بيت ابو فيصل
جناح فيصل
مكون من غرفه وصاله ومطبخ تحضيري
شذى جالسه في الصاله وزعلانه
فيصل : وهو يلبس بشماغه : ابي اعرف الحين وش مزعلك
شذى : تناظره بقهر : ابد سلامتك بس من يوم جينا وانت بس خارج و تركني لوحدي
فيصل: قلت لك قومي اوصلك عند امك ولا انزلي عند امي اسفل وانتي منتي براضيه
شذى : توقف وتروح عنده وتمسكه مع ثوبه بدلع : بس مهو معقول كل يوم تسهر لين الصبح مع العيال مهي حاله هذى انا بعيش برا على طول عشان ما تسهر مع غيري
فيصل : فديت الدلع وهله الي عليك ..و يبوس خدها..وش تبيني اسوي الشباب كل يوم واحد فيهم مسوي عشاء ..خلاص اوعدك ارد بدري اليوم
شذى : يعني برضه تبي تخرج خلنا نخرج نتعشاء برا انا وانت
فيصل : قلبي خلاص بكره اخرجك وعد ..وشافها كيف لمت فمها بزعل قرصها بشفتها وهو يضحك على زعلها ..
~~*~*~~
ام عامر : مريم وش عندك واقفه هنا
نوره :بلعت ريقها ولف تشوفها لانها واقفه خلفها: هلا عمه ...وتسلم عليها..وتحاول تغطي على هند خلفها وهي عند المرايه تعدل روجها
ام عامر: من يوم خرجت من البيت صايره تكلمها بنفس شينه و تكلمت بنفس خايسه و بصوت واطي عشان المكان الي هم فيه : وين البنات عساك ما جبتيهم
نوره :ضحكت بداخلها الحين مسويه عمرها تخاف عليهم : لا جبتهم ما تحرك عنهم لا تخافين طلعوا فوق مع الشغاله
ام عامر :قرصتها بنظرها بس عشان الي واقفه خلفها وهي شافتهم داخلين مع بعض وتبي تعرف من هي : من الي معك
مريم:يا ربي ما يفوتها شي و تدراكت قبل نوره ترد: امي هذى وحده من الي معي بالمدرسه..شوفي الصدف دخلت هي و نوره مع بعضهم
ام عامر : عدلت صوتها مثل عادتها لمن تكلم أي احد ما تعرفه بكل حب ود : هلا حياك تفضلي نورتينا بجيتك
هند: كانت تشوفها من المرايه حست بخوف منها وبطنها وجعتها بس لمن تاملت وجها فيها شي غريب بعيونها كانها تتظاهر القوه عشان تداري ضعفها من الداخل و سمعت كلامها مع نوره وتبلع ريقها مهي قادره فيه قصه بحلقها وشعور بداخلها ينبها تحذر من قربها رفعت نظرها ولفت تواجها و تسلم عليها : هلا عـ ... خاله وش اخبارك
ام عامر :تتفرسها وتقيم لبسها و هي من أي طبقه وحست ان البنت مستوها شي لانها لابسه فستان راقي و اضح من تصميمه و خامة قماشه و غير القلاده الناعمه الي عليها من حجر الزفير الاخضر وخاتم و احلاق مثلها : الحمد لله
هند: فصلت فستانها عند نفس المصمم الي فصلت عنده نوره الي بالنسبه لها ما يعني لها أي معني غالي بالعكس ما حبت انها تلبس بهذا السعر بس عشان يزيد رضيت فيه وكان عباره فستان ناعم من الحرير بالون الاخضر الغامق وبقصه انبير و باكمام تول من نفس الون : مبروك ما سويتي المها
ام عامر : الله يبارك فيك يالله عن اذنك نتقابل بعد شوي ...مريم دخلي ضيوفك وروحي شوفي اختك تبيك
مريم : زين ...وبعد ما راحت.. وش فيك خايفه باين عليك
هند: اتنهدت ..بقيت اموت خوفتني
نوره: هههههههههه والله لو تعرف لا تذبحنا كلنا
مريم: هههههههههههه امشي وانتى بطلي خوف ما يكفي يزيد كل شوى مزعجني يوصي عليك
هند: يابعد عمري
نوره : امشي اشوف قدامي..صايره بس نجيب اسمه تتغزلين فيه و تضيع علومك
مريم: روحوا انا بطلع عند مها اشوف وش تبي ..
