السلام عليكم ورحمة الله وبركاته
قراءة ممتعه ..
الفصل السادس و الثــــــــــــــ 36 ــــــلاثــــــون
مطار لندن
ملاك : مر الوقت بسرعه وثواني و أعلن عن موعد رحلتها تملكها الخوف بشكل فضيع تمنته يغير رائيه ويسافر معها لم تفكر بجرحه واهانته لها بقدر بحثها عن حمايته حتى لو كان يحتقرها من جراء المصيبه التي حدثت معها ..ناظرته وهي تحجب نظراتها بستار اسود كعتمة الليل منيع حتى لا يرى مقدار خوفها ورجائها له سلطت نظرها على شفتيه تريد منه كلمه وحده لكن طوال الساعه ظل صامت يقلب في صفحات الجريده ولم يفكر حتى بالنظر اليها..وقفت معه عند وقوفه
محمد : هروبه منها قبل هروبه من ذاته تملكت كيانه يحبها لكن جرح بداخله لم يتخثر من جراء كذبها وخداعها له... لماذا لم تخبره وقت الملكه..؟ واحساس بالهزيمه والطعن بالظهر وهو يثبت ويرفع رايتها امام والدتها وعمتها لطهرها وعفافها ....وهي تقتاله بصمتها عن ماضيها ..نظراته على الجريده لكن الحروف بداخلها متشابكه لا يعلم ماذا كتب بها يريدها ان تبعد عن نظره لو قليل ربما يستطيع اتخاذ القرار الصائب بحياته معها سمع الصوت اعلان الرحله ثني الجريده و وضعها على الطاوله وقف وبدون ما يناظرها وهي بعباتها وشيلتها استبدلتها بالبالطو من بعد وصول أغراضها..كلمها وهو معطيها ظهره : تعالي نشوف لك مكان او لا ..يوم عرف ان فيه لها مقعد كان وده يتراجع عن سفرها وبلع ريقه عمره ما كان محتار بامر مثل امرها مره يبي بعدها ومره يبيها تحت نظره ولأخر لحظه كان متوقع منها تتراجع عن الصعود لكن صدمته عندما تقدمت و راحت من قدامه وبدون ما تتكلم بكلمه وحدها
ملاك : من شدة خوفها شعرت انها خرساء حتى لا تجيد لغة الاشاره مشيت من امامه و هي شايفه عيونه عليها بس ما قدرت تفسر نظرته الا انه ممكن يرتاح في بعدها عنه صعدت الطائره و كل جسمها يرجف من الخوف تقدمت مع المضيفه لتصل الى مقعدها بالدرجه السياحيه وهي اول مره تكون بهذا المكان وقفت مكانها و المضيفه تشير لها على مقعدها بالوسط بين الرجال بأعمار مختلفه وقفت بحيره واضحه على كل ملامحها ودمعتها على وشك النزل والقصه تتضاعف بحلقها ..وهي بحيرتها مهي قادره تتكلم اشار الرجل الكبر بينهم ولم يتجاوز الثلاثين من عمره الي الذى بجانبه ليجعلوها على الطرف ولكن ..وقف ولد من المقعد الخلفي ..تعالي اختي هنا مكاني وانا اجلس مكانك ..شاف حيرتها وجه الوم لأهلها الي مخلينها لوحدها ..تقدم وجلس مكانها وافسح لها المجال لتجلس بجانب اخواته وامه .. واخواته ثنتين تهمس الاولى لثانيه : اخص مسوي فيها كريم عشان يلفت انتباهها
الثانيه : تقرصها ..سكتي ياخبله كيف تبينها تجلس وسط الرجال والنعم فيهم عيالنا ما يرضون لا على اهلهم ولا بنات غيرهم
الاولى : أي وجع لا تقرصين ..اصبري شوي الحين امي تستلمها تحقيق معها شكلي ماني بنايمه ببدل مع امي واسولف معها ..
