كاتب الموضوع :
فـ ج ـر الأــ م ــل
المنتدى :
القصص المكتمله
الجزء الاول
(الفصل الرابع)
كان يصعد الدرج بخطوات متلاحقه.. اليوم الصبح صحى على صوت جواله .. وكانوا الشرطه.. هذي المره الرابعه اللي يتصلون فيها خلال شهر .. وكله من ولده الخبل دلوع امه.. فتح الباب والغضب راسم ملامحه على وجهه .. صرخ فيه بأعلى صوته " نايف" .. وهالصرخه خلته يصحى من النوم مفزوع" ها... وشفيكم"
خلف" اللي فينا انك بتفضحنا .. انت وش مسوي البارحه؟"
نايف وهو يتثاءب والنوم يغالبه" اوووه.. والله ماسويت شي"
خلف" لا تقول ماسويت شي.. اجل ليش الشرطه متصلين فيني وطالبينك"
نايف بتضجر" وهالشرطه ماعندهم غيري"
بهالوقت دخلت حصه ام نايف.. الابتسامه شقت وجه نايف لين بانت ضروسه .. محد بيفكه من ابوه الا هي " هلا و الله.. هلا بماي ماذر..هلا بنوارة البيت "
حصه" نايف يهلي من صباح الله.. اكيد عندك شي"
نايف " اسألي المملوح اللي جنبك وهو بيقولك" ورجع ينام مره ثانيه..
حصه" خلف وش السالفه؟"
خلف " السالفه ان ولدك المدلل امس مسوي حادث وصدم في بوابة مطعم وكسرها"
حصه" بس.. وانت خاب عمرك ليش.. نايف حبيبي تفداه بوابات المطاعم كلها "
خلف بأسف" كنت ادري انك بتدافعين عنه وبتختلقين الف عذر وعذر.. بس من الحين اقولك .. انا مالي شغل بهالسالفه.. وماعندي ادنى استعداد ادخل اقسام علشانه .. وهذا هو عندك.. وريني وش بتسوين انتي وياه"
طلع وتركها.. هي ما همها كل اللي قاله.. اللي شالت همه هو من بيخلصلها الموضوع ... العاده خلف يخلص كل شي عن طريق ولد اخوه الضابط طراد وتمشي الامور بسلام .. بس هالمره شلون بتتصرف .. نايف لا يمكن يعتمد عليه.. بس لمتى.. لازم هالمره هو يتصرف .. اتجهت لسريره وصرخت فيه" نايفوه ووجع فز من مكانك"
قام بتثاقل" ياناس والله حرام .. خلوا عندكم شوي انسانيه.. خلوني اناااام"
حصه" ونومة جدي ان شاء الله.. شلون بيجيك النوم والشرطه طالبينك"
نايف" عادي هي اول مره"
حصه" خل عنك الكلام اللي ماله معنى .. وفكر معي شلون بنتصرف.. ابوك غسل يديه من الموضوع"
نايف" سهله.. عطيني من هالكنوز اللي عندك.. اصلحله قزازته وهو بيتنازل على طول"
حصه" لا والله.. على برودك هذا انا اسفه.. ماراح تشوف مني ولاريال"
طلعت من الغرفه وهي مقهوره من بروده وعدم احساسه بالمسؤليه.. لقت قدامها بنتها البكر وصايف.. اللي كانت جايه من غرفتها مستغربه من الاصوات اللي جايه من غرفة نايف" يمه وشفيكم"
حصه نفخت عليها" مب شغلك.. وخري عن وجهي"
جلست تتأمل امها وهي رايحه لغرفتها والاستغراب يزيد على وجهها .. خصوصا انها شافت ابوها قبل طالع من الغرفه زعلان والحين امها .. اكيد هذي مصيبه من مصايب نايف.. راحت غرفته عشان بتسأله" نايف وشفيكم؟"
نايف" اعتقد سمعتي امي وش قالتلك .. مب شغلك.. ويله اذلفي وخليني انام .. ولا تنسين تسكرين الباب وراك"
طبعا هو رجع يدبخها نومه وهي ما عرفت السالفه ولا بتعرف ..
