كاتب الموضوع :
هاجس ليل
المنتدى :
الارشيف
&&&&&&&&&&&&&&&&&&&&&&&&&&&&&&
الــــــــــجـــــــــزء الـــــخــآمــــــس عـــــشـــــر
&&&&&&&&&&&&&&&&&&&&&&&&&&&&&&
(( بــقــايــا أمــل ))
سَبحَانْ الله وبًحمًدهً ~ سًبَحاَن الله العَظًيَم
سَبحَانْ الله وًبحَمدهً عدَد ًخلِقهً ورًضاَ نَفسًه َوزَنةً عَرشًه وَمدًاد كَلماتهً
عندما تتقاذفنا امواج الحياة وتلعب بنا أعاصير الزمان
ونحن نحاول النجاة والبقاء بقدر المستطاع على ظهر ذاك القارب المتهالك
آملين ان نصل لبر الآمان الذي غدى حُلماً يصعب الوصول إليه
عندها قد تصيبنا خيبة الأمل تارة وقد نصاب بالإحباط والكآبه تارةً اخرى
لكن تظل بدواخلنا بواقي أمل وغريزة لحب البقاء
هي من تحثنا على التشبت بأطراف الحياة الباليه وألواح الخشب المتناثره بالبحر
لولا الأمل لما استطعنا العيش
لولا الأمل لفضلنا الموت على الحياة
لولا الأمل لأصبح غدنا مثل امسنا لاميزة لأحدهما
الأمل نعمة من ربنا جل وعلا ...شئ بأنفسنا ومنا يعيننا على الحياة ويساعدنا على التقدم رغم الشقاء ..~}
~..~..~..~..~..~..~..~..~..~..~..~..~..~
جالس بالسياره وعينه على المسجد .....كان بنفس المكان العصر وبنفس المكان المغرب
يهز رجله بتوتر وهو ينتظر اللحظه اللي يدخل فيها
يده ماسكه الدريكسون ينشد القوه والثبات يبي يحس إن احد قربه بشدته ويقويه
أرتفع صوت المؤذن يقيم لصلاة العشاء
رغبة داخليه إنه يشغل سيارته ويرجع من مكان ماجا لكن الموضوع تأجل بما فيه الكفايه ولازم ينتهي
ذكر الله بداخله لعل توتره يخف وقلبه المضطرب يهدأ ....فتح باب السياره ونزل وهو يتمتم بدعوات التوكل وطلب القوه وإتجه للمسجد وهو يقدم رجل ويأخر الثانيه
][ ~ نـْاصَـرَ ~ ][
دخل المسجد وعينه تسترق النظر للإمام بكل توتر وتوجس
اصطف مع جموع المصلين ودخل بالصلاة والخشوع فيها
7
7
7
انتهوا من الصلاة وطلع القليل من المصلين والباقي اتخذوا الوضعيه الأريح لهم بالجلوس
لف لهم الإمام واستقبلهم وارتفع صوته / بسم الله والصلاة والسلام على أشرف الأنبياء والمرسلين نبينا محمد وعلى آله وصحبه أجمعين نكمل مابدأناه من درسنا بالأمس .......
نزل راسه بخذلان .... هو يالله تغلب على خوفه وجا يطلب الإجابات على أسألته ...مايدري ليه كل ماقرب يرتاح طلع له شئ من تحت الأرض يكدره
لعن الحظ الردئ اللي يعاكسه دوم
رفع راسه وتواجهت عيونه وعيون الإمام وشاف علامات الصدمه على وجهه واكمل درسه بتلعثم وخطأ لحد ماقال / نكمل درسنا غداً بإذن الله
ارتفعت اصوات الحضور باستنكار / لا ياشيخ تونا بادين
- كمل كمل ياشيخ
- اعتذر منكم بس عندي شغله ضروريه ولازم اسويها الحين ....بكرى بإذن الله بكمل لكم ....وكمل كلامه بإبتسامه / واعزمكم على العشاء بعد
ارتسمت إبتسامات الرضا على الوجوه / الله يجزاك خير ياشيخ
وتفرقت الجموع لحد مابقى إلا هو وياه
قام من مكانه لحد ماوصل له / تبي نتكلم ببيتي ولا بمكان ثاني
تكمل بنبرة هاديه يحاول يخفي نبرة التوتر والخوف منها لكنه فشل / لا بمكان هادي بعيد عن الناس
- اجل توكلنا على الله تقدمني وأنا بلحقك بسيارتي
وتقدمه بمشيته وهو يحس ان دقات قلبه واصله حلقه خوف وتوتر من اللي بيسمعه الحين
.......................
][ ~ الَـجَـآزَيْ & عًـنْـاَدٍ ~ ][
جالسه على الكرسي قدام أبوها .... وصوت ضرب رجلها على الأرض مسموع يقطعه صوت تأففاتها
وعلامات الملل والقهر باينه عليها من حركات يدينها اللآرآديه وتغييرها لجلستها كل شوي
يسترق النظر لها بين كل دقيقه والثانيه وتنرسم إبتسامة التشفي على وجهه غصباً عنه وفرحه طفوليه داخليه يحس فيها
- والله ياعم كل شئ بيد الله ثم يدها إذا اتبعت التعليمات وحافظت على نفسها بإذن الله مهب راجعه للمستشفى بشر
- لا لا ماعليك بإذن الله بتنتبه على نفسها
لف لجهة بنته / سمعتي وانا أبوتس ؟
ردت بصوت واطي / سمعت جعلك بالجنه
عينه عليها وهي تكلم ابوها بهالنبره الواطيه وبنفسه[ صدق من قال إبليس يعرف ربه قبل كم يوم ينسمع صراخها بأول بالسيب والحين انا يالله اسمعه ]
رغبه ملحه عليه إنه يعاندها وينرفزها ويشوف وشلون بتتصرف بوجود أبوها ....وجه نظره لها / فيه شئ مافهمتيه يابنتي من اللي قلته.. يمكن إني تكلمت بمصطلحات طبيه كبيره عليك وانتي مالك بهالاشياء
كانك تبيني اشرح لك أي شئ أنا حاضر
ودها بهاللحظه بالذات تقوم تذبحه وتدوس على غروره ....بس وجود أبوها مانعها من انها تبدي أي حركه تنفس عن قهرها منه
من أول الجلسه وهو يستفزها بنظراته وإبتساماته وهي تاكل بنفسها من القهر منه
كورت يدها بقهر تفرغ شوي من البراكين اللي داخلها
شاف اصابعها وهي ضاغطه على العبايه بكل قوه وتخيل شكلها بطفولتها وهي تلحقه إذا انقهرت منه بشعرها المتطاير اللي ماتهتم فيه مثل البنات بسنها
تخيلها وهي تخنقه بطوله وعرضه بيدينها الصغيره صوره غريبه تخيلها واضحكته
تنحنح مايبي ضحكته الداخليه تتحول لضحكه مدويه واللي بيعتبرها ابوها عدم احترام له
نزل راسه تحت الطاوله ومحى آخر آثار الضحكه من على وجهه
اعتدل بجلسته وامتدت يده على ورقه على المكتب / هذاها هنا وانا جالس احوس عليها بالدروج
ومدها لأبوها / هذي ياعم فيها كل التعليمات اللي تو قلتها لك
مسكها ومدها لبنته وكأنها شئ غالي وثمين لازم تحافظ عليه / هاتس ..حطيها بشنطتس لاتضيع
الجازي /مالها داعي الأوراق فهمت اللي انقال
تدخل بينهم مقاطع كلامهم / انا أقول ياعم انها تاخذها فرضاً لاقدر الله نست شئ بيضرها
مانبي يجي الوقت اللي نقول فيه ليتنا
ناظرها ابوها بنظرة ترجي أول مره تشوفها بعيونه / خوذيها وانا ابوتس
نقلت بصرها بينه ونظرة الشماته والتحدي وإبتسامه السخريه وبين أبوها ونظره الخوف والترجي والحنان
أخذت الورقه وحطتها بحضنها مافيه أي شئ يستاهل إن أبوها يترجى من ماكان حتى لو كانت هي وعشان صحتها
مررت نظرها على أبوها برحمه وحنان وعلامات التعب والإرهاق باينه عليه بوضوح
حاوطت يده بكل يدينها برحمه / خلنا نطلع من هنا الجلسه الطويله تعب عليك وأنت من الصبح معي
- تو التعب ماهدنا
- جعلي فدى ماطاك..وين يهدك وانت توك بعز شبابك ...