ملاك : جلست وهي ترجف وممتنه له على مساعدتها وحست بالخجل وهي جلس بجانب المرأه المسنه المتبرقعه وهي كاشفه وجها و كل من معها بنقابهم اظهرت نقابها من شنطت يدها ورتدته ..ولتفتت لصوت المرأه المسنه ...عساك بخير يا بنتي انتى من وين ؟
ملاك : احرجها سوالها وهي بعدها مهي قادره تتكلم فردت بقصه بكاء ظهرت بصوتها : الرياض
المرأه المسنه : مشاء الله ...ما معك احد من اهلك
ملاك : سحبت النظاره عن عيونها وهي منزله راسها و سحبت الشيله تغطي عيونها وهي تبرق بالدموع على وشك النزول وحركت راسها لا
المرأه المسنه : اعذريني يابنيتي بس ابوك وينه ليه ما هو معك كيف يخليك تسافرين لوحدك
ملاك : نزلت دمعتها وما قدرت ترد عليها
المرأه المسنه : اعذريني يابنتي اذا ازعجتك
ملاك : لمست فيها الحنان وان الله ارسلها لها لتحتمي بها حتى وصولها وبلعت غصتها وتكلمت بصعوبه : لا خالتو عادي بابا راح يستقبلني بالمطار ..
المرأه المسنه : انتى منتى بسعوديه من يوم شفتك خمنت و ما غلطت
ملاك : خلاص تكفين بس تعبت من هـ الكلمه وردت عليها بتعب مثل صوت انهدام الجسور الشامخه : لا سعوديه بابا وماما سعودين ..اذا ممكن بدي نام وميلت على الجنب الاخر وبعدها لم تسمع لها أي سؤال ...
محمد : خرج من المطار وهو بعده مهو مصدق انه خلاها تبعد عنه ناظرها وهي ماشيه تمنى انها ترجع ولو لاخر لحظه لكن بعد ما اقلعت الطياره فقد الامل انها ترجع خرج وهو مهدود من التعب وصل البيت وكلم ابوه يستقبلها
~ . <* >.~
المستشفى
يزيد : جالس عند هند وهي بعدها نايمه وبوجه شاحب قرب منها و مرر اصبعين بظهر يده على خدها مسك يدها وباسها وجلس عندها على طرف السرير ويذكر كلمتها ...الله اذا حب عبد ابتلاه ..واخذ يسترجع الاحداث من يوم زواجهم وفاة امها وقوفها معه ويوسف والي صار ضربه لها و كسر من خلاله حياتهم و المصيبه الي لين الحين ما عرف كيف يمكن تنجلي ويقدر يثبت برائتها ويعيش معها بسلام عانت كثير وكانت صامده هو بس الي قدر يستشف ألأمها و ما بيده سوء الشوك اهداه لها بدل الورد ...لها فتره نايمه صلى الفجر بمسجد المستشفي وهي بعدها ما قامت قام وسحب الكرسي وجلس ونزل راسه على طرف السرير النوم بدأ يتسلل لأجفانه مرر يده على بطنها تنهد بالم وهو يدعيلها ياقلبي الله يصبرك ويصبرني على المصيبه غمض عيونه ويده على بطنها
~ . <* >.~
بيت ابو عامر
عامر : اتصل على بيت اهله وكلم امه : ايه يمه ضروري ارسليه ومثل ما خبرتك الرساله عند الرائد مشعل
ام عامر : جات تموت يوم عرفت وتكلمت بذهول : وش رسالته الله يكفينا شرها قلت لكم مهي بزينه اكيد وراها مصيبه
عامر : وهو يقلب بالأوراق قدامه على المكتب : مدري عنها انتي ارسلي السواق الحين يجيبها تامرين بشي يمه عندي شغل وش كثره
