كاتب الموضوع :
ساعه بلا عقارب
المنتدى :
القصص المكتمله من وحي قلم الاعضاء
السلام عليكم ورحمة الله وبركاته
الشوق قاتل صدق من قالها
نشتاق الى اوطاننا والى احبتنا
ونشتاق الي اصغر الامور لدينا
مثل شوقي لكل اخت منكم
تعرفت عليها وجمعتني بها هذه الصفحات
و عثرات قلمي الوليد
قراءه ممتعة ؛؛
الفصل الخامس عشر
بيت ابو محمد:
غرفة مي
يوم الاربعاء هذا غير عن بقية الايام إله نكه خاصه عند كل الطلاب والموظفين…مي ما تحب تضيعه في النوم تستغل كل دقيقه فيه عشان تسوي الاشياء الي ما تفضي لها ايام الاسبوع صحيت من النوم قبل المغرب وكعادتها لازم كوب الكوفي بعد ما تصحى من النوم تطلبة من الخدامه …وهي جالسه على السرير وجهازها امامها و تفتح في المنتديات الي تدخلها وتشيك عليها و تتصفحها على السريع دخلت صفحتها المخصصه الي تعتبرها كنز بالنسبه لها وعالمها الخاص بما تحتويه من هموم وماسي تدمع لها العين و ينفطر لها القلب اطلعت عليها و جمعتها على صفحة الورد حتى تستطيع الرد عليها بتمعن و هي تنقل احدهما اخذت تقراءه وهي مصدومه مما تقرأ وتردد بداخلها حسبي الله ونعم الوكل.. الحمد لله على النعمه الي انا فيها و قفلت الصفحه وهي بالصفحه الرئيسيه لفت انتباهها موضوع ( ضني ادخلني النار ) ودخلت تشوفه
( حُسن الضن )
قال ابن القيم رحمه الله ولا ريب أن حسن الظن بالله إنما يكون مع الإحسان، فإن المحسن حسن الظن بربه، أنه يجازيه على إحسانه، ولا يخلف وعده، ويقبل توبته، وأما المسيء المصر على الكبائر والظلم والمخالفات فإن وحشة المعاصي والظلم والحرام تمنعه من حسن الظن بربه، وهذا موجود في الشاهد فإن العبد الآبق المسيء الخارج عن طاعة سيده لا يحسن الظن به، ولا يجامع وحشة الإساءة إحسان الظن أبداً، فإن المسيء مستوحش بقدر إساءته، وأحسن الناس ظناً بربه أطوعهم له. كما قال الحسن البصري: ( إن المؤمن أحسن الظن بربه فأحسن العمل، وأن الفاجر أساء الظن بربه فأساء العمل )
وكيف يكون محسن الظن بربه من هو شارد عنه، حال مرتحل في مساخطه وما يغضبه، متعرض للعنته، قد هان حقه وأمره عليه فأضاعه، وهان نهيه عليه فارتكبه وأصر عليه، وكيف يحسن الظن بربه من بارزه بالمحاربة، وعادى أولياءه، ووالى أعداءه، وجحد صفات له، وأساء الظن بما وصف به نفسه ووصفه به رسوله صلى الله عليه وسلم وظن بجهله أن ظاهر ذلك ضلال وكفر.
قال رسول الله صلى الله عليه وسلم : ( إياكم والظن فإنه أكذب الحديث ) البخاري ومسلم
عن أبي هريرة رضي الله عنه قال: قال رسول الله صلى الله عليه وسلم ( حسن الظن من حسن العبادة ) أحمد وأبو داود .
ومن حسن ضن العبد بربه ...حسن ضنه بمن حوله واحاديثهم و مواقف الناس وتبريره لكل ما يحدث من حوله ..
مي تنهدت ...يالله وش كثر احنا مقصرين بمور ديننا ونرتكب الخطأ ...و جاء على بالها الموقف الي صار اليوم امامها مع البنات وحده مرت من عندهم و صاحباتها علقوا عليها انها تعاكس الجوال ما ينزل من اذنها ابد كل ما شافوها وهي تكلم ..وتلوم عمرها يالله يمكن يكونون ظلموا البنت ليه ما فكروا انها ممكن يصادف مرورها دايم واحد داق عليها من اهلها ولا صديقاتها ولا يمكن زوجها اذا مزوجه..وارعبها الباب الي اندق بسرعه وتفتح
منى : بصوت هادي ولا على قد دقها وفتحها للباب : سلام ..ضنيتك نايمه متى صحيتي..؟؟
مي: وعليكم السلام ..ابي اعرف انتي متى تبين تبطلين رجتك هذى يعني لو كنت نايمه كان وقفتي قلبي
منى: وهي تضحك : سلامة قلبك حرم سعد تبينه يجيني بالمنقله والفرجال يطير رسي (سعد مدرس رياضيات ومي بعد تخصص رياضيات )
مي: وجها حمر ومن النوع الي تخجل بس من يطرون اسمه : وجع انكتمي ..وتضيعها من الموضوع لانها تعرفها اذا بدت ما تسكت ....غريبه حضرتك صاحيه المغرب ما بعد اذن
منى: تجلس عندها :يالله بعديها لك بمزاجي هذى المره ... ما جاني نوم ولو نمت ما راح اصحى وبتعصب على امي لانها تبينا نصلي المغرب و روح لجدتي فوزه (ام امهم الله يرحمها )
مي : يوه نسيت بقوم البس وترخي لوحة الشاشه بس ما قفلتها ..انتى وش عندك ما لبستي ..؟
منى: عليها قميص ازرق بكم قصير لنص الساق : جهزت لبسي شوي اقوم البس ترى يمكن خالاتي يكونوا فيه كلهم اليوم اربعاء..بس قلت لأمي ما نبي نطول ابي ارجع انام..
