كاتب الموضوع :
ملكة النور ....
المنتدى :
الارشيف
بعد 20 يوم في أحد جزر الكاريبي
طلعت العنود من الكوخ اللي مستأجرينه ولقت بدر طالع من البحر ووقفت تتأمله من بعيد كان لابس شورت السباحه وصدره العريض والمليان عضلات عاري وشعره الاسود يلمع من المويه وكان مسمر بزياده بسبب الايام اللي قضوها تحت الشمس رجع بعض الخصل من شعره على ورى وهو يمشي لناحيتها ويبتسم لها
العنود كانت مبسوطه لدرجة انها تحس انها في حلم وخايفه تصحى منه في أي وقت كانت واقفه تنتظره ومعها المنشفه ولا بسه برمودا بيضاء وتوب أبيض ورابطه شعرها الطويل بإيشارب ملون ورافعه الخصل اللي على وجهها بالنظاره الشمسيه
قرب منها بدر وباسها على خدها وسحب المنشفه وجلس على الارض ومسك يدها وخلاها تجلس جنبه
العنود : نعيما
بدر : الله ينعم عليك , بعد شوي بأسبح معك
العنود : لا مستحيل اسبح هنا
بدر : يابنت الحلال الجزيره شبه فاضيه من بيشوفك ؟؟ بعدين خلاص كلها يوم ونرجع للرياض والا لو بكيفي كان مددنا شهر ثاني بس أنتِ الله يهديك الا تبين ترجعينا
العنود : إذا ما حضرت عرس هيوف بتزعل حرام البنيه أجلت عرسها علشان منو تبيني اخليها بعد , يكفي أن مالها خوات
بدر : يالبى قلبه الحنون , الا تعالي حطيتي واقي على وجهك ؟ انت بشرتك بيضاء وما تتحمل الحراره بكره تطلع حروق في وجهك
العنود ابتسمت : قبل فتره كنت راضي فيني وفي تشوهي
بدر : أنا راضي فيك بكل الاحوال وكمل بمزح : بس اخاف بكره ابوك إذا شافك وفي وجهك حروق يمسكني مع رقبتي ويقول سدد لي فلوس العلميات اللي سوتها بنتي
العنود : هههههههههههه لا مو لها لدرجه كلها عمليه ووحده وما كلفت
بدر : وليش ما قلتي لي عنها
العنود : كنت أبيها لك مفاجأه
بدر : وشلون طاوعك قلبك ودخلتِ المستشفى وسويتِ عمليه ولا قلتِ لي عنها
العنود : قلت لك السبب
بدر : بعد الملكه سويتيها ؟؟
العنود : أيه
بدر : ليش خاطرتِ بعمرك ؟؟ لو جاك شي بسبب هالعمليه ما كنت بأسامحك أبد
العنود ابتسمت : الحمدلله سويتها ونجحت والسالفه عدت على خير
بدر: شلون سويتيها وأنا ما وقعت مو انا زوجك ؟؟
العنود : سويتها قبل ما انحذف من دفتر العايله حق الوالد ووقع هو على أساس أنه ولي أمري
بدر : وأبوك ما قال لي !!
العنود بإستغراب : وش فيك بدر ؟؟ السالفه أنتهت بخيرها وشرها
بدر : لا تسوين شي من وراي. أنا زوجك ولا زم أعرف كل شي عنك
العنود : هاو !! لا يكون زعلت
بدر وهو مطمن راسه ويلعب بالرمل : ما يحق لي أزعل ؟
العنود استغربت وسكتت وبعد فتره مسكت يده : بدور آسفه ما توقعت انك بتزعل
بدر سكت وماقال شي
العنود وصدرها ضايق : بدوري حبيبي هذاني اعتذرت لك وكل يوم بأقولك آسفه وبأعتذر لك لين ما ترضى
بدر رفع راسه ونظراته كلها خبث وتحدي : الا عتذار لحاله ما يكفي خصوصاً منك انتِ
العنود ابتسمت وقربت منه وباسته على خده
بدر ابتسم لها وتوه بيمسكها الا قامت بسرعه وهي تقول : ما ودك نسبح ؟
بدر : توك ما تبين ؟
العنود بعناد وهي تبتسم : غيرت رايي
بدر : وأنا بعد غيرت رايي وماابغى اسبح
العنود : ليه !!
