السلام عليكم ورحمة الله وبركاته

و أخيييييييييييييييييييرا قريت هالجزء

بس قصير ... يعني لازم توقفين عند موقف الكل يتشوق لنهايته على العموم مقبولة منك مع اني متأكدة أنج تكتبين أكثر من اللي تنزلينه عندنا

و اخيرا اهتدت عليا و اعترفت لنفسها انها تحبه بس الله يستر من سارة شكلها بتخربها على الكل ::::: النذلة

مشكورة و تسلم الايادي

سلاااااااااااااااام
مساء النور والسرور
الى كل من مل من انتظاري ونسي القصه
لاني ادري ان الكل مل وما عاد في احد يترقب

اقول لكم اشتقت لكم واعذروني على التأخير

وما راح اغثكم بظروفي لان ما لكم ذنب فيها
لكن اقول لكم
هذا البارت وصل
واتمنى اشوف تفاعلكم معاي
واللحين اتركمم مع البارت الجديد



((الجزء الثاني والعشرون ))
(لحظات حرجه )




تــــــــــــــــــــــركــــــــــــــــــــــــــــي



عقب هالمسج خلاص ما عاد في صبر او حتى مجال للتردد او الحيره لازم اتصرف بسرعه ومن غير ما اضيع وقت ......كلمت خالد ومن غير سلام او تحيه قلت له
:- خالد انت في بيت عمي ؟؟

رد خالد بتأفف :- ايه نستنا العريس يشرف تخيل الكل هنا حتى الشيخ وصل والعريس ما نعرف وين اراضيه نتصل عليه جواله مغلق !!!

يعني للان ما عندهم خبر باللي نوي عليه ماجد استدركت الامر وقلت له
:- طيب ما له داعي تتصلون عليه وكلها عشر دقايق وتلاقون العريس عندكم ((وعلشان ما افتح مجال للاخذ والرد كملت ))ويلا مع السلامه

سكرت الجوال وانا بداخلي اعاصير....و في كل ثانيه تمر احس بشعور مختلف عن اللي قبلها وداخلي سؤال واحد يتكرر من غير توقف ...هل اللي بسويه صح ؟؟؟؟؟؟؟؟؟؟؟

حاولت ادق على ماجد لكن جواله كان مغلق يعني الجبان مصر يترك وداد في هاليوم ويفضحنا قدام الكل وهو ولا على باله لكن ما ني بتركي اذا ما عرفت شلون اجيبك وخلال اقل من عشر دقايق فتحت موبايلي وكتبت
((انت ما تركتها لانها لي من الاصل وعندك عشر دقايق بس علشان تحضر ملكتي عليها ...واسمع اول مبروك منك ))

عقب المسج حسيت اني انتشيت كشخت على الاخر وسحبت مفاتيح سيارتي وقبل ما احركها دقيت على واحد من اخوايانا عنده استراحه يتواجد فيها ماجد على طول ...رد علي وبعد السلامات والتراحيب سألته
:- بسألك يا خوك ماجد ال....عندكم اليوم ؟؟

سمعته يرد السلام على واحد من الشباب وبعدها قال :- ايه من عقب صلاة العشا وهو هنا ....هااااااا قررت تجينا ؟؟

ابتسمت :- يا ريت اقدر ...بس في رساله ابيك توصلها له قوله تركي ولد خالك تارك لك خبر مهم على جوالك

اشتغلت اللقافه عند خوينا :- خبر وشو ؟؟
ضحكت من قلب :- خله يفتح جواله وبتعرفون خبر وشو ....يلا في امان الله

سكرت الجوال وحركت السياره ورجعت افكاري تلعب فيني يا ترى اللي سويته صح ؟؟؟ وعقب هالخدر اللي احس فيه وش بيكون احساسي معقوله اندم ؟؟!!!!!




طــــــــــــــــــــــــــــــــــــلال



بعد مرور خمس دقايق من اتصال تركي اشتغلت حالة الاستنفار القصوى عند الكل العريس للان ما وصل ... اتصال تركي وكلامه بدل ما يطمني خلاني اتوتر ...كلام تركي يقول ان ورى ماجد شي وان جواله المغلق وتأخره وراه شي مو مثل ما كنا نتمنى...لكني اخذت بكلام خالد وسكت وحاولت ما ابين اي شي ودام تركي وعد ان العريس بيوصل خلال عشر دقايق فما في داعي للتوتر ... دخلنا المجلس وقبل ما اجلس اشر لي ابوي انه يبيني قربت منه سالني بهمس في اذني
:- وينه ماجد للان ما جا ترى الناس قامت تتكلم فيما بينها

رسمت ابتسامه على وجهي وقلت وانا اناظر الساعه

:- كلها خمس دقايق بالكثير ويوصل ...(بلعت ريقي وانا احاول اداري قلقي ) تطمن يبه ترى حنا قلنا للناس ان الملكه راح تكون على الساعه ثمان ونص والان توها ثمان وثلث

هز ابوي راسه وقال وواضح انه ما اقتنع :- طيب انت اتصل على ماجد شوف وينه فيه (ناظر ابو ماجد بطرف عينه وكمل ) وجهه زوج عمتك ما يطمن صار له ساعه يحوس في جواله الظاهر يتصل على اولده وما في رد...