مي : وليه من زمان ما جتمعنا جمعه كبيره عند جدتي كل مره نشوف وحده منهم
منى: امي سمعتها تقول لأبوي تبي تجمعهم كلهم على العشاء الاسبوع الجاي ...انتي وش عندك شكلك كنتى تقرين قصه شي اكيد عشان كذا ما خرجتي من غرفتك
مي : تبعد جهازها عنها لانها تعرفها ملقوفه ماتخلي شي : لا يستي القصص الي اقراها ما بعد نزل لها بارت بس ادخل اشيك ما حصل الف ادور أي شي يسليني ..تعرفين اني توني قراءة موضوع عن حسن الضن و الله انا مره مقصرين بامور ديننا شوفي انتي وشلون ضنيتي في ابد ما نفكر بالضن الحسن قبل السيئ
منى: وهي توقف يؤؤؤه لا تعطيني محاضره الحين خليها اذا ردينا بس انا ما قلت شي من عندي انتي مثلي ما تجلسين تسنترين عند جهازك الا اذا تقرين قصه ..و ما خلتها ترد ..سلاااام ..وراحت على غرفتها
مي: الله يهديك ياشيخه ويهديني معك ...ويدق جوالها وتسمع الصوت بعيد ..وتقوم بسرعه تاخذه من شنطتها الي على التسريحه وبتسمت من يوم شافت اسمه ....ياهلاااا والله أمطرت وازهرت الرياض وهلها بسماع حسك
محمد: انشرح صدره بترحيبها : يا هلا فيك وبكل غاليك ...السلام عليكم
مي: وعليكم السلام..وش اعلومك وينك امس ما كلمت احد
محمد: يتنهد بداخله : بخير الله يسلمك بس كنت مشغول انتم وش اخباركم
مي: الحمد لله الكل بخير ..وبتردد ..محمد حاسه فيك شي .. وبقلق..ملاك فيها شي
محمد: الحمد لله بخير مافينا غير العافيه ...
مي : وتشبك السماعه باذنها وتمشط شعرها بالفرشه : هي كيفها معك ..مدري احساسي يقول انك بالشرق وهي بالغرب صح ولا انا غلطانه
محمد: وهو حاس انها جات على الجرح : لا عاد مهو لهذى الدرجه
مي : حلو ..يعني متفاهمين مع بعض ..محمد تبي الصدق حاسه انك متورط معها ولا تقول لا لاني عارفه طبع كل واحد فيكم
محمد: ويوقف بسيارته على جنب ويناظر بساعته بعد فضلها ثلث ساعه و تخرج وبصوت هادي بس فيه نبرت التوتر : مي هي طبعا عنيده و ما تسمع الكلام..مع الكل ولا شلون ؟؟
مي : كانت عند الدولاب تاخذ لها ملابس سكرت الدولاب وهي تبتسم وحطتها على السرير: لا هي مهي عنيده لهذا الحد وجلست على كرسي التسريحه ..بس الي اتوقعه ياشاطر انك ما سويت مثل ما قلت لك
محمد: خير وش الي قلتيه ؟؟
مي: انك ما ترفع صوتك وانت تتكلم معها ..وحضرتك شكلك جايب العيد معها ..وهي ضنك تصارخ عليها ..وتعاندك
محمد: يكلم عمره ..يوه هي خلتني اكلمها مثل العالم ماغير ترفع ضغطي بكل مره وتخليني اعصب عليها : لا عادي كلامي معها بس لاحضت انها عنيده ...بس تعالي هي وش الاشياء الي تحبها اكثر شي
مي : من أي ناحيه
محمد: يلعب في القلم بين ايديه : اكثر شي تحبه
مي: سؤالك يحير هي فيه اشياء كثيره تحبها ..اكل ولا ..ورد ..ولا كتب ..ولا ايه..حدد عشان اعرف اقول ..انت تبي تاخذ لها هديه يعني
محمد: وخطرت على باله الفكره : ايه وش اخذ لها
مي : وهي تضحك : قصدك ورد
محمد: وهو يحرك السياره : ايه
مي : اصحك تاخذ ورد هي صح تعشقه بس ماتحب تشوفه مقطوف لانها ماتحبه يذبل ويموت
محمد: يوووه منها هذى المدلعه : زين وش الورد الي تحبه
مي : الزنبق و التوليب..
محمد : يبتسم على زهورها الي تحبها خطيره البنت مهي هينه بزهورها ( التوليب ...معناها : التصريح بالحب ....والزنبق معناها : قمة الجمال ) :زين وش الالوان الي تحبها اكثر شي
مي : وهي تضحك تعرف عشقه للورد : كل الالوان ما عندها لون محدد فيها
محمد : وهو يقرب من محل زهور قريب من الجامعه : اوكي ..وسكت
مي : هههههه وينك اسمع ...كلمها بهدوء عندها احسن من مية ورده...اسمع الحين مشغوله شوي نبي نروح عند جدتي فوزه..وتحط الجل على شعرها وتقلب شعرها على قدام عشان تنكشه لانه ناعم ولونه كستناي وطول ظهرها
محمد: انشرح صدره يوم سمع اسم جدته : ياحبني لها سلمي لي عليها وحبي راسها ويديها عني وعلى الكل ...يالله توصين شي
مي : سلامتك بس دير بالك على ملاك وتحملها الشي مايجي بالغصب ولا بين يوم وليله
محمد: ابشري يالغاليه سلاااام ...ويرح ياخذ الورد وعطه عنوان البيت وراح لها لانه اليوم معاقبها بعد ما ترح بسيارتها
:::: * ::::
في الجامعه:
شذى : تمشي هي وملاك ولها ربع ساعه خارجه من المحاضره وتتكلم معها وهذى ولا كان احد يكلمها معطيتها طناش : نجوي وصمخ لين متى بضلين ساكته ...
