مرت الايام بشكل سريع ..

البيت انزحم بأهل فارس ..

حب يبين لها كيف قدرها كبير عنده وخلا كل اهله يجوها حتى يخطبوها من عند ابوها ويملكوا ..


تناظرهم بنص عين وتميل على جنب وتهمس بالكلام ..

مو عاجبها الوضع ومو داخلين لها من زور ..

طلعت برا الصاله اللي فيها الحريم حتى تاخذ راحتها بالكلام ومسكتها من يدها : بصراحه سديم غلطانه لما وافقت عليهم

ام سديم عقدت حواجبها : ليه

حصه عمة سديم : يعني الحين من بعد العز والدلال اللي هي كانت فيه تاخذ هذا .. وغير كذا مافكرت بولدها ايش راح يصير فيه .. بصراحه هذي انانيه فكرت بنفسها ومافكرت بولدها

مر من عندهم حتى ياخذ اغراض من عند امه ..

سمع الكلام وحس انه دمه يغلي لما شاف امه ماردت عليها ..

تكلم وهو حاط عينه بعينها : العز والدلال ياعمتي ماتجي بس بالفلوس .. تجي بالراحه النفسيه بعد .. وبعدين فارس ايش ناقصه .. دكتور كامل والكامل الله .. واي بنت تتمناه يعني مابتفرق عند سديم .. لانها بتعيش بنفس الحاله بما انه دكتور وبعدين هي ادرا بمصلحة نفسها ومصلحة ولدها وتقدر تقرر بنفسها

ناظرته حصه بحقد وماقدرت ترد عليه بحرف واحد ..

لفت عنه ورجعت للحريم وهي تتحلطم ..

ام سديم لفت عليه وتكلمت بعصبيه : ثامر .. ليه كلمت عمتك بهالطريقه

ثامر : قهرتيني يمه .. جالسه تتكلم ونافشه ريشها .. على ايش وبعدين عماتي كلهم حقودات ولا يبون الخير لسديم .. من زمان وانا اسمع كلامهم وشوفي نظراتهم كيف .. لازم يوقفوا عند حدهم

ام سديم : بس مهما كان هذول عماتك

ثامر وهو ياخذ الصينيه من امه : فكيني يمه اي عمات واللي يرحم والديك .. اصلا المفروض مايجون اذا هم نفسهم خايسه كذا


:


جالسه بفستانها الفيروزي بالصاله العلويه وهي تطقطق بأصابعها بتوتر ..

خايفه لو تكون تسرعت بقرارها ..

وظلمت فيصل معاها ..

نفضت راسها من هالافكار ..

خلاص مابتسوي لها شي الحين وافقت والرجال تحت ..

لفت على جنان : الحين انتي من جدك جايه الفجر وبتروحين الصبح ؟

جنان تهز راسها بحماس : ايه كل شي لعيون سدوم نجي ونروح بنفس الوقت

هيفاء : بس مو تعب عـ ...

قاطع كلامهم رغد وهي جايه تركض لهم : يقووووووول ثااااااامر .. تغطووووووووا

هيفاء : وليه يتغطوا ؟

رغد رفعت كتوفها ونزلت

هيفاء وهي توقف : لا حول الله انا محد يعطيني احترام ولا كأني خالتهم

سديم : ههههههههههه ايه خاله بالاسم

هيفاء مشت عنهم وراحت تشوف ثامر ..

وقفت على اول الدرج وانتبهت لثامر واثنين وراه شاقين الحلق ..

هيفاء : خييييييير

مشعل وهو يأشر على الدفتر وهو يضحك ..

هيفاء انتبهت للدفتر اللي بيده ..

شهقت واتسعت ابتسامتها : بنااااات البسوا عبيكم – حركت حواجبها لسديم – اجا الدفتر

رجعت لفت عليهم : لحظه رامبو و مشاعل .. ايش تبون ؟

مشعل : مشاعل بعينك.. بس نبي نحظر اللحظه التاريخيه

ثامر وهو يركب الدرج ويضحك : هههههههه ماعليك منهم يبون بس يرفعون ضغطك

دق قلب سديم بقوه اول مانطقت خالتها هيفاء الدفتر ..

لبسوا جنان ودينا عباياتهم ودخل ثامر وهو مبتسم ..

شافت سديم الدفتر وزادت رجفة قلبها ..

بلعت ريقها الناشف وهي تتذكر الماضي ..

فتح ثامر الدفتر ومسكت القلم ..

قرت الاسامي واصابعها ترتجف ..


(( ماسكها من شعرها بنهاية راسها ..

دموعها تنزل من الالم والقهر بنفس الوقت ..

تحاول تفك نفسها وماهي قادره ..

الكل يترجاه انه يخف عليها وهو ولا كأنه يسمع ..

بالعكس كل ماترجوه زاد بالشد والضرب ..

تكلم من بين اسنانه : قلت لك وقعي

ناظرت بالدفتر وبكت اكثر : ماراح اوقـ ...

ماقدرت تكمل كلمتها بسبب حرارة الصفعه اللي حصلتها ..

صرخ وهو شادها : قلت لك وقعي لاتخليني اجلدك

ام سديم وهي تبكي وتحاول تسحبها من عنده : خلاص ارحمها بتموت بين يدينك

لف على ام سديم وعيونه حمرا من العصبيه : انتي وخري لايجيك مثل ماجا لبنتك

ام سديم بلعت ريقها وبعدت .. طول عمرها تخاف منه ..

سديم وهي تشهق بالبكي : والله حرام عليك اللي تسويه فينا

ابو سديم وهو يضربها : وقعي وانتي ساكته فاااااهمه .. بتتزوجيه يعني تتزوجيه والاسبوع الجاي تروحين بيته فاهمه

بكت سديم بحرقه اكثر ..

شدها اكثر وهو ماسك يدها اللي فيها القلم : وقعي قبل ماتنجلدين ..

شدت على القلم وهي ترجف وضغطت عليه وهي توقع ..

اول ماخلصت التوقيع رماها بقوه وهو ياخذ الدفتر من غير مايناظرها ..

بكت بحرقه من اللي صار لها وهي على الارض ومتكومه على نفسها ..

قربت منها امها تضمها وهي تبكي ..

دفتها عنها : وخرررررررري عننننني

قامت من مكانها وركضت لغرفتها وهي تبكي قفلت الباب على نفسها ..

ورمت نفسها على السرير ..

شلون تتزوج وهي توها مخلصه المتوسط ..

توها امس تلعب وتركض مع بنات الجيران ..

واليوم تتزوج ..

كيف تتحمل كل هذا .. ))


: هيه تتصورين مع لدفتر ؟

انتبهت على نفسها من طقت هيفاء وصوتها

ثامر ناظر هيفاء : شوي شوي على اختي

هيفاء : وانا شقلت .. هي معلقه عينها على هالدفتر تقول بتتصور معاه

ثامر : لو يصير لها شي جهزي قبرك

هيفاء : ليه ؟

ثامر : ايه عشان يجيك نمر بن عدوان ويذبحك لو تشمخيها شمخ واحد .. ترا مو ناقصين سوالف فارس

: ههههههههههههه

ثامر ناظر سديم : يالله وقعي

سديم شدت على القلم وبلعت ريقها ..

