كاتب الموضوع :
ملكة النور ....
المنتدى :
الارشيف
الجزء السابع والاربعون
طلَعوا العنود من غرفة العمليات وودها للعنايه وتطمنوا عليها أهلها وكل واحد راح لبيته
ساره وسلطان في السياره
ساره : سلطان
سلطان : هلا
ساره : من اللي كان واقف معنا عند غرفة العمليات
سلطان : بدر
ساره : وش بدر ؟
سلطان : هذا أخو مشاري نسيب عمي
ساره : ماشاء الله عليه رجال ما ترك عمك الا يوم تطمن عليه
سلطان : أيه مشاري مسافر وهو اللي وصل أصايل للمستشفى
ساره : تصدق , خطيب العنود ما ارتحت له حتى ما عنده اسلوب
سلطان : أي والله أجل البنت بين الحياة والموت ويقول وجهها بشع وإلا لا
ساره : الله يقومها بالسلامه بس
سلطان : آمين
***********************************************
بدر رجع للبيت هو وفاتن وأصايل راحت لبيت أهلها
أم بدر : هاه طمنونا
فاتن : الدكتور يقول لازم نحطها في العنايه 24 ساعه لين ما تتعدى مرحلة الخطر
غاده : لهالدرجه إصابتها خطره
فاتن : أسئلي بدر هو اللي كان واقف مع أبوها وسمع كلام الدكتور
أم بدر : هاه وأنا أمك وش قال الدكتور؟
بدر كان تعبان ونفسيته دمار كان خايف على العنود وفي نفس الوقت متضايق من اللي سواه نايف : يمه ادعوا لها بس هم سووا لها عمليه ووصلوا الشرايين في بعض وزود على كذا انكسرت رجلها وتشوه وجهها
غاده : لا حول ولا قوة إلا بالله العلي العظيم , عاد هي ملكة جمال
سلوى : وع وجهها قبل التشوه شين الحمدلله والشكر أجل ألحين وش بيصير
بدر عصب وحس أنه بينفجر : احترمي نفسك لو سمحتي ولا تغلطين على البنت , على الأقل البنت يوم تشوه وجهها عندها أخلاق تشفع لها مو مثلك
سلوى : وانت وش دخلك أحد جاء صوبك والا تكلم عنك والا عن أهلك
بدر : حتى لو هي غريبه أنتي مالك أي حق تتكلمين عنها
سلوى : إلا بأتكلم وأنت مالك دخل فيني وتستاهل عنيده ما جاها وجعلها تموت بعد
فاتن : جعلك الموت اللي يأخذك أنتي لا تدعين على البنت
أم بدر : لا تدعون على بعض
بدر : قومي أطلعي برى ولا عاد أشوفك جالسه معنا مره ثانيه
سلوى : إذا صار البيت بيتك تعال أطردني
غاده : البيت بيت أبوي, وبدر وأبوي واحد
سلوى : مالت عليكم أنتوا وبيتكم وقامت لغرفتها
فاتن : حشى هذي أبليس موب حرمه
غاده : الله يأخذها ويفكنا منها
بدر : هي ليش تكره العنود
فاتن :هي حاقده على أصايل وأهلها من الأساس و مره سمعتنا وحنا نقول أن عبدالرحمن خطب العنود ورفضته وحقدت على البنت زياده وطردتها من البيت
بدر : والعنود رفضت عبدالرحمن
أم بدر: أيه خطبناها وأهلها وافقوا بس هي رفضت تقول ما تبي تتزوج قبل لا تخلص دراستها
بدر بدون نفس : أنا بأروح أنام , تصبحون على خير
طلع بدر لغرفته وهو يفكر: طيب ليه العنود وافقت على نايف وهي ما بعد خلصت دراستها وباقي لها فصل كامل
**************************************************
ثاني يوم
قامت ساره من النوم ونزلت تحت قام سلطان وما لقاها في الغرفه نزل تحت وشافها جالسه تدرس
سلطان : صباح الخير
ساره : صباح النور هلا وغلا
سلطان : وش قومك بدري؟
