السلام عليكم ورحمة الله وبركاته

صباحكم ورد

ورقتنا اليوم أهداء لـ فروحه << الله يعين على زعل زارا << بس انا خاشه لس ورقه خااااصه جداً



الـــورقة الــســ 6 ــادسة
:
:
:
~~ مخططات زواج ~~
:
:
~~ طريق المطار~~
~~سيارة خالد بن عامر ~~

خالد يحط شنطة غانم في دبة الموتر ..:
مرحبااااا والله ..سلامة الأسفار ياعم
غانم يسكر تيلفونه [ ينهي مكالمته مع تركي ] :
المرحب يبقى ..الله يسلمك من الـشر
خالد يركب السياره ويحرك طالع من مواقف المطار: من تكلم ؟ ..تركي ولا فالح ؟
غانم يرجع الكرسي على وراء عشان يمد رجله : تركي وحلف علي
بالعشاء نهاية الأسبوع في المزرعة
يخفف خالد وهو مقبل على الاشارة : عساه على القوه ..وانت تستاهل
يوقف عند الأشاره ..ويلف لـعمه :
مرحبا والله يبه ..قطر نورت
غانم : تسلم النور نورك ونور اهلها ..اقول وش علوم أهلنا ..أبوك وعمك خالد و العجايز ...
خالد يحرك السياره عقب ما فتحت الأشاره : أبد كلهم بخير و ماعليهم إلا شكر الله ...
بس ياعم ..ويضرب بسبابته على الدرسكون ..
غانم عاقد حواجه: وش اللي بس !!!!؟
خالد ...يسحب نفس عميق : يبه راشد يبي
يعرس وعمي خالد قال عمك غانم يخطب لك
وجداتي عيوا قالوا مايعرس راشد وعمه
ما اعرس
يعدل غانم قعدته ويصلب ظهره :ويـــــــــــش
وليه رابطين الصبي
فيني ما عليك منهم لا اجيت وارتحنا يبشر راشد بالخير ..
ولا طلع يوم الخميس تفاهمت معه
إلا هو منهو يبي ؟؟؟؟؟
خالد يضحك .. : ههههه يعني ما تدري باللي
هو يبيها ؟!!!

غانم وهو ضايق خاطره من ضغط أمه وجدته
عليه : قل ياخويلد وأخلص علي مالي خاطر
للألغاز ؟
خالد ..: ابشر .. يبي بنت عمه ...سارا بنت
عامر [ أختي]
غانم .. يريح ظهره على الكرسي وحاط ذراعه
اليمين على جبهته
: زيـن مااختار ولف علي خالد وأنت ماتبي
تعرس؟
خالد بضحكه مهموم : لا تكفى يبه تو الناس
...وثانياً اللي كنت أبيها عيت ما تبيني
استقعد غانم ..: من هي !!!؟
يطلع من الدوار صوب منطقتهم : نجلا بنت عمي
استغرب غانم رفضها ..في نفسه (نجلا اكبر منه بـ8شهور) يكون ذا السبب..؟؟!!

...بكل هدوء: وليه عيت !!؟ وكيف عرفت انها
معيه ولا صاير كلام بينكم من ورانا!!
يلف خالد على الشارع اللي فيه بيوتهم :
عيت عشانها أكبر مني
وعرفت لأن السوري كلمتها قبل اكلم ابوي
يدخل من دروازة البيت ....ويلف على غانم
..وماهقيتها منك يبه
تضن فيني ان بيني وبينها مثل ذا الكلام نجلا
بنت عمي واللي ما ارضاه على سارا ما ارضاه عليها
غانم وهو ينزل : زين زين الله يوفقك معها ولا
مع غيرها
:
:
:
~~ نفس الوقت ~~
~~ في الشارع بين المسجد وبيت ابو سعد ~~
:
:
تركي يلف لـ أبوه وخاله ..: بمر البقاله بجيب لنا لبن وروب ..
أبوسعد : تعال لا تروح أكيد موضي طرشت السواق يجيب
تركي : يمكن سجت ..خلنا نطلق ارجيلنا أنا وذا المتعافي ..ولاهوب من بعد البقاله ..ويجر فهد معه
فهد وهو يدز يد تركي : يا أخي ماتعرف تتفاهم إلا بعنف
يعدل ثوبه مكان مسكة تركي ..داري بك منتب ساحبني لله تبيني اشتغل لك حمالي ...
يضحك تركي وهو يدخل البقاله : زين يالحمالي رح خذلنا لبن الصافي وحليبه وروب المراعي
يروح فهد لثلاجة الألبان وتركي يدور في البقاله يبي شي ينفع للي في باله
ضحك أول ماشاف الشبك الصغير واللي فيه خذا له ثنتين وطلب من العامل يجيب له كوره صغيره كبر كف اليد [ كبر كرة لعبة كرة اليد] ولحسن الحظ لقى آخر وحده بالمحل واللي معلقه بالفترينه
فهد شايل اللبن وحاطه على طاولة المحاسب : تركي وش عندك على الكوره
تركي وهو يدفع للمحاسب : لـ نصور اليوم يبكي يبي كوره
فهد يضرب كتف تركي بكف يده: زين يا ابو نصور ..شيل أغراضك وأنا بروح اجيب موتري عند بيت خالي عشان أودي أمل عقب العشاء
تركي وكأنها جاته من الله لأنه كان يفكر كيف يوصلها لـ موضي من دون ماينتبه فهد
: زين ما منك فايده جبتك معي تشيلها وبتروح اتعذر بالموتر
فهد وهو رايح : ههههههههه زين يالشويبه انتبه لا اطيح من طولك ماتشوف الأرض
ضحك تركي : تذكر اللي تسميه بناطحة السحاب اتصل على أمل
: هلا وغلا ..ههههه زين بتروحين اللحين ولا عقب العشاء [ وكأن فهد ماقال له ] زين وينس ذا اللحين صوت مواعين عندس
أمل تضحك وهي تشوف موضي : ايه اساعد موضي وينك انت
تركي وماعاد بينه وبين بيت خاله الا حوالي المترين : قريب من بيت الخال زين بطرش لس مسج صوتي عاجبني وحبيتس تسمعينه اسمعيه اللحين
يالله فمان الله
:
:
:
~~ المطبخ~~

يوصل لـ أمل المسج [ وسائط صوتيه] قصيده للشاعر حمد السعيد
امل تقرب من موضي عشان تسمعه معها ..[ من دون ماتعلمها من وين ]


للزين قالوا من قديم علامات:::
:::عين ومبسم والجسم والرشاقه
لكن كسر هالقاعده هالمتينات :::
:::مـن واقع ماهو كلام وبلاغه
اللي محليهن ولو هـن ثقيلات:::
::: دايم خفاف الدم وفيهن لبـاقه
الله يا هـن يا جماعه لطـيفات :::
:::وعلى الكلام الحلو فيهن طلاقـه
ما هو ضروري بالرشاقه رشيقات:::
:::وزود الوزن ما هو بيعني إعاقـه
صحيح بعض اللبس يعني إهانات:::
::: الوزن بالضيق عديم العلاقـه
بس موضروري يلبسن استرتشات:::
:::يازينهن واللبس واااسع نطاقـه
لابارك الله فيك يالضـيق بالـذات :::
::: ترى السعه مرات تعطي أناقـه
قالوا الرجـيم اليوم هـم البنـيات :::
::: قلت الرجيم أدري يبيله فراغه
وقالوا الرياضـه قلت ماهن مريضات:::
::: للسكري لا مامعهن بطاقـه
قابلهن الله بـلا رجيم ورياضـات :::
::: بهديلهن مني من الورد باقـه
هن دفء هذا المجتمع هن رقيـقات :::
::: هن ملح هن سكر لذيذ مذاقه
هـن لا سألتوني عن الحب بسكات :::
::: بأقول فيهن عن الحب طاقـه
ماهـو كلام اللي كتبته واشاعات :::
::: انـا ربطتني مع متينه علاقـه

