اليوم الثاني :

قام سلطان وهو مرهق لأنه طول الليل ما نام من السهر والتفكير في الفوضى اللي صايره في حياته والصدمات اللي تجيه ورى بعض من خطبته لهناء لحب فيونا ولتركها له ومن زواجه من ساره وحبه لها وقف تفكيره عند هالنقطه وهو يسأل نفسه معقوله حبيت ساره وإذا اللي قاعد يصير بيني وبينها موب حب أجل وشو؟ انتهى ليله واصبح وهو ما عرف الجواب .. قام صلى الفجر وتسبح وغير ملابسه وطلع ولقى متعب مجهز الفطور ومصلح قهوه عربيه رفع حواجبه وابتسم وذكر ساره وانعصر قلبه أمس أول يوم يمر عليه بدون ما يكلمها من وصل لألمانيا
متعب : وش فيك ؟
سلطان : ولا شي
متعب : شكلك ما نمت زين
سلطان رفع حواجبه
متعب : اعرفك زين إذا ما نمت
سلطان تنهد وسكت
متعب : ليش ما نمت
سلطان : مدري متعب قفل عالموضوع تكفى
متعب : ألحين بأقفل عليه بس أكيد بنفتحه في أقرب وقت
سلطان تقهوى بسرعه وراح لغرفته وراح يجهز أوراقه علشان يطلعون للشغل


طلعوا للشغل دخلوا الشركه الالمانيه قبل موعدهم بنص ساعه مشوا للغرفه المخصصه لهم وسلطان كان يمشي قدام متعب وهم يتكلمون وأول ما فتح الباب توتر ووقف مكانه متعب اللي كان وراه صدم فيه من وقفة سلطان المفاجأه ورفع راسه ولقى سلطان واقف قدامه وساد عليه الطريق
متعب : سلطان امش خلنا ندخل
سلطان سكت ومارد
متعب طل من ورى كتف سلطان وشاف فيونا جالسه وحاطه رجل على رجل بثقه وتبتسم
متعب بصوت واطي : الله يخسف بها
سلطان : اسكت متعب ومشى ووراه متعب
فيونا صباح الخير
متعب وسلطان : صباح النور
فيونا : كيفكم ؟
سلطان : تمام
متعب سكت ومارد
فيونا : ممكن تتركنا لحالنا متعب
متعب يناظرها بإستحقار : آسف عندنا كم شغله نبي نناقشها قبل الاجتماع
فيونا إلتفتت على سلطان وهي رافعه حواجبها بإستفهام
متعب : أنت وش تبين بالضبط
فيونا : أنا ابي اتكلم مع سلطان
متعب : علشان وشو ؟
فيونا : موضوع خاص
متعب : مابينك أنت وسلطان مواضيع خاصه
متعب يناظر سلطان بقهر يبيه يرد عليها
سلطان كان ساكت ويناظر اللي قاعد يصير بهدوء
فيونا التفتت تتأمل سلطان بكل وقاحه وقامت من مكانها وحاولت تقرب منه وهي تناظره بنظرات إغراء وتملك وإبتسامه أقرب ما ينقال عنها أنها إبتسامة وحده رخيصه وبايعه نفسها وتكلمت بصوت ناعم : شكل سلطان له رأي ثاني
متعب راح عند سلطان ومسك يده ورفعها في وجه فيونا وهو يأشر على الدبله : سلطان مو لك فاهمه
فيونا تغيرت ملامحها وابيض وجهها من الصدمه وعيونها شوي وهي تطلع من مكانها حاولت تتماسك ورفعت راسها بغرور وتكلمت : ولو بيننا أمور ما انتهت
متعب بعصبيه : ابعدي عنه احسن لك
فيونا : هو يقدر يقول هالكلام بنفسه
سلطان بهدوء : خلصتوا !! الإجتماع بيبدأ ومشى لقاعة الإجتماعات وفيونا ومتعب وراه وكل واحد يناظر الثاني بحقد ولو كانت النظرات تذبح كان متعب قد خلص على فيونا من زمان ودفنها بعد

طول الإجتماع أكثر من العاده وسلطان كان حاط كل تركيزه على الإجتماع لأنه آخر إجتماع قبل ما تبدأ فترة التدريب لرؤساء الفروع
وفيونا ومتعب طول الإجتماع يتبادلون النظرات بكل حقد وكره
خلص الإجتماع وطلع سلطان مع متعب ولحقتهم فيونا وهي تنادي : سلطان سلطان
سلطان : نعم
فيونا وهي تسوي نفسها متلهفه عليه : انتظر مكالمتك في أقرب وقت, فيه أمور ودي أكلمك عنها أنا بأجلس هنا لما تخلص فترة التدريب بس ما اقدر احضر فترات التدريب اللي في هالمبنى لأنها للرؤساء , بس أنت ارفع علي التليفون وأنا مستعده اجيك أي وقت
سلطان هز راسه ومشى وهو ساكت ومتعب يناظرها وهو وده يروح ويقلع عيونها من مكانها بس مشى ورى سلطان وهو كاتم عصبيته
سلطان مثل اليوم اللي قبله وصل للشقه وكان تعبان مره دخل غرفته وقفل على عمره وذب عمره عالسرير




اليوم الثاني

في بيت أبو عبدالله :
ساره كانت متوتره ومعصبه طول اليوم لأن سلطان ما اتصل عليها له يومين واليوم هو ثالث يوم وكانت قلقانه مره اتصلت عليه اكثر من مره و جواله مقفل , جوالها ما نزل من يدها وتكشيرتها ماليه وجهها واللي زاد ضيقها ان خواتها ووفاء زوجة عبدالله جايين عندهم من العصر وبينامون عندهم لأن اليوم خميس
جلست في الصاله مع أمها وخواتها كانت جالسه عالكنب واهلها جالسين على الأرض
أم عبدالله : تعالي تقهوي
ساره : مابي
وفاء : تعالي ذوقي ذا الحلا أنا اللي مصلحته
ساره ما حبت تفشلها : طيب صبوا لي فنجال
نجوى : اقربي طيب عمتي طلاله
ساره : طيب
هند : وش فيك عاقده الكشره ؟
ساره : مافيني شي مصدعه بس وما نمت أمس زين
سوسن : من السهر
نجوى : وش سهرانه عليه ؟
ساره : ماسهرت
سوسن : أكيد تكلم سلطان كالعاده
ساره بدون نفس وبعصبيه : يا كاشفتني يا قويه اصلا ما كلمني أمس
سوسن : وهذا اللي مخليك عصبيه
ساره : ورى ما تنثبرين
نجوى : وش فيك ساره ؟ كل هذا علشان سلطان ما كلمك أمس ؟
ساره : مافيني شي بعدين ليش تدخلون سلطان بكل سالفه أول مره تشوفون وحده مصدعه ومانامت زين
هند : يمه لا تحارشونها مستلجه اليوم اسفهوها لا تستنزل علينا
ساره : الشرهه على اللي يجلس معكم وقامت وراحت لغرفتها والدنيا مغيمه قدامها بسبب الدموع اللي غطت عيونها
دخلت غرفتها عقب ماصفقت بالباب بقوه نطلت عمرها عالسرير وهي تصيح ما تدري وش تسوي الخوف اكل قلبها على سلطان ولا عندها له رقم ثاني واستحت تتصل على أهله وتقولهم انه ما كلمها له كم يوم آخر شي اتصلت على العنود علشان تسولف معها وتسألها وش تسوي لعلها تلقى لها حل

العنود اول ما رن جوالها وشافت رقم ساره ردت بسرعه : هلاااا وغلااااا هلا بالقاطعه هلا بالغاليه
ساره ابتسمت : هلا بك زود يا بعدي
العنود : عندي لك خبر بمليون ريال
ساره : وشو
العنود : توقعي
ساره : فكيتي الجبس ؟
العنود : لا
ساره : أجل ؟
العنود بحياء : بدر خطبني ووافقت
ساره رحت لها من كل قلبها : من جدك ؟
العنود : لا من عمي
ساره : هه هه بايخه
العنود : ادري بس وربي من الوناسه مدري وش اسوي لو ما هالجبس اللي مسمرني بالسرير كان قعدت اناقز
ساره : مبرووووووك الله يسعدك ويهنيك ويوفقك ويتمم لك على خير يارب
العنود : وإياك يا قلبي وعندي خبر ثاني بعد
ساره : وشو لايكون تزوجتيه بعد وما علمتي
العنود : هههههههه لا وش دعوه
ساره : أجل وشو بعد ؟
العنود : الاسبوع الجاي بأفك الجبس بعدين بأبدأ اعالج وجهي واسوي عملية التجميل
ساره : وش هالاخبار الزينه وش هالعلوم لو اني داريه كان كلمتك من زمان
العنود : شفتي شلون اخباري كلها حلوه
ساره : عساها دوم يارب
العنود : يلله عاد هاتي أخبارك
ساره ما حبت تخرب فرحة العنود وماقالت لها شي سولفوا شوي بعدين سكرت منها وهي فرحانه للعنود قد ماهي متضايقه على سلطان آخر شي قررت تتصل أبو سلطان وتسأل عنه وعن سلطان
أبو سلطان رد عليها : هلا والله هلا ببنيتي هلا بمرة الغالي
ساره : الله يسلمك يارب , شلونك يبه
أبو سلطان : بخير وأنا أبوك أنت شلونك ؟ شلون الأهل عساكم بخير
ساره : الحمدلله يبه أنتوا شلونكم شلون أبوي سعود وخالتي والعيال طمني عنهم
أبو سلطان : والله كلهم بخير وما عليهم
ساره : عساه دايم يبه
ابو سلطان : وش اخبارك يا ساره معد شفناك من راح سلطان
ساره : والله يبه أدري أني مقصره بس مدري وشلون صايره ظروفي كنت ناويه أجي هالاسبوع بس قالت لي ريم انك في جده
أبو سلطان : أيه انا ألحين في جده وبكره إن شاء الله بأرجع تعرفين الشغل عقب ماراح سلطان صار أكثره علي وبيني وبينك فهد وناصر ماش منيب اعتمد عليهم مثل سلطان
ساره : الا وش اخبار سلطان عساه بخير له يومين ما كلمني
ابو سلطان : ايه هالايام مشغول أمس اتصلت عليه وجوال مقفل اتصلت على خويه متعب وقال هاليومين عندهم ضغط شغل وتدريب الا هو ما يتصل عليك
ساره : الا يتصل بس له يومين اكلمه وجواله مقفل
ابو سلطان بمزح : اها يالخبيثه أجل متصله علشان تسألين عن سلطان موب عني
ساره حست انها تفشلت : لا وش دعوه يا خال وربي أني اسأل عنك دايم حتى أسأل ريم وإن شاء الله الأربعاء بأجي أنام عندكم إذا بتتحملوني قالتها بمزح
أبو سلطان : وش دعوه لو ماشالك البيت تشيلك عيوننا كم ساره عندنا
ساره : الله يخليك لنا يارب ولا يحرمنا منك
أبو سلطان : ويخليكم لنا الا على فكره دريتي عن نواف
ساره : وش فيه ؟
أبو سلطان : ترى زواجه يوم الثلاثاء
ساره : بهالسرعه
ابو سلطان : عم البنت حدد الموعد
ساره : الله يوفقهم ويسعدهم يارب
ابو سلطان : بيحطون عرس رجال و بعد ما يجون من السفر جواهر وحنان وأم سلطان وباقي الحريم بيحطون عزيمه في حدى الفنادق للحريم
ساره : الله يتمم لهم يارب
أبو سلطان : آميييين
ساره : يلله أجل يبه ما أطول عليك قلت اتصل واتطمن عليك
ابو سلطان بمزح : تسلمين يبه ماقصرتي اتصلي دايم اسألي عني انا موب عن سلطان
ساره وهي تضحك : إن شاء الله يبه من عيوني
ابو سلطان : وإذا احتجتي شي والا بغيتي شي لا يردك الا سماعة التليفون
ساره : ما تقصر يبه عساك ذخر لنا
أبو سلطان : أجل سلمي عالوالد والا هل , فمان الله
ساره : فمان الكريم يبه

تطمنت ساره ان سلطان بخير على الأقل ارتاحت شوي بس كانت مشتاقه لصوته لحسه لضحكته لسوالفه قامت وغسلت وجهها ودخلت فراشها تحاول تنام لها ساعتين على الاقل منها تريح ومنا إذا نزلت تسهر مع أهلها تكون رايقه

سلطان في طرف ثاني من العالم كان جالس في قاعة التدريب وموب مركز وكل شوي يناظر ساعته وده يطلع بس ماكان عارف وش يسوي إذا طلع كان يبي يكلم أهله وساره وراحت أفكاره مع ساره وهو مايدري وش يسوي,, هاليومين اللي ما كلمها فيها حس أنه فاقد شي مهم حس انه كاره نفسه ونفسيته زفت وفيونا اللي طلعت له فجأه وماضيه حس ان مخه مشوش وضايع ما يدري وش يسوي تنهد وحاول يركز عالكلام اللي ينقال في القاعه


بعد ما انتهى التدريب طلع للشقه ولقى متعب سابقه للشقه
متعب كان يداوم في فرع ثاني لنفس الشركه
متعب : كيف كان يومك
سلطان : ماشي الحال . وأنت ؟
متعب : زين الحمدلله
سلطان : أنا بروح اتسبح وبكلم كم مكالمه بعدين نطلع نتمشى شوي و نتعشى
متعب : على أمرك يا ريس
سلطان : ريس في الدوام موب هنا
متعب : على أمرك سليطين
سلطان ابتسم وذكر ساره يوم تعصب عليه مره وتقول له سليطين
متعب : وش فيك ؟
سلطان : ولا شي وراح لغرفته غير ملابسه وتسبح بعدين طلع وفتح جواله واتصل على جده وابوه بعدين كلم أمه وبعد ما خلص من أهله تنهد ثمن اتصل على ساره
ساره اول ما شافت الرقم وهي تتتعشى مع اهلها فزت بسرعه وراحت لغرفتها
ابوها واخوانها يناظرون بعض وهم مستغربين والبنات يبتسمون ويعلقون بصوت واطي لأنهم عارفين أن ساره ما قمزت هالقمزه الا ان سلطان هو المتصل
ساره ردت وهي في تركض مع الدرج خايفه ان الخط ينقطع وهي تلهث ردت : آلو
سلطان : آلو
ساره وفيها الصيحه : سلطان
سلطان سمع صوتها وحس انه ضايع كانت اللهفه في صوتها واضحه لام نفسه ألف مره لأنه ما كلمها اليومين اللي راحو نسى سلطان نفسه وفيونا وكل شي صار له في اليومين اللي راحوا
ساره : سلطان
سلطان في نفسه عيون وقلب سلطان : لبيه
ساره وفي صوتها رنة عتب : وينك ؟
سلطان يكلم نفسه انا غبي ما استاهلها والا شلون قدرت اجلس يومين كامله بدون ما اسمع هالصوت
ساره : سلطان أكلمك
سلطان : معاك
ساره : وراك ما كلمتني اليومين اللي راحوا , ادري انك مشغول وربي عاذرتك بس على الاقل كان ارسلت لي رساله طمنتني عليك طول اليومين اللي راحوا وأنا قلقانه عليك وبالي مشغول عليك لين ما كلمت خالي اليوم وقال انه مكلم متعب وطمني عليك
سلطان : السموحه يا بعدي بس مدري وش اقولك
ساره : لا تقول شي أهم شي أني تطمنت عليك وارتاح بالي وكملت وهي تضحك حتى اتصلت على خالي وسألته عنك وفشلني
سلطان استحى وما يدري وش يقول والا وشلون يعتذر
سلطان : ساره تكفين سامحيني ما دريت اني بأسبب لك كل هالخوف والقلق أنا آسف
ساره : لا تعتذر بس ابيك توعدني انك إذا انشغلت تطمني عليك لو برساله على الاقل
سلطان : تأمرين أمر ما طلبتي شي
ساره عقب ما ارتاحت نزلت دموعها ما تدري هي من الراحه والا من صوت سلطان اللي اشتاقت له
سلطان : ساره
ساره وصوتها متغير : هلا
سلطان : وش فيك ؟؟
ساره : مافيني شي
سلطان : ليش صوتك تغير
ساره شهقت بصوت عالي وهي تصيح
سلطان بخوف : ساره تصيحين ؟؟
ساره : وربي غصب
سلطان : وش يصيحك ؟
ساره وهي تحاول تتماسك : مدري يمكن ارتحت يوم سمعت صوتك وتطمنت عليك
سلطان يالله وش سويت فيها أنا يارب سامحني وصبرني تمنى انه في هاللحظه معها يمسح دموعها ويعتذر منها ويأخذها في حضنه
سلطان وهي متنكد : ساره أبوي لا تصيحين تكفين والله تضيقين صدري , إذا لي خاطر عندك امسحي دموعك
ساره وهي تمسح دموعها : خلاص سكت
سلطان : سارونه ما ابيك تصيحين أبد مفهوم
ساره : مو بكيفي غصب وقسم
سلطان : كله مني أنا السبب
ساره تحاول تغير السالفه : لا تلوم نفسك بس أنا حزات ماقدر امسك نفسي والا نسيت انك مره قلت عني أم دميعه
سلطان تذكر الموقف : هههههههههههههه ذاك اليوم بس كنت أبي اقهرك
ساره تنهدت بفرح يوم سمعته يضحك : دوووم هالضحكه يارب
سلطان : تدومين لي يارب
ساره صارت فوق السحاب من كثر ماهي مبسوطه وبحياء ردت : وأنت بعد
سلطان وهو يبتسم ويتمنى يشوف وجهها لأنه عارف انها مستحيه : اخبارك سارونه
متعب كان واقف عند الباب توه بيدخل الغرفه وشاف سلطان يضحك وسمع آخر جمله ورجع للصاله وهو يبتسم ويكلم نفسه : عز الله طلعنا وتعشينا خلني اطلب بيتزا اصرف لأني لو بأحتري الباشا موب خالص الا بعد ثلاث ساعات
جلس سلطان يسولف هو وساره ومابقي شي ما تكلموا فيه كالعاده وكأنهم توهم يتعرفون على بعض كل واحد صاير يكتشف أشياء في الثاني ما كان يعرفها تكلموا عن طفولتهم ومواقفها مروا على مرحلة المراهقه وكل واحد يسولف للثاني عن حركاته
ساره : سلطان اعترف ما حبيت احد وانت في المتوسط ؟؟
سلطان : هههههههههه تغارين ؟
ساره : لا بس أسأل
سلطان : لا كنت مجتهد منيب راعي هالحركات وأنت ؟؟
ساره : تبي الصراحه
سلطان : أكيد
ساره : مابقي واحد وسيم يطلع في التلفزيون ما حبيته
سلطان : بالله
ساره : ههههههههههههههه كل اسبوع احب لي فنان والا لاعب والا مذيع
سلطان : ماشاء الله مدامتي حبت كل المشاهير الظاهر
ساره : الوسيمين بس
سلطان : وكم استمرت هالحاله عسى ما طولتي بس
ساره : لا ما طولت 3 سنين همن عقلت يوم خلصت المتوسط
سلطان : أوله 3 سنين ؟؟ معناها حبيتي كل واحد شهر موب اسبوع بس
ساره بهبال : لا كل اسبوع احب واحد من تبدأ السنه لين ما تخلص وإذا جاء السنه اللي بعدها كررت نفس السالفه لين ما حبيت كل واحد ثلاث مرات كل سنه مره
سلطان : ههههههههههههههههه حشى صار احتفال سنوي ذا موب حب
ساره : تغار ؟
سلطان : أبدأ
ساره : لأنك عارف انه حب خربوطي
سلطان : لأني عارف أنك ما تحبين أحد غيري ألحين
ساره : أحلى يا واثق
سلطان : صح والا لا
ساره ارتبكت : وشو اللي صح ؟
سلطان : ما تحبين الا أنا صح
ساره تبي تضيع السالفه : ماأكرهك
سلطان ابتسم على حركتها القديمه : ما قلت أنك تكرهيني أنت عارفه وش أقصد
ساره بإرتباك ؟ وش تقصد ؟
سلطان : أنت تحبيني
ساره بعصبيه لأن سلطان كشفها وخافت يستغل نقطة ضعفها خافت على كرامتها تنجرح : الثقه الزايده موب زينه ياجدي قال حب قال !! وقامت تضحك بأستهتار : أنا أحبك !! أوهامك واجده !
سلطان انصدم من ردها ويكلم نفسه: معقوله انا أتوهم طيب ولهفتها وخوفها علي ودموعها كل هذا وشو وش ينقال عنه !!
حس بإكتئاب مايدري وش يسوي مع هالبنت اللي بتسبب له الجنون مره بتموت من خوفها عليه ويوم جاب لها طاري الحب عصبت وقامت تتمسخر
ساره : أووه تأخر الوقت , آسفه سهرتك معي خالي يقول عندكم ضغط في الشغل المفروض انت داخل الفراش من زمان وراك قومه من الصبح
سلطان : أنا ألحين في الفراش بس مانيب مرتاح فيه
ساره : ليه ؟
سلطان : فاقد النومه جنبك
ساره بغى يطيح الجوال من يدها ومسكت الجوال وتناظر بإستغراب وكنها بتلاقي الجواب فيه حست أن سلطان متغير هالايام سوالفه وتلميحاته كلها متغيره معقوله الغربه تسوي كذا في الواحد !! والا يبيها تعترف له انها تحبه .. وهي تفكر لا تضعفين يا ساره اقضبي لسانك انت ما تدرين وش يفكر فيه يمكن يبي يستغلني إذا عرف ويخلي زواجنا يستمر بس علشان أهله والا هو وين والحب وين هذا هو له يومين منشغل ولا فكر فيني ولا لحظه , يارب وش الدبره وش أسوي حتى تفكير منيب قادره افكر زين
سلطان : ساره
ساره ما تدري ليه خافت من اللي بيقوله وتكلمت : سلطان أقرأ آية الكرسي وسم بالله وبتنام يلله ما أبي أعطلك وأسهرك أكثر وراك أشغال واجده بكره
سلطان بإحباط : طيب بس كنت بأقولك تصبحين على خير
ساره : تلاقي الخير
سلطان : فمان الله
ساره : فمان الكريم

