الجزء الرابع والاربعون

يوم العيد
ساره : سوسن بسرعه الله يعافيك
سوسن : أقول ترى ما نيب خدامه عندك
ساره : بأردها لك في المناسبات
سوسن : تعبت وانا أكوي ذا الفستان ويالله ضبطت معي الكسرات
ساره : مشكوره يا أحسن أخت في الدنيا
سوسن : أحد يلبس قبل الفجر
ساره : وش أسوي سلطان يقول بعد الصلاة خلك جاهزه
سوسن : والله أنك معطيته وجه
ساره : طيب دريت قلتي لي هالكلام مية مره ويلا أطلعي خليني ألبس
سوسن : طيب إذا خلصتي ناديني أبي أشوفك وأنتي لابسه
لبست ساره لبس العيد وكان فستان رمادي غامق تحت الركبه كت وضيق ومن عند الفخذ فيه كسرتين من قدام وكسرتين من ورى وتحته قميص أبيض وعلى الخصر حزام جلد أسود سخيف ولبست كلون أسود وبوت جلد أسود إلى الركبه وعلى الفستان لبست بلوفر أسود تريكو فيه خيوط رماديه مع أبيض خفيف وخلت البلوفر مفتوح وطلع شكلها رسمي وناعم
شعرها سوته كيرلي خفيف واستشورت قصتها ولبست عدسات أخضر غامق ومكياجها حطت كحل قلم ثقيل وبلاشر خفيف وروج أحمر طلع شكلها غريب بس حلو وخذت شنطتها وعبايتها ونزلت تحت وأهلها مجتمعين يتقهوون
ساره : هنهم
أبو عبدالله : وأنتي منهم
هند : والله طلع شكلك حلو وأنا من شفت فستانك وانا أقول وع كنه مريول
ساره : قلت لك بيجي شكله حلو وماصدقتيني
نجوى : بس لو لونه غير عن الرمادي كان أحسن
وفاء : وش تبين لونه أحمر والا أخضر , الرمادي حلو رسمي وهادي
ساره : احب الرمادي خصوصاً في الملابس الشتويه
أم عبدالله : لو ماصبغتي شعرك كان أحسن ربي مزينك بالشعر الاسود وتروحين تخربين عمرك
خالد : أي والله شعرها طلع شين المفروض تتحجبين لين ما يرجع لون شعرك الطبيعي
أبوعبدالله : ما عليك منهم وأنا أبوك قابلك ربي بسم الله عليك قمر
سوسن : وأنا
أبوعبدالله : السوري غير
هند : ليش على راسها ريشه مثلاً
عبدالله : أبوي صادق سارونه غير ملح وقبله
وفاء : هي تراني هنا
عبدالله : وأنا سابك أنا قاعد أمدح أختي
ساره : يمه منكم شبيتوا فيني ترى ما قلت شي
أم عبدالله : أقول تقهووا بس قبل لا يقيم المسجد
أبو عبدالله : خلاص حنا بنقوم نصلي وأنتوا خلكم جاهزين بعد الصلاة مباشره علشان نروح نصلي العيد
أم عبدالله : إن شاء الله
أبو عبدالله : خالد عبدالله يلا قوموا صلوا
خالد : طيب يبه مابعد أقام
أبوعبدالله : وأنت الظاهر ماعمرك طبيت المسجد قبل لا يقيم يلا قدامي أذكرها مره في العمر
خالد : يبه بأكمل فنجالي وألحقك
أبوعبدالله : أيه عقب ما يخلص الركعه الاولى تجي تسحب رجليك , وأنت الثاني ما ودك تقوم
عبدالله : يلا لاحقك ألحين
أم عبدالله : الله يهديكم بس
طلعوا الرجاجيل يصلون والبنات جلسوا يصلون وبعد ما خلصوا لبسوا عباياتهم وجلسوا برى
رن جوال ساره وكان سلطان المتصل
سلطان : ساره أنا عند الباب
ساره : خلاص جايه
فتحت ساره الباب ولقت أبوها وأخوانها جايين
ساره : يلا أطلعوا أبوي جاء
طلعوا مع بعض وركبت ساره مع سلطان
ساره : السلام عليكم
سلطان : وعليكم السلام , لحظه بأنزل أسلم على خالي والعيال
نزل سلطان يسلم على أبو عبدالله ويبارك له في العيد وجلس يكلم الشباب
سلطان كان لابس ثوب أسود وغتره صوف وجزمه سوداء( مكرم القارئ)
هند ونجوى في سيارة أبوهم
نجوى : ماشاء الله هالسلطان رزه
هند : أي والله من وقفته تحسين له هيبه
سوسن : وع يروع ماقد شفته يضحك الله يعين سويره عليه
أم عبدالله : أجل لو تسمعونه وهو يسولف ثقيل ماشاء الله
سوسن : وذا زين عاد
أم عبدالله : هذا الزين ماشاء الله موب مثل شباب هالايام الطايشين