ساره بملل : وش أسوي بكره إمتحاني
سلطان : الله يوفقك
ساره : آمين
سلطان جلس جنبها وجلس يتفرج على كتبها: إذا بغيتي مساعده قولي لي
ساره : جد والله بتساعدني ؟
سلطاان : إذا احتجتي
ساره : يلا أجل جيت في وقتك اشرح لي هالفقره
سلطان : أوف ما صدقتي
ساره : هونت ؟
سلطان : لا عطيني أشوف وش اللي ما فهمتيه
جلس سلطان يقرى شوي بعدين بدى يشرح لساره وهي قاعده تناظره وسرحانه في عالم ثاني
سلطان : هاه فهمتي
ساره : هاه
سلطان : أعيد ؟
هزت راسها وهي مستحيه : أيه
سلطان : طيب وراك خايفه ؟
ساره : لا بس ما فهمت
سلطان جلس يشرح لها من الأول رفع راسه وشافها تتأمله طاحت عينه في عينها ارتبكت ساره وجلس قلبها يدق بقوه وسلطان ما رحمها بنظراته ومن ارتباكها ما قدرت تفسر نظراته لها واللي كانت كلها نظرات إعجاب سلطان كان مبسوط وعجبه شكل ساره وهي مرتبكه وكان مبسوط لأنه كفشها وهي تتأمله وهالشي خلاه يفرح
ساره ولع وجهها وحست انها بتحترق من الفشيله واستحت ابتسم لها سلطان وهي ما قدرت تقاومه وابتسمت له وكان ودها تمد يدها وترفع الخصله اللي نازله على جبهته
دخلت فاطمه بدفاشه : يلا ماودكم تقومون تفطرون
سلطان كان وده يقوم ويشوت فاطمه
ساره في نفسها وش هالحظ ياربي
فاطمه : هاو وش فيكم ؟
سلطان : ما فينا شي
فاطمه : يلا أجل قوموا افطروا ماعاد الا خير وراك صلاة جمعه
سلطان : خلاص طيب بس اشرح لساره هالجزئيه
سلطان شرح لساره الجزئيه بسرعه
سلطان : هاه فهمتي
ساره ماسمعت ولا كلمه من اللي قال : أيه فهمت
سلطان : أكيد ؟
ساره وهي تكذب : أيه
سلطان : خلاص إذا بغيتي شي ثاني قولي
ساره : مشكور ما تقصر
فاطمه : لعنبوا أبليسكم الفطور بيبرد وأنتوا قاعدين تهذرون
سلطان قام وقامت معه ساره وراحوا يفطرون
************************************************** *
بعد صلاة الجمعه راح أبو أصايل وأم أصايل وأصايل للمستشفى يشوفون العنود وما قدروا يدخلون عليها لأنها في العنايه
جاهم الدكتور وسلم على أبو أصايل
أبو أصايل : بشر يا دكتور
الدكتور :الحمدلله إلى الأن حالتها مستقره وإن شاء الله بكره الصباح بنطلعها من العنايه
أبو أصايل : طيب الكسر اللي في رجلها يحتاج وقت طويل
الدكتور: الحمدلله الكسر مو مضاعف وكلها ثلاثة أسابيع أو شهر بالكثير ويجبر كسرها
أبو أصايل : طيب التشوهات اللي في وجهها ممكن تروح مع العلاج
الدكتور: التشوهات سطحيه فقط وممكن تزول مع العمليات التجميله والليزر وبإذن الله بيرجع وجهها مثل أول وأحسن أهم شي أنكم تراعون هالنقطه وتحاولون تتأقلمون مع شكلها وما تحسسونها بالتغيير اللي صار لها لأن الجزء الأكبر من العلاج يعتمد على نفسية المريض
أبو أصايل : وكم عمليه تجميل تحتاج؟
الدكتور : عمليتين أو ثلاث بس تطمن ولا تخاف إن شاء الله بنتك تقوم بالسلامه
أبو أصايل : الله يسمع منك , مشكور يا دكتور والله يعطيك العافيه
الدكتور :الله يعافيك , وبكره إن شاء الله تجون تزورونها بعد ما نطلعها لغرفه خاصه
أبو أصايل : إن شاء الله نزورها بكره