ساره بعد ما صكت الجوال رمته جنبها وهي متكدره ما تدري وش اللي خلاها تتكلم وتقول اللي قالته حست انه زعل وقامت تكلم نفسها :غبيه وش سويت أنا وش اللي ما احبه قلبي يتقطع كل يوم عليه واقوله ما احبك وش جاني انا وشلون تتصلح ذي وش يرقعها وش خلاني اتكلم وش بتفيديني فيه الكرامه الحين هذا هو زعل كل ما قلت فرجت رجعت تتعقد يارب وش قاعد يصير معي ما اعرف اتكلم زي الناس وش خلاني ارد بهالعصبيه فيه ألف طريقه أغير بها الموضوع وسحبت المفرش بقوه وحاولت تغطي نفسها وتنام مع انها عارفه ان الشمس بتطلع قبل ما تغط في النوم
سلطان من جهه ثانيه : هالبنت يا مجنونه يا تكابر قبل شوي تصيح وشوي وتطلع من السماعه علشان تتطمن علي ويوم قلت تحبيني بغت تقطع الخط في وجهي من العصبيه تستهبل ذي والا وش قصتها هالإنسانه بتموتني ناقص عمر آه بس لو انها عندي ألحين كان مسكتها وهزيتها لين يرجع عقلها لمكانه وخليتها تقولي وش قصتها وحط حرته في المخده اللي جنبه وجلس يخبط فيها لين ما عورته يده وآخر شي نام وهو متنكد


***************************************

اليوم الثاني

بيت أبو بدر

أبو بدر دخل على عياله بعد صلاة الجمعه وهم كالعاده مجتمعين بعد الصلاة يتقهوون
أبو بدر جلس وقاموا عياله كلهم يسلمون عليه
أبو بدر : أتصل علي اليوم أبو أصايل وتراهم موافقين ويبون يأخذون رأينا في موعد الملكه
بدر ابتسم وهو يسمع اخوانه وخواته يباركون له
بدر : الله يبارك فيكم
أم بدر مثل كل أم قامت تصيح وهي تقول : الله يوفقك وأنا أمك مابغى يجي اليوم اللي أشوفك فيه متزوج
عبدالرحمن : يوه بدت حركات الدراما يمه بلا هالحركات تكفين
غاده : دحيم ووجع
عبدالرحمن : وأخيرا بنرتاح من بدر وأصير دلوع أمي ويرفع حواجبه يبي يقهر بدر
بدر : يلله عاد تخسي محد يحل محلي
عبدالرحمن : انت بتصير عندك حرمه تدلعك أما أنا مسكين مالي لا وليف ولا صاحب وراح عند امه وحط راسه على كتفها شفتي يمه محد بقي من عيالك إلا أنا مالناش غير بعض يا ام بدر
أبو بدر : ورى ما تقعد في حضنها أحسن
عبدالرحمن : هههههههههههههههه غار غار
مشاري : دحيم اسكت عيب تراه ابوك
عبدالرحمن وهو مستغرب ويناظر أخوانه : ابوي يغار مني وانفجر يضحك مره ثانيه وكمل يبه لهالدرجه تحب امي
بدر : صاحي انت ؟ اكيد يحبها موب حرمته
عبدالرحمن يناظر أمه وأبوه وشاف ابوه باين انه مستحي وامه مثله ورجع يضحك مره ثانيه : يا حليلهم طائر الكناري اثرهم يحبون بعض من ورانا
كل الموجودين بالصاله قاموا يضحكون على ام بدر وأبو بدر
ابو بدر بعصبيه : ألحين انت ورى ما تنطم وتصير راكد مثل الرجاجيل
عبدالرحمن حس ان ابوه عصب ومسك نفسه بالغصب وهو مستغرب أول مره يشوف ابوه وامه بهالحاله لأنه ما عمره سمعهم يطرون الحب والا هالكلام قدامهم
أبو بدر وهو يكلم بدر : اتصل على أبو أصايل وحدد معهم يوم الملاك علشان نعلم الجماعه
بدر : إن شاء الله يبه اليوم بأكلمه وأرد لك بالليل
غاده : بتملكون بهالسرعه اتفقوا أول عالمهر و العرس و السكن وهالأمور بعدين حددوا الملاك
فاتن : ايه والشوفه أكيد بتشوفها وتشوفك قبل
أصايل: انتوا عارفين أبوي مستحيل يحدد مهر أو يشرط سكن أو عرس هو يحب يخلي الرجال يسوي اللي يشوفه مناسب له حنا نشتري رجال الكفو
أبو بدر : ليت كل الرجاجيل مثل أبوك
أصايل : الله يسلمك يا خال
مشاري يبي يقهر أصايل : يوم عرسي ماأخذ من المهر الا عشره ألاف ورجع الباقي يعني لا تاخذ معك مبلغ كبير بناتهم رخيصين مره
أصايل تناظر مشاري بقهر
ابو بدر : تعقب ياللي ما تستحي بنات أبو أصايل ينشرون بالذهب ياقليل الأدب
أم بدر : صادق يا ابو بدر لو تلف الدنيا كلها ما تلقى مثل بنات ابو أصايل
مشاري : لا حول والله العظيم أمزح أدري اني لو احب الثريا منيب لاقي مثل أصايل بس لا تكبرون راسها علي عاد
أبو بدر بجديه لأنه حس ان مزحة مشاري موب في محلها: أصايل وحده من بناتي ومنيب أرضى عليها فاهم والا لا وإن شفتك مزعلها بكلمه والا قاعد تمزح عليها هالمزح السامج لا تلوم الا نفسك
مشاري : إن شاءالله يبه والله انها كانت مزحه والتفت على أصايل أنا آسف وحقك علي وربي لو ألف الدنيا منيب لا قي وحده تجي في نصف مواصفاتك
أصايل عارفه ان السالفه مزح ووتبي تبين أنها موب زعلانه : وش قالوا لك غساله ؟؟
مشاري : هااه قايلكم قلبها كبير وعقلها أكبر هذي هي وش حليلها موب زعلانه ولا شي
أصايل : بس لا تتعودها
مشاري : تأمرين أمر حبيبتي
عبدالرحمن : لا حول اركد عاد ترانا موجودين
عهد : وين ناوي تسكن بعد ما تتزوج يا بدر .؟
بدر : وين بعد بدي أسكن هون
عبدالرحمن وهو مسوي مكشر : هون هون
بدر : يس بأسكن هنا معكم عندك ما نع ؟
عبدالرحمن : لا أبد, غير أن بيتنا بيصير فرع لبيت أبو أصايل يعني إستعمار رسمي
أبو بدر : وش قلنا حنا
عبدالرحمن : يبه نمزح وش بلاك ؟
ابو بدر : هالأمور ما ينمزح فيها فاهمين والا لا
أصايل متعوده عالمزح : ماتبي نخطب لك وحده من جماعتنا يا عبدالرحمن علشان نكمل السالفه
عبدالرحمن : بعد !! لا يرحم أمك أنا أعتزلت كل أنواع الحريم مير انتوا خلصتوا والا عندكم اخت ما ندري عنها
أصايل : لا خلصنا ارتاح وارجهن
عبدالرحمن مسوي زعلان : لاااه خساره عاد كنت ناوي أصف مع أخواني ويصير الدرب واحد يوم الأربعاء وكان يقصد موعد زيارة اصايل لأهلها يوم الاربعاء
مشاري : ولا يهمك ندور لك وحده من جيرانهم
عبدالرحمن : لا جد أنا شلت سالفة العرس من راسي يكفي اللي جاني منه
أبو بدر : لين متى يعني
عبدالرحمن : للأبد
بدر : أصايل متى تتوقعين أبوك فاضي علشان أكلمه ؟
أصايل : كلمه ألحين لو بغيت أكيد ألحين جالسين يتقهوون مثل العاده
عهد : الظاهر كل السعوديين هذي حزة قهوتهم وجمعتهم
فاتن : لا تنسين بعد المغرب تراها الفتره الثانيه
بدر : أجل عن أذنكم وطلع يكلم
أم بدر قامت تشوف الشغالات في المطبخ وابو بدر قام يريح شوي قبل الغداء والجماعه تفرقوا وما بقي في الصاله الا مشاري وأصايل
مشاري : أصايل زعلتي ؟
أصايل : يحق لي أزعل صح
مشاري : صح وأنا آسف وربي كنت أمزح
أصايل : أنت عارف أن أبوي زوجني منك علشانك رجال موب علشاني رخيصه
مشاري : وقسم بالله أدري بس مثل ما قلت لك ما كنت قاصد المعنى بس كنت أمزح ولو كنت أدري أنك بتزعلين كان ما قلتها ليت لساني انقص قبل لا اقولها
أصايل : لا تدعي على نفسك
مشاري : اصايل تكفين سامحيني
أصايل : لا تتعودها
مشاري : خلاص والله ما أعيدها كلش الا زعلك تراك اغلى من روحي والله
اصايل : ايه العب علي بهالكلام
مشاري : وش دعوه اصول تدرين اني جاد
اصايل : زين دريت
مشاري : دام دريتي خليني اقولك شغله
اصايل : وشهي ؟
مشاري: وش رايك ندور لنا بيت ونطلع
أصايل بإستغراب : ليه !!
مشاري : بدر بيتزوج وبيسكن هو والعنود هنا والبيت بصير ضيق عاد قلت ندور لنا بيت ونسكن فيه
أصايل : لا تكفى وش يطلعنا بعدين خالتي معتمده علي ومتعوده علي صحيح العنود بتجي تسكن هنابس عنيده رفلا وميب راعية مطبخ وهالامور
مشاري : البيت بيصير ضيق علينا
أصايل : ماصار ضيق علي يوم سلوى فيه تبيه يضيق يوم جت أختي لا يا مشاري مستحيل أطلع وأخلي خالتي مسكينه وإذا على قولك البيت بيصير ضيق اتفق انت وبدر وخالي واشتروا بيت أكبر لنا كلنا , اما أني أطلع واسكن لحالي انسى أنا حتى إجتماعات البنات ما اقدر اخليها واعد لها من الا سبوع للأسبوع شلون تبيني أخليها
مشاري : على راحتك مع أني كنت ابي اريحك من التعب لا تحسبيني غافل ادري انك شايله البيت على راسك من جيتي حتى الطلعات ما قمتي تطلعين مثل أول لأنك ما تبين تتركين أمي لحالها والله اني حاس فيك وداري انك ما تلحقين بين وظيفتك وشغل البيت وبوي الله يهديه ما يبي الخدمات يلمسون الطبخ أبد
أصايل قاطعته : إذا عجزت اقوم عن شغل البيت ووظيفتي صدقني إن إستقالتي من وظيفتي هي الحل الاريح موب الطلعه من البيت
مشاري وهو موب مصدق : وشو إستقاله ؟؟
أصايل : إذا عجزت عن شغل البيت والوظيفه بأستقيل
مشاري: من جدك !! وتتركين وظيفتك علشان أهلي
أصايل : أهلك هم أهلي بعدين انت عارف اني منيب محتاجه للوظيفه وراتبي هذا هو في البنك ما ألمس منه شي مصروف وتعطيني وش ابي بالوظيفه أجل ؟؟
مشاري :والله مدري وش اقولك يا اصايل انتي ذهب الا ألماس مستحيل ألقى حرمه مثلك
اصايل بثقه : ادري
مشاري : يحق لك توثقين آه بس لو تعرفين وش كثر أحبك , احس قلبي بينفجر من كثر ما احبك
بدر وهو نازل مع الدرج : رح فجره برى الله يجزاك خير موب هنا تونا مأثثين الصاله
مشاري : لا حول وش جابك أنت ؟
بدر : جاي اشوفك وانت تتغزل في حرمتك ابي اتعلم
مشاري : تتعلم مني !! هه أنت تعلم ديره لحالها لعنبوا ابليسك سنتين وزياده وأنت تحب ولا قلت ولا كلمه ولا لمحت ولا بين عليك
أصايل : هو وذيك الخبيثه الثانيه اللي كل ما قلت لها وش فيك قالت مافيني شي مصدعه والا ما نمت سنتين مصدعه وما نامت وأنا المغفله اشوفها قاعده تقرى دوواين وشعر وقصص رومانسيه بس ما نتبهت لها أثاريها غرقانه من وراي
بدر ابتسم إبتسامه عريضه وهو يقول : لبى قلبها تعذبت مسكينه
مشاري : هي هي انت وشو لبى قلبها ترى ما صارت حرمتك لين ألحين
بدر : بتصير إن شاء الله يوم الأربعاء الجاي
أصايل : حددتوا الملكه الا سبوع الجاي ؟
بدر : الأربعاء إن شاء الله
أصايل : ما كأنك استعجلت
بدر بثقه : أبدا , أصلا أنا قلت الثلاثاء بس أبوك قال انه زواج نواف
أصايل : طيب اصبر يومين لين ما تفك العنود الجبس والله بتنهار إن درت أنها بتشوفك ورجلها مجبسه
بدر : من قال أني بأشوفها , أنا بأشوفها يوم العرس
مشاري : بدر لا اللي قاعد تسويه مو في صالحك ولا صالحها , انت المفروض تشوفها قبل وسكت وهو ما يدري وش يقول بعدين كمل
اصايل اسمحي لي في اللي بأقوله بس هذا من مصلحتهم هم الاثنين او بالاصح من مصلحة العنود أكثر ما نبي نعرضها لمواقف سخيفه نبي نجنبها الاحراج
أصايل : فاهمه عليك وأنا رايي من رايك
بدر : وش قصدكم ؟
مشاري : بدر المفروض تشوف العنود قبل الملكه أنت ما تدري عن اللي صار بوجهها ولا تدري كيف صار شكلها علشان كذا لازم تشوفها قبل,, لازم يا بدر تخيل إحساس المسكينه لو شفتها يوم العرس وانصدمت بمنظرها وش بيكون حالها ذيك الحزه
بدر : أنا ما ابيها علشان وجهها وبس تفهمون والا لا اللي احسه تجاه العنود أكثر من إحساس الجاذبيه والافتتان , اللي احسه شي ما اقدر اوصفه لكم أنا ما انكر انها جميله بس جمالها شي وحبي لها شي ثاني . أنا بس من اسمع اسمها قلبي يفز حتى صوتها يوم سمعته حسيت اني بدنيا غير دنياي العنود ملكت قلبي وعقلي تفهمون علي والا لا
مشاري التفت على اصايل وهو مستغرب بعدين التفت على بدر وهو يضحك : وتقول علمني وشلون اتغزل !! تكفى داخل على الله ثم عليك أنت اللي علمني
بدر ضحك : انقلع مناك فاضي لك أنا
مشاري : طيب يصير خير انت خلك تتزوج ان ما نكدت عليك انت وهي وطينت عيشتكم ما اكون ولد ابوي
أصايل : وأنا معك
بدر : أعوذ بالله كل ذا حقد
دخل عليهم عبدالرحمن وهو شايل ولده : ما خلص غداكم ؟
اصايل : الا خالص بس نحتري خالي يقوم راح ينسدح ومابعد قام
عبدالرحمن : فهود من قام ما أكل شي
اصايل : هاته بروح اغديه هو و بدور
عبدالرحمن : تعبتك معي ومع ولدي يا اصايل
اصايل : وش دعوه فهود ولدي الثاني الا قل ولدي الاول على اساس ان بدوري هو ولد العنود
مشاري التفت على بدر : افتح ازرة ثوبك بالله بأشوف قلبك فز والا لا
اصايل خذت فهد وراحت وهي تضحك
بدر : وانت ما ينقال كل شي ؟
عبدالرحمن : وش السالفه ؟
مشاري : اخوك يقول كل ما سمعت طاري العنود فز قلبي
عبدالرحمن موب عاقل قيس زمانه
بدر بعصبيه : ما اردى منك الا هو , إذا حطوا الغداء علموني

