~~ بيت سعيد بن علي ~~
~~ غرفة أم عوجان ~~
:
:
الساعه 9:30 مساءً
أم عوجان على سجادتها اتسبح تدخل عليها دانه اتسحب
تسكر الباب بشويش عشان ماتحس بها تماضر وتكشفها
اتربع قدام جدتها وبوجه حزين تمسك يد جدتها : جدوه ما أقدر أنام وأنا ماعرفت القصه تكفين قولي لي
تبتسم أم عوجان : فديت ذا الوجه وشبيهته
ابشري يابنت سعيد
تبتسم دانه تدري إنها تقصد عمتها أمل فالـ كل يقول أن دانه نسخه من أمل وكأنها ابنتها أوأختها الصغيره
تنسدح وتحط رأسها في حضن جدتها : يا الله ياحبابه اضحكت قصدي ياجدتي الغاليه
أم عوجان تمسح على رأسها :
أيه أمل وهي بعمرس كلت قلبي تبي تدخل معهد عبدالله الأنصاري
وعيا أبوس وعمس وانا بعد كنت خايفه ماتقدر على المدرسه والمعهد
أبوس قال أول ثانوي صعب عليها مع معهد الأنصاري
تماضر بـ أهتمام واستغراب وش دخل دراسة عمتي بـ اللي سألت عنه
بس قالت يا الله خلينا نشوف وش تاليتها
جدتي شكلها طلعت الأرشيف كامل
بس المهم نوصل للهدف قبل ماتنام
ما أدري أسوي لها تركش كوفي وسهرها ابتسمت على الفكره
أم عوجان تواصل الـ قصه : المهم أنها طلبتني عقب نجاحها في أول ثانوي أنها تسجل ووعدتني توفق بينهم
وتوسط لـ ها علي عند أبوه وعمه ووافقوا
وسجلت وهي بثاني ثانوي
تماضر تقاطعها : جدوه هذا مهوب
معهد فضيلة الشيخ عبدالله الانصاري للقرآن الكريم وعلومه
اللي الدراسه فيه ببلاش ولأي جنسيه

أم عوجان : أيه ولا تقاطعيني ولا ترى بقوم أرقد واهملس
تماضر تنقز تحب رأسها : لا تكفين كلشن ولا زعلس

ما بغيتي تفتحين السالفه لاتسكرينها لين تقولين الأول والتالي
تضحك م عوجان فا دوماً دانه هي بسمة بيت سعيد وصاحبة
الروح المرحة او كما يسميها الجميع باللوتيه
تكمل ام عوجان : المهم أن عمتس صار يومها كله دراسه الصبح للمدرسه والعصر لـلمعهد
في أول الدراسه علي ولد عمس كان يساعدها ويسمع لها
وعقب عجبته هو بعد السالفه فصار
كل اللي تدرسه في المعهد كان علي يأخذه منها فصار يدرس معها بس من البيت
فصار هو بعد بين جامعته وبين كتب المعهد وحب العلم الشرعي
المهم ان ولد عمس عقبها بسنه تخرج ومع تخرجه
بدى يروح مع المشايخ ويحضر دروس الدين
وتطوع مع جمعية عيد الخيريه
دانه تقاطع جدتها : جدوه يعني صار مطوع صح انا أتذكره كان هو الوحيد في عايلتنا له لحيه أبوي وعمي بس عارض
وثوبه قصير
انتبهت ان جدتها تمسح دمعتها ماحبت تحسسها انها انتبهت خاف تزيد في بكاها : يا الله جدوه كملي
أم عوجان : المهم صارت قعداته معنا كلها نقاش في أمور الشرع والدين
ويسوي هو وامل محاضرات
وزادت علاقته بعمتس وكأنهم توم
وانجنت مرة عمس ماتبيه يقعد معها ولا يسولف معها
وأثرها من زمان وهي تاكل قلبه وتحرش عمس على أمل
لكن علي ما كان يرضى في أمل ولا يقبل فيها كلمه
فكان يحاول يرضي امه

