كاتب الموضوع :
"ميسان"
المنتدى :
القصص المكتمله
الفصل الثاني والعشرين
جالسين مع بعض يلعبون الشطرنج بالحديقه ..
ريم : انتي اشك فيك غشاشه
دينا : ههههههههههه حراااام عليك وين غشاشه .. بس هذي لعبتي المفضله
ريم : ايه قلتي لي وانتي مستلمتني بالغش
دينا حركت حجر : كش ملك
ريم : لااااااااااااااا بذبحك
بهالوقت جا هشام : ايش تلعبون
ريم : شطرنج وهذي لاعبه فيني لعب
هشام : قومي بس قومي ماتعرفين لها
دينا : هههههههههه مابتقدر علي هذاني قلت لك
هشام : طيب نشوووووف
جلس هشام ورجعوا الاحجار الى اماكنها
دينا : انا ابيض
هشام : هههههههههه طيب اسود عادي شفيه .. بس ايش معنى تحبين الابيض
دينا : لانه لون صافي واتفائل فيه
ريم : يالله بس العبوا وانا بكون الحكم
هشام : ههههههههه ومافي الا انتي الحكم .. اعرفي للعبه اول وبعدين قولي تصيرين حكم علينا
دينا : يالله نلعب
ابتدوا اللعب ..
هشام يمررايده بشعره : افففف
دينا تكتفت : هههههههههه قلت لك محد يقدر علي بهاللعبه
هشام حرك حجر
دينا حطت عينها بعينه وهي تحرك الحجر : كش ملك
ريم : قلت لك هذي محد يقدر عليها
دينا : هههههههههه
هشام : انتي مين علمك على هاللعبه
دينا : ههههههههه عادي دايم انا والبابا نلعبها
هشام : مالي دخل لازم افوز عليك
دينا بثقه : وماااارااااااااح تقدر
هشام : ههههههههه طيب نشوف آخرتها
فجأه دينا نقزت ومسكت رقبتها : آآآي
هشام وريم استغربوا ..
ريم : ايش فيك دنو
دينا : مادري احس شي نغزني
هشام : ايش نغزك ؟
دينا تجمعت دموعها : مادري يحرق
هشام قرب منها : وريني
دينا : تحرق بقوه
شاف هشام بقعه حمرا : شكلها قرصة نامس
دينا : مااتوقع
هشام خلاص قوموا ندخل داخل
دخلوا البيت
ريم : انا بروح اجيب شي حطه عليه
هشام : جيبي معقم احسن
راحت ريم ..
وجلسوا دينا وهشام بالصاله ..
دينا : وربي تحرق مو كذا النامس
هشام جلس جنبها ومبعد شعرها عن رقبتها حتى يشوف القرصه : أي والله مو شكلها نامس
.
.
.
.
.
داخل البيت وهو يدندن ..
اليوم لازم يحاول يتقرب منها
ويشيل الكره اللي بداخلها من ناحيته
نزل من السياره ..
فتح الباب بهدوء
انتبه على دينا وكيف ان هشام قريب منها ووجه عند رقبتها
حس بأعصابه تثور ..
وهو يشوفهم بهالوضع
وانشدت اعصابه ..
كان وده يروح ويطلع حرته كلها بهشام ..
بس مسك اعصابه وطلع من البيت
رجع ركب السياره
ومشى بسرعه .. يحس بالقهر بداخله
هشام ودينا يحبون بعض وهو الدخيل عليهم
كيف كان يفكر بأنانيه انه يمتلك دينا واخوه متعلق قلبه فيها
لازم يطلقها ويخلي هشام يتزوجها !
*********
رجعت ريم وبيدها مرهم ومعقم ..
: هذاهم الاغراض
هشام : ايش فيك تأخرتي
ريم : ماتاخرت على بال ماجيبهم
هشام اخذ المعقم وقرب يده لرقبة دينا
دينا نقزت ووخرت : لا لا اخاف من المعقمات تحرق
هشام : دينا اثبتي لازم نعقمها ماندري ايش هالقرصه
ريم : هههههههههه دنو لاتصيرين نونو واثبتي
هشام : ريم امسكيها لاتتحرك
دينا : لا خلاص مابي
هشام : دينووه اثبتي محنا عارفين ايش هالقرصه لازم تتعقم
ريم مسكت دينا بقوه ..
وغمضت عيونها بقوه ماتبي تحس بالالم
هشام بعد عنها : خلصنا
دينا : جد ؟
هشام : ايه
دينا : يعني افتح
ريم : هههههههههه ايه فتحي
دينا : ماتعور واجد
هشام : ايه انتي مسويه فيها دلوعه حبتين
دينا : ههههههه شكرا
هشام : العفو ولو
دينا : يالله انا بروح انام
ريم : وانا بعد بروح انام
دينا : اوكي تصبحون على خير
هشام : وانتي من اهله
راحوا دينا وريم ..