***********************************

اليوم الثاني : كلم سلطان ساره وطمنها عليها وما طول معها وسكر بسرعه
وساره اكتئبت وحالتها صارت دمار مثل أول

بدر و العنود فرحتهم ما توصف من الفرحه نواف بعد كان عايش فرحته أخذ زوجته وسافر قبل لا يحضر ملاك العنود أما ساره وسلطان او بالاحرى سلطان اكتفى بالمكالمات السريعه اللي ما تتعدى دقايق معدوده

يوم الاربعاء :
رجعت ساره من الجامعه ورتبت أغراضها وراحت بيت أبو سلطان علشان تطلع معهم لبيت أبو أصايل ويحضرون ملاك العنود وتنام عندهم هاليومين
في الليل اجتمعوا العوايل في بيت أبو أصايل وفرحانين بس العنود ضايق صدرها لأنها مسمره في سريرها وما تقدر تتحرك الا بمساعدة أحد من أهلها وبنات عمانها وعماتها يتمسخرون عليها وخذوا لهم أقلام وقاموا يكتبون ذكريات ملكتها على الجبس وهي قاعده تضحك عليهم وساره حبت تستهبل ورسمت وحده كأنها عروس وحطت لها رجل وحده بس وحطت سهم وكتبت عليها العنود والبنات يضحكون
منى: أثرك فنانه يا ساره
ساره : هههههههههه توك تدرين
هيفاء : ايه بياكسو متلثم وحنا ما ندري
أصايل : بالله ارسمي صورة المعرس المزيون جنبها
ساره : طيب ابعدوا ابعدوا وقعدت تشخبط لين ما رسمت واحد شكله غبي وحطت سهم وكتبت بدر قيس زمانه
جواهر : قسم بالله أنكم مهبل وش خليتوا للبزراين ؟
ساره : خلينا ننبسط
حنان : والله هالجبس صاير كنه جدار مدرسه من هالشخابيط اللي فيه
العنود : بكره إن شاء الله بأفكه خلهم يوسعون صدورهم
التفتت ساره ولقت وجود جالسه تناظرهم وهي مستحيه
ساره نادتها : وجود تعالي حطي بصمتك على رجل العنود
وجود كان ودها تروح بس متردده ومستحيه
البنات حسوا فيها ونادتها العنود : وجيد تعالي مابقى الا أنتي
ساره : بسرعه وجود ترى مابقي الا مساحه صغيره إذا ما جيتي بألعب أنا ومنى فيها x – o
جت وجود وهي مستحيه وكتبت كم كلمه ووقعت
أما ريم كل شوي تتصل عليهم وهي منقهره لأنها في الاربعين وماقدرت تحضر ملكة العنود

ساره كان مبين عليها أنها مبسوطه ومستانسه بس في داخلها مندمره ونفسيتها تعبانه بسبب معاملة سلطان الجافه لها رن جوالها وكان رقم سلطان وماردت عارفه وش بيقول وعارفه انه بخير دام اتصل عليها فضلت انها ما ترد لأنها تعرف نفسها ما تقدر تسيطر على عمرها من تسمع صوته وتشوف اسلوبه معهاتنزل دموعها غصب عنها علشان كذا حبت انها ما ترد احسن من انها تحوس فرحة العالم وتنزل دموعها قدام الناس قامت وحطت جوالها عالصامت ورمته بالشنطه وهي معبسه

سلطان استغرب عقب ما اتصل مرتين ورن التليفون لين ما انقطع ومحد رد عليه

بدر عقب ما تم الملاك ووقعت العنود تمنى انه يدخل عليها ويأخذها ويروح هو وإياها لمكان محد يعرفه كان وده يأخذها ويبعد عن الناس كلهم بس آخر شي رضخ للأمر الواقع وقضب ارضه
مشاري : هاه عساك مبسوط ألحين
بدر : ما راح ارتاح الا إذا صرت انا وإياها بمكان لحالنا
مشاري : أه يالخبيث
بدر : محد خبيث غيرك
مشاري بصوت عالي : أقول يا خال المعرس وده شوف حرمته
بدر انصدم لأنه ما طلب انه يشوفها أصلا
أبو أصايل استغرب لأنه يوم قال لبجر قبل الملاك لازم تشوف العنود رفض
أبو أصايل سكت واستئذن يبي يشوف رأي العنود
دخل على العنود وقالها : العنود تجهزي بدر بيدخل عليك
العنود بصدمه : وشو
أبو أصايل : اللي سمعتيه
العنود بعصبيه : لو تنطبق السماء على الارض مانيب طالعه له
ابو اصايل : ووجع قصري صوتك
العنود : منيب طالعه عليه بهالجبس وهالوجه لو تذبحوني لو تلغون العرس بكبره وتطلقوني منه
أم أصايل : العنود لا تفضحينا مع الجماعه
العنود : أنا قايله لكم من الاول مانيب متملكه وأنا بجبسي وأنتو اللي حددتوا بدون ما تعلموني تحملوا ذنبكم
أبو أصايل : العنود وأنا أبوك
العنود قاطعة أبوها بعناد : لا تحاولون طلعه منيب طالعه تفهمون والا لا
أبو أصايل يكلم خواته وحريم أخوانه والبنات اقنعوها بتفشلنا مع الجماعه
الحريم والبنات حاولوا يكلمونها وهي معانده وراكبه راسها
اصايل: خلاص يبه بأكلم مشاري أخليه يفهم بدر
أبو أصايل وهو معصب : أعوذ بالله من غضب الله
أم أصايل : انت خل الرجاجيل يقلطون عالعشاء ثمن خذ بدر على جنب وقل له
ابو أصايل : الله يعين بس , يالله لا تفضحنا
طلع أبو أصايل وقلط الرجاجيل عالعشاء بعدين نادى بدر وطلع معه للمجلس الثاني
أبو أصايل : والله يابدر مدري وش أقولك والله أني منحرج منك
بدر : خير يا خالي ؟
أبو أصايل : والله أنت عارف أن العنود لين ألحين مجبسه رجلها ومابعد فكتها ولا تتحرك من السرير واجد وعاد هي يوم قلت لها أنك تبي تشوفها استحت وتفشلت تقول ما ابيه يدخل علي وأنا عالسرير
بدر ابتسم : ما عليه يا خالي لا تجبرها أدري انها مستحيه وأنا مثل ما انت شايف ماقلت شيلأني عارف حالتها وما بغيت أحرجها بس مشاري الله يصلح هو اللي تكلم
أبو أصايل : عالعموم هي بكره موعدها بتفك الجبس إن شاء الله والله يحيك بعد العشاء تعال وشفها وأجلس معها لين يطيب خاطرك
بدر : زين يا خالي ماصار الا الخير لا تنحرج ولا شي السالفه ما تسوى
أبو أصايل وهو منقهر : من ألحين أقولك الله يعينك عليها تراها عنيده راسها يابس
بدر : ههههههههههه ولا يهمك يا خالي أنا بألين راسها إذا خذتها
أبو أصايل ابتسم : الله يقويك ويكون في عونك , يلله أمش خلنا ندخل مع الرجاجيل
بدر : اسبقني يا خال بأدق أبرتي وألحقك

سلطان في جهه ثانيه كان قلقان ونفسيته مو بعيده عن نفسية ساره وطلع وجلس في الصاله
متعب : وش فيك يا سلطان ؟
سلطان : احس اني تعبان تعبت من هالدنيا مدري متى بأرتاح
متعب : وش متعبك يا خوي فضفض تكلم طلع اللي في صدرك
سلطان : متعب أنت شايف عيشتي ضايع منيب عارف ارض من سماي علاقتي مع ساره متوتره وفيونا اللي مدري من وين طلعت لي
متعب : أنت لو تشيل الحقيره ذيك من راسك بتتعدل أوضاعك
سلطان : وش دخل فيونا بعلاقتي مع ساره
متعب : على بالك انا غشيم وما أحس فيك أنت من طلعت فيونا مره ثانيه وأنت مكالمتك مومثل أول مع ساره كل مكالمتك ما تتعدى الدقايق كلها كيف الحال واخباركم وتقفل بالله أمس مكالمتك حتى الخمس دقايق ما تعدت اول ما وصلنا كنت تكلمها بالساعات بس من طلعت اللي ما تتسمى وأنت متغير حتى نفسيتك تغيرت اول ما وصلنا كنت تسولف وتضحك وكل مما فضيت اتصلت على زوجتك أما الحين قبلك قافل على عمرك بغرفتك والا قابر عمرك بالشغل
سلطان : متعب انت ما تعرف وش اللي في قلبي صدقني فيونا ما غيرت شي فيني من ناحية ساره , المشكله في ساره نفسها بتجنني هالبنت يوم جلست يومين ما كلمتها بغت تموت من الخوف علي واتصلت على ابوي تسأله عني وأول ما كلمتها جلست تصيح من خوفها علي وعقب ما تطمنت علي وجلسنا نسولف مدري شلون دخلنا في سالفة الحب وهالامور وسألتها قلت لها تحبيني قالت لاتتوهم وشو حبه
متعب : طيب أنت قلت لها انك تحبها
سلطان رفع راسه وقام يناظر متعب بإستغراب وكأنه قاعد يتكلم بلغه ما يفهمها : أحبها ؟؟
متعب : أيه موب أنت تحبها
سلطان : وش قاعد تخربط أنت ؟
متعب : ليش أنت ما تحب حرمتك ؟
سلطان : احبها عاد ؟
متعب يناظر سلطان ووده يقوم يخبطه على راسه : إذا ما حبيت حرمتك من تحب أجل
سلطان سكت وقام يناظر متعب وما عنده رد
متعب : سلطان أنا أعرفك زين واكثر من أي أحد في هالدنيا أشوفك إذا جيت تكلم ساره ذيك الايام شلون تصير مبسوط ومستانس من تسمع صوتها والا بتسامه تشق وجهك وإذا صكيتها نها نفسيتك تتغير بالله عليك هذا وش يسمونه
سلطان : صحيح أحس بشي ناحية ساره بس ما يوصل للحب
متعب : أجل وش تسمي هاللي تحس به
سلطان : مدري
متعب وهي يبتسم : هذا اسمه حب يالحبيب
سلطان بعصبيه : حب في عينك , لا تنسى أني قد حبيت من قبل واعرف وشهو الحب
متعب : وتسمي معرفتك في ذيك الوقحه حب سلطان أنا عشت معك في التجربتين وصدقني ما عمري شفتك مبسوط كثر ما اشوفك مبسوط من تسمع صوت ساره حتى حرصك عليها وعلى مكالمتها وكل مره تكلم فيها ابوك وجدك توصي عليها وحزنك يوم سافرنا.. لا تقول إن كل ذا موب حب أنت حطيت في بالك أن اللي كان بينك وبين فيونا حب وخليت هالشي يرسخ في بالك وما عندك أي نيه تقتنع بغير هالكلام مع انه غلط من أساسه, اللي بينك وبين فيونا أبدا ما كان حب يمكن تفاهم ويمكن صداقه قويه بس أبدا ما كان حب.. انت اجلس مع نفسك واسأل عمرك هل الاحساس اللي تحسه مع ساره هو نفس إحساسك يوم كنت مع فيونا ؟ سوالفك حرصك وناستك نبضات قلبك لهفتك أسأل نفسك إذا كنت جربت كل هالاشياء يوم كنت مع فيونا والا لا .. بعدين أنت شلون تبي ساره تحبك وانت تعاملها هالمعامله عمرك قلت لها انك تحبها والا قلت لها انك تشتاق لها قد مر عليك يوم وخذتها بحضنك وقلت لها كلام حلو ؟؟
سلطان : قربت منها مره وحضنتها بس شكلها خافت مدري استحت وبعدت عني
متعب بإستغراب : وش قصدك استحت ؟
سلطان : ما بعد تعودت علي ولا تعودت اني اصير قريب منها
متعب متفاجأ : ليش انت ماقد لمستها ولا قربت منها ؟؟
سلطان سكت وطمن راسه
متعب بإستغراب : لا تقول ما بعد لمستها ولا قربت منها
سلطان هز راسه وهو ساكت
متعب : صاحي أنت ؟؟
سلطان سكت ما يدري وش يقول جلس يكلم نفسه آه بس ما تدري وشلون اتعذب إذا صرت جنبها كل مره اكون قريب منها واشم عطرها ودي اخذها واضمها وخليها بحضني ما تدري وشلون اتعب علشان اسيطر على عمري لأني ما ابي ما اخوفها
متعب : سلطان راجع حسابتك وفكر في حياتك وحياة البنت اللي ما تدري هي متزوجه والالا , إذا تبي تعرف ساره تحبك والالا فكر ليش هي تحملت وجلست معك ووافقت تعيش معك هالحياة حتى لو هي انكرت وقالت ما احبك ترى هي عندها كرامه ما اتوقع ان فيه بنت في العالم ترضى تنزل من قدرها وتقول احبك لواحد يتعامل معها بنفس اسلوبك ,ترى المبادره دايم تكون من الرجال لا تنسى أ المرأه بطبعها تستحي أنت ماسألتها هي تحبك والا لا إلا وانت متأكد من هالشي صح والا لا ؟؟

جلس سلطان وهو ساكت ومارد بكلمه ولا علق على كلام متعب
متعب حب يخلي سلطان لحاله وراح ودخل غرفته وهو يدعي أن الله يهدي سر سلطان ويطمن باله

اتصل سلطان مره ثالثه على ساره وماردت قام واتصل على خالد اخوها منها يسلم ومنها يتطمن
خالد : هلا حي الله النسيب
سلطان : الله يبقيك ويسلمك
خالد : وش اخبارك وش علومك وش الدنيا بك
سلطان : والله مشاغل الدنيا , أنت وش اخبارك وش اخبار الاهل بشرني عنكم
خالد : والله الحمدلله كلنا بخير
سلطان : الله يديم عليكم الخير يارب
خالد : انت وش اخبارك دايم اسأل عنك ساره واقولها سلمي عليه بس شكلها من تسمع صوتك تخق وتنسى
سلطان : هههههههه لالا تخاف وصلت لي سلامك مره
خالد : شف النكبه مره وحده بس وأنا كل يوم اقولها سلمي على سلطان
سلطان : حتى أنا دايم اقول سلمي عالاهل
خالد : ابشرك ما قد وصلت لنا سلامك أقولك من تسمع صوتك والا يحي طاريك تخق علينا
سلطان : ههههههههههههه يا حبك للكذب
خالد : أكذب !! أيه بلاك ما شفتها من رحت وهي صايره جلد على عظم ما تأكل ولا شي وصايره عصبيه حد ما تصارخ وهي داخله وطالعه وكل ما قلنا وش فيك قالت مافيني شي لين ما فضحتها سوسن وقالت انك السبب عاد تعال شف وجه سويره يوم فضحتها سوسن قدامنا بغت تقوم تذبح سوسن بس ربك ستر
سلطان استانس من كلام خالد : ههههههههههههههه ولو سمعتك الحين ذبحتك
خالد : عاد خلك رجال ولا تقولها اني علمتك
سلطان : لا توصي أصلا منيب قايل لها اني كلمتك تطمن يالخواف
خالد : خواف ! يا رجال ذي فيها قص رقاب وفيها لسان سويره اللي وش طوله
سلطان : يلله أجل ما اطول عليك بس قلت اسلم واتطمن عليك واشوف اخبارك
خالد : ما تقصر يابونسب
سلطان : الا اتصل على ساره من شوي وما ترد علي
خالد : ايه ساره في بيتكم تو اسأل امي عنها قالت انها راحت لبيت اهلك
سلطان: زين ما اوصيك عالمدام
خالد : تطمن لا توصي مدامتك في عيوني غصب علي طبعا
سلطان : ههههههههههه ايه خلها بعيونك دايم , يالله فمان الكريم
خالد : فمان الله , الله معك