تنهدت :- زين طال عمرك
رجعت وجلست جنب خالد وهمست في اذنه على اللي قاله ابوي واضفت :-
اخاف اتصل عليه وجواله ما زال مغلق ....لكن تدري انا بحاول وان شاء الله يرد

خالد قال وعينه على ابوي وعمي :- وانا اقول اتصل عليه برى المجلس ترى ابوي وعمي عينهم عليك ...ومحنا بناقصين ينتبهون لك اذا ما رد عليك

طلعت برى المجلس رفعت الجوال بتصل على ماجد الا سياره داخله البيت وقفت عند باب المجلس ظهر منها رجال غريب قرب مني وبعد السلام سألني
:- هذا بيت يوسف ال.........

ابتسمت له :- وصلت خير هذا هو بيته ...امر ؟؟

رد الرجال :- انا الصراحه بغيت ابو ماجدال...... وقالوا لي انه هنا

اقلقني ان الرجال وخاصة في غياب ماجد يسأل عن ابوه فسألت :- ليش تبيه عسى ما شر

رد الرجال :- ابدا بس في رساله مهمه ابي اوصلها له



ســــــــــــــــــــــــــــــــــــاره


احس الوقت يمر ببطئ متى بس بتجي اللحظه اللي يوصل الخبر للحريم ....ودي اشوف وش بيسوون اذا عرفوا ان ماجد ما يبي بنتهم صرف نظر عنها في اخر لحظه ...وخاصه رد فعل وداد ابي اشوف في عيونها احساس الذل والخذلان والحرج والهزيمه ودي اشوف دموعها على خدها .....
مليت ((اوفففففففففف متى بس بيوصل المرسال اللي بيبعثه ماجد لابوي برساله شفهيه يقولها قداااااااااااااااام الكل ....العريس يعتذر منكم ويقول انه ما يقدر يتمم هالزواجه))
تنهدت من قلب وبصوت مسموع ولاحظت ان كل العيون اتجهت لي ابتسمت وانا اناظر الساعه واقول لامي اللي واضح من عيونها وحوستها في الجوال انها ندمت على سكوتها وموافقتها المبطنه على مخططي قربت منها وكلمتها بصوت هامس

:- وش فيك من جلسنا للان وانتي مقابله جوالك ؟

وقالت اللي كنت احس فيه :- اخوك ماجد كل ما ادق عليه الاقي جواله مغلق

سألتها بخوف :- ليه وش تبين منه ؟؟

ردت وعيونها مليانه قلق :- ابيه يتراجع عن اللي في راسه ويجي يملك على بنت خاله ...ابي هالليله تمر على خير والله انا ما ني قادره احط عيني بعين ام طالال والكل وهذا هم ما عندهم خبر كيف لو دروا والله بطيح من عينهم كلهم ...(سحبت نفس ) هذا غير المسكينه وداد خايفه عليها والله قلبي ماكلني عليها احاتيها

اخذت الجوال من يدها وقلت لها :- انا موصيته يقفل جواله ويبعد من هنا كم يوم ..(لمعت ابتسامتي وانا اشوف الساعه صارت ثمان ونص ) واللحين تلقين خالي بو طلال وولده عندنا يبلغونا بان الملكه انلغت (حطيت يدي على كتفها ) اكيد بيعاتبونك وكل اللي ابيه منك انك تبانين قويه وما تضعفين قدامهم وسوي حالك ما تدرين عن شي

بس كملت كلامي الا نلاقي فيصل داخل علينا ويقول لامه بصوت واطي بس مسموع بالنسبه لنا كونها قريبه منا
:- يمه يقول ابوي بيجيكم اللحين في غرفة وداد ويبيك انت بعد معاها

مسكت ام طلال ولدها من يده وسألته :- متأكد ان ابوك قال انه يبيني بعد ؟؟

هز فيصل راسه اشارة نعم وقال :- ايه ..وايه نسيت ويقول لك ترى معاه عمي بو خالد

اكتفت ام طلال بانها قالت :- طيب انت روح وقول لابوك بعد خمس دقايق يجينا

طلع فيصل ركض وام طلال قامت بعده واستأذنت وطلعت من عندنا الى الصاله الخارجيه
كان واضح على وجهها الحيره ....
قلت في نفسي ((مسكينه ام طلال ما تدرين وش يبي منك زوجك ))



