بعت كل شيء واشتريت قلبي

السلام عليكم ورحمة الله وبركاته

zoooro

حياك الله مره ثانية كاتبه بين صفحات ليلاس و بين كوكبة كتابه



"بعت كل شي و اشتريت قلبي"

اجزم من البدايه انها بتكون مختلفه عن ابنتك الاولى
اعتمدتي على اسلوب الانا الواحدة و اسلوبك سلس للغاية و يجذبك للقراءة


مريم الجميلة و الغيورة من أختيها
الدلوعة لتتميز عن أختيها في مجتمعها
تعيش هي و عيلتها الفقر لتظهر بمظهر الغنى امام اهلهم و اصدقائهم
تربت تربية رائعة على يد والدنها و زرعت فيه كل القيم لتعيش و تتصرف
الى متى ستعيش هذه الحياة
ومالذي سيجبرها على بيع كل شيء و شراء قلبها


اعتبريني من المتابعين و إن من خلف الكواليس


كل التوفيق لك

القصة جيدة واسلوبك اعجبني وياريت رايك في اعمالي

مرحبا بكم احبتي ....لا ادري ما اقول ولكن جين ...حبيبة الكل ...انتي مثل نسمة هوا بارده بليلة صيف ولا شال صوف مسخن بالميكرووويف بليلة شتا ......اشكرج على تعليقج الحلو واتمنى ماتبخلين على بنصايحج الذهبية .......شكرا للاخ محمد فكما بدات قصتي السابقه بتعليقك ...هاهي قصتي الثانية تبدا به وهو شرف كبير
احبتي ليلاس ....اتمنى ان تكون تجربتي الثانيه ممتعه لكم ....في انتظار تعليقكم ........مع محبتي
زووورووو



مع بداية العام الدراسي ..................................
نظرا لظروفنا المادية الصعبة وعدم حصولي على بعثة قررت اقدم على جامعة البحرين اللي قبلتني مباشرة لان معدلي كان جيد جدا بشهادة الدبلوما ...مو ثانوية عامة ...قررت اتخصص بالبزنس ...وهالشي كدر خاطر الوالدة اللي كانت تبيني اتخصص مثل باقي الخوات ........نينا درست الطب بالديرة ...وتيتا تدرس نظم معلومات بالجامعه الكندية ومها تخرجت من فيزيا الطب النووي بلندن من سنة....اما انا ...فحسرة الوالدة فيني لاتصدق.....مرة سمعتها تكلم يدتي وتبكي ...كانت تقول لها
امي: والله اني خايفه على مريم ومستقبلها
يدتي: ليش...عاد ؟؟ البنت شزينها
: يمه حظها قليل ...لاهي شاطرة بالدراسه ولاهي مثل خواتها
:البنت زينه والكل يقول عنها حلوة
:يجاملوني يمه
: لاتسوين لج سوالف يابنتي ...ولا تحسسين البنيه بشي ...تراها تتأثر ويصير بخاطرها شي
: والله يمه ماقول بس قلبي يعورني عليها ....هذي بنتي
: انتي بس جدمي ربج بكل دعوة لها وهي الله بيوفقها بوللد حلال يسعدها
:ياااارب
انتهت سالفة امي مع يدتي وابتدت سالفتي ....يعني كل اللي تتمناه امي اني انخطب لواحد يرفع الراس ويشيل عنها ....اوكي يمه .....صار ...تبون واحد غني ...مو مشكله بظرف اسبوع يكون تحت امرج ....تبونه ريال وشخصيه ويعتمد عليه مو مشكلة يبي لي شهر وادبره .......كل اللي عليج يمه انج تسجلين الاوردر وانا انفذ ولاتشيلين همي !!!!!!!!!!!!!!!!

بالجامعه كنت قصة تتحرك على ريلين .....الكل عيونه علي ....ودرجاتي احسن منها مافي ...والبركة بالدكاترة اللي عندهم نظر ....والمصيبة عندي بس لما تدرسني دكتوره ...من اول محاضرة تبتدي نظرات العداء تتوجه لي فاضطر امثل دور الخايفه والمرتبكه واحاول دايما اظهر الاهتمام والاجتهاد (((ذكرووووننني دايما !!!اني ما اخذ مقرر تدرسه مره )))


صديقاتي بالجامعه قليلات وعادة ماتنتقدهم الوالده وتطلب اني اختار بنات عائلات محترمة(((الاحترام عند الوالدة يحدده كمية الممتلكات ))....دايما الاقيها تصرخ بويهي وتقارن بيني وبين نينا وتيتا
:شوفي رفيجات اختج ....اللي ابوها سفير واللي ابوها رجل اعمال
وساعات احسها تطالعني بنظرة كانها ماتبيني وتقول لي
: تكفين مرييييييييييييوم لا تعزمين رفيجاتج عندنا بالبيت ...مابي يدج يشوف العينه اللي تصاحبينهم

