هذا قدري و مصيري و رضيت به

27-03-20, 07:08 PM

المشاركة رقم: 1

المعلومات
الكاتب:	ليندا
اللقب:	عضو متألق

البيانات
التسجيل:	Jul 2006
العضوية:	8173
المشاركات:	164
الجنس	أنثى
معدل التقييم:
نقاط التقييم:	71

االدولة

مدونتي

الإتصالات
الحالة:
وسائل الإتصال:

المنتدى : الروايات المغلقة

هذا قدري و مصيري و رضيت به

هذا قدري و مصيري و رضيت به

السلام عليكم و رحمه الله و بركاته

ترددت كثيرا لكتابه هذه القصه و لا اعلم هل ستقبل ام سترفض
كيف اكتبها بالفحصى ام بلهجتي
لا اعلم هل لمست بها ركنا حساس ام لا او هل تعديت الخط الاحمر ام لا
و لكن قصتي من خيالي تحاكي ما نراه في هذا الزمن و بعض منها يتركز على ظواهر و حالات صحيه نادره اتمنى ان تعجبكم

ملاحظه:
هذي الراويه لا تناقش اي امر ديني او طبي و لكن تلامس حالات طبيه نادره

و اتمنى ان تنال اعجابكم

بسم الله الرحمن الرحيم

الفصل الأول

في ظلمة الليل و كل اللي في البيت راقد الا هي قاعده على شبريتها ( سريرها ) تفكر كيف بتروح باجر حفله اربيعتها و اعز صديقاتها

هي تعرف ان اربيعتها ما بتسامحها لو ما حضرت حفل تخرجها و حفل خطوبتها, ليش محد يحس انها تكره جمعات البنات
و تستحي تكون بينهم ما ترتاح تحس انها ما تنتمي لهم, بدأ الالم يشتد في راسها و مسكت راسها و استغفرت

مريم: استغفرالله خلاص بتوكل على الله البنات ما بياكلوني لين متى بتم خجوله
حطت راسها و رقدت و هي
تفكر و عقلها شغال يفكر في حفل باجر لكن بتتوكل على ربها
و بتدعي ربها ان يعدي اليوم على خير و تتحمل معاير البنات لها و على شكلها.

***
عائله خميس بلال

الجد خميس و الجده مريم
عيالهم ( بلال, محمد, سلامه )

عايله بلال:
بو خميس: 50 سنه و ام خميس خزنه 40 سنه
خميس: 22 سنه اخر سنه له في كليه ساند هيرست العسكريه
مريم: 17 سنه ثالث ثانوي
نوره: 16 سنه ثاني ثانوي
خالد و خليفه: 15 سنه اول ثانوي
عبيد: 13 سنه ثاني اعدادي

عايله محمد"
محمد بو سعيد: 48 سنه و زوجته عفراء 40 سنه
سعيد : 22 سنه في كليه ساند هيرست مع ولد عمه
خميس: 20 سنه في كليه زايد العسكريه
راشد: 19 سنه في كليه التكنولوجيا
صالح: 17 سنه ثالث ثانوي
مريم: 10 سنين
روضه: 8 سنين

عايله سلامه:
ام سلامه 45 و زوجها نصيب 50 سنه
عيالهم مفتاح: 24 سنه و متزوج من بنت عمه جميله 20 سنه
تهاني: 19 و مخطوبه من ولد خالها خميس
نهايه: 17 سنه مع بنت خالها مريم
احمد : 16 سنه ثاني ثانوي

* تنبيه احداث القصه تدور في سنه 2001 ميلادي*

يوم الجمعه في بيت الجد خميس

الكل متجمع في الصاله الحريم قاعدين يتقهون مع اليده و اليد قاعد مع عياله و احفاده و البنات في زاويه يسولفن و حشرت الاولاد
و هم يلعبون كوره على البلاي ستيشن و يتحدون بعض و يتضاربون و بحماس مسوين حشره و جو و البنات يضحكون عليهم ان ماخذين موضوع الكوره و التصفيات كانه صدق

قالت نوره لهم بسخريه: اقول راشد تراك حشرتنا الا هي لعبه لا تصدق نفسك
راشد بعصبيه و متفاعل: سكتي انتي ام عنقوص جودي ابوت نتحدى بعض في المهارات