وفاء : لا عاد يا خالتي الواحد لازم يضحك شوي ويبتسم
أم عبدالله : ومن قالك أنه ما يضحك , تصدقين سوسن هالنصابه
سوسن : يمه ما قد شفت ضروسه صدق كريه
أم عبدالله : وأنتي وش حارك ألحين هو رجلك والا رجل أختك , بعدين لو أنه على قولك كريه كان ما شفتي ساره متحملته
هند : سويره طايره به ما ترضى فيه
نجوى : يحق لها ماشاء الله, الله لا يضرها
سوسن : كفوكم
أم عبدالله : خلاص أنطموا جاء أبوكم

ركب سلطان السياره وهو ساكت وساره ساكته مشى أبو عبدالله بعدين مشى سلطان
ساره : سلطان لحظه
سلطان : وش فيك
ساره : سلطان ممكن ترجع للبيت نسيت شي
سلطان : ضروري
ساره : أيه الله يعافيك
سلطان : طيب ديور سلطان ورجع لبيت أبو عبدالله
ساره : دقيقه بس وحطت شنطتها ونزلت
سلطان : طيب
نزلت ساره وفتحت باب البيت ونادت الخدامه وخلتها تشيل صناديق الهدايا اللي سوتها وحطتها في السياره
ركبت ساره : آسفه خليتك ترجع
سلطان التفت على ورى : وش هالصناديق
ساره : إذا رحنا لبيت عمك بتعرف
سلطان : ترى جوالك رن وأنتي نازله
ساره فتحت شنطتها وشافت رقم عبدالله واتصلت عليه
ساره : هلا عبود
عبدالله : هلا والله
ساره : وش عندك داق
عبدالله بإستهبال : اشتقت لك
ساره : تصدق حتى أنا اشتقت لك
عبدالله : ياحظي وأخيراً تحققت أمنيتي في الحياة
ساره : ههههههههههه لا تسمعك وفاء ترى بتتوطى في بطنك
عبدالله : لا مرتاح منها هي راكبه مع أبوي وأنا مع خالد
ساره : آها بعذرك ماخذ راحتك , أخلص بس وش عندك
عبدالله : نسيتي صناديقك مدري وش اللي فيها هدايا حمولتك
ساره : يا حبيلك والله أنك أحرص مني
عبدالله : خلود ذكرني
ساره : خلاص بوس لي راسه بالنيابه
خالد بصوت عالي : سويره وين عيديتي
ساره : عياديكم عند سوسن خلوها تعطيكم إياها ترى كل شي عندها
عبدالله : يعني ما نسيتينا
ساره : أوما عاد أنساكم حد ينسى ضناه يا ابني
عبدالله : وش عندها طنط زكيه
ساره : لامن جد عبود أنا أنسى روحي وما أنساك لا أنت ولا خلود
سلطان كان سامع وشلون تكلم أخوانها ومقهور من أسلوبها معهم واللي قاهره أكثر برودها معه
عبدالله : بعد عمري سارونه , يلا أجل توصين شي
ساره : سلامتك
عبدالله : مع السلامه
ساره : في حفظ الله يالغالي

سكرت ساره جوالها وحطته في الشنطه والتفتت على سلطان ولقته يناظر الطريق قدامه وساكت
وصلوا للمسجد وسلطان وقف السياره عند قسم الحريم
ساره : وين بتوقف السياره فيه علشان أجيك بعد الصلاة
سلطان : إذا صلينا بأتصل عليك وأقولك
ساره : طيب خلاص


بعد الصلاة اتصلت ساره على سلطان
سلطان : هلا
ساره : وينك ؟
سلطان : امشي قدام شوي بتلاقيني واقف
ساره : طيب خلاص
طلعت ساره ولقت سلطان واقف وكان شكله يجنن وهو لابس الثوب الاسود والنظارات الشمسيه والغتره الصوف
ساره راحت له
سلطان : السياره بعيده شوي مالقيت لها موقف
ساره : وش ورانا خلنا نمشي
مشت ساره مع سلطان وهم يمشون شافوا ثنتين واقفين عند وحده من السيارات
البنت : شوفي ذا الاطخم يهبل
خويتها : قولي وش ذا العجوز اللي تمشي جنبه متمسكه في ذا العبايه حسافه تمشي جنب ذا الزين
البنت : تلقينها أمه هالخلفه
ساره لو ميب في الشارع كان كفخت البنات
ساره وهي تهز راسها بعصبيه : وقاحه وقلة أدب
سلطان ماسك نفسه لايضحك : وش فيك معصبه علشانهم قالوا عنك عجوز
ساره : لا والله علشانهم عند المسجد وقاعدين يناظرون في الرايح والجاي ما يخافون من الله , بعدين علشاني لابسه عباية راس صرت عجوز صدق ناس مريضه ومتخلفه