ملاك: تلف تواجها و هي بتموت من التظاهر بالصلابه ومن داخلها تبكي: شو بدك قول ...انتي يعني تضنيني مجنونه عشان صدق ان الي ارسلها بابا ..ارتاحي حبيبتي اولا هذا مش اسلوب بابا في الكتابه .
شذى:طيب حلو بس انتي وش صاير فيك ..منتى مرتاحه معه ولا كيف ؟؟
ملاك: شذو انتي بتعرفي اني ما بيعجبني ..وانتي فاهمه شو قصدي ..هو كل شي بده يفرضه فرض وانا مستحيل اتقبله
شذى: انجي ..انتي زعلانه منه انه ما يبيك تسوقين ولا عن شي ثاني بعد غير انه بنظرك مغرور ...بس اذا عشان هذا الشي لا تعبين عمرك معروف يا عمري الرجل الخليجي و يحب يخدم زوجته و هو يلبيلها كل طلباتها بنفسه
ملاك: شذو انتي مش فاهمه هو كل همه انه ينفذ الي بده وبدون احد يقول كلمه..او يعارضه
شذى : لا انتي الحين حاكمه عليه كذا وهو ما جلستي معه و عرفتيه زين ...او اجلسي معه وتكلمي وبعدين احكمي عليه ..ودق جوالها ومن النغمه عرفت انه فيصل متعوده بس يعطيها رنه ويقفل ..يالله هو متى راح يوصل هذا فصولي نبي نروح نتغداء برا وش ريك تجون معنا
ملاك:لا بالعافيه عليكي وهو عازمك بدك اجي معك حلوه هذى ..بس بجد من بكره بدي تكونوا معي في البيت على الغداء والعشاء وخليه بعد يكلم العيال اذا بده يكلهم
شذى : تخزها بعينها : يالطيف منك هذا كله عشان ما تجلسين مع رجالك...وبعدين فصولي وشله يعزمهم ...وتغمز لها وتضحك ...عندك حمودك خبريه
ملاك: بترجي وجها محمر : تكفين شذو كلميه ..وكملت بحزن يفطر الي يسمعه ..بدي كون مثل اول لما بابا فيه البيت مفتوح للكل ...واذا ما بدكم تجوا انا راح خلي السواق كل يوم يوصل الك الاكل على بيتك بدل ما تتعبي و تطبخي ..و بتريقه ..لاني اعرفك شلون شاطره بالطبخ وتبتسم
شذى : شوفي اذا علي عادي ما تفرق معي يوم السعد عندي اني ما ادخل المطبخ بس اشاور فيصل وارد عليك ...يالله هذا هو وصل ..شافت السياره ..سلام اتصلي بمحمد لا ياتاخر عليك ولا تبينا انتظرك لين يوصل
ملاك : روحي هو ما راح يتاخر احنا خرجنا قبل اليوم ..و بستها و راحت عنها ..و ما كملت ثواني الا تشوفه جاي ..و طلعت بالسياره وبدون ما تناظره ..السلام عليكم
محمد: وعليكم السلام ..تاخرت عليك ..وهو يشوفها كيف صاده وجها عنه
ملاك: بهدوء..وبدون نفس :لا
محمد: يبي يفتح معها أي حوار ومهو عارف كيف وحرك بسيارته ونادها بهدوء: ملاك
ملاك : تفتح شنطتها وتاخذ منها منديل معطر : نعم..بدون ما تناظره وتمسح يدها
محمد: عصب ويكلم نفسه انت وش فيك شاب ضوء البنت ردت عليك خلاص مهو معقول من يوم تشوفها تظهر شياطينك وتعوذ : الله ينعم بحالك بنت خالد ...اي مطعم تبين تتغدين فيه
ملاك: بتسمت بداخلها مسكين بيقلد خويه بكل شي : الغداء بالبيت جاهز هلآ
محمد: يلتفت عليها : بس انا ماابي من البيت و بتجين معي
ملاك : لفت عليه ولقيتها فرصه : بروح بس بشرط
محمد: ابتسم و نزل نظارته ونظرته كلها حب : امري انتي بس
ملاك: وترها كلامه ما تحب نبرة الغزل من الشباب تخاف منها و كش جسمها وهى ما تناظر فيه وتتكلم بسرعه خايفه يعصب عليها :تخبر فيصل والعيال الغداء والعشاء عندنا في البيت كل يوم
محمد:اول شي نصدم من طلبها وبعد كذا صار يضحك بصوت عالي ودمعت عيونه من ضحكه وبصوت له رنه غريبه :كل هذا عشان ما تقابلين وجهي على الاكل
ملاك: قلبها يرجف خوف من نبرت صوته الي كلها غزل وماردت عليه
محمد: ابشري بخبرهم اوامر ثانيه ...يمسح عيونه بمنديل و يلبس نظارته
ملاك: شبكت يدها في بعض : لا
محمد: زين الحين وين تبين
ملاك :أي مكان بس نص ساعه وبدي كون في البيت عندي دراسه كثير
محمد: اذا تحتاجي مساعده خبريني
ملاك: شكرا...وفضلت الصمت لانه اليوم موترها بصوته الي له رنه غريبه عليها
محمد: مد يده وشغل المسجل كست بصوت ابو نوره
::: * :::
في السياره
ام عامر رايحه على السوق تبي تاخذ لها شي تكشخ فيه في الجمعه الي مسويتها يوم الخميس وتكلم السواق : هيه انت اسمع ..