************************************************** **
في بيت أبو بدر
رجع بدر وأبوه وأخوانه من الصلاة
بدر شاف بدور ولد مشاري جالس يلعب وشاله وحطه على رجوله وجلس يلعب معه
عبدالرحمن : وولدي كخه يوم أنك مطنشه
بدر : أيه كخه على أبوه
عبدالرحمن : عاد من زين بدير يوم انك قاعد تشوقل فيه
بدر : هذا السمي لا تغلط عليه بعدين هذا صاير كنه يتيم لا أم ولا أبو , إلا على طاري أصايل اتصلتي عليها يا فاتن
فاتن : أيه اتصلت عليها
بدر: هاه وش اخبار أختها
فاتن : تقول بكره بيطلعونها من العنايه
أبو بدر : الله يشفيها ويعافيها ويقومها بالسلامه
الكل : آمين
أم بدر : عاد إذا طلعت من العنايه نبي نزورها في المستشفى
بدر : خلاص إذا جاء بكره وديتكم لها
غاده : السلام عليكم
الكل : وعليكم السلام
أبو بدر : وينك فيه
غاده : كنت في غرفة بدور أجهز أغراضه بترسل السواق علشان يجي يأخذه
بدر : وتخلي هالصغير يركب مع السواق لحاله , خلاص جيبي أغراضه خليني أوصله ما حنا ناقصين حوادث مع هالسواقين
عبدالرحمن : خلاص بأوصله عنك
سلوى عطت عبدالرحمن كوع علشان يسكت وهو طنشها
بدر بمزح : لا أخاف تنتقم منه
عبدالرحمن : وش دراك أني بأنتقم ؟ لهالدرجه أنا مفضوح , بس ترى مانيب معذبه واجد يعني بأربطه في الصدام مانيب مركبه داخل السياره
بدر : أيه عارفك نذل , الشر يتطاير من عيونك
عبدالرحمن : الله الشر يتطاير من عيوني , حشى شرشبيل مانيب عبدالرحمن
أبو بدر : وأنتوا ماتعرفون تمزحون مثل الناس
بدر : خلاص أبوي عصب غير السالفه
*************************************************
اليوم الثاني
كان سلطان في الدوام وعقله في الجامعه كان وده يتصل على ساره ويتطمن على نتيجة إمتحانها بس خايف تفسر لهفته غلط وهو من الاساس موب لاقي تفسير للي قاعد يسويه وجلس يناظر الساعه ووده ينتهي الدوام بسرعه علشان يرجع للبيت
ناصر كان فاضي وماعنده شغل وطلع وراح لفهد
فهد : خير وش عندك
ناصر :و الله شفت نفسي فاضي قلت خلني أشقر على ضنايا
فهد : باللهي
ناصر : اليوم ماهنا زود شغل وخفت أطلع ويعصب أبوي والا سليطين تعرفهم في النحشات مايرحمون عاد قلت مالي الا فهود أروح اتقهوى عنده
فهد : وش قالوا لك مقهوجي الشركه
ناصر : وأنت ماتعرف تجامل وتتكلم مثل الأوادم
فهد : لا ما اعرف
ناصر : طيب خلهم يجيبون لنا شاهي بس
فهد : نصور أنا عندي شغل لا تمشكلني مع سلطان
ناصر : ههههههههه يا حليلك سلطان مديرك
فهد : لا توني أدري تصدق , أقول تراه مديرك بعد أنت
ناصر : بس أنا بعيد عنه موب مثلك مكتبك ملاصق مكتبه
فهد : تصدق اليوم عاد مستهدي ونازل عليه سهم الله حتى يوم تأخرنا في تسليمه الملفات ما قال شي
ناصر : غريييييبه
فهد : حتى أنا استغربت
ناصر :تعال خلنا نروح نشوفه أخاف مريض والا بيموت والا فيه شي
فهد : كل تبن ولا تفاول عليه لا أكفخك
ناصر أمش بس خلنا نطل عليه ونرفع له ضغطه شوي
فهد : يلا مشينا
فتح ناصر الباب بهدوء وكان فهد وراه ولقوا سلطان لاهي ويطقطق في جواله مشى ناصر هو وفهد ووصلوا للمكتب وسلطان موب منتبه لهم