والله أني اتذكر يقول لي واتعبر العجوز لكنها تكتم عبرتها : يمه يبوني ما أقعد مع أمل حد يهمل روحه
تدرين يمه انا أشك ان أنتي أمي وهي اختي الصغيره
وكان دوم يقول لي ليه مارضعتها امي يومنها انفاس بـ منى
دانه بـ أستفهام مثل ولد عمها : جدوه صدق ليه !!!؟
ومنى صدق ماتت وهي صغيره ؟
أم عوجان : منى جات مريضه والدكتور قال لهم ان قلبها ضعيف ويمكن ماتعيش
وانولدت قبل أمل بـ شهرين وتوفت وهي أم 4 شهور وهي نايمه
وعلي وقتها عمره 3 سنين
أم عوجان وهي تتذكر :


عقب ماقامت من غيبوبتها
تنشد رجلها علي من بنتها
ام عوجان : علي وين البنت ؟ بشرني أربها حيه ماماتت
أبو عوجان " علي " : أبشرس طيبه وبخير وفي الحفظ والصون عند جوزه بنت سلطان
ام عوجان ترجع تنسدح على سريرها : الحمدلله
لكنها استغربت ليه يخليها عند جوزه وتلف عليه : علي ليه ماخليتها عند مريم تبزاها مع بنتها
ايتنهد أبو عوجان : أول مابه عيت ويوم حايلها عوجان
وخذتها عندها عيت بنتس تسكت وكأنها تدري انها ماتبيها
وعيت ترضع لا من صدرها ولا من المرضاعه
ولا سكتت لين خذيتها منها
وخفت البنت تموت وأنا مافيني حيل ولانيب عارف للبزران
فأقرب مايلينا جيره ودم جوزه وهي والله ماقصرت
وبنتس من خذتها وهي زاينه صحتها
ام عوجان : الحمدلله الحمدالله الله يصلحها

تنقطع الذكر بصوت دانه
: سبحان الله يعني من كانت في مهادها ماتحبها
يمه أحسها شريره وعموه ياقلبي كانت صغنونه ماتدري وش السالفه
بس صدق البزر يعرف اللي يحبه
تبوس يد جدتها يعني كملي

: اشتغل علي ودخل دوره للدعوة " دوره لتخريج دعاه شرعيين "
وكان يقول لي ودي أرجع أدرس في جامعة الأمام بالمدينه
بس مالله كتب له
خلصت عمتس من الثانويه بنسبه عاليه
وسافرنا عقبها لـ تايلندا أعالج تذكرين
تماضر تهز رأسها أيه أذكر سفرتنا اللي طحت فيها وانكسر أصبعي وتأشر على سبابتها اليسرى وتبوسها ومرينا ماليزيا
مزينها ذيك الديره صورنا فيها اجنن
فديتني حلوه
تبتسم ام عوجان وتمسح على رأسها : عقب ماعودنا راح علي للعمرة