موضي بضيقه وش ذا من ذا العله اللي مطرش ذا القصيده لس ذي مدح مبطن بقدح
امل سكرة من الضحك وتسندت على اقرب شي..: هذا تركي مطرشها
هنا موضي ضااااااااقت ودرت انها نغزه لها ...في خاطرها..يعني منتب ناسي اني كنت دبه وأنا بــزر ولا مراهقه ام 13 سنه افففففف منك يناطحة السحاب آآآه
بس كيف اتشوف الناس اللي على الارض وانت تنطح السحاب
وتحط الصحون بضيقه وهي اتحلطم في نفسها وامل تضحك على شكلها
لفت عليها ...: مستانسه فرحانه انت واخوس المخنز هنا انفجرت
امـــل من الضحك :يعني هو مطرشها لي وقال عاجبته ماقال
لـ موضي ليه تظلمينه
موضي وهي تضرب الملاس على طرف الصفريه [ القدر ] من الحـره ليت من يكفخس أنت وأخوس بذا
[ يضربكم بالـملاس ( ملعقه كبيره لسكب الطعام) ]
قامت امل وحبت خشمها وهي تغمز: هذي ترضيه بالنيابه عنه
موضي بخبث : آهـاا دامس تنوبين عنه باخذ حقي منس وبضحك انها بتضربها وطقت امل صوب الباب
يقطع ضحكم رنة تيلفون أمـل
:
:
~~حوش بيت عبدالله ~~
:
:
يوصل تركي بيت خاله عبدالله ويصوت على الدرويل : سورااااااج ود الأغراض المطبخ
يدخل المجلس وفي باله
[ لو امل انتبهت للأغراض بقول اغراض لنصور ونسيتها مع اللبن وخصوصا اني قايل لفهد انها لنصور ] ضحك بخبث ههههههه ومتوقع ان موضي بتنتفخ من الغيض وكأنها تنين ههههههههه تخيل شكلها واللهب طالع من فمها وخشمها
:
:

~~ الـمطبخ في بيت عبدالله~~

أمل رن تيلفونها بأسم سلطان وراحت الصاله ترد عليه عشان دوشت المواعين وماتبي صوت موضي يبين لولد اخوها..
موضي تحط المرقوق في الصحن وتغلفه بقصدير والسلطات مغلفتها بنايلون ...
وتوها تنادي الخدامه عشان تعطيها الدرويل يوديها المجلس : ماري ..ماري
ماري داخله المطبخ وفي يدها اكياس : يس مس
موضي وهي ترتب الصحون : شيلي المواعين ولا تنسين صينية اللبن عطيها سورج يوديها المجلس وتلف تشوف الاكياس : وش ذا الاكياس ..وتشوف الخدامه :ماري تونا شارين لبن ليه سورج جايب مره ثانيه
ماري وهي تشل الصينيه : لا هدا سير تركي جيب
انتبهت موضي أن فيه شي غير اللبن فراحت تفتح الاكياس اول ماشافت اللي في الكيسه : كــــوره !!!!!!..يا ناطحة السحاب ..وتشوف في نهاية الكيسه حلاوه في شبك على شكل كور صغيره هنا خلاااااااص حست عرق في راسها بينفجر وانتفخت من الضيقه ودها تركي قدامها عشان تفلعه بذا الحلاوه .... وتشوته بالكوره تسمع خطوات امل معوده لها شالة الكيسه ودعستها في رف من رفوف المطبخ
أمل وهي مستعجله وفي يدها عباتها : موضي اسمحيلي فديتس لازم اروح اللحين ...سلطان متصل ويقول ابوه مقوم الدنيا عشاني ماعودت للحين ..وفديته تعذر أني كلمته وهو اللي ماجاني وتحمل الهـده عني
موضي وهي تضمها : الله يحفظس ياعيوني من بوديس؟
أمل وهي تلبس شيلتها : فهد عند الباب يا الله مع السلامه
تلف موضي وتشوف على الثلاجه مغناطيسات احجام مختلفه تعلق فيها أوراق طبخات لاقدها تـتفنن وضحكت بخبث لما شافت اكبر مغناطيس شلته وحطته بواحد من اكياس البقاله وربطت عليه الكيس الاول وعقب حطته بكيس ثاني عشان ماتنتبه له خدامتها ونادت ماري ...: ماري عطي هذا كيس لسوراج يعطيه تركي قولي له هذي أغراض نساها داخل كيس اللبن
تروح ماري
وموضي تضحك ...مستانسه تشيل أكياس الكور وتروح حجرتها