سلطان : طنشي ما عليك منهم لو يدرون وش تحت هالعبايه كان ماقالوا هالكلام
ساره كان ودها تسأله وش قصده بسخافت يفشلها
أول ما ركبوا السياره رن جوال ساره وكانت مشاعل
ساره ردت بسرعه وبدون مقدمات : كل عام وأنتي بخير
مشاعل : احلفي بس
ساره وهي تضحك : والله
مشاعل : من عرفتك ماقد سبقتيني دايم أسبقك وأعايد عليك
ساره : هالمره سبقتك وقلتها قبلك
مشاعل : لا يا شيخه أنا اللي داقه عليك
ساره : لا يا مشاعل غش أنا أصلي في المسجد وأنتي قاعده في البيت يعني معي عذري
مشاعل : مالي دخل أنا اللي سبقتك
ساره : أنا اللي قلتها قبلك
مشاعل : اللي داق هو الفايز
ساره : هههههههههه الله يرجك بس على ذا الطقاق المفروض يعطونا حلاو بقرو حلاو مصاص مع البزران
مشاعل : حلاو المصاص تاكلينه أنتي
ساره : وش فيه حلاو المصاص والله أني أحبه
مشاعل : المهم ما أطول عليك بس قلت بأعايد عليك أول وحده بعد الصلاة قبل لا أحد يسبقني
ساره : لا تخافين أنتي أول وحده تعايدني محد سبقك وإن شاء الله أسبقك المره الجايه
مشاعل : نشوف , يلا بس مع السلامه
ساره : مع السلامه
سكرت ساره جوالها وحطته في الشنطه وشافت العلبه حقت هدية سلطان وترددت وآخر شي طلعتها
ساره بتردد : سلطان
سلطان : نعم
ساره : كل عام وأنت بخير
سلطان استحى لأنه ما عايدها أول ما طلعو من المسجد : وأنتي بخير وصحه وسلامه
ساره : تفضل
التفت وشاف العلبه : وش ذي
ساره : هديه
سلطان انبسط في داخله لأنها ذكرته بس ساره لسانها فلت منها : ريم تقول لازم تهدون بعض يوم العيد وقدام العايله بعد بس مستحيل اعطيك الهديه قدام الرجاجيل فياليت تأخذها مني الحين وتفكها من علبتها وتخليها معك
سلطان تحطم وضاق صدره وخذها منها : شكرا الله يعطيك العافيه وحطها على الطبلون وجلس يحاكي نفسه يلا ياسلطان وش تحتري عطها هالخاتم وريح عمرك صدق أنك غبي طول الليل قاعد تصفصف من ذا الحكي ووش بأقول إذا جيت أعطيها الهديه وهذا هي عطتني هديتها وبدون نفس بعد
سلطان فتح درج السياره وطلع علبة الخاتم وعطاها إياه : هذي هديتك إذا أعجبتك ألبسيها قدام الحريم
ساره خذتها : مشكور الله يعيده علينا بالصحه والعافيه فتحت العلبه وشافت الخاتم وكان شكله روعه وعجبها مره وطلعته من علبته وفصخت خاتمها اللي عليها ولبسته واستغربت لأن قياسه مضبوط جلست تتأمل يدها والخاتم وسلطان يناظر بطرف عينه وعجبه الخاتم في يدها وهالشي خلاه ينبسط نوعا ما
ساره : ما ودك تأخذ الهديه اللي جبتها لك
سلطان : خليني أوقف أول وشلون أفكها وأنا أسوق
وقفوا عندبيت أبو فيصل وقبل لا يطفي السياره خذ الهديه وفكها وكانت سبحه سوداء حباتها كريستال و محفور عليها بالفضي وريحتها دهن عود كمبودي عجبت سلطان وخلاه في يده وطفى السياره
سلطان : يلا انزلي
ساره : شكلنا جايين بدري
سلطان : يعني نقعد في السياره لين ما يجون؟
ساره تبيني أقعد معك وانت طاق ذا الزين واسكت لا والله ما أقدر أخاف اسوي فضيحه : لا خلنا ننزل
نزلوا من السياره وطقوا الباب وفتح لهم السواق
سلم عليه سلطان وسأله إذا فيه أحد جاء وقال السواق أن أبو عبدالعزيز فيه
سلطان : أبوي سعود فيه
ساره : زين فيه أحد سبقنا أجل
دخلوا للبيت ومالقوا أحد قدامهم
سلطان : تعالي سلمي على أبوي سعود
ساره : اخاف فيه أحد في المجلس
سلطان : بأروح أشوف وأعلمك
ساره دخلت لمجلس الحريم وفسخت عبايتها وطلعت عن المغسله تعدل مكياجها وشعرها
دخل سلطان وسلم على جده وعايد عليه بعدين طلع ينادي ساره
سلطان : ساره , ساره
ساره فسخت البلوفر اللي عليها : طيب دقيقه