\\\\\\\\\\\\\\\\\\\
توجهت وهي شايله بوكيه الورد بيدها.. للممر الطويل اللي بالمستشفى واللي فيه غرفة ابوها.. كانت تحاول ترسم الابتسامه على وجهها لو بالغصب .. بس عشان تبعث الامل في نفس ابوها وتخفف عليه.. هي تدري ان انسداد الشرايين شي مب هين.. بالذات لواحد كبير فالسن مثل ابوها.. بس تحاول تصبر نفسها وماتبين خوفها عشان ما تضايق ابوها ولا تقلقه.. انتبهت على نفسها قدام باب الغرفه.. رسمت الابتسامه المصطنعه من جديدودخلت " صبحك الله بالخير يبه"
ابوها تهلل وجهه بشوفتها" هلا والله ببنيتي باسمه"
قربت من ابوها وحبت راسه ويده.. وجلست بكرسي قريب منه"
جابولك الفطور؟"
ابوها" ايه جابوه وافطرت الحمد لله"
باسمه" طيب ما تبي اسويلك شي"
ابوها بجديه" ابيك تسمعيني"
باسمه باهتمام"خير يبه"
ابوها" انا خلاص ايامي بعالدنيا صارت معدوده.. والصراحه اني خايف عليك من هالدنيا وبلاويها.. انتي وحيده ومالك احد وابي اتطمن عليك قبل ما اموت"
قاطعته والخوف يملى وجهها" بسم الله عليك ليش تقول هالكلام"
ابوها " خليني اكمل.. في واحد جاني امس وخطبك مني.. وبصراحه انا ماشفت منه شي واشوف انه مناسب... ها وش قلتي"
باسمه تتنهد" اقول سو اللي يريحك يبه"
ابوها " انا مابي اللي يريحني ابي اللي يريحك"
باسمه تتغصب الابتسامه" ولا يهمك يالغالي .. كل اللي تبيه بيصير"
ابوها وانا اوعدك اني اضمن لك كل حقوقك.. وبسجل البيت والمصنع باسمك"
باسمه" انا موافقه على كل شي بتسويه"
ابوها" اجل خلاص.. اتصل بالرجال عشان نروح اليوم المحكمه يملك عليك واسجل البيت والمصنع باسمك"
اكن باين عليها الضيق واحزن من اول ماتكلم ابوها بالموضوع.. بس مافي مجال انها ترفض.. عشان ترضي ابوها اولا..ولأنها وحيدهبهالدنياومحتاجه رجال يسندها بعد وفاة ابوها... باسمه عايشه كل حياتها مع ابوها بعد ما توفت امها الاجنبيه.. وابوها وحيد اهله.. يعني لا خوال ولا اعمام.. ابوها كل شي بحياتها ولا شي غيره...
\\\\\\\\\\\\\\\\\\\\\\\\\\\\\\
جود اليوم كانت تعبانه شوي ولاداومت..طفشت من جلستها بالغرفه ونزلت بالصاله وجلست تصحح بعض دفاتر طالباتها.. وقريب منها كانت جالسه ام طراد تكلم وحده من خواتها..
ام طراد" مايخالف .. مايخالف يام فهد.. بيعوا هالبيت وبيعوضكم الله بغيره..
وشو اللي حسافه.. كبير ع الفاضي.. مافيه الا انتي وابو فهد..
مادامكم بايعينه وشوله موجعه راسك وموجعه راسي معك..
اقول بس غيري السالفه..
وشو؟ (تناظر جود بشماته) لقيتي عروس لطراد..
بهاللحظه وقفت جود منزعجه... لملمت الدفاتر المتناثره على الطاوله مستعده للهروب من الموضوع اللي ماتحب ابدا انه يفتح قدامها.. بس اكيد ماراح تخليها فاطمه.. انهت مكالمتها بسرعه.. ووقفت عشان تتفرغ لمواجهة جود" وشفيك وقفتي.. ماعجبك كلامي"
جود وهي مشغوله بلملمة الدفاتر" انا ماقلت انه ماعجبني"
فاطمه" اجل ليش تو بغيتي تهربين"
التفتت عليها جود بثقه" وليش اهرب انا ماسويت شي غلط"
فاطمه مصره تنكد عليها" اذا ماتبين طراد يتزوج عليك.. جيبيله الولد"
جود خنقتها العبره بس حاولت ماتبين" انتي تعرفين ان الامر هذا لا بيدي ولا بيدك.. بيد رب العالمين وبس"
ما كانت تبي تسمع اكثر .. رمت الدفاتر اللي بيدها .. تبي تهرب لأي مكان ... بس عشان ماتسمع هالسهام الحارقه اللي ترسلها مرت عمها وتخترق اعماق قلبها المجروح.. لكن ام طراد ما خلتها حست انها للان ما شفت غليلها " وين رايحه.. وش قصدك بهالكلام.. يعني انا مافهم.."
