المنتدى :
كتب المسرح والدراسات المسرحية
مجدي السماك , مسرحية القرد
مسرحية : القرد
تأليف : مجدي السماك
المشهد الأول
"المسرح مضاء بشكل طبيعي .. في الوسط يجلس دكتور بيولوجيا أمام مكتبه، في الستين من العمر. شعره ابيض، يلبس معطفا ابيض، على المكتب أدوات مكتبية وكتب ومجلدات . خلفه معلقة صورة قرد، بجانب صورة القرد سبورة وتباشير. وبجانب المكتب بعيد بعض الشيء قفص به خروف. يتم عزف موسيقا هادئة لمدة دقيقتين بينما الدكتور منهمك يحدق ويقلب صفحات أحد الكتب. فجأة تتوقف الموسيقا على صوت فني المختبر وهو مساعد للدكتور، عمره خمسة وعشرون عاما، يلبس أيضا معطفا ابيض، يدخل الفني من باب جانبي ويصرخ"
الفني : " يتجه نحو الدكتور" دكتور دكتور.. مبروك يا دكتور.. ألف مبروك .. التجربة نجحت.. اقسم لك أنها نجحت.. أنا راقبتها بنفسي"
الدكتور : " مستغربا"أنت متأكد يا ولد يا فني.
الفني : آه . والله العظيم .
الدكتور : يعني القرد صار يتكلم زينا.
الفني : وكمان تعلم القراءة والكتابة.
الدكتور :ممتاز. عال العال .. يعني مش ضايل غير المرحلة الأخيرة .
الفني : ائيش هي ؟
الدكتور : أن يتعلم القرد لغة أجنبية أو لغتين .
الفني : هو الآن يتقن ثلاث لغات .
الدكتور :" بدهشة" أنا ما أعطيته هرمون اللغات.
الفني : أنا أعطيته من سنه.. لمّا المعادلة الكيميائية جهزت .
الدكتور : برافو عليك.. ممتاز. أنا مبسوط منك.
الفني : وعلمته الرقص كمان.
الدكتور : أي نوع رقص علمته؟
الفني : كل الأنواع ..بلدي ..وباليه ..وديسكو.
الدكتور : مش ضايل سوى أمر واحد !
الفني : شو هو ؟
الدكتور : لازم أشوف طريقة تخليه يقرأ العلوم وثقافات العالم خلال أيام.
الفني : لقد قرأها كلها ..معادلاتك هايله يا دكتور ..أنت فطحل ..أنت دكتور الدكاترة..أنت عالم العلماء..لا يوجد مثلك على وجه الأرض أو أي كوكب.
الدكتور : يعني أنا ممكن أتكلم معه زي ما بتكلم مع أي إنسان .
الفني : طبعا ..وممكن أن يناقشك بأي موضوع.
الدكتور : أوع يا ولد يكون صار يفهم في الأدب والفن، أنا ضعيف في هذه الأمور.
الفني : متخافش يا دكتور ..هو عرف كثير في الأدب العالمي والفن ..ولكن مفيش مشكلة.
الدكتور : لا . في مشكلة . ومشكلة كبيرة كمان .كيف بدي أناقشه. مش عيب عالم مثلي يكون قرد بفهم أكثر منه.
الفني : لا تناقشه في الأدب. ناقشه في قلة الأدب.
الدكتور : " يكشر وجهه" ائيش قصدك بقلة الأدب؟
الفني : يعني في السياسة مثلا .. أو أفلام السكس.
الدكتور : هذه الأمور قلة أدب يا ولد يا فني؟
الفني : طبعا.. واللي بقرب منها أكل هوى.
الدكتور : أنا بعرف أن السياسة قلة أدب. بس أفلام السكس قلة أدب كمان؟
الفني : أكيد .. طبعا. بس في ناس بعتبروا افلام السكس كثرة أدب.
الدكتور : كيف؟ أما حاجة تجنن.
الفني : لمّا الواحد يتفرج عليها ، باله يرتاح ويصير هادي.
الدكتور : البال الهادئ قلة أدب؟
الفني : لا
الدكتور : إذن كيف ..هي فزوره .. فرفطت روحي ..أتكلم وخلصني.
الفني : اللي باله هادي بصير يفكر في السياسة.
الدكتور : آه ..فهمت .. السياسة تؤدي إلى هذه الأفلام.. يعني لقلة الأدب.
الفني : وهذه الأفلام تؤدي إلى السياسة كمان يا دكتور.
الدكتور : يعني مخلوطين مع بعض.
الفني : بالضبط يا دكتور مخلوطين خلط السواد.
الدكتور : في كل البلاد بكونوا مخلوطين ..على طول.
الفني : لا . بس في دول العالم الأخير.. قصدي العالم الثالث بلا مؤاخذة.
الدكتور : في دول العالم الأولاني ، قصدي أمريكا وأوروبا مبخلطوش.
الفني : مفشروا .. يسترجوا .. بس العالم الأخير اللي بيخلط .
الدكتور : ليه ..هم دول العالم الأولاني بيخافوا يخلطوا.
الفني : بيخافوا كثير طبعا.. والله أنهم جبناء.
الدكتور : بيخافوا من مين؟ ليكون بيخافوا من دول العالم الثالث.
الفني : السياسيين هناك معندهمش ضمير بس بيخافوا من الشعب .. جبناء بعيد عنك.
الدكتور : طيب السياسيين في دول العالم الأخير ما عندهم ضمير يخافوا منه أو شعب عين حمرة بتخوف.
الفني : لا ..لأن السياسي أهله بيستأصلوا منه الضمير عند الولادة. مع الحبل السري يعني يا دكتور.. والشعب زي منت عارف باله هادي ورايق.
الدكتور : وإذا حدا نسيوا يشيلوله إلضمير حايعمل إيش..كيف حايعرف يشتغل بالسياسة.
الفني : لما يكبر يستأصله بعملية جراحية في أمريكا.
الدكتور : أوع يا ولد ليكون القرد بعد ما صار يفهم صار يخلطهم مع بعضهم.
الفني : هو أكيد أكيد والله العليم بخلط .
الدكتور : متأكد ليش.. هو قالك.