بدر وهو يضحك ونظراته كلها توعد : في راسي مشاريع أهم من السباحه
العنود احمر وجهها ومشت بسرعه لجهة البحر تبي تطب تسبح
بس بدر كان اسرع منها وقدر يمنعها وهو يضحك : فيه أشياء اهم يا مدام .....
************************************************** **
قبل زواج هيفاء وفهد بيوم :
في الرياض الساعه 4 الفجر
ريم : يلله سارونه قومي نويصر بيطلع في راسه نخل
ساره وهي تناظر الساعه : تونا الساعه 4
ريم : وش نسوي الشباب كلهم يبون يروحون مبكرين يبون يوصولون للمزرعه قبل ما تحتر الشمس علشان يسبحون
ساره وهي تقوم : يا عليكم مزاج أحد عنده بكره عرس ويطلع قبل بيوم للمزرعه
ريم : نبي نستانس من زمان ما انبسطنا
ساره : توكم تنبسطون اليوم !!
ريم : وش نسوي هذا راي المعاريس على قول فيصل بيسوون حفله للفهود توديع العزوبيه
ساره : زين اطلعي خليني اغير ملابسي واصلي
ريم : يلله ننتظرك تحت لا تتأخرين
ساره : طيب ربع ساعه وأنا تحت
نزلت ساره وهي ماسكه شنطتها وركبت في السياره مع ريم وناصر
ناصر : بدري يا مرة أخوي كان قعدتي شوي بعد
ساره : الله من العجله اللي فيك , خالتي تو لاقتني مسكينه ضاق صدرها تقول وش يوديكم اليوم
ناصر : ياذا الاهل هم ونظامهم نظام شياب
ساره : وهي صادقه توكم تتذكرون تطلعون للمزرعه قبل العرس بيوم
ناصر : كل شي جاهز للعرس مابقي شي ما جهزناه خلنا نطلع نوسع صدورنا وخلي هالمعاريس يريحون شوي وبكره الظهر إن شاء الله نرجع للرياض كلها يوم نريح فيه ونستانس موب ضار إن شاء الله
ريم : أي والله صادق , نسيتي يا سويره قبل عرسي وعرسك أشين يوم هو اللي قبل العرس يجيب المرض من نصبح لين نمسي وحنا متوترين
ساره : هههههههههههه ولاتنسين كلمة هونت معد ابي اعرس
ريم : ههههههههههههههههه قلت لك اشين يوم
ناصر : بلاكم مريضات الله يشفيكم
ريم : الله وكبر يالصاحي , الا تعال وين بتودينا ؟ موب هذا طريق المزرعه !
ناصر : أيه ذا طريق بيت عمتي حنان
ريم : عماتي موب رايحين محد رايح من الكبار كلهم اليوم بيجتمعون في بيت أبوي سعود
ناصر : أدري بس أمس كلمت عمتي وقالت مروا خذوا وجود
ريم : ناقصين بزران !!