ام عامر : عساها الموت اكيد تبي تفضحنى برسالتها لكن الحمد لله الي بتكون بين يديني : سلامتك
عامر : الله يسلمك ايه يمه ادري انك ما تحبين نجيب سيرتها عندك بس هي مهما كان مرت ولدك ولازم تعرفين عنها
ام عامر : بدون نفس : خير وش فيها هي بعد غثتوني بها
عامر : الله يهديك يمه تراها بالمستشفى من البارح معها تسمم
ام عامر : بقهر وحقد يعلها ما تقوم منه ابد : زين مع السلامه ...وقفت ونادت على الشغاله تخلي السواق يجهز السياره وطلعت لمها تصحيها من نومها دخلت والغرفه مظلمه فتحت النور وتكلمها بصوت مرتفع وهي عند راسها ....مها قومي اشوف كل يوم وانتي على هذا الحال ما صارت
مها : فتحت عيونها بكسل وهي نايمه على جنبها : خير يمه وش فيه
ام عامر : قوم تجهزي اليوم بعد المغرب عندي جمعه و تبي تحظر معهم مرة الوزير ابيك تتعرفين عليها.... وتوقف عند التسريحه تناظر بشعرها تتاكد انه خالي من الشيب وتلف تشوفها بعدها نايمه ...قومي وش فيك ولا كنى اكلمك
مها : جلست وستندت على ظهر السرير وهي مغطيه جسمها : ما ابي انزل ولا اقابل احد
ام عامر : مهو بكيفك صايره مثل اختك وش الي غيرك اول كل شي اطلبه منك تنفذينه والحين بعد ما ملكتي معد يهمك قومي لا ارجع واحصلك نايمه ومجهزتي ما تلومين غير عمرك
مها : بتعب وقرف من كل شي حولها : يمه مالي خلق لجمعه خليها يوم ثاني
ام عامر : مهو بكيفك يوم ثاني انا متفقه معهم من قبل اسبوع يوم عرفت عن سفرت ابوك لشرقيه ... ليه تبيني اسويها وهو فيه عشان يغثني قومي وابيك تكشخين مثل دوم ..وتخرج عنها
~ . <* >.~
في المستشفى
ام احمد : بعد ما انخفضت حراره منى جالسه تحاول معها تخليها تاكل : كملي اكلك اشوف هبلتي فيني البارح والحين تتدعلين وبعدين وشهو الي مخبيته عني ولو عرفته ازعل عليك
منى : جالسه ومستنده على مخدتين خلفها و اثار التعب واضحه على وجها وصوتها و رتبكت من كلام امها الاخير ماتدري هي وش مسويه البارح وتبي تغير الموضوع : امي وش سويت الحين بدل ما تحضنيني قايمه علي وتستند على يدها بدلع
ام احمد :بضحكه فصوتها : اصبري علي مسيري بعرف وش مخبيه ...ويدق جوالها وكان ابو محمد ...وعليكم السلام ..ايه الحمد لله بخير الحين مافيها غير العافيه
منى تاشر لمها انها بعدها تعبانه
ابو محمد : الحمد لله ..ام احمد
ام احمد : امر عسي ماشر
ابو محمد : مايبيها ترتعب على بنتها مثل مهو ستغرب جيتها لوحدها يكلمها بهدوء : سلامتك خطاك الشر بس فيه خبر بيفرحك وكنت ابيه مفاجئه لك بعد ماتوصل لكن الحين عندي موعد مع واحد توه متصل علي بيمرني بجتمع معه في المكتب
ام احمد: خير ان شاءالله وش عندك
ابو محمد: ملاك رحلاتها توصل العصر ابيك ترسلين السواق يجيبها انا كنت بمر اخذها لكن الحين ما عندي وقت ..