وكملت بإبتسامه واضحه بصوتها/ بس اخاف العجوز تزعل مني ماخذتك منها من الصبح
كان أرسلت حدى العيال يخلص إجراءات طلعتي
حط يده اللي رسم الزمن علاماته عليها على يدها وشد عليها وتكلم بنبره قويه معاتبه حنونه / دامني بصحتي وعافيتي ورجليني تشيلني ماحدن قايم بامورتس غيري
لاصرت تحت التراب خلي العيال هاك الوقت يقومونبتس
- الله يخليك لنا وآ..... وغصب عنها سدت العبره حلقها ومنعتها تكمل كلامها ....مشاعر اجتاحتها صعب أنها تمثل القوه تحت قوتها
مشاعر صادقه صعب انها تاقف قدامها بكل شموخها وقوتها دون ماتحرك فيها ساكن
ماهتمت منه ولا من نظراته ولا من القهر اللي داخلها منه كل همها هالشخص اللي قدامها واللي افنى شبابه لراحتها
احنت راسها وباست يده الطاهره بكل عمق وحب وعيونها امتلت دموع بدون احساس منها
مسح على راسها بحنان وتكلم يمازحها / افا بنية ابوها تصيح ...ماهقيناها منها
ابتسمت غصب عنها ورفعت راسها واعتدلت بجلستها
7
7
7
وقف ابوها منهي الجلسه / يالله بنتوكل على الله ..اشغلناك معنا وعطلناك عن شغلك ....
دار حول المكتب وباس راسه / افا عليك ياعم حق وواجب
- انا اشهد ان ابوك ربى رجال والنعم به
عناد/الله يرحمه ويغفر له
- امين وموتى المسلمين ....نشوفك بحال احسن من هالحال
عناد/حياك خلني اوصلك لسياره
مسك يده / لالا وفيت وكفيت ...قابل شغلك ومرضاك ....السواق له ساعه عند الباب
عناد/ اجل بحفظ الله
تقدمها ابوها وهي تأخرت بمشيتها عن قصد ....طلع من الغرفه ومابقى إلا هي وياه
لفت له وواجهته وحطت عينها بعينه بقوه وبدون أدنى خوف وكأنها انسانه غير اللي تو بحضرة ابوها
رفعت الورقه قدام وجهه وشققتها لقطع صغيره ورمتها على الأرض وطلعت وسكرت الباب بقوه مصدر صوت قوي يقطع سكون المكان ويصحيه من استغرابه وصدمته بتصرفها وقهرها الواضح منه واللي مايدري وش سببه
..............................
جالس بالصاله بين أمه وخواته ويحس راسه بينفجر منهم
يجيهم يمين يجونه شمال ....طاقته نفذت ...هم اربعه وهو واحد
عجز يقنعهم ويفهمهم غلبوه بكثرتهم مع انه مقتنع ان كلامه صح !
][ ~ بًـيَـتـَ أَهًـلً طـْـلآلَ ~ ][
تنهد بقل حيله وملل / يمه ....يعني وش تبيني اسوي ؟
تكلمت اخته مقاطعتهم/ طلقها ؟
لف لأخته بصدمه وخوف / هه ..الجوهره وش هالكلام ...هذا وانتي الفاهمه والمتعلمه فيهم تقولين هالحكي
تكلمت امه / وهي صادقه ....من اول وانا مهب راضيه عن هالزواج ....دبرت وتزوجت من ورانا كن مالك اهل
- شغلكم يالحريم بالخطبه مايعجبني ....انا ابي النسب الطيب ...ناس لامن ضامتني الدنيا يعينون ويعاونون ...مايهمني الزين والشين
الأم/ شغل امك وخواتك مايعجبك ؟!!
شف عقوبة ربي فيك ....بلاك بحرمة مريضه ماتدري هي تموت اليوم ولا باكر
تكلم بلوم لأمه / يمه وش هالكلام .....قلبها تعبان شوي بــــــس
تكلمت امه بعصبيه / كمل ...لاتقول بس وتسكت ....ولا تقدر تجيب لك عيال ..سند لك وعون ويقومون بخواتهم بعد عينك
شف حالك وحيد بدون اخوان ...وكل هالبيت واللي فيه معلقين برقبتك
ناظر أمه بتعجب / من قالك هالكلام ....كله خطأ
وصله صوت اخته من وراه وكله فخر/ أنا قلت لها ...قريته بالنت
لف لأخته بعصبيه ...وهو وده يذبحها ...هو يالله يهادي امه ويقنعها وتجي هالبزر وتشيش امه عليه زود / انتي ابلعي لسانك لا أجي واقصه لك
ولا عمري اشوفك متدخله بكلام اللي اكبر منك ....مانقصني إلا مبزره يسيرون حياتي
نزلت راسها بخوف واللتزمت الصمت ....ناظرتها امها وتكلمت بنبره متباكيه / هذا وهي مادخلت بيتك وقلبتك على خواتك أجل لو تدخل وش بتسوي بخواتك
غصب عنه رق قلبه على امه ....حاوط كتوفها بذراعه مواسي لها / توها مانولدت اللي تغيرني عليكم ....انتم اهلي ووصية أبوي لو وش ماكان مافيه شئ بيغيرني عليكم
- الله يحميك ويبعد عنك الحظ الأقشر والردئ
حرك راسه يمين ويسار بقل حيله ..للحين امه مصره على رايها ومايدري وش بيصير بعدين !!
..........................
جالسين بالخيمه وأصوات سوالفهم وضحكهم ماليه المكان
مرخي جسمه على المركى ويده تلعب بالسبحه بآليه تعود عليها ويقابله بجلسته أخوه
][ ~ ضًـاْرًيَ & خًــاَلًـدٍ ~ ][
- الا ماودك تتزوج ...شيبت وانت عزوبي
- يقالك متزوج وانت بزر... مالك إلا كم شهر متزوج وشفت نفسك علينا
- ههههههههه ...آآآآخ بس لو أدري أن الزواج بهالزين كله كان تزوجت من زمان
كشر وجهه بضيق ...كلام اخوه ماعجبه ولهفته على زوجه مثلها ماتستاهله يضايقه
وده يعلم اخوه ....وده يفتح عيون اخوه على الحقيقه البشعه ويخليه يعرف خداع حرمته له ولعبها بعواطفه
عارف أن اللي بيسويه صعب ويمكن يسبب مشاكل مالها نهايه ويمكن أخوه يفقد الثقه بأي أنثى يرتبط فيها بعدين
بس مايقدر يشوف اخوه يغرق ولا ينقذه
مايقدر يشوفه ينخدع من انسانه مثلها ويسكت
كم مره جا بيتكلم بس كل مايشوف السعاده اللي فيها اخوه يحس ان لسانه انربط
تكلم بسرعه قبل مايتردد ويسكت مثل عادته / ضاري...
- هلا
- تعرف البنت اللي شفتها معي بالمزرعه وغصبتني أ........
تكلم مقاطعه / الله يستر عليها
خالد/ تعرف من هي ؟
- اقولك اسكت
خالد/ باعلمك طيب من هي و.....
اعتدل بجلسته بعصبيه وتكلم بصراخ / اقول ابلع لسانك ....فرحان بشين فعايلك وجاي تفضح عرضك بدال ماتستر عليها يالثووور
خالد/ اسمعني طيب بـأ.....
-خلاااااااص سكر هالموضوع
خالد/ بقولك شئ عنها اسمعنـ.....
وقف بغضب وتكلم بعصبيه / انـــطـــممم ....وتقلع عن وجهي يالردئ
انقهر منه وحط عينه بعين اخوه بقهر واصرار وتكلم بسرعه ندم عليها / تراها زوجتك
شاف علامات الغضب تحولت لملامح صدمه وذهوول على وجه أخوه
رجع بوقفته على ورى من هول المصيبه ...شافه وهو يسكر عيونه ويفتحهم بصدمه وعدم تصديق
وشاف ملامح الصدمه يكسيها الخذلان والإنكسار
طلع من الخيمه دون ادنى كلمه
كور يده بندم وعض شفته على تسرعه....
جلس على المركى والأحساس بالندم يقطعه ....لعن غبائه اللي خلاه يقول هالكلام لأخوه
تمنى انه كان أطرم ولاقال اللي قاله
مايدري وش استفاد من اللي قاله ....بدال لاينقذ اخوه سبب له جرح عمره مايبرى ومحى ثقته بكل بنات حواء
كان بإمكانه يحذره أو ينبه من بعيد لبعيد ولا يفجعه بهالخبر
7
7
7
اعتدل بجلسته على السرير بسرعه
دقات قلبه متسارعه ....والعرق مبلل جسمه رغم برودة التكييف
تنفسه مضطرب ....والخوف متمكن من كل خليه بجسمه
ارتفع صوته يقطعه صوت انفاسه اللآهثه / اعوذ بالله من الشيطان الرجيم ...اعوذبالله من الشيطان الرجيم ...اعوذبالله من الشيطان الرجيم
كان حلم ....حـــلـــم
يمكن اللي صار صدفه ....يمكن أنها ماكانت تقصد
يمكن اللي سوته مهب انتقام مني باخوي
رجع انسدح على السرير بعد ماهدت دقات قلبه وانتظم تنفسه وهو يردد / صدفه ....تزوجته صدفه
..........................