ناصر التفت على ريم وهو مكشر وساره لاحظت وابتسمت
ساره : الا هي في أي صف ألحين ؟
ناصر : راحت ثالث ثانوي
ساره : ماشاء الله صارت حرمه أذكر أول مره شفتها وهي في ثالث متوسط
ناصر : كل صغير يكبر هذي رويمه صارت أم من يصدق ؟
ريم : والله اني مخليه عيالي وأنا ضايق صدري ودي أني جايبتهم معي
ساره : وش عليهم خالتي وأم فيصل والخدامات عندهم خلك ترتاحين شوي من صياحهم
وصلوا لبيت حنان ونزل ناصر وطق الباب وفتحت الباب وجود أخذ ناصر منها شنطة ملابسها وحطها ورى مع الشنط وركب وركبت وجود وهي مستحيه
وجود : السلام عليكم
الكل : وعليكم السلام
ساره : وشلونك وجود ؟ وش أخبار الوالده والوالد ؟ واخوانك عساهم بخير ؟
وجود : الحمدلله كلهم بخير
ريم : أخبارك وجيد ؟ اخبار الاهل
وجود : يسلمون عليكم
ناصر : كيفك وجود ؟
وجود : طيبه الحمدلله
ساره : الباقيين راحوا ؟
ريم : أيه كلهم سبقونا فيصل وطارق ومنى راحوا مع بعض
ناصر : وفهد بيلحقنا بعدين , وهيفاء راحت مع نواف وحرمته
ساره : وأصايل والعنود ؟؟
ريم : بيجون مع رجاجيلهم مع ان خالتي أم أصايل معصبه تقول توهم قبل أمس واصلين من شهر العسل وشوله تطلع معكم خلها تقر في بيتها
ناصر : ياذا الحريم . ألحين رجلها راضي وهو اللي بيجيبها
ساره : وفهد وراه تأخر
ناصر ابتسم : بيلحقنا بعدين
ساره حاسه أن فيه شي : ليه ؟ عسى ماشر
ناصر : ياحبك للقافه يا مرة أخوي , حاشره نفسك في كل شي
ريم : نويصر ووجع كلمها زين تراها مرة سلطان موب واحد من أخوياك
ناصر : سلطان يالبى قلبه له وحشه الخبيث
ساره : الله يرده بالسلامه
ناصر ابتسم وماقال شي
ساره : خالد أخوي بيجي ؟
ناصر : أكيد بيجي وأنا أقدر أطلع من دونه
ساره : الله يمليكم بركة بعض
ناصر : أيه يالدنيا الله يرحمنا برحمته يا عيال عبدالعزيز الصغير متعلق في خالد والكبير في أخت خالد
ساره ضحكت هي ووجود
ريم : استح على وجهك وش ذا الكلام
ناصر : وأنا صادق أنا وطروق وخلود ما نقدر نطلع الا مع بعض
ساره : لا تخربون أخوي بس
ناصر : نخربه !! أخوك يخرب ديره
ساره : الله وكبر يالبريء
ناصر ومسوي على نياته : أي والله أني حبيب وطيب وحليو وقلبي كبير ومؤدب واحب كل الناس وماعندي خرابيط والا حركات
ساره لمحت ناصر وهو يناظر المرايه وهزت راسها وسكتت
ريم : زين صدعتنا بحسناتك سق وأنت ساكت وقسم بالله مدري شلون طاوعتكم وجيت معكم هالحزه
ناصر: محد طقك على يدك وقالك تعالي
ريم : واخلي هالجمعه والوناسه !!
ناصر : انطمي طيب محد صدعنا الا أنتِ وحنتك
ساره : رجعها تكفى للبيت توها تقول أحد يطلع معكم ثمن تقول وناسه !!
ريم : انا معترضه عالتوقيت أحد يطلع الساعه 4 الفجر !
ناصر : طيب كريمنا بسكوتك لو سمحتي ولا تخربين علينا منظر شروق الشمس وفتح درايش السياره
ريم : أخس يالشاعري من متى ؟
ناصر : من زمان بس محد حس فيني محد فاهمني والهواء عكسي
ساره : طيب انتبه للطريق لا نسوي حادث والتفتت على وجود : وش فيك ساكته ؟
وجود : مافيني شي ؟
ريم : صدعنا بها ما تعودت عالصيحه
ساره : مسكينه البنيه تستحي وحنا ما يحتاج ألسنتنا وش طولها
ناصر وهو يتمسخر : الله المستعان صدعنا بها أجل !! محد كسر روسنا من أول الا هي ولسانها اللي وش طوله ووقف عند المحطه يعبي بنزين بعدين وقف عند البقاله : وش تبون أجيب لكم ؟
ريم : جب لي كروسان جبن وعصير برتقال
ناصر : وأنتِ ساره ؟
ريم :أكيد كت كات وحليب جالكسي