الفني : قبل ساعة بعته يشتري علبة سجاير.. على سبيل التجربة يعني .
الدكتور : طيب وبعدين.. ائيش صار.
الفني : لهف الباقي.
الدكتور : مش يمكن ضيع الباقي في الطريق.
الفني : لا. كان مخبيها في بطنه.. بلعها ابن العفريته. بس صورة الأشعة بينتها.
الدكتور : بينت كويس في الصورة؟
الفني : آه .. وكمان سمعت صوت النقود بتخشخش في بطنه لمّا نط .
الدكتور : أنت سمعتها خشخشت بوضوح يا ولد؟
الفني : آه والله خشخشت.. كانت بترن في دنيه زي رنة الخلخال.
الدكتور : وأنت ائيش عملت؟
الفني : أعطيته شربة زيت خروع؟
الدكتور : " بنرفزة"يخرب بيتك ..يمكن يموت.. أنت بتحسبه بني آدم عادي.
الفني : قال يموت قال.. كان يكرعها مثل البيبسي وطلب يشرب كمان..واتهمني إني بخيل.. باين عليه طماع من أولها..وحرامي كمان اخو الشلن.
الدكتور : على هيك صار إنسان زينا زيو مية المية.
الفني : آه. نجح في التجربة بامتياز.. بس هو حرامي.
الدكتور : كيف طلعت الباقي من بطنه؟
الفني : لسه مطلعتوش .
الدكتور : ليه ..هو مراحش على الحمام بعد شربة زيت الخروع .
الفني : لا ..أنت بتفكره إنسان زينا.
الدكتور : مش مشكلة.. وصيه لمّا يعملها في الحمام يديلك النقود .
الفني : يستحيل.
الدكتور : ليش .
الفني : لأنه حلف برحمة أبوه أنها نقوده.. وانه ورثها عن أمه.
الدكتور : حاجة غريبة ..هو أهله كانوا يعرفوا النقود ويتعاملوا فيها.
الفني : لا .. يستحيل ..أهله كانوا في الغابة ..الله يرحمهم .
الدكتور : إذن كيف تعلم السرقة؟
الفني : هذا الموضوع حيرني ..بصراحة أنا مش فاهم.
الدكتور : يمكن انه بيقلد الإنسان يا ولد؟
الفني : أكيد ..لأن الإنسان مرات بيقلد القرد في الوقاحة.
الدكتور : يعني واحدة بواحدة ..تعادل. القرد يقلد الإنسان والإنسان يقلد القرد.
الفني : حاجة بتلخبط المخ.. مخي صار مقلوب منه ومن عمايله السودا.
الدكتور : ليكون يا ولد قابل حد من أهل السياسة؟
الفني : لا والله أبدا ..أنا طول الوقت عيني عليه.
الدكتور : حاجة غريبة!
الفني :" يخبط بكفه على جبهته ويتذكر" آه ..صحيح ..تذكرت.
الدكتور : ائيش تذكرت؟
الفني : هو قرأ عدة كتب في السياسة؟ ومجلات سكس كمان.
الدكتور : شو هي الكتب التي قرأها؟
الفني : كتاب الأمير.
الدكتور : هذا الكتاب تأليف ميكافيلي.
الفني : آه ..صحيح يا دكتور.. بتاع المرحوم ميكافيلي.
الدكتور : هي كمان هذه عملة تعملها ..شوف النتيجة..إئيش حنعمل معاه بعد عملتك السودا..أكيد خلط الكتاب مع المجلة.
الفني : أنت قلت لي اعلمه كل شيء. تركته في المكتبة فقرأها كلها.
الدكتور : لكن مش الحاجات التافهة زي السياسة.
الفني : بسيطة ..عندي حل.
الدكتور : ائيش هو؟
الفني : نعطيه هرمون مضاد للسياسة عشان يبطل يلهف النقود.
الدكتور :لا . إحنا نعطيه هرمون ضد اللهف عشان يبطل السياسة.
الفني : فكرة ممتازة.. صحيح انك مخك مخ دكتور كبير وبوزن كيلو ونص.
الدكتور : بوزن كيلوين بالضبط يا غبي.
الفني : أنا آسف يا دكتور.
الدكتور :متى بدك اتجيبه لي.
الفني : تقصد مين؟
الدكتور : بقصد القرد ..بقصد مين يعني هو في غيره. أنت كرهتني به قبل ما أشوفه.
الفني : وقت ما بدك أنا جاهز؟
الدكتور : ممكن الآن يعني؟
الفني : ممكن طبعا..تحت أمرك أي قرد في الدنيا.
الدكتور : " يعدل بيده ياقته وربطة العنق " طيب هاته ..خليه يتفضل.
الفني : أمرك .. حاضر .
"يخرج الفني مسرعا..بينما يتجه الدكتور إلى القفص الذي به الخروف ويوجه الحديث له"
الدكتور: شايف يا خروف، التجربة نجحت مع القرد زي ما نجحت معاك. القرد صار يتعلم ويفهم زينا. وأنا خليتك خروف بعد ما كنت قط ..وأنا لسه حطورك لغاية ما تصير إنسان، عشان اعرف الحلقة المفقودة اللي حكى عنها داروين..بعد هيك حرجع القرد اللي طورته إلى الوراء لغاية ما يصير خروف، ونقطة التقابل والتشابه بينك وبينه حتكون هي الحلقة المفقودة.. لازم اعمل هيك علشان أتأكد من الحلقة المفقودة. أنا عارف انته مش فاهم حاجة، بس متخافش، لمّا تتطور وتصير إنسان حتبقى تفهم.
الخروف : أنا بديش كل تجربتك هذه. أنا مليش دخل بيك..أنا عايز ارجع قط.
العالم : ليش ..انته هيك أحسن يا ابني.
الخروف : لا مش أحسن. انتم قتالين قتله؟
العالم : ليه؟ حد عملك حاجة..أنت طول نهارك تاكل وبنعلفك وهيك مربرب.
الخروف: تعلفوني عشان اسمن ولظلظ و تذبحوني على العيد .
العالم : مين قالك هذا الكلام الفارغ. محدش حيذبحك.
