** البـارت الرابــع **


قدمت هدى كأس العصير و الحلويات المشكله
لزائرتها وسألتها بينما هي ترتشف شيئا من العصير...
- شخبار صحة الوالده يا منى؟
إلى الحين تعبانه..؟؟
- لا..الحمدلله هي الحين بخير...
كان عندها ارتفاع في نسبة السكر
وبعد الراحة و العلاج أنتظم و صارت أحسن....
بس أنا أخرت زيارتي لك لأن مو حلوه أزورك
و ما مر 3 أسابيع من زواجك

- لا..كان أخرتيها لما يمر على زواجي 3 شهور بعد
- خلاص بالزيارة الجايه إن شالله
- منى لا تصيرين أنت و أخوي
علي...

- ليش شمسوي أخوك..؟؟
- حضرته ما زارني من بعد أول يوم إلا بدعوة..
لا ويقول مرة ثانية لا تعبين نفسك و تخليني أجي غصب أنا ما راح أجي
إلا بعد ما يخلص شهر العسل...أللي أبغى أعرفه أنتوا
كيف تفكرون..؟؟....يعني تظنون
أن كل زوجين ما يفارقون بعض
طول شهر العسل...بعد لو أحنا مسافرين كان بتحمل
بس هو يطلع أحيانا أو يجي أحد يبارك له و أجلس بروحي
و ما في غير أنزل عند خالتي وهي دايم عندها ناس يباركون لها
بزواجنا و ولادة بنتها و ما أعرف أحد منهم...
أف..أنا زهقت ما تعودت أجلس بالبيت وما عندي شي أسويه
على الأقل أبغى أكلم أحد غير زوجي...

- هههههه هههههه..أنا فكرت أن أخوك كل يومين عندك
أو أحد من أهلكم يبارك لكم و أنك زهقانه من كثر ما عندك ضيوف
وبعدين أنا اتصلت أكثر من مره و كل يرد علي زوجك ويقول لي أنك
مشغوله...فعشان كذا اكتفيت بكم رساله..

هدى بينها وبين نفسها..
-<و أنا أقول شفيه كل ما سكر
سماعة التليفون يضحك إذا
صادفته...طلع يصرف كل
اللي يتصلون علي ويقول
شفتي ما في أحد يحبك كثري
ولا وحده من صديقاتك
أو زميلاتك جات أو اتصلت...
طيب يا ياسر..يعني يوم خلصت من حركات الطالبات
ما خلصت من حركاتك...طيب >

- شفيك تفكرين باقي شي ما قلتيه
- هه..أي... اعذريني يا منى
الظاهر أني من كثر ما أفكر بأخوي
لأنه صار لحاله....و خاصة
أنه قاهرني مو مهتم..... بدا
يأثر على نفسيتي
- ههههه وش تبينه يسوي يجي يعيش معكم هنا..؟؟
- يا ليت بس هو رافض...والحل
الوحيد لـ هالـ موضوع أنه يتزوج
- طيب زوجيه!!

- مو هني المشكله...حضرته مو راضي و ما أدري كيف أتصرف معاه قبل
كان رافض أتكلم معاه بالـ موضوع بس يوم ضغطت عليه
و قلت ما بتزوج إلا لما يخطب وعدني
أنه يفكر بعدها صار كل ما فتحت الموضوع يتهرب منه بأي طريقه
و لما انتقلت هنا أقنعني ياسر بأن الشي الوحيد اللي يخليه يوافق
الإحساس بالوحدة فعشان كذا أنا
تزوجت هالفتره ولا كان أجلته
ليما يخطب....

- طيب انتظري لما يمل من الوحدة
يعني المسالة يبيلها وقت وصبر
- بس أنا ما فيني صبر...ما أقدر أضحك و أكل و أرتاح وخوي
ما أدري عن حاله...صدقيني ما أقدر هـالشي مو بكيفي..
- هذا لأن ما في شي يشغل تفكيرك غير هو وزوجك
و هذا شــي عادي وبعدين كلها كم يوم و ترجعين للمدرسة و الطالبات

- يمكن...بس بعدني مقهوره
زوجي قال قدامه أن صديقه الغالي يبي يتزوج
ويبيني أدور له وهو ما صدق قالي هذ جاك اللي يبي
تكفين دوري له و فكيني..