جاء سلطان وشافها وانصدم من التغيير اللي صار ووقف مكانه وهو ساكت ساره ما انتبهت له وجلست تحط روج وتزيد الكحل
سلطان ريم قالت تغيرت بس ما توقعت تتغير لهالدرجه صح شكلها حلوبس شعرها الاسود غير, ونحفت هاليوميين الخبله أنا قايل لها جسمها حلو ليش تنحف
التفتت ساره وشافت سلطان واقف عند المدخل وارتبكت
ساره : أنت هنا
سلطان : أيه توني جاي
ساره وش فيه يناظرني كذا لايكون ما عجبته بهاللوك : فيك شي ؟
سلطان : هاه , لا
ساره استحت من نظراته
سلطان عرف أنه اربكها وانبسط : أبوي سعود لحاله في المجلس إذا تبين تسلمين عليه
ساره : طيب
سلطان واقف وما تحرك وكان ناوي يعذبها بنظراته لأنه عرافها تستحي إذا أحد ناظرها وهو يتفحصها
ساره بلعت ريقها وهي واقفه وحست قلبها يدق بقوه ما تدري وش قصده من هالوقفه والا من نظراته
ساره وفيها الصيحه : ليش تناظرني فيني شي غلط
سلطان سكت شوي وهو يحرك فكه بتفكير: لا , الا وش رايك أغمض علشان ترتاحين
ساره ناظرته بعصبيه ومرت من قدامه وراحت لمجلس الرجال
سلطان ابتسم وهو يهز راسه بعدين مشى وراها دخل للمجلس وجلس جنب جده
سلمت ساره على أبو عبدالعزيز وباركت له بالعيد وأبو عبدالعزيز ما فك يدها وهي واقفه مستحيه وتناظر سلطان وسلطان شوي وينفجر ويكلم نفسه هالبنت تحفه في لحظه وحده تغير مزاجي ومزاجها مره معصبه ومره مرتبكه ومره مستحيه
أبو عبدالعزيز سحب ساره وخلاها تجلس جنبه بينه وبين سلطان كان الكنب صغير وساره جالسه ومستحيه وما عندها الا حل من اثنين أما أنها تلصق في سلطان ولا تلصق في أبو عبدالعزيز
الجو كان بارد وساره فاصخه البلوفر بعد بس من الحياء ووجهها صار أحمر وتحس بنار شابه في وجهها بسبب جلستها الغلط بينهم وبسبب فستانها القصير
سلطان حاول يبعد شوي علشان تقرب جنبه وعلى طول أول ما تحرك سحبت ساره الخداديه اللي وراه وحطتها على رجولها أبو عبدالعزيز كان لاهي بالسوالف عن ذكرياته وعن اعيادهم من أول ومو منتيه للأجواء والشرارت والشحنات اللي صايره جنبه بين ساره وسلطان
ساره كانت حاسه بقرب سلطان منها حتى أنفاسه الحاره تحس فيها على خدها حاسه أن الغرفه بتولع فجأه وبدون مقدمات واللي رافع ضغطها أن أبو عبدالعزيز ماسك يدها وقلبها يدق بقوه حتى النفس ما قدرت تتنفس زين
سلطان مايدري وش صار له ريحة عطرها وصلت لراسه من كثر ما هي قريبه منه. تحرك أبو عبدالعزيز علشان يطلع سبحته وبعدت ساره عنه وحست بكهرب لشطها لأنها صارت لاصقه في سلطان وماقدرت تمسك عمرها وصارت ترتجف
سلطان هو الثاني كان محتار من اللي صار له ومايدري وشلون جته الجرأه وحط يده على ظهر ساره ولف وجهه من جهتها وصار فمه قريب من وجهها
ساره أول ما لمسها سلطان تصلبت عظامها وشصبت
سلطان بهمس وصوته يهتز : وش فيك ترتجفين؟ بردانه ؟
ساره بلعت ريقها وعلى طول قامت من مكانها وكأن حيه لدغتها وسحبت يدها من يد أبو عبدالعزيز : معليش يبه دقيقه بس بردت وبأروح أجيب جاكيتي من الصاله وطلعت من المجلس وهي شوي وتركض
سلطان حس انه في حلم وصحى منه وجلس يحاكي عمره وهو مستغرب : وش ناوي عليه ياسلطان خاف ربك في البنت وش ذا الحركات لوماقامت من مكانها كان سويت فضيحه نسيت الوعد اللي بينكم سنه كامله مثل الاصدقاء , بعدين البنت ما تبيك شف وشلون قامت مثل المقروصه احفظ كرامتك وخلك بعيد عن هالسوالف