وظل هشام بروحه يفكر بدينا
( خلاص انا مالي حق افكر فيها .. ولازم انساها وماشوفها الا كأخت لي )
*********
صار له ساعه بالسياره يدور بالشوارع ..
يحس بالقهر من داخله
لازم يطلعها من باله ويعطيها اخوه هشام
كيف مافكر فيه ولا عطاه أي اهميه
بس اللي قاهره اكثر شلون وهي على ذمته تسوي هالحركات مع هشام
يعني ماتنتظر لين مايتطلقوا وتسوي اللي يريحها
اخذ جواله ودق على طارق ..
طارق : هلا باسل زييييين افتكرت ودقيت علينا
باسل : هلا فيك .. انت وينك فيه الحين
طارق خاف من نبرة صوته : انا مع الشباب ليه صاير شي ؟
باسل : اقدر اشوفك الحين
طارق : باسل ايش فيك خوفتني
باسل تنرفز : يووووووووه خلااااص مابي اشوفك .. باي
قفل جواله ..
: انا مالي الا اروح البحرين ارحم لي
*********
بالصباح ..
دينا راحت للمدرسه بشكل طبيعي
جنان بين وقت والثاني تغمز لسديم ويضحكون
دينا مو فاهمه ايش سالفتهم : انتوا ايش عندكم تتغامزون وتضحكون .. ضحكوني معاكم
جنان كاتمه ضحكتها : الا قولي لي دنو شخبارك مع باسل ؟
دينا : ايش جيب سيرة باسل الحين
جنان : انتي جاوبين – وهي تغمز لها - مافي شي يمين ولا يسار ؟
دينا : جنااااااااانووووووووه وبعدين معاك
سديم : ههههههههه انتي جاوبيها عشان ترتاح
دينا : لا طبعا ولو فيه شي اكيد بقول لكم .. ليه يعني بخبي
جنان بخبث وهي تأشر على رقبتها بنفس مكان البقعه الحمرا اللي برقبة دينا : طيب هذي اجل ايش منه
دينا استغربت : ايش ؟
سديم : هههههههه جنو تستعبط علينا
جنان بخبث : دنوووووو مو علينا هالحركاااااات
دينا : لا جد انتوا مو صاحيين
سديم : دنو جنان تقصد البقعه الحمرا اللي على رقبتك
دينا : اهاااااااا قولي كذا من الصبح
جنان : ايه ههههههههههه يالله اعترفي
دينا : سلمكم الله البارح جالسه العب شطرنج مع ريم وهشام بالحديقه وقرصتني حشره
جنان وسديم : بس !
دينا : ههههههههههه ايه هذي كل الحكايه .. وانتوا يالسخيفات راح بالكم لبعيد
جنان : ماصدق
دينا : ههههههههه لاتصدقين
سديم : ههههههههه اما هالحشره مختاره لها مكان صح
جنان : يعني بتفهمني ماختارت الا هالمكان .. مو حشره هذي ابد
دينا : ههههههههههه والله هذا اللي صار .. وباسل اصلا له يومين بالبحرين ماشفته
جنان : طيب نعديها لك هالمره
دينا : هذا وانتوا خوياتي وظنيتوا فيني كذا .. شلون البنات الباقيات
سديم : هههههههه نفس تفكيرنا بيكون
دينا : ههههههههه والله منتوا صاحيين
***********
بالليل ..