نوره بعصبيه: اسكت هذاك اول جودي يوم ياهل الحين انا شعري غير شو دراك لابسه شيله انا

يضحكون الاولاد عليها و نطق خليفه اخو نوره: احمدوا ربكم شباب في البيت تخرعنا بكشتها هاي السوداء

نوره بعصبيه: تغار مني لان طلعت فاتحه على امي و بعدين شعري انعم عنكم انزين مب انتوا فلافل يا الخوال

راشد بسخريه: سكتي مايكل جاكسون صورج و انتي ياهل سوداء كيف ابيضيتي ما ادري اشك من هالكريمات اللي تحطينها

طلعت لهم لسانها بقهر و بغرور لانها طلعت فاتحه على امها من بين اخوانها اللي طلعوا على ابوهم حنطيين مايلين للسواد

مريم: و الله صدقهم كنتي اسمر عني كيف ابيضيتي ياخي هالفودر اللي حاطتنه يغشنا ههههه
و ضحكوا الشباب عليها و عصبت نوره و بقهر لاختها: سكتي انتي شو دراج في الانوثه و بعدين هذا اسمه فاونديشن مب فودر شوفي شكلج جنج واحد من الشباب بهذا الشنب.
مريم تضرب اختها بوكس ع جتفها و تضحك: جب جب وين الشنب انزين ما اشوف
نوره بدلع: اي يعور و الله ضربج دفش قومي وين الرقه فيج
راشد: اقول مريم هاي رقيقه قومي لا تصيح علينا تعالي نلعب كوره بتحداج غلبتهم كلهم
مريم: هيه و الله بس براويك بكسر راسك

راحت لهم مريم و قعدت ويا عيال عمها و تمت تلعب و تتحداهم و تغلبهم كلهم و هي اختصاصها العاب البلاي ستيشن
و فازت عليهم و تحدوها بلعبه مصارعه و غلبتهم و تموا يلعبون لين اذن العصر و نشوا الشباب راحوا يصلون و هي راحت تصلي مع البنات داخل

دايم ترتاح يوم تلعب ويا عيال عمها بس ما تقعد مع البنات وايد تحس باحراج دايم يطنزون عليها و على شكلها
صحيح انهم خذوا جمال امهم الا انها ملامحها ما فيها انوثه و لو ما لبست العباه و الشيله بيقولون هي و اخوها توام او شخص واحد.

بعد الصلاه يت بتروح برع مع الشباب تلعب بس هم ترخصوا كل واحد طلع بيروح يلعب ويا ربعه و زقرتها امها,
مريم مب كانه لازم تروحين تجهزين لحفله اربيعتج.

مريم قبضت يدها بقو و كورتها نست الموضوع او تناسته ما تبا تروح بس ما تقدر على زعل اربيعتها و صديقه الطفوله شمسه و دشت على اختها نوره و هي مبوزه و نوره تدري ليش لان اختها ما تبا تروح
و نوره كانت مخلصه ميك اب و حطت روج وردي خفيف و ايلاينر وردي يمشي على لون فستانها و رمست بتهكم: يالله اخلصي خليني احط لج ميك اب اعرف انج ما تعرفين تتعدلين

وقفت نوره و بدت تعدل اختها و هي طايره من الوناسه, نادر ما تكون مريم كاشخه و اذا تعدلت
تطلع جميله توازي جمال اختها و رغم انهم يتعايرون احيانا لانهم من اصحاب البشره السوداء و يستصغرونهم
الا انهم معروفين بين الناس ان جميع عيالهم ناجحين و لهم مستقبل و بحد ذاته ابوها معروف في سلكه في الدوام
و يكفي ان رتبته عاليه في الجيش و في المهام مرافق للشيوخ

في قاعه البوم في دبي

البنات كلهم متجمعين و يايبين هدايا تخرج شمسه و في نفس الوقت هدايا خطوبتها و الكل ملتم
حولها و نعيمه ربي معطيها جمال ما شاء الله و اخلاق و تواضع و طيبه قلب كبيره و هي ابوها اربيع بلال بو خميس الروح بالروح
و من عايله معروفه في البلاد و عندهم الخير كله و حلال يتاجرون به