و في الليله اللي رجع فيها
دخل الصاله على صوت عمس وهو يهاد أمل

عوجان بضيقه : ويش ؟ وش فلوسه اللي لس عندي
مالس شي
أمل بـ أستغراب : عوجان ليه انا مالي ورث من أبوي
عوجان : اللحين حياتس كلها من اللي يصرف عليس مهوب ورث أبوس
أمل بـ أستغراب وبهدوء واحترام لـ اخوها الكبير: عوجان شلون والبيوت والعمارات وراتب أبوي اللي ينزل لي وأمي
يعني حتى لو فيه صرف علي بيكون من راتب أبوي
وغيره بيكون عندك
عوجان : جــــــــــــــــــــــــــــــــب ولا كلمه ماعاد الاذا تجين تحاسبيني
أمل بـ تصميم : عوجان انا ماطلبت واجد كل اللي طلبته
هو 50000 ريال
أبي أسوي لـ أبوي بير أرتوازي
في أفريقيا
عوجان يوقف وهو رافع عقاله وعيونه تنطق بالشر وبضيق وهو راص ضروسه :
أنا وش علي من الأفارقه جعلهم يموتون عطش انا مسؤول عنهم
اسمعي مالس شي عندي
أمل وقفت بـ أعتراض : عوجان يختك فكر مره ثانيه انا يتيمه وورثي في ذمتك , وش تبي بمال اليتيم ؟
ماحست إلا بطنين أذنها أثرصفعة من كف عوجان القاسي
يدخل علي في هذه اللحظه
ويسحب أمل ويوقف في وجه أبوه
امل تتمسك بظهره وتدفن وجهها الباكي فيه
علي يحاول يضبط أعصابه : يبه وش الجاري وش فيك على شيختنا
عوجان بضيقه وصوت عالي : شاخت اركبك
أنت وهي
عمتك كبرت وقامت تحاسب أخوها الكبير اللي في قدر أبوها
علي بـ أستفهام : وش تحاسبك عليه ؟
تتكلم أمل من ورا علي : علي كل اللي طلبته فلوس اسوي لــ أبوي فيها شي
ويقول مالي ورث
يلتفت علي ويمسك يد أبوه اللي مدها يبي يضرب امل وبضبط اعصاب اللي قدامه أبوه واللي وراه عمته إلا اخته وفي حماه :
يبه أمل في وجهي ولامنتب عادني رجال تضربها وهي محتميه فيني
ما انتظر رد أبوه لف لـ امل حب رأسها : روحي عند جدتي لين اتفاهم معه
يلف لـ أبوه
علي يبوس رأسه وخشمه : أقعد جعلني فداك :
:
:

~~ عند باب قسم الأقامه القصيره ~~
:
:
تركي واقف ومتورط يبي يروح يجيب السيارة مايبي يخلي ذا الخبل بروحها ياخوفي تخلي وحده من الممرضات تكلم نايف
والله يا ان سوتها أن اخليها تعيف عمرها
وخطر في ذهنه خاطر معقوله انها عايفتني وتبي نايف
هنا حس بنار في صدره
يسمع اللي يصوت عليه
سلطان اللي توه داخل من باب الطوارىء يبي يختصر الطريق للدخول للمستشفى عشان يأخذ الدور ويروح حمد للبيت
شاف سيارة تركي في الباركنك واستغرب نشد الرسبشن وعرف انه هنا
سلطان بـ اهتمام بعد السلام المعتاد واستغراب من شكل تركي
بثوب من دون غتره : تركي ؟!!! عسى ماشر ؟
تركي يمسح على وجهه بتعب : ماشر بس الاهل تعبانين شوي وبنطلع عقب شوي
سلطان : تركي شكلك يقول غير ذا , علمني ياخوك تراني اعين واعاون
هنا تركي قال في خاطره والله انك جيت في وقتك : مابه الا العافيه سخونه وراحت , وان كانك بتعاون فـ ولا عليك امر تجيب موتري لين الباب وانا بجيب الأهل على كرسي
سلطان بـ أستغراب : أبشر ماطلبت شي
تركي يرجع للغرفه وهو يزفر بعنف : يا الله انك تصبرني على ذا الشرسه
يازينس وانتي راقده
:
:
~~ المزرعه ~~

تيلفون موضي يرن تنتبه لها الجازي
خزنتي يتصل بك
عرفت انها بنت خال امها فـ ردت عليها
خزنه : السلام عليكم , كان مارديتي
حراااام عليس رفعتي ضغطي , شوفي كم مره داقه عليس
الجازي : احم , وعليكم السلام , مرحبا خزنه أنا الجازي
خزنه بأستغراب : مرحبا جزوي !!!!!!, شلونس ؟
ما انتظرتها ترد
جزوي موضي فيها شي ؟!!!
الجازي : هاه لا بس تعبت شوي ووداها خالي تركي للمستشفى
سكرت السماعه من دون ماتودعها