ام احمد: بفرحه ومهي مصدقه : الحين من جدك ولا تقص علي
منى حتى وهي تعبانه تعلق على كل شي : امي وش عندك انتي وابوي هاااه
ابو محمد : ضحك لفرحتها : ههههه الحين من متى عمري قصيت عليك خلاص روحي جيبيها وتصدقين لقرت عينك بشوفتها
ام احمد : تبعد عنها وهي تاشر لها تسكت : خلاص بكلم مي ترسل لهم السواق وشله اروح انا محمد معها
ابو محمد : لا هي لوحدها محمد عنده شغل
ام محمد : بخوف : وشهووو
ابو محمد : وش بلاك هي جايه بس تبي تشوف منى
ام محمد: كبتت خوفها مستحيل عمرها ماسوتها وجات لوحدها من بعد الي صار عليها بالمصعد : وليه ما خبرتني من قبل انها جايه
ابو محمد : ماحبيت اقلقك قبل ما توصل المهم رحلتها ما بقي عليها كثير وتوصل
ام احمد : ان شاءالله الحين اطلع لها استقبلها ..وقفلت
منى : بعدت الاكل عنها : امي وش فيك ...وبفرحه بصوتها وملامح وجها ...ملاك ومحمد جاين صح
ام احمد : وهي ساهيه بتفكيرها : ملاك لوحدها ..و كلمت مي تجي هي وحماده عند منى وهي تروح المطار تستقبلها ..
~ . <* >.~
في المستشفى
هند : صحت بعد تعب ومعاناة وفتحت عيونها بإرهاق و اجفانها بخمول رفعتها..واول مابحثت عنه طفلها اخذت تتحسس بطنها ودمعتها تاخذ مجراها على خدها
يزيد : بعد الغفوه الي اخذها قربها على السرير صحي وكان منزل راسه حس بحركتها شافها تبكي قام بفرح وجلس عندها وباس جبينها : لاتخافين ياقلبي مافيك شي
هند : بعدم تصديق وهي تبكي وحلقها جاف يالله قدرت تخرج الحروف : ولدي
يزيد : مسك يدها الي تحركها على بطنها : لا تخافين يا قلبي ما فيه شي الحمدلله بخير ضم راسها له وهي تبكي ..ويمسح على شعرها ..بس ياعمري ربي قدر ولطف فيك لا تخافين
هند: من بين دموعها ويدها بعدها على بطنها مهي مصدقه انه بعد التعب الي تعبته هو موجود تكلمت بصوت مرهق وهي تبلع ريقها الجاف بصعوبه : وش الي صار ؟
يزيد : يحب راسها : تسمم وش الي انتي ماكلته الي يجيك
هند : مالحقت ترد اندق الباب ودخلت الدكتوره ..اطمنت على وضعها وراح تضل عندهم كم يوم عشان تتطمن على وضع الجنين بعد التقلصات الي صابتها بالرحم من اثر مغص الي صابها ...
~ . <* >.~
مطار الرياض
ملاك : كملت رحلتها كلها بصمت نامت شي بسيط قفوات متقطعه من الم راسها وخوفها وتقوم وقت الصلاه وريحها ان المرأه المسنه نايمه وكفت عنها بأسئلتها...واول ما شافت امها تاشر لها معها احمد اجتازت كل الناس بسرعه و حضنتها وهي تبكي
ام احمد : قلبها ماكلها طول الطريق وهي جايه للمطار الحين بكاها يثبت لها ان فيه شي صاير بينهم اخذتها بحضنها وهي تحاول تهديها : هلا يمه هلا بنظر عيني وتسلم عليها.... بس يمه خلاص الناس حولنا
ملاك : نقابها بتل من الدموع ورفعت جسمها من حضنها وباست راسها ويدها ورجعت تحضنها مره ثانيه وهي تشم ريحت امها وعطرها بعمق تخلله داخل خلايا كل كيانها لتعيد ترميمه ...
احمد : يشد عباتها : بس فضحتينا الناس تسلم مهو تحضن كذا ..الحين انا تعبان وجاي استقبلك ماتعبريني افا عليك بس
ملاك : باست خد امها ولفت له نسيت وجوده بعد شوفتها لامها باسته وصوتها ناعم وصاير فيه بحه من ارهاقها : اسفه حبيبي ولا تزعل وسلامتك يا قلبي ما تشوف شر...