***********************************



في بيت أبو أصايل : أم سلطان يلله يا ساره نمشي تأخر الوقت وريم لحالها في البيت
ساره ابتسمت : لا تخافين عليها فيصل معها
أم سلطان : هي قالت لك
منى : ايه يوم اتصلت على طارق قال ان فيصل تعشى وطلع بسرعه راح لريم
أم سلطان : بعذرها هجدت اشوف لها ساعتين ما اقلقتنا بمكالمتها
النود : لا أحد يروح تونا مستانسين
أصايل جت وجلست جنب العنود وبصوت واطي مشاري يقول ان بدر آخذ رقمك ويبي يكلمك
العنود : أصايل لا تكفين
أصايل : وشو اللي لا
العنود : مابي اكلمه ولا ابي اشوفه لين يوم العرس
أصايل: تستهبيلن انت والا جاده
العنود : لا والله جاده تكفين أصايل كلمي مشاري قولي له مابي أكلمه
أصايل: يلله عاد عن المصاخه والدلع الرجال بيموت علشانك وأنت ولا همك
العنود : حتى أنا بأموت علشان أكلمه بس إذا كلمته وقال بأشوفك منب قادره ارده
أصايل : اقول ورى ما تلفقينه وتتصرفين مثل الحريم
العنود : أصايل راعي مشاعري توني مالكه عليه مالي كم ساعه
أصايل: عنيده انثبري عاد أنا ملك علي مشاري وطلعت اجلس معه موب كلمته وبس
العنود انت ما تستحين انا استحي
أصايل تناظرها بعصبيه
العنود : علشاني أصول قولي له موب اليوم بكره عالاقل تكفين تكفين
أصايل : أمري لله موب جاي العرس الا وبدر طالع في راسه نخل بسببك
العنود : يالبى راسه بس
اصايل : بتجلطيني أنت
العنود : اللي يكرهونك يارب
أم أصايل : وش عندكم أنت وهي ؟
أصايل قامت من عند العنود وهي تقول : ولا شي يمه ولا شي
كلمت أصايل مشاري وقالت له وهي مبسوط لأنه صاير مرسال الغرام لبدر ووده يذله شوي
مشاري راح لغرفة بدر ودخل عليه
بدر : ما تعرف تطق الباب ؟
مشاري : لا
بدر : أجل تعلم بكره بيصير عندي حرمه تبي تدرعم وبس
مشاري : على طاري الحرمه اتصلت علي أصايل تو وتقول ان العنود تعتذر عن استقبال المكالمات الهاتفيه اليوم
بدر : وشو ؟
مشاري : اللي سمعته
بدر : مشاري عن الاستهبال ورفعة الضغط
مشاري : والله العظيم نيب استهبل ولا امزح تو كلمتني أصايل وقالت أن العنود مستحيه اليوم ومنحرجه وتقول لا يكلمني اليوم
بدر : من جدك أنت ؟
مشاري : أي والله حلفت لك
بدر : وش سالفتها ذي اليوم مارضت ادخل عليها ومكالمات ما تبي ترد علي لا تكون مغصوبه علي مثل ما انغصبت على نايف
مشاري : مغصوبه !! مستحيل العنود تحبك وتموت عليك انت داري أنك من خطبتها وهي كل يوم تتصل على اصايل بس علشان تسأل عنك
بدر : صدق ؟
مشاري : اسأل أصايل
بدر : أجل ليش تتصرف كذا
مشاري : يمكن صدق مستحيه ترى هي منطويه على نفسها شوي موب إجتماعيه
بدر جلس شوي يفكر وهو مستغرب حركة العنود وسالةف الحياء ما دخلت راسه
بدر : مشاري أبي منك خدمه
مشاري : وشهي ؟
بدر : أبيك تعرف متى موعد العنود بكره في المستشفى
مشاري : ليش ؟
بدر : أبي اروح معها للمستشفى
مشاري : ألحين مكالمه ما رضت تكلمك تبيها تطلع معك لا وللمستشفى ويكشفون عليها قدامك !! تحلم أنت ؟
بدر : مشاري ابيك تساعدني أنت وأصايل أبي أكلمها بأي طريقه تكفى مشاري طلبتك
مشاري بإبتسامه خبيثه : كم تدفع طيب
بدر : وأنت دايم مصلحجي ما تسوي شي لله
مشاري :اخلص علي تب اساعدك ادفع لي
بدر : طيب دبرني وابشر باللي تبيه خلني اشوفها اول
مشاري : بأكلم أصايل واتشاور معها وندبر لك حل
بدر : زين عطني خبر اول بأول تكفى
مشاري: الله يعينك على بلواك

***********************************


سلطان جلس يفكر في كلام متعب كان محتار يحس ان كلام متعب صحيح بس ما يدري وش اللي مانعه من الاعتراف لنفسه وللعالم بهالحقيقه

ساره طلعت مع ام سلطان لبيتهم ودخلت ولقت ريم في غرفتها وعندها فيصل
أم سلطان : تعالي ياساره أنا قلت للخدامات يحطون أغراضك في غرفة سلطان , ريم قالت أنك بتكونين مبسوطه في غرفته أكثر من أي مكان
ساره سكتت وما علقت مع أن ودها تنام في غرفة سلطان الا أنها عارفه انه بيزعل إذا درى أنها تطفلت على غرفته
دخلت ساره الغرفه وكان واضح ان الغرفه رجاليه من أثاثها والاغراض اللي فيها كان فيها بعض اغراض بسيطه من اغراض سلطان كم عطر عالتسريحه وفي الدولاب كم قطعه من ملابسه جت تفتح الاراج بعدين حست انها قليلة ادب لو فتشتها حطت ملابسها في الجهه الفاضيه من الدولاب وباق الا غراض حطتها عالتسريحه جنب اغراضه دخلت الحمام وغسلت وجهها واسنانها بعدين طلعت ولبست بيجامتها ودخلت السرير وهي ترتجف ما تدري ليه جلست شوي تسوتعب الوضع وهي منسدحه على ظهرها بعدين تذكرت انها تركد الجوال علشان تقوم الصباح وتنزل تفطر مع حمولتها طلعت الجوال وشافت مكالمات سلطان وترددت ودها تكلمه وتسمع صوته وودها تطنشه آخر شي اتصلت عليه
سلطان كان منسدح ويهوجس رن جواله وشاف رقم ساره ورد
سلطان : آلو
ساره : مرحبا
سلطان : يا هلا
ساره : صحيتك ؟
سلطان : لا ما بعد نمت
ساره : اشوى خفت اني صحيتك
سلطان : لا تطمني كنت صاحي
ساره : آسفه ما رديت على مكالماتك كان جوالي عالصامت
سلطان : خفت عليك
ساره تكلم نفسها حس بتأنيب الضمير يمكن !! والا قال كذا من باب الواجب
ساره : لا كنا في ملاك العنود اليوم
سلطان : ماشاء الله اليوم تملكت
ساره : أيه الله يوفقها يارب
سلطان : آمين
سلطان : رحتي مع أهلي ؟
ساره : أيه قبل كم يوم خالي قالي تعالي عندنا كم يوم واليوم رحت لبيتكم
سلطان : بتنامين في بيتنا ؟
ساره : أيه
سلطان : بتنبسط ريم أجل
ساره : لا ريم عندها فيصل يمكن ينام عندها
سلطان : وأنت وين جالسه أجل ؟
ساره بإحراج خالتي حطتني بغرفتك
سلطان : بغرفتي ؟
ساره وهي مستحيه : سلطان إذا ما ودك بأقول لخالتي تشوف لي غرفه ثانيه ادري أنه وقاحه مني استخدم غرفتك وأنت مو موجود بس خالتي هي اللي قالت لي اجلس فيها
سلطان : ساره وش هالكلام وش وقاحته أنت زوجتي وغرفتي هي غرفتك أنا وأنت واحد بالعكس أنا مبسوط عالاقل بأكون على بالك هاليومين
ساره كان ودها تصرخ وتقول ارسى لك على بر ما عمرها شافت واحد مزاجه يتقلب بسرعه مثل سلطان حست انها لو تعيش معه مليون سنه مستحيل تفهمه !!
سلطان حب يقطع الصمت : شلونك ساره ؟
ساره : الحمدلله بخير , أنت شلونك ؟
سلطان : بخير الحمدلله مع ان الاسبوع كان ضغط بشكل رهيب ,, سلطان كان وده يصلح اللي الامور ما بينهم وما يدري وش يسوي
ساره : الله يكون في عونك ويساعدك
لطان : كيف الاهل ؟
ساره : كلهم بخير ويسلمون عليك
سلطان ابتسم ما خقت على قول خلود يمكن زعلانه : الله يسلمك وإياهم
سلطان : أجل جالسه بغرفتي
ساره بحياء : أيه بس والله ما فتشت شي
سلطان : هههههههههه خذي راحتك حلالك سوي اللي تبين اصلا ما صارت غرفتي
ساره بإستغراب : أيش ؟
سلطان : أنا ما عندي الا غرفه وهي غرفتنا وفي بيتنا
ساره مسكت الجوال وتناظر فيه وهي ميب مصدقه اللي قاعده تسمعه ما تدري تضحك وتنبسط والا تزعل لأنها عارفه ان الامور ما تصلح بينهم الا لأنها بتتعقد بصوره أكبر وسكتت ما تدري وش تقول
سلطان : ساره وينك ؟
ساره : معاك
سلطان : أنا آسف الاسبوع اللي راح مكالمتي لك كانت قليله ومستعجله بس مثل ما قلت لك ضغوط
ساره : معذور يا بعدي
ساره تحاكي نفسها أعتذر والا لا كانت متردده ومحتاره ماتدري وش تقول والا وشلون تبرر موقفها ...
ساره : سلطان أنا آسفه
سلطان : على وشو ؟
ساره بإحراج : سلطان لا تعصب الموضوع علي
سلطان : ساره صدقيني ماني فاهم وش تقصدين ؟
ساره بإرتباك : سلطان ذاك اليوم يوم طريت الحب ومالحب تمسخرت وضحكت بس والله ما كنت اقصد اني اتمسخر
سلطان : أجل وش كنت تقصدين ؟؟
ساره : صدقني بيجي اليوم اللي تعرف فيه قصدي وتعرف ليش رديت بذاك الرد
سلطان : وليش ما تقولين لي ألحين وش اللي يمنع ؟
ساره : سلطان تكفى لا تضغط علي ألحين
سلطان ابتسم وما حب يسكر السماعه الا لين يخليها تقول كل اللي في خاطرها
سلطان : يعني أفهم من كلامك أنك تحبيني
ساره بخوف وارتباك وحياء : سلطاااان
سلطان : عيونه
ساره من كثر ما هي مرتبكه وخايفه ما انتبهت للكلمه اللي رد فيها عليها
ساره : قفل عالموضوع سلطان
سلطان : ساره قوليها
ساره سكتت وما ردت
سلطان : ساره تسمعيني ؟
ساره : أيه
سلطان : قولي احبك ابي اسمعها منك
ساره بإحراج : سلطان يكفي
سلطان : أدري انك تحبيني صح والا لا
بعد سكتت ساره وما ردت
سلطان : زين قولي أيه عالأقل
ساره وهي متفشله : أيه
سلطان : وأخيرا ما بغت تطلع زين يالله الكلمه الثانيه قوليها وريحيني ابي اسمعها منك
ساره : سلطان الله يخليك كافي
سلطان : ساره تكفين
ساره : إذا رجعت من السفر
سلطان : آه منك مستكثره علي كلمه وحده لو انت قدامي خليتك تقولينها بالغصب
ساره عقب ما اعترفت كانت تبي تغير الموضوع وسألته : كيف الحال سلطان
سلطان : لا تغيرين الموضوع وتعالي قولي ليش عصبتي ذاك اليوم مع انك تحبيني
ساره : خفت تزعل
سلطان بإستغراب : أزعل !! أنت ما تدرين وشلون أنا مبسوط ومستانس يوم عرفت أنك تحبيني
ساره : صدق ؟
سلطان : أي وربي حسيت أني اسعد واحد في الدنيا
ساره : بس يوم كنا في فرنسا تذكر يوم قلت نستمر سنه ..
سلطان قاطعها :ساره انسي كل اللي قلته من قبل وكل اللي صار فيه كلام كثير بأقوله لك وأشياء كثيره بتتغير أول ما ارجع إن شاء الله
ساره : وشهي ؟
سلطان : ياشفاحتك مافيك صبر لين ما ارجع ؟
ساره : لا
سلطان : أجل اجلسي كلي في عمرك لين ما ارجع
ساره : سلطاااان
سلطان وهو يبتسم : لا تحاولين
ساره : الله يخليك
سلطان : أبدا
ساره : وأنا وش يصبرني لين ما ترجع
سلطان : علمي نفسك
ساره بمزح : خبيث
سلطان بنفس الاسلوب : نجسه
استمروا على هالحال طول المكالمه وكل ما حاول سلطان يرجع للموضوع غيرت ساره السالفه لين ما سكت من نفسه وما حب يضغط عليها
أذن الفجر وحست ساره انها صدق طولت مع أن ما ودها تسكر بس الوقت تأخر ويمكن خالتها والا خالها يجون يطقون عليها الباب علشان يقومونها للصلاة
ساره : سلطان
سلطان : لبيه
ساره : آذن الفجر
سلطان : طولت عليك
ساره : لا بس ودي اسكر قبل ما يقومون أهلك
سلطان : زين يا بعدي روحي الحين صلي ونامي وبأكلمك قريب إن شاء الله
ساره : زين تصبح على خير
سلطان : تلاقين الخير
ساره : فمان الله
سلطان : في حفظ الله انتبهي لنفسك
ساره : وأنت بعد
سلطان : من عيوني , يلله مع السلامه
ساره : مع السلامه

********************************************
اليوم الثاني بيت ابو بدر

دخل مشاري على بدر
بدر : هاه بشر وش سويت بالموضوع ؟
مشاري : تدري على حالتك ذي المفروض نسميك بودرو على وزن روميو
بدر وكبده حايمه من مصالة أخوه : يا خف دمك
مشاري بأبتسامه عريضه : أدري
بدر : اخلص
مشاري : اتصلت على اصايل وقلت لها قالت خلاص بتخلي السواق يوديهم للمستشفى وانت خلك هناك قبل الموعد واول ما يوصلون بتقول أصايل للسواق يرجع للبيت وأنت عاد خلك معهم لين ما يخلصون بعدين رجعهم للبيت
بدر: طيب خالي يدري عن الموضوع ما ابي اخها معي وهو ما يدري
مشاري : ايه اصايل تقول قلت وقال احسن بعد علشان تتعود عليك بعد
بدر : طيب أنا ابي اسولف مع العنود لحالنا
مشاري : سولف من ساد فمك
بدر : حرمتك النشبه بتكون موجوده
مشاري : بعععد حرمتي صارت نشبه ؟
بدر : يا خوي قدر الموقف حط نفسك مكاني
مشاري : وش تبينا نسوي لك يعني
بدر : تجي معي للموعد وتأخذ حرمتك أول ما توصل
مشاري: لا والله مسخره على آخر عمري صاير أخدم عند البيه بدر ومدموزيل العنود
بدر : مشاري إذا ما فزعت مع اخوك الحين متى تفزع معه ؟
مشاري : آه بس تدري اني مقدر ارفض لك طلب
بدر نط عند اخوه وباسه
مشاري : الله يستر من عنيده هذي ما بعد دخلت بيتنا سوت فينا كذا أجل إذا شرفت وش بيصير ؟
بدر : موب صاير إلا كل خير إن شاء الله