ناصر قام يتنحنح وسلطان سرحان
ناصر : يا ابو الشباب نحن هنا
سلطان رفع راسه وشاف أخوانه واقفين قدامه : خير أنت وإياه فيه إختراع اسمه باب يطقونه الناس قبل لا يدخلون
ناصر راح وجلس على طاولة المكتب : أيه ندري عن ذا الاخترع من زمان وطقينا الباب على قولك بس أنت ما رديت عاد خفنا عليك قلنا يمكن مات والا شي
فهد دف ناصر وطيحه من على الطاوله : كم مره قلت لك لا تفاول عليه
ناصر : يا المنافق توك تقول الله يفكنا منه
فهد : نويصر ووجع لا تنصب , سلطان تراه نصاب
سلطان : داري ماعليك منه
ناصر وهو يعدل جلسته على الطاوله : آفا ألحين اتحدتوا ضدي أنت وإياه
سلطان وهويناظر ناصر اللي جالس على الطاوله : ورى ما تجي تجلس في حضني أحسن
ناصر : لا وفر حضنك للمدام
سلطان ارتبك من كلام ناصر : أقول انقلع بس أنت وتفكيرك القذر
ناصر : خخخخخخخخ وش فيك لايكون استحيت بس
سلطان : ضف وجهك بس ويلا على مكتبك
ناصر : وش فيك عصبت ترى ماقلت شي حرام عادي خلك فري
سلطان : فهيد الله يعافيك إذا جيت المره الثانيه لاتجيب ذا البثر معك
ناصر : يا حليلك ياسلطان شكلك استحيت صدق , الا وش رايك في العرس زين؟ تنصحني فيه وأنا أخوك . ترى من تزوجت ما سولفت معنا زي الناس , ووش أخبار المدام معك هي مسنعتك والا أنت مسنعها ووش صار عليكم قصيت لسانها ؟
فهد : حشى وش ذا الاسئله على بالي أمي قاعده بيننا
ناصر : لا تحش في ممتي لا أعلمها عليك
فهد : ياشينك وأنت تقول ممتي
ناصر : خلونا في المهم بس , من جد سلطان وش سويت مع ساره
سلطان : ما سويت شي
ناصر : لين ألحين لسانها طويل ووشلون قدرت عليها
سلطان : أنت ليش نشبه
ناصر : وأنت ليش نجس يا أخي نبي نتعلم ونتثقف بكره ورانا عرس
سلطان : إذا خطبت ذيك الساعه علمتك
فهد : هذا إذا لقى وحده ترضى فيه
ناصر: بس بأه أنت وهو كفايه تقريح
سلطان : يا حليله أخوي انجرح
فهد : حط له بلاستر
ناصر : أخرس يا حقير لا أضربك بالألم
سلطان : قلم والا مسطره
ناصر : يا الله وش ثقالة هالدم اللي عندكم أنا بُراء منكم إلى يوم الدين ,لعنبوا كم ما تعرفون تذبون مثل العالم والناس
سلطان : وش نسوي نذب على مستواك
فهد : سلطان وش رايك تجي تتغدى عندنا اليوم
سلطان : لا والله بأتغدى في بيتي
ناصر : يا اخي اليوم تعال تغدى عندنا وش بيضرك
فهد : وهو صادق
سلطان : لا خلوها يوم ثاني
ناصر: ليش عاد
سلطان : خلاص أنت لا تصير حقنه قلت لك يوم ثاني
ناصر: ماتبي تخلي ساره تتغدى لحالها
سلطان : وش دخل ساره في الموضوع
فهد : خلاص يا بثر خله على راحته بعدين وش دخلك فيه حاط حرتك في هالساره الضعيفه
ناصر : يا أخي أغار منها
سلطان : لا تكون حرمتي الثانيه وأنا مدري
ناصر : وليش لا, ترى يصلح هاه وش رايك اتصل على الشيخ يجي يملك بنا
سلطان : وجع إن شاء الله , الله يأخذك على هالمزح الماصخ
ناصر: لا تخاف بأكون خدامه لك بأطبخ لك وأغسل ملابسك وأنظف لك البيت وأربي عيالنا أحسن تربيه أنت بس وافق
فهد : وع انطم تكفى حومت كبودنا الله يقرفك