تتصل على طول في نايف تاخذ رقم تركي
نايف سبقها واتصل
:
:
~~ سيارة تركي ~~

موضي اللي منزويه في الكرسي المجاور للسواق
تركي سافهها ولا التفت صوبها

تذكر انه ما سأل سلطان وش جايبه للطوارىء لا يكون به شي
يمسك التيلفون يدق له
بعد السلام عرف إن سعيد مرقد
اتفق مع سلطان يمر عليه عشان يعرف التفاصيل
يجيه خط قبل يسكر من سلطان
نايف يتصل بك
يحول على مكالمة نايف وينهي الأولى
وهو يلتفت على موضي
وبقصد يشوف ردة فعلها خصوصا انه جبرها ماتغطي وجهها عشان تقدر تتنفس << طبعاً بعد ماتعدوا مناطق الازدحام والشوارع المناره

فا انفعالاتها بتكون واضحه له
تركي : مرحبا والله بنايف

لكن موضي ماكانت معه كانت سرحانه وتبتسم
تتخيل لو ان علاقتها بتركي غير مثلهم مثل أي اثنين مملكين
تتذكر الحلم
تركي ضامها ويهمس لها أحبس
بيظل مجرد حلم عشان انا اتمناه صرت اتخيله واتحلم به
تنتبه من تفكيرها على صوت تركي
هاس نايف بيكلمس
موضي بحرج مهما كانت تقول نايف اخوي إلا انها ماتجرت تكلمه الا نادر : وعليكم السلام , الله يسلمك
نايف بـ أهتمام اخو : موضي شي يوجعس يا اخوس ولا مضايقس علميني
هنا موضي ما استحملت نبرة الاهتمام والخوف عليها من نايف حست انه صدق اخ لها فاختنق صوتها : لا مافيني شي يا خوي
جعلني ما اذوق حزنك
تركي بمجرد انها قالت ياخوي حس براااااااااحه
بس ماتهنى بـذا الراحه لانه رجع وشب جوفه غيض

موضي : نايف ابي ارجع بيتنا قول لخزنه اتجيني
نايف: ابشري بكره انا وخزنه عندس ولا يهمس وان كانس تبين اللحين جيتس ولا تشيلين هم وانا اخوس
هنا موضي بكت ألم فقد سعد وفرح بتعويض الله لها بنايف
نايف تروع
تركي سحب التيلفون بغيض
تركي : نايف مابه داعي اجي انا بجيبها بكره وخزنه اجيها هناك
نايف بـضيقه : تركي وش انت مسوي باختي ؟
وش اللي يخليها تبكي كذا ؟ هذا وانتوا مابعد اعرستوا تبكيها , هذي الامانه ياتركي ؟
تركي بـكتم غيضه من موضي :والله ياخوك ماجاها مني شي يبكيها
لكن اختك مهمله قربت الدفايه منها وهي نايمه ولولا ستر الله كان احترقت واحرقت المزرعه بكبرها معها ,و لو إني داري اني لا أسعفتها ووديتها المستشفى بيبكيها كان خليتها
هنا نايف ارتاحي نسبياً لكن اصر في نفسه يجيه بكره وياخذها : خلاص ياتركي خزنه بدق تبي تكلم موضي
وبكره بـ أذن الله عندكم
سلام عليكم
يسكر من نايف ويحطه سايلنت وهو يزفر بـ ضيق
: ارتحتي اللحين خليتي الرجال يحاتيس ماكنس مع رجلس
وش جاس مني عشان تسوين ذا الفلم
موضي بغيض تمسح دموعها بطرف الغتره اللي ملفوف بها رأسها: والله راجع نفسك وشوف وش انت مسوي ولا وش قايل وعقب تعال حاسبني
ويكون بعلمك انا ماني مهمله ولا كنت بحرق مزرعتكم وماشغلت لادفايه ولا غيرها
الله يعين اذا بتظلمني من اللحين
تركي بتعب وضيق : الله يعيني عليس ما ادري كيف بتكون حياتنا؟
موضي تكتم عبرتها لكنها خانتها : دامك ماتبني ليه خذيتني !!؟
تركي بـ أستغراب : ومن اللي قال اني ما ابيس !!!!!!!؟
تركي لفظ سؤاله وهم يدخلون من بوابة المزرعه
لـف لها مره ثانيه وعاد السؤال
موضي وهي تفتح الباب : ما أحد قال لي انا سمعتك بنفسي
نزلت وما اسمعت سؤال تركي
: وليه وافقتي علي دامس تقولين إني ما أبيس ؟
:
:

~~ صالة فيلا المزرعه ~~

الكل قام يسلم على موضي
والبزران حوليها
أم فالح تبكي يوم شافتها بخير واجبرتها تروح الغرفه ترتاح

تركي يدخل يسلم على خواته
الكل يسأله كيف صار الموضوع
وصف لهم الحاله اللي لقى عليها موضي
هنا نصور خاف وزاغت عيونه خصوصا لما سأل تركي
: يمه من اللي مشغل الدفايه ومخليها قريبه من السرير ؟
ام فالح : والله ياولدي ما ادري ؟ لكن بنشد الخدامات ؟
تركي: زين ولا عرفتيها تصرفي معها ولا علميني عشان ماعاد تتعودها ذا المره عدت على خير
هنا يسمعون صوت صغير : حالي تكي
مي بـ شر لأن نصور مروعها ومطيحها من المرجيحه : حالي نثور هو اللي ثغل الدفايه
تركي واللي معه مستغربين يمسك مي ويحطها بحضنه : صدق !؟ من اللي يقوله يا مي ؟
تأشر على نصور اللي يحاول يمثل عدم المبالاه : هو دال لي أنا وحثن
حسن يهز كتوفه : ما أدلي انا ماثمعته
تركي يأشر لنصور بمعنى تعال: نصور تعال عندي
نصور يأشر برأسه بمعنى لا : لا انتي تذابه ويروح يخب عند موضي
يبكي عندها من تركي انه بيضربه

~~ غرفة ام فالح ~~

موضي تسبحت وتوها بتنسدح في فراشها يدخل عليها نصور مثل الاعصار ويحضن سيقانها
: مودي ويشهق مودي تكي بيدلبني
موضي بأستغراب تركي يضرب نصور تنزل لمستواه وتحضنه: ليه حبيبي ؟
نصور بعبره : عثان هاه عثان انا ثغلت الدفايه
بث والله عثان انتي تنتي بلدانه
مودي انا احبث ما ابيث تموتين
ويبكي
موضي تبتسم : لا تخاف انا بكلم تركي اللحين
ادق من تيلفونها على تيلفون عمتها وتطلبها ما احد يقول لنصور شي وانها تحلف على تركي ما يسوي به شي
نصور رفض يطلع ونام هذي الليله بحضن موضي
:
:
:
:
~~ يوم السبت ~~

أم عوجان فرحانه اليوم بتعود بنيتها
وتماضر وخواتها فرحانات برجعت أمهم لكن حزينات إن جدتهم بترجع بيت عمهم
:
:
موضي ارجعت مع نايف وخزنه بعد مجادلات مطوله بين عمتهم أم فالح وتركي
لكن نايف قدر يقنع عمته رغم رفض تركي
:
:
سلطان همه زاد بمشكلة عمه
لكن هذا مارده عن دراسة المشكله ومحاولة ايجاد حلول لها بأقل الخساير وخصوصا انه عطى عمه امل بوجود مخرج له من المشكله وبكذا ارتفعت معنويات سعيد
وطلع للبيت
:
:
غانم من حبه لـ أمل ولـ موقف سعيد ليلة الملكة
تتبع أخبار سعيد اللي لاحظ عليه الهم
وعرف مشكلته ما حب يحرجه فااتصل لـ سلطان
يناقشه ويعرض عليه حل
:
:
~~ اليوم الثلاثاء " الضحى "~~
~~ بيت ابوسعد ~~

موضي تبي تزور أمل وتشوف أغراضها وتعرض لـ أمل ايميلات نجول عن صور جناحها في بيت غانم واذا تبي شي معين طبعاً نجلا هي مرسال عمها لـ أمل