*********************************************

العصر وصلت العنود مع اصايل للمستشفى وراحت أصايل وجابت كرسي علشان تدف العنود وتوصلها لغرفة الدكتور وأول ما وصلت لغرفة الدكتور وقبل ما تدخل رنت على جوال مشاري رنه وانتظرت شوي بعدين شافت بدر جاي من بعيد والعنود ما كانت منتبهه وصل بدر عندهم بعدين تكلم : السلام عليكم
العنود من قبل ما ترفع راسها وتشوفه عرفته بصوته وشهقت
أصايل ردت السلام وهي تنغز العنود علشان ما تقول شي
بدر : أصايل مشاري ينتظرك
أصايل : يلله أجل عن أذنكم
العنود مسكت في عباية أصايل وكنها بزر ماسك عباية امه
أصايل سحبت عبايتها بقوه وراحت بسرعه والعنود معصبه وما تدري وش تسوي ما توقعت أن اختها تسوي فيها هالمقلب ومع بدر يالذات
بدر : العنود وش فيك خايفه ؟
العنود سكتت وما ردت
بدر نزل لين ما صار في مستواها ومسك يدها : العنود لا تستحين ولا تخافين أنا ما صدقت أن هاللحظه تجي علشان اشوفك او اسمع صوتك عالاقل وتنهد بصوت مسموع بعدين كمل : آسف إذا ضايقتك بجيتي بس حبيت أكون معك في هاللحظه بس إذا أنت متضايقه أنا مستعد اروح واتصل على اصايل اخليها ترجع وتحرك من مكانه وجاء يسحب يده بس هالمره العنود اللي مسكته التفت عليها بدر وابتسم لها وسألها : تبيني أجلس معك ؟؟
هزت راسها وهي مستحيه
بدر : يلله أجل خلينا ندخل عالدكتور
دخل بدر وهو يدف كرسي العنود عالدكتور وقام الدكتور يسألها كم سؤال وهي تجاوب وهي منحرجه ومستحيه وبدر ساكت
والتفت الدكتور على بدر وسأله : أنت أخوها ؟
بدر ابتسم : لا زوجها
العنود حست بشي حلو يسري في جسمها يوم سمعت كلمة زوجها هالكلمه لها انبسطت ووحست ان لها طعم على انها كلمه بسيطه من كم حرف الا ان احساسها وهي تسمعها غير خصوصا وهي طالعه من فم بدر
الكتور حول سؤاله للعنود : مدام العنود انت حامل
العنود انحرجت واستغربت وودها تقوم تكسر المكتب على راس الدكتور مع ان سؤاله يعتبر عادي لأنه دكتور اولا ولانه ما يدري عن حياتها أصلا
ردت عليه : لا
الدكتور : متأكده
العنود كان ودها تقوم تصرخ في وجه الدكتور
بدر التفت عالدكتور وهو رافع حواجبه
الدكتور فسر لهم الموضوع : أنا بأحولها على قسم الأشعه علشان نتأكد من الجبر قبل ما نفك الجبس وجبيت أتأكد إذا المدام حامل أولا لأن الاشعه مثل ما تعرفون خطره عالحوامل
كتب لهم الدكتور التحويل وراحت وسوت الاشعه ورجعت وطمنها الدكتور أن رجلها جبرت وطلب منها تجلس عالسرير ونادى الممرضه تساعدها علشان يشيلون الجبس بس بدر قام معها وساعدها بدال الممرضه ومسك يدها ووقف جنبها
اول ما رفعت الممرضه الشرشف هي والدكتوره التفتوا على بعض يوم شافوا الرسومات اللي عالجبس والتواقيع , رفع الدكتور راسه لبدر وقعد يضحك هو وإياه
الدكتور علشان يلهي العنود عن منظر المقصات والمشارط اللي بتقص الجبس كمل سوالفه وهو يضحك : هذا رسمك يالعنود
العنود تمنت الارض تنشق وتبلعها من الفشيله قامت تدعي على بنات عمها وعلى ساره وعالساعه اللي خلتهم يشخبطون فيها ما تدري هي متفشله من الدكتور السعودي اللي قاعد يتمسخر والا من بدر اللي قاعد يضحك حتى الممرضه قاعده تضحك
الدكتور يتمسخر : ماشاء الله زوجتك موهوبه
بدر وهو يضحك : أيه أدري لها مستقبل مشرق في الفن التشكيلي
العنود ماتدري تضحك والا تصيح
الدكتور : تقدرين إذا خلصتي تأخذين الجبس معك وتحطينه لوحه في بيتكم
بدر حس ان العنود معصبه من مسكتة يدها بس ما قدر يسكت وقعد يضحك
الدكتور : بس لو أنكم استفدتوا من هالمساحه وخليتوا عيالكم يتعلمون فيها الكتابه كان افضل , وسأل بدر : عندكم عيال ؟
بدر : لا
الدكتور : الله يرزقكم الذريه الصالحه
بدر : اللهم آمين
الدكتور بعد ما خلص وفك الجبس : الحمد لله عالسلامه
العنود : الله يسلمك
الدكتور وهو يكلم بدر : طبعا ما اوصيك لا تتحرك كثير ولا تمشي كثير الا فضل ترتاح كم يوم قبل ما تمشي عليها
بدر : إن شاء الله يا دكتور
الدكتور : إذا تبون الجبس للذكرى تقدرون تأخذونه
بدر : ههههههههههههه أكيد بنأخذه وسلم عالدكتور وشكره بعدين راح ومسك العنود وطلع هو وإياها

بعد ماركبت العنود السياره التفت عليها بدر : اقول الحمدلله عالسلامه والا مبروك ملاكنا
العنود بحياء : الله يسلمك ويبارك فيك
بدر : شلونك يالعنود ؟
العنود : بخير الحمدلله , أنت شلونك
بدر : دامني معك فانا بألف خير
العنود : دوم يارب
بدر : تدوم أنفاسك يارب ومسك يدها ورفعه لفمه وباسها
العنود شعوهرا ما يوصف من الحياء
بدر : ليش مستحيه مني أنت زوجتي ألحين
سكتت وما ردت
بدر وهو ماسك يدها : عنوده حبيبتي تكفين عاد ابي اسمع صوتك ابي أسولف معك ما أبيك تستحين
العنود : أنت تأمر
بدر : الله لا يحرمني منك , وألحين وين نروح الدكتور ومانعك من المشي والبيت ما نبي نروح له
العنود : عادي ترى اقدر امشي
بدر : وتبيني أخليك أنا ما صدقت على الله قمتي بالسلامه , خلينا نروح أي كافي نجلس فيه
العنود خافت انهم إذا راحوا لكافي يقولها تكشف وجهها وهي ما تبيه يشوفها قبل لا تبدأ تعالج وجهها
العنود : خلنا ندور بالسياره أحسن
بدر : تأمرين أمر كم عنوده عني
العنود : يسلمك ربي
تمشوا شوي بعدين تكلم بدر : أمس خالي سألني قال متى تبي العرس وقلت الرأي راي العنود
العنود : وأنت متى تبيه
بدر : انا لو تقولين اليوم قلت هذي الساعه المباركه
ابتسمت العنود : مستعجل
بدر : لا تلومني العذاب اللي عشته موب سهل
العنود : الله لا يعيد ذيك الايام
بدر : آمين وكمل : وش رايك نخليه بعد شهرين ؟
العنود خافت ان الوقت ما يساعدها علشان العلاج : عطني فرصه كم كم يوم اشوف اموري واشوف كم الوقت اللي اقدر اجهز نفسي فيه بعدين ارد لك
بدر : العنود أنا أبيك بملابسك اللي عليك إذا اخذتك انا بأجهزك باللي تبين
العنود : بدر
بدر : يالبى من قال بدر عيونه وقلبه
العنود : تسلم لي يارب , عطني فرصه أدري انك مستعجل بس ما يصير ما اجهز نفسي
بدر : زين لا تطولين علي
العنود : لا إن شاء الله ما راح أطول
بدر : والعرس تبينه كبير والا مختصر
العنود : اللي يريحك
بدر : أنت تستاهلين أحسن عرس في الدنيا بس أشوف ان العرس الكبير بيأخر الموضوع زياده وش رايك نسوي عرس مختصر أحسن
بدر كان خايف على مشاعر العنود إذا حط عرس كبير عارف أن الناس ما راح يخلونها في حالها وبيوصلها كلام عن اللي صار بوجهها وعن تشوهها وهالشي خلاه يستعجل الامور ويكتفي بعرس مختصر
العنود : خلاص اللي يريحك
بدر : أجل العرس يكون مختصر والتاريخ أنت اللي تحددينه بس لا تأخرينا كثير
العنود : إن شاء الله
بدر : ليش أمس ما خليتني ادخل عليك
العنود بإحراج : ما كنت مستعده
بدر : ما يحتاج تستعدين
العنود تكلمت وهي مرتبكه : بدر ممكن أطلب منك طلب
بدر : انت تأمرين أمر مو بس تطلبين عيوني لك
العنود : تسلم العيون وراعيها , بدر أنا ما ابيك تشوفني قبل يوم العرس
بدر التفت عليها مستغرب : ليش ؟؟
العنود : من غير ليش تكفى قول تم
بدر ضاق صدره من طلبها ما يدري ليش طلبت هالطلب بس ما قدر يردها
بدر : مع أن طلبك صعب علي حيل واحبطني إلا أني ما اقدر أردك
العنود : مشكور ياقلبي الله لا يحرمني منك
بدر : ولا يحرمني منك بس إذا هذا طلبك لا تستغربين إذا كل يوم كلمتك وحاولت اقنعم تعجلين بالعرس
العنود : إن شاء الله موب صاير الا اللي يرضيك
بدر : آه يالعنود وربي منيب مصدق أني معك وانك صرتي زوجتي أحس اني أحلم
العنود : موب انت لحالك حتى انا
بدر : تحبيني يالعنود ؟؟
العنود بحياء : احبك أكثر من روحي
بدر : الله لا يحرمنا من بعض قولي آمين ويتمم علينا فرحتنا
العنود : آمييين

كملو سوالفهم وهم يتمشون مع بعض لين ما أذن المغرب ونزل العنود في بيتها وقلبه وعقله معها بس وعدته انها تكلمه في الليل وهالشي طمنه انها خذت عليه اكثر من أول ...

سلطان .. ساره .. فيونا .. ؟؟؟
بدر والعنود والمستقبل اللي ينتظرهم واللي ماكانوا متوقعينه ؟؟

يتبع ...

الجزء الواحد والخمسون

العنود بدت بعلاج وجهها وكان محدد لها تنتهي من علاجها بعد شهر ونص واتفقت هي وبدر يكون زواجهم بعد شهرين لأ نها ما تدري عن الوقت اللي تحتاجه عقب العمليه ,, أما سلطان وساره كانوا سمن على عسل ومافيه أحلى منهم الا أن سلطان كان متضايق شوي لأن فيونا بين كل فتره والثانيه تطلع له او تتصل عليه وتحاول تصلح اللي بينهم والمشكله مايدري وش اللي منعه وخلاه يتغاضى عن تصرفاتها.. كل مره يحاول يفهمها ويهاوشها بس يتراجع في آخر لحظه !!

سوت العنود العمليه و بالعافيه قدرت تتكتم على موضوع التجميل وحلفت ابوها انه ما يقول شي لبدر أو يعلمه وأهلها ما كان عاجبهم أنها تدخل المستشفى وتسوي عمليه وزوجها ما يدري بس آخر شي رضخوا لرغبتها ..
أول ما طلعت من غرفة العمليات كان أبوها وأمها وأصايل ينتظرونها في غرفتها ومتوترين لأن العمليه لو ما تنجح بتنهار العنود وبنات عمها وساره كلهم قلقانين عليها وكل شوي يتصلون يسألون عنها ..
طبعا العنود كانت مخدره ومابعد صحت من البنج راح أبوها للدكتور وسأله عنها وطمنه أن العمليه نجحت وأن وجهها رجع مثل أول وأحسن .
بدر مايدري ليش قلبه قابضه عالعنود من الصبح يتصل عليها وجوالها مقفل مع انه مو من عادتها تقفله حتى وهي نايمه كانت تخلي جوالها مفتوح .. اتصل اكثر من مره ونفس الشي !! بدى يقلق عليها قام اتصل عالبيت وردت عليه الخدامه وقالت أن العنود من أمس طالعه من البيت استغرب بدر لأنه أمس يوم يكلم العنود في الليل ماقلت له انها بتنام برى البيت اتصل على أصايل ونفس الشي جوالها مقفل وهالشي خلاه يخاف زود آخر شي أتصل على خاله ..
أبو أصايل كان قاعد مع أم اصايل وأصايل بالصاله اللي في جناح العنود أول ما شاف الرقم قام يناظر أصايل : هذا بدر يتصل وش أقوله ألحين أكيد يسأل عن العنود
أصايل : قل له في السوق والا طالعه أي مكان
أبو أصايل : مدري وش خلاني اطاوعكم واحلف اني ما اعلمه وش بأقول للرجال ألحين بتخلوني اكذب جعلكم منيب قايل
أصايل : يبه علشان عنوده تحمل اعتبرها كذبه بيضاء
أبو اصايل : الكذب كذب مافيه ابيض واخضر
أم أصايل : زين رد قبل ما يفصل
رد أبو بدر : آلو
بدر : هلا خالي وشلونك ؟ وش اخبارك ؟ بشرني عنك ؟
أبو أصايل : ياهلا والله ببدر حي الله النسيب والله أنا بخير أنت وشلونك ووشلون الوالد الأخوان والاهل عساهم بخير
بدر : كلنا بخير عساك بخير
أبو أصايل : الله يديم عليكم النعمه يارب
بدر : الا يا خالي بسألك عن العنود أتصل عليها هي واصايل وجوالاتهم مقفله واتصلت عالبيت وقالت لي الخدامه أن العنود من أمس وهي طالعه وما نامت في البيت عسى المانع خير يا خال ؟
أبو أصايل : يناظر أصايل وأمها وهو معصب لأنه كان ناوي يقول انهم في السوق مايدري ان بدر اتصل عالبيت وفضحتهم الخدامه
بدر : خالي فيكم شي ؟ العنود فيها شي أنا حاس ان فيها شي طمني تكفى
أبو أصايل وهو يحاول يضحك : لا مافينا الا العافيه تطمن وانا خالك
بدر : اجل العنود وينها ؟!
أبو أصايل : لحظه أسأل خالتك أم اصايل أنا كنت في المزرعه من أمس وتوني جاي ومابعد شفتها
ابو اصايل مسك الجوال بيده علشان يكتم الصوت والتفت على زوجته وبنته : وش اقوله الخدامه فضحتنا وقالت له ان العنود مانامت أمس في البيت
أصايل : قل راحت تنام في بيت ابوي سعود أمس ومابعد جت وإذا جت بتقولها تكلمه
أبو اصايل هز راسه وهو موب راضي ثمن رفع الجوال وكلم بدر : أم أصايل تقول ان العنود راحت تنام مع بنات عمها في بيت الوالد وبعد شوي بتجي إذا جت بأقولها تكلمك
بدر مايدري ليه قلبه ما ارتاح يمكن لأن العنود ما تطلع من البيت لأي مكان الا وهي قايله له سكت وكمل : زين طمنتني يا خالي الله يعطيك العافيه
أصايل : ماسويت شي وأنا خالك
بدر : ماقصرت الله لا يقصر بعمرك , يلله أجل ما أطول عليك توصيني بشي ياخال ؟
أبو أصايل : سلامتك سلم على الوالد والاخوان
بدر : يبلغ إن شاء الله , سلم على خالتي
أبو أصايل : يوصل يا ولدي
بدر : فمان الله
أبو أصايل : الله معك
أبو أصايل عقب ما صك الجوال حس انه ارتاح
أم أصايل : غلطتنا ما حرصنا الخدامه
أبو أصايل : سبحان الله كأن أحد معلمه
أصايل في نفسها أيه من حبه له الله يسعدهم ويخليهم لبعض
بعد ساعتين صحت العنود وكان جزء من وجهها مغطى بقطن وشاش فتحت عيونها ببطء وانسل اسم بدر من شفايفها وهي شبه صاحيه أبوها وأمها التفتوا على بعض مستغربين أنها قالت اسم بدر اول واحد
أصايل مسكت نفسها لا تضحك
أبو أصايل مسك يد العنود وقرب منها : الحمدلله عالسلامه
العنود كانت دايخه وماتكلمت
العنود كانت دايخه وماتكلمت
أم أصايل : توها دايخه
اصايل : شوي وتصحصح
بعد ربع ساعه كانت العنود صاحيه
أبو أصايل : الحمدلله عالسلامه وانا أبوك
العنود : الله يسلمك
أم أصايل : الحمدلله عالسلامه يمه
العنود : الله يسلمكم كلكم
أصايل: هاه إن شاء الله أحسن ألحين ؟
العنود : مدري والله العلم عند الدكتور
أبو أصايل :لا ابشرك الدكتور طمني وقال أن العمليه نجحت
العنود بفرح : صدق يبه ؟
أبو أصايل : أيه صدق
العنود وهي تتلمس وجهها : طيب وراهم مغطين نص وجهي
أبو أصايل : عاد توك طالعه من العمليات اصبري لك كم يوم طيب
العنود : ابغى اشوف وجهي خايفه مدري وشلون بيصير شكلي
أصايل : يعني بيزيد لك خشم والا فم مثلا ؟ تعوذي من الشيطان بس وماله داعي الخوف بكره والا بعده بتشوفين وجهك وبتملين من كثر ما تقابلين المرايه
أم أصايل : ترى بدر اتصل على ابوك و كان خايف عليك
العنود : وش قلتوا له
أبو أصايل قال للعنود عن المكالمه
العنود : ذا الخدامه فضيحه
أبو أصايل : خلاص المفروض نعلمه الحين العمليه وسويتيها ووجهك بيرجع مثل أول إن شاء الله وشو له نسكت ؟؟
العنود : يبه تكفى لا تقول له الله يخليك اللي صبرنا نسكت هالشهر بيصبرنا اسبوعين بعد
أبو أصايل : وش اللي يمنع ؟
العنود : يبه علشان خاطري لا تعلمه وبس
أبو أصايل : أنتي عنيده على من ؟ الله يعين بدر عليك
أم أصايل : كلميه يمه لا يقول مطنشتني
أبوها مد لها جوالها : خذي تراه قلقان مره
العنود خذت الجوال واتصلت عليه
بدر رد بسرعه : هلا بالغلا هلا بروحي وعمري وحياتي وكلي
العنود استحت : يا هلا
بدر : وينك يالغلا اتصل عليك من الصبح وجوالك مقفل ؟ موب عادتك تقفلينه حتى وأنت نايمه تخلينه مفتوح خوفتيني عليك
العنود : كنت في بيت ابوي سعود
بدر : اشتقت لك يا قلبي
العنود مستحيه اهلها واقفين فوق راسها وما تدري وش تسوي
بدر : عنوده حبي وش فيك ؟؟
العنود : مافيني شي
بدر : حاسك مو على بعضك
العنود بإحراج : لا مافيني شي
بدر : ما اشتقتي لي ؟؟
العنود بحياء : الا والله
أبو أصايل شاف العنود مرتبكه وضحك وهو يكلم أم أصايل وأصايل : تعالوا نجلس خلها تأخذ راحتها وتغازله على راحتها
أصايل : يبه !!
أبو أصايل : وأنا صادق شوفوها من كلمته ما ترد الا بكلمه والا كلمتين
أم أصايل : لا تحرجها عاد
أبو اصايل وهو يجلس في الصاله اللي في جناح العنود ووراه حرمته وبنته
العنود كانت منحرجه مره
بدر سمع حس ابو اصايل عند العنود وضحك : بعذرك ساكته الهيئه عندك ؟
العنود : ههههههههههههههههه
بدر : ماشاء الله كنه برج مراقبه قال لي مشاري عنه بس ما صدقته
العنود وهي تسوي نفسها معصبه : بدور ماارضى عليه تراه ابوي
بدر : لبى قلبك انت وابوك واهلك كلهم
العنود : الله لا يحرمني منك
بدر : ولا يحرمني منك يا خلفهم , آه بس
العنود : سلامتك من الآه فيني ولا فيك
بدر : حرام عليك ياالغلا وش قاعده تسوين فيني أنتِ
العنود : وش سويت ؟
بدر : حبك ذبحني والله قلبي معد يتحمل
العنود : هانت يا غناتي
تغير صوت بدر وصار أكثر حراره وصوته اقرب للهمس: اشتقت لك ما عاد فيني صبر .. الشوق بيذبحني وربي
العنود كانت حاسه فيه لأنها تحس بنفس الاحساس : بدور حبي هانت كلها اسبوعين وبتمر مثل البرق إن شاء الله
بدر: والله انها اصعب اسبوعين تمر علي بس وش اسوي فيك
العنود وهي تضحك : حبيبي بأسكر أنا ألحين لأن ابوي يناظرني من بعيد وشكله حاقد
بدر : يا ابوك هالحسود
العنود : وش قلنا
بدر : خلاص يابعدي روحي له ألحين بس بأكلمك في الليل زين ؟
العنود : هذا إذا ما سبقتك انا وكلمتك أول ما يطلع الوالد
بدر : المشكله تحسين باللي احس به بس مأخرتنا ليه ما أدري !!
العنود : يالله يا بعدهم انتبه لنفسك , فمان الله
بدر : فمان الكريم وما اوصيك انتبهي لنفسك
العنود : مع السلامه
بدر : مع السلامه , استودعتك الله

