كاتب الموضوع :
أمـ مجروح ـل
المنتدى :
الارشيف
الا يامطوله صبري . اذوق المر من كاسه
انا ياكم قسى دهري علي وكم قسو ناسه
تهنى من سلا قلبه ... مشى كلٍ على دربه
وطيت الشوك انا ودي .. ولا قبلي حدٍ داسه
احد مثلي بكى لما بكى دمعه ولا فاده
احد مثلي قسم همه معه في شربه وزاده
الا من كد صبري مثلي ... وانا في حالتي مبلي
وقل الحظ من صغري معي للحين هو عاده
على الله يابقى دمعي محد غيرك وفا ليه
جفوني كل هلي وربعي وانا مقفي على النيه
يادنيا لو على قلبي... احبك بس وش ذنبي
رضيت انا بردى حظي وحظي مارضى بيه
نصور الفتااان ..
واايه فديتك وفديت سوالفك الي تخرب ما تعمر والي بتكون يالفتان سبب في اشعال حربا ضروس وانت شغال رويتر ما تخلي علم(ن) شين عن موضي وسوالفها الا ونشرته .. ويا حلاتك يالفتان وانت تمص بالروب وتلعب بالعيشة وملوع جبد ثامر هههههههه ذكرت عرب عدنا كانوا يوم نحط الروب بدل ما يكلونه يسون فيه مساج لدينهم واريولهم والقهر محد ياكلمهم واسطتهم قويه ..
تركي ..
الله يعين الي تحطه في راسك يالفضولي ولا فضولي درجه اولى وما ارتحت الا لما عرفت بالسالفة والي خاشة عنك سالم .. وردة فعلك كانت طبيعية لو حد في مكانك يمكن سوى اكثر من هالشي .. لانه عمره ما راح يرضى ان اخته تنعرض كأنها انسانة رخصية او ناقصة .. بس بعد لو فكرت يمكن عايض يبغي يكفر عن الي سواه ويحاول انه يسعى في سعادة امل حتى لو كان على حساب مشاعره وحبه الي للحينه موجود .. بس مع ذلك اكيد انت ما راح ترفض اذا غانم تقدم لها وانك ادرى الناس فيه وهو الي يقدر يصون امل ويكون بخلاصها من عوجان الحمار واخوه الي ناوين انهم يزوجونها من واحد شيبه ..ويمكن بعد كلام فهد وانه حياة امل ممكن تدمر .. انك تحاول تسعى انها تكون من نصيب غانم بس كيف هالشي راح يصير .. ومنو هو المطوع الي يقصده فهد .. هل هو مطوع المسيد ولا شخصية ثانية مرتبطة بالاحداث ..؟؟؟؟
وعلوم موضي الي مهتم بها وتحاول تعرف الي قالته هذا يعني ان موضي تعني لك شي ولا شوه سبب هالاهتمام ولدرجة تاخذ نصور الفتان للجمعيه وتتعنى عشان تعرف شوه الي قالته .. وتوعدك بها وناوي تعلمها شوه المخنز يقدر يسوي كيف راح يكون هالتهديد وباي طريقة ..؟؟؟؟
عايض ..
حالتك تنرحم على كل الي سويته الا انك تعتبر مظلوم وظالم نفس الوقت ظالم لانك ظلمت امل بحياتها معاك وما حاولت تتعالج وتتخلص من الي الادمان على شانها وعلى شانك انت وحبك لها .. ويمكن كانت بتكون حياتكم افضل لو ما المخدرات الي هدمت كل شي فيك والي انهت على حياتكم مع بعض قبل لا تبتديها .. والندم والاحساس بالذنب الي تحسه فيه تجاه امل وانك السبب في حزنها وعذابها .. هو الي خلاك تفكر بمصيرها وسعدتها حتى لو على حساب نفسك ويعتبر هذا الشي كبير وصعب عليك وانت الي حبيت امل وما زلت تحبها وامنيتك وحلم حياتكو تكون من نصيبك تيي اليوم وتختار تكون من نصيب شخص ثاني بعد ما كانت لك .. وتعرف انها بتكون محرمه عليك حتى لو بالتفكير .. اعتبر الي سويته ناتج عن الحب الي تكونه لامل والخالي من الانانيه لان فعلا الي يحب بصدق يدور على سعادة الي يحبه حتى لو فيه هالشي تعاسته وحزنه ..