دخلوا ونوره حاولت تجلس مع هند بطاوله مهي بالصدر عشان ما تكون محط انظار عمتها وخبرت أمها بعد ما سلموا عليها ما تجيب سيره لعمتها عشان تعدي الليله على خير ..
هند : دخلت الصاله وشافت فخامتها الي اول مره تدخل مكان بهذا الشكل بس ما بين عليها انها جاهله لهذى الاماكن وكانت نظرتها عاديه للمكان كانها متعوده منذ طفولتها على الرفاهيه والفخامه ..لانها تحمل قناعه ذاتيه بداخلها اوصلتها الى هذه النظره للمور الغريبه عنها ..حاولت تجاري نوره بالكلام وهي تاشر لها على كل وحده تعرفها..بس فيه شعور موترها وتحاول تتجاهله و تذكر ربها كل ما حست فيه
~~*~*~~
العنود بعد محاولات اقنعت اهلها انها تحضر لانها ودها تشوف مريم بس كان كل خوفها انها تبان بفستانها المتواضع بخامته وتفصيله انها مثل سندرلا حين هروبها بملابسها الرثه وسط طبقه مخمليه ..و طبعا مستحيل البنت تحضر فرح مهما كان عمرها الا معها وحده من اهلها و قدرت العنود تقنع مرة اخوها تحضر معها وصلهم ابو ركان القاعه و راح على طول ام راكان من اول ما دخلت وهي عيونها تلف بكل مكان حولها و تتحسر على عيشتهم و العنود لفت انتباهها الفخامه بس حاولت قد ما تقدر ما تركز نظرها بقوه في الشي الي يبين انها مفجوعه ومنبهره فيه بقوه و كانت كل شوي تقرص ام راكان عشان تزل نظرها وهذيك تتحسبن عليها الي جابتها لمكان مثل كذا بعد ما اعطوا المسئوله العبايات الي جات اخذتها منهم ..
ام راكان : شوفي العز تجيك تاخذها منك يووه والله عبينا تفشل شوفي هذى وشلون عبتها ..
العنود : بس لا تفضحينا خليني اشوف مريم وينها تراني حدي متوتره ..عدلى عبات جلبيتك بس ..و تناظر بشكلها في المرايه و تعدل شعرها المقصوص مدرج لنص ظهرها و مكره اطرافه ولابسه فستان ناعم نيلي بقصات مداخله في الصدر و فيه تطريز فضي و مسلوب من اسفل وطويل بين طولها ولون بشرتها الصافيه
ام راكان وهي تعدل العبايه على كتفها وتناظر المرايه وتتكلم بصوت واطي :مالت علي فرحانه بجلبيتي انها من اليشمك ..وحسره شوفي هم وش لابسين ..وضنيت اني بكشخ عندهم فيها.. شكلهم يلبسون مثلها لنوم (جلبيتها تفته فيروزي وكلها تطريز )
العنود : جاتها ضحكه بصوت عالي بس مسكت عمرها على خبال مرة اخوها : ام ركان اركدي الله يخليك لا تفضحينا انتي كذا كنك تقولين لهم شوفونا ما نعرف شي ..
ام ركان : تعدل الجلبيه على بطنها لانها حامل بالشهر السادس وقالتها بطريقه خلت العنود تضحك قصب عنها :ايه انتي يالمتعلمه كانك عايشه بقصر مالت عليك تاملي بالعز يمكن ما يعزمونا مره ثانيه ..(ام راكان بنت عم العنود ما كملت تعليمها وهي اكبر منها بسته سنوات)
العنود : صبرك كان ما خبرت ابو ركان انك جاجده خيره ..وسكتت وهي تاشر لها تكلم مريم ...وبعد ما جاتهم مريم اخذتهم عند نوره وهند و العنود قرصت ام راكان الي لفتت لها الانتباه من كثر ما تركز عينها على الناس ..
مريم : شوفي هذى نوره الي اكلمك عنها وهذى هند مرة يزيد ..
نوره : اكيد العنود صح ..مثل ما تخيلتك
العنود : سلمت عليها ...وش اخبارك انتي والبنات ..ليه كيف تخيلتيني ؟؟
نوره : بخير الله يسلمك ..ابد من كثر ما قعدت راسي مريم من سواليفها عنكم تخيلت شكلك
هند عجبتها العنود لها روح حلوه وجلسوا يسولفون مع بعض حتى بعد ما راحت عنهم مريم ونوره عشان يشفون باقي المعازيم ..