راحت مع امها على المستشفي تشوف منى وأصرت تخرج معهم وما تنام بالمستشفى
~ . <* >.~
بيت ابو عامر
ام عامر بعد ما راحت مع السواق و استلمت الرساله فتحتها بس ما عرفت وش فيها تعرف شي بسيط بالكلمات الانجليزي و ما تعرف تقرأ..خبتها بداخل الدولاب بعدين تعرف وش مكتوب فيها و هي عارفه انه عن الفلوس الي وعدتها فيها وعن الي سوته بهند اكيد معترفه بكل شي
جهزت امورها لستقبال ضيوفها ..وتاكدت من مها انها جاهزه
مها بعد ما صلت العشاء وهي لابسه فستان اسود ناعم بكم جبنيز واضافت المساحيق على وجها والظل غامق يغطي على بهتان عيونها والسواد الي تحته شعرها مرفوع من الامام بنفخه بسيطه ومن الخلف مكسر بتموجات لبست عقد لؤلؤ اوفويت طويل وحلق من نفس الحبات والساعه الؤلؤ ودبلتها وهي تبلع ريقها والدمعه طفرت للرموشها حاولت تقاومها وتمسحها قبل ما تعدم كل مكياجها لازم تنزل وتشوف ام راشد وتعرف اخباره ولا راح تموت من القهر ..مررت يدها على بطنها بحزن اخذت منديل ومسحت دمعه تمردت وخرجت من محجرها و مسحت انفها ولبست بوت ناعم اوفوايت نزلت وسلمت على كل الموجودين وتحفتها ام راشد بالترحيب واخذتها تجلس عندها ..
~ . <* >.~
بيت ابو محمد
بعد الساعه عشره
الكل مجتمع في الصاله ومنى متمدده على الكنبه عندهم ومتغطيه بطنيتها واحمد على الارض ومتغطي باطانيته وجالس يلعب بلاستيشن
مي تصب الشاهي الاخضر بالنعناع للكل وتعطي ابوها شاهيه ..
ملاك : جالسه جنب امها ولافه يدها حولين يد امها وحاضنتها
ام احمد : تمسح على راسها وتكلمها بصوت هامس مالقيت فرصه من يوم جات تنفرد معها لوحدهم وتشوف وش فيها حتى محمد هم كلموه خبروه عن وصولها وما كلمته : وش فيك حبيبتي تشكين من شي
ملاك : باست يد امها وستنشقت ريحتها بعمق وحب وهمست : لا ..وحشتيني وجيت اشوفك
~ . <* >.~
نوره : زارت هند في المستشفى هي ومريم ولزمت على يزيد يرجع البيت وهي تظل معها لكن رفض انه يبعد عنها و هو راح ينام معها اليوم يخاف عليها من أي مضاعفات ويصير شي عليها او على الجنين والكل تقبل كلامه بدون معارضه شايفين مقدار اصراره
~ . <* >.~
بعد أربعه أيام
بيت ابو محمد
منى استعادة صحتها ورجعت لشيطنتها وجنانها وهم جالسين بغرفها هي وملاك سوليف ومي خرجت عنهم تكلم سعد
منى :بجديه بصوتها: لا خلاص توبه حرمت
ملاك : مسدوحه على بطنها ورافعه رجولها تلعب فيها وتحركها وبضحكه : عن جد
منى : ايه...خلاص ارسلت له مسج خليه يرن من هنا لين بكره مهو شغلي ..و تبرد بأظافر رجولها وهي على الكرس بتوتر ...انتي ما جربتي جيت اموت وامي تسالني تخيلي لوني معترفه قدامها اني اكلمه والله تذبحني ومعد ترضى علي ابد
ملاك : تعدلت بجلستها : خبرتك من البدايه وانتي عنيده سويتي الي بدك