ساره دخلت الحمام وقفلت على عمرها وتسندت على الباب وهي ترتجف بعد ما هدت غسلت وجهها بمويه بارده وهي تسب نفسها لأنها ما قدرت تمسك عمرها قدام سلطان : يالله يا ساره وش بيقول عني ألحين ما استحي مابقى الا أجلس في حضنه بعد ,طيب ليش حط يده على ظهري ليش تكلم في أذني. وش يبي مني؟؟ أكيد وراه شي. يمكن يبي يعلقني فيه علشان يضمن أني ما أتركه هالفتره. توه مهزئني علشان ما رحت معه للعزيمه بعدين طنشني أسبوع ومادق علي وبدون مقدمات وفي لمحه يتقرب مني . استغفر الله بس وليش أحط البلا منه أصلاً هو ماسوا شي غريب بس سألني إذا كنت بردانه والله أحس بيطق فيني عرق والا بأنجلط
خلني أعدل مكياجي واطلع قبل لا يجي أحد , مسحت وجهها وعدلت مكياجها وطلعت ولقت منى وأم فيصل جالسين في الصاله
منى : انتي اللي في الحمام من ساعه ونقول من هذي عبايته ونسأل الشغاله وتقول مدري رجال ومعه مدام
ساره سلمت عليهم وهي تضحك : وش أسوي سلطان جايبني بدري وتعرفين أن ما قعدنا عند المرايه ساعه ما نرتاح قلت أروح أتعدل في الحمام قبل لا يجي أحد
أم فيصل : حسبناك ريم قلنا أخاف جتها الولاده بس
ساره : حرام عليكم البنت توها في الرابع
منى : حركات وش هاللوك الجديد
ساره : وش رأيك
منى : يجنن
ساره : والله عجبك
منى : أيه مره حلو مناسبك
أم فيصل : أجل سلطان هو اللي مع عمي
ساره : أيه تبوني أقول له يطلع علشان تسلمون على أبوي سعود
منى : لا بعدين لين يجون باقي البنات ونسلم مره وحده
جو باقي العايله وجلسوا يسولفون وكلهم مستانسين الا ثلاث وهم ساره اللي ماتدري وش صار لها والعنود اللي تضحك معهم وقلبها ينزف من داخل ومنى اللي تحس لأن قلبها مات مع موت راكان
بعد ما خلصوا وتعيدا الحريم لبسوا عباياتهم علشان يسلمون على الرجاجيل وجلسوا كلهم في الصاله الحريم في جهه والرجاجيل في الجهه الثانيه
وكل واحد من الشباب صار يهدي أبوه وأمه ويستهبلون طلعت ساره جوالها واتصلت على سلطان
سلطان رد بعدين رفع راسه وشافها جالسه في الصاله الثانيه
سلطان : نعم
ساره : سلطان الله يعافيك ممكن تنزل الصناديق اللي في السياره
سلطان : ألحين
ساره : أي الصندوق الغامق حطه عندكم والفاتح جبه عندنا وأفتحها بتلاقي فيها صناديق صغار خل كل واحد يأخذ المكتوب عليه أسمه
سلطان : كلهم
ساره : أيه كلهم
سلطان : طيب وسكر جواله ونادى فهد
فهد : وش تبي؟
سلطان : تعال معي شوي
وراحوا للسياره وعلى طول فتح سلطان الصندوق الكبير ولقى صناديق صغيره خشب ومحفور على كل غطى أسم راعيه وفتح الصندوق ولقى فيه ورد مجفف ومصحف صغير غلافه شموا محفوربالذهبي وعلبة دهن عود صغيره وحبة شوكولاته ومحفور على الغطاء من جوى كل عام وأنتوا بخير وتحته سلطان وساره
فهد جلس يصفر : أخس يالكشخه والله وصرت تعرف الذوق والحركات مسوي كيوت من ورانا يالجلف
سلطان عجبته الهدايا وماكان عارف وش يقول ما توقع أن ساره تحط أسمه مع اسمها
فهد : لا واللي قاهرني أني أكلمك أمس وتقول نسيت الهدايا
سلطان صك الصندوق وحطه مع الباقي : تصدق وسكت
فهد : أيه أصدق ليش ما أصدق بس وشو
سلطان : خلاص هونت
فهد : يلا قل
سلطان : خذ بس شل صندوق الحريم دخله عليهم ما أبي ادخل عليهم
فهد : بس ما طلبت شي لو تبيني أجلس معهم أنا حاضر
سلطان : أقول لايكثر بس امش قدامي
شالوا الصناديق ودخلوا وفهد راح عند الحريم
سلطان حط الصندوق على الطاوله وفتحه : يلا كل واحد يأخذ عيديته
ناصر وطارق ماصدقوا وقاموا بسرعه وكل واحد سحب له صندوق وناصر يهز الصندوق: هذا شكله مليان
طارق : لا هذا أحسن
سلطان : يابابا لا تلعبون في أغراض غيركم الله يصلحكم كل واحد يأخذ المكتوب عليه أسمه وهو ساكت
ناصر : أخاف حقي يصير ما فيه الا شوي