ناصر : أنا أكلم سلطان ماكلمتك , هاه سلطان وش قلت
سلطان : والله لو أنك بنت ما أخذتك
ناصر : وليش إن شاء الله خايف على مشاعر المدام
سلطان : أيه خايف على مشاعرها عندك مانع
ناصر : لا تنصب بس لو يحصلك وحده ثانيه ما أنت قايل لا
سلطان أنا وحده وقلبت حياتي وشلون اجيب وحده ثانيه : لا والله اللي عندي تكفيني
ناصر : وين اللي بأقص لسانها وأربيها أشوفك خقيت معها وصرت تحبها
سلطان في نفسه معقوله صرت أحبها , إحساسي مع ساره يختلف عن إحساسي مع فيونا بس ساره غير في كل شي
ناصر قاطع عليه أفكاره : وين وصلت يا الطيب
سلطان ناظر الساعه وشافها 2 وانبسط
سلطان : يلا عاد الدوام خلص وحنا جالسين نهذر
ناصر : أيه والله ما نقصنا إلا حلا وترامس قهوه ويصير مكتبك غرفة مدرسات
فهد : وأنت وش عرفك بالمدرسات
ناصر : طويرق مابقي شي ما يعرفه عن المدرسات
سلطان : وطويرق وش علمه
ناصر : نسيت أن امه مدرسه
سلطان : يلا أنا بأروح البيت ولا تتأخرون عن دوام العصر , ويلا مع السلامه
ناصر وفهد : مع السلامه
وصل سلطان للبيت ولقى فاطمه في الصاله
سلطان : السلام عليكم
فاطمه : وعليكم السلام
سلطان : جت ساره
فاطمه : أيه جت الساعه 10.30 ونامت
سلطان : حلت زين في الإمتحان
فاطمه : مدري والله لأني ما شفتها يوم وصلت , بس قالت لي الخدامه أنها تقول صحوني إذا جاء سلطان من الشغل
سلطان : خلاص أجل بأروح أغير ملابسي وأصحيها
فاطمه : أخليهم يجهزون الغداء
سلطان : أيه الله يعافيك
طلع سلطان للغرفه وفتح الباب بهدوء وشاف ساره نايمه على الكنب مثل العاده راح عندها وقرب للكنب وجلس على الأرض وجلس يناظرها وهي كانت غرقانه في النوم
مد يده وبعد الخصل عن وجهها ومسح خدها بأطراف اصابعه وقرب منها وباسها على خدها بعدين قام وهو يحاكي نفسه : أنا وش فيني ضايع وموب عارف وش وضعي لا أنا متزوج ولا عازب وساره صايره مثل ظلي ماتغيب عن بالي ولا لحظه لا في نهار ولا في ليل هالبنت صايره خطر على مخي أحس عقلي بيروح بسببها بس والله انها رهيبه موسعه صدري ومخليتني مبسوط
غير ملابسه وطلع وراح ووقف عند ساره ونادها بصوت هادي : ساره ساره
ساره انقلبت على جنبها وما قامت
سلطان رفع صوته شوي : ساره يلا قومي
ساره فتحت عيونها ببطء :هاه
سلطان : قومي ماشبعتي نوم
ساره : طيب وجلست وهي تتمغط وفكت شعرها ورجعت تربطه من جديد
سلطان : يلا غسلي وجهك علشان ننزل نتغدى
ساره وهي تقوم من على الكنب : طيب مشت للحمام وناداها سلطان : ساره
التفتت عليه : سم
سلطان : سم الله عدوينك , وش سويتي في الإمتحان حليتي زين
ساره انبسطت لأنها حست انه مهتم فيها : الحمدلله وإن شاء الله a+
سلطان : زين الحمدلله , انا بأسبقك تحت
ساره : خلاص دقايق وأنا لا حقتك
نزلت ساره وجلسوا يتغدون
ساره : سلطان
سلطان : هلا
ساره : ترى اليوم بنروح للعنود طلعوها من العنايه الصبح
سلطان : ساره أنتي عندك إمتحانات أجلسي ادرسي والعنود كلميها بالتليفون
ساره : لا والله العنود أهم من الدراسه
سلطان : مايخالف كلها كم يوم وتخلصين إمتحاناتك وذيك الساعه أنا بأوصلك لها بنفسي