~~ خيمة [ المقعد الخارجي ] بيت غانم ~~


أم راشد وام خالد قاعدات حول الـدوه ..ودلـة الرسلان تفوح بالقهوه وجنبها غوري حليب غنم وجنبه شاي وغوري كرك بالزنجبيل
ام راشد تلتف على ام خالد : يانجلا ماكن غانم أبطا لا يكون خويلد سـج وماراح يجيب عمه ؟
إلا غانم داخل عليهم: السلام عليكم يابنات
العجايز من فرحتهن به بيفزن يقومن له لكنه حلف عليهن ودنق على الثنتين يحب روسهن وأيديهن
أم راشد : مرحبا والله ومسهلا تو مانورت ...لبى قلبك لاعاد تروح وتبطي علينا وتعبر العجوز من كثر حبها له
أم خالد: الله يهديس يمه ..
غانم يبي يوسع صدرها ..لو اني داري كان ابطيت بعد عشان اشوف غلاي عندكم[ حب راسها ]..وش رايـس المره الجايه تخـاويني انتي وام خالد
و جــر يد أمـه ويحبــها
تمسح ام خالد على راسه : خوتك ماتنعاف ...لاقد مابه ألا انت ماعليه لكن لقد مخاوينك رجاجيل محنى معبلينك
لكن علمني أربك ماتعبت ؟
غانم وهو يصب له بيالة حليب : لا ولله الحمد مـابه تعب والجو حلو
وتعب العمره كله اجـر ...
أم راشد وهو تفر التلفزيون على المجد [ وقت الصلاه في مكه ] : ياولدي مالقيتوا زحمه ..في التلفزيون نشوف زحمه عاد بقايا ذا الحجاج ماراحوا؟!!!!
غانم يلف يشوف التلفزيون ويعود يقابلها : مابـه زحمه يعني ذا اللي تشوفينه وقت صلاة الجمعة ولا غيره من الأوقات أخف
شاف العجايز في نفسهن العمره : وش رايكن على شهر 3 ولا 4 تكون الزحمه قلت وعاد الجو زين مهوب حر ..أروح أن وياكن وواحد من العيال اما راشد ولا خالد ..وأن كان الشيبان بيخاونا مرحبا بهم
أم خالد وراشد :جعلك حي وقوي ..الله يحينا يمك لذك الوقت
غانم : الله يطول بعماركن إلا وين خالد وعامر
أم خالد : راحوا لصلاة العشاء ولا عودوا علينا يمكن جاهم أحد في المجلس كني اشوف الطباخ يودي دلال جديده للمجلس
يقوم غانم : اجل بروح أصلي العشاء ثم بروح للمجلس ..وقف وهو عند باب الخيمه ..يمه تراني حاسب لـ جمله و مزنه من ماي زمزم لاتنسينهن والباقي وزعيه بمعرفتس بس بقي لي مطاره أبيها لـعامل عندنا في القياده موصيني عليها
ام خالد : أبشر يمك ..رح صل وارتاح لاحق على المجلس واللي فيه
يظهر غانم وهو يقول لا لا بصلي وبروح لـ شيباني أسلم عليهم
يتواجه مع خالد وعامر في الحوش يخاشمهم ويحب روسهم
وعقب ماتحفوا بعض [ السؤال عن أحوال بعض ]
يسألهم غانم : من اللي جايكم ؟
يرد خالد وهو يطالع عامر: خطاطيب
غانم رافع حاجبه : منهم ..؟!! ويخطبون من ؟!!
عامر : ولد سيف بن منصور ..ويخطبون سارا
غانم ..: وش رديت عليهم ..؟
عامر وبنظره طويله لـ خالد : أمرها عند عمها خالد.
والولد بننشدعنه وبنشوف راي البنت ؟
غانم ..وهو يفكر ..: زين زين ..الله يكتب اللي فيه الخير ..بصلي وبجيكم عند العجايز
صلى في مقلط المجلس ... وهو بيطلع يسمع صوت في المجلس ..فتح الباب لقى خالد[ولد عامر]
يشوف تحليل لـ مباراة السعوديه وعمان ..ومندمج..: خالد ..خالد
يفز خالد : لبيه ..آمر يبه ويجي عنده ..
غانم ..وهو زام شفايفه ..: أنت صادق أن راشد يبي السوري ولا لا
إلا يبه وعمي خالد يدري بس ماكلم أبوي
يتصل غانم على خويه اللي بالكليه العسكريه : السلام عليكم حي الله ابو جاسم
وعقب السلام والتحفي وبعض السوالف
: أقول يا ابو جاسم ولا عليك أمر بغيت اكلم راشد ضروري أن كان ماعليك كلافه ..ولا نيب مطول
:...
: انتظرك ...ويسكر الخط
خالد وهو يرجع يقعد ويابلفيت زعلان : افا يبه منتب مصدقني !!!!
يضحك غانم ..: تدري اني مانيب مكذبك ..بس قبل لا اسوي شي لازم اسمع من راسه يقطع كلامه رنت التيلفون
راشد بفرحه : مرحبا والله عمرة مقبوله ..شحالك وشحال الجماعه اللي عندك ؟
غانم ..المرحب يبقى ..تقبل الله منا ومنك صالح الأعمال وكلنا بخير
اسمع ...بنت عمك عامر جايها خطاطيب
راشد بضيقه : ويــــش !!!
غانم وهو يمشي صوب الخيمه : وط صوتك لا تفضحنا في الرجاجيل اللي حولك ...اللحين انت تبي بنت عمك ولا لا
راشد بصوت واطي مهموم : ايه يبه وانا معلم أبوي لكنه عيا قال عمك غانم يخطبها ...يبه ..تكفى احجرها لي ..
خلاص ابشر بعزك وأنا أبوك ..أرقد وآمن ..لا تحاتي
راشد بشك : أكيد يبه ...
غانم وهو يقرب من باب الخيمه يلمح نجول عند مدخل فلتهم يغير اتجاهه : افاااا يا ابوخالد منتب واثق من عمك ...المهم سكر ذا اللحين وسلم على ابوجاسم بيض الله وجهه اللي خلاك لـ ذا اللحين تكلمني
لا تهوجس واجد أزهل الموضوع عندي .... يا الله فمان الله
يسكر ويصوت على نجلا ...: نجـــول نـــجول
جاته نجول تمشي سريع وبين ايدينها لفه : مرحبا في ذمتي بتاج راسي ..عمره مقبوله ..عسى متعبت يانور عيني
وتحب راسه وياخذ اللي في يدها : المرحب يبقى الله يتقبل منا ومنس صالح الأعمال ..شحالس ياأم العيون النجلاء ويحب [ يبوس ] غنوم الصغير
نجول : بخير دامك بخير ...والله يبه البيت ماله حلا من دونك
غانم شايل غنوم الصغير : زين تعالي معنا الخيمه مابه الا ابوانس ولا خالد في المجلس
وقف فجأه ولف عليها : وين السوري ؟
نجول وتدري بحنية عمها وحبه لهن: راقده جات متأخر من الجامعه وقعدت تدرس لـ أختبارها و يا الله قدرة تنتظر صلاة العشاء وصلت ونامت
غانم بتفكير ويمد لها غنوم : زين نــوم الـعافيه اقول يانجول
راشد يبي السوري واضنس داريه ابتسمت نجول واشرت براسها ايه
غانم وهو مركز في عيونها : زين والسوري لو خطبها بتوافق ولا لا
نجول :هاه ما ادري يبه أسألها [ وش اقول لك اقول تحبه الا تموت فيه ]
غانم وهو رافع حاجبه : نجول جاوبي قبل يزوجها ابوها ولد سيف
نجول تروعت : لا يبه لاتزوجونها ولد ما ادري من ... وتنزل عينها من الحيا وماتبي تكشف سر رفيقتها وبنت عمها ..وفي نفس الوقت ماتبي الفرصه اللي بتجمعها بمعشوقها رشود تضيع
نجول : يـ يـ يبه السوري من مؤيدي البنت لـ ولد عمها
غانم وهو يرجع ياخذ غنوم منها : زين زين يا الله الصبي برد وحنا واقفين برى امشي ندخل الخيمه


~~ حوش بيت عبدالله [ابوسعد]~~


ابو فالح وتركي بيظهرون من البيت الا السواق سوراج ينادي :بابا تركي ..
يلف عليه تركي
يمد سوراج لـه الكيس ..: بابا هذا انت ينسى داخل كيس لبن
عقد حواجبه وخذا الكيس وتوه بيفتح الكيس الا ابو فالح يصوت عليه: يا الله ياتركي يابوك سرينا
يحط الكيس المربوط في جيبه ويحذف الثاني
:
:
~~ غرفة أم عـوجان ~~