**************************************



بعد اسبوع في ألمانيا

متعب وسلطان جالسين في شقتهم يتعشون
سلطان : اليوم شفت فيونا
متعب : وين
سلطان : عند الشركه
متعب : وش تبي ؟
سلطان : كالعاده تقول فيه كلام لازم اسمعه منها
متعب : وأنت ليش ما تقولها انك نسيت الماضي باللي فيه وترتاح
سلطان : مدري
متعب يتمسخر : لا تقول أنك ودك ترجع لها بعد ؟؟
سلطان سكت ومارد
متعب : ليش سكت ؟
سلطان : وش تبيني أقول ؟
متعب : ابيك ترد على سؤالي , سلطان أنت تبي ترجع لفيونا ؟
سلطان : لا
متعب : أجل ليش ماتقولها هالكلام وتريح عمرك
سلطان : مدري
متعب : سلطان قلت لساره أنك شفت فيونا هنا ؟
سلطان : لالا صاحي انت ؟ وش تبيني أقول ؟ انا ما صدقت ان الامور صارت زينه بيننا
متعب : وافرض انها درت
سلطان : وش يدريها ؟
متعب : افرض انها عرفت , وش تتوقع ردة فعلها
سلطان : اكيد بتزعل
متعب : طيب ليش ما تقولها بنفسك؟؟ الا إذا كان في بالك شي
سلطان : وش قصدك ؟
متعب : اللي يشوف تعاملك مع فيونا يقول أن ودك بها
سلطان سكت ومارد
متعب : شفت
سلطان : مو مسألة أني أبيها بس مدري ليش كل مره احاول فيها اصدها اتراجع
متعب تنهد : اسمعني يا سلطان أنت مو متأكد من مشاعرك تجاه فيونا
سلطان سكت شوي بعدين تكلم : اللي متاكد منه أني خايف تخرب علاقتي بساره
متعب : وخايف تصد فيونا بعدين تتحسف عقب !!
سلطان : فيونا عذبتني قبل ومستحيل اسامحها
متعب : ومع ذلك ما قدرت تصدها , اسمعني أنت لازم تروح وتتكلم معها علشان تحدد موقفك من اللي قاعد يصير لازم تخلص من هالسالفه
سلطان : لا مابي اتكلم معها ولا ابي اسمع شي منها
متعب : هذا لأنك خايف ان قلبك يخونك ويميل لها مثل قبل
سلطان هز راسه ومايدري وش يقول
متعب : اسمعني يا سلطان انت تدري اني اكره فيونا ولو بكيفي ذبحتها وارتحت بس عقب اللي شفته صرت محتار انا ودي ابعدك عنها بس قلبك مو على كيفي ولا على كيفك ,, عقلك مع ساره بس قلبك ما ندري مع من ؟
سلطان : مع ساره
متعب : لو هو مع ساره كان صديت فيونا من اول يوم وما انتظرت ولا لحظه
سلطان بيأس : وافرض اني رحت وتكلمت معها و ... سكت سلطان وما كمل
متعب كمل : وعذرتها ونسيت اللي سوته فيك ؟
سلطان هز راسه بالايجاب
متعب : معناها أن حياتك بتتغير وبتخسر ساره لأنك مستحيل تبقى مع الثنتين بنفس الوقت ضميرك مو مخليك تخون ساره وقلبك مو مخليك تستمر معها
سلطان انعصر قلبه يوم سمع كلمة تخسر ساره وصار صدى هالكلمه يتردد في راسه وقام وراح لغرفته وهو متضايق

*************************************
في بيت أبو فيصل :

نزلت منى من غرفتها ولقت أهلها جالسين يسولفون ويتقهوون
أبو فيصل يوم شافها جايه : يا هلا حي الله شمعة البيت ونوره
منى ابتسمت لأبوها : الله يخليك يبه
طارق : أحلى يالشمعه التي تحترق من أجل الأخرين
منى : من دوني أنت تعيش في ظلام دامس و رفعت حواجبها في حركه إستفزازيه
منى حست انها مبسوطه ما تدري ليه يمكن بسبب الحلم اللي حلمته براكان
جلست تسولف مع أهلها بعدين ناظرت أبوها وهي مستحيه لأن ودها تطلب منه طلب
منى : يبه ممكن اطلب منك طلب ؟
أبو فيصل : أنت تأمرين مو بس تطلبين
منى : يبه ودي اروح لمكه
أبو فيصل : مكه !!
منى : ودي أروح آخذ عمره لراكان ولي
أبو فيصل : في هالوقت ؟ كلها شهر وشوي وتجي العطله ونروح كلنا
منى : لا يبه ودي اروح هالاسبوع, الواحد ما يضمن عمره
أبوها : يا يبه الاعمار بيد الله أنت من بعد ما توفى راكان وأنت تطرين الموت اذكري الله وأنا أبوك
منى : طيب يبه وش قلت ؟ توديني ؟
أبو فيصل : والله وأنا أبوك ودي بس هالايام عندي شغل واجد ومقدر اخليه
منى : يومين بس يبه
أبو فيصل : والله وانا أبوك مقدر , لك مني وعد إذا بدت العطله اوديك واخليك تجلسين شهر موب يومين
منى ضاق صدرها وسكتت
طارق : أنا أوديك
منى بفرح : صدق !
طارق : أيه
أبو فيصل : وجامعتك ؟
طارق : الله وكبر والجامعه اللي يدرون عني أخلي احد من الطلاب يحضرني كلها يومين وراجعين
منى : ايه نروح الأربعاء ونرجع الجمعه
أبو فيصل اللي تشوفونه أجل
أم فيصل : أجل خذوني معكم
منى : لا يمه خلك في البيت عند أبوي وأروى
أم فيصل : دامه خميس وجمعه بأخذ اروى معي
طارق: لا يمه أنا ومنى خفيفين بنلاقي حجز بسرعه بس إذا أنت وأروى يمكن ما نلاقي حجوزات
أم فيصل : أجل بسلامتكم
طارق : أجل العصر إن شاء الله بروح أدور حجز للأربعاء الجاي
منى : الله يخليكم لي ولا يحرمني منكم كلكم,, يالله أنا بروح لبيت عمي بأشوف العنود اتصلت علي اليوم وقالت تبيني
أبو فيصل : الله يحفظك يا يبه
بعد ما طلعت منى تكلم أبو فيصل : من راح راكان والموت على لسانها
أم فيصل : لا تلومها راح منها في لحظه
طارق : كل يوم قبل ما تنام تصيح
أبو فيصل : وش دراك ؟؟
أروى : كل يوم أنا وطارق ندخل عليها في الليل نسولف معها وكل ما دخلنا لقينا عيونها حمر وصوتها واضح عليه انها تصيح
أم فيصل : الله يثبتها ياليتها ما اعتذرت ذا الترم وكملت دراستها لعلها تلهيها شوي
أبو فيصل : إن شاء الله تكمل السنه الجايه
أروى : مسكينه بنات عمي كلهم بيتزوجون وكلهم فرحانات ويجهزون وهي ترملت قبل لا تتزوج
أبو فيصل : الله يعوضها خير
أروى : أمس اقولها هالكلام وتقول منيب متزوجه عقب راكان
أبو فيصل : توها ما أمداها تنساه ولا تروح حرته من قلبها , الدنيا قدامها يمديها تسلى
أم فيصل : الله يسمع منك ويهدي سرها ويريح قلبها ويفرج همومها

**************************************************


بعد اسبوع في الرياض

زاوج العنود وبدر

طبعا عقب ما نجحت عملية العنود ورجع وجهها مثل أول قالت لبدر انها غيرت رايها وتبي حفل زواجها يكون كبير
طبعا بدر استغرب وحاول يقنعها أنه ما يمدي بس هي اصرت على رايها وخلت ابوها يتكفل بموضوع حجز القاعه وباقي الحجوزرات تكفلوا فيها عمانها وبدر واخوانه ويالله قدروا يلحقون يخلصون كل الامور في أقل من الشهر

في غرفة العروس
بعد ما خلصت العنود دخلوا عليها البنات
العنود : ما جت منى ؟
ريم : لا شوي وتجي
ساره : تأخرت
ريم : رحلتهم تأخرت ماوصلوا الا الظهر
هيفاء : وش طرى عليها تروح هالوقت
ريم : والله مدري خالتي تقول قالت لعمي وكان مشغول وطارق رحمها ووداها
دخلت منى عليهم والبنات فرحوا وقاموا يسلمون عليها ويتحمدون لها بالسلامه ويسولفون
أصايل : عنوده لا تغطين وجهك بالطرحه هالحركه قديمه خلي الطرحه نازله من ورى أحسن
العنود : ما ابي
بدور : مسويه رومانسيه وبتفاجأه
العنود : مالكم دخل ابي اشوف ردة فعله وتعابير وجهه إذا شافني
ريم : ارفقي علينا يا جولييت والله مع الخوف والربكه بتنسين وجهه وتعابيره وتقعدين تتنافضين من الحياء
ساره : وش دخلكم فيها خلوها على راحتها
العنود وهي تضحك لساره : يسلم لي الناس الفاهمين
هيفاء : ياوالله القهر تنخطب عقبي وتعرس قبلي
العنود : اذكري الله ووجعه ترى عرسك بعد خمسه وعشرين يوم اللي يسمعك يقول بعد25 سنه
هيفاء : ماشاء الله
ريم : انتوا لو بتجيكم عين بتجيكم من فهيدان
طقت ووجود الباب وهي مستحيه وفتحت لها اصايل
وجود : خالتي ام اصايل تقول شوفي خلصت العنود والا لا
العنود وهي تطل على وجود : وجيد تعالي شوفيني حلو شكلي والا لا
سحبتها اصايل للغرفه
وجود : قمر ماشاء الله
البنات كلهم ملاحظين ان وجود متغيره وصايره اركد من قبل واعقل بس منطويه على نفسها وصاروا يرحمونها ويحاولون يدخلونها معهم في السوالف
العنود بثقه : أدري
منى : ماشاء الله يالعنود أول مره اشوف عروس تسولف وتهذر عادي مثلك
هيفاء : توقعتك بتستحين وترتبكين
العنود : هي هي وش قالوا لكم ما احس صحيح خايفه شوي بس كل ماتذكرت اني بعد كم ساعه بأكون مع بدور احس اني اسعد وحده بالدنيا
أصايل : الله يشغلك انت وبدر هو هناك مشغلنا وأنت هنا
ساره : على طاري بدر اهله يدرون عن عملية العنود ؟
أصايل : لا وهالشي مسبب قلق لخالتي ومخوفها , خايفه من كلام الناس ومن ردة فعل بدر إذا شاف العنود مشوهه
العنود : كلهم بينصدمون
أصايل : وبيعصبون علي ليش اني ماقلت لهم
أم أصايل دخلت عليهم وهي معصبه : انتوا قاعدين تهذرون والعالم يسألون عنكم وابوكم محرق جوالي بالإتصالات
أصايل : نوسع صدر العنود
أم أصايل : خلاص ألحين بنزفها
العنود : ألحين !! ما كنه بدري ؟ حنا قايلين بأطلع الساعه 1 باقي ساعه
أم أصايل : انا أدري عن بدر ابوك يقول اقلقنا كل شوي يقول وين حرمتي
البنات قاموا يضحكون والعنود حمر وجهها
ام أصايل: يالله قومي قبل لا يجي هالمطيور ويطيرنا معه

طلعوا البنات وأم أصايل ومابقي الا العنود وأصايل اللي وقفت علشان تساعد اختها
كالعاده ظلمت القاعه وبدت الزفه وطلعت العنود بفستانها اللي كان فخم على انه كان ناعم ومو متكلف فيه الا أن الفخامه مبينه عليه
الحريم كانوا متحمسين يبون يشوفون العنود خصوصا عقب ما عرفوا ان جمالها اللي كلا يتكلم عنه تشوه بس خاب املهم لأن العنود كانت حاطهه الطرحه نازله على وجهها ومغطيه ملامحها ,,, العنود كنت غير عن باقي العرايس ما تكلفت كثير في مكياجها لأن وجهها كان يشع وعيونها تلمع والسعاده والفرحه مبينه على وجهها حتى الكوافيره قالت لها أنها من العرايس اللي قليل ما يكون تألقهم طبيعي وماحبت تخرب تألقها بكثرة الألوان والمكياج , اما شعرها الطويل كان يزين راسها تاج صغير من الالماس أهداه إياه بدر يوم اصرت تحط عرس كبير كانت رافعه جزء من شعرها ومنزله خصل خفيفه على وجهها زادتها نعومه وباقي شعرها خلته متموج بنعومه ومغطي جزء كبير من ظهرها و فستانها كان أبيض ناصع كاشف عن ظهرها وكتوفها والصدر كان فيه كريستالات منثوره عليه بشكل ناعم متداخله معه شرايط حرير والتنوره كانت نافشه بشكل خفيف وفيها كريستالات وشرايط مثل اللي في الصدر , مكياجها لونه وردي ومسكتها بيضاء معها كريستال ونازل منها شرايط وقفت عند أعلى الدرج بهيبة العروس ومع بداية شريط الزفه نزلت بشموخ وثقه مع انها كانت مرتبكه لأن الطرحه اللي مغطيه وجهها كانت طويله وخافت تطيح فيها بس مع تحركها بحذر نزلت من الدرج بسلام مشت العنود في الممر ومع كل خطوه كانت تحمد ربي عالنعمه اللي هي فيها
ساره من بعيد : ماشاء الله , الله يحفظها
ريم : على أنها يوم قالت بحط مكياج خفيف وتسريحه ناعمه عصبت لأني توقعت يصير شكلها عادي بس ماشاء الله شكلها يهبل
هيفاء : ايه والله انها صارت احسن مني موب مثلي مالت عليي متكلفه في فستاني مره
منى : فستانك حلو مافيه كلام , بعدين جمال العنود اليوم طبيعي العنود فرحتها وسعادتها انعكست على وجهها وخلتها متألقه بهالصوره وأكبر دليل لمعان عيونها اليوم
التفتوا البنات كلهم على منى
ساره : أيوه يا بتاعة علم النفس
ريم : اخس من متى صايره مثقفه وتقولين كلام كبير ؟
هيفاء لمست جبهة منى : لا حرارتها طبيعيه
منى : خير إن شاء الله
ريم : يلله عاد منوه من متى صايره تقولين كلام كبير مثل اللي تو والتفتت على ساره وكملت : وش قالت لمعه ومرايه وانعكاس
منى : انطمي انطمي عاد لا اروح اغتال فيرانك
ريوم : كلي تراب واحترمي نفسك ولا تقولين على توأمي فيران
ساره : خلاص عاد تغطوا بيدخلون الرجاجيل
دخل أبو أصايل وأخوانه وكان حاط يده بيد بدر وأبوه
بدر كان في آخر الممر ويشوف العنود جالسه بكل شموخ على المنصه شاف المسافه اللي بينهم وحس انها طويله وكان وده يقطعها ركض بس المكان والموقف ما يتحملون أي جنون وهو يمشي كان يفكر بسرعه يوم شاف العنود حاطه الطرحه على وجهها خاف من ردة فعله إذا شاف وجهها واللي صار فيه ,, خاف انه ما يسيطر عالموقف ويجرحها
أول ما طلع عالمنصه وقفت العنود وقلبها يدق بقوه وهو من جهته حس ان قلبه بينفجر من الخوف والفرحه في نفس الوقت ابوه اللي ماسكه مع يده الثانيه حس فيه وضغط على اصابعه وكانه يطمنه
البنات قربوا من المنصه ووقفوا على جنب علشان يشوفون زين ..
بدر من الربكه ماقدر يشوف وجه العنود من ورى الطرحه الشفافه مد اصابعه المرتجفه ورفع الطرحه ببطء وهو يدعي ربي بالثبات أول مارفع الطرحه وبان له وجهها اللي كان بجمال القمر يوم 15 من الشهر وإبتسامتها اللي نابعه من قلبها وزايدتها جمال على جمالها في هاللحظه صدح في القاعه صوت محمد عبده مذهلـــــــه.. وهالشي كانت اصايل مرتبته مع مشرفات القاعه ..
الصدمه كانت قويه على بدر مايدري هو كان يتوهم!! والا يتمنى والا عيونه خانته؟!
ابتسمت العنود يوم شافت ردة فعله و إبتسامتها زادتها سحر تحرك بدر بدون وعي بس ابوه نغزه علشان يركد ولا يتهور ومسك نفسه في آخر لحظه حركة بدر انتبهوا لها البنات لأنهم دقيقات وجلسوا يضحكون عليه
قرب بدر من العنود وباسها على راسها بعدين مسك يدها ورفعها لشفايفه وباسها أبو أصايل بصوت واطي : خلاص عاد وفر باقي الحركات لباقي حياتكم
العنود استحت واحمر وجهها وحمدت ربها ان عمانها ما سمعوا ابوها وان واللي موقفين قدامها منعوا الحريم اللي تحت انهم يشوفون حركة بدر