موضي تحب رأس أبوها وتقعد عند أرجيله : يبه
ابو سعد يبعد الكتاب : لبيه يا عيون ابوس
يبتسم يعرفها لاقدها تبي شي
ويكمل : وش تبين ولا كم تبين ؟
موضي تبوس يده : فديت قلبك ما ابي فلوس جعلني ماخلا
اممم ابي اروح العصر أزور أمل
ابوها عبس مايحبها تروح بيت عوجان : لا الا ان كان حد من بنات عمتس معس وضحه ولا نوير
موضي بتمسكن : يبه يمكن مايقدرون وامل هي اللي مكلمتني
والله ما أبطي
ابو سعد : انا بكلم عمتس تروح معس بس عقب ما تخذين الاذن من رجلس
موضي بروعه : ويش!!! ليه يبه؟ انا استئذن منك مهوب منه
اجل لا رحت اتقضى لعرسي استأن منه بعد!!!!؟
ابو سعد يمسك كتابه بنية اكمال قرأته : السوق يدري انس بتقضين ذا الفتره وذي عندي إذنها لين تروحين عنده
لكن زيارات بيوت فلان وعلان غير عمانس وعماتس لا لازم يدري
موضي بتأفف داخلي وضيق بين من عيونها : يبه تكفى انت قول له
أشر لها لا

موضي اخطرت في بالها فكره طلعت من عند أبوها
تتصل بـ أمل
موضي دخلت في الموضوع على طول : امول تكفين دقي لـ اخوس قولي له يعطيني الاذن عشان أجيس وشرحت لها موقف ابوها
اللي شارط موافقة تركي
تضحك أمل وتتصل بـ تركي
:
:
:
توقعاتكم ياحبايب




:
:

السلام عليكم ورحمة الله وبركاته

هلا والله ..با الامل ..

وش ها الزين وش الابداااع ..

في انتظارك ..

السلام عليكم ورحمة الله

أموله هو صدق ابطيتي علينا بالجزء وإلا من كثر شفقتنا عليه :)

تركي والله انه رهيييييييب وفعلا ماقصر بس البلا موضي مهي راضيه تهدي شوي وبين انه رومنسي وحساس والله انه حبيب <-- ياويلنا من زارا ههههههه

موضي قامت تبالغ بردة فعلها وحتى لو نايف ولد عمها ماتدخله في حياتها بحجة انه حسبة اخوها مو ساد عينها تركي هزلت !!!

الله يستر حاسه روحتها لأمل بيصير فيها شيء الله يستر من خليفه ,,,

اما هالخدامه فظيعه العرب وين وعي وين هههههههه

سلطان الله يحفظه هالولد بذرة طيبه متحمل همومن مهي بشوي ,,

علي ولد عوجان ماعرفنا نهاية السالفه ووش سبب وفاته هل عقب السالفه صار شيء وله علاقه بأمل ,,

دانه فديتها اللوتيه ياحلو سوالفها وتبي تسوي للجده تركش كوفي ههههه

نصور وبعه بعد حركااات حسون وميوه ياحلو ابزران بذالسن كل سوالفهم حلوه ,,,

غانم حبه راقي مثله ومن كثر حبه لأموله حب اهلها وقام يتنشد عن سعيد وبيساعده ياخبل امل اللي عادها متردده فيه ,,,

اموله تسلمين يالغلا على عالبارت الحلو وكوني واثقه ان كلي لهفه لما خطت يدينس الله يحفظها من كل شر ,,,

هلا امل اشتقنالك ابداع اموله روعه بعيني علي تركي جنان وانتي ياموضي الله يهداكي حني علي الرجال جننتيه وش تبين ب نايف ومعاكي قمرهم كلهم مشتاقه اعرف كيف مات علي منتظرينك حبيبتي ربي يحفظك لا تتأخري علينا

يعطيج العافيه اختي امل بارت مو طبيعي وخصوصا تركي

وموضي ،،، ابدعتي ،،، انطر البارت الجاي على نار ،،،