البارت الليلة الساعه وحده بإذن الله إلا اذا منعني ضرف قوووي

الجزء الرابع عشر



عرفت على طول أنه دخل البيت بسبب ريح العود الي يسبقه وش سويتي يا نوت راح يضحك عليك ليش سويتي بنفسك كذا
كان يمشي بهدوء في ممر البيت ويدور بعيونه عنهم او عنها بمعنى اصح البيت هادي مو شي غريب على هيف بس الغريب انه بدى يحب وجودها بدى يشتاق لشوفتها ابتسم للوجه الأحمر استغرب فيها شي غريب وش في وجهها صاير كذا
احم هيف : وين سعديه
حست مثل البرودة بكل اطراف جسمها بدال ما يسلم بدل ما يسأل عن الحال على طول يسأل عن سعدية كأن مالها مكانة بالبيت هذا
رفعت عيونها له وبسبب دموعها سببت غشاوة مدري ليش الحروف عاندتها ورفضت تطلع من فمها ناظرته بنظرات تحرق حتى اهو حس مثل الألم بقلبه سبب نغزة قوية وش فيها ليش دمعت عيونها ما سويت شي معقولة فهمت غلط والبنت فعلا مجنونه بس الهدوء هذا والعقل ما يصدر من إنسان مجنون مشى بهدوء وقرب منها وجلس جنبها وحط وجهه بوجهها : وش فيك شي يعورك
نوت ببكي خارج عن إرادتها تقدرون تقول آثار الكبت الداخلي : وخر عني
حطت يدينها على وجهها وكملت بكيها بصوت عالي ما عرف وش يسوي او وش جاها قرب منها اكثر وهي قامت ودفته وراحت تمشي بسرعه وتمسح على عيونها
وقف ومشى بسرعه وراها لقاها بالغرفة الثانية بحضن سعدية وتصيح وتهدي فيها للمره الثانية الرغبة في انه يحتويها ويهديها لكن يحس يدينه عاجزة وما يقدر يسوي شي او يمكن ما عندة الجراءة الكافية
هيف : وش فيها
سعدية : مدري والله دخلت علي تصيح مدري ايش صاير لها
هيف : يمكن تعبانه وبصوت واطي نوت ويعليه شوي نــوت
وهي دافنه راسها بصدر سعدية وتصيح وكل ما ناداها دفنت رأسها أكثر مشى وقرب منهم ومستحي من سعدية ماهي محرم له ومايبي يصتدم معها
هيف : نوت طالعيني وش فيك
ونوت بس ترتجف من البكي هدى صوتها بس جسمها ما زال يهتز
هيف : وانا فرحان وداخل البيت وناوي اسوي لك مفاجأة
هدت وحس ان جسمها هدى وما صار مثل أول
كمل هيف : يالله بريح شوي وانتوا تجهزوا فيه مفاجأة على بعد العصر تحتريكم
وطلع وخلاهم
سعدية : وش فيك يا بنتي ليش تصيحين
نوت بعبرة مخنوقة وصوت يالله يطلع : ضايق صدري
سعدية : استغفري ربك كل هذا من ضيق صدر
نوت : مدري احس الهموم اجتمعت فجأة داخلي
سعدية : أو متضايقة انه ما أنتبه انك متزينه عشانه
رجعت الدموع تنزل لكن بهدوء دموع تقطع القلب دمعه تنزل بتلقائية وبسهولة تلحقها دمعه ثانية كأنه حالفة ما تخلي الدمع الي قبلها تروح بلحالها في تنافس ايهم اسرع عشان تنحدر على خدودها وتجتمع بحضنها
كملت سعدية : يابنتي لا توقعين ان هيف راح يتقبلك بسهولة الحين هو يتوقع انك مجنونه وحتى لو عرف حقيقتك مراح يسامحك على طول حاولي يا بنتي تكسبينه بصفك
ما تقدر تتكلم ما تقدر تبوح لسعدية ما تقدر تقولها عن المشاعر الي أول مره تحس بها في حياتها عمرها بحياتها ما همها تتجمل او راي احد بزينها او مكياجها دائماً اهتمامها بعطاها وبمحاضراتها فكرة ان احد يعجب فيها ما عمرها طرى في بالها لحد ما بدى قلبها مثل عصفور مبلل يرجف داخل فؤادها خلاها تقعد قدام المراية ساعه كامله تشوف نفسها وتهتم وتشيل وتحط كانت تشوف نفسها عادية بالمقارنة بجمالة هيف الخارق ويوم شافت كيف دخل وما أثر شكلها فيه حست بالاحباط نست المجرمين الي قتلوا اهلها نست انها مطاردة وما عاد همها احد وخلت اهتمامها بالشخص الطويل الي هيبته تحسسها انها صغيرة مره مره