البنات من جهتهم يعلقون
هيفاء : ماشاء الله هالبدر يهبل بعذر العنود بغت تموت عليه
ساره : أيه ماشاء الله وهي بعد قمر
ريم : ماشاء الله هيبه ورزه موب مثل مشاري
منى : اسكتي لا تسمعك أصايل
ريم : وأنا صادقه ذا طويل وعريض ووسيم شوفي وجهه ماشاء الله ملامحه تخقق
هيفاء : جسمه مثل جسم سلطان ماشاء الله طول بعرض اللي يشوفهم يقول لاعبين كمال اجسام
ساره : بس سلطان أملح
منى : ايه عاد القرد في عين أمه غزال
ساره : انطمي والله ان سلطان يهبل
بدور : كلهم يهبلون اسكتوا عاد , بس نواف احسن منهم
منى : بدت حركات البزران
ريم : شوفوا بدر كنه موب مصدق
هيفاء : الا العنود اللي شوي وتخق عسى ما تنسى نفسها بس
ريم : الله لا يضرهم وفي كل البنات يناظرونهم
هيفاء : قصدك يناظرون بدر

سلموا عمان العنود على المعاريس وباركوا لهم وطلعوا وسلم عليهم ابو بدر وبارك لهم وقبل ما يطلع غمز لولده وهو يقول عرفت ليش كنت مصمم تأخذها وضحك له بدر آخر الرجاجيل كان ابواصايل اللي بارك لبنته وكان ضايق صدره لأنه بيفارق بنته
أبو أصايل : ما أوصيك عليها يا بدر إذا مشاري اخذ عيوني تراك أنت أخذت قلبي
بدر : ما يحتاج توصيني ياخالي محد يوصي أحد على روحه وعمره
أبو أصايل : الله يوفقكم ويسعدكم وأنت يالعنود انتبهي لزوجك وحطيه في عيونك
العنود : تأمر يبه
بعد ما طلعوا الرجاجيل جلس بدر والعنود عالكرسي وبدر ماسك يد العنود وكأنها كنز خايف عليه جت ام بدر وخواته وانصدموابمنظر العنود وسلموا وباركوا لهم وهم فرحانين باللي شافوه
بدر همس للعنود : ليش ما علمتيني ؟
العنود وهي تبتسم : فرحان ؟؟
بدر : أنا فرحان لأنك زوجتي وبس , أيأ كان شكلك
العنود طفت إبتسامتها من رده
بدر انتبه لها وكمل وهو يضحك : بس زادت فرحتي باللي سويتيه مع ان فيه اشياء كثيره لازم تشرحينها لي يا مدام
العنود ابتسمت له
بدر زادت سرعة تنفسه وقلبه صار ينبض بشكل جنوني وعيونه ما نزلت من عيون العنود وحس انه ضايع في سحرها وجمالها .. العنود كانت في حاله مثل حالته غرقانه في بحر من المشاعر .. بدر اللي كانت تحلم به في لياليها واقف قدامها و يبتسم لها مع أن عيونه ابتسمت لها قبل شفايفه زادت عيونه سواد وغموض وهمس بأسمها : آه يا العنود
همست له تنبهه بالمكان اللي هم جالسين فيه وكان صوتها فيه بحه خفيفه : بدر
بدر تنهد : يالله خلينا نمشي
العنود: تونا خلنا نجلس شوي
بدر : العنود خلينا نقوم احسن والا ماراح اكون مسؤول عن اللي بأسويه
حمرت خدودها من الحياء
بدر : قومي يابنت وربي ماباقي فيني صبر
ووقف ومسك العنود ووقفت معه ونزل من المنصه وهو ماسكها وخايف عليها تطيح بسبب فستانها الطويل وطرحتها.. مشوا مع الممر ووراهم المصوره و امه وخواته وأم اصايل واصايل ومن وراهم البنات وهم متغطين وأول ما طلعوا الدرج وصاروا في أعلى الدرج وقفت العنود والتفتت على الحضور ورمت مسكتها وكانت موجهتها لهيفاء اللي خذتها بسهوله رفعت العنود يدها وودعت المعازيم بعدين ارسلت بوسه في الهواء للبنات بدر كان يناظرها ومفتون بحركاتها العفويه
مشوا مع بعض للباب و بدر ماسكها و مارضى يفكها ولا خلا احد يقرب منها لبستها امها عبايتها وسلمت عليها وطلعت هي وزوجها للفندق ...

***********************************************

في ألمانيا :

سلطان كان لابس بيطلع عنده شغل سمع صوت الباب وراح وفتحه ولقى فيونا
سلطان : فيونا !!
فيونا : ممكن ادخل سلطان فيه كلام كثير وضروري اقوله لك
سلطان : لا أنا طالع ألحين عندي شغل مهم
فيونا : سلطان حبيبي اللي بأقوله أهم من كل شي
سلطان : فيونا قلت لك انا مشغول خلاص بعدين أكلمك
فيونا : كل مره تقول نفس الكلام وما تكلمني
سلطان : خلاص عاد قلت بعدين يعني بعدين
فيونا : وعد ؟؟
سلطان : أيه
فيونا : متى ؟؟
سلطان : في أقرب فرصه
فيونا بإحباط : طيب لا تتاخر انتظرك انا
سلطان : يصير خير
نزلت فيونا ودخل سلطان الشقه و خذ اوراقه ولاب توبه ونزل لشغله وهو متضايق

*******************************************

في القاعه
منى : يمه منه هالبدر حتى السلام ما خلانا نسلم عالعنود
ساره : لا تلومينه اللي شافوه موب سهل من كان يصدق ان ربي بيجمعهم عقب اللي صار
هيفاء : أي والله صدقتي وربي يستاهلون بعض الله يوفقهم ويسعدهم
ريم : قوموا خلونا نرقص
هيفاء : روحي قولي للطقاقات يطقون في فهود واقوم معك
ريم : انقلعي بس لو بأقولهم بأقولهم يطقون في فصولي والا في توأمي فديتهم
هيفاء : يا كلبه نسيتي أن فهود أخوك
ريم : وإذا صار
ساره : خلاص هيوف اسفهيها بعد شوي بأقول للطقاقه تغني في خالي وعياله سلطان وفهود
وجود بحماس : وناصر بعد
هيفاء وهي تناظر ريم : وارقص انا وسويره وخالتي وبس
وجود : وأنا بعد برقص معكم
ريم : هين يا سويره يوم جت هييف بتقومين معها
ساره : ومن قال بأقوم علشان هييف أنا بأقوم علشان سلطان
ريم : كلي تراب أنت وهي الشرهه علي اللي قاعده اترجاكم بأروح اتطمن على عيالي اصرف من مقابل خششكم
منى التفتت على ساره وسألتها بهمس : كيفك مع سلطان ؟
ساره ابتسمت : انا مبسوطه وأتمنى هو بعد يكون مبسوط
منى : دام ابتسمتِ معناها صار شي جديد
ساره هزت راسها وهي تضحك
منى : علميني وش صار ؟
ساره سولفت على منى وقالت لها عن كل شي
منى : الله يسخر لك يارب ويسعدكم
ساره : آمين ويرده لي بالسلامه
منى : متى بيرجع ؟
ساره : بعد شهر إن شاء الله
منى : بيحضر عرس فهد ؟؟
ساره : مدري ما اتوقع
منى : يوه كلها 5 أيام لو يقدم سفرته أمداه يالله إن شاء الله يرجع قبل
ساره : إن شاء الله , بس خايفه تصدقين
منى بإستغراب : وشو منه؟!
ساره : مدري ماقد قال انه يحبني او يبيني ..
منى : ساره شوي شوي ويقولها شوفي وين كنتوا ووين صرتوا بعدين لا تلومينه هو كان عايش تجربه من قبل وصعب عليه يطلع منها بسهوله ,, لا تخافين ولا شي دام هو مبسوط لأنك تحبينه هذا معناها أنه يحبك , بس هذا حنا يالحريم طماعات
ساره : لا والله منيب طماعه مابي من الدنيا شي الا قلب سلطان
منى : قلبه لك وقولي منى ما قالت
ساره : الله يسمع منك , ويسعدك أنتِ بعد ويرزقك باللي يسعدك
منى بحزن : سعادتي ماتت بموت الغالي
ساره : استغفرالله هالكلام ما يجوز يا قلبي , بكره ربي يرزقك بالرجل الصالح اللي يفرحك ويسعدك
منى هزت راسها : ما راح يصير هالشي
ساره التفتت وناظرتها بإستغراب : وش قاعده تقولين أنتِ
منى : ماراح اتزوج عقب راكان
ساره : منى راكان توفى وحقه عليك الدعاء و اللي قاعده تسوينه ما يجوز حرام تحرمين نفسك من الزواج علشانه انسي اللي راح يا منى وفكري في مستقبلك
منى : وشلون ما افكر فيه وهو في قلبي وعقلي وفي كل مكان اشوفه قدامي .. ونزلت دموعها وهي تقول غرفته قبال غرفتي شباكه مقابل شباكي امه وخواته وبسام حولي صوته وضحكته ترن في أذني صورته ما فارقت خيالي ولا لحظه كل اللي اقوله ان ربي يجمعني به في جنات النعيم ودي الحقه وارتاح ,, حتى أحلامي ما خلت منه
ساره : منى استغفري حرام اللي تقولينه
منى سحبت منديل من العلبه ومسحت دموعها وذكرت حلمها وابتسمت بحزن : كم مره شفته في منامي
ساره : علشانك تفكرين فيه يا بعدي
منى : راكان ينتظرني
ساره بتعجب : ايش ؟
منى : شفته كم مره في منامي وكل مره كان يناظرني ويقول متى تجين يا منى تأخرتِ أنا أنتظرك
ساره عورها قلبها من كلام منى : تعوذي من أبليس واقري اذكارك وصلي ركعتين قبل ما تنامين وما عليك الا العافيه هالاحلام من كثر ما تفكرين فيه
منى عرفت وش اللي يدور في بال ساره : ما خفت يا ساره , بالعكس أحس أني مرتاحه
ساره : لا حول ولا قوة الا بالله وش هالكلام غيري الموضوع تكفين
منى ابتسمت : طيب قومي نشوف ريم وعيالها فديتهم لبى قلوبهم يجنون

******************************************


في الفندق
دخل بدر جناح العرسان وهو ماسك العنود وكانت مستحيه شوي أخذ بدر عبايتها وبشته وعلقها
العنود جلست عالكنب وهي مرتبكه بدر جاء وجلس جنبها وآخذ يديها بين يديه وابتسم : عنوده
العنود : سم
بدر : عدوك يسم ,, ارفعي راسك يالغلا
العنود رفعت راسها وكان وجهها احمر شوي
بدر : مستحيه مني !!
العنود بإرتباك : شوي
بدر ابتسم ورفع يده ولمس خدها ورفع وجهها : عنوده ناظريني
رفعت العنود عيونها وتلاقت بعيونه وقلبها ينبض بقوه وريقها نشف كانت مفتونه فيه وفي وسامته في هيبته وطوله ورزته كانت غرقانه في حبه لحد الجنون
بدر قرب يدها من فمه وباسها وهي مسكت يده اللي على خدها وباستها
بدر قرب منها وتوه بيأخذها في حضنه الا سمع باب الجناح ينطق وجلس يسب في نفسه وقام وهو معصب وفتح الباب ولقى باقة ورد عند الباب آخذها ودخل عند العنود وقرى الكرت : مبروك ياقيس ليله سعيده والتوقيع مشاري ,, حط الورد على الطاوله ورمى الكرت جنبها وتوه بيرجع يجلس الا الباب ينطق مره ثانيه وراح يفتح ولقى باقة ورد ثانيه خذها مثل المره الاولى وفتح الكرت ولقى مكتوب فيه مبروك روميو ليلتك كوحلي يا قميل والتوقيع عبدالرحمن العنود ضحكت
بدر : يا بثرهم وتوه بيجلس الا وسمعوا صوت الباب مره ثالثه وضحكت العنود بصوت عالي هالمره
راح بدر وفتح ونفس المرتين اللي قبل لقى ورد آخذه ودخل
العنود : من مين ؟
بدر وهو يقرى : ليلتك سوداء يالحبيب التوقيع مشاري وعبدالرحمن وكمل بعصبيه : ذولي موب معدينها على خير
وسمع صوت الباب مره رابعه وراح يركض ووفتح الباب بسرعه وشاف ورد هالمره سحبه بسرعه للغرفه وماصك الباب خلاه شبه مسكر ووقف عنده وبعد دقيقتين بالضبط لمح عبدالرحمن يحط شي عند الباب وقبل ما يطق الباب فتح بدر بسرعه ومسكه مع جيبه
عبدالرحمن جلس يضحك وبدر معصب
بدر : بأذبحك ياللي ما تستحي
عبدالرحمن وهو يضحك : والله موب أنا فكرة مشاري
مشاري يوم شاف عبدالرحمن تأخر وسمع الاصوات فتح الباب اللي مقابل باب جناح بدر
بدر يوم شاف مشاري طالع من الغرفه فك عبدالرحمن وهو مستغرب : وش دخلكم هالغرفه
مشاري وعبدالرحمن التفتوا على بعض وهم يضحكون
بدر مسك الاثنين في نفس الوقت وهو معصب : انتوا صاحين
مشاري وهو يضحك ويحاول يفك نفسه من بدر : خلاص خلاص بنروح بس خلنا
بدر : حشى بزران استحوا على وجيهكم
مشاري : خلاص فضحتنا عند الناس اسكت تراها مزحه
بدر وهو يفكهم : إن شاء الله مستأجرين هالغرفه
عبدالرحمن بضحك : أيه
بدر : كنتوا ناوين تزعجوني طول الليل ؟؟
مشاري : لا عاد نكد عليك حنا قلنا اول شي نحط له ورد بعدين نقضي الوقت إستهبال
عبدالرحمن : هماني كاتب لك ليلتك سوداء كنا ناوين نسودها لك بس كشفتنا الله يقلع ابليسك
بدر بعصبيه : ياثقل دمكم, اقسم بالله ان ما نزلت أنت وهو الحين مايردني الا حراس الامن
عبدالرحمن : خلاص يبوي روق تراه يوم عرسك اضحك عاد
بدر : وأنتوا خليتوا فيها ضحك والا وناسه
مشاري : خلاص عاد آسفين بس لا تعصب وغمز له ألحين إذا شفت الدلال بتدعي لنا وتعرف أن معنا حق ومسكه ودفه داخل جناحه ومسك الباب وقبل لا يسكره نادى بصوت عالي : العنود انتبهي لبدر زين وخليه يروق لا يرتفع سكره وصك الباب وهو يضحك
العنود قامت وراحت لبدر ولقته واقف عند الباب ويهز راسه مايدري يضحك على تصرفات أخوانه والا يعصب
العنود بخوف : وش فيك بدور ؟
بدر مسوي معصب : مافيني شي , بس رفعوا سكري بحركاتهم
العنود مسكت يدينه : خلاص يا قلبي روق السالفه ما تسوى كانوا يمزحون يالغلا
بدر : لعنبوا ابليسهم تقل بزران ماكأن الواحد منهم وش كبره
العنود : حبيبي والله ماتستاهل السالفه تعال اجلس واشرب كأس مويه لا يرتفع سكرك ياخلفهم
بدر : خايفه علي ؟
العنود وهي تبتسم : إذا ما خفت عليك من أخاف عليه ؟ كم بدر عندي
بدر : آه بس يا جعلي فدوه لك وتوه بيقرب منها وهي رجعت وهي مستحيه وتلكمت: بدور خذت أبرتك ؟
بدر : جعل ابرتي في النار
العنود ابتسمت بحياء
بدر حس انها مرتبكه : يا لبى هالابتسامه , حبيبتي روحي غيري ملابسك وأنا بأطلب العشاء
العنود: إن شاء الله وراحت علشان تغير واحتارت ما تدري وش تلبس ووقفت ساعه تتفرج على ملابسها آخر شي اتصلت على اصايل اللي كانت جالسه مع البنات
أصايل اول ماشافت رقم العنود ردت بسرعه : هلا عنوده
العنود : اصايلوه وش ألبس ؟!
أصايل : نعم !!
العنود : اصايل بأغير فستاني ومدري احترت وش ألبس ؟
اصايل : ضحكت بصوت عالي والتفتت على البنات وقالت لهم وهم يضحكون
العنود بعصبيه : اصايل كلي تراب وقولي لي وش البس تكفين
أصايل بإستفزاز : البسي قميص نوم
ريم سحبت الجوال من أصايل
ريم : عنوده اسمعيني
العنود : هلا
ريم : روحي نادي بدر وخليه يختار أحسن
العنود : ضفي وجهك
هيفاء : اللي سحبت الجوال من ريم وهي تضحك : عنوده ما عليك منهم أحسن شي لا تغيرين وإذا قال بدر شي قولي ما اعرف افصخ الفستان لحالي ساعدني تؤبر ألبي
العنود عصبت وقفلت الجوال في وجيههم
ساره : حرام عليكم يا ويلكم من الله
أصايل : هههههههههههههه خلينا نرفع ضغطها شوي
هيفاء : الا صدق أنتوا يوم كنتوا عرايس وش لبستوا ؟
ريم : وش دخلك
هيفاء : أبي تعلموني عرسي بعد كم يوم
ساره وهي تضحك : أحسن شي لا تغيرين وإذا قال فهد شي قولي ما اعرف افصخ الفستان لحالي ساعدني تؤبر ألبي
هيفاء بتكشيره : انطمي

العنود آخر شي اختارت قميص نوم ابيض قطعتين محتشم نوعا ما ,, كأنه فستان أما شعرها فكت منه الطرحه والتاج وخلته مثل ما هو متموج ومغطي ظهرها والخصل القصيره على وجهها وبعد ما خلصت طلعت ولقت بدر مغير ملابسه وجالس عالكنب يوم وصلت عنده وقف لها بدر ومسك يدها ومشى معها للطاوله اللي عليها العشاء في الغرفه الثانيه وقف بدر ورى العنود وسحب لها الكرسي وقبل لا تجلس مسكها مع خصرها ولفها علشان تواجهه ,, العنود كانت مستحيه .. بدر رفع وحده من يديه وبعد الخصل اللي على وجهها وهمس لها : احبك ... وضمها لصدره العنود استكانت لصدره وهي مغمضه وحاسه براحه ما عمرها حستها وكانت حاسه بخد بدر على شعرها ويديه ضامتها لجسمه .. بعدها بدر شوي عنه علشان يشوف وجهها وابتسمت له وهي تتنهد نزل راسه لها وباسها قبل ما يضيعون في بعض وينتهي الكلام بينهم ومايبقى لهم الا الاحاسيس ....