مـــــــــــــــــــــــــــــــــــاجــــــــــــــــــــــ ــــــــــد


استغربت لمن سمعت خويي يهلي ويرحب بتركي في الجوال ...غريبه تركي صار له مده مقاطع هالشله وناسيها ...معقوله عرف اني هنا ؟!! الظاهر اني لازم اغير مكاني في هاليومين لاني ما ابي اسمع لوم او ملامه من احد....الظاهر اني بسافر البحرين او دبي يومين منها اغير جو ومنها اهرب منهم ....
وانا في وسط افكاري قرب مني خويي وقال لي

:- تركي ولد عمك يسلم عليك ويقول لك افتح جوالك ترى فيه خبر يسوى مليون ريال

فتحت جوالي بسرعه اكيد حاول يتصل فيني عقب ما وصله المسج ولقاه مغلق وارسل لي هالمسج فتحته وانا متوقع اشوف فيه غضب وحسره وقهر لكن انصعقت لمن قريت المسج

((انت ما تركتها لانها لي من الاصل وعندك عشر دقايق بس علشان تحضر ملكتي عليها ...واسمع اول مبروك منك ))

معقوله يملك عليها وهو في جده ..ايه ليه لا ...ممكن يدبرها عن طريق اخوه او ما اعرف بس اللي اعرفه ان تركي ممكن يسويها ناظرت الساعه لقيت ان قدامي سبع دقايق من العشر اللي قال عليها ....واللحين وش اسوي معقوله اتهاون بكلام تركي واخليه يتهنى بها ....

وقفت وفي يدي مفاتيح السياره مستحيل انوله اللي في باله باخذها وبخليه يتحسر عليها وباكسره واكسرها باني اطلقها بالكثير عقب اسبوع....عجبتني الفكره يعني ما راح يقدر يهزمني لو كانت هذي خدعه منه علشان ما افضح بنت عمه الليله

طلعت من الاستراحه متجاهل اعتراضات الشباب واسألتهم وين رايح وش فيك وش صاير ؟؟
وركبت السياره وسقت بسرعه مجنونه علشان الحق على الملكه والاهم الحق اوصل قبل الرجال اللي ارسلته لابوي علشان يلغي الملكه قدام الكل لكن اول ما وصلت صعقت بالرجال طالع من المجلس نزلت من السياره وتركت بابها مفتوح ورحت ركض له مسكته من ثوبه وقلت له بانفعال شديد
:- وش سويت ؟؟

ناظرني بذهول ومسك يدي ينزلها من ثوبه وقال :- وصلت رسالتك

حسيت ان عقلي تجمد وما ني عارف شلون اتصرف الى ان قال :- الصراحه اول ما دخلت المجلس وشفت ابوك وابو العروس ما قدرت اوقف قدام الناس واقول ان ما جد يقول انه عايف البنت وما يبي هالزواجه ....لكن علشان اتمم الاتفاق همست بهالكلام في اذن ابوك

احس ان الحظ في صفي يعني بامكاني وبكل بساطه ادخل الان واملك عليها ولا كأن شي صار حطيت ايدي على كتفه وسألته :- والجماعه وصل لهم الخبر ولا لسى

هز راسه باشاره النفي وما انتظرته يتكلم وركضت لداخل المجلس وانصدمت بالي شفته

تركي متصدر المجلس جنب ابوي وخوالي بو خالد وبو طلال مو موجودين شلون جا وهو في جده ؟؟؟؟؟؟؟؟؟؟؟؟ تقدمت كم خطوه في اتجاهه وقبل ما وصل له مسكني خالد من كتفي وهمس في اذني بنبرة تهديد وتحذير واقرب ما تكون من لهجة الامر

:- تعال معاي برى بلا فضايح خاصه وان الناس كلها تناظرنا

عقلي مو مستوعب اللي يصير فقلت له :- بس انا العريس وهذي ملكتي شلو........

قاطعني خالد برود والسخريه واضحه في عينه :- والله اجل وش الكلام اللي قاله المرسال اللي ارسلته لابوك !!