ساره : سلطان العنود مثل أختي سوسن وأنا مستحيل أخليها وما أزورها وإذا ما راح توديني بأخلي سالم يوديني لها
سلطان : سؤال أنتي عنيده على مين
ساره : عليك
سلطان وهو رافع حواجبه : لا والله وتنكتين بعد
ساره بغرور : أصلا لك الشرف أني أصير عليك
سلطان : الحمدلله والشكر ماعليك شرهه الامتحانات مأثره على عقلك
ساره : المهم وش قلت بتوديني والا لا
سلطان حب يستهبل عليها : لا
ساره : خلاص بأخلي سالم يوديني
سلطان مسوي يكلم نفسه : ماشاء الله ما تعوق
ساره تناظره علشان تقهره : وش قالوا لك أنا ساره والاقر على الله
سلطان : خلاص بأوديك أنا
ساره : بعدي والله هذا الكلام اللي يجمد على الشارب
سلطان : خير وش هالالفاظ قاعد مع الشباب
ساره : لازم أعطيك ألفاظ تناسب جنسك
سلطان : الله يشفيك
ساره : آمييين
سلطان : يلا طيب إذا خلصتي غيري ملابسك علشان نمشي أول ما يأذن العصر
ساره : إن شاء الله
************************************************
العصر راحت ساره مع سلطان للعنود
دخلوا وسلموا عليها بعدين طلع سلطان وجلست ساره مع العنود وأصايل وأم أصايل وريم
ساره : وش أخبارك يالعنود
العنود : الحمدلله بخير
العنود كانت نفسيتها تعبانيه ونص وجهها مغطيه الشاش
دخلت ريم وأمها وبعدين دخلت هيفاء ومنى وأم فيصل والغرفه امتلت وكل قام يسولف والعنود ساكته
ساره قربت من العنود وكلمتها بصوت واطي : العنود
العنود : نعم ؟
ساره : ما زارك نايف
العنود : لا ولا تجيبين طاريه
ساره : ولا كلمك
العنود : لا لا هو ولا أهله
ساره سكتت شوي بعدين كملت : أمس بدر كان هنا في المستشفى
العنود بحماس : كذاااااااااابه وش جابه
ساره وهي تضحك : أشوف الحماس رجع والابتسامه شقت الوجه
العنود : ساره تكفين تكلمي
ساره : بأكلمك في الليل وأقولك
العنود : لا تكفين وش يصبرني
أصايل : وش فيكم تتساسرون وش تقولون
ساره : ما قلنا شي
ريم : لعنبوا أبليسكم من ساعه تهذرون وتقولون ماقلنا شي
ساره : أنتي انطمي بس المفروض أنتي قاعده في البيت تدرسين
ريم : وأنتي بعد
ساره : حبيبتي على الاقل أنا ما أطلع من الامتحان وأقعد اتشكى وأقول ما حليت
ريم : طيب أنكتمي وبلاش فضايح استرينا ربنا يستر عليكي
منى : هو أنتي ناقصه
هيفاء : كلنا عارفين أنك دجه وماأنتي كفو دراسه
ريم : ترفقي على عمرك يالدافوره
دق سلطان على ساره
ساره : هلا والله
سلطان : يلا خلينا نمشي
ساره : طيب ألحين بأطلع
ساره قامت وسلمت على العنود
العنود : بصوت واطي أنتظرك في الليل
ساره : طيب
دخلوا حمولة أصايل قبل ما تطلع ساره وسلموا عليها
طلعت ساره ولقت سلطان واقف يسلم على بدر
ورجعت للغرفه
أصايل : وش فيك ؟
ساره : نسيت أقول شي للعنود
وراحت عند العنود وكلمتها في أذنها : بدر برى
العنود تناظر ساره : تمزحين
ساره : والله
العنود ضحكت : ناويه علي الظاهر
ساره : هههههههههههه وش رايك فيني أعجبك ؟
العنود : والله أنك أطلق من ريم ومنى
الحريم كانوا جالسين وما يدرون وش السالفه
ريم : خير تحشون عيني عينك