حفل عيال سعد الـ الكل يشهد به و يكون دايم حفل الكل يتلكم عنه و عن اللي يصير فيه من اناقه و فخامه و كان في مدخل الاستقابل
صف من المضيفات يرحبون بالزوار و قبل مدخل القاعه طاولتين على كل طرف فيها العطور و البخور للي حابه تاخذ منها و من غير داخل على كل طاوله مضيفتين يضيفون المعازيم

و في طاوله جدام قريبه من طاوله الفي اي بي اللي محجوزه لمعازيم ام شمسه من زوجات السفراء و الشيوخ كانت طاوله بنات الحر اللي ما يتمعون في مكان
الا و هم لازم يمسكون لهم حد يطنزون عليه و ينقصون قيمته بس لان ابوهم صاحب مركز و شان و يشوفون اللي دونهم ولا شيء.

قالت وحده منهم بغرور: بنات تظنون مريم بتحضر الحفل
خوله: ما اظن ياختي هاي ما تحضر حفلات البنات و اذا حضرت تلبس بنطلون و قميص جنها.... استغفر الله
مرام: جنها شو علمينا.
خوله: اظن هي من البنات المسترجلات يوم بتي شوفوا شكلها و الله واحد من الشباب
ساره: استغفرالله انا هذي الفئه ما احبهم ما اطيقهم يجحدون على حكمه ربهم و نعمته
ندى: هيه و الله خل نشوف كيف بيكون شكلها

و ما هي الا ثواني و دخلت مريم و اختها نوره و الكل التفت لهم خاصه لنوره لانها صوره من الجمال شعرها طويل و ملولتنه
و واصل لنص خصرها اسود سواد الليل و عيونها عسليه تميل من بعيد للون الرمادي و طول ما شاء الله و خصر ملفت
و محد قدر يكسرها ثقتها في نفسها كبيره لحد الغرور رغم انها ما تتكبر ولا تغتر لكن واثقه من نفسها
ولا همها كلام الناس و خاصه اللي يقول لها انتى لو شو ما سويتي اتمين بنت عبد.

و مريم ورى تمشي بتردد منزله راسها و على طول مشت لجدام لين الطاوله اللي حاجزتها شمسه للمقربات عليها و كرهت نفسها
انها لازم تمر بين كل هالطولات لين توصل جدام و الكل بيشوفها, كانت لابسه تنوره ناعمه و قميص مزري بالورد كت و فوقه شال شيفون
مع القميص ياي و فعلا مع تعديل اختها لها كانت جميله فعلا رغم طولها الفارع اللي تعدى طول البنات و بنيتها العريضه الا انها كانت فعلا جميله

دارت و قعدت على كرسي معطي ظهرها للبنات و قالت ندى بسخريه: سوير شوفي هذي هي مريم بس تصدقين غير شكلها الحين لكن يبين شكلها القبيح

ساره تطالع مريم: هيه بس ما اشوفها لابسه بنطلون مثل ما تقولون

خوله: ويه انتي شو دراج هي شكلها تعدلت عدل انتي لو تشوفينها في مدرستنا بويهها و شعر في ويهها بسم الله تخوف حتى صوتها ثقيل
ساره: معقوله ما ظن
ندى بتفاعل: شكلها تشل شعر وييها بموس عشان جي يطلع وايد اعوذ بالله من هالناس بس صبري براويج عقب الحفل شكلها الصدقي
ساره شو تقصدين , قالتها بخوف لانها تعرف بنت عمها لو بغت تسوي شيء بتسوي فضيحه و بتحرج الشخص ولا همها ابد الناس او مشاعر الشخص

بدأ الحفل و بدت الفقرات اللي ابتدت بفيديو يعرض صور شمسه من ولادتها لتخرجها و بعدين صور حفل عقد قرانها
و انتهى بصعود امها و القاء كلمه للحضور و افتخارها في بنتها و عقب الفقره اللي بعدها كانت العشاء و ثم توزيع الهدايا
و الاخيره كانت حفل الرقص.

وقفت مريم و قالت لاختها نوره: يالله مشينا ما احب اتم اكثر
نوره: شو بلاج الحين بنرقص يالله خل نستانس
مريم: تدرين ما احب الرقص ولا احب احضره
نوره: ليش انتي جي خلاص بطلي عادات الخجل ما بياكلونج البنات و بعدين شوفي شمسه تاشر عليج روحي لها فوق
مريم : لا لا ما بروح شو الكل بيطالعني.