جنان فتحت النت طفشانه
فتحت ايميلها
وشافت خالد شابك : حلو خليني استهبل عليه شوي
جنان : هاااااااااي
خالد : هاايااات
جنان : كيفك ؟
خالد : تمام .. وانتي كيفك ؟
جنان : تمام
خالد : واخبار المدرسه ؟
جنان : ماشيه تماااام وعال العال .. وانت كيفك مع الطب ؟
خالد : والله ممشيين فيه
جنان : ههههههه يعني بتصير دكتور
خالد : ههههههه يقولون
جنان : والله شكل عيادتك بتصير تشريح بدل ماتعالج المرضى
خالد : اقول انقلعي عني بس
جنان : ههههههههه وانا الصادقه شكلك مو وجه طب ابد
خالد : والله شكلك فاضيه وماعندك سالفه
جنان : ايه والله فاااااااضيه وابي اتسلى
خالد : اقول طيري عني مز فاضي لك
جنان : اطيير ! شلون اطير ماعندي جنحان
خالد : هههههههه خذي لك ريدبول بيعطيك جوانح
جنان : خخخخخخخخ سخيف
خالد : مو اسخف منك
جنان : اقول الا الصوره اللي انت حاطها هذي لك
خالد : وانتي ايش تشوفين
جنان : اشوف انك نصاب وحاط صورة مهند
خالد : مهند ! شعرفك فيه
جنان : مو هو خويك يالفالح .. وبعدين هو يعرف دينا
خالد : ايييه صح نسيت وبعدين ماني نصاب انا ماقلت لك هذي صورتي
جنان : اجل ليه عارضها
خالد : كيييييييفييييييي صورة خويي وانا حر انتي شتبين
دخلت ليان : جنوووو
جنان : نعم
ليان : جاااات الاغراض اللي وصيت عليها من باريس تعالي شوفيها
جنان بحماس : والله
ليان : ايييه يالله تعالي
جنان : طيب بس لحظه والحين بجي وراك
رجعت جنان للنت
جنان : ههههههههه انا اطلع من النت احسن لي منك
خالد : يكون احسن تسوين خير فيني
جنان : خليني بس اتفرغ لك وانا اوريك
خالد ( هه شعندها هذي مسويه فيها قويه ) : اقول روحي نامي بحضن ابوك احسن لك
جنان : انا اوريك .. باي
طلعت من الايميل
خالد : والله هذي مو صايحه بس انا لك ياجنان .. خليني اتفرغ لك واتسلى فيك واكسر راسك على هالغرور
***********
جالس بشقته ضايق خلقه ..
مو عارف ايش يسوي
يخاف لو طلقها تصير مشاكل ..
بس لازم يتفاهمون على كل شي
دق جرس شقته
قام وهو متكيسل يفتح الباب : طارق ! ايش جيبك
طارق : خوفتني عليك البارح وقلت لازم اليوم اجي واشوفك
باسل سكر الباب ورجع على الكنبه يتمدد : مافيني شي
طارق : باسل ايش فيك احكي لي .. افتح لي قلبك يمكن اقدر اساعدك
باسل : كاره نفسي ياطارق
طارق : طيب فهمني من ايش بالضبط ؟
باسل : دينا
طارق : ايش فيها دينا
باسل : لما بديت احس نفسي اني اتقبلها واميل لها اكتشفت انها تحب هشام
طارق : وانت ايش اللي خلاك تقول هالكلام وكيف اكتشفت هالشي
باسل اخذ نفس : شفتهم مع بعض البارح
طارق استغرب : كيف شفتهم يعني
باسل : مادري لاتسألني المهم هشام يحبها ولازم اطلق دينا عشان يتزوجها
طارق : انت كيف تفكر ياباسل ؟ .. شفت البنت ايش تقول استشرتها .. سألتها عن مشاعرها او شي من هالقبيل
باسل : لا
طارق : سألتها ان كانت تحب هشام ولا لا ؟
باسل : هم لا
طارق : طيب يمكن هي بدت تميل لك مثل ماانت بديت تميل لها
باسل : اقول لك شفتهم البارح .. تفهم يعني كيف شفتهم
طارق : الشوف غير السمع .. انا اقول تعوذ من ابليس وروح اجلس مع دينا وتكلموا على راحتكم وبعدها احكم ان كانت هي تميل لهشام ولا لا .. ساعتها لك الحق تطلقها ولا لا
باسل : ....
طارق بخبث : والله وطلع ولد خالي يحب وانا مدري
باسل : طارق ترا مالي خلق تريقتك
طارق : ههههههههههههههههه وانا الصادق
باسل : انا ماحبها للحين
طارق : ايه واضح ماتحبها وكل هالغيره من البارح
باسل : ترا مو رايق لك
طارق : طيب بخليك وبروح بس جيت اتطمن عليك .. وياليت انك تفكر عدل قبل ماتخطي أي خطوه
باسل : يصير خير
طلع طارق
وظل باسل يفكر بكلامه ..
بعد فتره اخذ مفاتيح سيارته وطلع
************
دينا جالسه مع ريم على التلفزيون ..
دخلت ام باسل
وجلست معاهم
دينا رفعت شعرها على فوق ضايقها شعرها..
وظلت تسولف مع ريم
ام باسل انتبهت على مكان القرصه اللي برقبة دينا ( هه غريبه باسل حن قلبه على دينا وورضوا ببعض .. انا لازم افهم كل شي من باسل )
بعد فتره
ريم تذكرت : ايه وكيف القرصه اليوم ؟
دينا : مسكت رقبتها .. تحرقني ساعات
ام باسل عقدت حواجبها : الحين هذي قرصه
دينا : ايه
ام باسل : قربي اشوف
دينا قربت من ام باسل ( ههههههههه والله شكلك حتى انتي فكرتي فيني نفس تفكير خوياتي )
ريم : ايه ماما امس بالحديقه انقرصت
ام باسل : ومن ايش هالقرصه
دينا : مادري
ام باسل بداخلها ( لما انبسطت انهم رضوا ببعض .. طلع تفكيري غلط ومجرد قرصه .. الله يهديكم لبعضكم )
دينا : طيب عن اذنكم انا بروح غرفتي
دخلت دينا الغرفه
ووقفت قدام المرايه ..