السواق : امر عمتي
ام عامر : الحين بعد ما تنزلني بالسوق ابيك تروح عند الشركه وتشوف يزيد وين ساكن فيه وتجيب لي عنوان شقته
السواق : خاف ويكلم نفسه لا انتي يزعل مو مشكل بس انا هذا يزيد يذبحني لو يمشي وراه : بس ..
ام عامر: تصرخ فيه : لابس ولا غيره ياويلك بعد ساعه لو ما جبت لي عنوانه
السواق : بخوف : طيب
::: * :::
بيت الجده فوزه
عندها سبعه عيال (اربع بنات و ثلاثه عيال ) كلهم كبار وام محمد كانت اوسط عيالها...الكل مجتمع عندها بغرفة المخصصه لجمعتهم ارضيتها موكيت و الجلسه ارضي والجده متصدره بمكانها المعتاد بصدر الغرفه والكل حولها و ترامس القهوه موزعه عند كل مجموعه ترمس الي بالهيل والي بالزنجبيل والي بالزعفران كل حسب ذوقه بشربها
ام احمد جايبه معها صواني حلى بسبوسه وكنافه وفته بالسمن والتمر بحافظة الاكل ومقربتها من ام فايز( الجده فوزه)
ام احمد: تكلم ام فايز بصوت واطي واكل من حولها يسولف واصواتهم مرتفعه : خالتي بغيت اخبرك عن شي هو ما بعد صار
ام فايز:حرمه كبيره بالسن جسمها ممتلي و صحتها على قدها ونظرها سته على سته ..عايشه في بيتها لوحدها بنفس الحوش مع ولدها الكبير بس هي عشان بناتها اذا جوها يجلسون عندها في البيت وتحب ام محمد كنها بنتها: خير يا بنيتي وش عندك
ام محمد: ابو محمد بلغني اخبرك منى جاينها خطاب وهي ما بعد ردت موافقتها عليهم
ام فايز وهي تلف تناظرها : عرب نعرفهم و انا امك
ام احمد: لا خالتي ما نعرفهم بس و لدهم مع محمد وهو يعرفه زين
ام فايز : والله خاطري وانا امك تكون لواحد من عويلتنا و ما تخرج برا مثل اختها وابوها وش قال موافق عليهم
ام محمد: ايه موافق عليه لانه محمد مدحه والولد النعم فيه واهله بعد جلست معهم والنعم فيهم
ام فايز : بس خاطري تكون لبدر ولد فايز ولا طلال ..انتي خيري ابوها اني ابيها لوحد منهم العيال ما تكلموا لانهم عارفين انكم ما تعطون البنت الحين ...
منى: نطت وجلست عندهم وش عندهم المزيونات يتساسرون ...
ام فايز : سكتت و تضحك عليها لان ام احمد خانقتها..وحطتها فبالها ماتبيها تروح عن عيالها
ام احمد: انتي متى بتعقلين يعني الواحد ما يعرف يقول كلمة راس غير خشيتي خشتك فيها
منى : وهي تنسدح وتحط راسها على رجل امها من الجهه الثانيه عن جدتها : يازينها عاد من كلمة راس بين العجايز شوي و بتخبروني بها لاني العجوز الثالثه معكم قالتها وهي تضحك
ام فايز : عجز حيلك من بنيه قومي عن امك لا تكسرين رجيلاتها هي مهي بناقصه
منى: جدتي وش فيك علي اليوم ولا عشان بنيتك المزيونه ام طلولك ما هي بجايه
الجده : تمد عليها عصاتها : احشمي يالي السانك يطول اذونك طلال تاج راسك
منى: وهي تضحك ورجعت على ورا : ول جدتي انتي ليش شابه ضوء خلاص بس نجيبلك سيرة طلول تشبين علينا و الله انا تاج راسه هل شايب ولد بنتك
الجده: شاب راسك وعجز حيلك اذا بتشيبين ولدي يالمقويه
منى: هههههه عصبت عجيزنا
ام احمد : تقرصها : احشمي جدتك لا رويك شغلك
منى: ايييي ..وتتثاوب ...امي متى تبين نروح البيت خلاص ترى انتهاء اشتراكي وبديت افصل
ام احمد: تمسح على شعرها : قلت لك نامي شوي الظهر ما رضيتي وش تبيني اسوي بعدها ما جات تسعه وتبينا نمشي
مشاعل ومي جالسين يسولفون على جنب وهي اصغر من مي بسنه
مشاعل: وش فيها اختك رايحه دور حضن امها
مي : تلف تشوف منى وهي منسدحه : ما نامت الظهر
على بعد مسافه بسيطه منهم البنات الي بسن المتوسط بنات فايز وفلاح ..سديم بنت فلاح تقلب بالقنوات وحطت على المسلسل التركي وترفع الصوت
الجده : تصرخ عليها سديم وصمخ يالي ما تستحين شيلي عن هـ الفاصخين الي ماعندهم لاحشمه ولا دين
سديم : بدلع : جدتي كلها شوي وتنتهي المسلسل
ام سديم : سديم غيري ولا رحتى البيت شوفيها
مي : بهدوء وصوت واطي : خالتي اسمحيلي الله يهديك وش تشوف فيها ترها مهي بزينه للي بسنها
سديم: وش فيها لشفتها عادي وش الي مهو بزين الحين شفيهم الكل يتابعها (سديم ثانيه متوسط)
مي: سديم حبيبتي انتي شايفه هم يتكلمون عن الاسلام وهم ما يطبقونه..
