مشكوره يا قلبي على الرد
وخذى راحتك وانا راح اتابع معك وان شاء الله تكملين البارت الثامن
لكن اهم شي تكملينها لو تطولين مو مشكله

**((البــــــ 8 ــارت))**


في المساء خرجت أحلام من عملها وتوجهت إلى منزل منى
و اللي كانت تنتظرها بفارغ الصبر لأن أحلام ما تزورها بهالوقت إلا لشيء مهم....
ولما وصلت خبرتها باختصار باللي
صار معها فعلقت منى:

- أحلام لا تتهورين وترفضين كل ظروفه تناسبك وما أعتقد تحصلين
فرصه أفضل طلبتك فكري بالموضوع بجديه.
- مو عشان أفكر بجديه عندي كم سؤال والمشكلة أن ما في أحد عنده الجواب غيره
- طيب وين المشكله؟؟..هو كتب لك إذا عندك أي سؤال اتصلي..

- وتقولينها بكل سهوله اتصلي ما تحسينها صعبه علي
- وين الصعوبه فيه..أهم شيء أنت
لا تترددين ولا أقولك..

سحبت منى الورقه اللي مكتوب فيها الرقم
من يد أحلام و بخفه ضغطت أزرار جوالها
ومدته لأحلام وهي تقول:
- مو صعبه بس أنت لا تترددين ولا تعقدينها و إذا رد قولي آلو...يالله
1..2..3..4..5...مرت ثواني و أحلام
تسمع صوت طلال وهي ما قدرت تنطق بحرف ولما حست أن الجوال
بيطيح من يدها غفلت الخط ورمته على منى و اللي عيونها تدمع
من الضحك على حركة أحلام ولما طولت بالضحك قالت:

- لا تلوميني تخيلت أنه بيطلع لك من الجوال مو بيكلمك بس ههههه ههههه
- منى لا تصيرين سخيفه..أصلا هذي المشكلة اللي جيت عشانها..
أنا صعب علي أكلمه أو أكلم غيره تعرفيني أرتبك و أتلخبط...ما تعودت يا منى ما تعودت
- ههههه حلوه ذي ما تعودت خلاص تعودي يا شيخه ألا أقول أنت شبتسوين
إذا جا يشوفك

- لذاك الوقت يصير خير المهم أنا ما عندي غيرك و أنت أختي اللي ما جابتها أمي و
- أحلام بلا هالمقدمات وهاتي من الآخر
- أم أأأ ما في غير أنك تكلمينه على أنك أنا
- أنا!!..وش جاب صوتي لصوتك هالرقيق الناعم
- من هالناحيه اطمني هو غير أيام الطفوله
اللي ما أذكرها ما سمع صوتي وبعدين تعرفين ما عندي لا خوال ولا عمام
فما تعودت أكلم رجال غير الدكتور اللي يعالجني و غالبا الممرضه تعيد له كلامي
وغيره دائما يفكروني ما أتكلم
..... ..... ..... ..... ....... .............. ......... ......... .........

بعد 10 دقائق أكتبت أحلام الأسئله في ورقه وبعدها
اتصلت منى و حطت ع السبيكر ورد عليها..
= آلو
- السلام عليكم
= وعليكم السلام..من معاي..؟
- أنا..أنا أحلام

= هلا هلا بنت العمه..كيف الأحوال إن شالله كلكم بخير..؟
- الحمدلله بخير بس بغيت أسألك أم أأ..
بهاللحظة وقف طلال سيارته على جنب
حتى يركز معها ويسمعها بوضوح
= أي سؤال تبين أجاوب عليه سألي لا تترددين هذا زواج مو لعب

- أنت ليش تزوجت أجنبيه..أقصد ليش ما أتزوجت سعوديه مثلا..؟
= لأني قبل لا أسافر ما كنت أفكر بالزواج
بس هناك بعد فترة من الغربة وحياتهم المختلفه حسيت أني لازم أتزوج
حتى أحمي نفسي من طريق الحرام ووقتها
كان صعب أني أرجع والزواج هنا ما يصير بأسبوع
- طيب لي ما قلت لأهلك..؟

= لأني عارف أنهم بيعارضون وخاصة أمي ففكرت أني أفاجئهم لما أرجع
بس اللي صار إنا انفصلنا قبل لا أرجع..
- ولي ما تفكر تخبر أمك بوضعك عالأقل..؟؟
= أولا..لأني أعرفها..بتزعل مني و أقل شي ما تكلمني سنه ثانيا..
لأن و ضعي هذا خاص فيني وما في أحد من حقه يعرف فيه غير اللي بخطبها