بلعت ريقي وكذبت :- اي مرسال واي كلام؟؟!!!!! ...انا ما بعثت حد

ابتسم خالد بسخريه اكبر :- مسكين ومو انت اللي بعثت الرساله لتركي من جوالك

حسيت العرق يتفصد من جبيني ما حسبت حساب لذا الشي حاولت اشوف لي منفذ فقلت
:- كانت مزحه مجرد مزحه والله انا مستحيل اقصد هالشي ...وكنت ابي اسوي مقلب في تركي لانه ما يقدر يحضر ملكتي

رد علي خالد وهو يقرص عينه فيني وواضح انه مو مصدقني
:- ما اظن ان تركي بيحضر ملكتك ولو بالجبر ...واتمنى لو انك تحضر ملكته بس الصراحه خايف عليك من طلال و (وناظر جهة ابوي ) ابوك يذبحونك بعد الملكه فارجع مكان ما جيت احسن لك

حس خالد خاصه بعد ما شفت نظرات ابوي المشتعله عضب ونقمه علي اني وبكل طواعيه بطلع من المجلس فهمس في اذني قبل ما يرفع يده عن كتفي
:- لا تظن انك نجيت ...وتراني اول الناوين على تأديبك لكن الوضع خدمك الصراحه ما ابي اخرب فرحة اخوي واسوي فضيحه علشان واحد ما يسوى



((وداد))



شهقت وحطيت يدي على اثمي وتسابقت الدموع لعيني اول ما سمعت عن سالفة المرسال اللي بعثه النذل ماجد لابوه ....لكني ما حبيت ابكي وابين ضعفي قدام ابوي وعمي وحمدت ربي ان طلال واقف جنبي وماسك يدي بقوه ويده على ظهري يحسسني بانه جنبي وفي صفي وخطر في بالي سؤال وقبل ما اقوله سمعته من امي
:- طيب ليه جايين كلكم تخبرونا بهالخبر؟ يكفي طلال يخبرنا وانا اتصرف مع الحريم

ابتسم ابوي وقال :- لانه قبل ما يطلع المرسال سأل الشيخ ((وين العريس ؟؟))
وقبل ما نرد سمعنا صوت من باب المجلس يقول ((انا العريس، واسف على التأخير يا شيخ ))
قاطعت ابوي :- وانا مستحيل اوافق عليه عقب اللي سواه (وكملت بلهجه مليانه عتب ولوم ) جاي تسألني يبه اذا كنت اقبل بواحد لولا ستر رب العالمين كان فضحني قدام كل الناس وبمثل هالليله ...ما هقيتها منك يبا انا عندي الموت ارحم من اني اتزوجه

تكلم عمي بو خالد لاول مره من دخل :- مو اول تعرفين من العريس

استغربت كلمة عمي وناظرت طلال اطالبه بتفسير ...شد طلال على يدي وقال
:- اللي دخل علينا المجلس كان تركي (ابتسم طلال بشبه ضحكه وكمل ) كلنا انصعقنا اولا كيف هو هنا وحنا كلنا نعرف انه في جده وثانيا وش اللي جالس يقوله وهو يعرف ان ماجد هو العريس ...طبعا عمي كان ناوي يقوم له ويمسكه من ثوبه علشان هالموقف قدام الرجال لكن ابوي مسك عمي وقال
((وش هالكلام يا تركي وانت تعرف ان العريس ماجد و...))
لكن تركي قاطع ابوي وقال
(( بس انا ولد عمها واولى فيها ....وهذا انا اشهد كل الرياجيل اللي بالمجلس
ان ما كانت بنت عمي لي فما بتكون لغيري الا على جثتي ))
ساعتها عمي ثار وقف في وجه تركي وقال
((يعني تحير بنت عمك وانت داري انها مخطوبه لولد عمتك من زمان ))
لكن ابو ماجد وقف بين الاثنين وقال
((بس هذي سلوم العرب ودام ولد عمها حيرها فحنا ما نقدر نخطبها من غير ما يرخص لنا ...ها وش قلت يا تركي ))

لكن تركي رد ((لو كنت بارخصها لكم يا عمي ما كنت جيت وحيرتها ))
وطبعا الشواب اللي في المجلس اغلبهم اذا مو كلهم وقفوا في صف تركي واعتبروا ان اللي يسويه دفاع عن حقه لكن هذا ابوك وعمك قدامك جايينك يبون رايك ....(وهمس في اذني) الصراحه تركي ما يتعوض...