هشام : ابي افهم انت ليش معصب
بندر : ولا شي ما عصبت بس متضايق
هشام : شوف جو المزرعه
بندر: أمس يوم رحنا لبيت الدكتور هيف طلع عامل يشتغل عنده سوداني ما أخذنا منه لاحق ولا باطل يقول اذا جا الدكتور تفاهموا معه
هشام : خلاص الامر صار سهل نروح للرياض وبلغوا ناصر
بندر : وهذا الي بيصير
جاهم مؤيد يمشي : يا الله بنروح للرياض الحين
بندر : ليش
مؤيد : مدري ناصر اتصل علي وقال تعالوا
بندر : اجل علمته
مؤيد : وش اسوي احرقني بالتلفونات
هشام : الحين نمشي
مؤيد : أي وش ورانا بسرعه قبل احد يلزم علينا من اهل القرية ونتبهذل معهم

بسرعه ركبوا السيارة ومشوا هشام يفصفص حب ماهمه احد وفيه انسان بجسمه معهم لكن عقله وقلبه مو معهم يحس انه متضايق ما يدري ليش هل هو سبب ان الكلام الي بـ الأوراق قضى وما عاد لقى كلام البنات العفوي الي طالع من القلب الي يحس نفسه ارتبط فيه كلام بسيط من يومياتهم ومهاوشاتهم صارت جزء من يومه ما يمر عليه يوم الا يقرا فيها واليوم خلصت عشان كذا تضايق فكرة جنونية لمعت براسه انه يرجع للبيت ويدور يمكن يلقى تكملة لليوميات
مؤيد : بندر وش فيك مو طبيعي من طلعنا من القرية
بندر : من قال لا عادي بس افكر في اهلي
مؤيد : ذكرتني لازم احول لهلي مبلغ يارب مدري وش اسوي انا اقدر اجمع انا اقدر اصرف على اهلي
بندر : هونها وتهون ورجع يكلم نفسه انتبه يا بندر لا تخلي بنت تخرب عليك حياتك ووظيفتك







سلطان : خلاص متأكدة ما نسيتي شي
مثايل : ان شاء الله كل شي معي
سلطان : خلاص يالله اسبقيني تحت وانا بنزل الأغراض

نزلت مثايل ولقت ابو سلطان ماعلية غير الطاقية ومدد رجلينه وام سلطان جنبه تقهويه ونوف منسدحه تقرا مجلة بيدها ومندمجه فيها
مثايل : السلام عليكم
الكل : وعليكم السلام
ابو سلطان : يا هلا والله ومرحبا اقربي يا بنتي
قربت مثايل وحبت خشم عمها وجلست بينه وبين ام سلطان
ابو سلطان وهو يكلم مثايل : والله ودي انكم تريحون الليلة والصباح تمشون ابرك لكم من تنطحون الليل " تنطحون يعني تستقبلون الليل هذا اقرب تفسير لها غيوم :) "
مثايل : بكيف سلطان
قعدت نوف : الله صار سلطان له راي
جتها صقعه من عند راسها : أي عندتس اعتراض
ابو سلطان :هههههههههههههه اشوي شوي على نوف
ام سلطان : ماعلى نوف لا بغت نوف لا تطول لسانها
نوف : يمه اشك احيانا انتس امي مدري تغارين عشان ابوي يحبني
ام سلطان : اغار عشان ابوتس والله لونه ابن سعود
ابو سلطان : اخو مزنه افا يا ذا العلم الظاهر اني طايح من عينتس
نوف تحرش بينهم : شفت يبه امي معجبة بغيرك
وسلطان يناظر مثايل ويبتسم على ابتسامتها لمهاوشة عمها وزوجته
ابو سلطان يكمل : اني داري من يوم خليت ذا العجوز وهي تحوم مع ذا السواق وانا غاسل يدي منها
سلطان :ههههههههههههههههههههه افا يبه
ام سلطان : ويني اروح ما اروح الا لقصراي الي في بيتنا القديم ولا السوق
ابو سلطان : لا لا بروح انشد الهندي ليكون تعرفين شايب غيري
نوف :هههههههههههههههههه يبه ما لقيت غير شايب
ابو سلطان وهو يضحك :هههههه اجل فيه شاب بيقبل بها
ام سلطان : هـه يومني بنت مابقى احدن ما جاني القاصي قبل الداني
ابو سلطان يقرب من مثايل ويوشوش في اذنها : ذا السالفه معها حتى قبل لا تجيب سلطان
مثايل :ههههههههههههههههههههههههه
ام سلطان : ادري انك تحتسي فيني
سلطان وهو يبتسم : يالله حنا بنروح قبل يجي الليل
ام سلطان وهو تقلب الموضوع بالتمام ويتحول من مشهد مضحك إلى محزن : يا ولدي تروح مع وجه الليل اصبروا لبكره
سلطان : يمه انا احب الليل هدوء ويغمز لمثايل ورمنسي
ابو سلطان :هههههههههههه وش ناوي عليه
انقلب وجه مثايل احمر ونوف ماسكه ضحكتها
ام سلطان : ترا عندكم بنت ماعرست وش ذا الكلام عندها
نوف بشهقة فشيله : يمه
سلطان : هههههههههههه ازهليها تلقينها تعرف العلوم كلها الله يخلي بدر
شرح كلمة ازهليها معقد شوي يعني ما تخافيش دي بتعرف كل حاجة ههههههههه غيوم :) "
قامت نوف مثل العادة من الفشلة والقهر وراحت للمطبخ