يقطع شوارع الرياض بسرعه مجنونه ....يقطع إشاره شارع ويتفادى الإصتدام بشارع ثاني
ابتسامه عريضه مرسومه على وجهه ...وسعاده داخليه تشع منه شع وكأنه أول مره يحس بطعم السعاده
وده يطير ويطلع من زحمة الشوارع ويوصل للبيت بهالثانيه
وده يشوفها بعيون غــيــر ...بعيونه بعد مانكشفت الحقيقه وانشالت الغشاوه عنها
ابتسامته كل مالها وتتسع لحد ماتحولت لضحكه تشق سكون السياره
يضحك من قلب وكأنه بشر بملياااااااارااااات
][ ~ نـْاصَـرَ ~ ][
فجأه الإبتسامه انمحت من على وجهه بكل قسوه....وتحولت ملامحه لملامح الصدمه والحزن
يحس انه كان بغيبوبه وأحد صحاه منها
توه يحس ببشعاة الحقيقه اللي انقالت له
توه يعرف دنائتها وحقارتها وقذارتها
توه يستوعب الطرف الثاني بالقصه
فجأه ترددت كلمة محمد براسه وخلته يستوعب الحقيقه بكل أبعادها وشناعتها ( أخوك اغتصب بنت عمك ....اخوك اغتصب بنت عمك )
أخــــــوووووكـ
-أخــــوووووي ....يوسف ...أخـــــووووي
أجزاء الصوره الناقصه وضحت.... والخيوط المتناثره اجتمعت
وبانت له الحقيقه بكل بشاعتها وحقارتها
اخوه الجلاد وزوجته المظلومه
اخوه الغاصب وحبيبته الضحيه
اخوه المعتدي وهي عرضه
وقف السياره على جنب وعقله ماقدر يستوعب اللي انقال له
كانت فرحته ببراءة زوجته معميته عن الطرف الثاني بالقصه
وسعادته بأنها له لوحده سدت سمعه عن أي اسم ثاني انقال
فتح أزارير ثوبه بيد مرتجفه ...ومسح فيها وجهه مره ومرتين وثلاث لعله يصحى من هالمصيبه او يستوعبها
شال الشماغ من على راسه وخلل اصابعه بشعره وضغط عليه ...يحاول يسكت هالصوت المزعج اللي يرن فيه والكلمه اللي يتردد صداها
وين كان يوم صار اللي صار ....وين أهل البيت
ويـــــــن كـــنـــااااا
الغضب اشتعل بداخله بأقوى صوره والقهر وصل لأعلى مواصيله
رص على اسنانه وبراكين الغضب والقهر ثايره داخله ....ووجهه انقلب للون الأحمر وكأنه بينفجر
ضرب على الدريسكون مرتين وثلاث واربع بدون مايحس بأي ألم ..
وأي ألم بيحس فيه اقوى من هذا !!
تمنى لو اخوه حي ..كان عذبه وماخلاه يموت براحه لين مايشفي غليله منه
تمنى لو يرجع ثواني ويفرغ كل القهر اللي داخله فيه
القهر اللي فيه ماهو بسيط
قهر رجل انطعن بظهره من اقرب الناس له
قهر رجل اعتدى على عرضه ولا يقدر يدافع عنه
قهر رجل انخدع وانخان من احب الناس على قلبه
ارتفع صوته بصرخه من اعماقه ...
صرخة ألم ..
صرخة قهر...
صرخة رجل غيور انتهك عرضه ...
- آآآآآآآآهــ .....
ونزلت دموعه بدون إرداته تخفف القليل والقليل من النيران اللي بداخله
رحمه من ربي بأصعب المواقف
عيون الناس المتسائله متسمره عليه وعلى شكله المريب ..ازارير ثوبه مفتوحه وشعره متطاير وضرب يده المتواصل على الدريكسون ودموعه المغطيه وجهه
فيه اللي يسأل واللي يتوقع الإجابات والإحتمالات
ارتفعت اصوات الناس بحيره/ وش فيه ؟؟
- يمكنه مجنون
- يمكن ميت له احد
- يارجال شكله فاقد عقله ماتشوفه يصارخ
- لالا شكل ميت له غااالي ويمكن ماقدر يتحمل الصدمه
يمكن كلامهم صح !!
يمكن انه فقد عقله من بشاعة الحقيقه اللي عرفها عن اخوه !!
ويمكن هي ماتت بالنسبه له وفقدها للأبد!!!
................................
واقفه قدام المغسله تغسل مواعين العشاء وهي تتمايل بوقفتها بتعب تخفف ثقلها عن رجلينها وبين كل فتره والثانيه تمسد ظهرها تنشد الراحه
ابعدت خصله من شعرها كانت على وجهها ومضايقتها وغمضت عيونها وتنهدت بتعب وتعابير وجهها المصفرالذابل تغيرت لملامح تعبانه ومرهقه
خلصت من غسيل المواعين وصارت تمسحهم بالفوطه بملل وآليه تعودت عليها خلال الشهور اللي عاشتها هنا
عيونه تتابعها بقلق ....يتفحصها بنظرة خوف عليها وحب إطمئنان
لها فتره وهي بحالة خمول ...كل مالها وتنحف ووجهها يذبل
كم مره يقولها بوديك المستشفى عشان نتطمن عليك لكنها كانت ترفض وبشده
يحاول يخفف عنها شغل البيت ويساعدها لكنها ترفض بعد
احتار معها ولا يدري وش يسوي ولا وش اللي ويرضيها
][ ~ ضًـاْرًيَ & الًـعًـنٍـوْد ~ ][
قام من مكانه وتوجه لها .....مد يده بدون أي كلمه وأخذ الصحن والفوطه منها وصار يمسحه واخذ الثاني والثالث وهي تتابع تحركاته بصمت وقهر منه ماتدري وش سببه
تنرفزت من حركته وودها تاخذ الصحن اللي معه وتكسره فوق راسه مع انه مب أول مره يساعدها بشغل البيت بس ماتدري وش المشاعر الغبيه اللي تحس فيها
وبدون شعور منها سحبت الصحن من يده ورمته على الطاوله بغضب وقهر ظاهر وارتفع صوتها بحده / اتــرررك الصحن
شايفني مكسره ماعرف أخلص شغلي
ابعد عني خل لي مكان اصير فيه لحالي بدون ازعاجك وملاحقك لي
ابــي اتنفس ....ابي اعيش مثل الناااااس
اوووووف عـــاد ...زززززهـــقـــتــــ ملـــيتـــ منك
فتح عيونه على آخرهم بصدمه من ثورتها وعصبيتها بوجهه وبدون داعي
تصرفها شل تفكيره ومنعه من القدره على انه يبدر منه أي ردة فعل
بحالة صدمه وصمت وسكون ..!!
لف وطلع من المطبخ وخلاها بدون أدنى كلمه أو فعل منه يدل على انزعاجه وصدمته من تصرفها
ردة فعل طبيعيه كان بمقدور أي شخص بمكانه انه يسويها ...!!
...............................
تمشي بخوف وتردد ...تقدم رجل وتأخر الثانيه
وعيونها تدور بكل الإتجاهات بتوتر
بس لازم تعرف مصدر الصوت بشقتها
اما أنه قطوه او أحد ثاني واللي متأكده منه أن هالأحد مب زوجها ...فأسوأ الإحتمالات انه حرامي ولازم تتأكد بنفسها قبل ماتستنجد بأحد
خطوه جريئه منها وشجاعه للي مايعرفها لكنها تعتبرها شئ عادي مقابل اللي شافته بحياتها
استوقفها صوت الدش بالحمام والملابس المرميه على الارض عند الباب
شالت ملابسه عن الأرض ورفعت حاجبها بإستغراب ....مستغربه انه استعمل الحمام الخاص فيها وهو اللي محرم على نفسه دخوله
تبدلت ملامحها لملامح خوف وقلق ...خافت لايكون تعبان او متهاوش مع احد أو مأذيه أي شئ واضطره انه يستعمل هالحمام
ودها تفتح الباب وتطمن عليه وتريح قلبها الخايف.. لكن العلاقه بينهم عارفه حدودها ولا يمكن بيوم انها تتخطاها وتعيش حياة طبيعيه مثل ماكانت تحلم
][ ~ نـْاصَـرَ & شَـَمـْـسِ ~ ][
ارتفع صوتها ونبرة الخوف واضحه فيه / ناصر ...فيك شئ ؟
وصلها صوتها / جيبي لي فوطه وملابس
حضنت ملابسه بحركه غير إراديه منها وشئ من السعاده تحس فيه وإبتسامه حقيقه انرسمت على وجهها
وتكلمت مع نفسها بفرحه وعدم تصديق [تروش بحمامي مانقرف ...اجيب له ملابس واشيلها بيدي ...ماصارخ علي ]
وزادت من احتضانها لملابسه وقربتها لخشمها واستنشقت رائحتها بعمق وهيام ...الرائحه اللي تسوى عندها أغلى العطور
ماهمها تعرف السبب اللي غيره كل اللي همها أن شعوره تجاهها تغير وبس
................................