تمت مريم تهز راسها من بعيد ان ما بتصعد لها و نعيمه فاهمه عليها عقب نزلت و سحبت مريم لها و الكل يطالع فيها و طبعا
مريم تشوف الناس يطالعون فيها و يتهامسون و اللي يضحك و توترت اكثر تظن يتلكمون عنها لكن كانت انظارهم عاديه و محادثاتهم و ضحكاتهم
ابدا مالها علاقه في مريم. بتوتر يت تمشي مريم بس مسكتها نعيمه يت مريم تسحب يدها و سحبتها بقوه و تخرطفت نعيمه
مسكتها مريم قبل لا تطيح و طاحوا من على الاستاند.

مريم بخوف: شموس سوري و الله مب قصدي ادزج بالقو

شمسه و هي تضحك: ههه ادري يالهبله بس تدرين دفاشتج شوي شوي عليه الحين الكل بيضحك علينا
مريم بتوتر: قومي اساعدج توقفين
قامت و ساعدتها و رجعت قعدت ع الطاوله و سمعت اللي وراها تصفر و تقول: عاش بو الشباب يستغل الفرص و يحضنها ما يروم على فراقها.
عصبت مريم و راحت الحمام عشان تهدي عصبيتها و يتها نوره تدري لو عصبت اختها بتتعب و بتنهار.
نوره بخوف: خلاص مريومه هدي شوي و انا اتصلت على ابو بكر و الحين بيي ياخذنا
مريم: ما اقدر شفتي شو قالت ندى دومها جي تعايرني ع شكلي انا شو سويت ليش دوم تشبهني بالمسترجلات انا عمري ما كنت جي ولا اتشبه او اعترض بخلقه ربي
نوره و هي تواسي اختها: ادري يا عمري و الله ادري خلاص اهدي شوي
الا و تدخل ندى و بنات عمها عليهم: ها عبود ما تروم على فرقى حبيبتك
مريم و بصوت واطي متنرفز: لو سمحتي طلعي برع
ندى: اوه بلاك معصب هدي هدي استاذ مريم
ساره: ندى خلاص بس عاد خليها في حالها

قربت ندى من مريم و هي تسحب ساره وياها و تقول لها شوفي كيف بنيتها شوفي و شلت ماي و رشته على ويه مريم و عقب يابت فوطه
و مسحت مكياج مريم بهمجيه و يلست تضحك على شكلها و قالت لها شوفي كيف خافيه اللحيه عدل شوفي

شهقت ساره و تمت تطالع برعب و اشمئزاز و قالت: انتي ما تخافين ربج كيف جي حرام و الله

صرخت مريم و بصوت جهوري: بس خلاص مصختوها عاد
خوله: يمه صوت ريال و هي تدز ساره على مريم
خافت ساره و اصرخت على بنية مريم العريضه و اللي كلها عضلات و رجعت بخوف و هي تشهق: اعوذ بالله شو مسويه في عمرها هاي يع يع
مريم طفح الكيل عندها و دزت ساره و طارت البنت بسهوله على الارض و عفدت فوقها تثبتها و تصرخ في ويهها.
مريم بعصبيه و هي فاقده اعصابها: لا تقولين عني جي و هيه انا اشل حديد و عايبني شكلي و عايبتني عضلاتي شو تبين اذبحج.
نوره بخوف و هي تشوف اختها بدت تفقد اعصابها و اذا مريم نست عمرها عادي تضرب اللي جدامها و تموته.

دخلوا السكيورتي على الصريخ و فرقوا بين ساره و مريم و ساره شعرها منتكش و فستانها منطر على صوب و
مريم معصبه و في يدها جزء من شعر ساره.

انتهى الوضع بلمت الحريم و الكل بدا يرمس و طبعا ندى ما قصرت و تمت تصرخ على مريم و تقول لها يا المسترجله و الكل سمع
و شلت مريم نفسها و طلعت و تحققت اسوء مخاوفها ان الناس يشوفونها بنظرت المسترجله

السلام عليكم و رحمه الله و بركاته ترددت كثيرا لكتابه هذه القصه و لا اعلم هل ستقبل ام سترفض كيف اكتبها بالفحصى ام بلهجتي لا اعلم هل لمست