وقبل ما ارد قال ابوي :- وقبل ما اسمع ردك اللي بانفذه ولو على رقبتي ترى اعرفي ان اللي سواه تركي حفظ ما وجهي قدام كل الرجال خاصه عقب كلام ابو ماجد وغياب ولده ... وابو ماجد ما وقف في صف تركي الا بعد ما وصله المرسال (نزل ابوي راسه يبي يخفي دموع غزت عينه وتبي تفر منها ) يعز علي والله ازوجك لواحد مثل ماجد او حتى اجبرك على الزواج
من تركي ولو كنت اتمناه زوج لك

خلاص حسيت اني بابكي اصلا وش ممكن اقول غير اني موافقه فكرت في الكل اذا رفضت اولهم ابوي وموقفه قدام الناس ما يكفي ان تركي اكيد احرجه قدام الرجال وان كان في باطن الامر انقذه اقوم انا والغيه قدام الناس واخليهم يقولون ان ما له شور وكلمه على بنته ....وموقفي قدام عمتي وبنتها وابو ماجد والاهم ماجد اللي اكيد بيفسر رفضي له على اساس اني احبه او انه رغم انه ذلني وباعني الا اني شاريته او انه قدر يكسرني ...وتركي خاصه انه عارف بسالفة المرسال وحركة ماجد النذله
وش بيقول عني اني بلا كرامه ...مستحيل اخلي هالاحساس يوصل له لكن بعد لازم اعرفه بعد اني مو راميه حالي عليه وافهمه زين انه ما كسبني بجميل او طوقني بمعروف وانه كان ولا زال شخص غير مرغوب من طرفي وان الظروف هي اللي اجبرتني اوافق عليه علشان كذا قلت
:- ما عاش اللي يذلك او ينقص من قدرك يبه وحنا اللي نشورك مو انت اللي تشورنا ورايك يمشي علينا كلنا وما لنا الا نقول امرك يبه واللي تشوفه

ابتسم ابوي وقرب مني باس راسي وقال وهو يناظر امي :- عز الله انك عرفتي تربي يام طلال (رفع راسي بيده وقال لي) انتي روحي ومحد يبيع روحه.....انتي جوهره ثمينه وغير تركي ما أامنه عليها

بعد ابوي عني وقرب مني عمي باس راسي ومسح عليه بيده وقال
:- تراني في مقام ابوك الا ابوك ... ومع اني اعرف ان تركي يقدر الاشيا الثمينه وانك اثمن ما عرفت روحه ... لكن انتي غييييرولو خدشك في يوم بكلمه وزعلك ولو من غير قصد ترى قولي لي وانا اوعدك اني اادبه وما اخليه الى ان ترضين

ابتسمت لعمي والجمني الحيا وما عرفت وش اقول غير :- ربي يخليك تاج فوق روسنا يا عمي

طلع ابوي وعمي وشددت على يد طلال اللي همس لي لمن شاف وش كثر انا متمسكه فيه
:- مو وقته بعد الملكه ببارك لك ...والان لازم اروح لاني ناوي اكون شاهد على العقد

ما تركته وفهم طلال اني ابيه في شي نزل راسه لي وقال
:- امري وش بغيتين ؟؟

بلعت ريقي وقلت بهمس علشان امي ما تسمعني :- ضروري بعد الملكه اكلم ولد عمك تركي

ابتسم طلال :- ما له داعي لانه اكيد بيطلب كذا بنفسه ( عفست وجهي دلاله اني مو طايقه سيرته وطلال ما عجبه رد فعلي وحس باللي يدور في نفسي ) تركي هنا في الرياض من الصبح جا من جده بسيارة يعني طلع من جده في الليل.... ممكن يكون تفكيرك صح لو كان عارف بنيه ماجد من قبل او كان على صلح مع ماجد ...لكن انه ما يلقى حجز على الطائرة ويجي من جده في سياره فمعناه ان اللي افكر انا فيه صح (اتسعت ابتسامته ) الرجال كان ناوي على اللي سواه من غير ما يعرف باللي يخطط له ماجد ...الرجال عااااااااااااااااااااااااشق

وتركني وطلع وبعده امي قالت

:- عندي لك كلام بس مو وقته واصلا وقته فات....واللحين بروح ابلغ المعازيم عن خبر ملكتك على تركي والله يستر من عمتك ...

طلعت امي ودخلوا البنات والفضول كاسنهم يبون يعرفون وش يبوني فيه ابوي وعمي وانا احساسي غايب وعقلي مشغول بكلمة عاشق واحاول احطها سبب لكل تصرفات تركي في الفتره الاخيره واخرها الليله اشوفها ممكن تكون صح لكن اللي عرفته من ايام ثالثه متوسطه يقول انه مستحيل يكون شعور تركي تجاهي وان السبب ما يتعدى النخوه والمروه اذا ما كان الغرض منه انتقاااااااااااااااااااااااام او تسليه