تدقق بالقرصه : هههههههه معقوله يعني كل من يشوفها يفكر فيها شي ثاني
وصل باسل الخبر ..
ودخل جناحه
شافها ببرائتها واقفه قدام المرايه
بالتنوره المبكره بالاحمر والقميص الابيض بدون اكمام
مستحيل اللي يشوفها يقول هذي تخون او ترتكب اخطاء قدام الجميع
دينا انتبهت عليه لفت وسندت نفسها على التسريحه : انت جيت
باسل دق قلبه يحس بمشاعر غريبه من ناحيتها مو عارف حقيقتها يرتبك بس يشوف عيونها او نظراتها او حتى يسمع صوتها الناعم : ايه توني واصل
سكتت دينا ماعرفت ايش تقول من نظراته وزادت دقات قلبها
باسل حس بأنجذاب من ناحيتها
قرب لها من غير مايحس..
رفع يده يمررها على شعرها
شاف خدودها كيف متورده
مرر يده بخفه على خدودها وكأنه خايف يشمخها
دينا حست بتوتر مو طبيعي دقات قلبها زادت اكثر من قبل
بعدت عينها تبعد التوتر عن نفسها ..
باسل لما قرب توصل يده لرقبتها انتبه على القرصه
تجمد لما شافها
حس بأعصابه تنشد
غمض عينه بقوه
وبعد يده
يبي يضبط اعصابه قبل مايتهور
دينا شافته كيف شاد على اعصابه
خافت منه وحاولت تبعد عنه بس مافي مجال ..
فتح عينه باسل وشاف القرصه يحس بالقهر ..
هو صار يحبها كيف يقدر يتخلا عنها
مسك دينا من كتوفها وقربها منه بقوه وتكلم من بين اسنانه : اذا تبين هشام تكلمي وقولي مو تسوين هالحركات من وراي وتستغفليني .. على الاقل احترميني انتي على ذمتي
دينا مو فاهمه شي ومنصدمه : انت ايش قاعد تقول وتخربط
باسل : اتوقع فاهمه انا ايش اقول .. اذا تحبي هشام فتكلمي وقولي لي
دينا : انت ايش تقول مو فاهمه عليك ؟
باسل تركها بقوه : لاتسوين نفسك بريئه ومو فاهمه شي .. ومايحتاج تنكرين امس انا شايفكم سوا وانتوا داخل البيت بالصاله .. واليوم تأكدت من اللي على رقبتك
دينا غرقة عيونها .. كيف يتهمها بهالطريقه ولا مع اخوه واللي هي تعتبره بمثابة اخوها : تتهمني بالخيانه ياباسل .. انت ايش تقول واي بقعه .. ان كان ضنك ان هذي – وهي تأشر على رقبتها -خيانه فهذي قرصه البارح انقرصتها لما كنت جالسه بالحديقه نلعب شطرنج انا وهشام وريم .. ولما شفتنا على حد قولك كان يطهرها لي .. واذا تبي تتأكد تقدر تسأل امك وريم وهشام كلهم يدرون عن الحكايه
دفته دينا ومشت عنه .. لما قربت من الدرج اللي بالجناح التفتت عليه : وايه على فكره هشام ان كان ظنك اني احبه .. فأنا اعتبره اخوي حاله من حال تركي
باسل انصدم من الكلام اللي سمعه ..
وظل واقف بمكانه فتره
حس نفسه غبي بتفكيره وتصرفه
كيف سمح لنفسه يظن فيها بهالطريقه ..
الحين مستحيل تسامحه على كلامه وشكه فيها
طلع من الغرفه بعصبيه ..
انتبه هشام على باسل : باسل ابيك بموضوع
باسل عطاه نظره وطلع من البيت
هشام : هذا ايش فيه هالفتره نفسه بخشمه
.
.
.
.
.
دينا نايمه على بطنها على السرير وتبكي بحرقه ..