أصايل : وش عندك أنتي وإياها
منى شكت في السالفه وضحكت : خلاص أنتي وإياها يكفي حش
ساره : ماشاء الله لقطتيها
أم أصايل : وش فيكم أنتوا
ساره : مافينا شي بس نبي نطفر ريوم
ريم : أقول إذا فيك خير وصليني معك للبيت
ساره : يلا أجل أمشي سلطان برى ينتظرنا
طلعت ريم مع ساره
ريم : من ذا اللي مع سلطان
ساره : بدر
ريم : كذااااااااابه
ساره : والله
ريم : إن شاء الله هذي هي السالفه اللي بينك وبين العنود
ساره : أيه
ريم : ساره حرام عليك البنت مخطوبه لا تخربينها اللي فيها كافيها
ساره : أنتي لو شفتي خطيبها على قولك والا سمعتي كلامه بتسوين مثلي
ريم : حتى ما يصير تعلقينها في بدر زياده
ساره : ريوم صفقيني أن استمرت خطوبة العنود ونايف
ريم : ليه
ساره : تدرين أنه ما زارها ولا دق عليها لا هو ولا أهله
ريم : وش دراك
ساره : سألت العنود
ريم : صدق ما يستحون
سلطان : وش فيكم واقفين خلصونا نبي نمشي
بدر كان واقف عند غرفة العنود ومقهور لأن مايفصله عنها الا الباب كان وده يكسر هالباب ويدخل يتطمن عليها بنفسه بس مسك أعصابه وقعد ينتظر أهله علشان يطلعون ويطمنونه عليها
في الليل اتصلت ساره على العنود وقالت لها عن كل شي والعنود انبسطت
العنود : يا حبي له
ساره : خلاص عاد لا تمدحينه واجد ترى بأحس بالذنب وضميري بيأنبني على نايف
العنود : تكفين وش يأنبك عليه لو فيه خير كان اتصل على أبوي يتطمن
ساره : يمكن اتصل عليه
العنود : لا سألت أبوي وسكت ما قال شي
ساره : الله يصلحه
العنود : الله يفكني منه قولي آمين
ساره : الله يدلك على الخير
العنود : آميين , ويلا عاد روحي كملي دراستك قطعتك
ساره : تفداك الدراسه يا بعدي
العنود : خلاص ترى ما اتحمل يكفي الاخبار الحلوه وبعد كلام حلو أخاف أروح فيها
ساره : بسم الله عليك
العنود : عن البربره الزايده ويلا بس مع السلامه
ساره : مع السلامه
*********************************************
عبدالرحمن دخل للغرفه يغير ملابسه وجلس يحوس في الدولاب يدور على تيشيرت نظيف وشاف كيس صغير بين الملابس سحبه وفتحه ولقى فيه علبه فتح العلبه ولقى فيها ساعه نسائيه وباين أنها غاليه شاف أسم المحل وكان محل مجوهرات رجعها في مكانها وهو يكلم نفسه : هين يا سليو نهايتك قربت على بالك أني دلخ وعلى وجهي بنشوف وش بتسوين اليوم
غير ملابسه وراح وجلس ينتظرها ترجع
دخلت سلوى وهي مبسوطه : السلام عليكم
عبدالرحمن : وعليكم السلام
سلوى : من زمان وأنت هنا
عبدالرحمن : وين كنتي
سلوى : رحت أزور صديقتي
عبدالرحمن : وصديقتك ساكنه في كوفي شوب
سلوى تغير وجهها : وشو
عبدالرحمن : أقول صديقتك ساكنه في كوفي شوب يوم أنك رايحه تزورينها
سلوى بلعت ريقها : وش فيك يا عبدالرحمن
عبدالرحمن : معك ساعتين ضفي كل ملابسك وأغراضك وعلى بيت أهلك وورقة طلاقك بتوصلك قريب
سلوى بخوف : عبدالرحمن وش فيك وش قاعد تقول ترى ما أحب المزح البايخ
عبدالرحمن : سليو اطلعي وأنتي ساكته ولا تخليني أفضحك عند العالم
سلوى : وش فضايحه كان ولد أبوك تكلم