أمل تغط [تهمز – تمسد] ارجيلات أمها ...وتمسحها بفازلين ...
يـدخل فيصل وفي يده غرشة شامبو جونسون للأطفال ويمده لـعمته [أمل]
: عــموه هذا من اللي يساعدون اليهود ويذبحون الأطفال في غـزه
أمــل وهي تـجر فيصل وتحب خدوده :لـبى قلبك أيه حبيبي كل اللي من جونسون [ يعني كل منتجات شركة جونسون ] يساعدون اليهود اللي يذبحون أهـل غـزه
فيصل يطالع الشامبو ويفكر : عـموه يعني أقطـه
أمل تشوفه بنظرات حنيه : لا ياقلبي هذا انت شريته قبل تدري يعني الفلوس خلاص دفعتها وراحت بس خلاص من اللحين ماعاد تشتري منه
فيصل يقعد جنب امل على السرير :عـموه أنا اليوم العصر كنت اشوف التلفزيون مع جدوه وشفت هذاك الشيخ السـعودي امممممم نسيته ..قام وقف عند راس جدته :جدوه وش اسمه
أم عوجان وهي تلف ملفعها على عيونها : الـعريفي
يرجع فصول جنبها : وقال أسامي وااااجد ماحفضتها بس تذكرت هذا جونسون عشان انا احبه [ يقولها بحزن وهو يطالعه ] ورفع وجهه بس عموه خلاص أنا ماأحبه لأنهم يساعدون اللي يذبحون الأطفال حـــرااااام
أمل تمسح على راسه : تدري حبيبي عشان انت تركته لله وعشان ماتساعد اللي يحاربون المسلمين الله بيعوضك بشامبو أحلى منه في الجنه ...[ تحاول تقرب له معنى تعويض الله حسب سنه ]
فصول يبي يكمل لها : عموه اليوم هذاك ..مذيع فلسطيني قعد يبكي ..الـيهود هـدموا بيته واذبحوا اخوه ..والشيخ يقول اللي يشتري من الشركات اللي قالوا عنها يساعد اليهود ...ويلف وجهه عنها ..عـموه ما أبي اساعدهم
أمل تحضنه من وراء وتجره وتقعده في حضنها : لـبى قلبكـ الـطاهر ..جـعل ربي يحفظكـ أنت وأخوانـكـ
ينتبه فيصل للفازلين اللي عند أرجيل جدته ويأشر عليه : عـموه هـذا بعد من جـونسون
أمـل تعطيه الـعلبه : فيصل أنت في الصف الثالث يعني تعرف تقرأ ..خذ
العلبه اقرا وين مصنوعه وايش اسم الشركه
فيصل ياخذ العلبه : مصنوع في الهند والموزع السعوديه ...ويأشر على سطر مافهمه ...[ صنع في الهند بواسطة هندوستان يونيليفر المحدوده]
تقراه امل له يعني المصنع اللي في الهند ماخذ بس العلامه التجاريه [ وتأشر له على الأسم ]
فيصل : يعني عادي نستخدمه ..
أمـل عشان شافت مكتوب على العلبه ان الشركه الاصليه في لندن : وش
رأيك نسأل ونتأكد عشان اذا كان من اللي يحاربون اخونا في غزه نقاطعه
شافت امل امها نامت ولها شخير خفيف بصوت واطي: فيصل خلنا نطلع
عشان جدوه ماتقوم من صوتنا ..يهز فيصل راسه ويمشون بشويش ..ويسكرون
الباب بعد ماطفوا الليتات .
:
:
:
تلتقي في الصاله ببنات عوجان ... ريم منسدحه على الكنبه [ لابسه بجامه خفيفه تبين مفاتنها ] وماسكه الرموت تفرفر في القنوات ..نوره [ لابسه جلابية بيت ورافعه شعرها بكلبس..] قاعده على الكنبه الثانيه واللاب توب في حضنها ..
امل توقف عندهن : السلام عليكم ...
استحوا الثنتين ووقفوا يسلمون ..حبوا خدها الثنتين ..كل وحده من جهه ..ضحكت امل وضمت الثنتين ..: فديت قلوبكم ...ريمي ..نونو تتذكرون يوم كنتوا صغار ..تتسابقون من تحبني ..وتسون كذا ..
ريم ونوره يحبون أمل ..بس بسبب تفكير أمهم بعدوا عنها ...لكن مازال هناك شي من ذلك الحب ...
ألتفتت لـ ريم : ريمي بجامتس خفيفه ..وقلت لس من قبل ماتلبسين البجامه وتطلعين من غرفتس بها ..اخوانس رجاجيل ..حراااام يشوفونس كذا حتى ابوس مايجوز يشوفس كذا ..
ريم رجع لها تفكير امها ..ترجع تنسدح ..: افففف عموه عادي ليه مكبره الموضوع ..
فيصل ..يشوف ريم ..: ريم سلطان ذيك المره ضربس تبينه اليوم بعد يضربس قال لس ماتلبسين كذا قدامهم..
تقوم ريم يوم طروا سلطان ..ترقى للدور الثاني و اتحلطم امحق بيت ..وأمي راضيه وشعليكم مني ..
تلتقي بـ أمها في الصاله فوق ..متزينه ومتعدله ..[ معزومه ]
مريم [ مرة عوجان ] : وش فيس ...؟
ريم ..: يمه بجامتي فيها شي ..لو لبستها وقعدت في الصاله
مريم من دون اهتمام : عادي وش فيها انتي في البيت مهوب في الشارع .
ريم بحزن : يمه بس عمتي تقول وسـلـطـ...تقطع الكلام ..موجة غضب مريم ..: يعني ذا العله وش عليها منس انتي بنتها ولا بنتي ..
وتنزل الدرج ..بسرعه وبكل غضب توقف وراء أمل وتجرها من كتفها عشان تقابلها
تلف امل بسرعه من جرة مريم لدرجة انها بغت اطيح
ادز يدها إلي على كتفها.. وبكل هدوء رغم قوة صوتها [ وهذا يغيض مريم ان امل ماترفع صوتها ]: خير يامريم وش فيس جايه بشرس ..
مريم تحرك كفها في وجه أمل : اسمعي عيالي مالس شغل فيهم ..ليه تحرضين سلطان على خواته ..وكيفهم يلبسون اللي يبون ان شاء الله تقعد مفسخه مالس شغل
أمل وبكل ثقه تقعد على كنبه : اسمعي ...ذولا عيال اخوي يعني عيالي ..لو شفت غلط بتكلم ..ولا راح اخذ شورس ...
مريم اتوعد أمل ..: ماعليه ياالمطلقه بنشوف إذا جاء عوجان وش بتقولين ههه ... . معيوفه عقب شهرين وتبين تتحكم بعيالي ..
تطلع مريم رايحه لمشوارها متوقعه انها جرحت أمل بكلمتها
ماتدري ان هالكلمه ماتمثل شي لـ أمل جرحها من عوجان وسعيد اكبر من جرح [ المطلقه ]
فيصل يجي جنب أمل : عموه يعني أبوي بيضربس مثل ذيك الـمره ..
تضمه أمل : ياحبيبي لا تحاتيني ..لبى قلبك اسمع عوجان أخوي وحتى لو تهاوشنا او ضربني يظل اخوي ..يعني سلطان لما ضرب ريم ..مش معناه انه يكرهها صح ..يأشر براسه ايه ..
نوره قاعده جنبهم في خاطرها : عموه والله احبس ومايهون علي يجرحونس بس هي امي ما اقدر اوقف معس في وجهها ..هي أولى أني ارضيها ..
فتفضل نوره انها تسكت..
:
:
تقوم امل رايحه لـ غرفتها وفيصل ينسدح يشوف ام بي سي 3 ..ونوره تكمل اللي تسويه باللاب توب
:
:
:


يتبع

~~ في خيمة بيت غانم ~~

يدخل غانم شايل غنوم الصغير و وراه نجول : السلام عليكم
العجوز أم راشد مرحبا بالحامل والمحمول
نجول بضحك : افااااا وانا ماترحبين فيني الله يسامحس ياجدوه
عامر وهو رافع يده اليمين يشر له تجي جنبه: مرحبا باام العيون النجلاء تعالي جنبي ...
تروح جنبه : وتحب خشمه وراسه فديتك يبه أنت اللي رافع معنوياتي
أم راشد :وش مواعينس اللي رافعها لس !!!!!؟
هنا ضحكوا إلا ام خالد وخالد نقمهم بنظره تفشلوا واسكتوا
خالد : يمه يعني انه رفع من قدرها يوم انكم سفهتوها
تلتفت لها ام راشد رافعة عصاه : تضحكين علي يابنت المدارس والتلفزيون
عامر يمد يده يمسك العصى ونجول ميته ضحك ومـتـقيه في عمها عامر : يمه في وجهي
أم راشد ..: عشان عمس ولا كان ذا العصا بتشبع من ظهرس
تقوم نجول وتضم جدتها أم راشد من ورا وتحب راسها : فديت انا العصبيه ...يمه الله يهديس انتي على كل شي بتظربيني حراااام عليس
عامر يشاركها الدفاع : يـمه الله يخليس لنا ..بـتشوهينها وهي عادها طلابة نصيب
غــانم يقعد جنب خالد عقب ما عطا امه غنوم الصغير : على طاري طلابة نصيب ...
الـتفتوا كلهم عليه
غانم يوجه الـكلام لـعامر : أقـول يا ابوخالد ...ولا يهونون الحاضرين
الموجودين ..:لاهنت لاهنت
يكمل غانم : جايينك خطاب أنا وأبو راشد نبي سارا لـ ولدك راشد
يرتاح عامر [ وهذا اللي تمناه من زمان تكون بنته عند راشد]: قلته لك من قبل واقوله اللحين سارا أمرها عند عمها ويأشر على خالد فلا تخطب ياغانم مني اخطبها من خالد
خـالد ...فرحان أن غانم تكلم ما حب يحجر بنت اخوه عقب ماجوها خطاب وحس انه اللي ضيعها من ولده لكن الله انعم عليه بـ تصرف غانم ..
يلتفت خالد لـ غانم : ياغانم الـبنت بنتك والولد ولـدك
الـعجايز مايبون يقطعون الـكلام في أوله هم يبون سارا لـ راشد لكن يبون يضغطون على غـانم عشان يعرس
أم خالد توقف وتشر لـ نجول تشيل غنوم توديه داخل عشان مايتروع لو ارتفعت الاصوات : وأنا أقول مابه عرس لـ راشد لـين يعرس غانم
وان كانه يرضيه يعلق الصبي والبنت يقعد بليا عرس وذنبهم في رقبته
وتأيدها أم راشد : نــعم مابه عرس لين يعرس عمهم
تنهد غانم وخذا نفس طويل وقام مايبي يقول لهن شي يتعبهن ويرفع ضغطهن ولاهوب قادر يرضيهن : على خـير لا ذا اللحين مانشدنا البنت وراشد مهوب معرس لين يخلص من كليته تقدم من امه وجدته حب روسهن
لف متجه لباب الخيمه : يا الله تصبحون على خير وما ترك لهم مجال يكلمونه في شي
خالد وعامر لفوا على العجايز : يايمه وش قومس على غانم جاي فرحان ونكدتن عليه كان خليتنه لـ بكره ولا عقبه
ام راشد كانت الاسرع في الرد: لا اخوك أن ماجبرناه ولا بيقعد كذا
تكمل ام خالد : يعني عاجبك حاله دافن عمره في الشغل بين العسكريه وبين شركته ولا فكر لا بعرس ولا بزر يفرحنا به
أم راشد : لو أنه غالي عندكم كان عرفتوا منه وش علته يومن انه مايبي العرس
اللي يشوفه صاد من العرس يقول مابه رجله [ يعني عاجز ] لكنه طلب العرس قبل فويش اللي صادٍ به؟؟؟؟!!!
خالد : والله يايمه اني ماقصرت انا وعامر معه من سنين وهو يتصدد منا وقد حمست عليه شهر وانتي خابره ولابه فايده
ام خالد بيقين من الله: الله بيفرجها من عنده و بيهديه الله ذا المره وان شاء الله انه بيفرحنا ويعرس
الكل :آآآآآمين
:
:
:
~~ بيت ناصر بن فالح ~~
~~ حجرة تركي ~~