سلطان : وشو الشوي
ناصر : اللي فيه
سلطان : وأنت تعرف وش فيه يوم أنك تتكلم
ناصر :لا
سلطان : أجل انطم
ناصر : طيب
كل واحد خذ صندوقه وفتحوا وكلهم أعجبتهم الهديه
أبوعبدالعزيز : هذي أحسن هديه جتني في حياتي
ناصر : علشانها من سلطان وحرمته
أبو عبدالعزيز : علشانها مصحف يالثور
طارق : ههههههه ثور أصلي بعد
أبو سلطان : وش ذا الزين يا سلطان
أبو أصايل : أثر العرس له إيجابيات
فيصل : قل الحرمه وأنت الصادق هذانا معرسين وماقد جبنا شي
طارق : قلت لك حرمتك سنعه تكفى أخطب لي وحده من خواتها
سلطان : ماعندها خوات
فهد : سلطان باقي وحده مكتوب عليها اسمك
سلطان : خلها بأخذها إذا طلعت
ناصر :خخخخخ حرمته معطيته هديه مثل هدايانا وهذا دليل أن كل ذا الحركات والكشخه مالك دخل فيها أنت وجهك
سلطان : لا يالحبيب وهذي وشي وطلع سبحته من جيبه
ناصر : أجل ما أبي زوجني يبه أبي أحد يعطيني هديه كل عيد محد يهديني شي
طارق طلع ريال من جيبه : خذ هذي عيديتك مني
ناصر : ضف وجهك شايفني أطر
طارق: مالت عليك ترى هالريال يجيب لك ثمان خبزات صامولي والا تميسه يا الثور يعني يعيش عايله
ناصر طلع خمسه : خذ هذي وانطم لو سمحت
طارق : كم فيها من خبزه
نواف: فيها فطور كامل خبز وفول وشاهي
فهد : والله وهمكم بطونكم بس

في جهه الحريم كانوا كلهم مبسوطين
ريم : يقطع ابليسك ياسويره أبلشتينا كل عيد بيزعجونا الرجاجيل يبون هدايا
ساره : خلاص هذي أول مره وأخر مره
أم فيصل : والله حلوه وين جتك هالفكره منه
ساره : هند اختي متعامله مع المحل ولقيت عنده هالصناديق وأعجبتني

تكلم أبو أصايل بصوت عالي : اسمعوا يا جماعة الخير
أبو عبدالعزيز : سم
أبو أصايل : أبشركم العنود جاها نصيبها وإن شاء الله العرس بيكون في الصيف
الرجاجيل قاموا يباركون لبعض
العنود حست أن أبوها دمرها بكلامه وقامت وراحت للمجلس الثاني
ريم ومنى وهيفاء انصدموا بالخبر
وأم سلطان وأم فيصل والعمات جلسوا يباركون لأم أصايل
ساره ماتدري وش اللي صاير البنات حالتهم محتفسه والحريم مبسوطات
قاموا البنات ولحقوا العنود وساره وأصايل جلسوا مع الحريم
أم فيصل : وش فيها العنود
أم أصايل : تعرفين دلع البنات وحياهم
راحوا البنات عند العنود وجلسوا يهدون فيها وبالغصب جروها معهم للصاله علشان محد يشك فيها وحمدت ربها أنها متغطيه جلست مع الحريم وهم يباركون لها وهي دموعها تنزل من تحت الغطاء
أم سلطان : متى بتمشون للمزرعه
أم فيصل : مدري والله أنا ما ودي أروح و أخلي منى لحالها
منى : يمه روحي وش علي طارق وناصر بيجلسون عندي
العنود : انا بأجلس عند منى
أم سلطان : وأنتوا يا ساره متى بتمشون
ساره : نمشي وين نروح
ريم : للعيد الكبير جمعة العايله
ساره : متى ووين
أم سلطان : هاو ما قالك سلطان
ساره : لا بس ريم قالت فيه عيد في الليل وأحسبه هنا
أم سلطان : لا هذا خالي الله يسلمك كل سنه يجتمعون عنده كل العايله من كبيرهم لصغيرهم القريب والبعيد وتكون الجمعه في المزرعه وحنا عاد نروح كلنا وننام هناك كل واحد له غرفه هناك
ساره : محد قالي
ريم : هذانا قلنا لك
ساره بصوت واطي مع ريم : وشلون كل واحد له غرفه يعني كل عايله لها بيت والا كلكم في نفس البيت
ريم : كل واحد له غرفه الكبار أبوي وعماني وجدي لهم دور وكل واحد منهم له جناح
والدور الارضي كل واحد من الشباب له غرفه صغيره يعني سرير ودولاب بس والبنات كلهم في غرفه
ساره : وليش عاد