عبدالرحمن طلع من واحد من الدروج أشرطه ورماها على الطاوله
عبدالرحمن : هذي تسجيلات لمكالماتك مع خويك سعد وطلع ورقه من جيبه وهذي لسته بأسماء المحلات اللي تقابلتوا فيها وراح للدولاب وطلع الساعه ورماها في وجهها وهذي آخر هديه منه
سلوى وجهها قام يتقلب ألوان والخوف بين عليها
عبدالرحمن : أنا بأطلع ألحين وما أبي أرجع وألاقيك موجوده وفهود بيجلس عندي فاهمه والا لا وأن حاولتي تسوين فيها ذكيه وتطالبين بحق الحضانه بتلاقين هالاشرطه في يد أخوك منصور وفي الشرطه بعد
وقبل لا يطلع رمى عليها يمين الطلاق وانطوت صفحة سلوى وأهلها من حياة عبدالرحمن ومن هالقصه بعد
في الليل رجع عبدالرحمن للبيت ولقى أبوه وأمه وبدر جالسين في الصاله
أبو بدر : عبدالرحمن
عبدالرحمن : سم
أبو بدر : طلقت سلوى ؟
عبدالرحمن : أيه يبه
أبو بدر : ليش وأنا أبوك أنتوا عندكم ولد ماله ذنب وترى المشاكل تصير بين كل اثنين
عبدالرحمن : يبه أنا طلقتها بالثلاث وتراني ما طلقتها الا بعد ما عوفتني حياتي وقلبتها جحيم
أم بدر : بس فهد ولدك وش ذنبه
عبدالرحمن : وأنا بعد وش ذنبي , وفهود بيعيش عندي وأنا اللي بأربيه
أم بدر : فهد صغير ومحتاج لأمه خله عندها لين ما يكبر طيب
عبدالرحمن : لا يمه مستحيل أخليه عندها ولو سمحتوا لا أحد يتكلم في هالموضوع مره ثانيه أنا طلقتها وارتحت . وتصبحون على خير أنا بأروح أنام وطلع على طول لغرفته
أم بدر : الله يهديه استعجل بالطلاق وش ذنب هالصغير
أبو بدر : سليو ما تنقدر بس عاد ما توصل للطلاق الله يصلحه بس
بدر : أنتوا ما تدرون عن عيشته معها هو أبخص بنفسه
أبو بدر : بدر وأنا أبوك رح تكلم معه وشف وش فيه
بدر : إن شاء الله يبه
طلع بدر لغرفة أخوه ولقاه قاعد على السرير
بدر : ودي أسولف معك إذا ما عندك مانع
عبدالرحمن : حياك الله
راح بدر وجلس جنب أخوه على السرير
بدر : وش فيك يا عبدالرحمن
عبدالرحمن : ما فيني شي
بدر : ليش تسرعت وطلقت حرمتك
عبدالرحمن : أنا ما تسرعت ولا شي بالعكس المفروض أني مطلقها من زمان
بدر : وليش عاد
عبدالرحمن : أنا بأقولك عن اللي صار وما أبيك تقول الكلام لأحد البنت راحت والله يستر علينا وعليها , وتكلم عبدالرحمن عن سلوى وخيانتها ومكالماتها بالتليفون وطلعاتها والهدايا اللي تجيها
بدر : وأنت وش دراك عن طلعتها والهدايا اللي تجيها
عبدالرحمن : أنا كنت شاك فيها أول كانت مكالماتها كثيره والتليفون ما يطيح من أذنها وحطيت جهاز تسجيل أما طلعاتها وروحاتها وجيتها السواق ماقصر كل مكان تروح له يقول لي عنه لأني موصيه عليها
بدر : الله يهديها ويستر على بنات المسلمين ويعوضك بوحده أحسن منها
عبدالرحمن : لا خلاص أنا كرهت جنس الحريم
بدر: يعني نزوجك رجال
عبدالرحمن : هههههههههه والله أنك فاضي
بدر : من زمان
عبدالرحمن : زين قم خلانا ننام ورانا دوامات بكره
بدر : يلا أجل تصبح على خير
عبدالرحمن وأنت من أهله
************************************************** *
|
01-08-10, 08:42 AM
جديد مواضيع قسم الارشيف
العرض العادي