طلعوا ودعوا اهلهم وركبوا سيارة سلطان ومثايل تحس بحرج العروس يعني مو متجريه بالكامل
سلطان : احم وش فيك يا مثايل ليش ساكته
مثايل : مافيه شي
سلطان : طيب اسمعي هذي اهداء مني

بدى صوت محمد بن فطيس يلج بالسيارة


بعض العرب حبه يوردك الجنون
ولا يوصف لة غلاة احكاك لة

ما يقنعة وصف الغلا وش يكون
لو كل حرف بالحرير يحاك لة

الموت جاك وهو تقبلة الظنون
ولا لك الا الصبر ....وش وداك لة

ان قلت ضاق ..قال..هونها تهون
مايدري ان ضيقتك لة ..وبكاك لة

تقعد تحبة وانت ساكت ومغبون
يمكن بيوم يقال لة ما اوفاك لة

وكانك مشكك هو يمون ..او ما يمون
تخيل ان عفت الصبر فرقاك لة

غلاة من فوق الغلا ماهوبدون
وحكاة سمعك يجبرك بارخاك لة

ودك تحطة فالعيون من العيون
وتبسط على رمضى الثرا يمناك لة

وتظلة من الشمس في ظل الجفون
ولا يمر اذنة سوا لباك لة

وتسج من غيرة لونهم يذكرون
ومنين ما سجت القدم ممشاك لة

فلو يميلة الترف ميل الغصون
غصن ليان ومكرمة بسقاك لة

جديلة الى اقفي ستر منة المتون
كني بريحة لا لتفت لدعاك لة

يزها الملابس ..اي لبس..واي لون
وفالليل وجهة لا ظهر قداك لة

كيك وعسل لكن ما هو في صحون
ودعاك من عين الحسود اغطاك لة

اللة لا يعطية ناس س ينضلون
ويستر علية من النحل لا ياكلة

والوصف والتعبير في وصفة يخون
غير اطلب الله يستجيب ادعاك لة

.....: ناصر انت متأكد انه هيف بن سعود وين جاها وين جاته
ناصر : انا مثلك يا طويل العمر متفاجا
....: وش السواه الحين وش التعقيد هذا اكيد انه يعرف بخططنا ولا ليش هو بالذات الي تزوجها
ناصر : وش رايك الحين وش تبينا نسوي
.....: مصيبة وطاحت على روسنا اذا ولد سعود متدخل بالشغل كل شي بينهار
ناصر : يعني نخلي المراقبة على بيته
.....: انتي صاحي ما تعرف هيف اصبر الموضوع يبي له طبخ على نار هادية انا بحاول اهدي الناس الي احرقوني باتصالاتهم لحد ما نشوف حل للموضوع






هيف ينادي سعدية : سعدية
سعدية تجي يمه : ناديتني
هيف : أي اخذي معك ترامس قهوة وشاهي عشان اذا بغينا نجلس شوي
سعدية : يعني بنتأخر
هيف : أي بنتأخر وبنتعشى برى

راحت سعدية للغرفة الي نوت جالسه فيها لقتها تقرا قران بصوت مو عالي ولا واطي تحس اذا سمعته بهدوء نفسي انتظرت سعدية لحد ما كملت
سعدية : مشاء الله ربي واهبك صوت رائع
نوت ابتسمت لها : الحمدلله هذا من فضل ربي
سعدية : نوت انا ما اعرف اسوي مثل قهوتكم ياليت تعلميني عشان الدكتور يبينا نسوي قهوة وشاهي
وقفت نوت بحيوية : تعالي اعلمك
ابتسمت سعدية لها حست ان نفسيتها تغيرت وهذا بفضل الله ثم قراءة القرآن
مسكت نوت يد سعدية وصارت تسوي معها نفس حركتها مع سمر تركض بها بس الفرق غير سمر صغيرة بالسن او متقاربات بالعمر لكن سعدية تختلف اثقل من سمر وكبيرة شوي وصارت تجاري نوت بالركض عشان تغير نفسيتها
دخلوا المطبخ ونوت بفرح غريب وبشعور اغرب بسعادة غريبة ما تطلع إلا من إنسان يحب يحس ان فيه طاقة كبيرة مستعد يفرغها لمحبوبة لو يبي يقعد طوال اليوم يخدمه ما قال لا او شعر بالتعب
قعدت نوت تفتح الإدراج وتطلع اغراض القهوة وراحت وحطت المويه بالبريق الي واضح انه حق قهوه وخلته يغلي لحد ما تكمل باقي الأغراض راحت تطل شافت سلة اكيد حقت ترامس القهوة والشاهي وسعدية تراقبها وتشوف عشان تستفيد وتقدر تسويها لهم بدى الماء يفور قربت نوت وحطت القهوة وخلتهم يطبخون مع بعض وراحت لترامس وحطت الهيل وشوي مسمار وزعفران وشوي كوفي ميت وسعدية سوت الشاهي وخلوا القهوه تطبخ مره عشان يطلع طعمها حلو وقعدوا يسولفون
دخل عليهم هيف ببدلة رياضيه بيضا مره وكاب اسود وجزمه سودا واضح انه كان يسوي رياضه
نوت توترت وهو وجه مبتسم يناظرهم : هاه زانت القهوه
سعدية توترت تخاف يسئلها كيف سوتها : أي باقي شوي
هيف ما انتبه بالاصل هل سعدية تعرف او لا بس احيانا الانسان اذا خبى شي وما حب احد يدري عنه يفضح عمره بحركاته
شدته ريحة القهوة وراح يمشي يبي يشرب مويه ونوت عيونها معلقة فيه بنيته وشكله وهيبته طول وشكل تشدها وتأسرها له هو التفت عليها شاف عيونها معلق عليه دنقت بسرعه وحمر وجها ابتسم على حركاتها العفوية وحس بدقات قلبه الي صايره ترجف بشدة اذا شافتها
كان لبسها بسيط تنورة سودا وبلوزة سودا وفيها وردة حمرا بالوسط لكن فتحه الصدر دائرية ومخصرة على جسمها خلته ينجذب لشكلها البسيط سعدية كانت تشوف نظراته وترجع تشوف الي عيونها بتحفر الأرضية من كثر ماهي مدنقة ابتسمت على انحراج نوت
قرب متعمد لان نوت كانت مستندة على درج وهو يسوي نفسه يبي غرض ورآها شافت البياض قرب منها بغت تتحرك يمين تحرك يمين متعمد ويسوي نفسه غلطان تحركت يسار سوى نفسه يتحرك يسار لحد هي ما صقعت بصدره من توترها حس هو بعد بتوتر ماله تجارب والبنت هذي قلبت كيانه على طول طلعت نوت من المطبخ وسعدية انحرجت وحطت وجهها يقابل الفرن ماتبي تبين لهيف انها منتبه لهم
رجفة يد هيف خلته يحط الكاس قبل يطيح من يده