وقبل الزفه اتصل ابو ركان عليهم وطلب منهم يخرجون ..ومع اعتراض مريم على خروجهم المبكر بس ما قدرت تاخرها على اخوها ..وحلف عليها تتعشاء قبل تخرج
~~*~*~~
بيت ابو ملاك
البنات جالسين عند التلفزيون بالصاله الي فوق
منى : وهي تفك شعرها من الشباصه : وش رايكم اقصه
مي : لا بلا جنان هو قصير ولا تنسي كيف تبين تسوين تسريحه بعرسك لازم يطول شوي ..
منى : يووه تصدقين نسيت هههههههه
مي : ههههههه خبله انتي ..
ملاك : جالسه تاكل شكولاته بصمت ..
منى: يالدب يكفيك اكل بتنتفخين ..الا تعالي منتي ناويه تصبغين شعرك وتغيرينه
ملاك : لا ما ابي العب بشعري لونه هو حلو اذا ابغيره اسود
منى : قامت جنبها : خبله انتي الناس تغير شعرها ملون وانتي اسود مجنونه
مي : لا ما يناسبك الاسود ما يلائم لون عيونك وبشرتك
ملاك : طعم الشكولاته صار مر بحلقها ...وتكلمت بحزن : ياما تمنيت يكون شعري اسود ولون عيوني غير ..
محمد: قرب منهم : بس انا عاجبني شعرك ولون عيونك ..مناسبين لك اكثر
منى: يا اخي خاف ربك كل شوي تتغزل قدامي راعي مشاعري
محمد: غطي وجها بكف يده بلعب بوجها : هههههه خبله انتي
منى : سحبت يده : ليه شايفني جايه من مصح حمدلله والشكر وبعدين خلها تصبغ شعرها من باب التغير
محمد : اطلعي منها امنتى الي شعرك امية لون تحطين فيه ..يجلس ..ملاك ياويلك تغيرين لونه بزعل عليك ...منى صبيلي شاهي
ملاك : فضلت الصمت و لي كتنفته من يوم كانت في السابعه من عمرها تخاف وتجرحها الكلمه اذا احد تكلم عن بشرتها و لون عيونها ..وراقبتهم بدون ما تتكلم تمنت تكون اخت محمد عشان يعاملها مثل اخواته ..تخاف من نظرته لها تبي نظره اخويه نظره ابويه زوج لا
~~*~*~~
في سيارة ابو ركان
من يوم دخلوا السياره وام ركان تحكي الرجالها عن الفخامه والعز الي هم فيه وش الشي الي شافته
العنود: بس فضحتيني معد اخذك معي مكان مره ثانيه
ام راكان : ههههههه احلمي تخرجين من غيري خلي الواحد يشوف الدنيا والعز..هذا القاعه كذا وشلون بيوتهم
ابو ركان: بعتب ولوم : افااا ماهقيتها منك الحين انا ما ني معيشك
ام ركان : تداركت عمرها : خيرك مغرقنا الله يحفظك بس حلو نشوف الناس كيف عايشه
ابو ركان : تبين تشوفين الخير الي انتي فيه شوفي الي اقل منك لا تناظرين للي اعلى عشان ما تتعبين
العنود : ههههه حلال فيك سامعه يالفشيله انتي كله كوم وخبالها بصالة العشاء شي ما تعرفينه ليه تاخذين منه و بعدين تقولين لوع كبدي
ام راكان : مالت عليك بجرب حرام يعني ..و طول الطريق وهم مناقره هي و العنود وتحكي عن كل شي شافته
~~*~*~~
مر الوقت بسرعه والكل مبسوط وبعد ما دخل راشد عند مها ومعه عمه واخوانها وسلموا عليها وخرجوا وهم بالتصوير
راشد : بكل وقاحه من يوم دخل وهو عينه عليها يتفحصها و قرب منها و بصوت مدروس يذوبها : ياويل حالي كيف بنام اليوم وش رايك اخذك معي
مها : خجله منه و داعبتها نبرت صوته فيها بحه حلوه حبتها..وحمر وجها خجل وبهمس : راشد
راشد: وهو يلتهم وجها و جسمها بعيونه و عينه مركزه على صدرها المفتوح : يا ويلي ما خذه حلا بنات الديره ومجمعتك فيك وبعد بتلوميني ياعيون راشد انتي
مها : تكلم نفسها وهي منزله راسها الله عليكم مكبر كذبكم انتم يا الرجاجيل وتجرات و قالتها بصوت واطي : تسلم عيونك
وانزفت بفستانها بالون الفضي واسع من اسفل و عباره عن قطع مناديل منسابه بشكل ريش طائر و الصدر عليه رسمة جسم و راس اوزه تلتف حول الرقبه من جه وحده ويظهر الراس على الكتف من الجه الاخرى والظهر قطعه شفافه مطرزه ..دخلت بكل شموخ ممسكه بيده على ترانيم موسيقي مولفه لها ..و راشد كانت انظاره تلتف لمكن حوله لايفوته نظراتهم ..التي تلتهم ملامحه المبتسمه وبعد مكوته فتره قصيره خرج ..و بدوا يهلون المهنين يباركوا لها وام عامر تقف بجانبها بكل عنجهيه ..