قلبها يدق بقوه وهي تقرا اسمه ..

وقعت بأصابع مرتجفه ..

حست نفسها مخنوقه وسط التبريكات وتشجيع البنات ..

ضمها ثامر بقوه : الف مبروك .. الله يوفقك يختي

شدته هيفاء من ثوبه : يالله انقلع شبعه هي .. خلينا نسلم عليها

ثامر ناظرها وهو يعدل ثوبه وشماغه : دفشه .. الله يعين زوجك عليك

اشرت له هيفاء بيدها وماردت له خبر ..



:


المجلس امتلا بالتبريكات ..

جلس جنبه مشعل وهو يضرب رجله برجل فارس ويقرصه ..

ناظره فارس وهو مستغرب : ايش فيك ؟

مشعل وهو يناظر الكل ومبتسم ولا كأنه يسوي شي ..

تكلم من غير مايحرك شفايفه : ابي اتزوج

فارس وهو يبعد عنه شوي : طيب انا شدخلني عورتني

مشعل يقرب منه : ياخي عشان انعدي منك .. محط عاطيني وجه

فارس ضحك عليه ..

يعرفه طول عمره هذي طريقته بالكلام : ههههههههه

قرب ثامر منه : مشعل قوم تبيك امك .. فضحتنا

مشعل قام بسرعه : ايه يمكن لقت لنا عروس

ثامر : طول مابتحن محد بيعطيك وجه

فارس ضحك عليهم ..

جلس جنب ابوه وقلبه يرجف من الفرحه ..

اخيرا أخذ اللي سرقت منه قلبه ..

حاس ان وده يطير بالسما من فركته ..

ميل نفسه جهة ابوه وهمس : ابي اشوفها

ابو فارس وهو مبسوط لولده ..

وبنفس الوقت اخير كسر خشم ابو سديم : حقك

لف على ابو سديم وهو يحط يده على فخذ فارس : الشيخ فارس يبي يشوف زوجته

ابو سديم تغير وجهه من القهر : بكرا

فارس : لا ياعمي انا ابي اشوفها الحين

ابو سديم سكت ثواني وتكلم من دون نفس : طيب .. ثامر .. روح شوف له طريق

طلع ثامر وهو مبسوط لاخته ..

شاف قدامه هيفاء : هيوف

هيفاء لفت عليه : هيوف بعينك .. انا خالتك

ثامر : تخلخلة ضلوع العدو

هيفاء : اخلص ايش تبي ؟

ثامر وهو يناظر عماته يطلعون من البيت : وين رايحين عماتي ؟

هيفاء بدون نفس : عماتك مالهم داعي .. جالسين ويتوشوشون

ثامر : زين طلعوا من نفسهم .. المهم خبري امي ان فارس يبي يشوف سديم

جنان سمعت صوت ثامر لبست عباتها بسرعه ولفت شيلتها : ثامر

ثامر لف عليها : هلا جنيه

جنان : وانت متى بتحترم اللي اكبر منك

هيفاء : هذا عمره مابيتعلم انه يحترم احد .. اذا انا خالته ومايحترمني تبيه يحترمك انتي

ثامر : عشان خطبة سديم بحترمكم اليوم بس

هيفاء تكش على وجهه ..

ثامر : المهم جهزوا لفارس حتى يدخل

ثامر لف حتى يمشي

جنان : لحظه .. انا جايبه معاي سي دي .. شرايكم نشغله لهم

هيفاء : ايه وانا بعد مجهزه

ثامر رجع لف عليهم : مجهزين عدتكم

هيفاء : ايه عماتك وطلعوا واهله بيطلعوا بعد خلونا نسوي جو رومنسي لهم

جنان : خلينا نشغل لهم غرام اطفال

ثامر صفق يدينه ببعض : لااااا انتوا ناويين تسيحوهم علينا

هيفاء : عادي نخليهم بغرفه ثانيه عشان يسيحون عدل

جنان : لاااا انا ابي اشوفهم

هيفاء : ايه والله هذي راحت عن بالي

ثامر ناظرهم : والله انكم ملاقيف

هيفاء وهي تدفه : انت مالك شغل واطلع منها

ثامر وهو يمشي عنهم ويبوس يده وجه وقفا : مجانين الله يكملكم بعقلكم

راح ثامر ودخلوا هيفاء وجنان وهم يخططوا ايش يسووا لهم

قربت دينا من عند سديم وهي تغمز لها : جهزي نفسك .. حبيب القلب يبي يشوفك

لفت عليها سديم وقلبها دق : ايش ؟

دينا رفعت كتوفها ومشيت عنها وهي تضحك ..

ناظرتها سديم وهي متلخبطه وكأن حد كب عليها مويه بارده ..

ظلوا بالصاله خوات فارس وامه وامها وصاحباتها ..

ابتدا ميوزك وسمعت الكلمات وضرب قلبها اكثر وهي تشوفه داخل ..




غـرام أطفال جمعـنا وكـنا بشعور كبار..
وفـا قلبي مثـل ماتوفي العشاق أو أكثر


أحب بجد ما ألعب مثل منهم في سني صغار ..
ولا أذكر قلبي لو مره معاها كذب وقصر



.
.
.

ابتسم وهو يشوفها ومانزل عينه منها ..

وقفت وقلبها يرجف مع رجفة اطرافها..

بلعت ريقها وهي تشوفه يقرب منها ..

وقف قدامها وهو كل نبضه بقلبه وكل نقطه دم تجري بعروقه تنطق بأسمها ..

مسك يدينها البارده المرتجفه وهو عينه عليها ..

حط يده على راسها وباسها على جبينها ..

ورجع عينه بعينها : مبروك حياتي

سديم تكلمت ونبرة صوتها مخنوقه : الله يبارك بحياتك



.
.
.



في ذاك الوقت ما أكتب ولكن أحفظ لشعار ..
عشان اعجابها فيني يزيـد ويصبح الأكبر


حفظت لخالد الفيصل قصيدة يا غريب الدار ..
وديوان البدر كلـه عشان أتعلم وأبحـر



.
.
.



ابتسم فارس لما سمع هالمقطع ..

تذكر كيف كان يكتب اشعار خالد الفيصل قبل ماتتزوج سديم ويرسلها لها برسايل ..

تذكر طفولتهم سوا وكيف كان حبهم عذري وطفولي ..

وكل اللي كان بينهم رسائل بريئه واشعار ..

حتى ماكان بتكلم معاها وجها لوجه ..




.
.
.




بنيت لحـبها قصـر ٍ عظيم وعالي الأسوار..
ولا فكرته بيوم ٍ على ذا الحـب يدمـر


غرام ٍ كنت له شاري وبـاع بآخر المشوار ..
أنا عقـب الغدر هـذا أنا وشلون ماتأثر


بكيت بيـوم فرقاها تقـل بين الحنايا نـار ..
وكني فاقـد الدنـيا ولاني قـادر أتصبر


أبتأسف أنـا لقلبي عسـى يتقبل الأعـذار ..
لأني صدق ذليتـه وعذري حيـل متأخر



.
.
.