هـــــــــــــــــــــــــــــاجــــــــــــــــــــــــر



اليوم الخميس ....اسوء يوم مر علي ...غريبه اني اوصفه باسوء يوم وهو المفروض يكون احسن واروع يوم خاصه انه اليوم اللي كنت احلم فيه بس هذا احساسي خاصه ان عليا مو جنبي لان اليوم يصادف ملكة اختها .......اوووووووووف والكريه ان خواتي كلهم حجزوا وحده تجيهم البيت ورفضوا يجون الصالون(المشغل ) بحجة عيالهم اللي تقول بنتها صغيره وما تقدر توديها مشغل خايفه من ريحة الاصباغ واللي تقول عيالها يفشلون من شطانتهم والفوضى الي يسوونها في كل مكان يروحونه ...وما صار نصيبي الا جواهر الخبله تكون ويياي طبعا
صدعت راسي بحنتها وسواليفها اللي ما لها معنى .....يزعم تسليني ....وفي كل سالفه وكل جمله تذكرني بحمد كأني ناسيتنه او اقدر انساه والقهر اني في العاده احس بطول الوقت لمن اقعد وياها ...وهذا اللي كنت اتمناه علشان تتأجل اللحظه اللي بشوف فيها حمد ...لكن العكس هو اللي صار ...واللي زاد الطين بله ان اول ما رجعت البيت لقيت انهم جايبين فلبينيه علشان تصورني انا وعريس الغفله بعد ما رفضت اني اروح استوديو عقب الملكه ...ولولا وجود خالتي كنت طردت المصوره ودست في بطون خواتي ومن القهر دخلت حجرتي وقفلت علي الباب وطبعا خواتي قروا عيوني اللي تقول ممنوع الاقتراب منطقه مليئه بالالغام فما قربوا مني لكن جواهر بكل ثقاله دم جت تتميلح عند باب غرفتي تقول

:- هجور حبيبتي بطلي الباب

رديت بدفاشه وقلت صبر :- ابي ارتاح شوي روحي قعدي عند البنات

ما استسلمت :- اصلا الكل يبي راحتش بس بطلي الباب خلي المصوره تشوف شغلها تاخذ لش كم صوره بروحش قبل ما يجي حمود

كنت بقول حمود بعينش وخذيها تصوره وفكينا منها لكني مسكت نفسي و قلت
:- بس انا ما ابي اصور لا بروحي ولا مع احد

قالت بثقاله دم :- ادري انش تستحين بس ما يصير لازم تصورين علشان الذكرى

اوفففففففففف متى بتفهم هالبنت اني ابيها تروح عني :- زين خلي الصور كلها مره وحده ما في داعي كل شوي اصور

ابدا ولا كأنها تسمعني وعلشان تجبرني ابطل الباب قالت
:- زين هجور بطلي الباب ترى انا واقفه في الصاله من غير عبايه واخاف سالم في اي لحظه يطلع من غرفته

كنت ناويه ارد بحده واقول دامش عارفه هالشي فارقيني وروحي للبنات تحت لكن بما اني اليوم عروس ولا زم اكون مؤدبه تقدمت من الباب فتحته ويا ريتني ما عطيتها مجال تدخل لانها اول ما دخلت دخلت المصوره وراها ...وابتدت جلسة التصوير واوامر الفلبينيه البايخه اللي كل شوي تقول بصوتها الحاد
:- one two three smail

طبعا مرت هالدقايق على خير الى ان جت اللحظة اللي طلبني فيها الشيخ علشان يسمع موافقتي وبعدها مرر لي الدفتر علشان اوقع على العقد ...كنت متوقعه احد الامرين اما اني اتصرف بلا مبالاه وغضب واوقع والا كأن شي صاير ...او اني ارتبك وارجف من التوتر والخوف مثل ما اقرا في القصص ...لكن ولا شي من هذا صار لاني وقعت واحاسيسي كلها متبلده وفكري مغيب لانه محصور في شي واحد............... حمد

حمد وش راح يسوي اول ما يشوفني صرت مثل المراهقات اترقب واتخيل رد فعله اول ما يشوفني الليله... وبعدها يرجع لي عقلي وافكر في الاهم وش راح يقول هالمره من كلام يسمني فيه واجهز الف رد وجمله علشان احرق اعصابه وابين له اني ند له ومستحيل يهزمني وانه ما فاز الا في جوله وانه اكيد بيخسر الحرب .....لكن اللي شغل بالي اكثر من اي شاي ثاني هو محاولتي لفهم شعوري الحقيقي في هاللحظه ومحاوله معرفه وش راح يكون شعوري اذا شفته

واتمنى اني اعرف وبكل بساطه هو ...حمد وش يحس فيه وش شعوره اللحين وبعدين
اتمنى اني هالمره انجح في قراءة عيونه والاسطر المخفيه بين جمله القادمه