مسكت حافة الطاوله وعضت شفتها بندم على تصرفها الطفولي
تصرف عارفه أنه غلط وماله داعي
بس ماتدري وش سببه ولا ليه سوته
واللي خلاها تموت ندم هو سكوته عنها ولا كأنها سوت شئ
لو كان قاسي معها ويعاملها بجفاء وخشونه كان اريح لها وبتلقى عذر لنفسها على اللي سوته فيه
لكن المشكله انه يعاملها مثل الملكه فوق عرشها وكل ماتطلب يجاب
ويعاملها مثل الطفل بنعومه ودلال ...ويقابل انفعالاتها بوجهه بهدوء قاتل وطيبه زايده تزيد من عصبيتها يوم بعد يوم
][ ~ ضًـاْرًيَ & الًـعًـنٍـوْد ~ ][
ضربت راسها بيدها بتأنيب ضمير وارتفع صوتها / غبيه ليه اسوي كذا ....صدق إني بزرررر .....غــبــيـــه
قطع عليها كلامها مع نفسها اليدين الدافيه والخشنه اللي حاوطت خصرها والأنفاس الدافيه اللي لفحت رقبتها
ووصلها صوته يملاه دفى العاطفه والأحاسيس الصادقه مثل ماتعودت عليها / آسف إني ابعدتك عن اهلك
وآسف أني ضغطت عليك
وآسف أني اخذت كل وقتك ولاقدرتي تختلين بنفسك ولو دقايق
وكمل بإبتسامه واضحه بصوته / اعذريني ماعندي خبره بالحريم .....علميني واوعدك اني اتعلم بسرعه
ولا تقولين غبيه ....انا حبيبتي مهب غبيه.... وطبع بوسه بحراره على خدها وثانيه بنفس حرارتها على رقبتها واستكانت بجسمها الصغير بحضنه الدافي العريض بكل طواعيه
همس بأذنها بكل رقه وبنبرة صوت لذيذه دافيه يملاها الحب والعشق الواضح / أحــبــكــ
غمضت عيونها بكل قوتها واضطرب نفسها من وقع هالكلمه عليها
لأول مره تسمعها منه ....
وأول مره يعترف لها بحبه ...
ياما حلمت بهاللحظه بفترة مراهقتها ورسمت وخططت لردة فعلها لو حبيبها أو زوجها قالها لها ...
والحين هالكلمه انقالت لها وعارفه بصدقها ..لكن ماعندها الجرأه أنها ترد عليه
ماعندها الجرأه أنها تقول كلمه صغيره وتجبر بخاطره مثل (وأنا بعد )
اجتمعت الدموع بعيونها والعبرة سدت حلقها....الموقف فوق طاقتها ولا تقدر تتحمله
من أول ماخطتها نجحت وعاشت بقربه والندم يقطعها وتأنيب الضمير ذابحها
شافت أنه مايستاهلها وأنه يستاهل زوجه أفضل منها بمليون مره
زوجه تبادله المشاعر الصادقه وتعيطه مثل مايعطيها من الحب
قوتها اللي تسلحت فيها طوول الشهور اللي فاتت نفدت ولاتقدر تستمر بلبس الأقنعه وتمثيل دور الزوجه المحبه المطيعه
تبي ترجع لسعوديه...ترجع لبيت اهلها وتخلص نفسها من الورطه اللي حطت نفسها فيها
تبي ترجع وتخلصه هو من إنسانه خاينه ومخادعه مثلها
7
7
7
تبي تخلص نفسها من بين يدينه لكن رغبة داخلها رافضه هالشئ
تبي تبعد عنه وتختلي بنفسها وتندم حضها لكن شئ اقوى منها يمنعها
كل شئ بداخلها يبي قربه
وكل الأحاسيس متوجه له
لكنها تكبت أي مشاعر صادقه تجاهه وتمنع أي فعل منها يدل على ميلها له
وتقول لنفسها دايماً (يكفيه ماجاه مني ....مايستاهلني يستاهل وحده أفضل مني ...لعبت بمشاعره بما فيه الكفايه ..يكفي اللي جاهـ مني )
استغرب سكوتها وتصلبها بحضنه بعد سماعها كلمة (أحبك)منه
لآم نفسه على تسرعه ..وصار يطمن روحه المتوجسه بأعذار واهيه بأنها مصدومه أو تأثير هالكمه عليها كبير وحاول يقنع نفسه بهالأعذار اللي داخلياً مب مقتنع فيها
* لكن عين الحبيب لاترى زلات محبوبه *
فك يدينه عنها وابعدها عن حضنه برقه ولف عنها متوجه للباب ...يمكن خوف من ردة فعل مشابهه لثورتها بوجهه قبل شوي أو خوف بالإستهتار بمشاعره ...لكنه أسلم حل بنظره لحماية مشاعره
خطى بضع خطوات واستوقفته يدها الصغيره الناعمه يوم مسكت يده بكل قوه
استدار وواجهها بإستغراب من حركتها ...وصدمه منظر عيونها الغرقانه دموع
ماتدري وش تقوله ...بس ماتقدر تخليه يروح بعد ماصدته بهالشكل المؤلم
مالقت قدامها إلا أنها تقوله عن الشئ اللي لها فتره وهي مغبيته عنه على امل أنه ينتهي اللي بينهم اذا رجعت لأهلها ......اغتصبت ابتسامه ونطقت كلمات بحروف متقطعه وغير واضحه بسبب عبرتها / أنـ ـا حـ ـامـ ـل
فتح عيونه على آخرهم بصدمه وعدم تصديق
وخلال ثواني بس تبدلت ملامح الصدمه لملامح سعاده حقيقه وانرسمت على وجهه ابتسامة فرح صادقه
تكلم بسرعه وبكلام غير مرتب / صدق ...صدق
تأكدتي ؟!!
وش دراك؟؟
حللتي ولا وشلون
يعني ...يعني وشلون ؟!!
هو صدق.؟.... صح ماتمزحين ؟
السعاده اللي يحس فيها انتقلت لها بشكل جزئي وشوفته وهو يتكلم وكأنه طفل منتشي فرحه اسعدتها
ابتسمت بوجهه وهي تراقب تصرفاته وحركاته اللآراديه اللي يسويها من شد فرحته
قربت له وحطت اصبعها على فمه بكل نعومه ورقه وتكلمت بصوت ناعم هادئ / اووش اووش اووشـــ
وحاوطت خصره بيدينها وريحت راسها على صدره وصارت تمسح على صدره من جهة قلبه بكل نعومة وتحس بدقات قلبه السريعه والمضطربه / انا حامل صدق مامزح
ووشلون عرفت ؟
كنت شاكه ....بس شريت أختبار حمل من الصيدليه وطلع أني حامل..... بـــــس هذي كل القصه
حست بدقات قلبه تهدى ونفسه ينتظم
ماتكلم ولا قال شئ
كل اللي سواه انه حضنها لكن هالمره غير عن كل مره ...حضنها بكل قوه وتملك وكأنه يضمها هي واللي ببطنها ويمنع عنهم أي خطر أو أنهم يضيعون منه
مشاعر هاللحظه الصادقه بينهم اجتاحتها بكل عنف وسلبت كل قوه امتلكتها ...وتمنت لو تقدر تعيش طول حياتها بأحضانه
لكنها داخليا ً مقتنعه بشئ واحد انها ماتقدر تكمل حياتها معه بوسط تعذيب الضمير والندم ~||
.............................