طول هالوقت ومو لاقيين كلام يقولوه ..

همس لها : واخيرا قدرت اخذك

ناظرته وهي تحس ان دموعها بدت تتجمع بعينها ..

حاولت قد ماتقدر انها تمسكهم ..

حاسه بقربه منها ان روحها رجعت لها ..

دارت بعيونها عنه وابتسمت ..



واقفه بنهاية الصاله وهي تناظرهم ..

ضحكت دينا : اللي يشوفهم مسويين كناري الحب

جنان : اقول هيفاء شوفي ايش بسوي

هيفاء : ايش بتسوين ؟

جنان : المهم ترددين معاي

هيفاء :ايه عادي انا معاك بأي شي

هتفت جنان وعيونها بعيون سديم وبأبتسامة خبث وهي تصفق : حبها ولك حبها ولا تخاف من امها

رددوا البنات معاها : حبها ولك حبها ولاتخاف من امها


لفت سديم وناظرتهم وهي منحرجه وودها تكفخهم ..

فارس انتبه عليها ..

وتذكر هي اللي كان بيضربها ..

تلاشت ابتسامته وهو يناظرها ..

عطاها نظره ورجع لف على سديم ..

سديم كان ودها تضحك على اللي صار " والله تستاهلين ياجنو على لقافتك " ..

جنان حطت يدها على قلبها : يمه ايش فيه هذا

هيفاء ماتت ضحك وهي تطلع : احسن احرجك

جنان وهي تطلع وراها : مالت عليك انتي الثانيه .. اكيد تذكرني فحقد علي

هيفاء : بأيش ؟

جنان : هههههههههه ماعليك ولا شي



:


دخل بعد ماطلعوا الكل وهو معصب ..

نزل شماغه ورماه على الكنبه ..

يحس ان راس نزل للأرض وهو مجبور على هالزواجه ..

تذكر انه ماطلع من البيت ..

لف عليها بسرعه : وين بنتك

ام سديم بأرتباك : مع فارس

ابو سديم بعصبيه وهو يصرخ عيها : ايه ويينهم ؟

ام سديم خافت منه : ليه ؟

ابو سديم من بين اسنانه : انتي جاوبي ومالك دخل

ام سديم حست بمصيبه جايه بالطريق ..

اشرت له على الغرفه اللي هم فيها : هناك بهذيك الغرفه

مشى ابو سديم للغرفه وفتحها بسرعه ..

ناظر ساعته ورجع رفع راسه : ماشاء لله .. وانت للحين هنا

فارس ناظره ببرود وهو حاط عينه بعين ابو سديم وشد على الكلمه الاخيره : ايه نسيت نفسي مع زوجتي

ابو سديم ودمه يغلي : لما تتزوجها .. هذيك الساعه تصير زوجتك

فارس : بس رسميا هي زوجتي واقدر آخذها من الحين لو ابي .. بس لان قدر سديم كبير عندي ومستحيل آخذها بهالطريقه هذي .. بس عشان قدرها ماينزل

ابو سديم ومنقهر منه ووده يقطعه بأسنانه : ترا اليوم وافقت انك تشوفها بس عشان كنا عند الرجال .. لكن لاتحلم انك تشوفها مره ثانيه قبل زواجكم

سديم انصدمت من كلامه : بس يبـ ..

فارس شد على يدها يسكتها والابتسامه شاقه وجهه وهو يناظر ابوها : بس كذا .. ابشر ياعمي .. على امرك

ناظره ابو سديم واعصابه انشدت ..

مو فاهم كيف هالانسان ..

تركه ومشى عنه ..

سديم لفت عليه بسرعه : كيف سكت له ؟

فارس وهو يضحك : ههههههه وليه اشد معاه بالكلام واحنا فتره قصيره وبنتزوج ولا بعد بنروح كندا .. يعني مابيدري عن هوا دارنا .. وبعدين الحين لو طلعتي السوق مثلا مع امك او ثامر واتفقت معاكم اني اشوفك .. بيدري ابوك ؟ طبعا مابيدري

ابتسمت سديم على تفكيره ..

فارس : المهم ان انا اخذتك ومحد راح يقدر ياخذك مني

سديم ضحكت بخجل ..

انطق الباب ودخل ثامر وهو يضحك : اذا ناوي يجيك بالرشاش اجلس

سديم بسرعه : لا

ثامر وهو يغمز له ويضحك : روح روح .. ماتشوفها بعض الناس خايفه عليك

فارس : وانت شدخلك .. صدق بزر

ثامر : لو سمحت صرنا بالجامعه وسنه ثانيه بعد

فارس : طيب درينا

ثامر : يالله طيب .. ترا وقتك خلص .. انتهت الزياره

سلم فارس على سديم واشر لها ان بينهم اتصال ..

مشى ناحية الباب ولف على ثامر : يالله قدامي .. جالسين بسجن احنا .. قال انتهت الزياره قال

ثامر : هههههههه مو عاجبك روح ناقشه

فارس : لا خلاص عاجبني .. يالله باي

ثامر : هههههههه باي


طلع فارس من البيت ودخلت سديم غرفتها وهي تتنهد ..

واخيرا اخذت اللي تحبه ..

حاسه نفسها بحلم مو بعلم ..

تدعي ربها ان امورهم تتيسر وتمشي حياتها بدون مشاكل ..

رمت نفسها على السرير وهي تاخذ نفس ..

هذا فارس احلامها اللي طول عمرها تتمناه ..

كانت بتعض اصابعها ندم لو رفضته ..

رن جوالها وقامت بسرعه له ..

رفعت الجوال وتلكلمت بهدوء : هلا

فارس بهمس : هلا بهالصوت

سديم حمرة خدودها من نبرة صوته : هلا فيك

فارس : انا حاس ان كل اللي صار حلم مو علم

سديم : ليه ؟

فارس ابتسم : كذا بين يوم وليله ينقلب كل شي – تنهد – وبعدين ايش هالاغنيه اللي كنتوا حطينها

سديم ابتسمت : تدري كل مااسمعها احس ان احنا المقصودين

فارس : هههههههههه نفس الشعور

سكت ثواني وبعدين تكلم بهدوء ..: تدرين انا وين واقف ؟

سديم : وين ؟

فارس : قدام الدريشه

سديم : من جدك ؟

فارس : ايه .. ويالله قومي قدام الدريشه .. خلينا نسترجع ذكرياتنا

سديم ضحكت : هههههه مجنون

فارس : ايه محد جنني وطير عقلي غيرك

سديم وقفت وتوجهت ناحية الدريشه ..

بعدت بيدينها الستاره وشافته واقف ويناظرها ..

ابتسمت له بأحراج ..

رفع يده فارس وحطها على القزاز وهو يتأمل سديم ..

رفعت سديم يدها ولمست القزاز البارد بسبب برودة التكييف ..

اقشعر جسمها من البروده ..

ناظروا بعض فتره من غير ماينطق واحد منهم حرف ..

تنهد وهو يشوفها ويتذكر الماضي ..

تكلم بهدوء اقرب من الهمس : ايام ياسديم .. تذكرين كيف كنا نوقف قدام الدريشه لثواني وانتي تخافي وتسكريها

سديم ابتسمت وهي تتذكر وهزت راسها بالايجاب ..