ساره : هههههههه ايه
ريم : عاداتك مستحيل تغيرنها
ساره : وأنتِ وجود ؟
ناصر : ما يحتاج حلاو مصاص
وجود : مابي شي
ريم : جب لها مثلي
صك ناصر الباب ودخل البقاله
وريم وساره يضحكون
ساره : هالناصر هو وخلود نفس الطينه لا تزعلين وجود ولا تحطين في بالك هذا أسلوبهم
وجود : منهو نويصر علشان أزعل والا أحط في بالي واحد مايسوى
ريم : هههههههههههههههههه لا يسمعك
وجود : يضف وجهه
ريم : ورى ما رديتي عليه أجل , من خبرتكم وأنتِ وإياه مناقر أشوفك هجدتي ماصرتي مثل أول
ساره : منتب صاحيه ريوم , البنت كبرت معدهيب صغيره علشان تناقره
رجع ناصر ومعه كيس ركب السياره وعطى ريم أغراضها بعدين عطى ساره وآخر شي ناول وجود عصير وكروسان مثل ريم بعدين رمى عليها كرتون بنادول وهو يضحك ويقول : هديه من الهندي
ريم وساره يضحكون
وجود عصبت ورمت الكرتون عليه : اشبع به
ناصر : شكرا
وجود : لاشكر على واجب
وصلو للمزرعه بعد ساعه والشباب راحوا يسبحون والبنات دخلوا المطبخ يجهزون الفطور
ريم وساره وبدور ومنى ووجود وهيفاء ,, منى وساره يشتغلون والباقين يسولفون
دخلت عليهم أصايل
أصايل : السلام عليكم
البنات : وعليكم السلام يا هلا
أصايل : وش تسوون ؟
ساره : نصلح الفطور ألحين الرجاجيل بيطلعون من المسبح ويبون فطورهم
منى : انا وساره اللي نشتغل ورجاجيلهم اللي يزطون
ريم : ترى اخوانك معهم
ساره : اخوي مابعد جاء ورجلي موب فيه
هيفاء تطل من ورى ظهر اصايل
اصايل التفتت على ورى : وش تناظرين ؟
هيفاء : وين عنيده ؟
أصايل : مابعد جت
هيفاء : لا تقولين ميب جايه ؟
أصايل : لا بتجي بس موب ألحين على الظهر خبرك معاريس ما بعد قاموا
منى : الله يهنيهم
ريم : ما ملوا من بعض !!
بدور : اذكري ربك ترى ما كملوا الشهر توهم
ساره : وريم صادقه
ريم : انطمي عاد أنتِ قاعده شهرين عسل بدال الواحد
ساره : اعوذ بالله يمه منك
أصايل بخبث : أقولكم شي
البنات : كلهم وشو ؟؟
أصايل: لا خلاص أخاف تذبحني عنيده
ريم : قولي تكفين
أصايل : لا خلاص بعدين موب اليوم
بدور : تكفين قولي
أصايل : أمزح اعوذ بالله طرتوا في العجه مخفات
ساره : إذا جت العنود بتقول لنا
أصايل بتصريف :ايه طيب
بدور: أمس كلمت اتحمدلها بالسلامه و خالتي تقول هالخبله سمرت مره من القعده في الشمس
هيفاء : بلاه من خبالها أحد يروح لشهر العسل لمكان كله شموس ؟ علينا قل يعني ؟ لو تجلس في شمسنا يومين يمديها تصير سوداء موب سمراء وبس
منى : رجلك جاء يا أصايل ؟
أصايل : أيه وبدر بعد بيجي , يوه من زمان ما اجتمعنا لحالنا من دون الحريم
وجود : كلكم الحين حريم
ساره : من قال ؟ على بالك يوم تزوجنا عقلنا ؟ الا احس ان عقلي صار اخف من أول
بدور : تكلمي عن نفسك بس
هيفاء بقلق : ماتدرون وش فيه فهود ماجاء ؟؟
بدور : كلن على همه
هيفاء : انثبري بس بكره عرسي ولا تبيني أقلق
أصايل : لا حول لا تقلقين إن شاء الله بيجي
ريم : ماسألتيه ؟
هيفاء : الا سألته قال عنده كم مشوار بيخلصهم بعدين بيجي
ساره : انتي المفروض اليوم ترتاحين وما تفكرين في شي أبد
ريم وهي تتمسخر : شوفوا من ينصح !! ذكرتيني بوحده متصله علي ليلة عرسها تقول هونت معد أبي اعرس
ساره وكأن السالفه ما همتها : مخفه ذي
ريم بإستفزاز : وبزر
ساره : طالعه عليك , الله يصلحها ويصلح كل مسلم
البنات يضحكون على ساره وبرود أعصابها وريم اللي عصبت
أصايل : أنتوا الثنتين مدري متى تركدون !!