معقولة البنت هذي فيها شي مميز يخليني قدامها اكون انسان ثاني واتصرف تصرفات عمري ما سويتها ماعمري اهتميت للبنات لكن هذي تجذب في وجها شي يخليني انجذب لها غصب سبحان الله

طلع من المطبخ التفت بجسمه وبعيونه يبي يشوف وينها لكن ما شافها ما انتبه للعيون الي تراقبه رقى الدرج بخطوات سريعة وهي على طول راحت للمطبخ تتفاجا بضحك سعدية
نوت تبتسم لها : وش فيك
سعديه وهي تمسح عيونها : ولا شي تذكرت حاجه تضحك
نوت وهي تناظرها بشك وبحرج : متأكدة
سعدية : متأكدة تعالي شوفي القهوة
جت نوت وزلت القهوة بالترمس ومسحت الترامس وحطتهم بالسلة وخذت مقداع للتمر وعبته تمر وشوي فناجيل وبيالات وحطتهم بعلبه وخلتهم مع بعض على جنب
طلعت هي وسعدية يلبسون عباياتهم

جالس ساعه يضبط شكله قدام المرآيه ويرش من العطورات اخذ مفتاحه ومشى بسرعة نازل مع الدرج وشاف سعديه بعبايتها وحجابها ونوت تحاول تخبي نفسها وراها بعبايتها ابتسم تصرفاتها تعجبه حياءها
هيف : مشينا
واخذ السله من سعدية ومشى قدامهم ونوت وسعدية يمشون وراه فتح شنطة السيارة عشان يدخل السله في الوقت الي نوت ركبت قدام وهي تحس بتوتر فضيع دخل وحست به يوم جلس كأنه اخذ كل المرتبة الأولى ماتدري هل هو من جسمه او حضوره تحاول تكتم نفسها عطره دخل داخل حلقها وزاد من توترها
قعد يطالعها من طرف عيونه ويشوف كيف تدس يديها داخل العبايه وماتبيهم يظهرون شغل الاذاعه مثل عادته ومشى
هيف : راح اوديكم مكان راح يعجبكم الظاهر انتي ياسعدية اول مره تجين الرياض
سعدية : أي والله اول مره كل جياتي السعودية بس مكه
التفتت له نوت لانه يوجه الكلام لسعدية مع التفاتتها له انتبه لها والتفت عليها
يمكن من قهر خفيف تحس فيه ما رجعت تصد زي دايم ابتسم لها وهي غصب عنها التفتت دقات قلبها تحسه بيسمعها ابتسامته خدرتها ورفعت حرارة جسمها ياربي وش هذا الي احس فيه
وقف هيف عند محطة وعبى بانزين يوم خلص وقف عند البقالة
هيف : تبون شي محدد ولا اجيب لكم على ذوقي
سعدية : الي تشوفه يابني
هيف وهو يلتفت على نوت ويمسك طرف اصبعها الي ظاهر : وانتي
دسته نوت داخل وطلعت كلمة :عادي
هيف :هههههه وشو الي عادي
نوت : أي شي
هيف : اقول سعدية تراني انسى ان نوت ترا للي والله اكلمها على انها عاقل ماتدرين وش تحب
ليش ليش سويت كذا نوت تكلم روحها
في الوقت الي هيف يكلم نفسه ليش ياهيف سويت كذا
سعدية : يابني انزل الله يهديك وجيب أي حاجة
نزل هيف وهو متغير مزاجه
سعدية : انتي السبب انا متأكدة وعارفه انه داري انك مو مجنونه
نوت : كيف متأكدة
سعدية : عشانه يكلمك عادي هو كان كذا زمان معك
نوت : لا ما كان كذا
سعدية : شفتي اسمعيني يا بنتي اعترفي وقوليلة كل حاجة قبل تخسرينه
نوت :طيب ليش يحب يجرحني لو كان عارف
سعدية : ليش والي سويتيه له شويه يكفي انك خدعاه وقايله لوه انك مجنونه غيروه كان طلقك من زمان
كلام سعدية خلى نوت يضيق صدرها خاصة طاري الطلاق حست ان هيف صار جزء من حياتها
شافته يمشي وهو شايل أكياس كثيرة معاه دخل كيسه وخلى الباقي في الشنطه على طول لمعت فكرة في راسها