فارس بنفس الهدوء : من بعد ماصرت اراسلك بالرسايل .. ماصرت اشوفك الا نادر

سديم تذكرت الرسايل وضحكت : رسايلك كلها محتفظه فيهم للحين

فارس وهو يضحك ويتذكرهم : هههههههه عاد كلهم اشعار مسروقه

سديم لفت وسندت ظهرها على الدريشه : ههههههه مسروقه ولا منك .. مايهمني اهم شي خطك فيها

فارس : تعالي وين لفيتي

سديم لفت عليه : ايش ؟

فارس : مو كفايه ابوك ماخلاني اتهنى بجلستي معاك

سديم : ههههههههههه انت حاقد عليه

فارس : مو مره لان احمد ربي على هالدريشه الموجوده على الاقل محد كشفها للحين

سديم : ايوه وانتبه من الدريشه لايصيدها .. تلاقيها بكرا مقفله

فارس : الحين عادي خليه يكشفها .. انتي صرتي عندي ولو صار شي آخذك خطيفه





*****************

بدت ترتيبات سديم للسفر وزواجها ..

ناظرت بالاغراض اللي اخذتهم على ايامها مع راشد ولا استعملتهم ..

معظمهم جدد بس تبي تبعدهم عنها ..

كارهه كل شي فيهم واي شي له صله بالماضي ..

دخل ثامر الغرفه وهو يناظر زحمة الاغراض القديمه مع الاغراض اللي توها شاريتهم للزواج

تكلم بأستغراب وعينه على الاكياس : انا مستغرب .. الحين تاركه اغراضك اللي بالماركات العالميه .. ومو ماخذه الا ماركات عاديه

سديم ناظرته ببرود : طيب !

ثامر فتح الشنطه وهو يطلع منها الاغراض : بربري .. قوتشي .. دلوشي قابانا ..- رفع راسه – وهذا غير المستخبي .. وتقولين لي طيب وببرود

سديم وهي تسحب من يده الاغراض وتدخلهم الشنطه : اولا مالك شغل بهلاغراض .. وثانيا انا فكرت اتصدق فيهم .. وثالثا والاهم .. صحيح ان هالشغلات اغلى وافخم من اللي اخذتهم .. بس الحين انا ببدا حياه جديده ولازم انسى الماضي من دلع وخدم وحشم وماركات .. لازم ارجع لسديم العاديه البسيطه اللي كانت قبل 6 سنين .. وانسى الطبقه اللي عشت فيها طول هالمده

ثامر ابتسم لها : طيب انتي تغيرتي .. وفيصل تقدرين تغيريه ؟

سديم اخذت نفس وهي تجلس على السرير ..

ناظرت فيصل اللي جاس ويلعب بألعابه : بحاول قد مااقدر اني اعلمه على القناعه .. مابيه يصير مثل اهل ابوه او جده اللي هو ابوي ويغتر بالفلوس اللي عنده ..

حست بغصه بس حاولت تمسك نفسها قد ماتقدر : مابيه يبين انه اعلى من اخوانه لو صار بيني وبين فارس عيال

ثامر وهو يحاول يغير من الموضوع : بس تدرين سدوم ترا انا اولى بهالاغراض

ناظرته وهي معقده حواجبها : كيف ؟

ثامر : الحين تقولين بتتصدقين فيهم عطيني اياهم انا اولا فيهم

سديم ناظرته وهي مو قادره تفهم : ايش بتسوي فيهم ؟

ثامر : ابد .. على الاقل اسوي بسطه قدام ديزل او أي محل ونحط تخفيضات

سديم قامت وراه تضربه وهو يضحك ..

دخل ايمن وبيده اكياس ..

ناظرته سديم بالاكياس اللي بيده : ايش هذا ؟

ايمن وهو يرفع كتوفه : مدري بس هذا لك

ثامر وهو يصفق بيدينه : احنا ماخلصنا من الاغراض اللي عندها تجيبون اكياس زياده بعد

سديم توها بتفتح فمهما تتكلم رن جوالها ..

اخذته ورفعته بسرعه : هلا دنو

دينا : وصلتك الاغراض ؟

سديم بأستغراب : انتي اللي جايبتهم ؟

دينا : ايه .. كنت في السوق وشفت هالشغلات عجبتني فاشتريتها لك

سديم : تسلمين لي والله

سمعة صوت رنه ..

بعدت الجوال عن اذنها تشوف الشاشه ورجعت قربته بسرعه : دنو اكلمك بعدين جاني خط

دينا بخبث : ايوا يااعم اكيد الحلو هو اللي داق

سديم : ههههههههههه دنو ترا مو رايقه لسوالفك يالله باي وثااااانكس على الاغراض

قفلت من عند دينا وردت بسرعه .. : هلا والله

: هلا بهالصوت وراعيته

سديم : هههههه

فارس : شلونك ؟

سديم : لوني مثل لونك

فارس : هههههههه اجل زين .. طيب حبيبتي ابشرك واخييييرا قدرت احجز القاعه

سديم عقدت حواجبها وماهي فاهمه عن ايش يتكلم : أي قاعه ؟

فارس : القاعه اللي بيصير فيها زواجنا

سديم : فارس مو انا قلت لك مابي حفله

فارس بهدوء وهو عارف معارضتها عن الحفله من قبل : هالكلام مفروغ منه .. انا قلت لازم اسوي لك فرح يعني لازم

سديم : اوف منك عنيد

فارس : انتي اللي عليك تتعدلين وتلبسين فستانك وتجين .. باقي الترتيبات والحجوزات انا اللي اسويها

سديم : فارس افهمني .. انا مابي اطلع قدام الناس ايش بتقول عني وانا مطلـ ..

فارس قاطعها وتكلم بجديه : سديم انا كم مره قلت لك ماتجيبين طاري هالموضوع ابد .. تدرين ان انتي عندي ولا كأن هالشي صار .. وبعدين انا مالي دخل بالناس .. اللي تقوله خليها تقوله .. انا اللي علي من نفسي واني اسوي لك كل شي

سديم : بس ..

فارس قاطعها : مافي بس .. خلاص انا قلت كلمتي

سديم بلعت ريقها : طيب

بعد ماقفل الخط نزل الجوال ودق على الارقام بسرعه : هلا خالتي .. كيفك ؟

ام سديم : بخير الحمد لله .. انت كيفك ؟

فارس : الحمد لله .. خالتي اذا ماعليك امر .. اذا انتي حول سديم وخري عنها

ام سديم استغربت : لا ماهي حولي .. آمر

فارس : مايآمر عليك عدو .. بس كنت ابي منك انك تخبين عن سديم ترتيبات الزواج

ام سديم براحه : ايه وانا اقول كذا بعد

فارس : وحتى بطاقات الدعوه لاتخلوها تشوفها

ام سديم ضحكت عليه : هههههه طيب ليه كل هذا

فارس : ياخاله انا عارفها زين .. بكل شي بتعارض عليه .. اقول لها يمين تقول شمال .. وانا مابي اقصر معاها

ام سديم : لا ماعليك قصور والله يهنيكم مع بعض

فارس : آميين





***************




بالليل ..