ساره : مافيه أمل
منى : خلوا عنكم المناقر وتعالوا نفطر بس
طلعوا البنات وأفطروا بعدين ناموا ... قاموا العصر و نزلوا للصاله وجلسوا يتقهوون ودخلت عليهم العنود والبنات كلهم تناقزوا وهم فرحانين
ريم : الحمدلله عالسلامه
العنود : الله يسلمك
ساره : تو مانور المكان
العنود : وه بس استحيت
منى : من متى !!
العنود : انطمي عاد وجامليني لا تفشليني
مشت العنود وسلمت عالبنات وجلست والبنات يسألونها عن احوالها وهي مبسوطه
ساره : ماشاء الله وش هالزين محلوه وسامنه يالدوبا
العنود : صدق ؟
ريم : ايه عسى فستانك يدخل عليك بكره
العنود بخوف : ما قسته تصدقون , إذا ما دخل علي بأذبح بدور كل ما جلسنا مع بعض قعدنا نأكل
هيفاء : تسلفيني , راح نص وزني
العنود : أنتِ وراك نحفتي ؟
هيفاء : مدرييختي , ضايق صدري كل مارحت اقيس فستاني الا هو صاير اوسع علي من قبل
ساره : مثلي يوم عرسي
منى : كل ذا من خوفك اللي ماله سنع والهموم اللي لها أول ومالها آخر
العنود : يلله عاد وش يخوفك فهد يحبك وكلنا عارفين هالشي وإن شاء الله ربي بيوفقكم وتنبسطون وسعي صدرك بس ولا تشيلين هم
ريم : هييف على طاري فهود ماجاء ؟
هيفاء : لا توني متصله عليه يقول في الطريق
أصايل : ما صلحنا غداء للرجاجيل
منى : إذا جاعوا يأكلون لهم أي شي والعشاء اليوم بنحطه مبكرعلشان ننام بدري بكره ورانا قومه من الصبح
ريم : نصور يقول ماراح نمشي الا الظهر , كل شي جاهز
منى : والكوافيرات ؟؟
هيفاء : أنا متفقه معهم يجون للقاعه العصر
أصايل : حجزتوا لنا كلنا ؟
ريم : أيه
بدور : وكم عامله بتجي ؟
هيفاء : اربع
العنود : بس !! ما يمديهم يخلصونا نسيتوا عماتي وأمي وأمهاتكم ؟؟
بدور : أي والله صادقه أبد ما يمديهم يخلصونا
ساره : خلاص انا أهلي حاجزين ثلاث وشغلهم حلو أحد يبي يجي معنا
ريم : خلاص بأجي معكم أنا وأمي
ساره : أجل بأقول لنجوى تخليهم يجون في بيتنا علشان الزحمه
ريم : خلاص زين ونشوف إذا احد من عماتي بيجي معنا يكفونا ثلاث ؟
ساره : أيه بيجون من العصر بعد ويبدون فينا بعدين خواتي
رن جوال ريم وشافت رقم ناصر وردت : هلا نصور
ناصر : ريم ساره عندك ؟
ريم : أيه
ناصر : خليها تروح للصاله الثانيه
ريم : ليه ؟
ناصر : لا حول وش دخلك
ريم : أجل منيب قايله لها
ناصر : رويمه ووجعه
ريم : أول قل لي ليه ؟
ناصر : كلي تراب وسوي اللي قلت لك وصك السماعه في وجهها
البنات : وش فيك ؟
ريم : مدري عنه نويصر يخربط
منى : وش يبي ؟
ريم : يقول خلي ساره تروح للصاله الثانيه
ساره : انا !!
ريم : أيه
ساره : ليه ؟
ريم : مدري
ساره : يمه لا يكون سلطان فيه شي
منى : لو فيه شي بيقول تروح للصاله الثانيه
هيفاء : يمكن مقلب
وجود : أكيد اخوك بيسلم عليك
ساره : مالقيتي الا خلود يسأل علي عند الرجاجيل
العنود : طيب قومي شوفي
قامت ساره والبنات طبعا لحقوها من اللقافه
سارده دخلت الصاله ومالقت شي والبنات واقفين ورى القزاز العاكس
ساره بإستغراب : مافيه شي
وتوها بتروح عند البنات الا باب الصاله اللي يفتح على جهة الرجاجيل ينفتح وتسمرت ساره مكانها
.... بعدين صرخت وهي مو مصدقه سلطان !!!