مشاعل : الحين انتي وش الي عاجبك فيها
ام سديم : الله يهديها ما في مسلسل تركي ما تبعته (ام سديم على نيتها وماتحب تقول لا لهم)
منى:تقلد صوت جدتها : ايه هم اذا طبوا بشي يمسكون فيه لين يغثون العرب منه..اول مكسيكييني (مكسيكي ) ..وبعده لبناني ...والحين تركي
سديم : هذى الي تبي تنام ابي اعرف بس وش الي ما يعجبكم فيها..انا اشوفها مسلسل عادي مثلها مثل غيرها
مي : لا حبيبتي المسلسل فيها اشياء محرمه وانتم ...صايره عندكم عادي الحين تشوفين الوحده حامل من فلان وعادي عندكم وتقولونها بكل بساطه حامل من فلان مهي مرته ...حبيبتي هذا حرام اسمه زنا والعياذ بالله والحين صايرين يجاهرون فيه بكل المسلسلات فهمتي علي ..يعني لو ستمر الانسان يشوف الحرام بيتعود عليه كيف لو كان الي يتابعه طفل صغير كيف راح يتغير تفكيره وجا على بالها الي قرته اليوم
سديم : زين خلاص بغير القناه ..بس صدق مي وش تبينا نتفرج اذا التلفزيون كله كذا
مي : لامهو كله فيه تقدرين انتي تشوفين الي يفيدك
دخلو عليهم البنات الصغار
اسيل سنه ثالث بتدائي اخت سديم
اسيل : سديم حطي على ابله نوره جات على دبي بسرعه
مشاعل : هاه عندك اختك شوفيها ترضين تابع معك الي تشوفينه
سديم : لا هي ما تشوفها وحطت لهم على المسلسل الي يبونها
:: * ::
ام عامر عصبت خبرها السواق ان يزيد ما كان في الشركه الي يقدر يتبعه لبيته
مها : كانت نايمه وتوها صاحيه من النوم على دخلت امها من السوق الساعه تسعه ونص
ام عامر: وش عندك نايمه لهل حزه (الوقت)
مها: تحب راسها : كنت سهرانه ما نمت بدري ..يمه مريم مهي بجايه اليوم
ام عامر : لا اذا ماجاتك بعد المغرب مهي بجايه وش عندك تسالين منتي بخارجه يكفيك امس خرجتي مع اخوك وبدون شوري
مها : لا سلامتك يمه برجع غرفتي اكمل نومي احسن ..وبعقلها تبي تكمل مخططها الي نجحت فيه و دمرت لين الحين جهاز ثنين من العيال بعد ما سحبت كل الي عندهم
::: * :::
ملاك ومحمد بعد الغداء رجعوا على طول على البيت و ومحمد حاول يكون هادي بكلامه معها ..بس هي ما اعطته وجه انه يتشجع ويتكلم معها بغير امور الشغل
بيت ابو ملاك
ملاك : دخلت غرفتها و حطت اغراضها وهي طفشانه الي ضاع عليها الوقت و ما انهت كل الي عندها من مذاكره ودخلت على السريع شطفت جسمها ولبست بجامه تشرت ابيض و سيافاته فوشي وعليه قلوب صغيره فوشي والبنطلون فوشي تحت الركبه تبي تحس بشوية انتعاش بالون عشان تقدر تركز زين وهي تذاكر ...و اخذت كتبها و جلست على السرير وبعثرت كل اوراقها قدامها و هي تذاكر تشم ريحه غريبه في الغرفه بس منعشه تلتفت حولها مافي أي شي ر جعت لوراقها وشوي تزيد اريحه الحلوه وتقوم من على السرير وتفتح ستارة البلكونه الشرفه الخارجيه لغرفتها وقفت مذهوله من منظرها كلها ورود راحت سحبت شرشفها (جلالها) ولفته وخرجت تستنشقها بعمق ورودها المحببه على قلبها باحواض الزرع و ماليه الشرفه كلها غمضت عيونها وهي تشم وحده منها بلون البنفسج وداعب خدها بنعومتها وهي بعالم زهورها المنعش وهي تتامل كل وحده ودرجات الوانها وتبوسها
محمد: من اول واقف يتفرج فيها دق الباب ما ردت ودخل وشافها وهي مغمضه عيونها ولمن باستها : يا بختها ليتني مكانها ...قالها بصوت هامس
ملاك: انتفظت ولفت عليه ..انت شو جابك هون
محمد: يسبل عيونه: ان شاء الله عجبتك الهديه
ملاك : لفت تشوف الورد وتشوفه وهي وجها محمر من تطفله عليها :انت جبتها وتاشر على الورد
محمد: وش رايك ..؟؟
ملاك: ليه ..
