الشرف لي يا وردة الغالية ..

في سوريا في محل الأيس كريم المشهور ذاك أكلنا منه عجيب ، أيس كريمهم غيير يا جماعة

في تركيا السوق يجنن و الأكل بعد كنت صغيرة و ندري عن مهند نشوفينه لسا صغير !! خخخ

البلجيكيين اوسم ناس في الأرض ما أدري ليش ما يتغزلون فيهم

الإيطالين أحترمهم لأنهم الدولة الأوروبية الوحيدة ايلي عندهم ماء في التواليت مو مثل الباقي بس محارم ورقية -- وععع - أربع سنيين و انا كلا أسلل غرشة ماي للحمام الله يكرمكم!!

في السعودية الكعبة المشرفة فيها شي روحاني حسيتها تلمع في عيوني أول ما شفتها تتلألأ يعني

الكويت لاس فيجاس الخليج ما نطلع ويا البنات إلا سيايير ملاحقتنا " مغازلجية " أحس كنا مجرميين و لازم ننصاد!!

هولندا الخمر أرخص سعره من الماء!!! و الحشيش مشروع بيعها في المقاهي ، الدراجات لها طريق خاص و الورود على أفا من يشيل .

تايلند طردونا من الفندق لأنا كنا جذيه 15 جاهل " طفل " و انا معاهم طبعاً 5 سنوات خب العائلة كلها مسافرة ويا بعض و طحنا على باوارييد " مفرقعات " و كانت ممنوعة في البحرين و بس مثل المجانين نلعب فيها لين ما فلتونا بره ! هههه! بس خالتي و زوجها ايلي انشفع ليهم لأنهم كانوا في شهر عسل قبل ما نصيدهم و العائلة تطب عليهم!!

فاتيكان بايطاليا أصغر دولة بالعالم و الغريب إن في قلب الكينسة في نقوش عربية بالباب لسورة العنكبوت أصلهم كانوا ينقلون النقش من مباني اندلسية و ما يعرفون وش ينقلون ، تخيلوا في قلب السيستين جابل آية قرآنية سبحانك يا رب!

بس عورت راسكم ننتقل لسؤال التالي.

و الله يا وردة ما اتخيل أخيم بدون الأهل ، لأنا نسوي أشيا قرعة ، يوم كنا مراهقين ناخذ سيارة خالي و نجرب كل واحد لفة بدون رخص كاااااااااان فـــن و العجيب إنه يعطينا وجه!! هههه!! و بعد نقعد نغني على النار و نقول إعترافات و نشارك في الذكريات يعني ما ينفع ندش حد مو من الأهل ، ما بناخذ راحتنا..

قلت هالحجي من قبل بس بعيده من شان خاطر عيونك الحلوين ، يوم بغيت أنضم للمنتدى كل ما احط إسم حلو إلا ماخذينه، فلاعت جبدي و أنا كل دقيقة أحط إسم و في الأخير و لأني كنت قاعدة ألصق شغل للمدرسة - و انا على فكرة أدرس صف الرابع و الخامس يا ريما - بصمغ اليوهو و ريحته في راسي و لايعة نفسي منه ، فقمت من القهر و حطيته كمزحة اجرب و طلع محد مستعمله و بس لصق!!! كنت حاطة أسامي دلاعة على ورود ما أدري شي جذي Blubel على Tulip كنت مستعجله و أبي اخلص.

صديقة العمر و الغربة GMA و لكنها عادت لتواصل الدراسة و أنا قررت المواصلة بالبلد . أحس روحي ضايعة من دونها. على العموم الله يخلي الماسنجر و التيلفونات !! هههه!

مواقف محرجة هاذي كثيير عندي منها ، هههه مرة كان المدرس يشرح و أنا حدي أبي أنام ، و كنا واقفين يشرح عملي رحت سندت ظهري على الشي ايلي وراي و إلا ما شوف روحي طحت في سلة خماااااام كبيرة و الكل يضحك !! ههههه!! زين كانت كلها اوراق مو شي ثاني!!