وقف سلطان وهو يبتسم
ساره بدون ما تحس راحت عنده بسرعه وضمته وتعلقت في رقبته سلطان على طول خذها في حضنه وشد يديه عليها وهو مغمض
ساره كانت تصيح وتضحك في نفس الوقت تعلقت فيه وما تبي تتركه حست انها تحلم
البنات يناظرون من ورى القزاز ومبسوطات أول مره يشوفون مشهد رومانسي مثل الافلام قدامهم ومباشر بعد !!
بعد عشر دقايق تقريبا بعدت ساره وهي تناظر وجهه وموب مستوعبه وعيون سلطان مافارقت عيونها جلسوا يتأملون بعض ومر الوقت وكأنه دهر عيون ساره الواسعه كانت تتكلم بدال شفايفها كان باين فيها الشوق واللهفه والحب والفرحه.. كل المشاعر الحلوه شافها سلطان في عيونها ورموشها كانت رطبه بسبب دموعها,, قلوبهم كانت تدق وكأنها تدق بلحن واحد سريع كان حاس بقلبها يدق على صدره وهي حاسه بدقات قلبه على صدرها كانوا ضامين بعض وكأنهم شخص واحد ونبضهم واحد والاهم أن احساسهم واحد ..
سلطان بهمس : اشتقت لك
ساره وهي تبعد عنه حست انها فوق السحاب ومسحت دموعها وهي تضحك : حتى انا اشتقت لك الحمدلله على سلامتك ,, كانت تلهث ما تدري ليه ؟ يمكن من دقات قلبها المجنونه والا من الفرحه اللي ما توقعتها والا من كلمة سلطان اللي تمنت تسمعها
سلطان مد يده ومسح دموعها بأطراف اصابعه وكانت عيونه مثل عيونها الا انه قدر يسيطر على نفسه قبل لا تنزل دموعه,, ماكان متخيل هالاستقبال من ساره صحيح قالت تحبه ومشتاقه له بس إستقبالها كان اروع مما تخيله الفرحه في عيونها أول مره يشوفها ما كان متخيل أن أحد بيشتاق له كل هالشوق وعلى كثر سفراته بس ماعمر احد استقبله هالاستقبال ..
ساره حست ان لسانها انربط ما تدري وش تسوي ووش تقول
سلطان وهو ماسكها وفمه قريب من اذنها : هاه وين الوعد ؟
ابتسمت ساره بحياء و بصوت واطي يرتجف : أحبك
سلطان تنهد والابتسامه شقت وجهه و قرب وجهه منها وهي تراجعت وهمست بحياء وهي تضحك : البنات واقفين ورى القزاز
سلطان رجع على ورى وأشر على البنات : السلام عليكم
البنات كانوا مبهورين بالموقف اللي قدامهم
هيفاء : ليش علمته إن حنا نشوفهم كان كملوا
العنود : ما قد تخيلت اشوف سلطان في هالموقف
ريم : أموت واعرف وش همس لها ؟
أصايل : ما يبي لها ذكاء أكيد قال احبك والا من هالكلام
منى : الله يسخرهم لبعض
التفتت العنود لمنى ورفعت حاجبها وهي تستفسر لأنها من تزوجت معد تدري عن اوضاع ساره وسلطان ومنى هزت راسها وهي تبتسم
بدور : ماشاء الله شكله يحبها
هيفاء : الا قولي سويره اللي ميته عليه
وجود: الله يسعدهم يستاهلون
منى : غطوا على رومانسية بدر والعنود
ريم : الظاهر الرومانسيه وراثه في هالعايله ,, بروح اسلم عليه
بدور : خليهم مع بعض شوي
ريم : بأسلم عليه بعدين بأخليهم مع بعض , ونادت هيفاء : تعالي معي
دخلت ريم وهيفاء وسلموا على سلطان وتحمدوا له بالسلامه وبنات عمه سلموا عليه من ورى القزاز وراحوا للصاله الثانيه
ريم : اجلسوا عاد والا بتقعدون طول اليوم واقفين
جلس سلطان وسحب ساره جنبه
هيفاء : زين انك جيت يا سلطان علشان تحضر العرس
سلطان : آفا عليك كم هيوف وفهود عندي ؟
هيفاء : لا عيوني أبيك بكره إن شاء الله تصير أخوي موب أخوه فاهم
سلطان : أخوك وأخوه كله واحد
هيفاء : لا أبيك انت اللي تزفني له بكره مع ابوي سعود ونواف
سلطان : عيب اتقدم على عماني
هيفاء : مالي دخل دامك جيت أبيك تزفني أنت والا مابي
سلطان : وإن شاء الله تبيني أدخل عالحريم !!