*****************************************

البنات طلعوا من القاعه بعد الفجر وراحوا لبيت أبو سلطان
بعد ما صلوا الفجر وغيروا ملابسهم وقاموا يسولفون عن العرس
أم سلطان : ما ودكم تنامون ؟
ريم : شوي يمه نبي نحش شوي
منى : حشي لحالك خلاص أنا خدرت بروح انام
هيفاء : وأنا بعد
ريم : سارونه تعالي معي لغرفتي نسولف شوي قبل لا ننام
ساره : لا بروح لغرفة سلطان بنام
ريم : الله يقلعكم يالسخيفات اجلسوا نسولف شوي
ساره : أيه أنتِ نايمه لين العصر وحنا ندهر من الصبح
منى : وأنا متى جيت من مكه
هيفاء : لا حقين عالسوالف الساعه 8 ألحين معد الا خير
ساره : يلله تمسون على خير وراحت لغرفة سلطان دخلت وفرشت أسنانها وجلست عالسرير وكان ودها تكلم سلكان قبل لا تنام لأنها أمس يوم كلمها سكرت بسرعه علشانها مشغوله في العرس ترددت شوي بعدين اتصلت عليه
رن الجوال 3 مرات وجت تسكر بس سلطان رد قبل لا تسكر
ساره : آلو
سلطان : هلا والله وغلا
ساره : قومتك ؟
سلطان ابتسم : لا قايم صليت الفجر وما نمت
ساره : زين خفت أني أزعجتك
سلطان : وحتى لو كنت نايم خذي راحتك
ساره بحياء : قلت اسمع صوتك قبل لا أنام
سلطان : مابعد نمتي !!
ساره : ماجينا من القاعه الا من شوي
سلطان : شلون المعاريس ؟
ساره : ماعليهم مبسوطين الله يتمم عليهم
سلطان : بدر والعنود يستاهلون كل خير
ساره حست ان سلطان فيه شي مو طبيعي
ساره : سلطان
سلطان : سمي
ساره : فيك شي ؟
سلطان : لا وش فيني
ساره : مدري حاسه ان فيك شي , متضايق من شي ؟ تعبان ؟؟
سلطان : لا مافيني الا العافيه
ساره : صوتك فيه شي حاسه فيك
سلطان تنهد ماكان متوقع ان ساره بتحس فيه من صوته : سارونه قلت لك توني مصلي الفجر ومنسدح كنت بأنام يمكن صوتي متغير علشاني منسدح
ساره : إن شاء الله يكون كلامك صحيح
سلطان : المهم أخبارك ؟
ساره : دامك بخير فأنا بألف خير
سلطان : دايم يا بعدي
ساره : يدوم لك الخير وما تدري وش اللي جاها وخلاها تقول له اشتقت لك سلطان
سلطان : صدق ؟
ساره : مكانك خالي الله لا يخليني منك
سلطان غمض عيونه وحس أن متعب معه حق في اللي قاله وانه لازم يتكلم من فيونا علشان يريح عمره
ساره : وينك ؟
سلطان : معك بس تفاجأت
ساره ابتسمت وكملت بمزح علشان تطير الحياء : يا أنك ذكي
سلطان : كيف !!
ساره : يعني تدري اني احبك أكيد بأشتاق لك يالذهين
سلطان مايدري هو مبسوط من كلامها والا من راسها اللي لان أخيرا واعترفت له أنها تحبه
سلطان : هههههههههههههههههههههههه
ساره : وش يضحكك ؟
سلطان : آخيرا قلتيها
ساره استحت وماردت
سلطان وهو يضحك: لاحول كملي وش بعد
ساره : خلاص عاد
سلطان : بس اشتقتي لي
ساره بحياء : سلطان شوي شوي علي والله منيب متعوده اقول مثل هالكلام لو ماهو يطلع من نفسه بالغصب والا ما كان فكرت اقوله
سلطان ضحك على تفسيرها الغبي
ساره : إذا كل شوي بتضحك علي بطس اخمد اصرف
سلطان: لا والله ما اتمسخر وش احلى من صوتك والا سوالفك علشان يتصبح بها الواحد
ساره حست انها قاعده تتوهم او تهلوس من النوم : شكلك مروق وأنا خلاص طافي شحني معد قمت اجمع
سلطان: خلاص يمي روحي نامي ألحين وإذا قمتي نكمل سوالفنا
ساره : انتبه لنفسك ياخلفهم
سلطان : وأنتِ بعد, مع السلامه
ساره : فمان الله

**********************************

قبل الظهر في الفندق

حست العنود أن فيه أحد يشدها فتحت عيونها وشافت نفسها نايمه وبدر نايم جنبها و يده مطوقتها وتشدها لجسمه الدافي ابتسمت ورفعت يدها من تحت يده ومررت أطراف أصابعها على ملامح وجهه ببطء
بدر حس بلمستها وفتح عيونه
العنود استحت واحمر وجهها
بدر ابتسم لها : وش فيك ؟
العنود بحياء : بتأكد إذا أنا أحلم والا لا
بدر : إذا فيه أحد يحلم فهو أنا وابتسم لها : صباح الخير
العنود : صباحك عسل
بدر : نمتي زين ؟
العنود استحت وهزت راسها بالإيجاب وبعد شوي تكلمت : وأنت ؟
بدر رفع نفسه وتسند على يده الثانيه وانحنى عليها وعيونه تلمع وتبتسم لها بحب : أحلى ليله وأحلى نومه مروا علي في حياتي
العنود حست ان وجهها بيحترق من الحياء
بدر حس فيها وكان وده يحرجها زياده بس ما معه وقت لأن وراهم سفر
تحرك بدر : يلله حبي ورانا سفر لازم نقوم نتجهز بسرعه ولو انه بكيفي أجلت السفره لبكره
العنود قامت بسرعه قبل لا يشوف دموعها اللي ماتدري ليه نزلت !!

********************************************

متعب : صباح الخير
سلطان كان واقف في المطبخ : صباح النور
متعب اليوم إجازه أشوفك لابس !!
سلطان : عندي مشوار
متعب : وين ؟؟
سلطان : إذا جيت قلت لك , شف القهوه صلحتها وطلعت زينه اليوم : يلله فمان الله وطلع وصك الباب وأول مانزل اتصل على فيونا وخذ عنوانها

وصل سلطان لفندق فيونا أول مادخل جلس في اللوبي واتصل عليها
سلطان : فيونا أنا تحت أنزلي
فيونا : تعال لي في جناحي الدور 3 رقمه 312
سلطان : تبين تكلميني أنزلي نتكلم تحت في اللوبي أو نروح أي مكان نتكلم فيه
فيونا : سلطان ما اقدر انزل أمس التوى كاحلي ورجلي تألمني وما أقدر احركها او امشي الا كم متر بس
سطان لوى شفايفه بتكشير : طيب دقايق وأنا عندك
طلع سلطان لجناح فيونا أول ما طق الباب فتحت له فيونا وهي مسويه روحها ما تقدر تمشي وكانت لابسه فستان أقل ما ينقال عنه أنه بقايا قماش لأنه مشقق من كل جهه وأجزاء جسمها اللي مكشوفه أكثر من اللي مغطيها الفستان
سلطان أول ماشاف شكلها انصدم من لبسها و نزل عيونه للأرض
فيونا مشت خطوتين بعدين مالت على سلطان وسوت نفسها انها بتطيح ومسكته مع يدينه سلطان رجع على وراه ودفها عنه وهو يناظرها بإستغراب
فيونا وهي مسويه زعلانه : اسندني سلطان
سلطان : إذا تبين احد تستندين عليه استندي على الجدار بعدين روحي البسي شي محتشم إذا تبيني أجلس واسمعك
فيونا ناظرته بتكشير : حبيبي نسيت أني كنت عايشه معك في نفس الشقه ؟
سلطان : صحيح كنا عايشين في شقه وحده بس أنت عارفه أني ماقد حطيت يدي عليك أو لمستك وما كنت أسمح لك تتمشين في الشقه بمثل هالملابس
فيونا قربت منه وما كان يفصلها عنه الا خطوه وقالت بدلال : اشتقت لك
سلطان بصوت عالي : فيونا إذا كنت مشغلتني طول الفتره اللي راحت علشان تقولين لي هالكلمه فأنا آسف أني ضيعت وقتي
فيونا : سلطان لا, فيه كلام كثير بأقوله لك
سلطان وهو معطيها ظهره ومتجه للباب : ياليت تقولينه الحين وقبل ما تقولينه روحي غيري ملابسك
فيونا بعصبيه : Ok شوي وراجعه
بعد دقايق رجعت وهي لا بسه جينز وتيشيرت وأشرت عالجلسه : تفضل
سلطان شاف ان فيه كرسي لشخصين وجنبه كرسي لشخص واحد اختار الكرسي اللي لشخص واحد وجلس عليه
جت فيونا وجلست في الكرسي اللي جنبه
سلطان : قولي اللي عندك
فيونا : حبيبي تشرب شي ؟
سلطان : لا شكرا , أبي اسمع وش عندك بس
فيونا ناظرته بعدين تكلمت : حبيبي أنا آسفه عاللي صار في الماضي , أنا كنت مضطره أتركك ظروفي كانت صعبه كنت محتاجه للفلوس كنت في وضع يخليني اسوي أي شي علشان الفلوس
سلطان : وأنا ما كنت أبخل عليك بشي سكن وأمنت لك مصروف وعطيتك ومستقبلك مضمون معي لأني قلت لك بنتزوج
فيونا : سلطان أنت كنت تعطيني اللي يكفي إحتياجاتي وبس فيه أشياء غير الاكل والشرب واللبس والحاجات الضروريه كنت في سن صغيره ومحتاجه ارفه عن نفسي واعيش حياتي واتمتع بكل لحظه فيها فيه اشياء ضروريه لي بس أنت كنت تشوفها تافهه ,, مثل ما قلت لك كنت صغيره وعرفت حمدان وبهرني بكلامه ووعوده لي والفلوس اللي كان يصرفها علي بدون حساب أو تفكير وطلباتي اللي كان يلبيها لي أول ما أطلبها ومرات قبل لا أطلب وفر لي كل شي أبيه خلاني اتمتع بكل لحظه عشتها معه
سلطان : تتمتعين بالتدخين والسهر والرقص في النوادي الليليه ؟؟ بعدين عمر 24 مو صغيره ولا مراهقه
فيونا كملت : لما عرض علي الزواج ماقدرت أرفضه خصوصا ان الزواج منه كان حلم بالنسبه لي وافقت عليه وصار اللي صار بس بعد ما تزوجت تغيرت معاملته لي صار يمنعني السهر والتدخين وحرمني من صداقاتي واجبرني أقطع علاقاتي مع اصدقاي الشباب واخذني معه للإمارات والعيشه هناك ما كانت بنفس عيشتي هنا بس أنا ما رضخت له ولا سمعت كلامه هو من جهته استخدم اقوى سلاح عنده وحرمني من المصروف والفلوس ماقدرت اتحمل وهربت مع صديقه اللي قال بيساعدني علشان اتطلق منه وفعلا بعد فتره تطلقت ورجعت هنا واشتغلت
سلطان : وش ثمن المساعده اللي قدمها صديقه ؟؟
فيونا ارتبكت واحمر وجهها وردت بعصبيه : مساعده بدون ثمن حب يسوي خير
سلطان : طيب وأنا وش وضعي كله من قلتيه ما اشوف أن اللي قلتيه يهمني في شيء ولا له صله فيني
فيونا : بس انا تربطني فيك أقوى صله
سلطان : رفع حواجبه بإستغراب
فيونا قامت من مكانها وجلست على مسند كرسي سلطان: صدقني سلطان بعد ما رجعت عرفت أني كنت غلطانه في حقك واني لو ألف الدنيا ماراح القى رجال يحبني مثلك وكملت بدموع سلطان أنا أحبك وأنت تحبني سامحني حبيبي أدري أني غلطانه بس الحبيب يغفر زلات وغلطات حبيبه صح
سلطان : وبعدين ؟؟ غفرت لك زلاتك وش يصير يعني
فيونا : نرجع لبعض حبيبي
سلطان رافع حواجبه : نسيتي أن متزوج
فيونا بثقه : طلق زوجتك
سلطان : وبعدين ؟
فيونا : نتزوج ونعيش حياتنا مثل ماكنا مخططين لها
سلطان : وتعيشين معي للسعوديه وتقطعين كل علاقاتك وتنسين السهر والشراب
فيونا قربت منه : سلطان حبيبي أنت تحبني وأكيد ما راح تجبرني على اشياء او تفرض علي شي غصب عني وقربت منه وكانت ناويه تبوسه بس هو فز من مكانه ووقف بنص الغرفه والتفت عليها : آسف فيونا ضيعت وقتي ووقتك عالفاضي
فيونا بخوف : وش قصدك ؟؟
سلطان : أنا مستحيل أرجع لوحده حقيره مثلك وحده تخلت عني بنفس طريقتك وكانت تواعد واحد غيري في النفس الوقت اللي كانت عايشه فيه من خيري كنت تغافليني وتوعديني بالزواج مع انك كنت تخططين تتزوجين من واحد غيري
فيونا ودموعها تنزل : سلطان انا قلت لك كنت غلطانه وأنا آسفه
سلطان : انا اللي آسف اني عرفت وحده منك آسف على الوقت اللي ضيعته عليك وعلى الوهم اللي كنت عايش فيه كنت مغفل سمعت منك كلمتين حلوه ولقيت وحده تسمع لي إذا تكلمت وتفهم علي وصدقت اني أحبك وللأسف اوهمت نفسي بهالشي وضيعت سنين من عمري عالفاضي
فيونا : وحبك لي ؟
سلطان : كان وهم
فيونا قربت منه وتعلقت فيه بس هو ابعدها عنه : سلطان وحبي لك
سلطان بإستحقار : قصدك حبك لفلوسي
فيونا : حبيبي خلنا نتفاهم
سلطان : مافيه مجال للتفاهم أنا واحد متزوج وأحب زوجتي تفهمين والالا أحب زوجتي وحس براحه كبيره عقب هالاعتراف اللي اول مره ينطق به قلبه قبل عقله
فيونا قاطعته : مستحيل أنت كنت تحبني وبتظل طول عمرك تحبني
سلطان : غلطانه أنا ما عمري حبيت ولا راح احب احد غير زوجتي ومستحيل أطلقها او اتخلى عنها
فيونا : سلطان أنا مستعده اعيش معك في الظل
سلطان بإستحقار : أيش ؟؟
فيونا : أنا مستعده اسوي أي شي علشانك وأنا راضيه اني اعيش معك حتى لو ما طلقت زوجتي
سلطان بعصبيه : وانا مابي اعيش معك ولا ابي اعيش معك من الاصل تفهمين والا لا وراح عند الباب وفتحه قبل ما يطلع التفت : اتمنى تنسيني مثل ما انا نسيتك وتنين ان فيه واحد اسمه سلطان كنت تعرفينه ورجاء مابي اشوفك تعترضين طريقي او تحاولين تتصلين فيني وصك الباب بقوه وحس انه ان جبل من الهموم أنزاح من على صدره و راحه أول مره يحس بها ..


********************************************