مها : مسكت يد مريم الي و اقفه قربها : مريم وين هند ما جات
مريم : الا جات شوفيها طالعه
ام عامر سمعتهم وتشوف من الي جايه وكانو اكثر من وحده مهي عرفتها وكم وحده حامل
هند:قربت منهم بكل هدوء وبعد ما سلوا عليها الي كانوا قبلها سلمت عليها وهي مبتسمه : بارك الله لكم وجمع بينكم بخير يارب
مها : الله يبارك فيك ..
ام عامر: تمسكها مريم مع يدها وتقرب منها : من بنته هذى الي معك
مريم:حست بتوتر هي ما حسبت اليله عدت على خير : يمه ما تعرفينهم اهلها
ام عامر: وهي تتامل ملامحها : ما شاء الله عليها مزيونه لو مهي بمعرسه كان اخذتها لاخوك بدل الي ماخذها الي ما يندري عن اصلها
مريم : ابتسمت وتكلم نفسها آآآآه يمه لو تعرفين انها مرته كان حطيتي كل عيبه فيها و ما قلتي عنها الي قلتيه
هند: ما حبة وقفتها على الكوشه وترتها والناس تشوفها : الله يسعدك مها مع السلامه
مها: هند تعالي وين رايحه يزيد بياخذك الحين والحفل بعده ما انتها
ام عامر :سمعت كلام مها لان صوتها وصلها تكلمت مع سكوت المطربه و ناظرت مريم ودها تذبحها : آآآه ياقليله الخاتمة تكذبين علي ...وتقرب من مها و هند و تكلمها وهي تغلى ويدها تاكلها وتقطعها بضروسها و تضربها قدام الناس و تكلمت بكل تعالي وكبره وكل كلمه كانها سهم تنقرس بقلب هند ... انتي وش جايبك هو الي باقي ناس حثاله شحاتين ما ينعرف اصلهم يحضرون افراحنا طلعي برا لا شوف وجهك..ولا تفرحين كثير .. منتي مطوله معه ..
مها : يمه الناس بيسمعونك
مريم : يمه لا تفضحينا
ام عامر: و تكلمهم بصوت واطي شوي : سكتي انتي وهي شغلي معكم بالبيت... و تاشر على هند ...هيه انتي طلعي وش تنطرين
نوره : جات تجري من اول ما شافت عمتها عند هند وشكلها معصبه ومريم و مها واقفين عندها : خير وش فيه
ام عامر : طلعي برا يا وجه النحس ..