ريم : الشباب علشان كل واحد إذا تزوج تصير الغرفه له ولحرمته أما البنات اللي بتأخذ من العايله بتصير مع رجلها أما اللي بتاخذ أجنبي فيه ملحق للضيوف ماله داعي يدخل معنا
ساره : آها فهمت
أم سلطان : حنا بنمشي بعد شوي
ريم : وحنا بعد
ساره بإحراج : خالتي عادي لو ما أروح
أم سلطان : ليش ؟
ساره : خالتي ما حسبت حسابي وما جبت لبس معي وهالفستان ما ينفع لسهره في الليل وربعكم أول مره أشوفهم صعبه ألبس ذا اللبس العادي قدامهم
أم سلطان : خلي سلطان يوديك للبيت تغيرين
ساره : خالتي ما استعديت
أم فيصل : خلاص يا أم سلطان خليها تجلس مع البنات
ريم : وارو ح انا بلحالي
هيفاء : وانا وين رحت
أصايل : وأنا بعد
جواهر : أجل دامكم يا البنات بتجلسون خلوا بزارينا عندكم لين العصر بنروح نجهز أغراضنا ونمر نأخذهم العصر
منى : خلاص أبشري يا عمتي بس لا تقولين ليش وصخوا ملابسهم
حنان : لا عادي أصلاً مابعد لبسناهم ملابس العيد الزينه
أبو سلطان : يلا يا أم سلطان نبي نمشي
أبوفيصل : أم فيصل خلينا نخاوي أخوي أجل
أم فيصل : إن شاء الله بس دقايق نجهز أغراضنا
أبوعبدالعزيز فهد ونواف متى بتمشون
فهد : بعد العصر يبه ودنا ننام شوي
أبو عبدالعزيز : أجل أنا بأجلس هنا عند منى لين العصر بعدين تعالوا خذوني
سلطان اتصل على ساره
ساره : نعم سلطان
سلطان : تعالي شوي للمجلس باكلمك
ساره : طيب
راحت ساره للمجلس وهي مستحيه ومرتبكه وما فسخت عبايتها
سلطان : ماودك نمشي مع أهلي
ساره : لا مانيب رايحه للمزرعه
سلطان : ليش؟
ساره : ما دريت أن فيه عيد وجمعه ثانيه
سلطان : هذا أنتي دريتي
ساره : أيه بس ما خذت حسابي في اللبس
سلطان : أصلاً حنا بنمر البيت علشان نأخذ غيارات
ساره : لا ما نيب رايحه
سلطان : فيه مشكله غير مشكلة الملابس
ساره : أيه إذا رحنا أنا وين انام فيه
سلطان : وهذي مشكله في نظرك
ساره : أيه مشكله وحده مواصله أمس وتبيها تواصل اليو م آسفه ما أقدر
سلطان : الغرفه تكفي أنك تنامين في المكان اللي يريحك
ساره : اللي أعرفه انها سرير و دولاب بس بعدين خلاص أنت رح من ماسكك
سلطان : أسمحي لي أقول تفكيرك مريض إذا كان هذا هو السبب
ساره : كيفي انا مريضه عندك مانع طلعه
سلطان بعصبيه : أجل أمشي خليني أحطك في بيت أهلك على الطريق
ساره : أهلي في الاستراحه عند عمي أنا بأنام هنا مع العنود ومنى
سلطان : بتجلسون لحالكم في البيت
ساره : لا طارق وناصر بيجلسون بعد
سلطان : أجل أنا بأجلس مع أبوي سعود وبأروح معه العصر
ساره : طيب قبل لا تروح ممكن توصلني للبيت ودي أخذ لي غيارات
سلطان : أمشي ألحين أجل
ساره : لحظه أقول لمنى لأن الصغار هنا عماتك راحوا وخلوهم عندنا
سلطان : استناك في السياره

راحت ساره لبيتها وخذت غيارات لها ورجعت لبيت أبو فيصل وفي الطريق اتصلت عليها منى
ساره : هلا منى
منى : سارونه تكفين الحقي
ساره :وش فيك
منى : ياسر والهنوف تهاوشوا وكل واحد يدبغ في الثاني
ساره : هههههههههه وأنتي قاعده تتفرجين فكيهم طيب
منى : ما قدرت وليدوه فازع مع أخوه وهالضعيفه الهنوف بتموت بينهم
ساره : وين هيفاء راعية التخصص
منى : راحت لبيتهم والعنود تقول بالطقاق جعلهم يتذابحون
ساره : خلاص حنا قريبين
منى : لا تطولون تكفون
ساره : على بالك إذا جيت بأسوي شي , أخاف يطقوني بس
منى : يسونها هالثيران
ساره : يلا مع السلامه
منى : مع السلامه
سلطان : وش فيهم
ساره : وليد وياسر عيال حنان حاطين حيلهم في الهنوف بنت جواهر وقاعدين يجلدونها
سلطان : مدري حنون متى بتربي عيالها زين أول وجيد وألحين هالقرود
ساره : سلطان وقف عند البقاله خذ لهم حلاو