- هههه..و أنت اشتغلت خطابه و أنامدري..
- لا..بس هذا صديق زوجي من سنين و ما عنده أحد يدور له
و هو يقول لي[ من غلاته و أخلاقه وطيبته وشهامته وكرمه
لو عندي أخت زوجتها له بدون تردد برغم أنه من السودان..]
- من السودان و أنت عندك معلومات
كافيه عنه عشان تعرفي من تناسبه

- أكيد..هو عمره [30]
يشتغل مع زوجي من سنين وراتبه
جدا ممتاز عشان كذا هو ما يفكر
يتركه...يا خذ إجازة مرتين بالسنة
يصرف على أمه و أخته وبنت عمه
اللي هي زوجته
- زوجته !!

- أي زوجته بس على ورق..وهذي
قصه طويله <<بعدين أقولها لكم>>
- و ليش يبقي سعوديه
- ما أدري..بس يمكن متعقد من
زواجه الأولي

- و ما طلب مواصفات معينه؟؟
- بعد مو سعودي وتبينه يتشرط
أصلا هو بنفسه قال أرمله أو مطلقه
..بس تتوقعين ألقى وحده توافق عليه
- إذا هو مثل ما قلتي أنا أوافق عليه
- ((( أنـتِ ))).؟؟

&&& &&& &&&

نزل طلال من غرفته مستعدا
للخروج وكانت أمه تكلم بالتليفون
و أخته جالسه وشكلها تنتظر أحد
- شفيك متوترة تنتظرين أحد يولد
- لا..أنتظر أحلام و مليت من الانتظار تدري بعد ما عندها جوال
- هههه زين ولا كان طفشتيها
المهم لا تنسين اللي وصيتك عليه


*** *** *** ***

جلست أحلام في غرفة وداد..
تأملت مساحة الغرفة و سعها وتناسق
ألوانها فرق كبير بين هالـ غرفة
و غرفتها كل شي فخم و مريح
برغم هذا ما تدري ليش ما تحس
بالراحة اللي تحسها بغرفتها
و انتبهت على صوت وداد...

- تفضلي جبت لك العصير بنفسي..
- مشكورة..
وبعد ما تكلموا في عدة مواضيع
فتحت وداد أحد الأدراج وطلعت منه
ألبوم صور تفرجت أحلام على كم صوره وعلقت عليها
و بعدها شافت صورة طلال فقالت وداد:

- صاحب هالصوره خطبك مني
شو رأيك؟؟
- وداد تتكلمين بجد..؟
- وجد الجد
- لا يكون أنتِ أقــ.....

- طلال دائما يا خذ قراراته بنفسه
وما في أحد يغير قراره بسهوله بس
يقدر يقنع أي شخص باللي يبقيه
و بعدين هو يعرف كل شي عنك
- و الوالدة تدري..؟
- بيقول لها بس يبي موافقتك أول..

- و أنا أقول دوري له وحده غيري
- ليـــــــش..؟؟..صدقيني هو اللي أختارك و فاجئني وقتها
وبعدين هو صار له ثلاث سنين بره يعني شايف الشقر و الخضر
عشان كذا يبقي وحده جمالها مو عادي و أنت
ما شاء الله عليك ما في مثلك
جمال ماله مثيل و أخلاق
وطيبة قلب ومن ناحية مرضك
هو سأل طبيبك و عرف كل شي يخص مرضك
و زي ما أنت شايفه خير أبوي كثير ويقدر يهتم بصحتك
و يعالجك بأفضل مستشفى...

أحلام بينها وبين نفسها..
- < هو أكيد تأثر بحالتي الصحية
و كسرت خاطره و بدافع الشفقة
و كوني جميله قال يكسب فيني
أجر و يتزوجني >..........
اشكريه نيابة عني وقولي له
لا يشغل تفكيره بمرضي
و أنا طول عمري أهتم بنفسي و أعتني بصحتي
و ما راح أكون عاجزه عنها في السنين الجايه.....
دوري له وحده غيري أنا ما أنفع لزواج
وهو يستاهل اللي أفضل مني على
الأقل تتمتع بصحة جيده...
والجمال بدون صحة نتحسر عليه
و ما نحس ذاك الوقت تجاهه
إلا بالشفقة...

&&& &&& &&&


س:تتوقعون إذا منى جديه بكلامها
أبوها يوافق..؟؟
وطـــلال و أحــــلام
س: طلال يستسلم ولا...؟
س: و أحلام تغير رأيها ولا...؟

أتمنى لكــم قرأه ممتعه
ولا تنســـــونـي من الدعاء
******************
***********
***
صمت

(( أدري تأخرت عليكــم بالبارت 4 بس صدقوني
معذوره لأن الأتصال بمنطقتنا فيه خلل وفي منتديات
ما تفتح معاي......والحمدلله أن ليلاس يفتح عندي...... ))