ياجماعه ...الاحساس بالاضطهاد ساعات يقتل الاحساس نفسه ...وهذا اللي صار لي ...ماحس بالقهر كثر ماحس اني ابي اقهر اللي حوالي ...ما يضايقني اشياء وايد ...بس بسهوله ممكن اضايق ناس وايدين ...شفيها لو صادقت وحده تشتغل عقب الجامعه بارت تايم بشركة اتصالات وتساعد بيتهم وتصرف على دراستها ....الوالدة تقول لا ...هذي بنت فقر ...بس بنت الفقر هذي تاخذني معاها بسيارتها لما تتاخر علي نينا وتغديني على حسابها من مطاعم الفاست فووود لما نتاخر بالجامعه ...معاها كنت احس بالراحه ...ومع كل حنانها اللي احس بالحاجه له ...كانت ماتطلب اي مقابل ...لا مادي ولا معنوي ولا اي شي .....بس عواطف!! بكل طيبتها وعفويتها ماكانت تعجب (( ام ربيعه)) الوحيدة اللي الوالدة ترضى انها تزورني كانت ميعاد...بنت عرفتها بتجمع طلابي وخذنا على بعض بسرعه .....ابوها واخوها عندهم افرع لشركات بدول الخليج وماسكين عدة مشاريع ويبين عليها العز ...لما تدخل البيت تصر تشتري للوالدة عطر من كلوي ولا من لوران ...وتحب تسولف عن اخر موضه ..واحسن مكان تسوي فيه حفلة عيد ميلادها ...وهالشي يفرح الوالده وتتمنى ينالني من الحب جانب ...وانا ما امانع بس مو بطريقة امي ...مع ميعاد اتصرف بتكلف ماحبه بس مادامت اهي حابة تتقرب مني كنت اجاملها... كنا نسولف عن اخر الموضات واحسن انواع البودروطرق الشادو الجديده ومن وين بناخذ هدوم العيد ..................اووووووووووف سوالف تحسسني بالمللل .....بس مضطره اجاريها


