المنتدى :
من عيون الشعر العربي والعالمي
من اشعار صلاح جاهين
(1)اصحى يانايم
النور ملو الشوارع
و مليون راديو والع
الساعة اتنين صباحا
لكن إيه الموانع ! ..
الخلق رايحة جايه
و الدنيا لسه حيه
مليانه بالهأَو أَو
و زعيق القهوجية
واحد يقول لواحد :
خليك يا عم قاعد
التانى يقول له :
شكرا
ده انا م المغرب مواعد
فيه سهره لسه عندي
في بيت فلان افندى
ح ناكل حاجة حلوه
و نشرب تمر هندى
و اللى تروح دالقه جردل
فوق حضرة المبجل
طبعا صاحبنا يزعل
و ينفجر شتايم
و الحى كله يوصل
ما بين مصلح و لايم
اللى يقول : يا جماعة
و اللى يقول : يا بهايم
و مطرب الاذاعة
يصرخ ، و ف وجده هايم
و لو طرطقت ودنك ،
في وسط دى العظايم ،
تسمع مسحراتى ،
بطبله صوتها واطى ،
بيقــــــــــــــــــــول :
اصحى يا نايم
*********************
(2)كلام في السياسة
ماليش كتير فى السياسه
لكن بافكر
وماليش كتير فى الكلام لكن بعبر
من قلب مليان حماسه
وبقول كلام فى السياسه
باحلم تملى بالسعاده ولامان
باحلم اعيش من غير ما اخاف غدر الزمان
وان جيت ونلت المنى
يصعب عليه الهنا
من غير ما يتهنوا جميع الناس كمان
سموا الشعور ده حب ولا اشتراكيه
ماليش كتير فى السياسه .......
اوقات بحس كأنى على مفرق طريق
احتار ويصبح قلبى فى الافكار غريق
ولما اشور الجيران
واشاور الخلان
راى الصواب يظهر جرئ وله بريق
واحس رأى حبايبى ينور عينيا
سموا الشعور ده حب ولا ديموقراطيه
ماليش كتير فى السياسه ........
بينى وبين ايامى حرب ماتنتهيش
وزى كل الناس بموت علشان اعيش
اتمنى اروح عندهم
جهدى على جهدهم
يصبح وجودنا قوه بعد ماكان مفيش
وانا ايش اكون لولاش بلدى عليا
سموا الشعور ده حب ولا تعاونيه
ماليش كتير فى السياسه ........
انا قلبى مليان حماسه
لكل شئ حد صادق
ماليش كتير فى السياسه
لكن بحب المبادئ
وبحب صاحب المبادئ
الاشتراكيه
الديموقراطيه
التعاونيه
*******************
(3)القاهرة في الف عام
يابنايين ياحدادين ياحجارين
يامبيضين يانقاشين يانجارين
الجميع: ياكل يد طاهرة. تعالوا نبني القاهرة
مقدم العمال : هيلا ليصا علي قول أجدادنا
ماشاء الله علي فن بلادنا
الهرم الأكبر والمادنة
بنيناها ياليلا ليصا
العمال: هيلا ليصا
جوهر: النجم القاهرة في الطالع
واسم القاهرة منه طالع
وأنا جوهر مقدام ومطالع
ما اسمحش فيها بنقيصة
العمال: هيلا ليصا
مقدم العمال : يابني دي اسمها أرض الشمس
كا. هي. رع. بلسان الأمس
وتاريخها بألوفه الخمس
هو احنا في طبعة رخيصة
العمال: هيلا ليصا
مقدم العمال: ياما عواصم أنشأناها
هنا.. ورجعنا بنيناها
بين أعلي الأرض وأدناها
تحكم وعلي الحكمة حريصة
العمال: هيلا ليصا
مقدم العمال: وآدي القاهرة طالعة جعيصة
هيلا ليصا
جوهر: القاهرة نرقي ونبخر
يجعلها المولي اللي مقدر
أسعد م الفسطاط والعسكر
ولا تلقاش ولا تنغيصة
هيلا ليصا
الجميع: يجعلها حكامها خدامها
والعدل ينور أيامها
قيموا الباب ياللا لسلامها
خلوها حصينة وعويصة
هيلا ليصا
(موسيقي اقامة الباب)
اصوات: (بحنان)
يابنايين.. ياحدادين.. ياحجارين..
يامبيضين.. يانقاشين.. يانجارين..
ياكل يد طاهرة..
لكم السلام
م القاهرة
******************
(4)بحري
آخر النهار هفهفت نسمة على الميّه
بعودا ليام على الجدعان و عليا
يا صيادين القاروص غيّه
رمى الشبك ع السمك له خِفيّه
طرحت طرحه لقيت فى الطرحة جنيّه
حلِّيت وعقدتهم على عينيا
و نزٍّلتنى القرار صرخ الشبار فيا
إرمى الشبك ع السمك يا واد بحنيّه
لا دق ع الباب و أقول للحلو يا جارى
رمىْ الشبك صنعتي والصبر دا كاري
أصبر على الرزق لما تمتلى بحاري
وأصبر على العشق لما تنطفى ناري
يا ميت ندامة على اللى البحر ما ادّاله
مفتوح عليه الحنك والكف مادّاله
عدّى الشطوط والخطوط اللنش عدى له
غفر السواحل يا صاحبي مستعدا له
أنا مذهبي الصبر واصبر حتى على تارى
و اطعم شباكي و صنارى بصباري
أنا أعوم على الصبر لما أوصل لأوطارى
و الصبر دا مركبي والقلع والصاري
|
28-09-08, 02:00 AM
جديد مواضيع قسم من عيون الشعر العربي والعالمي
العرض العادي