كيف يسمح لنفسه يفكر فيها بهالطريقه
لما حست انها بدت تميل له يسمعها هالكلام الجارح
اخذت الجوال ودقت على جنان : الو جنو
جنان خافت اول ماسمعت صوتها : دينا ايش فيك
دينا : مقهوره ياجنو مقهوووووووووره
جنان : دينا تكلمي خوفتيني ايش صاير ؟
دينا : انا ياجنو يشك فيني .. انا اللي صاينه نفسي وماسمحت لحد بتعدا حدوده معاي يشك فيني
جنان : حبه حبه علي يادينا .. هدي وقولي لي مين اللي يشك فيك وليه ؟
دينا : باسل شك فيني
جنان : ليه ؟
دينا : شفتي القرصه
جنان : ايه
دينا بكت بحرقه : فكر فيها مثل تفكيركم .. وماشك فينا الا انا وهشام اللي اعتبره اخوي
جنان : وليه بالذات هشام ؟
دينا : لانه شافه البارح بطهر القرصه وشكله مانتبه .. انعمت عينه
جنان : دنو .. هدي مايستاهل تسوي بنفسك كل هذا
دينا : انا يشك فيني ياجناااان ومع مين مع اخوه
جنان : وربي مايستاهل دمعه من عينك
دينا : بس قهر ليه يشك فيني
جنان : مو انتي ماتبيه وتبين تطلقين .. خذي هذا سبب انكم تنفصلون
دينا : اتطلق !
جنان : ايه .. هذي فرصتك ترجعين لحياتك الطبيعيه
دينا سكتت تفكر بالكلام ..
جنان : انتي فكري زين وشوفي اللي صالح لك واللي تبين تسويه
***********
باليوم الثاني ..
سديم : وليه تطلق انتي مجنونه تخليها تفكر بهالتفكير
جنان : انتي اللي تقولين هالكلام
سديم : خليها هي بقرارها تاخذه .. بس اللي انا اشوفه هو يحبها
دينا : ايه يحبني ويشك فيني حلوه ذي
سديم : لو مايحبك او عالاقل بدا يميل لك ماكان غار لما شافكم وثارت اعصابه
جنان : أي رجل خليجي عنده حب الامتلاك .. حتى لو مايحبها
سديم : مو كلهم بس صدقيني انه يحبك يادينا والايام بتثبت لك .. انتي لاتستعجلين بقرارك هذا اهم شي
دينا : بس قهرني لما شك فيني
سديم : لانها ردة فعل من اللي شافه .. احنا خوياتك وافتركنا نفس الشي كيف وهو بمسمى زوجك الحين
دينا : صحيح
جنان : طالع هذي قلبت مخها
سديم : ههههههههههه انتي خليك برا مع بندورتك
جنان : فديييييييت بندورتي انا
دينا وسديم : ههههههههههههههه
دينا : والله تطوراااات صرنا نتفداهم بعد
جنان : ههههههههه انتي خليك مع باسل
دينا : بعد شكه فيني انا راح اوريه
جنان تحمست : ايش راح تسوين ؟
سديم : ههههههههههههه وهذي للشر ضد الرجال تقوم
جنان : هههههههه شسوي بعد .. بس يالله ماتبين مساعده
دينا : لا انا راح اعلمه مين دينا اللي يشك فيها .. واخليه يندم على اليوم اللي فكر انه يشك فيني
انتهى الدوام وقررت تروح بيت اهلها تجلس كم يوم فيه تريح اعصابها ..
دخلت البيت وشافت تركي
تركي : اووووووووه دينوووه منوره عندناااا
دينا : ايه بغثك كم يوم
تركي : هههههههههه قالت تغثني قالت .. روحي عني بس
تركها وراح غرفته ..
دينا : ههههههههه انا اوريك يالدوب
ام عمار : دينا انتي هنا
دينا : ايه ماما راح انام هنا كم يوم اشتقت لكم
ام عمار ضمتها : بعد عمري والله وحشتيني
دينا : وانتي اكثر .. طيب ماما انا بروح الغرفه ارتاح لي شوي
ام عمار : اوكي حبيبتي
راحت دينا غرفتها وكل خوفها انها تتقابل مع عمار ..
مالها خلق تتهاوش معاه
مر كم يوم وهم على نفس وضعهم ..
دينا ببيت اهلها ..
وباسل بالبحرين
يفكر باللي سواه وكيف انه ظلمها ..
يحس بمشاعر غريبه تجاها
مايبي يفقدها
بس مو عارف ايش يسوي
رجع بيتهم يبي يشوفها او يتسامح منها على كلامه
دخل الجناح ومالقى فيه احد ..
طلع وشاف ريم : وين دينا
ريم : راحت بيت عمي صار لها كم يوم
باسل : طيب ماقالت لك شي
ريم : مثل ايش ؟
باسل : ولا شي خلاص انا طالع
ريم : ههههههه وهو لحقت تجلس عشان تطلع
باسل : مالي خلقك الحين
طلع من البيت وراح بيت عمه مالك ..