مرة من المرات ...عزمتني ميمي (((ميعاااد)) على حفل استقبال ..اختها
كانت توها رادة من الدراسة بره ومسوين لها حفله كبيره بفندق راقي ...وزيادة في البلوى ...اتصلت امها على امي وطلبت ان الكل يحضر ...اوهوووووووووو....بعد بناخذ نينا وتيتا ...والله ماروووح ....امي كانت بتيين ...منو اللي مايررروح ...الا تروحين لو تكون هذي اخر دقيقه بعمرج ...انا مابغيت على الله تنعزمين عند هالعوايل تقولين ماتبين
: يمه ماعندي فستااااااااااااااااان
: اخذي من خواتج
: مابي ...فساتينهم تلوع الجبد
نينا : منو اللي يلوع الجبد ياعديمة الذوق ...بيير كاردان ..ولا ستيلا مكارتني ....يا اوفر
: مابي اررررروح
امي: بتروحين ولا بيكون هذا اخر يوم لساني يخاطب لسانج .
:يمه انتي من صجج بتخاصمين علشان حفلة
طالعتني امي بحنان مو متعوده اشوفه وايد وقالت لي
:روحتج يمه بتخليج تشوفين الناس اللي احنا اساسا منهم واللي لازم تتزوجين منهم واللي لولا غباوة ابوووج جان احنا احسن منهم
طالعتها بضيييق وقلت لها اني مابي نينا وتيتا ييون معاي
ضحكت امي وقالت لي
: من حقج ...بس منو اللي بيردج غيرهم
: بطلب من ميعاد تردني اهي واذا ماوافقت مابروح
:اوكيه
واتصلت بميعاد وخبرتها عن الموضوع فوافقت بفرح جنها اهي بعد تبي توصلني
وعلشان تراضيني الوالده خذت من يدي فلوس وعطتني علشان اشتري لي فستان...........طلعت السوق ابي اخذ فستان ...وطبعا مشورة الخوات الممله تلاحقنيي بس انا مابي فستان ماركه ...ابي فستان يتكلم على جسمي ....ابي فستان يقول ...هذا انا ...وكنت اطلع من محل وادخل بالثاني ومحتارة بالفساتين بس بلخير لقيته ...فستان اسود ناعم وقصير وقصته عباره عن خيط يربط ورا العنق وعلى الظهر ربطات بحرف الاكس تبين اجزاء من الظهر وكان من سي كي مصنوع من الليكرا ويلصق بالجسم بطريقه وقحه ....ولان قوامي مافيه عيوب ...كان الفستان علي رووووعه .....بس نينا مارضت اشتريه وقالت انه جيييييييييب ومنظره يوحي باني بنت شوارع .....................مادري ليش اي شي يعجبني ...اكتشف عقب فتره انه قبيح وسيء بالنسبه لهم ...
اصريت عليهم اني اخذه والا مستحيل ارووح هالحفله ؟؟؟طالعتني نينا بغضب وقالت لي
: شكلج فعلا مابتروحين ...لان حتى لو احنا رضينا ...الوالدة مابترضى
:مو شغلي ابيه
: كيفج !!
وشريته ورديت البيت وجربته وامي معانا وعلى عكس ماتوقعت ....امي عجبها الفستان وقررت انها بتروح معاي بدون خواتي ....وعطتني شال ساتان اسود وطلبت مني اخليه دايم على كتفي
سويت شعري ديجراديييه (غجري ))ولبست كعب نص متر
نفسي احس اني طويله وماخليت مكياج ثقيل ...شوية بودر وشادو بني على اسود خفيف وطلعنا على الفندق ...امي بين كل دقيقتين تطل على شكلي...كان اللون الاسود يوضح بياض بشرتي ولون عيوني وشعري كان طويل وميلته على جنب علشان يبان ظهري من الفستان وتطلع حركة الاكس اللي ورا
.....................................................
الحفله كانت عامرة وامي تتصرف وكانها على طول تنعزم بهالفندق وتمشي بكبرياء وانا وراها امشي مشية اتقصد فيها ان الكل ينتبه احرك جسمي شوي واخر راسي شوي واطالع بلامبالاة وانا داخله وجدام كل العالم قبل لاندخل قاعة الحفله طيحت الساتان اللي على كتفي وامي كانت بتنفجر وانا طالعتها بغباء وكاني ماقصد وشلته ببرود ورجعت حطيته
لما شافتنا ميعاد كانت فرحانه اني لبيت الدعوه وصارت تعرف امها على امي وعلى مشاريع يدي وعلى اسم عايلة ابوي ووووووو
اما انا فدورت على حد اعرفه بالحفله ومالقيت ...افتقد عواطف بشدة في هالحفله
رجعت لي ميعاد عقب قتره وخذتني اسلم على اختها ...اللي ماحبتني من اول نظره ((عادي تعودت على نظرات الحقد اللي نابعه من نقص ...انا اساسا احمل هالاحاسيس ضد خواتي))...سلمت عليها ووقفنا معاها شوي وابتدت تعلق على اللي بالحفله......هذي عريضه ...وهذي اللون اللي لابسته مايناسبها ...وهذي منظرها جنها طالعه من غابه ...ووووووو...ووصلت الى فستاني ...وقالت ....تذكريني بممثله اوروبيه مثلت دور بفستان يشبه اللي لابسته
: قلت لها بعدم اهتمام ينرفز
: صححيييح؟؟؟
: اي ...كانت تمثل دور وحدة جييييب
رديت ببرود وانا اخذ لي عصير من الويتر اللي يمي
:على هالحال اكيد كانت جميييييييييييله
ضحكت ميعاد وطالعتنا اختها ومشت
طالعت ميعاد ببرود وقلت لها
: شفيها اختج
:ولا شي بس اهي طبيعتها جذي ...سوري مريوم على اسلوبها
:لا حياتي عادي ...........
وابتدت الفرقه تغني وكانت عباره عن فرقه شعبيه من ورا الستار وصارو البنات يرقصون ...وكنت اهتز مع الاصوات وابي ارقص وخايفه من الوالده اللي متحلفة فيني مارقص ...وميعاد تلح علي وانا ابي ...شوي وفكرت اطلب من امي اني ارقص جدام ام ميعاد ...لازم بتستحي ومابترفض وفعلا امي مانعت شوي ولما سمعتها ام ميعاد صارت تمدح في تربيتي واني جيت استاذن مو مثل بنات عالايام واصرت على امي تسمح لي ولمن دخلت الستيج كانو حاطين موسيقى مصرية والكل نزل وخلى الستيج خالي ؟؟؟
ماحبيت النظرة اللي كانت بعيون اخت ميعاد وهي تشوفني وصلت ومارقصت وقررت ارقص على صوت الدرباكه وربطت شال الساتان على وسطي وابتديت اهز....بصراحه هالحركات جربتها وايد بس ماتوقعت اني اقدر اجاري الدرباكه وكل ما اهتزكانو البنات يردون للستيج ويجاروني بالرقصه لين ما امتلت من يديد .................................خلصت الرقصة بقهر اخت ميعاد وفشيلة امي من بنتها اللي ترقص مثل رقاصات شارع محمد علي وازود و صداقات جديدة وعزيمة على حفلة شوي بمزرعه عند وحدة حاولت تجاريني بالرقصة وماقدرت ولماتعبت ظلينا نضحك انا وهي وتعرفنا وخذينا ارقام بعض
لما انتهت الحفلة كانت ميعاد تجهز نفسها علشان توصلنا ونزلنا للساحه الخارجيه للفندق ننطر السياره وشوي ولا اخوها وصل وسلم علينا وناداها ....كانو يتكلمون بحدة ورجعت ميعاد وقالت لنا واهي منحرجه انها بتوصلنا مع اخوها لانه مو راضي تطلع بروحها الساعة 2ونص الفجر ..........الوالدة مستانسه وهي تقول لها ونعم التربيه ماعليه يمه اهو ولدنا بعد...ورجع اخوها بسياره لكزس اخر موديل وقعدت ميعاد يمه واهو فتح الباب اللي يمه للوالده وصرت انا ورا ميعاد (((يعني بالمختصر في مرأى البصر ))
كانت عيونه ماتروح ابعد من المنظره اللي يشوفني منها وكان يكلم امي ويسالها عن عايلتنا ...وسالها
: عسى بس استانستو عندنا خالتي
:وي يمه ماقصرتو كل شي كان حلو ومستوى
:وممممريم ؟؟؟!!!
طالعته بعدم اهتمام من وين عرف اسمي هذا وشلون يقوله جذي بدون القاب وطالعت الوالدة اللي بين عليها انها فاهمه شي انا مابي افهمه ورديت ببروود
:حلوة
احسه ضايع ويطالعني جنه يبي يحفظ درس بيمتحن فيه....داخل نفسي ادري اني ماحب عينته ....بس حبيت اجرب لعبة الانثى معاه ...طيحت الشال وخليت شعري يغطي كتوفي وهو كان حاله غييييييييير...ولما نزلنا ماشلت طلعت امي بسرعه بحجة انها تبي تشوف خواتي وتطمن عليهم وتركتني مع ميعاد واخوها ....اسلوب امي قهرني احس انها تبي تبيعني بسرعه لاول شرااااي