واقف تحت الدش والمويه تسري على جسمه وتحاول بقد ماتقدر انها تطفي اللي داخله
عيونه مفتوحه ومصوبه على اللآشئ قدامه يسترجع الأحداث اللي فاتت وكأنه كان بداومه وماحد طلعه منها غير صوتها المتسائل يوم وصله
غمض عيونه بقوه ورص على أسنانه يحاول يكتم غيضه لكن ماقدر ....كتمه على قدر استطاعته لكن صوتها بنبرته الناعمه الهاديه الخايفه خلت مشاعر القهر والغضب ترجع تملى صدره من جديد
][ ~ نـْاصَـرَ ~ ][
استنشق نفس طويل وعميق يهدئ من اضطرابه ويستعد على مواجهة حياة جديده مع إنسانه ياما حلم بالحياة معها
اليوم بتبدأ حياته معها بدون شكوك وبدون عذاب وبدون حرمان
الشئ اللي كان مبعدهم عن بعض اختفى بظهور الحقيقه رغم بشاعتها
بس هل هي بتقبله إذا رجع لها أو بتاخذها الكرامه وعزة النفس وبيكون لها مركز القوه وتنتقم لظلمها منه وتطلب الفراق ؟!
احتمالات كثيره جت بباله وخلته يتردد يقولها انه يعرف السالفه ويفضل السكوت والإحتفاظ بها
خاف لاتروح من يده بعد كل اللي صار
هي حلم الطفوله والمراهقه والشباب ...وبعد كل اللي عرفه عنها كان مازال متمسك فيها واقنع نفسه باسباب واهيه عشان يكون بقربها
والحين لايمكن يفرط فيها لو وش ماكان
بيخلي الحياة ماشيه مثل ماهي بينهم وشوي شوي يعدل بحياتهم لحد ماتكون حياة طبيعيه بدون احساس منها
من حقه يعيش مثل ماتمنى ومن حقه عليها أنها تشاركه حياته بعد كل اللي صار
هذا هو الحل اللي توصله والحل الأأمن لكل الطرفين من وجهة نظره
........................
منسدحه بالصاله على رجلين امها ...ويد أمها تمسد شعرها بين كل دقيقه والثانيه وتتمتم بكلمات الشكر والحمد ودمعه طاهره شاكره تشاركها هاللحظات
][ ~ بًـيَـتِـ أًهًـلْ الَـجَـآزَيْ ~ ][
اعتدلت بجلستها بتعب خفيف وباست يد أمها بحب / فديت شيلتك وريحتك وهالدراعه الحمرى اللي لابستها لاعاد تصيحين والله إني طيبه ومافيني شئ وهذاني قدامك لو فيني شئ كان ماطلعوني اصلاً
غطت وجهها بشيلتها وكملت صياحها تحت نظرات المتواجدين بالصاله والمتعاطفين معها والبعض كاتم ضحكته
ارتفع صوت ذياب بمزح / الله يهديك يايمه شوفيها مثل الناقه قدامك مافيها إلا العافيه بتدفنا وتدفن عيالنا وعيال عيالنا وهي للحين تناطح لاتخافين عليها أم سبعة ارواح
ارتفع صوتها بغضب معاتب وخوف فطري من العين/ قطع الله لسان العدو....وش هالحكي ...اذكر ربك تبي تطيحها من حيلها ....ماصدقت متى فتحت عيونها ورجعت للبيت بالسلامه وأنت تبي تعينها ياللي ماتستحي
ماقول إلا خلف الله على اهلك وعلى حرمتك وعلى ولدك ياهاردي
طول ماهي تهاوش وهو فاتح عيونه بصدمه أول مره جدته تهاوش أحد فيهم بهالشكل وكل الباقي كاتمين الضحكه على شكله وعلى هواشها واللي ماخذت نفسها فيه مع طوله
أول ماخلصت حك رقبته بإحراج منها ومن الموجودين وارتفع صوته بعتاب مازح/ حشاا يايمه ماتسوى علينا كلمة قلناها لو إني أنا كان مادافعتي عني مثل هالصخله هاللي جنبك
ضربت صدرها بيدها / هــوّ ...كلكم عيالي وأي احد فيكم ينجاس بشوكه انا اللي اتوجع بداله
الضنى غالي وكلهم واحد عندي وانا امك ...لاجربته بسألك من أغلى من عيالك فلان ولا فلان وبنشوف وش بتقول ؟!
قام من مكانها وباس راسها / الله يعيطك طولة العمر وتشوفين عيال عيال عيالي وتخطبين لهم بعد
- آمــــيـــن ..على زود عمل صالح يارب
7
7
7
دخل من الباب بسرعه وابتسامه خبيثه مرسومه على وجهه بشقاوه / احــم احــم
اللتفتت الأنظار له بتساؤل
صقر /اقول أخت الجازي تأخرتي على دوامك
ناظرته بتعجب / أي دوام ؟!
تكلم وهو يغمز بعينه ويأشر فيها على برى / اللي خبري خبرك واللي كل يوم مسنتر بالخيمه يبي يشوفك ويتطمن على قولته
تكلمت الجده / ياخزياه بس ...جاكم الثاني ذا اللي مايفهم
رجال ويزور حرمته المصخنه وش لكم بهم
خالد / هههههههههههه جدتي على النظام الأوربي الظاهر ..فري الوضع عندها
ذياب / يايمه دايم يجلسون لحالهم..اثــــنــــيـــــنـــ والشيطان ثالثهم وماندري وش يصير داخل هالخيمه ماعندهم لاحسيب ولا رقيب
غطت وجهها بالشيله بحيا الأنثى الفطري /يارب لاتواخذنا ...يارب لاتواحذنا ...سفيه سفيه
ضاحي / هههههههههههههههه لاتدقق على المسيكين هو مرتب أموره ان زواجه قبل أسبوعين وزياده وحاشر عمره على هالأساس تجي عمتك المصون وتخرب عليه مخططاته واستعداداته وش تبيه يسوي يعني ....يصور جنبها مثلاً ؟!!
ذياب / ههههههههههههه هقوتك كذا الولد متشحتف على احم احم ....لازم محرم ياجماعه ..وشرب صدره بإستهبال /وماحدن قدها غيري
وجهها انصبغ بحمرة الخجل وجسمها ارتفعت حرارته وصار يعرق مع ان الجو بارد من التكييف
ودها هاللحظه تختفي ....تصير شئ صغير ماينشاف ...ولا تكون بهالموقف البايخ
غاصت بالكنب من الحيا ...عيال اخوها ماخذين الوضع عادي ويتكلمون ولا كأنها موجوده بالاساس
ماقدرت تستحمل الوضع أزود من كذا قامت من مكانها بعصبيه رغم خجلها وارتفع صوتها بحده / خلااااااااص ...بلا قلة ادب
سكتوا العيال فجأه من صراخها ...ويوم انتبهوا لكلامها ووجهها المنقلب انفجروا ضحك ولا همهم
ماتت قهر منهم وودها تذبحهم ولا على الاقل تقطع ألسنتهم / وجع انت وياه خلااااص
ماحد لقى لها بال والضحك مستمر
تكلمت بنبره منقهره متباكيه/ الله ياخذكم إن شاءالله
وطلعت من الصاله متوجهه للباب الخارجي اللي يطلع على الحوش
ووصلها صوت خالد / انتبهي لايتهور رجلك ...تراك مريضة قلب والشسمه ماينفع هالحين لازم فتره ثم خليه يفلها على كيفه
وانفجروا مره ثانيه بضحكه اقوى من اللي قبل/ههههههههههههههههههههههههههههههههه
وهي صارت تغلي من القهر والعصبيه منهم وتوجهت لطلال بالخيمه
.........................................
جالسه تنتظره بغرفة المكتب ..عارفه انه هالوقت يجي من الدوام ولازم يمر المكتب يحط شنطته واوراقه
دقايق بس ودخل المكتب بقامته الطويله وهيبته ولا إرادياً منها سرى بجسمها شعور لذيذ بشوفته حتى لو كانت داخلياً تنكر انها للحين مازالت اسيره حبه
دخل وحط الشنطه على الطاوله الجانبيه وجلس على الكنب وفسخ شماغه وطاقيته وخلل اصابعه بشعره وصار يدلكه بتعب وإرهاق
ودها بهاللحظه تقوم وتريح راسه على رجلينها وتدخل اصابعها بشعره وتدلكه له
وتمرر اصابعها على وجهه برقه وتسوي له مساج يريحه من التعب الواضح على وجهه
احلام سريعه ومجنونه مرت ببالها ...لكنها محتها وطردتها من بالها قبل لاتعيشها بخيالها
][ ~ مـَــْزـوَنـَــ & مـتـَعـبَـــْ ~ ][
انتبه على وجودها واخيراً وحس بشئ من الفزع من وجودها الهادئ / بسم الله هبلتيني
كان تكلمتي ونبهتيني ؟!