دخل البيت وماشاف احد بالصاله
طلع لغرفة دينا على طول
طق الباب وسمع صوتها الناعم ..
دينا : ادخل ..
دخل باسل وهو متردد : مرحبا
دينا كانت على الكنبه التفت عليه وهي مستغربه ايش اللي جيبه
باسل : ممكن اجلس معاك شوي ؟
دينا حاولت تضبط نفسها وتبين انها زعلانه رغم المشاعر اللي بداخلها من ناحيته : اجلس
باسل جلس على الكنبه وهو يفرك جبينه مو عارف من وين يبتدي وايش تقول
دينا وجوده معاها بنفس المكان يربكها ضلت تناظره تنتظره يتكلم
باسل : انا مو عارف ايش اقول او من وين ابتدي .. داري انك زعلانه مني على الكلام اللي قلته لك
دينا : ياليت هي جايه على كذا الا انت متهمني بشرفي .. ومع مين مع اخوي
باسل اخذ نفس : دينا انا آسف .. جلست كم يوم افكر بالكلام اللي قلته .. حسيت نفسي حقير وغبي على هالتفكير .. بس من القهر لما شفتكم مع بعض
دينا : طيب تأكد اول وبعدين احكم مو تقول كلام انت مو عارف صحته
باسل قرب منها ومسك يدها وحط عينه بعينها : دينا انا آسف واي شي تطلبيه راح اسويه .. دينا أنا .. انا ..
دينا ناظرت بعينه تنتظره يكمل كلامه : انت ايش
باسل ظل يناظر ببحر عيونها .. هالبنت فيها سحر كيف سحرته بهالفتره البسيطه : انا احـ ..
دخل تركي فجأه : دنوووووووووووووووووووو
انصدم بس شاف باسل مع دينا وكيف جالس مع دينا جنبها
تركي حك راسه : اوه انت هنا
وراه جت تركض جنان : سربرااااااااااايـ .. –سكتت ماعرفت ايش تقول – ههههه شالسالفه
دينا وباسل يناظروا جنان وتركي ومو فاهمين شي
تركي : هههه جنو كأن مكانا غلط
جنان مسكت يده : هههههههه تعال تعال بس معاي
طلعوا تركي وجنان وهم يضحكون
دينا رجعت ناظرت باسل : انت ايش ؟
باسل مرر يده بشعره : دينا سامحيني على الكلام اللي قلت لك اياه .. واي شي تطلبيه راح انفذه
دينا : تنفذ أي شي ؟
باسل : ايه أي شي
دينا سكتت فتره .. وبلعت ريقها : خلاص طلقني
باسل جته صدمه : ايش!
دينا وقلبها يدق من الكلام اللي قالته ونار اشتعلت بداخلها : اللي سمعته
باسل ظل فتره حاط عينه بعينها
مو مستوعب كلامها
كيف يطلقها بعد ماتعلق فيها
كيف يقدر يتخلا عن ابتسامتها .. ضحكتها .. برائة نظراتها
انوثتها .. طريقة كلامها .. نعومة صوتها
اكيد صار شي بعقلها
: انتي اكيد تمزحين
دينا مو عارفه كيف جاتها الشجاعه انها تطلب هالطلب بعدت عينها عن عينه : ماامزح .. انا مااقدر اعيش مع انسان يشك فيني
باسل : دينا الموضوع نقدر نصلحه بس مو بالطلاق
دينا : انت قلت تنفذ طلبي .. وهذا هو طلبي انا
باسل الصدمه شلته مو عارف دينا كيف تفكر وقف بيطلع وهو قريب من الباب : دينا انا طلاق ماني مطلق .. بخليك كم يوم تفكري فيها عدل – كمل بألم – واذا تأكدتي انك ماتبيني انا حاظر اطلقك
طلع من الغرفه ودينا رمت نفسها على السرير تبكي .. كيف قدرت تطلب منه مثل هالطلب
تحبه وماتقدر تطلق منه
بس تبي ترد كرامتها اللي انجرحت بشكه فيها ..
.
.
.
.
.
جنان وتركي جالسين بالصاله ..
تركي مو فاهم شي
وشك ان بين دينا وباسل خلاف
شافوا باسل طلع من الغرفه وهو معصب
جنان وتركي ناظروا بعض مستغربين ..
جنان : انا بروح لدينا
تركي : اوكي وانا بشوف باسل
دخلت جنان على دينا ..