هند:قوتها نسحبت منها و من توتهرها حركت جنينها السريعه اربكتها و سببت لها مغص اخرسها والدمعه بعينها
ام عامر: روحي انتي واهلك النصابين قدرتوا تقصون على ولدي ولعبتي عليه لعبتك صح بس لاتظنين بطولين معه ..وبتشوفين كان ماهو طردك
بعض الحريم سمعوها : وش فيك يا ام عامر عسى ماشر
ام عامر:عدلت من نبرت صوتها وتتكلم بكبره: ابد سلامتكم بس هذى الي سمعتم عنها و قلت لكم عنها الي يزيد ما خذها الي كان يساعد اهلها وتخزها بعيونها بس قريب بتحضرون عرسه خطبت له وحده من مستواه عشان كذا لما عرس اول ما سوينا له عرس..لانه مهو بعرس وهو ناوي يردها لهلها بعد ما تولد لانه مهو قادر يعيش معها مستوي تفكيرها شعبي
الكل نصدم من كلامها
هند:بصعوبه خرج الكلام من حلقها : الله يسامحك يا عمه وفاضت دموعها على خدها ونزلت تسحب رجولها ما تشوف طريقها
ام عامر: عمى الدبب بعينك ان شاء الله قال عمه قال
نوره تنزل بسرعه و راها
مريم :عاتبت امها بس بصوت واطي عشان محد يسمعها : ليه حرام عليك تسوين فيها كذا
ام عامر:خزتها بعينها تتوعدها : انقلعي عن وجهي وبعدين تعرفين شغلك انتي واختك
مها: جلست على الكرسي وسكتت..و توتر الجو
ام عامر تلحقها بنظراتها وهي خارجه القاعه و عقلها فيه الف مخطط عشان تتخلص منها والي قهرها انه مهتم فيها مخليها من مستواهم ..و راحت لضيوفها تشوفهم وتدخلهم للعشاء
~~*~*~~
في مستشفى الامل
يوسف جالس على السرير ويتامل في من حوله مناظر محزنه اعمار مختلفه عنابر واقسام متعدد حسب الحاله التي وصلوا اليها و دمعت عينه من القهر الذي اصابه على حاله وحال غيره نتيجة ذهاب عقولهم وتعاطيهم المحرمات وحزن على من هم خطهم الشيب وذهبت عقولهم فاليوم بكى من قهره على ما حدث لمسن في الخامسه و الستين دمرت كل خلايا دماغه و بعد علاجه من ادمانها تم نقله الي مستشفى المجانين لانه لم يعد بوعيه .. واخر يعري نفسه من ملابسه بدون وعي منه و يتم عزله و اعطائه جرعات من المنوم وهناك من يضرب راسه في الجدار ويعزل بغرفه محميه باسفنج عازل ..بكى بصمت قاتل على ما اوصله الى هذا المكان بكى قرت عينه التي فقدها وهو ليس بوعيه اطفئت عنه الانوار بوقتها المحدد حتى ينام الكل بعد اعطائهم المهدي و ظل هو عيناه تبرق في الظلام الذى اعتاده لان ذلام روحه يظاهي الظلام الخارجي
~~*~*~~
هند: دخلت صالة الحمامات وهي تبكي وتمسح بدموعها وترجع تنزل مره ثانيه وتحاول تاخذ نفس عميق تعدي اعصابها و تغلصات بطنها ..
نوره: واقفه عندها : هند والي يعافيك لا تبكين انسي الي سمعتيه انتي كنتي متوقعه هـ الشي صح ولا لا
هند: بصوت باكي : تقول أي شي ..تسبني بس ..لا تاخذ يزيد مني ..والله اموت
نوره: تحط يدها على كتفها : يا خبله صدقتي كلامها و انتى تعرفين يزيد وش كثر يعزك عمره ما راح تقدر تخليه يعرس عليك ولا يبعد عنك
هند: وهي تمسح دموعها : مدرى كلامها فيه شي يخوفني احس انه يبي يصير
نوره: خلاص انتي لا تحطين بخاطرك ما راح تقدر تسوي شي وهذا انا قدامك على قد ما كانت تزن على عامر يعرس واخاف ما صار شي الحمدلله
هند: نوره ولي يعافيك يزيد ما ابيه يعرف شي عن الي صار
مريم : دخلت عليهم وباين انها متوتره : هند يزيد ينتظرك برا
هند: خبرتيه الي صار
مريم : هو اتصل علي كانه حاس بالي يصير وعلمته
هند:وبلوم : ليه حرام عليك ليه قلتي له
مريم: وش تبيني اقول خليه يعرف هو مسيره بيعرف اذا مهو منا من كلام الناس الي الحين في الصاله
هند:مسحت دمعتها الي رجعت نزلت وبلعت ريقها : بس هي امك مهما كان