بعد ما دخل ومشى نوت مدت يدها على صدر هيف ارتبك من حركتها ومال بالسياره بس رجع اتزن يوم سحبت القلم من مخباه ما قدر يهادها او يقولها شي لانه توه جارحها التفت شافها يوم اخذت كرتون المنديل الي قدامها وكتبت كلام كثير ودسته بمخباه الي قدام
انبهر من حركتها والتفت عليها ابتسمت له وبان بعيونها
نوت : انتبه للطريق
هيف ويالله صوته يطلع وطلع له بحه : وش هذا
نوت : كلام مو الحين تقراه اذا وصلنا أقراه
هيف يحاول يسيطر على نفسه لمستها لصدره خلاه يرتبك ويرتجف لدرجه انه صار يرص يديه على الدريكسون عشان ما تنتبه لرجفة يده
وهي تحس بفرح غريب شافت كيف ارتبك من قربها منه معقولة اثرت فيه ولو شوي
وسعدية تحاول تلهي نفسها وتناظر برى عشان حركاتهم واضحه وتفضحهم اكثر يعني حتى الأعمى بينتبه لهم










ابو سمر: يابنتي اخرتينا الله يهديك مواعد الرجال والمفروض نكون قبله اخاف الحين انه سبقنا
سمر بفرحه : وش اسوي يبه سويت الفطاير الي تحبها نوت اشتقت لها مره أحس الوقت بطيء بسرعه يبة امشي
ام سمر : الحين تبين ابوك يصدم فينا وحنا من الصبح نقول امشي امشي
سمر : خلاص يبه امشي وسط
ابو سمر :هههههههههههههههه خلاص ولا يهمك باقي شوي
ام سمر : بتحجز ولا نجلس برى
ابو سمر : لا بنحجز مخيم عشان تاخذون راحتكم




بندر : ليش دخلوا مؤيد ومادخلونا
هشام : وانت ليش حارق نفسك احسن
بندر : ليش طيب انا ابي ادري عن كل شي
هشام : خلنا بس نروح لغرفتنا نريح الحين بيأذن المغرب
بندر وهو يكلم نفسه انا ابي ادري عشان عندي مشوار الليلة مشوار مهم
هشام : بندر وش تفكر فيه يالله خلنا نروح
بندر بنزعاج : يالله امشي



ناصر: اسمعني يا مؤيد خلاص تقدر تسافر لهلك بنهدي الوضع اسبوع اسبوعين
مؤيد : ليش الموضوع بدى ينتهي
ناصر : اسمع الكلام خل الشباب يرجعون لهلهم بس خل تلفوناتهم بيديهم اذا بغيناهم اتصلنا فيهم







مشى المكان حلو والجو احلى والهدوء مالي السيارة بدوا يشوفون تجمعات الناس والمخيمات بكل مكان راح للمكان الي متفق مع ابو سمر عليه ومشى لحد ما وصل عندهم
هيف : يالله انزلوا
نزلوا وانتبهوا انه ما نزل معهم
سعدية :ليش مو نازل
هيف : اسبقوني فيه حريم قدامكم وانا بحتري الرجال
شدت نوت عبايتها عليها بسبب الهوا البسيط خايفه تنكشف ومشت هي وسعدية بهدوء ودخلوا لداخل المخيم في الوقت الي استغله هيف وطلع الورقة يبي يشوف وش كاتبة نوت

هيف تبي تعرف من أنا
انتظرني الليلة في حديقة بيتك
زوجتك

حس بشعور حلو من كلمة زوجتك كانه فعلا توه اليوم متزوج




دخلت نوت وماسكه يد سعدية ونخرعت على صوت الي طلع
سمر بصرخة : نــــــــــــوت
نوت : سمـــــــر
ركضوا لبعض وضموا بعض وقعدوا يبكون ولا وحده راضيه تفك الثانية سمر تصيح وتقول ليش ليش رحتي وخلتيني ونوت ترد عليها وتصيح سمر صارت لي بعد اعلوم ولا لقيتك عشان اقولك عنها وسمر ترجع تبكي وتقولها فقدتك ما اجلس مع أي احد تقولين روحي الي فقدتها اليوم رجعت لي
ام سمر وهي تمسح دموعها : خلي يابنتي لي فرصه اسلم عليها