ما اظن ان ركزت او حتى سمعت اي تعليق من البنات اللي اعرف ان القصد منها هو اثارت جنوني وانهم يشوفوني خجلانه ومنحرجه لكني ابدا ما كنت اسمعهم وكل ردودي على الناس الموجوده كانت اليه كلها

((الله يبارك في حياتكم ...وعقبالش ...تسلمين ....وغيرها وغيرها ))
طبعا البنات ما استسلموا بالذات جواهر اللي من شافت اني ما استجيب مع مزحاتها اللي اكيد مثل وجهها ...قررت انها تدخل معاي مجلس النساء وتحضر جلسة التصوير مع اخوها

كل هذا علشان يستمتعون بشوفتي وانا منحرجه لكن الله رد كيدهم في نحورهم وقف لهم سالم عظم في البلعوم لانه دخل حمد المجلس وما طلع الا بعد ما طردهم كلهم

وساعتها وقبل ما يقول حمد اي شي قالت المصوره بصوتها الحاد
:- سير اوقف جنب مدام (واشرت له يمسكني من خصري ) ايوه امسكها جذي ونزل راسك على كتفها (بعدها وجهت الاوامر لي ) يلا مدام خلي راسك على صدره وامسكي كتفه

طبعا اول ما لمسني حسيت بدفء جسمه على عكسي كنت احس اني قاعده في القطب المتجمد وبالذات اطرافي احسها ثلجت كنت ناويه اقول لهم يطفوا التكييف لكن لمسات حمد خلت النيران تتسرب لجسمي ........نيران خلت الدفء يغمرني لكن اعصابي ضلت مشدوده لقربه مني ولخوفي اكثر من اللحظات اللي راح نكون فيها بروحنا

وطبعا ما انتهت جلسة التعذيب اقصد التصوير الا بعد كم صوره هزتني ولعبت في مشاعري ورفعت درجة حرارتي من امثال ... sir kiss her وغمضي وقرب منها سير.... ومن هالحركات اللي كنت اشوفها في صور البنات ... كنت احاول طول الوقت اني ابعد تفكيري عن حمد واركز مع الكاميرا لكن هيهات كل ما تقرب مني او همس في اذني بكلمه تتخربط كل مشاعري وافقد السيطره عليها وتتشتت احاسيسي ....اخيرا خلصت الفلبينيه ثقيله الطينه شغلها استأذنت وطلعت عم السكون من بينا لثواني استغليتها علشان اعيد لملمت احاسيسي واسيطر على انفعالاتي الى ان تكلم حمد وهد كل جهدي بجمله وحده



علــــــــــــــــــــــــــــــــــيـــــــــــــــــــــــ ـــــاء



دخلت انا وسعاد والعنود ونجود على وداد نبي نعرف وش صار في اجتماع القمه اللي صار في غرفتها لكن البنت صدمتنا بجمله وحده وما علقت عليها كل اللي قالته وسكتت بعده ولا كأنها تسمع تساؤلاتنا هو
:-تركي خطبني ....وانا وافقت

اول سؤال خطر في بالي وهو الوحيد اللي ردت عليه وداد
:-شلون خطبش وماجد ؟؟؟والناس وليش اختار تركي هالوقت بالذات

ابتسمت ابتسامه جانبيه وقالت
:-تركي جا من جده خصيصا علشان يحيرني و............ماجد كان ناوي ينهي الخطبه اليوم

عم السكون في غرفتها بعد اللي قالته اضن ان الكل شاف ان الصمت افضل الى ان قربت سعاد منها حضنتها
:- الف الف مبروك ...الصراحه انا من زمان اتمنى انك تكونين لتركي

نجود سحبت سعاد بعيد عن وداد وهي تقول
:- بعدي عن حرم اخوي (ومالت على وداد تحضنها ) والله اخوي طلع رومانسي اجل يجي من جده بس علشان محد ياخذ اميرة احلامه (غمزت لوداد ) وانتي طلعتي منتي بهينه اجل ما تحبينه هااااااا وهذا تأثيرك عليه لو تحبينه وش كان بيصير فيه

ابتسمت وداد ورفعت راسها بغرور
:- شفتي رحمه باخوك انا ما احبه لاني لو كنت احبه كان من زمان انجن

ضحكت العنود على رد فعل نجود اللي عفست وجهها وكانت مستعده تدافع عن اخوها لكن العنود قاطعتها
:- اظن بسكم هذره على راسها وروحوا تحت ضبطوا الزفه اللي بتدخل فيها على الناس
(ولفت لوداد ) ما راح اقول انك مستحيل تلاقين احسن من تركي لانك بتكتشفين هالشي بنفسك
لكن بقول بكره بنشوف من بيجن على الثاني ....ترى من اللحين احذرك تركي لا يستهان به

