المنتدى :
الارشيف
وعمري بقى سنة
ازيكم يا ليلاسيين
وانا قاعدة دلوقت في المنتدى و عيني جت فجأة على تاريخ اليوم اكتشفت انه مرت سنة كاملة على وجودي في ليلاس
ياااااه
سنة بحالها مرت وانا هنا بينكم
عرفت ناس كتير بتشرف بمعرفتهم
استفدت من حاجات كتير
واتعلمت حاجات كتير
قريت
ولعبت
وضحكت
وبكيت بعض الاوقات
وصار ليا هنا اصدقاء بعتز بيهم جدا وليهم مكانة كبيرة في قلبي ومش قادرة اتخيل انه ممكن يجي وقت وماشوفهمش
ناس كتير اتناقشت معاهم
منهم اللي لسة هنا
ومنهم اللي معدش بيشارك
مواضيع نزلتها
ومواضيع شاركت فيها
اول قسم دخلته وشاركت فيه كان الروايات بالتحديد روايات عبير
لكن ماستمريتش
وبعدين رحت المرسى
وباقي اقسام المنتدى
لكل اعضاء المنتدى:سعيدة جدا بوجودي معاكم
واتمنى دايما اكون معاكم
كلمات لبعض الاعضاء:
ola_mfs: صديقتي لوزة
لفتي نظري بردودك الشقية وطريقتك الساخرة, حتى خلطك الجد بالهزار كان جميل ويعجبني جدا, انتي اول حد ناداني باسمي هنا, واول حد اراسله ع الخاص في المنتدى
بتمنى ارجع اشوفك كتير زي زمان, وارجع اشوف موضوعات كتير ليكي زي الاول
Honey 1900:
انسان محترم جدا, سعدت بالمناقشة معاك في مواضيعك, ونورتني في مواضيعي, واجاباتك على استفساراتي في قسم الكمبيوتر كانت حلول سريعة للمشكلات اللي واجهتني مع الجهاز العجيب دة( بتتعاملوا معاه ازاي؟)
فعلا هاني الازمات الصعبة
مش هنسى ابدا خناقات موضوع كائنات انانية حشرية متوحشة, ولا موضوع هل يجوز اصطياد عريس كانت اوقات حلوة
وموضوع المذكرات بعتبره فضفضة برتاح فيه جدا, ورسالة الى احلى حاجة فيه بنقول اللي عايزينه وممكن اللي موجهة اليه الرسالة مايفهمهاش اصلا
اوقات كتير بكون قاصداها, امال بكتب ليه الرسالة من الاساس؟ غلاسة بقى
بشكرك جدا
فتاة الجليد الأحمر:
صديقتي العزيزة لين, اوقات يتهيألي ان عقلك اكبر من سنك, واوقات يتهيألي انك طفلة جدا
لكن برضه بتعجبني طفولتك دي, والفترة اللي مسكت فيها الحوار الجاد معاكي كانت فترة حلوة وكان لينا فيها افكار حلوة بس معرفناش نكملها بتمنى انك تنفذيها لو امكن
الياذة الواقع:
صديقة تانية شقية, مواضيعك دايما شقيةوتفجر قنابل شديدة التدمير في المنتدى, واسلوبك جميل جدا في الردود
سعدت جدا بمعرفتك
أم عمرو:
اختي الكبيرة نوسة
بحسك ام رائعة حنون, وسعدت جدا لما لقيت ان لينا هوايات مشتركة, واسلوب تفكيرنا قريب من بعض
واحشاني جدا
دلوعة بكيفي:
في البداية كنت بعتقد انك عصبية جدا, وفضل الاعتقاد دة جوايا لفترة طويلة
لحد مابدأت اقرب منك شوية ولقيت انك قلبك طيب وحساسة جدا
يمكن عصبية شوية
بتمنى ليكي التوفيق في دراستك
tonyrobinho:
عضو خفيف الدم, مجهوده كبير في المنتدى, وبعتبرك اخ اصغر واتشرفت بمعرفتك توني
واتمنى لك النجاح والتوفيق
الرومانسي الحزين:
بالرغم من انه غايب الا اني مانساش مواضيعه الطريفة, ومجهوداته وموهبته
ربنا يوفقه
ميلودي:
معرفتكيش غير من فترة قصيرة, لكن لقيت انك انسانة محترمة جدا وطيبة قوي
سعدت بمعرفتك
solly:
شقية تانية من بنات المنتدى, عضوة مرحة ومجهودها كبير بالرغم من صغر سنها, مختفية اليومين دول معرفش ليه
يمكن عشان الدراسة
وحشتيني سولي وبتمنى تحققي كل ماتتمنيه
نونو:
وادي واحدة تانية شقية
بس شقاوتك دمها خفيف, بس ياخوفي عليكي من البدلة الصفرا نونو خدي الحماية من نبع الحب, واوعي نونو تعملي فيا مقلب من مقالبك انا بقولك اهو
همس الطيور:
واحشاني جدا همس البلابل, لما بدخل موضوع فيه مشاركات ليكي انتي وعلا بعرف انه اكيد المناقشات هتتقلب لخليط رائع من الجد والهزار والسخرية والردود الساخنة, فاكرة؟
ربنايوفقك في دراستك وترجعي تاني
vueleve:
بالرغم من عصبيتك, الا انك عضوة بحترمها وبعزها, ومنساش انك نجدتيني لما دلوعة ورطتني ف رمضان ف عزومة الفطار
beautyfofo:
واحدة من البنات الاشقياء , لكن برضه شقاوتك دمها خفيف, ومقالبك بتوقع القلب, واوقات كنت بصدق فعلا لحد ماوصل لآخر الموضوع واكتشف انه مقلب
واحشاني مواضيعك وردودك
zahraa:
فينك يادكتورة؟
عضوة مثقفة ظريفة, عرفتك في من الجاني, واتمنيت اعرفك اكتر من كدة
في انتظار عودتك
silence sound:
عضو بحترمه جدا, واخ سعدت بمناقشاته ومواضيعه
بتمنى لك كل التوفيق
اسامي كتير لسة ف بالي لكن خايفة انسى
عشان كدة بقولكم كلكم بعزكم جدا وبتمنى لكم كل التوفيق
وبتمنى اكون دايما ضيفة خفيفة معاكم
اختكم اسراء
|
22-11-08, 02:19 AM
جديد مواضيع قسم الارشيف
العرض العادي