تركي طالع من الحمام مغسل أسنانه ونيته للنوم توه منسدح على سريره فز واقف تذكر الكيس اللي في ثوبه
قام وطلعه ... فتحه اول ماشاف المغناطيس ضحك وانسدح على السرير
والله منتيب هينه ياموضي ههههههههههههههههههههههههه
يمسك المغناطيس اللي على شكل نخله فهم مقصدها
[ كأنها تقوله الطول طول نخله والعقل عقل صخله ]
مردوده اذا انا نخله فـ انتي صخلة نصور
قلب المغناطيس وحفر عليه بقلم حبر جاف تاريخ اليوم وحطه بدرج الكمودينو
يكلم نفسه ...شكل الكور سوت مفعولها وفورت اعصابها ...يرجع للسرير يتلحف لكنه كل ماتذكر شكل المغناطيس رجع يضحك
لـدرجة ان فهد دق عليه الباب متروع من ضحكه : وش فيك !!!!!؟
صاير فيك شي ..!!؟ شارب شي !!؟ لا يكون موضي حطت لك شي في المرقوق !!؟
أشر له تركي لا : لا لا رح لا تقذاني ابي انام
فهد ... يسحب الغتره اللي معلقه على الشماعه جنب الباب ويحذفه بها: أنـا الغلطان اللي جاي اشوف وش فيك مستهبل ...ضحك تالي الليل ولا ربعك حاضرين [ يقصد الجن ] ويمثل الخوف ويتلفت حوليه الله يسكنهم مساكنهم
خلك مع ربعك اضحكوا وارقصوا سلام
بيطلع يسكر الباب وقفه تركي عقب ما استقعد على سريره وسند ظهره على راس السرير : تعال تعال خربت مزاجي
فهد بتعب : لا لا بروح غرفتي عندي كم ورقه لازم اراجعها عشان اجتماع الاقسام بكره
تركي يرجع ينسدح : اجل اذلف جيت بس خربت مزاجي وعقب تقول عندك شغل ..يا الله يالله برى وبند الليتات
يضحك فهد : هههههههه احلى طرده اهم شي خربت المزاج شكل بيت الخال له دور به سكر الباب قبل يقوم عليه تركي
يوخر تركي اللحاف من وجهه : ويفكر معقوله يكون كلام فهد صدق
لا لا موضي بزر وكانها اختي هههههههههه ثانيا انا قايل شروطي من قبل في اللي تكون ام عيالي وماتنطبق على الكوره
يرجع ينسدح ويحاول يقنع نفسه انها مثل اخته وينام على ذا الفكره
:
:
~~ بيت الخال عبدالله ~~
~~غرفة موضي~~

تسبحت ونشفت شعرها اللي يوصل إلى نص ظهرها ومقصوص مدرج بشكل دائري... ولبست لها بجامه شتويه بنطلونها كرهوات درجات الوردي وفانيلتها ورديه ولابسه دلاغات ورديه ورافعه شعرها بكلبس ورده فوشيه..
اطالع نفسها بالمرايه ..فديت قلبس ياموضي امــــــواه والله انس اجننين هههههههههههه تكلم روحها صدق اني هبله اتغزل بعمري ..تفتح اللاب توب وافتحت على الشفره اللي تكتب بها ذكرياتها عشان ما احد يفهمها
وبما انها مدرسة تاريخ فكانت تحب علم اللغات القديمه فكتبت باللغه.....اللي هي مسويه شفرتها مع الحروف العربيه ..
وصورت الكوره والشبكين اللي فيهم حلويات الكور بكميرتها الدجتل وصورة نفسها وهي تاكل وحده منهم وحاضنه الكوره طبعت الصور وطبعت اللي كتبته ..حطتهم على طاولتها ...
خذت كرسي التسريحه وحطته في غرفة الملابس عند الكبت [ الدولاب] وافتحت الرف العلوي اللي تحتفظ فيه بثلاث علب ..
العلبه الاولى:كاتبه عليها
[ اسألوا دمي .. وسعادتي وهمي
اسألوا التوفيق ..
والـكدر والضيق
اسألوا الطيب في صفاتي ..
والدعاء اللي في صلاتي
واسألوا شهودي ..
الدموع اللي في سجودي
اسألوهم .. واسألوا دمي ..
عن غلا أمي ]

العلبه الثانيه:كاتبه عليها...
حبيبي سعد..<< فراقك صعب تعبت من شوقي لك
[ أشتاق ولكـــن لمـــاذا أشتـــاق ولا أراه ..
أشتـــــاق ولكــــن أعجــــز عن البـــوح ..
أشتـــاق ولكـــن تؤلمنــــي الذكريــات ..
أشتــــاق ولكـــن أتمنـــى أن لا أشتـــاق .. ]
العلبه الثالثه: كاتبه عليها [ذكرياتي ]

تحضن العلبه الأولى وتقاوم الرغبه في فتحها [ العلبه اللي فيها ملفع امها وجلابيتها –مشطها – مكحلتها –نظارة القرأه – نوتتها اللي بخط يدها ...]...تكلم نفسها ما أبي أبكي ...خلااااص ترجعها بتردد في الكبت وتشوف الثانيه وتحاول تصد عنها [ ثوب سعد ..غترته..عطره اللي يحبه ..ملف شهاداته ..ألبوم صوره
..أشرطة الفيديو لرحلاته ...]..تسحب الثالثه وكلها خوف بعد فتره بتحط
رابعه لـ أبوها ..لا لا يارب طول في عمره ..وتنزل دمعة خوف وحزن ...تنزل
من الكرسي ...وتنزل العلبه ..على الأرض وتسجد باتجاه القبله وهي تبكي
يارب ...انك عالم بحالي وحيده ومالي الا أبوي يارب لا تحرمني أياه يارب متعه
بالصحه والعافيه ..وارحم امي وأخوي اللهم أجعل قبورهم روضة من رياض
الجنه آآآآمين ياكريم ..
تقوم ..وهي تردد الحمدلله على كل حال ...
تمسح دموعها ..وتحاول تتناسى حزنها على احبابها
تشيل العلبه وترجع للأوراق والصور اللي طبعتها ...
تفتح ألبوم ذكرياتها ...تثبت الورقه ..على جهه وبالجهه المقابله تثبت الصور ...
تاخذ الكوره وتكتب على اللون الفاتح منها

... وهي تضحك هههههههه لما تذكرت اللي طرشته له ... وش بتكون ردة فعله
تحط الكوره في العلبه ..وترجعها مكانها في الكبت..
تطلع تتطمن على أبوها بعد ..