فتح الباب الخارجي من بعد ماتطمن ان الكل نايمين ..

اشر له يدخل بسرعه ..

نزعوا جزمهم ومشوا على اطراف اصابعهم ..

دخلوا البيت وكأنهم حراميه ..

مشى بهدوء حتى يتأكد مافي احد مار او طالع من غرفته ..

مد يده وسحبه وراه ..

وصلوا للغرفه المقصوده ..

طق الباب وماردت عليه ..

فتحه بهدوء ..


الغرفه مظلمه ومافي الا نور شاشة الابتوب عاكسه على وجهها ..

متربعه على السرير ببجامتها ..

بدي ابيض برسومات باللون التركواز والوردي والان مخربطه ..

مع برمودا تركواز لو وست ..

اللابتوب بحضنها والسماعات على اذنها ..

وخصل من شعرها نازله على وجهها ..

: سديم

نزلت السماعات عن اذنها من غير ماتلتفت له : نعم

ثامر وهو واقف عند الباب : سدوم

سديم وعينها بالشاشه مندمجه وتتكلم بهدوء : اششش .. اسكت فيصل يادوب نايم

ثامر بصوت واطي وبأبتسامة خبث وهو يسحبه من يده : انا جايب لك شي

سديم تأففت وهي ترفع راسها : اففف .. ايـ ..

جمدت بمكانها وهي تناظره ..

ماستوعبت اللي قدامها ..

حتى الكلام ضاع من لسانها ..

ضحكوا على شكلها وصدمتها وهي جالسه بمكانها ..

استوعبت شكلها انها جالسه بالبجامه والغرفه محيوسه من الاغراض ..

اشرت لهم بيدها ل شعوريا : اطلعوا برا

فارس وهو ميت من الضحك عليها : ههههههههههه ايش فيك سدوم

سديم : قلت لكم اطلعوا برا

ثامر وبـأبتسامة شماته : سدوم .. هذا فارس ماعرفتيه .. ايش فيك

سديم : احلف عاد

فارس بهدوء : خلاص لاتفضحونا ويجي ابوكم ويذبحنا كلنا

سديم غطت وجها بيدها : لا لا لا .. ماتشوفني وانا بهالشكل

ثامر : ماهو شافك وشبع شوف بعد

فارس قرب منها وجلس جنبها ..

مسك يدها ينزلهم من على وجها : انتي قمر بكل الاحوال

سديم وهي تهز راسها : لا جاي وحوستي حوسه ..والغرفه مو مرتبه

ثامر : فارس ماعليك من هالاغراض .. بس سديم تبي تفتح لها محل تبيع فيها هالاغراض

سديم ناظرته بعصبيه : ثااااامر

فارس ناظر ثامر : ثامر .. يالله عطنا قفاك .. ولاتعصبها

ثامر وهو يهدده : طيييييب .. انا اوريكم .. صحيح دخلتك انا .. بس دور لك حد يطلعك

فارس : مستغنيين عن خدماتك .. تراني ادل طريقي

ثامر : طيب دبر لك حد يدخلك البيت مره ثانيه – رفع يدينه – ياااااااااارب يصيدكم ابوي حتى يذبحكم

فارس وهو يضحك عليه : هههههههه طيب بس اهم شي تهوينا

طلع ثامر ..

وقفت سديم تشيل بعض الاغراض وهي منحرجه ..

فارس قام وراها ومسكها : سديم شتسوين

سديم بأحراج : احاول اعدل هالحوسه

فارس وهو يسحبها ويجلسها جنبه : خليها عنك بس .. عارف العفسه اللي انتي فيها لترتيب اغراضك واغراض فيصل

سديم ابتسمت بأحراج منه : و انت ماجيت الا فجأه .. حتى تشوفني بهالشكل وبهالحوسه وانا بعدني مارتبت الشنط

فارس : ياحلوك وانتي بهالشكل .. وبعدين تونا بس انا وثامر متفقين وهربني

سديم وهي تضحك عليه : ههههههه حراميه

فارس وهو يقرص خدها : عشانك اصير حرامي ونصاب وكل شي

سديم وهي تضحك : هههههه لا بسم اللـ ...

سكتت اول ماسمعت صوت حركه قريب من الغرفه ..

فارس لف عليها : فيه حد برا ؟

سديم رفعت كتوفها : مادري .. لحظه اشوف

طلعت سديم من الغرفه حتى تطمن من الوضع ..

تحرك فيصل وهو على السرير وفتح عينه شوي ..

ماشاف سديم موجوده وبدا يتنفس بسرعه قبل مايبكي ..

فارس لف عليه لما حس بحركته ..

عرف ان ورا حركته هذي بيبكي ..

قرب منه حتى يهديه قبل مايبكي ..

ناظره فيصل واستغرب منه مو متعود عليه وبدا يبكي ..

حاول ياخذه فارس بس ماقدر وهو يحاول يبعد نفسه عنه ..

التفت فارس وشاف غلايه مويه كانت سديم حاطتها بغرفتها عشان لو فيصل صحى بالليل ماتحتاج تنزل للمطبخ ..

وجنبه علبة الحليب ورضاعته ..

قام بسرعه من مكانه واخذ الرضاعه ..

عباها مويه من غير مايسخنه ..

وفتح علية الحليب وهو محتار كم ملعقه يحط له ..

حط بالرضاعه على كيفه وسكر الرضاعه ..

تذكر حركة خالته وهي ترج الرضاعه ..

رجها بسرعه من غير مايفهم ليه ..

قرب من فيصل وحطه على حضنه وفيصل عيونه على الرضاعه وبدا يهدا لما شافها ..

اخذ الرضاعه بيدينه الصغار وحطها بفمه ..

فارس ناظره وهو يضحك : هههه عارف شغلك يعني يالدب .. وهمك كرشتك

فتحت سديم الباب بسرعه : كأن فيـ ...

سكتت اول ماشافت فيصل بحضن فارس والرضاعه بفمه ..

حاولت تتذكر ان كانت مسويه رضاعه من قبل له ..

بس هي متأكده انها كانت تو غاسلتها ..

رفع راسه فارس وشاف علامات التعجب بوجه سديم .. تكلم بهدوء : اشش بينام

سديم سكرت الباب وجلست جنبه : ايش صار ؟

فارس وعينه على فيصل وهو يمسح على شعره .. تكلم بهمس : ابد .. صحى ولما ماشافك قام يبكي .. فشفت الحليب وسويت له بسرعه

سديم وهي ترفع يدها وتشوف الساعه : ايه هذا توقيته بشكل يومي يصحى عشان الحليب .. بس كان انتظرتني

فارس لف عليها : لو انتظرتك كان مات من الجوع مسكين

رجع عينه على فيصل .. وابتسم : احلى مافي الاطفال برائتهم

سديم ناظرته كيف ماسك فيصل ومهتم فيه ..

كان ودها تطير بالسما من الفرحه وتضم فارس ..

وتتمنى محبته لفيصل ماتتغير ..