منى : خلاص انا خبرت خالد مستحيل ارد عليه لا يتصل
مي : بصدمه وهي واقفه عند الباب : نعممممممممم
منى : رفعت راسها بصدمه
ملاك : تربعت على السرير وتعرف شدت مي مثل امها بهذى الامور : مي سكري الباب وتعالي افهمك
مي : وهي تسكر الباب وبعصبيه : وش تفهميني عليه انتي عارفه وش تقولين
منى : وجها صار الوان وطاح بالارض
ملاك : تناظر منى : مي محمد يعرف هو طلب يكلمها ومحمد وافق
مي : جلست بصدمه مهي مصدقه الي تسمعه : مستحيل
منى : والله يعرف وهو الشيخ خبرهم انه جائز بس خلاص انا ما ابي اكلمه
مي : أي شيخ هذا يفتي من راسه ما يجوز يا خبله و شلون قدرتي تخبين عن اهلك وتكلمينه
منى : تبرد اظفرها بسرعه و راح وهي مهي حاسه قامت بسرعه عند مي :مي الله يخليك خلاص ماراح كلمه بس امي لا تعرف الله يوفقك بتاخذ بخاطرها بعدين
جلسوا فتره يتناقشون بالموضوع
لفوا لدقت الباب وتفتح عليهم
محمد :ببتسامه مشرقه بكل وجهه : ممكن اقتحم اجتماعكم يا حلوات
مي : وقت وصرخت اول وحده : لا ما صدق يادب ليه ما قلت انك جاي وتروح وتسلم عليه
ومنى : لااااا وش المفاجات الحلوه انت وملاك لاعبين علينا هذى المره وتنط وتبوسه على خده
ملاك : مكانها حاضنه المخده وعيونها ثابته عليه صوته دفق الحمم الخامده بداخلها أربعه ايام ما سمعت صوته ولا تجر ائت انها تكلمه
محمد : وهو يسلم على اخواته عينه عليها يحاول يقاوم نفسه ما يختطفها ويضمها لصدره ويخفف لهفت و شوقه الي صارعها بغيابها
منى : بضحكه بصوتها : يااااهو وتحرك يدها قدام عيون محمد بس خلاص عارفين انك مشتاق لها وتحبها
محمد : لف لها وهو يضحك : مهو شغلك
مي : بخجل : امشي بلا لقافه
منى :نووو احد يفوت لقاء الحبايب والعشاق ...وتقرب من ملاك الي بعدها على وضعها ..استحي على وجهك يالعجوز قومي سلمي على رجالك وتسحبها
ملاك :وقفت تعدل بفستانها بكم قصير ولنص الساق نزلت عينها بالارض و هي توقف و عيونها ادفقت فيها الدموع ..ما شرعت غير البوسه الي على خدها و ريحة عطره الي صهرت الكثبان الجليديه بداخلها رفعت نظرها وبريق الدموع فيها وهي على صمتها
محمد : قرب منها وباسها على خدها بوسه خاطفه حتى شفاته ما لامست نعومة بشرتها من سرعتها وقف يتامل عيونها لحظات كانها عصور كتحلل الصخور تحت أعاصير الرياح كتفتت الصخر بقوة قطرات الماء وتحوله الى اشلاء اخترق خلايا كيانها لتقتاله بسهامها ...رفع يده وبعد شعرها عن جبينها وباسه وهو يستنشق رائحة بشرتها لتنعش رئته اغمض عينيه وهو على وضعه لم يفق الا على صوتها
منى : بشكل مسرحي مضحك : رمت نفسها على السرير وهي تصرخ ومغطيه عيونها : لاااااااااااا مقدر على كذا عيب عيب وتحط يدها على قلبها ياويللللي يايمه على الحب ما عرفوا عنكم بهوليود وبليود غطيتو عليهم