....مادري ليش ماني حابه فكرة ان امي تشوف وتسكت بس ساعات اعذرها لما احط نفسي في موقع المسؤلية عن ولد واربع بنات
وصلنا البيت وامي كانت فرحانه جنها كانت بحلم وانا ماني مهتمه بالمرة .....ِشوي ووصحت من احلامها وهبت فيني تهاوشني على هالرقص اللي رقصته وتقول شقد كان لايق على الدور مع الفستان
وانها ماتوقعت ان عمرها كله قضته وهي تربي في بيتها رقاااصة
ياجماعه شفيها ؟؟؟؟حفلة بنات وانا اساسا من غيرشي دمي يرقص .....هالدور مع درباكة شاسوي احل امتحاان العربي؟؟؟؟

كنت قاعده بالكانتين بالجامعه ...اغلب صديقاتي كانو مشغولين بمخقرراتهم وانا عندي محاضرتين متاخر ونينا ماتقدر تييبني بالوقت فحضرت قبلهم بساعتين ....احس بملل مو طبيعي ...كل البنات مع بعض وانا بروحي .....هذي لا وهذي مايصير نصاحبها وهذي اابوها سمعته سيئه وهذي من بيئه اوفر ....بس يام ربيعه احنا بالكانتين كلناسوا ...مثل بعض ...بناااات مايشوهنا تاريخ اهلنا ...ولا ارصدتهم في البنوك ....بس بنات ...وانا غرقانه بتفكيري لمحته ...حاولت اتجاهله بس كان يتعمد يطل بويهي ويمر جدامي ...ماكان يطالع بحب ولا باعجاب ...كانت حواجبه نازله على انفه في توضيح جميل للوجه الغاضب ...مادري ليش احس اني مو مرتاحه من نظراته ....بس عموما انا ماسويت شي يحسسني بالخوف او بالخجل ...شوي وقرب ....شوي وكان يروح ويرد مثل حيوان بري محبوس بقفص....وعيونه كانت على الطاوله اللي انا فيها ...بصراحه ابتدو اللي حوالي ينتبهون ...وياكثر الشائعات بالجامعه.......وصارو البنات يتهامسون وهو يروح ويرد ....كنت قاعدة على الطاولات اللي بره الكانتين ولما حسيت الوضع صار مريب ....شلت اغراضي وكنت بمشي ...احس البنات يظنون ان بيني وبينه شي ...واول ما حركت الكتب من على الطاوله وقفني وقال .....لوسمحتي
طالعته بغضب ...كلامه معاي تاكيد لكل البنات اني اعرفه وما رديت عليه ومشيت معصبه وهو لاحقني ........................................................... اوهووووووووووووووووووووووووووووووو