نوره:بعصبيه : بس الكلام الي قالته قدام الحريم ما ينقال
هند: وهي تبكي : هذى امه ما تعرفين قيمتها الا اذا فقدتيها
مريم : تحاول تهديها تعرف درجه احترامها وتقديرها لامها ولك واحد كبير من معاملتها مع عمتها ام ابراهيم : هند حبيبتي امي وحنا نعرف طبعها اكثر منك لا تضنين انها مثل امك الله يرحمها
هند: تمسح دموعها : بس مهما كان ما تخبرينه هذى امه تبينه يشيل بخاطره عليها ...ودق جوالها وله نغمه خاصه
نوره : لا تردين عليه اخرجي له تعالي بسرعه لبسي عباتك
هند: تمسح دموعها والسواد الي تحت عينها ورجعت تحاول تهدي اعصابها : نوره وين بناتك بخذهم معي عشان يسكت طول الطريق ما يعصب
مريم : لا روحي انتى لوحدك وبطريقتك تقدرين تهدينه
هند: ترمي المنديل الي بيدها في السله : ايه بعد ما عصبتيه تبيني اهديه
نوره : روحي وبعدين معك شوفي رجع يتصل
هند: زين وتروح معهم عند الباب و تلبس عباتها وتخرج
~~*~*~~
في الغرفه في القاعه بعد ما الناس قاموا للعشاء هي رجعت عند راشد
راشد : من يوم دخلت عليه وهو مستلمها غزل : حبيبتي يالله انا بوصلك البيت
مها : تفاجئت من طلبه : وشهوووو
راشد: وجهه قريب منها ويشوف حركة ارموشها وتوترها : وش فيك انا مكلم عمي وهو موافق
مها : بدون ما تناظره و نظرها على بحضنها وبصوت واطي : بس امي مستحيل توافق
راشد: بصوت واثق و تحدي : ليه خليها تجي انا بكلمها بروح معك البيت ونجلس على راحتنا ... وبرنه مميزه بصوته و هو يقرب من اذنها ...كيف ما تبين تجلسين معي تبيني اروح
مها : بتهور و ارتباك من قربه وريحه عطره الي حاسه فيها طبعت بجسدها من وقت التصوير الي طغت على عطرها : لا وين تروح
راشد: ضحك برنه مبحوحه: زين ناديها
مها :حاولت تعترض ومنعها و كلمت امها وهي خايفه من رد فعلها وطلبت منها تجي راشد يبيها : الحين جايه
ام عامر : دخلت ضنت انه يبي يخرج : خير وش عندك يا راشد
راشد: حس انها من النوع الي ما يجي الا بالحيله : عمه طلبتك تكفين لا ترديني
ام عامر: عينها على مها : خير وش الي تبيه
راشد: ابي اوصل مها لبيتكم واجلس معها هناك انا كلمت عمي وافق انتي وش رايك
ام عامر: وهي مقهوره من رجالها الي ما يخبرها بشي : زين طالما عمك موافق ليه تاخذون راي
راشد: ولو عمه انتى الخير والبركه و الكل في الكل و كلمتك على راسي
ام عامر : كلامه اشبع غرورها بعد الي صار : انا مجهزه لكم تجلسون هنا اليله مفتوحه الناس ما بعد خرجوا
راشد : بقوة عين: انتوا اجلسوا معهم واحنا نرجع البيت
ام عامر ناظرته بحده : زين شوف واحد من اخوانها خليه يوصلكم
راشد: انا ابي اوصلها بسيارتي مزينها .. اذا تبين يا عمه تعالي معنا
ام عامر : لا روحوا الله يستر عليكم بس هاه ما وصيك سوق زين ونتبه لبنتي
راشد : تامرين امر ومها بعيوني
ام عامر: قهرها الي مدبر كل شي : تسلم ..اخرج قرب السياره على بال ما البسها عباتها
راشد: فرحة نصر صار الي يبيه : ابشري شوفيلي الطريق
ام عامر : وقفت معه وبعد ما خرج رجعت لبنتها وشافتها وهي تلبس بعباتها : سويتي الي براسك ما تستحين على وجهك وش تبيني اقول الناس الي جالسه برا بنتي رايحه معه على البيت لوحدها
مها :بارتباك : يمه انا ما لي دخل هو الي طلب
ام عامر: وليه ما قلتيله لا من البدايه روحي وشغلك معي بعدين انتم منتم جايبينها لبر لا انتي ولا اخوانك واياني وياك تروحين من هنا ولا من هنا على البيت عدل والحين انا جايه وراك ..ماني مطوله
مها: زين
ام عامر: يالله قدامي لا احد يشوفك من المعازيم وتخرج معها