رجع فارس فيصل على السرير وناظر ساعته : يالله انا تأخرت

سديم : تو بدري

فارس : تبينا ننصاد ونتوهق مع ابوك

سديم وهي تضحك : ههههههه لا

فارس : خلاص قومي شوفي الوضع امان ولا لا

فتحت سديم الباب واشرت لفارس ينزل وراها ..

نزلوا بسرعه وهم على اطراف اصابعهم حتى محد يحس فيهم ..

وصلوا للباب الخارجي ..

فارس لف عليها : انتبهي على نفسك

سديم وهي تهز راسها : ان شاء الله

فارس : ونامي زين .. واكلي زين .. وكل شي زين

سديم وهي تضحك على الشريط اللي كان دايم يعيده : ههههههه طيب خلاص روح قبل ماننصاد

فارس : اللي يشوفنا يقول جالسين نسوي شي حرام .. ماكأنك زوجتي وحلالي

سديم : لاتستعجل كلها فتره بسيطه .. بس يالله رووووح

فارس : طيب طيب .. بس لاتدفيين وبعدينـ ..

: سدييييييييييييييييييييم

انتقزت سديم ولفت وهي مرعوبه من صوته ..

قلبها رجف من الخوف ..

تكلم بعصبيه وهو معقد حواجبه : ايييش جالسه تسويييين ؟

بلعت سديم ريقها وماقدرت تنطق بحرف واحد ..

رجع فارس ووقف قدامها وخلاها ورا ظهره ..

ابو سديم زادت حدة صوته : انت ايش جاااااي تسوي هناااااااااا في بيتي بهالوقت

فارس ببرود : كنت جاي انبه ثامر على سيارته مولعه لمباتها .. وهو نادا سديم .. بس هذي كل الحكايه

ابو سديم من بين اسنانه : مو انا قلت لك ماتجي وتشوفها الا بالزوااااج

فارس : عارف بس هي جات كذا وشفتها .. حتى ماكملنا دقيقه

ابو سديم : تسلتغفلووووني انتوووا

فارس : حشى وعن الف حشى ياعمي .. شدعوه نستغفلك .. على العموم ماهي مقصوده .. والمره الثانيه ماراح تتكرر ان شاء الله

ابو سديم : يالله الحين ايش عندك واقف عطنا بقفاك

فارس بأبتسامه : طيب .. تصبحون على خير

طلع من البيت بعد ماغمز لسديم بعينه ..

سديم مشت بسرعه من غير ماتناظر ابوها وتوجهت ناحية الدرج قبل مايقول لها شي ..

ابو سديم بحده : سديييييييم

سديم بلت ريقها ووقفت وهي ماسكه الدرابزين ..

ابو سديم من بين اسنانه : ان مره ثانيه شفتك واقفه معاه من وراي .. لتشوفي شي عمرك ماشفتيه

سديم هزت راسها وركبت الدرج بسرعه ..

دخلت غرفتها وسكرت الباب وسندت نفسها عليه ..

اخذت نفس وحطت يدها على قلبها وهي تتنفس بسرعه ..

رن جوالها وراحت له بسرعه ترد عليه قبل ماتزعج فيصل بنغمته : الو

فارس : سوالك شي

سديم : لا

فارس تنفس براحه : الحمد لله .. كنت خايف انه يسوي لك شي

سديم : لا الحمد لله .. بس انت من وين جبت هالثقه وانت تكلمه

فارس : عادي .. ابوك كذا الواحد يتسايس معاه ومايقدر يقول كلمه وحده

سديم وهي تضحك : هههههههه الحين السالفه طاحت فوق راس ثامر

فارس : العن شكله على هالدعوه .. على طول انصدنا اشك انه هو اللي خرب علينا

سديم : ههههههههه الحين بياكل هوشه على هالدعوه

فارس : ماعليك لاتخافين عليه .. اصلا انا متفق معاه على هالقصه

سديم : يعني مجهزين كل شي

فارس : ايه افا عليك .. يالله الحين نامي

سديم : ان شاء الله

فارس : تصبحين على خير

سديم : وانت من اهله





*************

بعد ايام دخل ثامر وبيده كيس ..

راح لامه وسلمها اياه : يمه هذي بطاقات الدعوه .. بسرعه خبيهم قبل ماتشوفهم سديم

ام سديم وهي تاخذ الكيس : اختك هذي حكايه .. الحين لو تعرف فيه بطاقات دعوه بتستخف

ثامر : ماعليه يمه تحملوها كم يوم ويصير زواجها

ام سديم : الله يهنيها يارب ويعوضها عن اللي شافته

سديم دخلت الصاله : الحين انتوا مو ناويين تقولون لي ايش بيصير بالزواج ؟

ثامر : احلمي

سديم جلست وهي تتأفف : الحين هو زواجي ولا زواجكم .. ادخل هناك وكأني هبله ماعرف ايش الترتيبات

ام سديم : هذي نتيجة معارضتك له على كل فكره

سديم : بس لازم اعرف .. لافارس يقول لي ولا انتوا بعد

ثامر : هذي توصيات زوجك .. احنا مالنا دخل

سديم انتبهت على الكيس اللي يحاولوا مايبينوه لها : ايش هالكيس ؟

ام سديم : ولا شي

سديم عرفت من الاسم اللي على الكيس انه لبطاقات الدعوه : لاتقولون هذي بطاقات الدعوه

ثامر بإبتسامه عريضه : ايه

سديم وقفت بعصبيه : لا عاد كذا زودها فارس

ام سديم : سديم .. كيف تبينا نعزم الناس بدون دعوات

سديم : خليهم هم يعزموا .. احنا اللي يروحوا منا خالات وعمات وبس

ام سديم : طيب .. كذا ولا كذا نحتاج دعوات للدخول

سديم سكتت شوي .. : ... طيب ابي اشوف البطاقه

ثامر : لا .. انتي اللي عليك بعد كم يوم تكشخين وتروحين الزواج

سديم : طيب علموني بأي قاعه على الاقل

ام سديم : هم هذي مو لازم تعرفينها

سديم تأففت : افففففففففف بس منكم .. كل شي ماتبوني اعرفه

ثامر : تفاهمي مع زوجك

سديم : ماهو ازيد منكم ولا شي راضي يقول لي عنه

ام سديم : انتي اللي سببتي لنفسك هالشي .. محد قال لك تعارضيه عل كل شي يقوله

مشت سديم عنهم وهي تتحلطم : ابد ولا كأن اللي بتتزوج انااا

دخلت غرفتها وسكرت عليها الباب ..

منقهره منهم ..

تبي تعرف التفاصيل حتى ماتتفاجئ ..

رجعت ترتب اغراضها بنرفزه ..

جلست على السرير واخذت جوالها حتى تدق عليه ..

طاح من يدها لتحت السرير ..

تأففت ونزلت من السرير وهي تناظر تحته ..

انتبهت على صندوق ..

هذا صندوق ذكرياتها اللي حطته ببيت اهلها بعيد عنها ..

سحبته من تحت السرير وحطته قدامها وهي جالسه على الارض ..

مسحته من الغبار اللي عليه ..

وفتحته ..

ابتسمت وهي تشوف كتاب باللون الأخضر ..

اخذته ومسحت الغبار اللي عليه ..

مكتوب عليه باللون الذهبي ..