محمد : سحبها مع يدها وهو يضحك : وش مجلسك برااا اشوف الواحد ما يعرف يسلم على زوجته براحه ...وخرجها برا الغرفه وسكر الباب
منى : صدمت بمي الي خرجت على طول وهي تصارخ : يالدب استح على وجهك ملاك ياخبله يقص عليك هههههههههه
مي : وجها محمر وتضحك : اسكتي ياقليلة الادب فضحتيهم
منى : دق على الباب مهو شغلي افتحوااا البااااب غرفتي اطلعوااا منها
ملاك : وجها محمر خجل من الموقف الي صار
محمد : سكر الباب ورجع لف لها حضنها ودفن وجهه بشعرها وهو يتنهد : شتقت لك ..بعدها وحضن وجها بيدينه ...رجع باس جبينها
ملاك : غمضت عيونها مهي قادره تعبر مثله عن احساسها بشوقها لانه مافي كلمه توصف مشاعرها حتى الصمت يتفجر اذا بيعبر عن الي تشعر فيه نزلت دموعها على خدها دفنت وجها بين اضلعه يمكن تقدر تعبر لو شي من الي بداخلها ما تعرف هل هو تقبلها او مجرد وهم
محمد لف ايديه حولها لكن الازعاج الي مسويته منى برا خلاه يبوس راسها ويبعدها وتكلم وهو مبتسم : تعالي فيه ناس يبلي ارويهم شغلهم...و يمسكها مع يدها ويخرج برا و اول ما فتح الباب صرخ فيها ...تـــعالــي انا راويك يالدب
منى : يوم شافته جد بيمسكها نزلت تجري مع الدرج وهي تصارخ: واااااو يمــــــــــــــــــــه
محمد : لف لملاك الي ضحكت مي جت طيح من خبال منى يوم وصلت الصاله اسفل واحمد توه داخل معه كرتون صدمت فيه
محمد ارعبه الصراخ صار من كل وحده منهم الثلاثه بصوت واحد ...
~ . <* >.~
في الفندق
اصايل مصوره حمد وهو نايم فديو تراويه انه يشخر وهو مسكها يبي يمسحه
اصايل : لاااااااا مافي مهو شغلي احسن خلك عشان تحرم تتحداني
حمد: مثبتها على الكنب ويحاول يسحب الكمره منها : بتمسحينها غصب عنك ياحلوه سامعه
اصايل : لا ..فك يدي وجعتني
حمد : يشد على يدها ويتغزل فيها : سلامة يدك ياقلبي اعطيني الكمره افكها
اصايل : حمد وجعتني
حمد : يبوس خدها هاتيها اول
اصايل : هبل فيها متقدر تسوي شي يعاقبها بغزله وبوساته : خلاص زين فك يدي اعطيك هي
حمد : قولي احبك افك يدك
اصايل : صار وجها الوان خلاص خذ وسحبت يدها من خلفها ..فك يدها جاء بياخذها منها شردت عنه رجع سحبها وثبتها وهو ميت ضحك عليها ولف يدينه ثبتها واخذ الكمره منها وفعلاً يشخر بنغمات ومتفننه بتصويره ..اوف كل هذا يطلع منى انا يوه اوركسترا أثريني وانا مدري
اصايل : بخجل من وضعها : شفت يالشايب
حمد : ههههههههه شايب منك عمري بحياتي ما شخرت كله منك مطلعتني جبل وش طوله
اصايل : بتحدي تبيه يبعد شوي عنها : الحين ليه ما تعترف انك شايب هاااه
حمد : وهو يقرب وجه منها وبهمس : اذا كنت شايب بتحبيني قولي عني الي تبين قلبي ما شاب غير من كثر حبك هبلتي فيه من صغرك ما تبينه يشيب بس لا تخافين بقربك رجع مولود جديد ...