الخروف : الحمار اللي مر من هنا أمبارح هو اللي قال لي.
العالم :" يخاطب نفسه بصوت مسموع للجمهور" يبدو إحنا الآدميين انفضحنا عند كل الحيوانات.
الخروف : حتى أنا من يوم ما صرت خروف ونفسي بتهف على سمكة أو شقفة بسطرما.
العالم : ليش ..أنت باقي قط ابن باشاوات..لمّا تبقى إنسان حتاكل اللي نفسك فيه.
الخروف : مش عايز أصير زفت إنسان ..انته بس بتوعدني على الفاضي، الإنسان في كل مكان ميت من الجوع ومحدش مطلعله.
العالم : يا غبي انته بس خلى أيدك بأيدي وتوكل على الله. حتشوف النتيجه.
الخوف : يعني أسلمك دقني.
العالم : طبعا.. يعني حتسلمني ليتك لمكعبرة.
الخروف: أمري لله.. لاحق الكذاب لباب الدار.
العالم : حدا يرجع إلى الوراء يا غبي " ثم يتجه بكلامه إلى الجمهور" أنا من كام يوم حولت بقرة إلى إنسان. صارت امرأة وخارقة الجمال كمان." يشير بيده إلى امرأة تجلس في الصف الأول بين الجمهور "شوفوا ما أحلاها ..زي ملكة الجمال.
"تقف المرأة في مكانها وتتحدث بعصبية"
المرأة : لا يا عم. أنا عايزة ارجع بقرة ..حتى والله نفسي آكل ضمة برسيم من يوم محولتني إلى إنسان..وكمان محدش راضي يتجوزني..عنست من تحت راسك الله يخرب بيتك.. لو بقيت بقرة كان مليون عجل تزوجني. أنا كنت بهزة واحدة من ذيلي أغري أتخن عجل.
العالم : محدش من كل الحيوانات اللي اشتغلت معاها عايز يكون إنسان . ليش مش عارف. هو الإنسان وحش لهذه الدرجة.. بعدين معاكم ..كيف بدي اشتغل إذا كل حيوان بدهوش يطور أو يصير إنسان.
المرأة : أنا بصراحة بقرف من كل الجنس البشري..الله يخرب بيوتكم..مش عيب عليكم تطعموني لحم العجل وميهمكوش شعوري. اخص عليكوا اخص.. اتفو.
العالم : اقعدي يا وليه لحسن اعطيكي أنزيم يقلبك عرسة أو سحلية ..وجع يخلع أسنانك. كمان أسنانك سودا ضربها السوس الله يقرف عيشتك.
" في هذه الأثناء يدخل الفني جريا بتلهف. نفسه مقطوع. رأسه مجروح وملفوف بقماش طبي ابيض عليه بقع يود ودم"
الفني : الحق يا دكتور ..وينك ..مصيبة ..وين انته.
الدكتور : خير يا ابني.. فيه حاجة..مالك مجروح .. مين طبشك.
الفني : القرد يا دكتور.
الدكتور : ماله ..إيش فيه .
الفني : مش عايز يقابلك..ونطحني ، فتح راسي وسيل دمي.
الدكتور : ليش.. حصل إئيش.
الفني : سعادة القرد بيقول اللي عايز التاني يروح لعنده. حاولت أجره نطحني.
الدكتور : أما قرد ابن كلب.. طيب ليش.
الفني : بيقول بلا مؤاخذه يعني أنه مستّعر منك.. وانك مش من مقامه.
الدكتور : بتقولها بوجهي ..عمى يعميك قليل أدب.
الفني : هو اللي بيقول. وبيقول كمان انك حرامي.
الدكتور : كيف أنا حرامي؟ أنا عمري ما اشتغلت في السياسة.
الفني : بيقول القرد انه مره كان في قفص في حديقة الحيوان.. من زمان يعني..
الدكتور : إئيش يعني، هو أول قرد يدخل قفص حديقة حيوان. حيكون وين يعني؟ في فندق خمس نجوم ولا في قصر.. هو فاكر نفسه إئيش ابن القردة.
الفني : بقول انت يومها رميت له قرن موز.
الدكتور : كويس ..أنا لأني كريم يا ابني. لازم يشكرني بدل ما يشتمني.
الفني : أصله بيقول انه بعد ما أكل الموزة..
الدكتور : "يوطي رأسه ويديه على خاصرتيه" أيوه . حصل إيش. قول.
الفني : بعد ما أكل الموزة أنت طلبت منه ثمنها.
الدكتور : أما كلام فارغ صحيح ..انته بتصدق هذا الكلام.
الفني : .........
الدكتور : إيه ..ساكت ليه ..مصدق كلامه" يقولها بنبرة استغراب."
الفني : بصراحة آه..أنت بتعملها.
الدكتور : " بصوت مدهش" مصدق ليش.. شو أنا أعملت.
الفني : انته مرة أعطيتني سيجارة وأخذت بدالها سيجارتين وقرن موز.
الدكتور : مهو يا غبي قرن الموز أعطيته للقرد. على فرض أني أخذت منه ثمن الموزة ..هذا حقي.
الفني : هو يومها شعر بالاهانة.
الدكتور : ليش؟
الفني : بيقول انه أصله من أسرة عريقة ومن غابة محترمة ومنزلتها عاليه.
الدكتور : هي القرود برضه عندهم الأسر مراتب والغابات درجات.
الفني : آه .. زى الإنسان.. تصور بالله عليك.
الدكتور : يعني الغابات زي الدول والممالك..وأسرهم لها منازل عريقة زي العائلات الحاكمة !
الفني : بالضبط يا دكتور.
الدكتور : روح قول له ييجي لحسن أعطيه هرمون يقلبه ضفدعة.
" يمسك الدكتور بالطباشير ويكتب معادلة كيميائية معقدة على السبورة."
يخرج الفني مسرعا من باب جانبي.
إظلام كامل للمسرح .