~~*~*~~
هند: دخلت السياره الي واقفه قدام الباب بهدوء وهي تفكر كيف ممكن تهديه اذا عصب و تهدي خوفها الي ينهش قلبها : السلام عيكم
يزيد: وعليكم السلام... وش الي صار
هند: تحاول انها ما تبكي : حبيبي ليه معصب ما صار شي وكل الي صار متوقع و زين الي جاء على قد كذا
يزيد: كل هذا وتقولين شي بسيط
هند: تحط يدها على كتفه حبيبي اذا تبي تزعلني منك تسوق وانت معصب وتمسك يده وتحطها على بطنها عشان خاطر ولدنا لا تزعل هذى مهما كان امك شوف انت وشكثر تحب ولدك هي بعد تحبك
يزيد: سيارته قزازها مخفي(مظلل)تنهد بصوت مسموع وده يشوف وجها و باس راسها: الله يخليك لي ولا يحرمني منك و هنياله والدي لانك امه
هند:ارتاحت شوي من ردة فعله : امين و يحفضكم لي ولا يحرمنى منك
~~*~*~~
راشد :مشغل المسجل اغاني رمنسيه و يمشي على مهل وماسك يدها:حبيبتي وش رايك نروح أي مطعم
مها : من يوم طلعت السياره وهي موترها بحركاته وغزله جري ولا عليه يقول كل الي في باله بصوت هامس : لا
راشد: يا عمري من اش خايفه
مها: امي مستحيل توافق
راشد: بس انتى زوجتي الحين وش فيها اذا خرجتي معي ..
مها : حبيبي معليش ياليت نروح البيت أكيد امي بتوصل قبلنا
راشد: وش قلتي حبيبي يازينها من صوتك الي ما يمل الواحد من سماعه
مها: راشد وبعدين
راشد: هههههههههه احبك ياقلبي خبلتيني من يوم شفتك خليني اخرج حره الكم شهر الي وانت بعيده عني و يبوس يدها
مها: راشد خلاص ...و رن جواله مها بدلع .. ليه ما ترد عليه حرام هذى ثانى مره يدق
راشد: ما عليك منهم العيال عارفين اني معك (ورجع الجوال يدق اخذه وقفله ) اقفله وارتاح منهم
مها: لو رديت عليهم وش فيها
راشد: ليه ارد عليهم وانا معي القمر الليله (ويكلم نفسه لو تدرين من الي تبيني ارد عليهم كان متي مكانك ولا تطلبين مني اكلمهم )
~~*~*~~
عدت الايام سريعه كحركة الامواج المتلاطمه لا يلحق بها احد وتختفي وخلال هذا الاسبوع ام احمد ما خلت سوق ما راحته و اخذت كل شي للبنات وهم معاها ومنى ما قابلت خالد خلال هذى الاسبوع ومحمد اكثر وقته مع خالد وما كان يشوفهم الا على العشاء والفطور وملاك سكنت روحها بضن امها مره ثانيه الي فقدته من سنوات ...
ام عامر مانجح مخططها الي كانت ناويه لهند عليه بسبب ارتفاع حرارتها بعد الملكه بيو و الانفلونزا المصاحبه له ..
بيت ابو ملاك ..
محمد: خالد ادخل المجلس الحين اجيك
خالد: شفت لا تأخرت ياويلك مهو تحصلهم جالسين وتنسي عمرك
محمد: هههههه اذا القمر فيه انسى اني اجيك.....يبي يحرق له اعصابه
خالد:تكلم بقهر : وجع زين حن على ورسلي قمري تجلس معي
محمد:حس بصدق هذى الايام بمدى حبه لمنى بس الي كان مستغرب منه كيف ممكن الشخص يحب انسان ما يعرفه بس لمجرد الفكره انه بينهم راح يكون ارتباط : اقول اول املك عليها وبعدين قول تجلس معي
خالد : بجديه : يالله احنا فيها نادي عمتي اكلمها
محمد: ويطلع الدرج : ههههههههه احلم باي
خالد: يرفع صوته وياشر بيده : ياويلك اذا تاخرت خمس دقائق معك ولا بتحصلني على راسك ... ويروح يمشي للمجلس شافها جالسه وقف يتاملها لثواني بصمت كانت لحظات بالنسبه له كرحله من الارض لسماء اسكنت مشاعره ..وعلت الابتسامه الا أراديه محياه وغمض عيونه ي خزن صورتها بذاكرته مع الصوره السابقه و تنهد بعمق و مشي بخطوات واثقه و هاديه ...آآآآآآه يا سعدى وهناى ويقرب منها وهي مهي منتبه : مساء الفل والاحساس والطيبه على احلى قمر اليله انجلى بين الغيوم ينور حياتي ..