موقف جارح جداً و حقييير لأنه عرفني حقيقة إنسانة كنت يوم من الأيام اعزها مثل إختي و هي طلعت فالصو !! الله يسلمك كنت في الغربة فتحت الإنترنت ذاك اليوم و إلا قريت تعزية لعمي في الجريدة كنت أتصفحها يوميا - و من بعدها قطعت العادة - و ذبحت روحي من الصياح لأنها كانت صدمة و أمي ما خبرتني إنه مريض ، يمكن صار لي ساعة و نص و انا أبكي و نفسي انقطع و جهي صار طماطة و خفت أسوي في روحي شي فقمت و قعدت في حجرة ايلي ذكرتها فوق ، كانت تكلم ***** بالمسنجر و هو شي كل يوم تسويه و لا حتى عبرتني لأكثر من ثلاث دقايق ، معني كلش مو من النوع إيلي يصيح و لين صحت يعني في مصيبة ، بس و ش تقولين لين تكتشفين إن دمعتك ما تسوى فلس لشخص كان عبالك إنك مثل إخته ؟؟؟

جاوبناه فوق و على فكرة هذا بعد يتغير على الموود .

في الفترة الاخيرة قريت رواية Fires of Winter by Johanna Lindsay يعني بالله عليها الكاتبة شنو كانت تفكر في يوم تكتب الرواية، البطل اغتصب البطلة ، و كان مختطفها لتكون عبدة و تعمل ***** لمن سالوته نفسه من جنوده لأنه من الفايكينغ ، بس لسبب أو لآخر تمكن من البقاء عذراء لحين ما يغتصبها و تحمل منه ، و بعدينهو فكر أنه يتزوجها عقب ما شردت مثل السيلانية !!! شي كريه و ما يسوا الحبر ايلي انصرف عليه .

انا الصراحة احب الرومانسية و أكره الشهوانية الزايدة على اللزوم أحسها تخرب الروايات ، أحب لين تكون البطلة شخصيتها قوية بس مو نحيسة يعني قلبها رقيق فهذا الشي ايلي يجمل المرأة ، ما أحب لين يسونها مجنونة و ما تعرف وش تبي جنها هبلة تقول له روح و هي بعدين تكتشف انها تبيه !! ليش يا يمة إنتي عمية؟؟ تجذبني الرواية لين تكون حبكتها قوية و فيها أشياء ما نتوقعها ، يعني مو حبني و أحبك و جو ناس و خربوا و بعدين ردينا لبعض ، لا في قصص و روايات فيها قضايا و محاور تمس الحياة و الواقع

أنا أكره الكذب و العيارة ، و لازم أصدقائي يكونوا صريحين و لا ما اقدر أرافقهم ، ما احب ربع المظاهر و الفشار و الطلعات ، أحب أصدقاء أشاركهم حياتي بفرحها و حزنها مو حزت لين صحت دوروا وجهم عنك ، و شخصياتهم تكون نقية ، لأني ألقط الإشعاعات السلبية بسرعة من الناس و أتأثر فيها .

فارس الأحلام ، شقول لك ، قبل كنت أقول ما أبي أحط صفات لأني أبي أرضى بلي الله يعطيني اياه ، لكن بعدين شفت إن المثالية ما تنفع و الوحدة منا لازم تعرف وش تبغي و إلا تظلم روحها و الشخص ايلي يتقرب منها ، الشكل مو مهم عندي بس لازم أرتاح له - أصل نظري ضعيف ههههه - لازم يكون شخصية منفتحة على العالم و قوية - ولد أمه ما يعجبني - ، يكون وسط بين الجدية و الهزار يعني مو أكستريم لأي طرف منهم ، يكون متربى في نفس بيئتي عشان ما يصير كلاش ، في الاخير يكون هو ايلي يشيلني مو أنا ايلي أشيله !! هاذي عاد فسروها على كيفكم !!

كلا يقولون عني عاقلة و اكبر من عمري ، خاطري أصير مجنونة ، عيبي أني عنييييييييييدة و ما أحب أسوي الشي إلا لين أقتنع فيه .