محمد: يمسك يدها وبكل حب و شاعريه : عشان اجمل ورده عندي تفتح عيونها على الورد و يغار و يتغزل بجمالها ...شافها كيف نزلت راسها و خدودها محمره و هو قلبه يرجف بين ضلوعه
ملاك : يدها ترجف من مسكته و خوف جتاحها من صوته وسحبت يدها ..و أنغذها من الرد صوت جوالها بعدت عنه وراحت ترد وكانت ريم ترددت بس لمن شافته واقف مكانه ما تحرك برا ردت جلست على السرير وهي تلف شرشفها عشان ما يبان شي منها : هلا ريومه ..وعليكم السلام ...بخير ...سلامتك مافيني شي بس حبيت اكون بعيد عنكم ...لا ماصار شي .. لا ما بدي شوفها ..لا اكيد بشوفك بكره بس انتي لوحدك ..ماشي .. باي
محمد: وقف معطيها ظهره يتامل الورود ويذكر كيف كانت ادعبها بخدها مرر يده على الورده الي كانت تشمها وقطفها و جا خارج..وقف متكي على الباب الزجاجي و يتاملها وهي تكلم بصوت واطي
ملاك: رفعت راسها شافت الورده بيده صرخت : حرام عليك لشو تموتها
محمد: بهدوء وبروة اعصاب رايق لبعد حد ويقرب منها و يمرر الورده على وجها وهو مبتسم : هذى لي عندك ورودك هناك وهي كلها فتره وتموت حتى لو كانت باغصانها
ملاك : كانت مغمضه عيونها ومهي قادره تتنفس من خوفها من كلامه وقربه وبصوت واطي وباين فيه الخوف : خذها كلها مابدي ايها
محمد: جا بيرد الا يسمع صوت الاذان بصوت عالي يتردد بكل البيت التفت لها بسرعه : وش ذا ؟؟؟
ملاك: قامت عن السرير وبعدت عنه قد ما تقدر: انا طلبت من روز تشبك توقيت الاذان بكل البيت
محمد: لا اله الا الله ..طيب ليه
ملاك: تكلمه وهي معطيته ظهرها وبغصه بحلقها : بابا عامله عشان ما نفقد صوت الاذان والمساجد هنا تقدر تتوضأ وتنزل فيه غرفة مصلى بالحديقه بابا كان يصلي مع الخدم فيها جماعه
محمد: الله يرحمه ويغمد روحه الجنه خير ما سوى ...ويلفها عليه ..ويبوس راسها ادعيله ..يالله اشوفك بعدين ..وخرج عنها
ملاك : مسحت دمعتها الي نزلت و فردة سجادتها وصلت
::: * :::
بيت عامر:
جالسين بالمقلط ويلعبون ورقه وعندهم الشاهي
عامر : ابي اعرف انت الحين متى ناوي تعقل ياخي اركد شوي وش فيك مشفوح كذا قوم كمل لعب
يزيد :مطير عيونه فيه : انا
عامر: ايه انت
يزيد : وش سويت
حمد و ابراهيم : هههههههههههه
حمد: ياربي متى بس اعرس واريح عمري اذا هو تشوفونه انا بعتزلكم خير شر الي يبيني يجيني لبيتي
ابراهيم : الحين انت قايم عليه وناسي عمرك
يزيد : رجع طنشهم و اتكي على المركن و رجع يكتب مسج ويرسله لهند من المغرب ما شافها وكل ما يقولها يالله على البيت تقول مشغوله وهو يتوعد فيها
حمد : ايه طلعوا فضايح بعضكم..ويحذف يزيد بعلبة المناديل انت وبعدين معك راعي ان معك ناس عزابيه اتقي الله فيهم
يزيد: لف عليهم وهو بضحك : احد مساكك يالحسود روح اعرس
حمد : بجديه روح كلم خالك الي مهو براضي
عامر : حمد من جدك الحين خالي مهو راضي لك تعرس
حمد : يقول بعدين هذا وانا الي ابيها منا وفينا كيف لو انها من برا وش سوى فيني
عامر: انت من تبي ؟؟
حمد: بنت خالي هزاع
عامر: والنعم والله ..ابشر بلي يسرك بروح معك و أكلم خالي في الموضوع
حمد: قام وحب خشمه
يزيد : هههههههههههههههههههههههههه وعينه على جواله يقرأ المسج الي وصله من هند
::: * :::
بيت ابو محمد
بعد ما رجعوا البيت الساعه عشره و شوي بسبب منى الي تبي تنام وطلعت على طول غرفتها ادور مخدتها
مي : وهم بالصاله على الساعه 11 ..مي خارجه بالاب توب بيدها وشافت خالتها جالسه لوحدها : خالتي عندك شي الحين
ام احمد : لا تعالي جلسي
مي: ابوي وين
ام احمد: لابسه قميص نوم ناعم طويل مع الروب : عنده كم اتصال نزل المكتب يخلصها ...انتي وش عندك ليه ما نمتي زي أخوانك
مي: تجلس جنبها على نفس الكنبه لابسه بجامه وردي : نمت الظهر ما فيني نوم الحين بس فيه مشكله ابيك تشوفنها..انا كتبت الرد بس انتي بعد رايك يهمني (مي كانت تبي تدخل خدمه اجتماعيه ولا علم نفس بس فظلت انها تمارس هوايتها بهذا الشكل وتدخل التخصص الي هي تحبه في الكليه وتكون جامعه كذا بين الاشياء الي تحبها )
ام احمد: وش المشكله هذى المره (هي الوحيده الي تعرف عن مي وهويتها و الصفحه المخصصه لها تحل فيها مشاكل الناس باختلاف اعمارهم ..)