هيفاء : أكيد
سلطان : لا وأنا أخوك آسف كلش الا أني ادخل عالحريم
ريم : وش بيضرك عاد ؟
سلطان : دخول عالحريم مستحيل
هيفاء : أجل منيب طالعه
سلطان : هيوف انا يوم عرسي ما طلعت تبيني أطلع ألحين
هيفاء : يوم عرسك غير وألحين غير بعدين أنا مالي أحد الا نوافوه لا أبو ولا أم ولا خوات مستكثر علي تطلع معي
سلطان : وين راح أبوي سعود وعماني وأبوي
هيفاء : ولو أنت غير أنت ونصور احسكم خواني مثلكم مثل نواف وابيكم كلكم معي بكره
سلطان : ساره قولي لك شي
ساره ابتسمت : صحيح أني أغار عليك وما ودي تطلع عند الحريم بس علشان هيوف كل شي يهون
هيوف : يسلمون لي الناس الفاهمين
سلطان التفت على ساره : أبيك عون
ساره : علشان هيوف سلطان تكفى لا تكسر بخاطرها
هيفاء : ايه ترى اول مره اتزوج
سلطان : خلاص طيب يصير خير
هيفاء : يالبى قلبك ويلوموني فيك
ريم : ورى ماقلت لنا أنك بتجي ؟
سلطان :قلت اخليها مفاجأه
ريم وهي تمزح : أمحق مفاجأه
ساره : انطمي انتي بعدين المفاجأه موب لك
هيفاء : رحت للبيت
سلطان : لا والله من المطار لهنا على طول
ريم : بيزعلون أهلي
سلطان : فهد كلمهم وقال لهم وأنا بأكلمهم بعد شوي
هيفاء : يلله ريوم قومي عاد خله يجلس مع حرمته شوي
ريم : يلله نخليكم بس لا تأخذون راحتكم مره ترانا في الجوار وكل شوي بنطل عليكم
سلطان : طيب انتِ اذلفي اول بعدين طلي
طلعت ريم وهيفاء والتفت سلطان على ساره وهي التفتت عليه وجلسوا يناظرون بعض وهم ما يدرون وش يقولون آخر شي ابتسمت ساره
سلطان : وش فيك ؟
ساره : مابعد استوعبت
سلطان رفع يده ولمس خدها : هاه استوعبي تراني حقيقه مو خيال
ساره : وأحلى حقيقه والله
سلطان : شلونك ؟
ساره : مافيه أحلى مني هالوقت , وأنت
سلطان : مثل ما انتي شايفه
ساره : ليش ماقلت لي أنك بتجي ؟
سلطان : حبيت اسويها لك مفاجأه كنت أبي اشوف ردة فعلك
ساره ابتسمت : مامر علي ولا راح يمر علي أحلى من هالمفاجأه
تنحنح خالد ودخل عليهم وقامت ساره وسلمت على أخوها
خالد : هاه ارتحتي ألحين ؟ والتفت على سلطان : من رحت وهي مشغلتنا لا تأكل ولا تشرب حد ما تمشي وتصارخ علينا وكله بسبب حضرتك
ساره : بلا نصب عاد
خالد : بالله يا سلطان موب صايره كنها جني
التفت سلطان عليها وجلس يتأملها من فوق لتحت ونظراته كانت مركزه عليها
ساره استحت من ملابسها ومن خالد وسلطان كانت لابسه جينز ضيق وقميص ابيض خفيف سحبت الخداديه وحطتها عليها ولا عاد تحركت
سلطان : الا والله ناحفه ووجهك شاحب
خالد : البركه في سيادتك
ساره تبي تصرف نظرهم عنها: حتى انت سلطان ناحف
سلطان : من طبخ متعب