- آخر سؤال ليش اخترتني و أنت عارف وضعــي الصحي..؟؟
= اللي قالته أختي وداد عن أخلاقك وصفاتك خلاني أختارك والأهم
لأن ظروفك تناسب ظروفي هذا يخليني أصر عليك خاصة
و أنا مستحيل أخذ وحده و أحرمها من الأمومه حتى لو هي راضيه...
أحلام وافقي و لش وعد مني ما تندمين.....
عندك يومين بعدها رسلي لي قرارك النهائي..يا موافقه أو لا..؟؟

أنهت منى الأتصال وبعد دقائق من الصمت سألت أحلام عن رأيها فأجابت:
- أنا مو معارضه لكن...
- رجعنا للكن اللي متعلقه في لسانك أخ
ما أقول إلا يالله أنك ترزقني وتوفقني
و تنسي بعض الناس كلمة لكن و مو موافقه
...... ......... ....... ......

في نفس الوقت كان طلال يفكر:
- معقوله هذي أحلام اللي كلمتني...بس وداد قالت
نسبة 1% إن أحلام ممكن تكلمني...يعني معقول تكون
و حده أستلمت الرسالة وتلعب علي...المشكله أن ما أميز صوتها و لا أعرفه...
بس وداد تعرفه...
أنا لازم أتأكد ولا ما راح أنام الليلة

***** ***** *****

جلس عمار على صوت المنبه و هو يحس بالآم خفيفه بأكتافه
توضأ ودلكه بدهان مسكن وطلع يصلى صلاة الفجر في المسجد
كعادته وقرأ قرآن ورجع الشقه فطر وجلس يرتب ولما صارت الساعه
الـ6 طلع بسيارته متوجه لبيت ياسر
ولما وصل أتصل فقالت هدى:

= أنا جاهزه بس ياسر يببدل ويفطر
- أجل أنزلي أنتظريه معاي في السيارة ولا
أمشي و أخليكم
= لا خلاص نازله
نزلت هدى وقربت من السيارة ولما شافت أخوها سرحان
مدت يدها وضربته على كتفه وهي تقول:

= السلام عليكم
- آخ..أنت ما بقيتي تمزحين معي إلا اليوم
= يا أخي رد السلام بالأول
- وعليكم السلام
ركبت هدى و سألته لما شافته يضغط بخفيف على كتفه ويده فيها خدوش
وحاط مخده وراء ظهره

= عمـــار شفيك..؟؟ متضارب مع أحد
- اللي فيني من زوجك المحترم
= زوجي..خبري فيه من أخذت سيارته ما طلع من الشقه
إلا إذا كان طلع عليك بالحلم و تضاربتوا فهذا شي ثاني
- يعني أنا أكذب عليك ها..خلاص شوفي من بيعلمك باللي صار
و زوجك ماراح يعترف على نفسه

= عمــــــــــار..
عمار يكلم نفسه<<أختي و أعرفك أي شي يخصني قلبك يعورك إذا ما عرفتيه>>
- ما بعلمك إلا إذا وعدتي تنفذين لي طلب صغير..
= وعد
- أمس و أنا في البحر مع الشباب أتصل ياسر يسأل عنا وقبل لا يسكر
الشباب سألوه إذا يوصي على شي فقال لهم طالبكم طلبه شيلوا عمار ورموه بالبحر...
عاد الشباب ما صدقوا المعرس طالبهم و شالوني أربعه و بغيت أفلت منهم ما قدرت
و الباقي ماتوا ضحك علي...ورجعت وما كان فيني شي بس من صحيت من النوم
حسيت بالألم عرفت الحين كيف من زوجك...عاد الحين
جا دورك تنفذين طلبي و اللي أعرفه أنك ما تخلفين و عودك..

بلعت هدى ريقها و سألت:
= و شالمطلوب مني
- ما تكلمينه ولا تردين عليه إلا الساعة 3 العصر
= بس
- لا بس و لا غيره أنت وعد تيني و سكتي
هذا شرف الأخ..

**** **** **** ****

س: عمــــــــار شناوي عليه..؟؟
س: هدى تنفذ طلب أخوها الغريب
ولا تخلف وعدها عشان زوجها..؟؟
س: طلال بيقول لأخته وداد عن الرسالة ولا لا...؟؟
س: منى و أحلام تتوقعون وحده منهم
تتزوج بالبارت الــ 9 أو لا..؟؟
تحياتــــي لكم و أنتظر توقعاتكم
**** **** ****

أنتظر أي تعليق....؟؟؟؟