مي: من النوع الخجول مره تتكلم وهي ماتناظر خالتها : المشكله لبنت 15 سنه عن التحرش الجنسي
ام احمد : اعوذ بالله من الشيطان الرجيم ...اللهم احمينا بحمايتك وستر علينا ..ولانها عارفه مي مستحيل تحكي اكثر ..اعطيني اشوفها
مي: شوفيها مابعد نقلتها بعد ماتعطيني رايك انزلها ...وفيه مشكله ثانيه انتي حليها زوجيه
ام احمد: طيب ..وتاخذ الجهاز من مي وتقرأ
بسم الله الرحمن الرحيم
السلام عليكم ورحمة الله وبركاته
ما اعرف من اين ابدأ بعرض مشكلتي لاني خائفه من نفسي ومن كل من حولي انا عمري 15سنه ماراح... اقول المدينه الي انا فيها بس مشكلتي بدت قبل شهرين وهي لا حضت نظرات اخوي الكبير غريبه لي وصار يشدد علي بلبس العبايه و يضربني اذا خرجت بعبايه فيها تطريز او كنت لابسه نقاب ..ونظراته تخوفني .. احسه يخترق ملابسي وهو يناظرني ..مره كنت بالمطبخ وهو جا ياخذ له كاس من الدولاب وانا كنت واقفه و مسكني وشد علي وحاول يتحرش فيني و كررها اكثر من مره اذا ما كان فيه احد في البيت مره اختي الصغيره خرجت برا غرفتي و خلة الباب مفتوح قمت من نومي مفزوعه كان يبي ينام جنبي على السرير
الله يخليك ارشديني وش اسوي
انا خايفه اخبر امي ما راح تصدقني وانا الحين من شدة خوفي ما اجلس في البيت اذا امي خرجت و اقفل على نفسي غرفتي اذا ما رضت تاخذني معها
الله يستر عليك ابي حل ورد باسرع وقت
الرد :
وعليكم السلام ورحمة الله وبركاته
ابنتي الفاضلة ..
من وجهة نظري أنها ظاهرة وظاهرة خطيرة اصبحت منتشره الان وبكثره ..اعانك الله ...ولكن هناك بعض النقاط كنت احب ان توضحيها لي اكثر وهي
عمر شقيقك كم ..؟؟
ايضا علاقة والديك مع بعضهم كيف هي ؟؟؟
تستطيعي مواصلتي على الخاص اذا احبتي ..
بنسبه للمشكله بنظره عامه ..
ان المجتمع العربي بشكل خاص اصبح يسلط الضوء على جسد المراءه من جميع النواحي حتى اصبحت بنظر الكثير كانها سلعه رخيصه
و من اسباب التحرش الجنسي كثيره ومتعدده :
1. البعد عن الدين و ضعف الوازع الديني ..وهذه اهم النقاط والركيزه
2. تأخر سن الزواج
3. البطالة و المخدارت والخمور
4. الميل المتزايد عند المرأة للتعري والكشف عن جسمها ولا ينسى أن المرأه تلعب دوراً في إثارة شهية الجاني بالأضافة إلى عامل جديد يتمثل في الدش بقنواته التي تبث مواداً كلها إثارة بالإضافة إلى أفلام السينما والنت المجلات والصحف التي تنشر صوراً عارية
5. مداعبة الزوجين او ممارسة الحق الزوجي امام الابناء او تجاهل الصغار منهم ومشاركة الابناء فراش الايبوين
6. ضعف الشخصيه فالاشخاص ضعاف الشخصيه هم اكثر الاشخاص عرضه للتحرش سواء كان من باب المزاح او الجد و السبب ان هولاء الضعاف غالبا ما يستجيبون للتهديد لذلك على كل الاباء تعليم الابناء الدفاع عن النفس ومصارحة الاهل عند الشعور بالايذاء
لذلك بنيتي الحبيبه عليك النظر الي ماسبق من نقاط
ربما كان لباسك هو السبب للفت اخيك اليك ...وبما انك وقعتي بصلب المشكله ...عليك مواجهته بخطائه الذي يفعله واخبار احد والديك لو بشكل غير مباشر وهو امامك على انها قصه لصديقتك فهو سوف يستمع الى رد والدك او والدتك وربما يرتدع بعدها و اذا لم تجدي أي تحسن عليك اخبارهم بما يحدث معك لا تخجلي منهما لان الامر خطير واذا استمر لا تظمنى عواقبه
وعليك تحصين نفسك بالاذكار والاكثار من الدعاء والصدقه لو من مصروفك اليومي اذا استطعتي
وانتظر منكي رد بنيتي لتطمنيني عنكي او أي استفسار اخر
ام احمد : يالله يارب تفرج كربتها وتهدي اهلها لها وتحضن مي يبعد عمري ما يحتاج اني اسوي فيها شي بس والله تقطع قلبي عليها وعلى الي مثلها مهم لاقين ام يفتحون قلبهم لها وجلسوا يسولفون بالمشاكل المعروضه و ام احمد ...مي تخليها ترد بالنيابه عنها على المشاكل الزوجيه الخاصه ومشاكل الاطفال
::: * :::
بيت ابو ملاك
محمد بعد ماصلى المغرب و العشاء مع الخدم جماعه و كان جالس بغرفته ويكلم خالد وهو حاس انه انجز شوط عظيم اليوم مع ملاك ..