وشافتها حاطه وجها على المخده وتبكي
خافت ان صاير شي كبير بينهم
: دنوووو ايش فيك تبكين
دينا : تركييييني بروحي مو ناقصه شي انا
جنان : لا مو تاركتك الا بعد ماتقولين لي ايش اللي صاير بعد بينك وبين باسل
دينا رفعت راسها وسندت ظهرها بواجهة السرير .. ومسحت دموعها بيدها : طلبت من الطلاق
جنان مو مستوعبه : طيب مو هذا اللي انتي تبيه
دينا دموعها نزلت وهزت راسها بالنفي
جنان : دنو مو فاااهمه عليك .. ايش السالفه
دينا ثنت رجلها وضمتها لصدرها ونزلت راسها تبكي : احبه .. تفهمون كيف يعني احبه
جنان : ههههههه تحبيه وتطلبين منه الطلاق .. ايش هالعقل اللي عليك
دينا : ماااادري ياجنو لاتسأليني
جنان : طيب هو ايش ردة فعله ؟
دينا : مادري .. بس ماقدر استغني عنه تعودت عليه بحياتي .. تعودت على مزاجيته وعصبيته وعلى كل شي فيه .. ابيه ياجنو
جنان : دامك تبيه ليه طلبتي الطلاق اجل .. منتي بصاحيه
دينا : ماااااادري ..
جنان : انا صحيح قلت لك اطلبي الطلاق بس فكرتك تكرهيه مثل اول
دينا : خلاص تركيني بروحي
جنان : الحين انتي ارتاحي وبعدين نتكلم
.
.
.
.
.
تركي لحق باسل : باسل ايش فيك
باسل : مافيني شي بس اتركني بحالي
تركي : ايش صاير بينكم
باسل : مو صاير شي خلاص اتركني بحالي
تركي : انا مو فاهم ايش سالفتكم .. تراها اختي ياباسل
باسل وهو يفتح باب سيارته : اففففففف داري انها اختك .. وهي عندك روح اسألها
دخل سيارته وتحرك بسرعه
مو فاهم هي كيف تفكر وكيف ممكن تطلب منه هالطلب
مو قادر يتخيل انها بتبعد عنه ويشوفها مع الايام مع واحد غيره وتحبه
ضرب الدركسون بقهر : غبي .. غبي انا كيف حكمت عليهم وفكرت بهالتفكير من قبل مااتأكد
الحين وصلت لطلاق
والله يستر من الجاي
مو هامه اهله وجده ولا احد اهم شي هي
بس لو كانت جد قرارها ماتبيه لازم ينفذه لها
مايقدر يجبرها تعيش معاه وهي ماتبيه
بس كان يشوف بعينها مشاعرها اللي تخبيهم ..
عيونها فاضحتها
معقوله كان يتوهم ..
*********
جالسه بشقتها وطفشانه ..
مو عارفه ايش تسوي
ماسكه الرموت وتغير القنوات من الملل
رن جوالها ورفعته بملل : هلا
هيفاء : هلا فيك .. يالله بسررررررررررررررعه البسي وطلعي لنا احنا عند الباب
سديم مو مستوعبه شي : انتي ومين ؟
هيفاء : ههههههههههههه انا والاغبياء الثلاثه
سديم : هههههههههه ايش عندك
هيفاء : كاسرين خاطري .. كل مااكلم واحد فيكم يقول طفشان .. قلت اعزمكم قبل مااطلع
مشعل سحب منها الجوال : ايه نستفيد منها قبل ماتتزوج وتشرد
هيفاء ضربته : اقول ترا اخليك تنزل الحين
مشعل : ايه مين بيوصلكم غيري .. اللي معاك ماعندهم رخص
هيفاء : الله والرخصه المؤقته اللي مطلعها
سديم : ههههههههه لاتتهاوشون الحين بطلع
هيفاء : يالله جهزي نفسك بسرعه
سديم : اوووكي
انهت المكالمه وراحت بسرعه تتجهز ..
طلعت لهم وركبت السياره : هااااي
مشعل : ايش هاي قولي السلام عليكم .. مرحبا .. أي شي غصب تعلمينا انك تعرفين انجليزي
سديم : ههههههههه مالت عليك .. الا اقول هيوف مالقيتي سواق غير هذا
مشعل : سواق بعينك انتي الثانيه .. ترا نرجع
الكل : لاااااااااااااااا
مشعل بغرور : خلاص اجل طيعوني
هيفاء : اففففففف منك
سديم : عادي رجعنا عندي سواقي نقدر نروح فيه من دونك
رامي لف عليها من الكرسي اللي جنب مشعل : ههههههههههه كفك والله جبتيها
هيفاء : ايه والله .. ههههههههه خلاص ميشو رجعنا وبلا منتك سواق سدوم يوصلنا
مشعل : لا محد بيوصلكم غيري
ثامر : ههههههههههه خايف على بطنه
سديم : ايه مو هو همه بطنه .. الله يعين اللي بتاخذه
مشعل حط ايده على قلبه : آآآآه متى تجي بس
هيفاء طقته : وجع ان شاء الله .. استحي على الاقل .. وبعدين بعدك بزر
ثامر : ههههههه مشعل لحد يتكلم معاه بموضوع الزواج يغمى عليه
سديم : ههههههههه ميشو اقول خلك عن الزواج بس
مشعل : الا انتي خليك بعيده
وصلوا المطعم ونزلوا ..