سلطان : وش رايك نوقف نصلي
مثايل بحرج : لا خلها مع العشا
سلطان بستغراب : ليش
مثايل : اول شي حنا مسافرين ثاني شي تبيني انزل بلحالي
سلطان :هههههههههههههه قولي كذا خايف
مثايل : وش اسوي اول اذا رحنا انا وامي وامك ونوف والحين بس بروحي مقدر
سلطان : طيب ولا يهمك بحجز غرفة ونزلي وبنصلي سوا فيها
مثايل : أي اذا كذا ماعليه
سلطان : هههههههههههههه توني ادري انك خوافه
مثايل وهي تحاول تجري نفسها : اصلن وش تعرف عني
سلطان وهو يبتسم لها ويمسك يدها : تبين تدرين وش اعرف عنك
مثايل بنحراج من مسكة يده : ممممم
سلطان بابتسامة :وش مممممم يعني أي
مثايل بضحكة خفيفة : أي
سلطان : اذا رجعنا ان شاء الله وريتك كل شي
مثايل : تقصد صوري
سلطان : أي صورك وش يدريك عنها
مثايل : قالت لي عنها نوف
سلطان : لا خلي الصور فيه اشياء ثانية
مثايل : طيب قولي
سلطان وهو يقرب يدها من فمه ويبوسها : لا تصيرين فضوليه كل شي بوقته حلو
مثايل : الحين وش يصبرني بقد افكر
سلطان : ياقلبي يا ناس على الدلع ترفقي علي شوي
مثايل وهي منحرجه : سلطان
سلطان : عيون سلطان
مثايل : بس عاد
سلطان : مقدر امسك نفسي يكفي همسك يذوبني





ابو سمر وهيف كانوا في قسم المخصص للرجال ويتقهوون
ونوت وسمر ايديهم بيدي بعض ولا وحده فيهم راضيه تفك يد الثانية
سمر : يابنت الذينا هذا زوجك وش ملحه
نوت : وش ملحه قولي وش زينه
سمر : أي ابي اقول وش زينه بس استحيت منك
نوت :ههههههههههههههههه اشتقت لك والله
سمر : خلاص لا تخليني اصيح يكفي كحلي سال
نوت : يومك داريه اني بجي ليش تحطين كحل
سمر : ابي اتزين لك

وام سمر وسعدية يراقبونهم ويبتسمون لحركاتهم
وقفت سمر وسحبت يد نوت
سمر : تعالي معي ابيك بشي خاص
نوت : يالله مشينا

طلعوا برى الخيمة في المخيم نفسه بس ما ينكشفون
سمر : يالله قوليلي كل شي من طق طق لسلام عليكم
نوت بعيون مليانه دموع : وش اقولك يا سمر مرت علي ايام قسم بالله لو أني مو مؤمنه وخاف من ربي امداني انتحرت الله لا يعيدها
سمر : طيب قوليلي كل شي بالتفصيل عارفتني احب التفصيل
نوت :هههههههههه تعلميني الله يعين رجلك
سمر : اذا مثل رجلك ابصم لك بالعشرة ان انطرم
نوت وجهها صار احمر خفيف : وش معنى
سمر : ياختي عليه جمال يسكت وطول ورزة اوف مشاء الله
نوت بحزن : أي مشاء الله
سمر : وش فيك تقولينها من غير نفس
نوت : مدري يا سمر احس نفسي عنده ولا شي
سمر : نوت وش هـ التفكير الجمال مو كل شي
نوت : بس مدري عنه هو
سمر : خلينا من الكلام هذا الي يسد النفس وعلميني كيف طبقتي دور الجنون وش المصاعب الي مرت عليك
نوت : اسكتي يا سمر قسم بالله اني مجنونه تدرين ليش ولا وحده تخاف ربها تسوي نفسها مجنونه ولا عمك الشيخ سالم اخذ مني العبايه كل ما اتذكر ذيك الايام احمد ربي على نعمة العقل
سمر :هههههههههههههههههههه والله انا مجانين كيف طرت الفكرة علينا ليش ما خليناك تروحين وتجلسين عند عمي سالم بدون ما نقول مجنونه
نوت : تدرين انك غبية لو قايلين اني مو مجنونه كان ما رضى نجلس عنده وهو وحيد وبعد مو متزوج لا والتحرشات الي صارت علي ياربي سترك بس
سمر : يالله قوليلي
بدت نوت تحكي لسمر عن معاناتها وحياتها والي صار لها وطريقة زواجها وكل الي مر عليها





اذن المغرب وبدت الشمس تغيب والناس اصواتهم تعلى مدري وش السر ليش الليل يكون الصوت فيه عالي هل المقولة الليل يسري بالصوت صدق