غاااانم .. غنومي ..
عمرة مقبوله وذنبا مغفور يا غنومي واقول انا وين شمس القصة وقمرها مختفي ثرك راح تعتمر .. واعتقد انك ما نويتها الا انك نواي على امر وتفكر في شي .. وعشان تقدر تاخذ القرار السليم الي يكون فيه خير لك .. بس بعد معرفة منو الي كنت ناوي تتزوجها ورفضتها امك .. شي بالموضوع الي يخلينا نشك كيف عرفت فوز وهي بعيدة ولا هي وحدة من اهلكم .. فكيف بغيت تتزوجها ولا ما فكرت بعدها تتزوج وتكون اسرة .. ممكن يكون السبب هم الي ساحرينك وبعد سبب رفضك للزواج كل هالسنين ..؟؟
فهد ..
الظاهر ان عندك سر يا فهد وشي مخفيه ومحد يعرفه عن حياتك وممكن يكون هالشي انك تحب ولا شوه تفسير دفتر الشعر ولا الخواطر .. والمسج الي طرشته .. واذا كان صح هالشي منو هذه الي انت تحبها هل ممكن وحده من اهلكم ..؟؟ هذا السؤال الي اجابته بتكشفها الاحداث ..
امل ..
الله يعينج يا امل .. كل شي مريتي فيه بحياتج امر عن الي قبله .. بداية من زواجج الي كان بداية عذاب ومعاناة والسبب اقرب الناس لج اخوج والي وما همه شي وهمه يرضي طمعه ويستفيد حتى لو على حساب سعادة اخته والانسان الي راح ترتبط فيه طول حياتها وهم عارفين انه مدمن مخدرات الي كان سبب ضياعه وضياع حياتج وحمل لقب مطلقة وانتي في اول عمرج .. بس مع ذلك الله ياخذ شي ويعطي شي .. ويختبر صبرعباده وقوة ايمانهم ويبتليهم عشان يختبر هل بيصبرون ولا بيكون اليأس رفيقهم .. وانتي صبرتي ورب العالمين بيعوض صبرج خير .. وخصوصا ان في ناس تحبج وتهتم ولج وتفكر فيج واولهم اخوانج الي ما يابتهم امج عيال ابو فالح .. وكل الي يحبون امل ..هم سند لج في الدنيا والملجا الي تلجأين له في الشدة .
روح الامل .. ورقة رائعة يالغلا وابداع فوق الوصف مشاء الله عليج .. كل ورقة عن الثانية احلى واروع من الي قبلها .. فعلا كل ورقة اقراها يزيد اعجابي باسلوبج وطريقتج الي تتميز بالواقعية الي نفقدها في الوقت الحالي بمعظم القصص .. وطريقة والوصف الدقيقة واايد اعجبتني وكاني اشوف الاحداث وردات فعل كل شخصية وتعابيره اللحظية .. الي تعيشج داخل الشخصية وتتعمقين فيها وبتركيبها .. وما اقدر اقول عشان اوصل لج رايي وانبهاري بكل ورقة بكلمات اعتبرها تبخس حق امل وحق قلمها الي اتمنى انه يستمر ببداعه الرائع .
التعديل الأخير تم بواسطة فروحه ; 10-01-09 الساعة 12:05 AM
سبب آخر: عدنـــــــــــا
|
08-01-09, 04:32 PM
جديد مواضيع قسم الارشيف
العرض العادي