~~ غرفة عبدالله [ ابو سعد ] ~~

تدخل موضي الغرفه مالقت ابوها تشوف الساعه ..: قدها عشر ومادخل من المجلس ..توها بتطلع تتصل له إلا ابوسعد داخل ..: مرحبا بحبيبة أبوها ..ويفتح أيدينه ...تضم أبوها وهي ماسكه عبرتها ..دوم تخاف تفقده ..
موضي ترفع راسها وهي للحين بحضنه : يبه روعتني عليك وشفيك ابطيت
يحب جبهتها ويرفع يده ينزل غترته ويمدها لها : عقب ماراح رجل عمتس وولده جاني عمس ومعه نايف ...
من نطق ابوها الاسم اعتفست موضي وبان الحزن على وجهها
ابو سعد : ماتبين تعرفين وش يبون ؟
يقعد ابوسعد على السرير ويمسك يد موضي ويقعدها جنبه : يا ابوس هذي رابع مره يجيني عمس ....نايف خطبس مرتين وعبدالله اخوه مرتين وكل مره تقولين ماتبين العرس
يا ابوس انا مانيب دايم لس ولا عمس بدايم لس ...ولا ابي اجبرس على أحد منهم وحتى عمس مايبيس تنجبرين على أحد بس خوفه عليس مثل خوفي ..
وش قلتي ياموضي
موضي وهي تمسح دموعها اللي تنزل من دون صوت : يبه ...يبه ..[ صوتها يطلع مقطع وتشهق ] يبه الله يطول بعمرك لاعاد تقول كذا
اذا تبيني اخذ أحد منهم بكيفك انا ما اعترض على أمرك
بس يبه ..والله اني استخرت وكل مره يطلع لي لا ولانيب مغضبة ربي الا اذا انتي تشوف شي ثاني
ابوسعد يمسح دموعها : يا ابوس انا ماقلت اخذيه عشاني ...
تقاطعه موضي : يبه تبيني أخذ واحد اخوه يبيني وتهاوشوا قدامي وبغوا يتذابحون
يمكن كل بنت تستانس ان عيال عمها يتهاوشون عليها بس يبه ذولا أخوان
ما أقدر يبه ..اتخيل اني أخذ واحد ومن كثر غيرته من اخوه اللي كان يبيني يعيشني بجحيم
يبه تكفى ما ابيهم يبه خلهم أخوان لي مهب عيال عم
ابو سعد وقف يائس من بنته وعنادها : بكيفس لكن شوفي ياموضي لو جاني عقبهم واحد ارضاه لس زوج بوافق عليه من دون شورس
موضي هنا تروعت وقفت وجات جنبه تمسك يده تحبها : يبه يعني بتجبرني على أحد ما أبيه
ابو سعد مايبي يضيق خاطرها بس خايف عليها اتبهدل لو صار له شي : روحي نامي ياموضي خليني ارتاح
موضي خافت ابوها يرتفع ضغطه ويصير فيه شي : خلاص يبه اللي تامر به تكفى يبه لاتنام وانت زعلان أنا مالي غيرك وتبكي بحزن
يمسح ابو سعد على راسها ويضمها لصدره : مانيب زعلان وعمس برد عليه انس عاده عياله اخوان لس لكن ان كانس بترضيني الرجال اللي بيجيني وارضى به عقب عيال اخوي بزوجس اياه
موضي اشرت براسها ايه وهي خايفه من ذا المصير بس وكلت امرها لله
تحب راس ابوها وتطلع رايحه لغرفتها
:
:
:
~~ غرفة فهد ~~

جالس على كرسي المكتب ..انتهى من آخر ايميل المفروض يطرشه عشان اجتماع بكره
وعقب فتح الايميل اللي مطرشته امل
فتح الملف [ امـ مجروح ـل]
يقرأ القصايد بندماج وماحس بالوقت
توه بيسكر الملف عشان يكمله متى مافضى وبالغلط اصبعه نزل الصفحات للصفحه الاخيره
ولفت نظره....
إلى ابن عمي ...[ لا أعلم من تكون ولكن.. أتمنى أن يكون لك وجود في واقعي كما أراك في خيالي ]
:
:
هنا ترك فهد اللاب توب وسند ظهره على ظهر الكرسي وسرح
ضرب بكفه على الطاوله : هههههههه والله وجا الحل ..من عند الله ...وان ماضبطت عودنا على مطوعنا
يسند ذراعه على الطاوله وكفه تحت لحييه [ ذقنه ]...ويضرب بالسبابه على شنبه الخفيف .. بتفكير : ولا نلعب على الحلين مع بعض ...يسكر الملف على نية يخمر الفكره لـ بكره اللحين هو دايخ وهذي يبي لها مخمخه عدل ..
يقوم يتوضى ويصلي ركعتين قبل ينام ..

~~ ثاني يوم ~~
~~ مدرسة الثانويه ~~

هيا ومنيره يسولفون عن بزارينهم
هيا : والله يامنور مارقدت البارحه عبودمسخن وكل شوي يون
منيره تصلح الدفاتر : الله يعينس يختي والله ياذا البزران واحد يصحى والثاني يمرض يختي كنهم يشتغلون شفتات يخلص واحد ويبدى الثاني
أمل تلتفت عليهم : لا تتشكون تعرفون ان الام اذا سهرت مع ولدها وكانت محتسبه الاجر لله كان لها اجر من سهرت في المحراب تتعبد
فحمدوا الله على ذا الاجر ومابه اجر من دون تعب
هيا وهي تحط راسها على الطاوله ومتوسده ذراعها تلف جهة امل : أمل ابي كافي [ شكولاته] يختي احس مافيني طاقه وعندي الحصه الرابعه تدريب البنات لمبارة دوري المدارس
أمل: لبى قلبس ..ماعندي لكن شوفي طاولة موضي ماتخلى من الحلويات
صاح الجرس وطلعت امل لـ حصتها الثالثه
قامت هيا ادور في درج موضي ومالقت شي وعقب انتبهت لشنطة موضي وفيه شبك طالع من طرف الشنطه سحبته لقت فيه [كافي] كور كلت اللي في الشبك ومابقت الا وحده وتوها تشاور عمرها تاكلها ولا تخليها
تدخل موضي جايه وهي شايطه وضايقه على الأداره : هيا انا بنجلط من ذا الوكيله بجي يوم وانا ذابحتها آآآآآآآآه جعل يسقى لاغيرت شغلتي
تنتبه لـ هيا واللي في يدها
تسحب اللي في يدها : هـــــويا جعلس الحــله [ يعني اسهال اكرمكم الله ] ليه كليتيه من اللي سمح لـس
هيا من غير اهتمام لهواشها : ومن متى نستأذن بعض في العيشه بكره بجيب لس مثله عشره
موضي في خاطرها [ انا الغلطانه ليه جبتها معي هنا ..ما أبي عشره آآآه ابي ذا اللي كليتيه .. مايخلون الواحد يتهنى بشي اففففف منس ياهويا]
منيره تسمع كلامهم وتضحك تاخذ الكوره الباقيه من يد موضي بسرعه وتاكها وهي تلعب حواجبها لـ موضي
موضي ...وتبي تحط الحره في أحد : اكليه ياجازورا ... تسحب الشبك وتمده لمنيره : هاس لحقيها الشبك بعد
هنا غصت منيره : كـح كـح وتشرب ماي
جعلس السلال ياموضي ماقوى عينس
تضحك هيا وهي طالعه : مكثورة الخير يابنت عبدالله
موضي تلف تقعد على كرسيها : آآآمين الله يكثر خيري ويبعد المتطفلين عني وهي تكش على منيره
ومنيره تضحك : مابه فكه منا على قلبس
تضحك موضي اللي تعتبرهم خواتها مهما صار : عسل على قلبي ولو انس تدبلين كبدي
اجيها خبطه من منيره
وتستمر مناوشاتهم اللي ماتنتهي
:
:
:
نفس اليوم
~~ الوقت 9 ليلاً مجلس عيال راشد ~~
~~ بعد.. عشاء رجعت غانم من العمره ~~
:
روحوا الشيبان ولا بقى الا الشباب
وتركي يسولف مع عايض ومنصور... وسالم يسولف في التلفون
خالد [بن عامر ]ومحمد بن عوجان وعلي بن سعيد يسولفون عن الجامعه
فهد يستغل فرصة انشغال الكل ينشد غانم اللي قاعد جنبه [ فهد قاعد على يمين غانم ]:
اقول ياغانم تعرف مدير تحرير مجلة بـروق ...[ مجلة للشعر ]
غانم قاعد ناصب رجله اليمين وماد ذراعه اليسار على المسند اللي جنبه .. ويلف عليه وهو يلعب بـمسباحه .. : هههههه ليه تبي تنشر قصيدك ..
يتكي فهد على المتكى اللي قاعد جنبه غانم ..وبصوت هادي : ايه ولا ..
غانم يرفع حاجبه بأستغراب : كيف ..!!!؟ وش تقصد ...؟
فهد ..: بقول لك عقب بس علمني تعرفه لان راشد قد قال لي ان بينكم معرفه
غانم ...يفتح بوكه ويطلع كرت ويمده لـ فهد : هذا كرته ومعرفتي به زينه .ولد عمه خوي لي ...وتحطه على يمناك ..اما هو معرفتي به سطحيه بس ان شاء الله انه بينفعنا
واللحين علمني وش تبي به
بعلمك قبل اطلع بس خل الموضوع بينا
يلتفت عليهم سالم ..: اقول وش عندكم اتهامسون ...؟؟؟
ويقوم ويقعد مقابلهم ... ...
فهد يبي يقهر سالم لانه خرب عليه يلتفت على غانم ويغمز له [ يعني مش معي ]: جعلك تسلم ياغانم ..وجهك ابيض بس سالم دق صدره وهو اللي بيدفع ...وخمسين الف مهيب مخسرة ولد الخاله
يفز سالم : ويــش متى قلته ..تكذب !!!!
غانم ...يكمل كذبة فهد : افااااا ياسالم ...ويلتفت لـ فهد خلاص يافهد دام سالم ..مهوب قد كلمته ..انا بدفعها واستر على ماوجهت منه
الكل ينتبهون لحركة سالم والصوت اللي ارتفع من روعة سالم وش فيكم وش صاير ؟!!!!
فهد يهز راسه بأسى وهو يشوف سالم : ابد سالم حلف انه يدفع ثمن تصليح تناكر المزرعه .....بس..يقاطعه..
تركي ..اللي فهم انه مقلب في سالم : جعلك قوي ياسالم ..بيض الله وجهك ياخوك ..
سالم ...يقوم يقعد في طرف المجلس : انقلع انت واخوك ..تبون تسرقوني ...ولا كذبتوا الكذبه وصدقتوها ...ويلتفت لـ غانم ..لكن مشروهي على ابو راشد [ غانم ] اللي ماشي في كذبكم ..
يضحك غانم ...وفهد على سالم اللي ضاق عليهم ..
تركي عقب ما هدى الضحك على سالم
تركي يأكد على الكل : لاتنسون العشاء ليلة الجمعه في المزرعه
ويلتفت لـ غانم ...وترى ابوي موصي على العجايز ..ام راشد وام خالد
عانم وهو يفز رايح صوب سالم الحمسان : جعلك على القوه ..وام راشد مايحتاج علمها ابو فالح انه قاعد عندها من مغرب ...
يدنق على سالم : يحب خشمه ..السموحه كن حنا زودناها عليك ...
سالم مايرد عليه يعني انه للحين زعلان
غانم يلتفت لهم ويشر بكفه ..بمعنى وش السواه بذا اللي نفسه شينه
يأشر له تركي وعايض اسفهه
فهد يبي ينرفز سالم زود : غانم من جدك تبي ترضيه اسفهه يارجال ذا مايعرف المزح
سالم يمثل الحزن ..:
لاخاب ظنك بـالرفيق الموالي ..مالك مشاريه على نـايـد الناس
يضحك فهد والباقين ويقوم يحب خشمه :
رضيت يالحموس يادافع البلا غديت كانك عجوز تزعل بسرعه
يدفه سالم : رح رح امحــق رضوه
وتكمل السهره بين مناوشات اصحاب