مشعل بعد ماجلس : اقول هيوف عسى دوم تعزمينا على هيك حركات
هيفاء : لاتنبسط واجد هذا بس لان زواجي قرب
رامي : يابخلك
هيفاء : اذا بخيله لاتطلب
ثامر : ههههههههههه لا انا بالنسبه لي انتي كريمه
سديم : انتوا للمصالح شاطرين
رامي : ايه ايش تبين اكثر
مشعل : عاد انتي متزوجه كنز وماشفنا شي للحين
سديم : اقول ميشو اذا ماتسكت بكسر راسك
ثامر : ههههههه مشعل انت اليوم من كل الجهات
مشعل : ايه والله ثنتينهم متفقين علي
بعد ماخلصوا العشا ..
سديم قامت : الحمد لله
هيفاء : انتظريني بروح معاك
مشعل : على وين
هيفاء التفتت عليه : مالك شغل
سديم وهي واقفه انتبهت على واحد عاطيها ظهره
ارتبكت ودقات قلبها زادت
هيفاء وقفت جنبها مستغربه : سدوم شفيك
سديم : شكل فارس هنا
هيفاء تتلفت : وينه
سديم : لاتتلفتين كثير فضحتينا
هيفاء : وينه ماشوفه
سديم : هذاك اللي عاطينا ظهره
هيفاء : ايه والله شكله هو
الشاب وقف ولف
سديم وهيفاء مشوا بسرعه
وماتوا من الضحك ..
واقفين مفهيين وبالاخير ماطلع هو
*************
صار لها كم يوم ضايق خلقها ..
هامله نفسها ومو مهتمه لشي..
لون بشرتها شاحب من كثر التفكير
كيف تهورت وطلبت منه هالطلب
طول الوقت سرحانه وتفكر
سديم : دنو الى متى هالحال
دينا : أي حال
سديم : اللي انتي فيه .. لمتى بتظلي كذا
دينا بسرعه نزلت دموعها : مدري حاسه نفسي غبيه
جنان : انتي مو معروف لك الحين تحبيه وتطلبين الطلاق ليه مدري
دينا : جنو تكفين عاد لاتزودينها علي
سديم : دنو اذا تحبيه وماتقدرين تستغنين عنه ارجعي لبيت عمك وهو بيفهمها انك ماتبين الطلاق
جنان : ايه دنو اذا تبيه ماعليك من شي وارجعي
دينا : رايكم كذا يعني
سديم وجنان : ايه
دينا : بس ايش اقول له ؟
جنان : مايحتاج تقولي له شي .. مجرد وجودك بالبيت راح يفهمها
دينا : مادري والله
جنان : بصفقك ترا
دينا : خلاص بيطلق خليه يطلق .. ماعاد يهمني شي
سديم : دنو ايش فيك
دينا : مابي اعيش مع واحد يشك فيني .. حتى لو اموت فيه واحبه
سديم : وانتي ؟
دينا : هوه مايحبني ولو يحبني ماكان شك بلحظه فيني
سديم : كم مره نعيد ونزيد
جنان : خلاص خليها بكيفها وتاخذ قرارها بروحها
***********
عمار مختفي عن بيتهم كم يوم ..
ادمانه للمخدرات مدمره
يحاول مايخلي اهله يحسوا انه فيه شي
دخل البيت بالعصر
شاف دينا ..
راح يطلع حرته فيها : انتي على وين لابسه عبايتك وطالعه ؟
دينا : خير ايش تبي ؟
عمار : اقول على وين لابسه وطالعه
دينا تكتفت : شكلك نسيت اني متزوجه وعندي بيت
عمار : اذا زوجك مو بحولك .. مايصير نخليك تروحين وتجين على كيفك
دينا : انت مالك دخل ويالله ابعد بروح للماما
عمار : ههههه روحي لامك .. روحه بلا رده
طلعت دينا وهي ضايق خلقها
ركبت السياره : خلاص امشي
.
/
.
/
.
/
.
|
06-09-08, 12:47 PM
جديد مواضيع قسم القصص المكتمله
العرض العادي
