السلام عليكم ورحمة الله وبركاته ومشكورين على الترحيب الحار والله اني من زمان ونفسي اكون مشاركة دايمة معاكم

وعندي سوال ممكن واحدة منكم مر عليها مثل وضعي انا واحدة اذا مسكت شغل مارتاح حتى انجزة بالكامل والمشكلة انة مافي احد يقدر هذا التعب بس لو بكلمة شكرا مع اني ولله الحمد اعمل لوجه الله اولا ماني منتظرة من احد اي شي ولكن لما يكون هناك شكر اكيد يعطي دافعية للعمل صح والا لا

وردة انا اسفة لاني من فترة كويلة مكلمتك لظروف خارجة عن ارادتي وماتشوفين شر ياعز وافضل صديقة

سلام صبايا

وردة الغالية يا قمر ما في فرق في الواقع بين آرائنا لأن نتيجتها وحدة و هاد يلي قلته إن اتزوج منشان الناس ما تصرع راسي لا وألف لا ..مليون مرة انقهر من جهل يلي بيفكروا انهم زعلانين عليك لانك "عانس" ولا اني احكم على نفسي بعمر كامل من الغربة النفسية لزواج غير متناسب ، بيجوز يلي شفتيه فرق هو قناعتي اني مو بحاجة للزواج لأحس إني مكتملة وسعيدة وفي الواقع هي قناعة عامة مو بس بخصوص الزوج بحس إن المفروض الواحد يعرف شخصيته تماماً يستثمر نقاط القوة ويتلافى نقاط الضعف وما يخلي سعادته معتمدة على أي شخص تاني _طبعاً مستحيل تعزلي نفسك عن المحيط تماماً_ ولكن وخصوصاً بالعلاقة الزوجية وبالعلاقات الانسانية بشكل عام ما تخلي وجودك معتمد على شخص بحد ذاته ، مافي احلى من لما بنكون تنين عم نضيف لحياة بعض ونقويها ولكن إذا احتجت الك باستمرار لتغذّيني نفسياً رايح اتعبك واتعب نفسي وهاد يلي عم يسبب أغلب المشاكل للناس المتزوجين يلي بعرفهم .

وبوافقك على كلامك لربا القمورة ناس كتيرة بتحب تدعم ذاتها الهشة بتدمير شخصيتك ، بنقدك _وقت بيكون غير محق وظالم_ ، بالسخرية منك ، بكتير اشيا تانية القصد منها إتعاسك وسبحان الله لو كانوا هنن سعيدين لما احتاجوا ينكدوا على الناس بالشكل هاد .


وعلى فكرة ربا خطر على بالي شي ما قلته _مستحيل يكون ضل شي مو هيك _ عم تقولي لازم يكون عمره 70 واطرش واعمى.. طيب ما خطر على بالك مين بيريد يتزوج انسان ما بيسمع ؟؟ صدقي الجواب رايح يدهشك ، والمقصد من كلامي انت ما بتعرفي شو المطلوب ويلي بيرغبه الرجل عند البحث عن زوجة . فيلا انفضي غبار الكآبة عنك وارجعي بسرعة لاننا بنحب الكنافة موووت وما بنحسن بلاها


ههههههههه رومانس والله وقت بديت القراءة افتكرت ما راح لاقي شيء مشترك بس سبحان الله أجانب وعرب ما في فرق بالرومانسية الظاهر ، تخطيط المشاوير والمكتبات والغرف والتفكير كيف بتحكي عن رواياتك للأشخاص الجدد وحتى المناقشة عن ابطالك وكأنهم أشخاص حقيقيين _طبعاً لما حدا بيعبرك وبيخليك تحكي _ وكتير اشيا تانية كنت مفكرة أنا الوحيدة المبتلية فيها وطلعت براءة الآن الحمد لله


رزان ميت السلامة فيك حبيبتي

برأي كلامك صح لأن أحياناً بتحسي روحك عم تموت وقت بتعطي وبتقدمي عصارة جهدك وأعصابك وما بتلاقي ولا حتى كلمة الله يعطيك العافية وعلى فكرة ما بطلب تنقال دائماً مرة من القلب بحس بتكفيني زوادة عمر من دفء السعادة وحتى أحياناً نظرة عين بتحسي عم تحكي _عندي عقدة يا لولا الظاهر _ وأصعب شي وقت بتكوني انت بوادي والناس بوادي تاني يعني انت بتجوري على نفسك على حساب صحتك وعافيتك احياناً والطرف التاني محسب انك عم تعملي اقل ما يمكن وبالعكس بيجوز يحملك منية كمان . بالاخير الواحد بياخد حسبه الله وبيقول ربنا ما بيضيع تعب حدا إن شاء الله .
خلينا نشوفك باستمرار عزيزتي ولو حتى إذا بدك تفشي قلبك بس


سلام يا جدعااان