هذه مداخلة اعتذار والله يجزي الخير للصديقة يلي نبهتني عن سوء الفهم يلي ممكن ينتج عن خطأي


صبايا آسفة جداً وعذري أني افتكرت أن المقصود بالكف شيء شبيه بالبازوكا تبع وردة العزيزة فرجاء خاص للأخت ليبانون انجل يلي كانت المقصودة بكلامي إن تسامحني وحقك على راسي والله كنت عم امزح لأن كل ما شفت طلبها لروايات الابطال العرب بحس مشتهية أوجهلها بازوكا محترمة وطبعاً هاد مو اعتراض على ذوقها لأن لولا اختلاف الأذواق لبارة السلع وبيجوز هي شخصياً تتقزز من سيرة ليندا هاورد يلي بموت فيها أنا .
الخلاصة حقكم علي جميعاً .

الحبيبة ربا وأنا تشرفت بالتعرف عليك عزيزتي وكل يوم ومع كل مشاركة الك بيزيد تقديري واحترامي .
إذا كان المقصود بكلامك موضوع الزواج فأنا فهمانة عليك لأن أغلب الناس لا إما ما بتصدقك لا بتزعل عليك وبيحاولوا يقنعوك تغيري رأيك .
بس يا قمر ديري بالك الموضوع أمانة برقبتنا يعني مو إذا اجا شخص تحسي أنه مناسب لاحتياجاتك ترفضيه لمجرد التثبت على الموقف ، بالنسبة الي شخصياً برفض فكرة إن لازم يكون في رجل بحياتي حتى أكون سعيدة أو إني أتزوج منشان المجتمع ما يصرع راسي بكلمة عانس ..بتزوج بس إذا لقيت إنسان وبستعير كلمة لولا الغالية "رفيق الروح" شخص أتشرف بصهر حياتنا سوى ولحد الآن ما لقيت شخص قريب من اللي بدي ياه ،ودعوتي الشخصية لرب العالمين إن ما يحيجني لحدا وما بريد اشوف هالشخص فعلاً ، بس إذا حصل فربنا يقدرني إني أكون على قدر المسؤولية والالتزام هاد .
أطيب التمنيات والدعوات الك يا بطة ربنا من عندو يختار الخير ويرضيك فيه حبيبتي

ميت السلامة فيك أخت رزان وغلاوتك من غلاوة وردة العزيزة يلي الف شكر الك على دلة الخير هي يلي نحنا الكسبانين فيها ، ورجاءً عزيزتي حاولي طلي علينا كل ما حسنتي لأن أكيد إنت قمورة وظريفة والتعرف عليك بيسر الخاطر متل وردة القمر

اهليييين رزان...واخيرا اقدرنا نحكي معك بعد ما سمعنا عنك من وردة القمر...بما انه انت السبب في معرفتنا بوردة وبما انك صديقة عزيزة لوردة فإذن انت صاحبتنا لعزيزة الجديدة اهم شي ما تخافي

ريما..احنا كلنا بنعرف انك بتقصدي كل خيرلانك انت بالاصل طيبة و ما في حدا زيك ..وانت ما بطلع منك غير الكلام المنيح
وعلى قصة الزواج..انا ما راح اتزوج لسبب واحد اللي هو انه ما عندي مقومات الزواج..يعني ما بتخيل حدا حتى يفكر يتجوزني لانه ماعندي لا شخصية منيحة ولا اي شي منيح..فإذا تجوزت راح يكون عمره 70 سنة و يمكن اعمى و اطرش كمان..و صدقيني اني ما عم بدور على كلام تشجيعي او شفقة بس انا هيك مقتنعة انه راح يصير.. لهيك الروايات و الكتب مهمين عندي..بعطوني عالم ما راح اعيشه غير من خلال القراءة...
لمّا تكوني مستعدة قوليلي عشان احطلك باقي لاسئلة