"المشهد الثاني"
" تفتح الستارة، المسرح مضاء،في وسط خشبة المسرح مائدة طعام تتسع لأربعة أشخاص ، مع أربعة كراسي ، على الطاولة صحون بها طعام وشوك وملاعق، الدكتور يلف ويدور حولها ببطء"
الدكتور : "يخاطب نفسه بصوت يسمعه الجمهور"هما طولوا ليش ..يا رب يا ساتر ..الله يعلم شو الحكاية ..قال ائيش قال القرد مستعر مني ..أنا اللي طورته وخليته إنسان زي البني ادمين وفوق هذا بيقول عني حرامي، طيب يا ابن الابالسه، والله غير اوريك ..بس لمّا اشوفه. وين حيروح مني يعني.
الفني : " يدخل جريا" دكتور ..دكتور ..انته يا دكتور الدكاترة.. يا فطحل.
الدكتور : ايوه يا ولد.. مالك متسربع.. ليش القرد مجاش معك؟
الفني : بيقولك أنه عنده شروط علشان ييجي.
الدكتور :"بصوت يشبه الردح" شروط ..أي شروط ..والله اهلين كمان القرد عنده شروط ..هو فاكر نفسه شو، أمريكي يعني.. لكن إئيش اقول.. الحق عليك أنت يا فني الزفت.
الفني : ليش يا دكتور.
الدكتور : في حد أعطاه كتب السياسة غيرك.
الفني : غلطة وصارت.. أنت حتوافق على شروطه.
الدكتور: ائيش هي شروط جنابه؟
الفني : عايز يدخل ماشي على سجاد احمر، والناس تقف تصفقله وتغنيله كمان أغاني ترحيب على الموسيقا.
الدكتور: ليش كل هذه الخوته واللخه ..فاكر نفسه فوق البشر.
الفني : أكيد نفسه ينبسط.. ويصهلل شوية.. حتوافق يا دكتور؟
الدكتور: خلاص بسيطة ..افرش وله سجاد احمر.. وغنوله.. خلينا نخلص.
" فورا يتم عزف موسيقا سواء من فرقة موسيقية موجودة أو بواسطة آلة تسجيل متصلة بمكبرات صوت ، لمدة دقيقتين فقط ، وحشد من الشباب والبنات يغنوا : أهلا وسهلا باللي جاي، وأهازيج. مع تصفيق وزغاريد ملعلعة. كل هذا متوافق مع دخول القرد من باب جانبي إلى خشبة المسرح ، يمشي معتدلا على قدمين ببطء ويتبختر على سجاد أو قماش احمر، ذيله طويل جدا ويجر على الأرض، مؤخرته حمراء فاقعة، يحمل في يده غليون. بعد دقيقتين يتوقف الغناء ويذهب الجميع. يظل على خشبة المسرح فقط الدكتور والقرد"
القرد : مش مرحبا.
الدكتور : قصدك مرحبا.
القرد : لا لا لا ..أنا بقول مش مرحبا .. وأنت لازم تقول مش اهلين.
الدكتور : ليش كلامك مقلوب يا ابني .
القرد : علشان أنا مقلوب من قرد إلى إنسان.
الدكتور : أهه ..مفهوم مفهوم.
القرد : " بنظرة ونبرة استعلاء"أنت من اللي بقولوا عنهم إنسان.. أو آدميين.
الدكتور : آه .. ايوه يا ابني أنا منهم.
القرد : من زمان ؟
الدكتور : إئيش هو اللي من زمان؟
القرد : من زمان أنت إنسان؟
الدكتور : طبعا. أنا بالأصل إنسان.. يعني حكون إنسان من ربع ساعة بس.
القرد : أصلي أنا إنسان بس من شوية أيام.. يعني إحنا أصبحنا زملاء.
الدكتور: " مستغربا" زملاء! هيه مهنة.. يلا زي بعضه. زملاء زملاء.
القرد : أنت إنسان من الناحيتين؟
الدكتور : ائيش يعني؟ مش فاهم عليك.
القرد : أنت إنسان من جوه ومن بره.. إنسان جواني وبراني.
الدكتور : ائيش هو اللي من جوه ومن وبره.. هي بطيخه.. أنت بتتكلم عن بطيخه.
القرد : من جوه حمرا؟ قصدي يعني أنت من جوه إنسان ومن بره إنسان برضه؟
الدكتور : طبعا .. يعني شايفني قدامك إنسان نص نص.
القرد : أصلي أنا من جوه إنسان بس من بره حيوان.
الدكتور : صحيح. أنا عارف حكايتك. أصل أنا شريتك من حديقة الحيوان وخليتك إنسان.
القرد : يا سلام ..وين أيام زمان ..أيام ما كنت في الغابة.. أحلا أيام عمري.
الدكتور : أنت مش مستريح انك إنسان.
القرد : طبعا مش مستريح. هو في بعد الحرية في الغابة .. هوهوهوهوه !!
الدكتور : هي برضه حياتنا مثل الغابة.. حتنبسط فيها.
القرد : لا ..أبدا.. حياتكو مثل السجن، انتو مسجونين في حريتكوا..وكمان بصراحة حياتكو مثل السلخانة..مليانة قتل وموت ودم.. حياتكو مليانة ظلم.
الدكتور : حتتعود عليها وتبقى آخر السطه.. حتكيف آخر تكييف.
القرد : أنا بصراحة عايز ارجع قرد.. أنا خجلان منكو ومن حياتكم المقرفة.
الدكتور : لالالا. أنا مسمحش بالإساءة إلى الجنس البشري.. اتكلم زي الناس ما بتتكلم .
القرد : تقدر تقول لي أودي وجهي وين لما أشوف أصحابي القرود والحيوانات.. الله يخزيكوا خليتوا رقبتي قد السمسمة قدام أهل الغابة.. اخص عليكو اخص.
الدكتور : يا ابني أنت ألآن صرت متطور عن الحيوانات.. أنت إنسان.
القرد : إنسان مؤقت ولا على طول.. إلى الأبد يعني.
الدكتور : مؤقت طبعا. أنا بعد هيك .. حارجعك إلى الوراء .. درجة وراء درجة .. علشان اكتشف الحلقة المفقودة .. اللي حكى عنها داروين. أنت فاهم .. فاهم أنت؟
القرد : أنا مش موافق. أنا عايز فورا ارجع قرد وخلص. يا إما حطربق الدنيا فوق راسك.