اوهوووه دايم انسى ...كان طقيتي الطاوله طيب ولا لمستي كتفي مثل عادتك القبيحه
كشرت بوجهه بحقد ...ودها تقوله بعالي صوتها (تراني اتكلم ....تراني صرت كااااااااامله ماينقصني شئ)
لكن لا وألف لا...مب هي اللي ترجع لواحد ذلها بعد ماعطاها ظهره
حتى لو عاشت تحت حمايته ..مافيه شئ يجبرها انها تنذل له من جديد وهو نفسه ماتغير ولا عمره بيتغير ويتنزل لها على قولته
اشرت له بيدينها [أبي أكلمك بموضوع مهم ]
متعب/ يخص وشو ؟
-[يخص فلوسي ]
متعب/ يالييييل رجعنا على طير ياللي
- [أنا ابي كل ارباحي مابي راس المال ...ببالي مشروع ]
ابتسم بإستهزاء / ماشاءالله من متى صار عندك ميول تجاريه ؟
-[أنا بنت تاجر أباً عن جد والتجاره بدمي مثلي مثلك ولاا أحسن بعد ...واللي قدرت أنك تسويه أقدر اسوي أضعافه]
شاف نظرة التصميم والقوه بعيونها ....نظرة ماتعود عليها بيوم منها
كان الغالب على نظراتها نظرة الإنكسار والخوف من فقدان شئ مايدري وشو
لكن النظره اللي يشوفها بعيونها اليوم ..نظره جديده ..نظره خلته يسبح داخل عيونها ويتأمل دقائقها بكل تركيز
صحى من سرحانه بعيونها وقام من مكانه واتجه للباب وارتفع صوته / بفكر بالموضوع وارد لك خبر
اعترضت طريقه ونظرتها زادت تصميم وقوه ونظرة تهديد /[أنا يوم جيت اكلمك ماجيت اشاورك ...أنا طلبت وبـــس ...وأرجو إنك ماتتأخر بتلبية طلبي ....ولاتضطرني اخذه عن طريق احد غيرك ]
وطلعت وتركته وهو بحالة صدمه من كلامها اللي أول مره يسمعه منها ومن نظراتها الغريبه كلياً عليه واللي أول مره يشوفها بعيونها
واللي بطريق غير مباشر وبدون قصد منها سحرته ~||
ساعات الرجل يفضل يشوف بعض القوه بالمرأه
يفضل يكون لها رأي وحضور ومايفضلها بكل الحالات تابعه منكسره
ساعات تكون قوتها هي مصدر سحرها وجاذبيتها للرجل ويتمنى إنه يكون بقربها عشان يكسر قوتها وتخضع له ويحس بالنشوه
لكن غالباً ماتغفل المرأه عن هالشئ وتعتقد إن خضوعها المستمر له هو الشئ اللي يحببه فيها
وتلقى الزوج بعد كم سنه راح يدور له حرمه ثانيه أو أنثى شرسه ويرتبط فيها عشان يمارس رجولته عليه ويحس بالإثاره بحياته
الرجل بطبعه ملول ولا ضير من تبديل الطباعْْْْْ .ْْْ.ْْْ.ْْ}
.............................
منسدح على الكنب بالصاله ويقلب بقنوات التلفزيون بكل ملل ينتظر الغدى بتعب
وصلته ريحة الأكل وحول نظره بإتجاهها وطاحت عينه عليها وهي شايله صينينة الأكل وتمشئ بكل هدوء مثل عادتها
تبعها بنظره لحد ماحطته على الأرض وحتى يوم رجعت تجيب الباقي مازال متابعها بنظرات تقطر حب وهيام
رجعت بصحن الفاكهه وجيك المويه وحطتهم بجنب الصينيه واتجهت لغرفتها مثل ماتعودت
][ ~ نـْاصَـرَ & شَـَمـْـسِ ~ ][
ارتفع صوته بنبرة رجا ماقدر يخفيها من صوته / تعالي تغدي ...وين رايحه ؟!
لفت له بسرعه وصدمه وعدم تصديق / نـعــم ..وش قلت ؟!
- اقول تعالي تغدي
تلفتت حولها بحركه غباء وعلامات الصدمه والذهول مرسومه على وجهها ....تكلمت وهي تأشر على نفسها / أنا ؟
- شايفه فيه احد ثاني غيرنا ؟
تكلمت بنبرة خوف وتعجب وعلامات الإستغراب مرسومه على ملامحها ببراءه/ لا ؟
- اجل تعالي تغدي وانتي ساكته
تكلمت وعلامات الدهشه والضياع كاسيه ملامحها /طيب ..إن شاءالله ....ولفت متجهه للمطبخ
استوقفها صوته / على وين ؟
تكلمت للحين وهي بحال الصدمه والذهول / بروح اجيب لي ملعقه
تبعها بنظره وهو يبتسم على شكلها المنصدم والخايف بنفس الوقت
لكن شئ من الرحمه بداخله تجاهها... أي حياة وصلوا لها وهو مايدري عن نفسه تخليها منصدمه وخايفه من تصرفه بهالشكل
تنهد بألم ...لكن مب مثل الألم السابق اللي يحس
الحين كلها مسألة أيام ويقدر يعيش معها مثل ماكان يحلم ويتخلص من كل الآمه ...لكن أول كان يتمنى موته كل يوم ولا يتعذب بقرب حبيبه مثلها
شافها وهي جايه ومحى آثار الإبتسامه من على وجهه بسرعه وتكلم مع نفسه ( أخاف ابتسم بوجهها يغمى عليها من الصدمه )
وبدون شعور منه انرسمت الإبتسامه على وجهه ... السعاده اللي يحس فيها مايقدر يكتمها وغصب بتظهر على وجهه بأي صوره قد تكون إبتسامه أو ملامح مرتاحه أو النوم قرير العين بدون خوف أو هم
جلست بتردد وخوف واضح ...وبدوا ياكلون
هو توقف عن الأكل بدون وعي منه وصار يتأملها بعشق وكأنه توها يشوفها قدامه
متلذذ بالنظرات لها والإبتسامه مرسومه على وجهه بكل طواعيه
منزله راسها بخوف لكنه مستمتع بالنظر لها بكل حالاتها
يتابع يدها وهي ترفع خصله من شعرها الناعم من على وجهها اللي يعشقه
انتبه على يدها اللي ترتجف من الخوف ...مد يده ومسك يدها بقوه
رفعت راسها بسرعه وتلاقت عيونها الفزعه المتسائله المتوسله مع عيونه المطمأنه لها
وارتفع صوته بنبره لأول مره تسمعها منه ...هاديه مرتاحه ..طالعه من القلب / لاتخافين مهب مسوي لك شئ ...تغدي وانتي مرتاحه ......وابتسم بوجهها إبتسامه قصيره ورجع يآكل بهدوء
وخلاها تعيش صراعات نفسيه عنيفه بداخلها ...مشاعر غريبه وخليط عجيب من الأحاسيس تحس فيها
صدمه وسعاده ...خوف وطمأنينه ...ذهول وراحه
ابتسمت بدورها وهي تسترق النظر له وكملت غداها وهي تحس لأول مره بأنها تعيش حياة طبيعيه
...............................
وقفت عند باب الخيمه وصارت تحرك يدها قدام وجهها عشان الهوى يجيها ويشيل آثار العصبيه ويبرد عليها الحراره اللي تحس فيها
رفعت يدها وعدلت شعرها وجلابيتها ورسمت إبتسامه على وجهها رغم القهر اللي بداخلها من شوي وسمت بالله ودخلت عليه بالخيمه
أول ماشافها مقبله عليه فز من مكانه مثل عادته واستقبلها بإبتسامته اللي تعودت عليها وعلامات الحب تجاهها كانت واضحه عليه
][ ~ الَـجَـآزَيْ & طـْـلآلَ ~ ][
باس خدينها بنعومه وشغف ثم باس يدينها بقوه وهو يستنشق ريحتها
بوسته ليدينها اخجلتها وخلتها لاإرادياً تبعد عنه
رفع حاجبه بوجهها باستغراب من حركتها / وش فيك ؟!