~~ يوم الاربعاء ~~
~~ العصر ~~

أم عايض في مقعدها ..تشوف المجد ..ومسباحها في يدها ..
يدخل عيها ...عايض وسالم راجعين من الـمسجد..
يقعد عايض جنب امه ويحط راسه في حضنها
سالم ..من عند الباب ..: متى بتكبر ...وتخلي حضن امي ..
أم عايض ..تمسح على راس عايض بحب ..ك ماعلي منه انت عندك حضن ام طلال وهو ماله الا حضني ..وتعبر متى بيفرحني ويعرس ...
يلف عايض وجهه صوبها ..ويسحب يدها يحبها ..: الله يهداس يمه ..قريب ان شاء الله بفرحس ..
سالم ..يبي يستغل الفرصه ..: زين دامه قريب اجل خل امي ادور لك عشان اول ما تقول ياعرس نقول اخطب فلانه
استقعد عايض وهو يضحك ...: زين يالخطابه رح وبشوف امي كان في خاطرها أحد ..
راح سالم والفرحه مهيب سايعته ان اخوه رجع يفكر بالزواج ..وقف على الدرج ..متسند على الربزين الخشب المعتق ...بس المشكله اني داري انه مهوب معرس لين تعرس امل ...يتنهد ..ويكمل طريقه لغرفته وهو يردد الله يوفق الثنين
في المقعد ..
أم عايض تمسح على راس عايض اللي رجع وانسدح في حضنها ..: وش رايك ..ببنت هادي ..المها ..
عايض يعقد حواجبها :أي هادي فيهم ..؟!!
ام عايض تبي تقرب له ..: شفت هيا مرة فالح ..بنت اخوها هادي ..
عايض ..: يمه ما كنها بزر ..
ام عايض ..: لا لا قدها في الجامعه..وبنت خالد ..نجلاء[ توم راشد ] قدها آخر سنه بالجامعه ..
وبعد عندك موضي بنت خالك ..ماعليها قصور ..زين وأخلاق ..جعل ربي يحفظها ..
وعندك روضه بنت سعيد ..امها شيما تنحط على الجرح يبرى ..
عايض بتفكير وهو يضم يد امه لـ صدره : لا سعيد وعوجان ما أبي نسبهم انا استحملت نذالة عوجان عشان خاطر امل ولا غيرها مايستاهل لو مصبوبه ذهب
أمه اتنهد بضيق رغم حبها لـ امل إلا انها حاقده عليها انها السبب في حال ولدها ...
أم عايض : الله يكتب لك اللي فيه الخير فكر بااللي قلت لك عنهن ...
يستقعد عايض : ابشري بس لا تخطبين لين اقول لس ..
تدخل عليهم الخدامه ..شايله صينية القهوه ..
يغير القناه على الجزيره الاخباريه ..
يدخل عليهم سالم ماعليه الاسروال وفانيله ..شايل طلال يحطه بحضن عمه ..ومعه مرضاعته
خله عندك ..ماخلاني انام ..ويغمز لـ أخوه ..وخدامته عندك تحت..
ضحك عايض ...: هههههههه زين زين يعني العسل لك وانا مربيه لـ ولدك...
مارد عليه سالم ...ورجع لغرفته
..طلول يلعب في لحية عمه اللي طولها من عقب اللي صار له من 5 سنين ..
ام عايض ترفع ايدياتها : جعل ربي مايحرمني اشوفك شايل ضناك ..
عايض يحبب يد طلول :آآآآآآمين ويطول في عمرس
:
:
~~ نفس الوقت ~~
~~ بيت ابو فالح ~~

ابو فالح وام فالح يتقهون ..
ام فالح تشرب فنجالها وبتفكير : اقول ياناصر ..كلم تركي إلى متى وهو ما اعرس قده ابو 33 سنه وش ينطر
ابو فالح يمد فنجاله لها ويتخير له فردة تمره من ملة [ وعاء] التمر: وانتي تحسبيني ماكلمته
كل ماقلته قال مهوب ذا اللحين ..وتوني من اسبوع مكلمه يقول بينتظر لين تستقر أمور شركته هو وغانم ..
ام فالح اتنهد وبضيقه : ليه ماعليه قاصر والعرس بيرده عن شغله ...
ابو فالح يضحك : وشفيس شاطه اليوم على العرس ..تبين حد يعرس ابشري اخطبي لي ..
هنا ام فالح ولعت تمد الفنجال عليه بضيقه وانكت شوي منه على كفه : ايه انت بتموت على العرس ومستعد ولا عيالك ماعليك منهم
ابو فهد يقهقه ويرجع راسه على ورى [ متعته يشوفها غيرانه عليه ] : يادافع البلا وانتي ابد ضو ماأحد يضحك معس إلا ولعتي ..
يدخل تركي عليهم توه جاي من دوامه يحب روسهم
ويقعد جنب ابوه : وش عندكم على الضحك جعلني ماخلى منكم ..
يضحك ابوه : ابد امك تبيكم تعرسون قلت دامهم ماطاعوس خلاص ابشري انا بعرس وافرحس ..
ضحك تركي لكنه درى ان موال امه بدى وبتقعد تمدح في ريما بنت عمه وخلود بنت عمته وموضي بنت خاله
قال مابه الا اطق لكن وين
توه بيقوم ..الا ابوه يجر يده : اقعد واسمع منتب رايح دورتك اللي عقب كم شهر الا وانت معرس
تركي يبي يرد لكن هيهات ..تقطع عليه امه
ام فالح : واختار من اللي حولك اللي تبي مانيب جابرتك على أحد ..ولا تقول لا وتتعذر بشركه تراني طقت كبدي منك انت واخوك [ فهد ] ما احد فرحني غير فالح
جعل ربي يرضى عليه وتمثل الزعل وعدم الرضى على تركي..