الدكتور : أنت عايز تخرب كل شغلي وبحث سنين طويلة من عمري.
القرد : أنا باكره داروين موت.. ونظريته معكوسة.. علشان هيك ماباحبش سيرته.
الدكتور : كيف نظريته معكوسة.
القرد : لان الإنسان هو اللي تطور.. وصار قرد.. مش العكس.
الدكتور : يا سلام.. نظرية جديدة يعني.. ولا ائيش.
القرد : طبعا.. يعني أنت جدي الإنسان.. وتعال أبوس قفا يدك.. قال داروين قال.
الدكتور : يعني القرد متطور أكثر من الإنسان .
القرد : آه بالتأكيد." يمسك بذيله" أنت عندك زي هذا الذيل.
الدكتور : لأ . معنديش.
القرد : ميش قلتلك.
الدكتور : ائيش دخل الذيل بالموضوع يا مغفل.. اللهم طولك يا ذيل، قصدي يا روح.. لخبطني الله يلخبطك.
القرد : لمّا تطور حايبقى لك ذيل زيه .
الدكتور : أنا يا ابني تطورت.. وشبعت تطور من ملايين السنين.
القرد : تقدر تقولي.. ائيش الفرق بين الإنسان والقرد؟
الدكتور : طبعا.. الإنسان آدمي.. القرد حيوان.
القرد : مش صحيح .
الدكتور : " بغيظ" ائيش هو الصحيح .. نورني .. فهمني .
القرد : الإنسان شكله آدمي وبداخله حيوان.
الدكتور : " بسخرية" يا سلام .. وبعدين.
القرد : القرد شكله حيوان وفي داخله إنسان.
الدكتور : وفق كلامك يعني الإنسان في داخله حيوان..والحيوان في داخله إنسان.
القرد : بالضبط يا دكتور. اسم الله عليك.
الدكتور : فهمني كيف.. أنت عندك في مخك الدنيا ملخبطة وسايحة على بعضها. مش بعيد بعد شوية تحكيلي انه الأسد موزة والموزة أسد.
القرد : أنت عمرك سمعت.. انه حيوانات غابة هجموا على حيوانات غابة تانية.
الدكتور : لا .. مسمعتش .
القرد : بس مجتمعات الإنسان.. بتهجم على مجتمعات إنسان آخر.. وبتقتلها.
الدكتور : صحيح .. ائيش يعني.. شو يعني.
القرد : يعني الإنسان.. اقل تطور وبداخله حيوان..صحيح انه شكله إنسان.
الدكتور : يا ابني الإنسان.. نزل عليه كتب سماوية وأنبياء و......
القرد : ( يقاطعه ) بسبب سلوككم المخزي .. وأعمالكوا السودا ..أنتوا بحاجة إلى كتب سماوية ..وأنبياء.. بس مانفعش معكوا أي كتاب منها.. وضربتوا قنبلة ذرية على اليابان.. وقتلتوا الهنود الحمر .. وسكنتوا محلهم.. وطردتوا شعب فلسطين من أرضه .. وسكنتوا محلهم يهود.. كل هذه الفظائع .. اعملتوها بعد ما إجاكوا كتب سماوية وأنبياء .. ومن قبل الكتب السماوية..أنت مسمعتش قصة قابيل وهابيل..ولا أنت ضعيف بالتاريخ يا دكتور الدكاترة..يللي مخك بوزن كيلو ونص.
الدكتور : بوزن كيلوين بالضبط لو سمحت.. انتم كمان بالغابة القوي يأكل الضعيف.
القرد : عشان يعيش بس.. ويحافظ على نوعه.. القرد لا يقتل قرد ..والأسد لا يقتل أسد..بس الإنسان بقتل أخوه الإنسان. الإنسان يقتل الشجر والأسماك والحيوان كمان.. يعني الطايح رايح..أول بأول.. الإنسان قاتل بالفطرة.
الدكتور : بس القتل هو القتل.
القرد : قتل عن قتل يفرق. عمرك شفت أسد قتل مليون غزال.
الدكتور : لا. ماشفتش.
القرد : لان الأسد غلبان . بيقتل غزال واحد بس علشان يعيش يا حبة عيني.
الدكتور : بس الإنسان متطور لأنه بفكر.
القرد : الإنسان طول وقته يفكر كيف يقتل الملايين ويستعبد أخوه الإنسان.
الدكتور : " بعصبية" وبعدين معاك. كل حاجة بتحورها وتشقلبها على كيفك. الأمور عندك سايحة على بعضها. الإنسان اخترع أدوية وعلاج. وبنى حضارة كمان.
القرد : أدوية ائيش بلا كلام فاضي.. عشان طمعه يبيعها بمصاري ويربح. وإلا ليش ما يوزعها على الشعوب الفقيرة ببلاش.. طيب هو بيقتل الشعوب الغلبانة وبيسرق ثروتها كمان.. وعلى أكتاف الغلابا من دمهم وثروتهم يبني حضارة.
الدكتور : هذه سياسة يا مغفل. الفرق بين الإنسان والحيوان انه الإنسان بيشتغل في السياسة لأنه بفكر.
القرد : أنت بتعرف ليش الله ما أرسل أنبياء ورسالات إلى الحيوانات.
الدكتور : طبعا بعرف. لأن الحيوانات ماباتفكرش.
القرد : كلامك مش مظبوط.
الدكتور : ائيش هو المظبوط.
القرد : لان الحيوانات بنت حلال طيبة وعندها أخلاق اكتر من الإنسان.. يعني ميلزمش لهم أنبياء.. سلوك الحيوان ممتاز وما شاء الله عليه.. ربنا يحمي كل الحيوانات من عيون الإنسان الحسود الحقود.
الدكتور : " بدهشة" الحيوانات عندها أخلاق.
القرد : طبعا. مفش عندهم ظلم وعنصرية وقتل وسرقة وكذب وخداع ونفاق وغيره وغيره يا دكتور.
الدكتور : الوعي المتطور مع العلم حايحل هذه المشاكل كلها في المستقبل.
القرد : القصة مش قصة وعي وعلم.
الدكتور : قصة ائيش.