الديوان الثالث

خالد الفيصل

فتحته ..

وقرت خطه ..


" كلمات ترنمت في آذني حينما سمعتها ..

وأنارت بصيرتي حينما قرأتها ..

كلمات خالد الفيصل ..

أستاذي وشاعري الأول ..

23 / 10 / 98

فارس "


فتحت صفحاته وهي تسترجع ذكرياتها ..

انفتحت على صفحه فيها ورده جفت وورقه مطويه..

ابتسمت وهي تشوفها ..

فتحت الورقه ..

وهي تقرا الكلام اللي فيها ..


" هذا الديوان عزيز علي ..

احتفظي فيه عندك ..

وكل ماقريتيه ..

تذكري ان فيه انسان مستحيل ينساك ..

سديم ..

اتمنى انك تكوني قويه وتحاولين تنفصلين منه ..

وانا راح اكون بأنتظارك ..

هذا رقمي ..

######0504 "


رجعت طوت الورقه وحطها بالديوان ..

وقفت وبيدها الكتاب حتى تحطه بشنطتها ..

طاحت منه رساله ..

انتبهت عليها ورفعتها ..

فتحت الظرف وطلعت الورقه منه ..

فتحت الورقه وبدت تقرا الكلمات ..


" مــرتــاح احــبـــك ولا عـلَّــمــت
حـتَّـى انـــت عـيّــت أبـيّــن لـــك

و البـارحـه يـــوم انـــا سـلـمـت
شـكّـيــت لــــو عـيــنــي تــدلـــك

بـرقٍ لمـع فـي العيـون و خفـت
مـواجــع الـقـلـب تـوصــل لــــك

عسـاك فـي نـاظـري مــا شـفـت
كـيــف المعـالـيـق يـومــنّ لـــك

مـن خوفـتـي لا احـتـرق جنَّـبـت
هـربــت مـــن شـمـسـك لـظـلّـك

اخشى عليـك الهـوَى لـو طحـت
مـــــا تــلّــنــي يـــمّـــك يــتــلّــك

أبـــــي قـلـيــلــك ولا حــصّــلــت
بـعـضــك تـركـنــي مــــع كــلّــك

ما ادري صواب او خطأ ما قلت
إنــــك حـبـيـبـي و انــــا خــلّـــك


فارس "



ضحكت وهي تتكر هالرساله ..

كانت هذي اول رساله يرسلها لها ..

وماتنام الا بعد ماتقراها ..

ضمتها لصدرها وهي تتذكر هذيك الايام وحلاوتها ..

بهدوئها ولطافتها ..



.
.

دقت ساعة الصفر ..

ولبست الفستان الأبيض لأول مره بحياتها ..

ناظرت نفسها بالمرايه ..

فستان ناعم بموديل اوروبي ..

من الدانتيل الفرنسي المشغول بفخامه ..

ماسك على جسمها وبالاخير منفوش على خفيف بطبقات من الدانتيل والتول ..

هديه من جنان ودينا ..

مررت يدها على الفستان وهي تتنهد : حتى الفستان ماشوفه الا يوم الزواج

جنان وقفت وراها وهي تناظرها بالمرايه : ماعجبك

سديم لفت عليها : بالعكس مررره يجنن .. بس منقهره مادري عن أي شي بترتيبات الزواج ابد .. يمكن انتوا تدرون عنها اكثر مني

جنان : تستاهلين .. انتي اللي سببتي هالشي لنفسك

دينا دخلت الغرفه : يووه يابنات القاعه امتلت

سديم وهي تجلس : اجل ماراح اطلع .. انا قايله سووه عائلي

جنان ناظرت سديم : سدييم ترا بكفخك

سديم : معازيم الدنياا وتبوني اطلع قدامهم وانا مطلقه

دينا : رجعنا على الطير ياللي .. وخير ياطير اهم شي فارس

سديم : مابي اطلع

جنان : ترا برتكب فيك جريمه اليوم اذا ما ..

رن جوالها ولفت عليه ..

ردت بسرعه : هلا بندوري حبيبي

سديم ناظرتها وهي فيها الضحكه : ماقدر انا

جنان طلعت لها لسانها ولفت عنها وهي تهمس : ايه حبيبي

بندر : كيف القمر اليوم

جنان وهي واقفه قدام المرايه وتعدل خصل شعرها : بخير دامك بخير

بندر : مرتاحه ؟

جنان : ايه .. – كملت بخجل – ناقصني انت

بندر ضحك : ههههههه لاتخليني اتهور واجي اطلعك من الزواج بكبره

جنان : لا خلاص بتوب

بندر : طيب كيف صاحبتك مستعده ؟

جنان ناظرت سديم : لا جالسه تدلع علينا

بندر : مثل ماانتي تدلعتي علينا

جنان : عن التطنز

بندر وهو يضحك عليها : هههههه طيب خلاص بقفل بس كنت ابي اتطمن عليك

جنان : اوكي

بندر : انبسطي بوقت

جنان : ان شاء الله

قفلت الخط ولفت على سديم ودينا يناظروها بخبث : خييييير

سديم وهي رافعه حاجبها : حبيبك هاه

جنان : ايه حبيبي .. وعمري وحياتي وكل شي

دينا : ماقدر انا

جنان : انتوا بالذات ماتتكلمون

سديم : من متى صار حبيبك وتتكلمين بهالهداوه

جنان : مالكم دخل

دينا : سدوووم .. ماتلاحظين انها تغيرت

سديم : ايه مررره .. صارت هاديه وراكده – غمزة لجنان – ايش سوا لك بندر

جنان حمرت خدودها وابتسمت بأحراج : لازم اتغير واتأثر منه

دينا : ايوااااا ايش سوا لك

جنان وهي تنزل يدها للكعب : والله لو ماانا خايفه على كشختي كان هالكعب على راسك

سديم : تونا نقول هاديه .. ايش فيك قلبتي

جنان : عشان تترك حركاتها

دينا : هههههههه طيب انا بسكت بس قولي ايش سوا لك بندر

جنان سكتت فتره ..

ابتسمت وهي تلعب بالسلسال : كل اللي سواه وتقولوا ايش سوا .. يعني وقف معاي وتحملني وماتخلى عني وتقولوا ايش سوا لي .. لو واحد غيره صدقوني مابيتحملني وبيرجعني على اول طياره وورقتي معاي .. بس هو لا .. فكل هذا يخليني غصب احترمه واحبه واتأثر منه بعد

سديم : الله يهنيك يارب

جنان وهي ترتخي على الكرسي : آآميييين يارب .. هذا بندوري مو حي الله

البنات : هههههههههههه

رن جوال سديم ..

لفت دينا عليها : لااااا احنا اليوم ماراح نخلص من افلامكم الغراميه


.
.
.
.
.
.



بالقاعه اللي جنبهم ..

مبسوط وطاير من الفرحه ..

حاس انه بحلم ..

وماراح يتأكد انه ماهو حلم الا لما تصير معاه وبروحهم ..

طلع جواله ..

ودق على الارقام بسرعه : الف الف مبروك ياحياتي

سديم تكلمت بهدوء : الله يبارك بحياتك

فارس مستعده عشان اخطفك

سديم : هههههههه تخطفني !