سمر : اصبري نوت لا تكملين قصة الثوب الاسود لحد ما ارد على ابوي
نوت : يالله
سمر : هلا يبه ... أي بنسوي مشاوي انا متبله كل شي بس عليكم انتوا الشوي
نوت : سمر خلينا نشوي حنا
سمر : لا حنا مو افضين بس كملي ابي اشوف هيف يوم خق عند الاسود
نوت بشهقة : من قال خق
سمر : اقول علينا وش حركته اجل
نوت : اقول سمر من ماشيتي بعدي صايرة قليلة ادب
سمر : اقول كملي تبي تغير السالفه عجلي ترا مراح نطول بنرجع بدري
نوت : ليش
سمر : تدرين بشغل ابوي ولازم ينام بدري
نوت : أي صح
سمر : نوت والله خاطري تروحين معنا ونسترجع ذكريات قبل
نوت : طيب والي يراقبون البيت
سمر: ما عاد شفت احد
نوت : زين يا سمر لاني ابيك تجيبن لي كتاب
سمر بخلعه: عسى تبيني ادخل بيتكم
نوت : أي ليش
سمر : عشان يذبحني ابوي
نوت : طيب ادخليه بسرعه اذا رجعتوا والله الكتاب عندي مهم
سمر : خلاص الله يعيني طيب قولي لي الحين وش صار بعد
نوت : صدق الخبل ما ينسى سالفته
سمر بشهقة : الحين انا خبلة اقول كملي يا مجنونه
نوت : الحين انتي تقولين لي مجنونه ما اثرت فيني ليش يوم قالها اثرت فيني
سمر : الحب الحب وما يسوي كملي يا ماما كملي

السلااااااااام عليكم..


يااغيووم الله يهديتس كاان شلتي سعديه من كاااادر التصوير .. نكدت علينا الله يخليها لاهلهاا.ههههههههههه.

غيوومه تبين الصرااحه كل جزء اقول هذا احلى جزء وماا ادري الا ويجي احلى منه... والله روووعه .. جزء اليوم صرااحه الاسلووب فيه يهبل... والا الترجمه.. ياالهووووووي على الترجمه..هههههههههههه والله يااغيوم من شفت كلمة ازهلهاا واني منزله عيني تحت ادووور الترجمه قلت هذي كيف بترجمها الحين.. بس بسم الله عليتس.. اوول مره اشووف ترجمه اطووول من الكلمه..ههههههههههه..

شووفي الجزء اليوم فيه حدثين رئسيين. الاول ان ناصر وجماعته بهدوون اللعب والسبب هيف.. طيب ليـــــــــــش؟؟ والثااني تحرك نووت عشان تقوول لهيف عن وضعها.. واللي اتمنى انه فعلااا يصير وماايعكره شي .. يااخوفي يصير لها شي بالثمامه وبعدين يتاخر اعترافها ...
سلطان ومثاايل : يااحلووكم وانتم مبسووطين ومرتااحين.. بس والله خااايفه من رومانسيتك ياا سلطان تقلب نكد ويصير لكم حادث بهالليل بعدي الشر عنكم ياارب..

ناصر : وشلوون عرفتوا هيف؟؟ وش الشي اللي يربط هيف بنوووت؟؟؟ وهو ماايعرفها ولااتعرفه..؟؟ ومن هووو رئيسك هاللي انت تسووي كل شي بشوووره؟؟؟ نوت نعرف انكم تلااحقوونها عشاان معها شي او انتم تفكرون ان معها شي يخص ابوها وامها وقتلكم لهم... بس هيف .. وش يدخله بالسالفه الحين؟؟ هل هيف له علاقه مبااشره بالشي اللي تدوورون عليه.. والا علاقه غير مبااشره ومن اياام ابوووه.. يعني يمكن ابو هيف وابو نوت بينهم شي وهالشي هوو اللي انت ياا ناصر وعمك تبوونه؟؟؟ بس وشووو ماا ادري؟؟؟

بندر : كل اللي تسوويه يدل انك شرطي.. وكل هالحركات مااتمشي علي.. انت شرطي وهاللي تسوويه تبيه يووصلك لاكبر قدر من المعلومات.. ويمكن لما قمت تسأل عن نوت بالقريه كله عشان تااصل لهاللحظه اللي يكون فيها ناصر عن رئيسه وهو اللي انت تبيه.. بس مااصار لك فرصه انك تقرب منه بسهووله.؟؟

وخااطري اشووفك وانت ببيت نوت وبمكان واحد مع محبووبتك الورقيه سمر.. هل فيعلاا بيكون بينكم لقاااء وبتشووف سمر اخيرااا وتعرف انها هي اللي تقرأ كل كلامها و تاثرت فيها وحبيتها عن طريقه.. وكانّ هالاوراق صاارت ادماان لك.. وصرت تقوول هل من مزيد وتحس انك بدون هالاورااق نااقص .. اتمنى اشووف وش رااح تسووي لوو شفت سمر بالبيت .. يمكن تكفخها والا هي تتخرع منك لما تشووفك وتملى الدنيااا صراخ.. ؟؟ والله للحين ماافي بالي شي محدد عن اللي بتسوويه لو شفتها.. ؟؟ هذاا لوو انت فعلاا شفتهااا؟؟