تركي ..يحس بهم كبير ..وقف : على خير ابشري انتي وابوي بس اصبروا علي شوي
أم فالح ترفع نظرها له وبضيقه أول مره يشوفها تركي :وش نصبر عليه هاه الى متى ؟!!!

ينقذ تركي من الهده دخول فالح ونصور
يسلم فالح ونصور عليهم
فالح يقعد جنب أمه ويهمز كتوفها بيده عشان تهدى : عسى ماشر وشفيس يا ام فالح ؟!!

نصور يناقز عند عمه : تكي سلني ..
يشيل نصور معه ويطلع قبل تفتح امه الموضوع من جديد
:
~~ نفس اليوم ~~

الساعه 5 مساءً..لابس ترينغ أزرق..وجوتي رياضه ابيض ..
يمشي مع أخوه.. خالد ..اللي ملزم عليه الدكتور المشي عشان صحته اللي تدهورت من فتره ..
يسولف ويضحك مع خالد ..
ينتبه لـ خويه حميد ..[ ولد عم مدير تحرير بروق ]اللي يمشي عكس اتجاههم ...يسلم عليه ويتحفى كل منهم الثاني وعقب كلن راح يكمل مشيه
يتصل في فهـد :السلام عليكم ..
فهد توه قايم من النـوم : وعليكم السلام
غانم يضحك على صوته : وشفيك ..راقد لا ذا اللحين يادافع البلا ..
فهد وهو ضايق عشانه قومه وهو عاده ماشبع نوم : وش عليك مني لا يكون انت اللي توزع النوم ...اخلص من تركي اجيني انت
غانم يضحك ومارد عليه
فهد : اخلص ليه داق وش تبي
غانم يوقف ياخذ ماي لـ خالد من سيارات الماي الصغيره اللي موزعه في نواحي ممشي [ سباير ] المدينه الرياضيه ..
: ما ابي شي انت اللي تبي
توني شايف ولد عم الرجال ..ذا اللي في مجلة بروق وتذكرت انك تبي منه شي قلت يمكنك استحيت ..تكلمني مره ثانيه
فهد وتوه يتذكر انه سج ذاك اليوم يكمل السالفه معه بسبب سويلم : الله يذكرك بالشهاده ..بيض الله وجهك ..اسمع يا ابو راشد بعطيك ملف فيه كم قصيده حول 5 اخترته من ضمن قصايد واجده ابيك تقراها واتنقى احسنها وتخليه ينشرها بأسم مستعار
غانم مستنكر آخر طلب ولا سالفة النشر عادي عنده : ليه تبي يحط اسم مهوب اسمك
فهد ..يقوم من السرير يتمغط : آآآآه ابد طال عمرك لأنها مهيب لي ..
غانم بـ تفهم انها لواحد من خويا فهد : زين يالشيخ لاتنسى انه لازم يعرف اسم الشاعر الصدق حتى لو بتنشر بأسم مستعار فا اكتب اسم خويك على الملف ولا طرشه لي مسج
فهد يمشي صوب مكتبه : خلاص لـ قريتها وحددت أحسنهن طرشت لك مسج بأسمه..
غانم : على خير ..في ..
يقاطعه فهد : غانم لاتعلم تركي خل الموضوع بينا والليله بمرك اعطيك الملف وتراه كاتب اسمه المستعار تحت آخر قصيده
غانم بأستغراب : ابشر ..خلاص انتظرك عقب العشاء ..
:
وانت بحفظه

~~ يوم الخميس ~~
~~ بيت ابو فالح ~~

ام فالح في المطبخ ...تآمر الدرويل والخدامه يشيلون الاغراض اللي مجهزينها لروحة المزرعه
يرن تيلفونها بأسم [ امل ] : وعليكم السلام
مرحبا يا بنتي ...شلون صباحس ؟
امل ..وهي تحط شنطتها على طاولتها :صباحي زان بسماع صوتس ..يمه ..الدريول بيمرس ينزل مواعين مسويتها عشان العزيمه اليوم ..
ام فالح وهي تأشر للسواق ماينسى كرتون
الاغراض :ليه كان ماكلفتي على نفسس ...
امل ..وهي اتملص من يد موضي .: مابـ....
تجر موضي تيلفون أمل ..: مرحبا ياعمه ..
ام فالح ..مستغربه : موضي ...وين امل
تضحك موضي :هذهي جنبي ..يمه فيه حلويات انا مسويتها البارحه عشان العشاء ..فديتس مري البيت وخلي الخدامه اطلعها لس من الثلاجه ..
ام فالح تحب موضي واتمناها لـ واحد من عيالها : فديت قلبس ..ياموضي كان ماتعبتي نفسس انت وامل ..مهوب لازم كان بقول لواحد من العيال يشتري لـهم جاهز ..
تجر امل تيلفونها عقب مافسخت عباتها ورتبت شكلها : هلا يمه ..فديتس ماراح
نـطول عليس ..واذا وصلتي المزرعه انتي وابوي ناصر كلميني ..مع الـ ..تتذكر أمل شي ..يـمه ..
ام فالح ..: لبيه
أمل ..: لبيتي في منى ..يمه لو نقص شي ولا نسيتي شي وتبيني أجيبه دقي علي ولا على موضي ..نجيبها وحنا جايينكم ..
أم فالح تسمع ابو فالح يـصوت عليها تمشي طالعه من المطبخ : زين جعل ربي يوفقس انتي وموضي
في امان الله
:
:
تطلع لـ أبو فالح وتيلفونها يرجع يرن لكن ذا المره ...بأسم وضحه
:
:

~~ نفس اليوم [ الساعه 10 الصباح ] ~~
~~ حوش بيت غانم ~~

حمزه السوداني واقف في الحوش قريب المطابخ ومعطي المطبخ ظهره : عـمتي ام خالد ...عمتي أم خالد
تظهر له ام خالد من المخزن اللي جنب المطبخ وهي مستتره عليها برقعها وجلال ضافي على جسمها : مرحبا ياحمزه ...عسى ماشر يابوي [ تعامله وكانه من عيالها له 20سنه عندهم وجاهم وهو ابو 18 سنه حتى كلامه صار تقريبا نفس كلامهم ]
حمزه : ياعمتي انتي وعمي خالد طلبتوا مني اشيل النخل اللي في بيت الريان قبل يهدمونه الحكومه
أم خالد تشر براسها : ايه ليه حد طردكم منه ولا عيا عليكم ؟!!!!!
حمزه وهو يمد كفه لها : لا ياعمتي بس وحده من النخل لقيت بين جذورها ذا الشي
تمد ام خالد يدها تاخذه : عطني اشوف ..
حمزه بخوف عليها : لا لا ياعمتي شوفيه وهو في يدي ولا بحطه لس في الشيول وشوفيه بس لا تلمسينه
ام خالد بأستغراب : لـيه يا ابوي ياحمزه ..!!!!؟
حمزه وهو يشر للسواق يجيب الشيول اللي في المخزن ويحطه لها فيه عقب ماطرش الدريول عشان مايدري بكلامهم : عمتي ترى انا قلت لـ عمي غانم بس قال لي ذا وصخ قطه ولا اهتم فيه بس انا شكيت أذكر جدتي كانت تقول
لي عـن

وأخيــــراً

كل دمعة لها نهاية .. ونهاية أي دمعة بسمة ..
ولكل بسمة نهاية .. ونهاية البسمة دمعة ! ...
ولحن الحياه بداية ونهاية ،، بسمة ودمعة ،، فلا تفرح كثيرا ،، ولا تحزن كثيرا
وإذا أصابك أحدهما فنصيبك من الآخر آت مع صفحات القدر ....



انـتـهـت ورقـتنا


قرأة ممتعه



همسه

..لكل الأحبه هنا ..اليوم ان شاء الله بـسافر ...فراح انقطع عن النت مدة تقريباً اسبوعين ..لو قدرت ادخل انزل لكم شي ابشروا وان ماقدرت فا أتمنى ان تلتمسوا لي العذر

ودعتكم الرحمن