~ . <* >.~
بيت ابو محمد
محمد : لف يشوف ملاك الي تصرخ وهي على الدرج وينتبه للي قدامها الهامستر (حيوان يشبه الفار ) و منى و مي يركضون كل وحده بجهه في الصاله والهامستر الثاني خلفهم والبيت انقلب الي اعصار مدوي من صرخاتهم واحمد يحاول يجمع همستراته كان داخل فرحان راجع مع سعد ومشتريها له وتقابله منى وطير الكرتون والي بداخله
ام احمد جات من المطبخ والهمستر بوجها صارت تصرخ مع البنات وتسمي
محمد : نزل الي على الدرج حركه برجه قرف منه ومسك ملاك وهو يضحك على الي صاير في البيت ...خلاص بس ويكلم احمد انت من وين جايبهم
احمد : توه ينتبه لمحمد انه فيه ويصرخ : بس الله انت من وين طلعت
ام احمد : منهو الي جايبهم البيت
احمد : ماما سعد اعطاني هي
منى : تصرخ وهي فوق الكنب واقفه بطولها وتاشر على مي : كله منه الجتا لذبحه لك الحمار ..
محمد : ملاك ماسكه فيه بقوه : بس خلنا نمسكها قبل ما تنخش باي مكان ..وانت اصبرك انا ما قلت لك القرف هذا ما تجيبه البيت يوم طلبته.... تجيب لك المرض يالخبل
احمد : يمسك واحد ويدخله بالكرتون ويطرد ور الثاني و ما قدر يمسكه ويدخل على المطبخ وما سمعوا غير صرخت الشغاله والشي الي طاح ونكسر واحمد خارج ماسكه ميت ضحك .......ههههههههههههههه ماما الحقي الشغاله داخل المغسله
الكل مات ضحك وبعد ما اخذ احمد كم تهزيئه ..من امه
احمد : يووه مي سعد برا يبيك
منى : انتظري البس عباتي واخرج له ارويه الدب الحمار وشون يجيبها بيتنا
محمد : صرخ فيها : بنت وبعدين معك خلاص..بلا قلت ادب ..
مي : قامت وخرجت تشوفه وهو جالس على درجة المدخل ويضحك
سعد : ياهلا بعمري وش الزلزل الي صاير عندكم
مي : بعد ما تاكدت من شكلها بمرآية المدخل تكلمه بعتب : حرام عليك الي سويته فينا الحين بتاخذها معك تبيه يمرض منها
سعد : وقف قدامها ومسك يدها : اخوك الي يبيها وبعدين تعودي عيالي لو طلبوا يربون اسود بجيبها لهم البيت مهو همسترات
محمد: بضحكه وهو عند الباب : يا اخي خاف الله فأختي وش تبيها تموت رعبه بسبتك يعني
سعد : ياهلا والله متى جيت ما عندي علم ...ويناظر مي بلوم ليه ما خبرته
محمد : توني واصل واشوف خرابك فبيتنا
جلس سعد تعشي معهم وبعد ما خرج و هم جالسي بالصاله كلهم و احمد متربع قدام الكرتون حيواناته الجديده
ابو محمد : قوم ظهرهم برا عند الباب
احمد : يبه ابيها تنام بغرفتي
ام احمد : قوم اشوف حدك اليوم تخليها في البيت بكره تشيلها ما ابي اشوفها
محمد : جالس وملاك جنبه و ماسك يدها بعد شعرها خلف اذنها ..ناظرته ومعد يدري بالي حوله وهم تايهين بنظرات بعض ..
منى دق مي الي جنبها وهي تضحك وتهمس : راح فيها اخوك خلاص هبلت فيه ملاك
مي : مبعده نظرها عنهم : الله يسعدها ويسعده انتي وش حارك ها
ابو محمد : يالله تصبحون على خير ..وقام طلع عنهم
محمد : مسك يدها وقفها معه يالله انا كمان تعبان ابي اطلع انام..
ملاك : جلست بحرج وهو ماسك يدها وهمست : ما فيني نوم ..وشافت نظرات امها تهددها قومي مع رجالك ..قامت وهي ساكته ...
استودعكم بحفظ المولى
26-05-09, 10:57 PM
جديد مواضيع قسم القصص المكتمله من وحي قلم الاعضاء
العرض العادي