القرد : قصة طمع وأخلاق.
الدكتور : ائيش الحل.. الدنيا هيك.. مش ممكن تكون غير هيك.
القرد : أنا اكتشفت معادلة واخترعت أنزيم يطور الإنسان ؟
الدكتور : مش فاهم .
القرد : نطور الإنسان إلى مرحلة اكثر تطور. متطور من جوه مش من بره. إنسان ما بعد الإنسان.
الدكتور : كيف. ائيش هو هذا الإنسان.. ائيش هو.. ائيش اسمه.
القرد : ممكن نسميه إنسان ما بعد الإنسان.. مش مشكله اسمه..سميه زي ما بدك.
الدكتور : ليش هذا الاسم بالذات.
القرد : لأنه حايكون جديد خالص غير الإنسان الحالي.. نوع جديد من الكائنات.
الدكتور : بس كل ما تطور الإنسان بيزيد شراسة وبصير قتال قتله. عندك مثلا زمان كان الإنسان يقتل بحجر وسهم وسيف ولمّا تطور صار القتل بالجملة بالمدفع والطيارة والقنبلة الذرية.. يعني ما بعد الإنسان الجديد الله بعلم ائيش بدو يعمل.
القرد : إذا شفناه شرس بنقتله فورا. بنطخه أو بنشربه السم الهاري.
الدكتور : كل مرحلة ولها إنسانها .. المشاعية والعبودية والإقطاعية والرأسمالية والامبريالية وبعد هيك العولمة، أو بسموها ما بعد الإمبريالية. الإنسان ما بعد الإنسان مش حايظبط على مرحلتنا. لازم يكون إنسان مرحلة ما بعد العولمة. أو ما بعد بعد الامبريالية.
القرد : وفق كلامك ما بعد العولمة حاتكون مرحلة عبودية.
الدكتور : كيف؟
القرد : زمان كانت عبودية بدائية. بعد هيك حتكون بالكمبيوتر والانترنت.
الدكتور : كلامك مش مفهوم؟
القرد : زمان كانوا يستعبدوا الجسد علشان يسلبوا الإرادة، بعد هيك حايستعبدوا المخ من اجل إلا رادة.. يعني النتيجة هي هي.
" يدخل الفني واضعا يده على بطنه ويتحدث بصوت عالي"
الفني : يللا ناكل يا دكتور.. أنا متت من الجوع.
الدكتور : يللا اتفضلوا على الأكل.
" يجلس الدكتور والقرد والفني إلى طاولة الطعام "
القرد : أنا بدي فوطه بيضا عشان أحطها على صدري.
الدكتور : كول بدونها زيك زينا.. أنت صرت منا وفينا.
القرد : لا يا عم. أنا إنسان حضاري. بدي أحافظ على لبرستيج تبعي.
الدكتور : " بنرفزة"هتوله فوطه بيضا.. خلينا نعرف ناكل.. خلينا نخلص.
" تقف نفس المرأة من بين الجمهور ، التي تحولت من بقرة إلى إنسان وتتحدث. ويكون الفني قد احضر فوطة بيضاء ويعطيها للقرد . يضعها القرد على صدره"
المرأة : أنا كمان بمثل بالمسرحية وباطلع آكل معاكوا. والمخرج وافقلي، وكمان مؤلف المسرحية مجدي السماك قال لي كلي زي ما بدك. بعدين أنا لسه ضايلي دور، والله بترك المسرحية وبروح.. الله لا يقيمكوا ودبروا حالكوا.
الدكتور : عارفها بتعملها. تعالي كلي. يخرب بيتك طول نهارك دايره على بطنك يا طفسة.
" بسرعة تصعد المرأة إلى خشبة المسرح وتأخذ مكانها إلى الطاولة"
المرأة : فش حوليكوا عرق برسيم اخضر يفتح نفسي.
الدكتور : هي نفسك عمرها كانت مسدودة. انسي حكاية البرسيم. لازم يا بنتي تتأقلمي مع وضعك الجديد.. أنتي إنسان.
المرأة : أشمعنا القرد طلب فوطة وجبتوله. علشان هو راجل وأنا وليه.
القرد : كلو كويس ومحدش يفتح تمه ويطلع صوت وهو بمضغ.
المرأة : ليش. أنت بدك تتحكم فينا كيف ناكل.
القرد : يا وليه أنا بقرف من صوت المضغ.
المرأة : أنا بعرفش آكل وأنا مقفلة تمي.. أموت من الجوع يعني.
الدكتور : معلش. كلي بسرعة وانزلي محلك تحت.
المرأة : بديش انزل تحت، هان أريح ، وكمان بشوف أوضح.
الدكتور : هو بخاطرك يعني.. هيك بده المخرج.
المرأة : أشمعنا كلكوا على الخشبة فوق وأنا تحت.
الدكتور :إحنا ممثلين أساسيين.. بس أنتي دورك ثانوي من تحت.. يعني كومبارس.
المرأة : أنا قلت للمخرج يعطيني دور الفني بس مرضيش. الله يقطعه من مخرج.
الدكتور : سيبنا منها قليلة العقل. قلي يا قرد يا خويه.
القرد : نعم.
الدكتور : متى بدنا نشتغل على معادلتك الجديدة. معادلة ما بعد الإنسان.
القرد : علشان نشتغل أنا عندي شروط.
الدكتور :" بعصبية" كمان بتشرط .. شروط ائيش يا حبيبي.
القرد : " بهمة وصوت عالي"عندي شرطين.. راسي وميت سيف.
إظلام كامل.. تسدل الستارة.
المشهد الثالث
(( الإضاءة عادية. طاولة صغيرة في الوسط . على جانبي المسرح عدة كراسي ، أربعة أو خمسة. في الخلف معلقة صورة لفتاة جميلة. القرد بمفرده على حافة المسرح قريب من الجمهور. يوجه الكلام لهم.))
القرد : الدكتور بفكر حاله اعند مني يعني ، إذا رفض شروطي بقهره وبظل إنسان. بس أكيد حيقبلها. شرطين صغار مش كثير عليه ومش خسارة فيه.