انصدمت من ردها" انا قلت ما تفهمين"
ام طراد" صدق انك ناكره للجميل.. حنا اللي ربيناك وضفيناك بعد ما كنتي بتترمين بالشارع.. تقولين عني ما افهم.. ايا اللي ما تستحين"
جود من صدمتها بكت .. قولتها كلام ماقالته .. والحين تمن عليها بالتربيه..هذي اي نوع من البشر" يامره حرام عليك .. خافي الله في نفسك وفيني"
هربت للمطبخ.. وهي تحاول تخفف من حدة صياحها.. ماتبي تحسسها بلذة الانتصار.. ماتبي تبين لها انها قهرتها وكسرتها بالكلمتين اللي قالتهم.. تبي تظل دايما جود القويه الشامخه اللي ماترضى لنفسها بالمهانه...
\\\\\\\\\\\\\\\\\\\\
كان قاعد يذوق الاكل اللي طبخته بنته عذاري قبل مايرسلونه للجيران" المرق ناقصه بهارات.. زيدي بهاراته.. لا تفشلينا قدام الناس"
عذاري" ان شاء الله..(بهمس)خايف افشلكم والا خايف يدورون مطعم غيرك"
سلطان لاحظها بس مايدري وش تقول" وش عندك تخربطين"
عذاري ارتبكت" انا اخربط.... لا من قال.. ابد سلامتك.. قاعده اكلم نفسي"
سلطان " الحمد لله والشكر.. اقول كملي شغلك احسن لك"
قطع عليهم صوت جواله يرن .. واللي طبعا شاريه مستعمل ويستقبل بس مايرسل.. يقول ما يحب كثر الهرج بالتلفونات وهو اصلا مايحب كثر الفلوس اللي بيدفعها..
نرجع للمكالمه اللي فز قلبه عليها ولاحظت هالشي عذاري.. طلع بالحوش ورد هناك وهالشي خلى عذاري تتأكد ان المسأله فيها ان .. لحقته عشان تسمع المكالمه" هلا .. هلا بوباسمه.. وافقت.. الله يبشرك بالخير.. ان شاء الله.. مع السلامه"
هربت عذاري للمطبخ قبل ما يشوفها ابوها.. سمعت المكالمه بس مافهمت شي.. وتدعي انه مايكون اللي في بالها...
\\\\\\\\\\\\\\\\\\\\\\\\\
من دخلت المطبخ فجرتها صياح.. وشهلا بنت عمها تحاول تهديها بدون فايده... كانت ماسكه نفسها قدام ام طراد بالغصب.. ماصدقت تبعد عنها عشان تطلع كل اللي بداخلها" انا مادري ليش تعاملني كذا"
شهلا" امي طول عمرها وهذا اسلوبها.. يعني ماتعودتي عليه"
جود" مافي انسان يقبل بالذل والاهانه"
شهلا وكأن بداخلها جروح وتفتحت" الا انا.. طول عمري مذلوله ومهانه... وساكته"
جود" انتي غير.. هذولا اهلك وهذي امك"
شهلا بسخريه" امي.. يابنت الحلال.. خليني ساكته احسن"
قطع عليهم دخول ابو طراد.. وبيده اغراض للبيت.. وقفوا جود وشهلا احتراما له.. سلم عليهم وردوا السلام.. ومسحت جود دموعها بسرعه لكن عمها انتبه لدموعها واثارت فضوله" جود.. وشفيك يابنيتي احد مزعلك"
جود تتغصب الابتسامه" لا ابد .. مافيني شي.. سلامتك"
التفت على شهلا بعبوس كالعاده" وانتي.. جيبيلي القهوه الحين .. مو مثل العاده ماتجيبينها لي الا بعد الظهر..
طلع ابو طراد .. والالم ارتسم على وجه شهلا.. دايما اذا شافت الفرق بمعاملة ابوها لها ولبنت عمها تحس بالاضطهاد.. معتبره نفسها خدامه بهالبيت لا اكثر ولا اقل.. امها تعتمد عليها بكل شي يخص البيت.. كل اللي عليها تنفذالاوامر وبس.. وطلباتها دايما مرفوضه.. اشي الوحيد اللي تحقق لها هو اكمالها لدراسة الثانويه.. وهي بطبعها مثقفه .. تحب القراءه والاطلاع على كل شي ... ومنع اهلها لدخولها الجامعه كان صدمه بالنسبه لها... بس عادي .. هي تعودت على الصدمات...
|
14-10-08, 06:14 AM
جديد مواضيع قسم القصص المكتمله
العرض العادي