منى: سمعت صوته ولفت بسرعه عليه كانه احد ضاربها بمطرقه على راسها وتوقف متروعه وتروح بتعدي من جنبه ويمسكها مع يدها (لابسه بنطلون حينز واسع وجكت احمر فوق الركبه و متحجبه )
خالد: مسكها بكل تملك ما يبي يفقدها قبل ما يعرف اخبارها و يطرب اذنه بصوتها : على وين
منى: ترتعش وخايفه
خالد: ههههههه وش فيك خايفه : تعالي اول شي رجعيلي قلبي الي غرقتيه يومها بمسبحكم
منى:تتلفت ونادت بصوت يرجف :يمه.. محمد
خالد: عاجبه شكلها كانها طفله احد مرعبها بشي تخاف منه : ههههههه ناديه ما يهمني انتي لي يا حياتي من يومها وانتي فبالي طول الوقت
منى:من ربكتها وخوفها قرصته بيدها الثانيه عشان يتركها وعينها تلف حولها تبي احد يخلصها رجولها تصلبت مهي قادره تتحرك ويم يكلمت طلع همس :خويلد
خالد: هههههه حاقده علي خويلد ...آآآآآآآه ذبحتيني يا روح خالد جننتيني صرت اناظر بمحمد وتخيله انتي
منى : بهبالها المعتاد رفعت نظرها له : احلف
خالد: ضحك من قلبه : ههههههههههه مني الله يخليك بطلب منك طلب وتنفذينه وياخذ قلم من جيبه ويكتب بيدها الي ماسكها بقوه عشان ماتهرب
منى: مهي مستوعبه هذا وش يسوي بيدها ما يكفي مسكته لها : وش تسوى شايف يدي سبوره ولا جدار تشخمط عليه
خالد :مهو قادر يمسك عمره عن الضحك على شكلها لونها صاير احمر ويدها مبيضه معد فيها لون وتتريق وتعلق عليه : ههههههههه والله احبك يانضر عيني هذا ايميلي ابيك اتضيفيني عندك ابي اكلمك اليوم
منى: كانه احد يضربها على اذنها : لااااااااا
خالد:بنبرت حزن صادقه : حبيبتي ليش لا الملكه امك مهي براضيه املك حرام عليهم وش يبوني اسوي والله ما راح اطول معك ولا راح اضيعك من دراستك بس اتطمن عليك
منى:تسحب بيدها : ابي يدي
خالد: هههههه وش فيها يدك حبيبتي عسل مثل صاحبتها وش قلتي الساعه عشره انطرك
منى: سحبت يدها بقوه و راحت جري و عدت من الصاله وطلعت فوق
ام احمد: جالسه في الصاله عند التلفزيون :وش فيها
محمد: ههههههه هي وين كانت الي تركض كذا كانه احد يطرد خلفها
ام احمد: تمشي بالحديقه الي برا
محمد: عصب وقف : وكيف خارجه كذا بدون بالطو طويل الخدم فيه برا... (انا راويك يا خالد أكيد قايلها شي )
ام احمد : ما تبي مشاكل بين عيالها : انا اكلمها على لبسها بس انت لا تكلمها
محمد : زين بس لوشفتها برا كذا بحش رجولها ...خالتى بروح المجلس عند خالد خليهم يجيبون العشاء ويخرج
اتمنى استمتعوا بالقراءة
ايه شايفه عيونكم ..تبرق ودكم تذبحوني بارت قصير
بس اوعدكم في بارت اذا ربي راد يوم الاربعاء او الخميس في الليل ..
ويمكن افاجئكم فيه بكره محد يدري ..
تحياتي
استودعكم بحفظ المولى
14-03-09, 08:05 PM
جديد مواضيع قسم القصص المكتمله من وحي قلم الاعضاء
العرض العادي