" يتراجع القرد ويجلس على كرسي جانبي أثناء دخول الدكتور وبيده حقيبة يد جلدية"
الدكتور : إحنا لازم نبدأ الشغل بأسرع وقت. أنا قربت اطلع على المعاش.
القرد : مش ممكن اشتغل إلا غير لما توافق على شروطي..شرطين بس.
الدكتور : شو هي شروطك .. أول شي اسمعها واعرف ائيش هي.
القرد : الشرط الأول أنا بدي أصير حاكم.
الدكتور : ائيش حاكم. قصدك تصير حكيم.
القرد : لا. سلامة فهمك. بدي أصير حاكم بلد أو بلدين أو ثلاثة. أو كبشة بلاد.
الدكتور : مش ممكن. قرد يحكم بلد. فاكرها مسخرة ولعبه.
القرد : هي أكيد مسخرة ولعبة.. بدي تنقيلي بلدين أو ثلاثة كويسين احكمهم.
الدكتور : شايف صار عندك شهوة الإنسان..وحب الحكم والتسلط.
القرد : ليش مستغرب. أنت نسيت انه أنا من بره قرد بس من جوه إنسان.
الدكتور : بس مش حاكم . شوفلك شغلانة اقل شوية.
القرد : لا يا عم. بدي شغلانة تليق بمقامي.
الدكتور : أنا فاهم .. بس مش هيك يعني.
القرد : أنت حاطط حاجة من جيبك.. خليني أتسلى شوية بشعب صغير وكلبوظ.
الدكتور : لا مش حاطط حاجة من جيبي .. بس يا ابني الحكم مش تسلاية.
القرد : تنساش بحيات أبوك تنقيها بشعوب ظريفة ودمهم خفيف.
الدكتور : ليش دمهم خفيف.
القرد : عشان لمّا اشرب من دمهم متتعبش معدتي. وميعملوش عليه ثورة أو انقلاب.. أنا عارف الشعوب غدارة وقليلة اصل.
الدكتور : بس كيف حالقي لك .. من وين بدي.. أجيب لك بلاد تحكمها.
القرد : اكتب لي فيهم كمبيالة.
" يفتح الدكتور الشنطة ويخرج منها دفتر كمبيالات وقلم ويكتب ويقول ما يكتبه بصوت مرتفع يسمعه الجمهور"
الدكتور : إلى السيد قرد المحترم. لك في ذمتي أنا الدكتور البيولوجي ثلاثة بلاد بشعوب ظريفة ودمها خفيف. موقعها في المكان المشار إليه باللون البني على الخارطة رقم 9999. آخر موعد للتسليم بعد سنه من تاريخه.
القرد : "يستلم الكمبيالة ويحدق بها جيدا" بس أنت مكتبتش موقعها ومكانها.
الدكتور :"يخرج من الحقيبة خارطة جغرافية" حيكون مكانها هنا.. في الوسط.. عند اللون البني.
القرد : لا بديش بالوسط زحمة..بدي إياها على البحر عشان هواها ينعنشني.
الدكتور : حاضر .. خلص على البحر هنا "يشير إلى الخارطة بالقلم"
" يتصافحان مهنئان بعضهما. مبروك. مبروك"
الدكتور : ائيش شرطك الثاني؟
القرد : بدي أتجوز؟
الدكتور: " بدهشة" تتجوز؟ هي اللي ناقص علينا!
القرد : ليش لأ.. ائيش ناقصني؟ شايفني اعور.. ناقص رجل ولا ايد؟
الدكتور : خلص حجوزك شيتا أو أي قردة في الغابة.
القرد : بنفعش. بدك اياني أنا بجلالة قدري أتجوز قردة.
الدكتور : ولا يعني راح تتجوز مين. حتتجوز يعني مارلين مونرو.
القرد : متنساش انه زوجتي حاتكون سيدة البلاد الاولى.
الدكتور : مش ناسي. بس هو في وحدة حاتوافق تتجوزك و شكلك قرد؟
القرد : طبعا. لمّا أكون حاكم حالاقي والله لو كان شكلي زي الحردون.
الدكتور : طيب ليش كل هل التفقيع والغلبة؟
القرد : يا راجل كيف بدي أتفاهم مع قردة وأنا بطلت افهم لغة القرود من يوم ما صرت إنسان. بدي وحدة حلوة .. أحلا بنت في الدنيا.
الدكتور : طيب أجوزك الوليه اللي قاعدة تحت.
القرد : الوليه الهبلة اللي كانت بقرة؟
الدكتور : آه.. في غيرها ترضي بيك يعني.
القرد : لا بديش..متنفعنيش.. عايز الشعب اللي بدي احكمه يعيرني بزوجتي واصلها وفصلها.. أقول ائيش للشعب اللي حاتسلى فيه واحكمه.
" تقف المرأة من الصف الأول. من بين الجمهور وتتحدث"
المرأة : ليش ما تتجوزنيش .. يعني شكلك أحلا من شكلي.. إحنا لتنين كنا حيوانات.. أنا كمان أحلا منك بمليون مرة.. ائيش ناقصني..إذا على البرسيم حاحرم أدوقه.. وحصير اقفل تمي لمأ آكل.
القرد : أنتي! أنتي حاتشغلي الشعب كله يجمعلك برسيم.
المرأة : لا والله .. أنا بوعدك. ووعد البقرة دين عليها.
الدكتور : ليش ما تتجوزها..ائيش ناقصها .. ماكنتو مع بعض في الغابة أيام زمان. ولا أنت نسيت يا ابن القرود.
القرد : مش ناسي .. شوف لي وحدة زي الخلق والناس..بدي وحده أصلها وفصلها إنسان أبا عن جد..عشان اتفشخر بيها قدام الشعب وزملائي الحكام.
الدكتور : من وين بدي اجيبلك.. فش هلقيت.
القرد : اكتب لي فيها كمبيالة تانيه.
الدكتور : حاضر." يكتب بصوت عالي" إلى القرد في ذمتي عروس بيضاء وعيونها خضراء . جسدها ممشوق وعودها رفيع.
القرد : أشمعنا نقيت عيونها خضراء.. مفش لون تاني.
الدكتور : ممكن اسود زي الزفت.