سعديه : يااشيخه واللي يرضى عليتس اذا شفتي الدكتوور هيف داخل مكان نطي مثل الغزال واذلفي عنه.. والله انتس تسووين زحمه بالمشهد.. اطلعي من عندهم وخليهم يعرفون يتفااهموون بدووون رقاااابه.. ههخهخه

نوووت : يااااقلبي واخيرااا شفتي سمر.. والله صيحتوني معكم.. أهي أهي أهي ... بس استاانست انكم رديتوا لبعض.. وحرزنتين عليتس نووت وانتي كله بس تعتبرين انتس مو حلووه والله انتي كلتس ملح وقبله.. والزين غسال يدين.. هخهخهخه.. ولو تدرين ان هيف معجب وقلبه تطييير دقاته اذا شاافت كان انهبلتي.. هخهخخه
اعجبتني مرره الحركه اللي سويتيها لما كتبتي الورقه.. والله لعبتي بالدكتوور لعب .. هخهخخه بس اهم شي انتس فعلاا توفين بوعدتس وتقوولين له كل شي.. اما صرااحه المكان اللي اخترتيه للاعتراااف سووو رومنتيك.. ياارومنتيك انتي.. هع هع هع

الدكتوور هيف : تدري ياا داك انك رايح وطي وبدون حقيقه.. هخهخه.. ياا خي لو تشووف وجهك والا عيوونك وانت تدوووور على نوت اوول مااتدخل تعرف انك تحبها وماايحتااج تستغرب من دقات قلبك اذا شفتها. البنت مااعليهاا كلام ادب واخلاق ودين .. وعقل وهذا بتعرف عنه قريبا.. بس الحين ودي اعرف ليش المسؤل خايف منك؟؟؟ وش عندك عشان يخااف؟؟ يووه لاايكون بينك وبينه معرفه؟؟؟؟ مدري ليش الحين فكرت بالدكتور عبدالعزيز.. مع اني عارفه انه غلط بس كل الشخصياات اللي هنا مشكووك فيها انها الراس الكبيره..

غيوومه يهبل الجزء.. الله يعطيتس العافيه ياارب.. ومن الحين اقوولتس اني مشتااقه للجزء الجاي من انا اقرأ هالجزء. فاذا الله احيانا..لاا تتاخرين علينا فيه..
مشتااقه اعرف وش بتقوول نوت لهيف ..؟؟ وش بيكون موقفه من كلامها؟؟ ومشتااقه اعرف وش بيصير لسمر اذا راحت لبيت نوت تجيب الكتاااب.. ومشتاااقه انتس تخلين سعديه تاخذ اجازه من المواقف اللي تجمع نوت وهيف.. ههههههههههههه
نشووفتس على خير غيومه..

يعطيكـ العافيه غيووووووووووووم

اسمعي غيوووووم عشان التثبيت مراح نصبر يالين يوم الخميس لالالالالا الله يسلمكـ

ابي اعرف وش بيصير في الحديقه مافيني صبر ابد ابد

نوووووووت : حركاااااااااات بديناا نتغير ونغار صح اسمعي اذ1 جيتي في الحديقه قولي له كل شي

وابشري بعزك راح يساعدك ويحبكـ الرجال خاق وبدووون اعتراف بعتراف وش راح يصير..

بندر: مررررررررره منصدمه انا توقعته من المباحث بس شكل توقعي غلط 100% او من الشرطهـ

أجل تعلق في سوالف البنات شكله راح ينصدم في سمر في نفس البيت اذ1 راحت تجيب الكتاب..

سلطان ومثايل :

امممممم الله يوصلهممم بسلامهـ اخصصصص سلطين يعرف لرمنسيه فليل ماشي الله يستر بس ...

يعطيكـ العافيه غيووووووووم وننتظرك ياقلبي

جــــــــ,ـــــ,ــــودي

مراااااااااااااااحب

كيفك أختي ....... غيوم الشوق

عزيزتي لقد جمعت أجزاء قصتك ووضعتها بمشاركتك .. أرجو منك العذر

ولكن لتسهل قراءة البارتات بتتابع ..

عزيزتي ... كل الشكر لك ولأناملك المبدعه على هالقصه الرائعه ..

والف مليون مبرووووك التثبيت .. تستاهلي والله ..



ولو أني متأخره ,, ولكن أن تأتي خيرآ من ألا تأتي أبدآ ..

وتاخري باعطائك حقك من الشكر ماهو الا للأنشغالي الكثير بالمنتدى ..

وانتي لست بحاجة للرفع المعنويات فأنتي من المبدعات القديرات ..

فكتابة قصة ليس بالأمر السهل أبدآ .. الله يعطيك العافيه وينور طريقك

ولا يحرم منتدانا من وجودك يارب ..

وكل مانزل بارت أسمحي لي بأضافته بأول مشاركة لك .

لتكتمل الأجزاء .. والتوفيق أن شاء الله دوم مو يوم ..

تقبلي تحيات اختك أم دودي الحلو ..