وقربت العنود من وداد ضمتها وباركت لها وهي تقول
:- اكذب لو قلت اني مو فرحانه من اللي صار........ صحيح اني كنت اتمنى ان تركي يقوم بهالخطوه قبل لكن الاهم انه سواها قبل ما يفوت الوقت

بعدت العنود من حضن وداد وقربت مني
:- خليك جنب العروس وانا بنزل اشوف الوضع تحت ترى في توصيه ان العروس ما تتأخر عند الحريم

نزلت العنود وبقينا انا وداد في الغرفه بروحنا طبعا المفروض مني اني ابارك لها بدوري بس اللي شفته في عيونها خلاني اسألها
:- وداد ليش وافقتي على تركي ؟؟

رفعت وداد راسها وكأنها ما توقعت هالسؤال
:- لاني بكل بساطه ما اقدر ارفض اولا علشان ابوي وسمعته وموقفه قدام الرجال ...ثانيا لان تركي انقذني و للمره الثانيه كان البطل المنقذ وحنا نعرف انه اذا كان في احد يستحق وداد كجائزه على افعاله فهو تركي

طبعا مو هذا السبب اللي كنت ابي اسمعه غير ان عيونها تقول ان في سبب مو حابه تقوله
ما حبيت اضغط عليها لاني اتوقع انه بيجيها يوم وبتوقله

نزلت وداد على انغام زفتها ودخلت على الحريم اللي كانوا يتهامسون فيما بينهم وكل وحده لها رايها وتوقعاتها عن تصرف تركي وهم بين مؤيد ومعارض
اللي تقول
((والله البنت قطعه وتستاهل اللي سواه))
واللي تقول
((ولو ما توصل انه يخرب على ولد عمته ...هذي عمته زعلت وما اظنها ترضى بعد ما انكسر قلب ولدها ))
وثالثه تقول
((صحيح هي تستاهل بس يعني ما حليت في عينه الا اللحين وينه قبل ما يخطبها ولد عمته ؟؟))
وترد عليها الاولى
(( يقولون كان يدرس برى وما جا الا وهي مخطوبه ))
ردت عليها وحده ثانيه
((وليه ما حيرها قبل ؟؟؟ بدل ما يجي ليله الملكه ويسويها ))

طبعا حديثهم استمر وما سمعت بقايا الهمسات الجانبيه خاصه ان موبايلي كان يرن وكان المتصل طلال بعدت شوي عن الازعاج وكلمته
:- هلا هلا والله يا بعد قلبي

طلال :- بعد قلبي !! ترى انا طلال مو بعض الناس ...لكن مقبوله يا بعد حيي

في البدايه حسيت بالحرج وان وجهي ولع من الحيا لكن تغلبت على هالشي ورديت بنفس اسلوبه
:- بعد حيي!! ترى انا عليا مو بعض الناس ومو مقبوله ...المهم امر تدلل

ضحك طلال :- افااااااااا مو مقبوله صراحه زعلت وتراها من القلب ومحد مقصود غيرك

كنت برد عليه لكني سمعت احد يكلمه بعدها رجع كلمني وقال
:- المهم نأجل النقاش لبعدين واللحين العريس يقول يبي العروس عنده في المقلط على وجه الضروره

ابتسمت ورديت عليه :- من عيوني العروس لحظات وتكون هناك ....ولا تزعل
وعلشان ترضى بخليك تقول اللي تبيه لبعد حيك وجها لوجه

رد بشغف ولهفه
:- احلفي !!متى وين وكيف ؟؟؟؟




وللحظات الحرجه بقيه
في امان الله
مع اعذب وارق التحايا
اختكم ميما

السلام عليكم ورحمة الله وبركاته

و أخيييييييييييييييرا و بعد منزلة حزء له بقايا و كل شوي ترمين لنا بقايا الله يسامحك:(
بس مقبولة منك و راضيين عنك مو الجزء حلو من اولو لآخرروووووووووو و خصوصا موقف تركي طول ما انا اقراه و انا اسمع قلبي يدق لا يجي ماجد و يخربها .... بس ما وريتينا فشيلة سارونة المجنونة نبي نشوف ويهها قالب الوانه...

بس كله كوووووووووم و تعليقات هاجر كوم ههههههههههههههههه ضحكتني ما يطيح عليها دور العروس بالمرة و بصراحة عندها حق في بعض الأمور خصوصا في جلسة التصوير

تسلم الانامل على البارت الرائع في انتظار المزيد على أمل ألااااااااااااااااااااااااااايطول الانتظار هذه المرة