تكلمت بصوت واطي يضعف من نبرة الخجل / هـاااه ...لا بس ...خلاص مب شئ
ابتسم بخبث / لاعادي قولي
بلعت ريقها بتوتر وحيا / تبي مويه ؟
- ههههههههههههه لامابي شئ
وحاوط كتفها بيده وجلس وجلسها جنبه وكمل كلامه / أنا ابيك انتي وبـــس
نزلت راسها لاإرادياً بحيا وتلونت خدودها بحمرة الخجل ....رجع باس خدها مره ثانيه ورجع لمكانه ثم قرب مره ثانيه وباسه ورجع لمكانه يوم قرب مره ثالثه حطت يدها على خدها تمنعه لايبوسها / الحين يجون عيال اخوي وانت تسوي كذا
- أولاً وش يجيبهم ماعمرهم سووها ...ثانياً أنتي زوجتي وحلالي ماحد له علينا كلام
وثالثاً الذنب ذنبك أنتي تغريني وانا ماستحمل ..تحملي عاد
اتسعت عيونها بصدمه وضربت صدرها وتكلمت ببراءه / انا ..؟!! ...والله ماسويت شئ
ومسكت جلابيتها / حتى شوف لابسه جلابيه وسيعه مررره
- البلا كله منك والله ....من أشوف هالخدود ولعت حمر ماقدر امسك نفسي
تكلمت بنبره ناعمه معاتبه كلها غنج / طــــلاااال
- ياويلييييييييه ...راح طلال وطي فدوتن لعيونك
عيون طلال انتي ...آمري تدللي بس
سكتت ولا ردت بكلمه ونزلت راسها بحيا
- ههههههههههه هاه شكلنا بنرجع مثل اول
خلااااص مهب متكلم بأسكت وأنتي سولفي وأنا باسمعك .....يالله أبداي
قامت من مكانها / تبي شاهي ولا قهوه ؟!
اشر لها بيده على صينية القهوه
حطت يدها على خصرها وبرطمت بزعل / طـــلاااال ..خـــيـــر؟!!
حرك يدينه بمعنى وشو
- جالسه مع اطرم انا ....تـكـلـم
اخذ نفس عميق وصار يكح بتصنع / كح كح كح ...يااااااربي بغيت اموت عشاني ماتكلم
- ماعندك حل وسط ....يااما تتكلم كلام مب زين ولا تسكت ولا تتكلم ابد
- انا مثل بابا هنود اسمع الكلام تقولين يمين اقول يمين تقولين يسار اقول يسار
- هههههههههههه ماشاءالله ...ياحظي والله ....اجل بتصير مثل الخاتم باصبعي على قولتهم
- تهبين والله
- ههههههههههههه عارفه انك بتقول كذا ....بس بشوف قلت يمكن تغيرت عقب ماتعبت
- لك الحشيمه والكرامه يابنت ضاري....لك علي عهد إنك ماتنظامين وأنتي ببيتي وتحت حمايتي
ابتسمت بوجهه بحب صادق ولسانها يردد كلمات الحمد بداخلها على ماأنعم الله عليها
مدت له فنجال القهوه
- ايه صح تذكرت ...
- اسلمي
- أمي مستغربه من امك ماجت تزورني لا بالمستشفى ولا بالبيت ....حتى خواتك ماجو بعد....عسى ماشر ؟!
وجهه انقلب وملامح الضيقه غصب انرسمت عليه مع انه كان يحاول يخفيها ....
مايدري وش يقولها ....هل يقولها الحقيقه ويصدمها أو يكذب عليها وساعتها منين بيجيب له عذر لأهله على تطنيشهم لها وعدم زيارتها
بس مايقدر يقولها الصدق وموقف اهله منها ....هو يبيها ولا عليه من كلام اهله لو جلسوا يزنون فوق راسه مليون سنه ...ماله زوجه إلا هي ولا لها زوج إلا هو بإذن الله
- آ ...آ ...أمي باليوم اللي دخلتي فيها المستشفى رجعت ويا خالي لديره ورجعوا خواتي معها
تقول ضايق صدري ومن كلام الحريم اللي ماله داعي ....انتي اخبر فيه
ردت بحسن ظن تربت عليه / الحمدلله دامها طيبه ومافيها إلا العافيه بسلامتها ...امي خايفه لايكون فيها شئ ولا درينا عنها ولا قمنا بواجبها
ابتسم بتوتر بوجهها يحاول يخفي مشاعر الضيق / لا لا الحمدلله طمني امك وهي كلها ايام وترجع لرياض اختي لها كم يوم وهي غايبه عن الجامعه
مسك يدها وسحبها وجلسها جنبه/ تعالي اجلسي هنا وين بتنحاشين ...ولا كالعاده من تصبين القهوه تجلسين بأبعد مكان عني كننا متهاوشين
7
7
انفتح الباب بقوه ودخلوا منه عيال اخوها الثلاثة ورى بعض ومرسومه على وجيههم ابتسامات الخبث والشقاوه
حمد ربه بداخله على دخلتهم وقطعهم لكلامه معها بموضوع أهله واللي للحين مالقى له حل يرضيهم
خالد / احم ....لا شكل الأوضاع للحين تمام ولا احد خرب شئ
ضاحي / والله ماندري عنهم شف وشلون لاصقه فيه ...هالجيل التالي من تحت لتحت وانا اخوك
خالد / هههههههههههه هقوتك كذا
ذياب / هقوته ونص شفهم للحين لاصقين ...شكلهم بالشين بأعمارهم
وارتفعت اصوات ضحكهم /هههههههههههههههههههههه
قامت من مكانها بغضب وخجل وقهر منهم وتكلمت بصراخ / والله لاأعلم عليكم أبوووووي
قسم لأخليكم تندمون يالحميررررررررر
ضاحي / امسكها ...امسكها ...قليلة الأدب تتلفظ على اللي اكبر منها ...امـــســـكـــهـــا
وهي صدقت كلامه ورفعت جلابيتها وركضت برى الخيمه بخوف وتعب يبطئ حركة ركضها
وانفجروا ضحك على حركتها وخوفها
ضاحي/ ياأنها تووووونس ...من عقب زواجها صايره غبيه هالبنت هههههههههههه
لف صقر لطلال / شفت الوجه الثاني لحرمتك ....هبال وصراخ ههههههههههه
طلال/ الله لايحرمني منها لاهي ولاهبالها ولاصراخها
خالد/ اخوووووس اخووووووووس يالجازي سي السيد ميت بدباديب اهلك هههههههههههههههههه
...........................
فارشه بطانيه خفيفه على الثيل ومنسدحه عليها
من اول ماحملت وهي تحب تجلس بالحديقه الخلفيه للبيت وتستمتع بجلستها على الثيل وريحة الزرع
وهالمكان ماحد يجيه من الرجال من اول ماتزوجت يعني صار شبه خاص فيها
سمعت صوت خطوات تقرب منها لكنها ماتحركت من مكانها حافظتهم عن ظهر قلب وعارفه صاحبهم
][ ~ ذَيــًآبــَ & مُـَـهـَرهَـْ ~ ][
وصلها صوته مازح/ عادي اجلس عندك ولا تنتظرني احد ؟
اعتدلت بجلستها ومدت يدها المتوسطها خاتم قدام وجهه وتكلمت بنرة دلع مصطنع/ آسفه مالك حظ معي...انا متزوجه وحامل بعد ...يعني بالسعودي لاتتلصق فيني...واحسن لك إنك تبعد لايجي زوجي ويشوفك... تراه يغــــــار علي حـــيـــل يمكن يذبحك عادي عنده
- ههههههههههههه خليتني سفاح مهب زوجك
ابتسمت بوجهه بمحبه وقربت له عشان يجلس جنبها
جلس جنبها وحاوط خصرها بيده وريح ظهرها على حضنه ويده الثانيه تلعب بأصابعها بكل نعومه بحركه تعود عليها لاصار بقربها
- عاجبتك الجلسه هنا ؟
- روووووووعه لاتسألني ماقدر اعبر عن مشاعري
- ههههههههه طيب ياأم مشاعر
تكلمت بنبرة عتاب / تتطنز علي ؟
- على خفيف بس .....لا من جد كان جلستي بالحديقه الكبيره أحلى واكبر ومرتفعه ابرد لك
- لا... هنا أريح وعلى كيفي متى مابغيت انسدحت ولا جلست ماخذه راحتي
تكلم بنبره جاده / كانك ماخذتي راحتك ولا تحسين إن حريتك ناقصه نطلع من هنا وناخذ لنا بيت على قدنا
- لاااا من قالك إني ماخذت راحتي ماخذتها بالطول والعرض وابوي وجدي ماقصروا معي حرموا العيال من كل شئ عشاني
- لاتضغطين على نفسك عشان فلان وعلان ...بنعيش هنا عمر وكانك مهب مرتاحه طلعنا وبس
لفت وجهها له وحطت يدها على خده برقه / مليت وأنا وحيده من دون اهل ...مليت وانا لحالي من دون ونيس