محمد: ابي افهم الحين انت وش معصبك علي
خالد :وهو بغرفته : ياسلام اليوم كله ما شفت احد منكم ما صارت ياخي لمن اعرس روحوا جلسوا مع حريمكم معلي منكم
محمد: ههههههه الحين من قال انه بنعطيك اختي ..وبعدين انت بشغلك معي عشان تعرف و شلون الواحد ما يلحق على دراسه وشغل بوقت واحد
خالد : .....
محمد : حس بهدوء على الخط : الو انت معي
خالد: ملامحه متغيره ومعفوسه الي يشوفه يقول احد ضاربه ولا مخرعه و اضح من صوته بس حاول يكون جدي : محمد الحين اختك ممكن ترفض ولا لا
محمد: شوف هي اتوقع منها أي شي ممكن يصير بس انت ليه مستعجل خلها تفكر وبعدين تدخل السلطات العليا بالموضوع اذا فيه شي
خالد : ما يدري وش الضيق الي جثم على صدره وحب يغير الموضوع ويجلس لوحده شوي : انت وش عندك الحين
محمد: ابد سلامتك توني بذكر ماده عندي طويله مابعد فتحتها
خالد : يالله اجل اشوفك على خير بكره
محمد: على خير ان شاء الله ولا تنسى الغداء عندنا
خالد : ماشي سلام
محمد: سلااام ...و قفل منه وفتح مدوناته في الجوال نقل الي كتبه وهو في الحديقه وهو يضحك وسوى ارسال
ملاك : بغرفتها كانت مندمجه لابعد حد مع دروسها و منسدحه على بطنها و المرسام(قلم الرصاص) بيدها ودون الي تحفظه و الي مهي فاهمته تحط عليه علامات عشان تسال شذى فيه شوي الا يوصلها المسج
عند ما الشــمـس بفجـــرٍ تـشـــــــرق
تملأ الكـون وتعلــو في السمــــــــاء
وأتى النــور وللعيـــن دنــــــــــــــــى
تجهــر العيـــن إذا شـــعّ الضـيـــــاء
وطيــور الصبــح تشــدو وتجـــــــول
وتحـاكـي الورد من دون عــــنـــــــاء
زهــرة أم وردة مـــــــــــــــــاذاأرى؟؟
غصــن فــلٍّ تــحــتـــه ظــلّ ومـــــــــاء
والنــدى يحبـــو علـى أغصــــــانــــــه
فكــأنّ الورد يجهـــش بـــالــبــكـــــــــاء
هــكذا الــور إذا أســقـيـتـــــــــــــــــــــه
زاده المــــاء جـــمــــالاً وبـــهــــــــــــاء
يــاعبيــر الورد فــي أنســــــــــامــــــــه
فـــي بـــراد الليـــل يـــدفــيــــه اللـــقــاء
إنّ للــورد لغـــــاتُ تجــــمـــــــــــــــــــع
تمنـــح القــــلـــب ســــرورا ونقـــــــــاء
بعض أغصـــان الحــدائـــق تــرقـــــــص
تكســب العشّـــاق لحــنـــا وغنـــــــــــــاء
فكـــأنّ الورد ينطـــق مــعـــلـــنـــــــــــــاً
يتســـاءل أيــن أوقــــات الصــــفـــــــاء؟
إنّ للــــورد جــمـــالاً يـــســــــحـــــــــــر
هــــو للعشّـــــــــــــــــــــــاق داء ودواء
ولـــه أيضـــا معـــاني تعــــــــــــــــــــرف
عنـــد أهــــل الحــــب يكـــســــوها الغــلاء
إنّ للـــورد قلــوباً تعشـــــــــــــــــــــــــــق
تعتـــنـــي بـــالــورد صــبحا ومـــســــــاء
وردة اسطنـــبــول أزكـــــى أم هـــــــــــي
وردة الطـــــائف صيــــف وشـــــتــــــــــاء
كـــل عيـــدٍ تجـــلــب انـــواع الــــــــــــورود
تنثـــر مـــابيــن جـــمع الأصـــدقــــــــــــــاء
إنّ للــــورد معــــانٍ تـــنـــقــــــــــــــــــــــل
تجمـــع الأحـــبـــاب فـــي لــــــــون الــــوفاء
وردةً حـــمــــراء مـــن محـــبوبـــتــــــــــــي
تــبعــد عنّـــي هــمـــومــــي والشّـــقــــــــاء
كلمات : صالح أبو غريـــــــــــــــب
ملاك : بس انتهت من المسج قامت مثل المجنونه و الجوال بيدها وتصرخ والله لاذبحك يا لمغرور كنت شاكه انه انت وتروح على غرفت محمد وهي تصرخ وتفتح الباب عليه بقوه وتصرخ فيه
لنا لقاء أخر بإذن الله
تحياتي ؛
التعديل الأخير تم بواسطة ساعه بلا عقارب ; 27-01-09 الساعة 12:26 PM
|
18-01-09, 05:03 PM
وامي قالت حرام عليك وقفتي قلبه 
جديد مواضيع قسم القصص المكتمله من وحي قلم الاعضاء
العرض العادي