خالد : أنت بسبب الطبخ هذي لا مسويه مثل المسلسلات وذاك اليوم عيت تروح مع اهلي للعزيمه أثرها تحتري مكالمتك طال عمرك
ساره عصبت واستحت : خويلد ووجع
خالد بإبتسامه عريضه : فيه علوم واجده بأعلمك عنها بعدين إذا خمدت هالسكنيه
ساره بتهديد : خويلد بأذبحك
خالد : حلالك أهم شي ابرد قلبي منك
ساره : ماودك تقلب وجهك وتجلس مع الرجاجيل ؟
خالد : خلاص بأذلف بس الرجاجيل يسألون عن سلطان مشتاقين له
سلطان : لاحول خلاص شوي وألحقك
خالد بمصاله: وش رايك أحتريك ؟
سلطان : يارجال طس أنت وأنا بأجي وراك فكني بس
خالد : خلاص خلاص لا يطق فيك عرق بس لا تطول
طلع خالد والتفت سلطان على ساره : متى بنخلص ؟
ساره : خلصنا
سلطان : احلف لك أن احد بينط بعد شوي
ساره : هههههههههههه طبايعهم ما يخلونها
سلطان : قومي نروح البيت ؟
ساره : ألحين ؟
سلطان : أيه
ساره : لا وهيوف مسكينه ألحين فرحانه فيك وفهد ضارب مشوار من المطار لهنا ونروح ونخليهم
سلطان : عاد ليتهم يكملون معروفهم
ساره : خلاص يا قلبي هانت كلها يوم ونرجع للبيت
سلطان : متى بس ؟
ساره قامت ومسكها سلطان : وين ؟
ساره : بروح أجيب لك شي تأكله
سلطان : لا لا مابي شي خليك جنبي بس
ساره : المطبخ قريب
سلطان : والله مابي شي يكفيني الجلسه معك
ساره : اسمع لاحقين عالكلام والسوالف انت رح تسبح وغير ملابسك وأنا بأجيب لك شي تأكله علشان تنام لك شوي مفهوم ؟
سلطان : وش دعوه طرده ذي !!
ساره : آفا عليك انا أطردك , أنا ابيك تريح وربي
سلطان : لا تخافين أنا كذا مرتاح
ساره : زين كل لك شي على الاقل علشاني سلطان تكفى
سلطان : طيب جيبي لي أي شي وترى علشانك بس
ساره : يابعد هلي وناسي دقايق بس
راحت ساره وجابت القهوه والحلا وجلست تقهوي سلطان وكل شوي ريم داخله عليهم والا فهد والا ناصر يبونه يجلس معهم لين آخر شي طفش منهم وراح معهم وهو مغصوب
في الليل جلسوا البنات يصلحون العشاء واتصلت ساره على سلطان ومارد بعدين اتصلت على خالد
خالد : هلا
ساره : سلطان وينه مايرد ؟
خالد : سلطان نايم
ساره : ما تعشى طيب !!
خالد : كان شكله تعبان ودايخ لقيناه نايم في المجلس وخليناه
ساره : أنتوا عنده ؟
خالد : لا حنا جالسين برى عند الملعب
ساره : لو طلعت تشوفوني ؟
خالد : لا ليه ؟
ساره : بروح اودي لحاف ومخده لسلطان واشوف محتاج شي
خالد : خذي راحتك محد لمك
ساره : يلله أجل مع السلامه
خالد : مع السلامه
راحت ساره ولقت سلطان نايم على الارض ومتوسد يده حطت المخده تحت راسه وغطته باللحاف وجلست تتأمله وهي مبسوطه باسته على خده وقامت طفت عليه الانوار وصكت الباب وهي تدعي ان الله يحفظه ويخليه لها
|
01-08-10, 09:00 AM
جديد مواضيع قسم الارشيف
العرض العادي