القرد : لا..بتشائم من الأسود.
الدكتور : ممكن فيراني.
القرد : لا ياعم.. أنت عايز تضحك الناس علينا.
الدكتور: أحسن حاجة الاخضر. أصل البلاد اللي حتحكمها أرضها خضرا مليانه أعشاب وأشجار.. عشان يمشي مع لون النبات يا مغفل.. أنت مابتعرفش بالذوق..ائيش فهمك.
القرد : لا بديش ..بدي عيونها زرقا عشان تناسب لون البحر و السما.
الدكتور : تكرم يا سيدي..حاعدل الكمبيالة " يعدل الكمبيالة بالقلم"
القرد : لازم تكون زوجتي مثقفة عشان تناسب مستوايه.
الدكتور : " بغيظ"أكيد.. هو أنا يعني حاجيبلك وحده أي كلام.
القرد : الله يخليك.. أنا مش عايز أوصيك.. دير بالك كويس.
الدكتور : وين المعادلة .. خلصنا.
القرد : أي معادلة.
الدكتور : معادلة إنسان ما بعد الإنسان.
القرد : أنا حافظها في مخي.. بس على مين بدنا نطبقها..بدنا إنسان.
الدكتور : نطبقها عليك أنت.
القرد : لا يا عم.. هو أنا حقل تجارب للي رايح واللي جاي.
الدكتور : فيها ائيش يعني.
القرد : أنا بديش ارجع قرد.. وكمان مش عايز أتطور اكتر من هيك.
الدكتور : ليش.
القرد : أنا خلص ضمنت مستقبلي.. حاصير حاكم لشوية شعوب وهذا بكفيني..نعمة كريم.. مين صحح له يتسلى بالناس ويحكمها.
الدكتور : لازم ترجع قرد. والى اقل من قرد كمان. عشان اعرف الحلقة المفقودة تبعت داروين.
القرد : الله يجعلك ما تعرف.. أنا ناقصك.. بدي أتجوز.
الدكتور : على هيك أنت غدار.. وكذاب كمان.
القرد : أكيد..أنت نسيت إني صرت إنسان.
الدكتور : ماختلفناش.. طيب خلينا نتفاهم.
القرد : عند مصلحتي الشخصية مفيش تفاهم..بيني وبينك الأنسنة حلوة برضه.
الدكتور : واضح إنها أعجبتك وتعودت عليها.
القرد : بصراحة آه.. بيني وبينك العز كويس برضه.. والفرفشه كمان.
الدكتور : الحق على فني الزفت اللي أعطاك كتب سياسة.
القرد : يخلف عليه اللي دردحني فيها ونورني.. ولا كان بقيت حمار مابفهمش حاجة.
الدكتور : بس أنت بتخلط السياسة مع السكس.
القرد : طبعا. هي هيك الأصول يا دكتور.. ماينفعش بدون خلط.. لازم الأمور تسيح على بعضها.. علشان حياتي تكون متنعنشة.
الدكتور : طيب كيف حانطبق معادلتك.
القرد : شوف الوليه اللي كانت بقرة.
الدكتور :" يقترب من مقدمة الخشبة" تعالي أنتي يا وليه.
" تصعد المرأة إلى المسرح"
المرأة : " بسذاجة"عايزين ائيش مني ..أنا زعلانة منكوا..اخص عليكوا.
الدكتور : خلاص..حاجيبلك برسيم. بس عايزين نطورك كمان شوية.
المرأة : حصير ملاك يعني ؟
الدكتور : اقل شوية.
المرأة : شيطان ؟
الدكتور: أحسن شوية.
المرأة : ائيش يعني.. هي فزورة.
الدكتور : حانعملك نوع تاني.. نوع يفوق الإنسان.. أكثر تطور من الإنسان.
المرأة : حصير آكل برسيم يعني.
الدكتور : طبعا..كل حاجة حاتكون موجودة.
المرأة : حاتجوزوني؟
الدكتور : طبعا..حانتركك عانس بدون جواز.. أنا كمان خايف عليكي تخربي وتبوظي.
المرأة :" تهجم على الدكتور وتبوسه" ربنا يخليك.
الدكتور : يلا مدي رجلك خلي القرد يعطيلك حقنة.
" تمد المرأة رجلها. يقترب منها القرد. يعطيها حقنة يخرجها من جيبه"
القرد : حانستنا شوية.
الدكتور : حاتاخد وقت طويل.
القرد : لا ..فورا.
" إظلام لعدة ثواني..إضاءة ألوان غامقة متقطعة مع دقات موسيقا صاخبة توحي بأن حدثا جللا يحدث. المرأة تلف حول نفسها وتقع. ثم تقوم وقد تحولت إلى ما بعد الإنسان"
القرد : ممتاز . التجربة نجحت . مبروك يا دكتور.
الدكتور : مبروك علينا كلنا.
المرأة : أنا حاسة بشيء غريب.
الدكتور : ائيش بتحسي.
المرأة : لازم احكم كل الكرة الأرضية والكواكب المجاورة..لا. لازم احكم الكون كله.
الدكتور : حاجة غريبة..يعني أنتي عندك شهوة الحكم والسيطرة.
المرأة : آه .. بدي كل شعوب الأرض والكون يعبدوني..وتقدم لي القرابين من لحوم البشر.
الدكتور : والبرسيم.. مش عايزة برسيم.
المرأة : أي برسيم.. البرسيم للي زيك.
القرد : بس أنا موعود بعدة شعوب عشان احكمها والعب بيها.
المرأة : ملكاش حاجة..روح انصرف روح.. حرجعك قرد.
الدكتور :" يهمس في أذن القرد بصوت مسموع للجمهور" لازم نقتلها فورا.
المرأة : مش راح تلحقوا تقتلوني.. "تهجم عليهم وتقتلهم بيديها بقوة غريبة شرسة" أنا سيد الكون .. أنا ما بعد الإنسان.. الكون كله يركع عند اقدامي.
" إظلام تام. تسدل الستارة"
انتهت
Magdi_samak@yahoo.com
|
12-08-08, 01:52 AM
جديد مواضيع قسم كتب المسرح والدراسات المسرحية
العرض العادي