يوم لقيت لي اهل .ومب أي اهل.. أهلن ينشرون تبيني ابعد عنهم
حشا علي ماطلعت من هالبيت إلا على قبري
حضنها بقوه واحتواها وسب غبائه اللي ذكرها بماضيها ووحدتها
تكلم يبي يشغلها عن هالموضوع اللي يكدرها حتى لو حاولت تخفي ضيقها عنه / كم بقى لك شهر وتالدين؟
- هههههههههههه...مب سائلني امس وقلت لك باقي لي ثلاث شهور
- وش اسوي ابيه يجي بسرعه ..مليت وانا انتظر .....ماتحسين إنه طووول ؟
- عشانك تحسب كل يوم ...إنسى وبيجي اليوم اللي اصحيك فيه واقولك ودني المستشفى بولد وانت ماتدري
- الحمدلله إني مهب بعير
ناظرته بتعجب / ليه ؟
- كان صار حملك سنه عاد وش يصبرني لهاك الوقت
- ههههههههههههههههههههه اوريك يعني أنا ناقه
- يعني يوم قلت إني بعير عادي عندك هاه ؟
- هههههههههههه لا محشوم افا عليك
- طيب طيب يجي لك يوم
رجعت وريحت ظهرها على حضنه وهي تناظر السماء / شف شف الغروب ...سبحان الله كأنه لوحه
- سبحانه
مررت يدها على عيونه بنعومه ورقه / غمض عيونك ...وتنفس بعمق وأزفر الهوى من صدرك بشويش
خل ريحة الزرع تدخل صدرك...شم ريحة الطين مع المويه ...شم ريحة الورد
تحس ببرودة الهوى وهي تلامس وجهك ويدينك ..صح؟
شبكت يدينها بيدينه بنعومه / تحس بملمس يديني ...صح ؟
وباست خده بكل رقه وتكلمت بصوت هامس رقيق / تحس بملمس شفايفي على خدك ...صح ؟
وبكل مره تسأله كان يهز راسه علامة الموافقه من دون مايتكلم
مهره /عشان كذا احب هالمكان ...لإنه مكانا الخاص ...حديقة اسرارنا
حتى لو أجلس فيه لحالي يذكرني فيك واتخليك بقربي ويدك بيدي وانفاسك على خدي
فتح عيونه وناظرها بنظرة انسان عاشق متيم هايم بحب محبوبه
مسك راسها بيدينه وباسها بين عيونها وحضنها وصار يمسد على ظهرها بهدوء
- أبي ولدي يطلع بطيبتك ....أبيه مثلك
لاحد يربيه غيرك ...لاتهملينه ...خليه يتذكرني
احكي له عن هالمكان ....قولي أبوك هنا جلس...هنا عشت انا وياه احلى ايامنا
خليه يعرف إني فخور فيه حتى وأنا غايب
المهم لاينسى إن عنده أبو كان يموت بامه ويبيه يطلع مثلها
قامت من حضنه واعتدلت بجلستها وهي تناظره بتساؤل وإستغراب
ابتسم بوجهها واعتدل بوقفته ومد يده لها / يالله تعالي أمي تسأل عنك
مسكت يده بكل طواعيه ومشت معه بدون ماتسأل
..........................
دق المنبه مثل عادته كل يوم بدون كلل او ملل على الساعه ست ونص
غمض عيونه بقوووه وسحب المفرش وغطى راسه يبعد ازعاج المنبه عنه
توه مستغرق بالنوم من عقب جيته من صلاة الفجر
لكن مافيه مفر لازم يقوم وراهـ شغل وناس ينتظرونه
][ ~عًـنْـاَدٍ & بًـنْـتَـهـ ~ ][
شال المفرش عن وجهه وقابلته عيون خضر وكبار تناظره بكل براءه
شئ من الفزع حس فيه وخلاه لاإرادياً يرجع على ورى / بسم الله
وش جابك ؟!!
ناظرته نظرة عتب يخالطها براءه
ابتسم بمحبه صادقه بوجهها وارتفع صوته / تعالي عطي بابا بوسه
قربت له بكل طواعيه وباسته برقه
ناظرها بنظرة تعجب مصطنع / بس هذي ؟!!
ابتسمت بدورها بوجهه ونشرت بوساتها الطفوليه البريئه على كل وجهه
حضنها بحب مثل عادته / حبيبة ابوها زايرته اليوم ...وش عندها ؟؟
ناظرته بنظرة شقاوه ورفعت يدها قدام وجهه وفيها ربطة شعر
ناظرها باستغراب / وش ذي؟!!!
- دي استروبري ؟
اعتدل جالس / نعم ؟!!
تكلمت بلوم / بــابـــا ؟؟
- طيب آسفين ..مادرينا غلطنا على أم الفراوله
- بــابــا ...مش أوم الفراوله ...دي استروبري
- قسم إني حفظتها من كثر ماشريتها لك
بس وش اسوي فيها ؟ّّ!!
- عايزه تحوطلي أئرنين
- تبيني انا اسوي الأئرنين لك ؟!!
هزت راسها علامة الموافقه على كلامه
- روحي لجولي وش عرفني بالأئرنين انا ؟!
- دي مابتعرفش حاقه خالص
- اجل انا اللي اعرف
ناظرته نظرة عتب / انتا كُنت بتعملي شعري
- قايلك خليني اوديك للحلاق يقصه لك مثل أول عشان أعمله لك
ناظرته بصدمه ومسكت شعرها وتكلمت بنبرة خوف عاليه اشبه بالصراخ/ لاااااا ...انا مش ولد ....عايزاه يطووووووووووول
- اكلتينا ...ماتسوى علي كلمه قلتها لك
مادري منين جايبه طولة اللسان وأنا ابوك ....أنا وش حليلي ماحب اصارخ
ناظرته نظرة استهزاء فيه وعدم تصديق لكلامه وميلت فمها بعدم اقتناع
تكلم وهو يبتسم على تصرفاتها / بــعـــــد !!!
اخاف يجي يوم تطلعيني من البيت إذا ماعجبتك
مدت له الربطات وناظرة برجا / بــابـــا ....ربنا يخليك
- يابابا ماعرف اربط شعرك
وكمل بمحاولة اقناع لها / خليني اقصه ....واشتري لك ام الفراله كبــــيــــــــره مررررررره
-لااااااا عايزه شعري يطول....خالتي القازي بتئول ماحدش يئوص شعره إلا الولاد
تكلم بصوت واطي وبنبرة قهر / وهذي كل شئ مدخله خشمها فيه ...ماحد سلم منها
وكمل كلامه وهو معلي صوته/ قلت لك مااعرف اسوي قرنين روحي لجولي
تكلمت بصراخ وهي تهز راسها علامة الرفض وتحرك يدينها بعناد/ ائولتلك مابتعرفش مابتعرفــــــششششش
ارتفع صوته بغضب وناظرها بنظره حارقه ومعنفه لها / بــــنـــتـــ
سكنت حركتها وسكتت بسرعه ونزلت راسها بخوف ومسكت يدينها بقووه
وكمل كلامه بنفس نبرة صوته /لاعمرك ترفعين صوتك علي ســـااامــعـــه ؟؟
هزت راسها علامة الموافقه
- تــكــلــمـــي
- ايوه
- قولي إيه لاتعوين لسانك
ناظرته بنظرة عتب وبعيون غرقانه دموع ووجهها متلون بحمرة العبره وتكلمت بلكنه مكسره / ايــه
رق قلبه عليها ووده ياخذها بحضنه ويراضيها ولايشوف هالنظره بعيونها
تكلم بنبرة ندم وأبتسم إبتسامه يحاول يراضيها/ تعالي اعملك ائرنين
جالسه بمكانها ولا تحركت وتناظره بنظرة خوف وعتب
مد يدينه لها / تعالي يابابا لاتخافين
قربت له ومدت له المشط والربطات وعطته ظهرها
ناظر المشط والربطات بيده / بالله هذي حاله ....دكتور ماسك ذا الخرابيط بيدي
بدال مامسك لي مشرط ولا إبره ....قالو وش حدك على المر قال اللي امر منه
يالله استعنا على الشقا بالله
- بابا بسورعه حتأخر عالمدرسه
- طيب طال عمرك خمس دقايق واخلص من شعرك ...تامرين على شئ ثاني
- لا
- ماش يبي لنا زوجه ...مره ائرنين وجت سليمه والمره الثانيه وش بتطلب مني
& تمنايتي لكم بقراءة ممتعه ومشوقه &
& أخوكم / هاجس ليل &
........................[/SIZE]
التعديل الأخير تم بواسطة العامريه ; 22-02-10 الساعة 09:36 AM
سبب آخر: تكبير الخط
|
22-02-10, 08:27 AM
واتمنى ان تكون اخر الغيبات بارت ملئى بالاحداث
التى ستغير مجرا الاحداثفى القصه متعب وانجذابه المتاخر لمزون ..تاكد ناصر من برائه شمس .طلاق طلال والجازى المحتمل..فى انتظارك هاجس
جديد مواضيع قسم الارشيف
العرض العادي
