لـ تلقي بهمها بين يدي من بيده أمر كل شيء
ولـ تحمده وتشكره أنه لـطف فيها هي وعيالها من دون علمٌ منهم
وعاشوا لها وهم بخير وأبطل إلـ أعمال سواء إللي بطل قبل يدرونه أو بعد ماسخر الله لها ذا السوداني إللي الطيب بين فيه وخذا العمل للشيخ
صدق المعروف ما يضيع
على سجادتها تـلهـج بالدعاء
في سجودها يخالطه صوتها الباكي ودموعها اللي أغرقت سجادتها
ربي لك الحمد والشكر
يارب أنت أدرى بحالي وحال عيالي
يارب أنهم يمكرون وأنت خير الماكرين
رد مكر كل ماكر في نحره وأحفظ عيالي وعيالهم من كل شر
يارب تفرحني بزواج غانم وأشوف عياله
وتستمر أم خالد في طلب ورجاء من لا يخيب من رجاه
:
:
~~ المزرعه~~
~~الساعه 1 صباحاً ~~
موضي ماجاها نوم ....وشافت فراش امل خالي قالت خليني اشوف ذا الهيسه وين راحت تسهر وخلتني لحالي ...خذت جلال كبير ولفت نفسها فيه ..احتياط ..
نزلت تحت بشويش عشان ما تقوم النايمين ..
..دخلت المقعد .. لقته مظلم ونور بسيط واصل له من الإنارة الخارجية للحديقة أول ما أفتحت الباب وصل لها صوت أمل ...بس من برى ..أرفعت حواجبها مستنكره وش مطلع أمل برى ...لفت للستارة الشيفون اللي تطاير من الهواء ...
موضي تكلم نفسها ..: بسكر الدر يشه ..وعقب بطلع للي سهرانه ومهملتني ..من وراء الستارة شافت أمل متسنده على وحده من الشجر وجنبها فهد وتركي قاعد على المرجيحة ويستمع لهم بعدم اهتمام..
موضي ضحكت بألم في نفسها : هههه شكل مالي احد اسهر معه أمل مع أخوانها ..ماشاء الله عليها الله يخليهم لها ...ليت عندي أخوان من الرضاع آآآآآآآه الله يرحمك يا سعد ونزلت دمعه يتيمة ..تحمل كل معاني الحزن والقهر والوحدة ...تلتفت للدر يشه المغطاة بالستارة المتطايرة .....توها تمد يدها تبي تسكرها لكنها تخشبت ودموعها تحجرت ونصل خنجر تركي يـنغرس في أعـــماق روحها
وفقدت حاسة السمع في حينها وكأنها تقول خــــلاااا ص ما أبي تجريح أكثر ...ترجع للغـرفـة بروح مثـقـلة بالهـموم وجرح غائر نازف
ولسان حالها يقول ..
اضحك مع الناس واخـفي همً قـتـلني
همٍ بوسط العين بين ومفضــــــــــــوح
اخفي دموعي بأبتسامه وكــــــــني
سعيد بدنيتي بضحك و مـــــــــزوح
وانا اللي فيني هم وحزنٍ سكـــــني
لو سكن غيري من القهر بات مذبــــوح
:
:
:
:
أتمنى أن لا تبخلوا علي بردودكم
فتفاعلكم هو ما يشجعني على إكمال الوريقات وبدونكم لن يكون للوريقات حياة
ألقاكم الجمعة القادمة بأذن الله
08-05-09, 01:42 PM
جديد مواضيع قسم الارشيف
العرض العادي