فارس : ايه خليهم يسووا الزفه بسرعه

سديم بلعت ريقها وتكلمت بتوتر : على طاري الزفه .. فارس مابي اطلع قدام الناس

فارس تنهد : سديم عشان خاطري ولآخر مره خلينا على الاقل نعدي هاليوم

سديم : بس منحرجه من المعازيم

فارس : انا راح ادخل معاك .. ولا مالي خاطر عندك

سديم : طيب

فارس : طيب يعني ايش

سديم : راح اطلع للزفه

جنان بصوت عالي : ياهوووه كان من زمااااان كلمتها ولا هالتعب النفسي

فارس سمعها وضحك : ههههههه يالله حبيبتي اهم شي تهدين نفسك

سديم : ان شاء الله

دخلت هيفاء الغرفه وناظرتهم : انا ادوركم وانتوا هنا

دينا وهي الابتسامه شاقه وجهها : ننتظر نهاية مكالمة الاخت

هيفاء : وايش دخلكم فيها يالله كل وحده قدامي بيدخل العريس الحين

جنان : شوفيها كيف خقت ووافقت انها تنزف بس قال لها كم كله

قفلت سديم الخط ولفت عيهم : مزعجااااات

هيفاء : يالله امشوا معاي خلونا نجهز زفتها

جنان : لحظه قبل ماطلع سدوم .. بليز قولي لي ايش قال لك

سديم : انتي تغير فيك كل شي .. الا عرق اللقافه مازال فيك

جنان ضحكت وهي تطلع : امزح معااااك



.
.
.
.
.



بعد مانزل الجوال ..

ظل مبتسم وهو سرحان ..

ضربه على كتفه هو يغمز له : ايوا يحق لك تسرح

فارس لف عليه وهو مبتسم : بلا هبال علي ..

ناصر : يحق لك عريس

فارس : شوف اوكي السكبه ؟

ناصر وهي يعدل شماغ فارس : لحظه اعدل لك

نزل يده على البشت وعدله

فارس : هاه كيف الحين تمام ؟

ناصر : تمام بس لحظه خلينا نعطرك زياده ونحط لك عود – غمز له - عشان تشم ريحتك المدام وتدوخ

فارس عطاه نظره : جوز عني

طلع العود ناصر وعطره : اقول لايكثر هرجك وخلك ساكت .. انت عريس اليوم مالك كلمه

فارس : اشوف فيك يوم .. وانا اوريك بس تتزوج

ناصر وهو يضحك : ههههههههه هذا ولا بالاحلام

مشى ناصر عنه ..

قرب منه ابوه وهو مبتسم .. همس له : للحين مصر محد يدخل معاك

فارس هز راسه : ايه

ابو فارس : بس اعمامك يبون يفرحون فيك

فارس : لو انا دخلت مع اعمامي .. هي مين يدخلها وانت عارف ابوها ايش مسوي

ابو فارس : انا ادخلها .. وموجود اخوها

فارس وهو مبتسم : مابيها تحس ان انا حولي اهلي وعزوتي وهي لا .. فراح ادخل انا معاها وخلاص

مسك يد ابوه ويشدها : يبه انا بس مابيها تطلع وهي حاسه بشي ناقصها قدام المعازيم

ابو فارس وهو يضمه : الله يوفقكم ويهنيكم يارب



دخل فارس قاعة الحريم

ودخل الغرفه ..

شاف سديم جالسه على الكنبه وتنتظره ..

رجف قلبه وهو يناظرها ..

وقفت سديم بهدوء اول ماشافته ..

ابتسم لها وهو يقرب منها ..

باسها على جبينها ..

حط عينه بعينها وتكلم بهدوء..: الف مبروك

سديم وهي تبعد عينها عن عينه : الله يبارك بحياتك

قرب فارس من اذنها وهمس : طالعه قمر

دق قلب سديم مع كلماته وتوردة خدوها اكثر ..

حست ان الجو حولها صار حار ..

فتحت الباب بسرعه وشافته كيف كاشخ ..

تكلمت بحماس وهي تناظره : فاااااااارس طالع قمر

فارس نقز وابتعدت سديم شوي : بسم الله .. ايش اللي جيبك الحين

نوف عوجت بوزها : جايه ابارك له – كملت بحماس وهي تضمه – بس والله طالع قمر

فارس : خلاص .. وخري .. جد مايعه

سديم وهي تضحك عليه : حرام عليك .. بالعكس نوف عسل

فارس وهو يناظر نوف : من قدك لقيتي لك محاميه

نوف : ايه بس حسافه .. هالمحاميه ماراح تجلس معاي هنا الا يوم واحد

فارس وهو يقرصها بخدها : يالله بس خلصينا .. نبي ننزف ونشرد

نوف : على ايش مستعجل

فارس وهو يحط يده على قلبه ويناظر سديم : احد يشوف هالحلاوه كلها ومايستعجل

سديم فتحت عينها ..

انحرجت من كلامه قدام اخته ..

فارس ضحك وهو يقرب سديم له .. : يالله روحي شوفي ايش صار بسرعه

نوف طلعت وجهزت الزفه لهم ..

شبك فارس يده بيد سديم ..

وبدا ميوزك هادي ..

مع القاء قصيده بصوت مستحيل تغلط فيه ..

لفت على فارس وناظرته ..

ابتسم لها وهو عارف من نظراتها السؤال اللي ببالها ..

دق قلب سديم مع كل كلمه يلقيها فارس بالقصيده ..





من يقول الزين مايكمل حلاه ..
كل شي(ن) في حبيبي اكتمل

الله اللي كمله والله عطاه..
مابقى للزين في خلّي محل

العيون أحلى من عيون المهاه ..
شافها قلبي و صفّق و احتفل

نظرته من فتنته شعلة حياه ..
والجفون من الحيا فيها كسل

ساهم(ن) رمشه على الخد وسناه ..
كن لمعة وجنته ورد(ن) وطل

الشفايا كنها جمر الغضاه ..
تحرس الريق المحلّى بالعسل

والشعر ليل(ن) نقل حمرة مساه ..
أجعد(ن) حوّل على صدره همل

مايج من فوق متنه ماطواه ..
لون شلال(ن) مع المغرب نزل

وأنطلق جيده يماري في بهاه ..
فوق مياس(ن) تعزّل واعتدل

بالرشاقه فيه من ظبي الفلاه ..
لي مشى كنّه على الروح انتقل

ريحته من كل زهر(ن) منتقاه ..
والزياده للخزامى والنفل

صافي(ن) مثل المطر فوق الصفاه ..
باسم مثل البشاير بالأمل

جامع(ن) من كل زين منتهاه ..
مستحيل الوصف في خلي سهل

كايد(ن) ماهو يلين لمن بغاه ..
يرتفع عن كل سقطات الزلل


انتهت القصيده ..

وبدت الزفه على انغام اغنية فطومه ..



الصلاة على الرسول لا اله لا الله ..

الف الصلاة على الرسول ..


العروسه اللي قبلت ..

بزينها والله ضوت ..

زاد نورج والحلاة ..

والصفات فيج اكملت ..



.
.