سلطان : بيت عمي مليان من الحلاو
ساره : ما يخالف جب لهم شي جديد
سلطان : والله انهم ما يستاهلون بس شورك وهداية الله

وصلوا لبيت أبو فيصل وأول ما دخلوا سمعوا الهواش
سلطان : عمى ما صارت هوشه أصواتهم واصله للشارع
ساره دخلت للصاله وجلست تضحك على منظرهم ومنى والعنود جالسين يتفرجون
ساره : فكوهم
العنود : وش يقدرهم ذولا
ساره : وين أبوي سعود
منى : راح يصلي الظهر وما بعد جاء
ساره : زين أنتوا اطلعوا فوق وبأخلي سلطان يجي يفكهم البنت بتموت بين يديهم
العنود بدون نفس : من حضها والله
ساره : نعم
منى : لا ما عليك منها الظاهر قامت تهلوس من قلة النوم
ساره : خلاص أنتوا روحوا ناموا وأنا بأجلس عندهم
منى : خلاص حنا بنطلع في غرفتي إذا طسوا ذا المبزره ألحقينا
ساره : خلاص طيب
راحت ساره ونادت سلطان ودخل سلطان وشاف عيال عمته متشابكين باليدين والشعر
سلطان صرخ فيهم : وليد ياسر فكوا الهنوف يلا
هدت صيحة البزران بس ما فكوا بعض
سلطان فصخ عقاله : هاه بتفكون بعض والا وشلون وعلى طول فكوا بعض والهنوف راحت تركض وحضنت سلطان
سلطان ضم الهنوف وشالها وساره تناظره ياحظك يالهنوف من قدك سلطان يدافع عنك
راحت ساره ومسكت وليد وياسر وودتهم للمغسله وغسلت وجيههم
وجلسوا كلهم في الصاله
مشاري حس نفسه ضايع ووقف يتفرج عليهم وأول ما نادته ساره جاء يركض وطاح في حضنها جلست ساره مع الاولاد على الارض بعد ما فصخت جزمتها وخذت الكيس من سلطان وعطتهم الحلاو وجلست تلعب معهم وهي مطنشه سلطان معطيته ظهرها ومع التعب رفعت شعرها وربطته فوق والبزران صاروا يمونون عليها ويلبعون معها وهي انبسطت وجلست تمص معهم الحلاو وطول الوقت وهي تضحك بس حاسه بنظرات سلطان اللي ما فارقتها ولا لحظه
سلطان كان معصب لأنها مطنشته ومو معتبرته موجود أبد
التفتت ولقته يناظرها بعصبيه سوت نفسها ما انتبهت وكملت لعبها مع البزران لين ما تعبوا وناموا
راحت ساره ونادت الخدامه وخلتها تجيب لهم بطانيات بعدين راحت تغسل وجهها وجلست في الصاله تو سلطان بيتكلم الا وأبوه سعود داخل وكالعاده مسك القعده بسوالفه
مر الوقت وجت جواهر وحنان وخذوا عيالهم وأبوعبدالعزيز راح مع سلطان وفضى البيت
طلعت ساره فوق ولقت البنات نايمات غيرت ملابسها ونامت معهم
قاموا البنات بعد العشاء ونزلوا يتعشون وكل وحده منهم ساكته بعد ما خلصوا العشاء طلعوا لغرفة منى وجلسوا منى قامت ووقفت عند الدريشه وكالعاده نزلت دموعها
ساره شافتها وأشرت للعنود
العنود : وش فيك يا منى
منى : العام مثل هالوقت كنت جالسه مع راكان تحت وهالسنه أنا واقفه هنا وهو مدفون تحت الارض
ساره : اذكري ربك يا منى وتعوذي من أبليس
منى : لا تلوميني يا ساره راكان حبيته أكثر من نفسي وهو بعد كان يحبني وبعد ما لقينا سعادتنا فجأه يضيع من بين يدي
ساره : لاحول ولا قوة إلا بالله والتفتت على العنود ولقت العنود تصيح
ساره بإستغراب : العنود وش فيك أنتي بعد ليش تصيحين
العنود: أصيح على حظوظنا الرديه أنا وبنت عمي مالنا حظ في هالدنيا , راكان راح منها في لحظه وأنا أبوي بيروح حياتي بكلمه منه
ساره : العنود أنتي من الصبح موب طبيعيه وش سالفتك تكلمي
العنود : آه ياساره وش أقول بس
ساره : قولي كل اللي في خاطرك بردي قلبك
العنود : أوعديني ما تقولين لأحد عن اللي بأقوله لك
ساره : آفا عليك يا العنود سرك في بير
العنود قالت لساره عن سالفة بدر كلها
العنود : وهذا حظي وهذا حظ بنت عمي الله يعوضنا فالاخره بس
ساره : آه هالدنيا ما عليها أحد مرتاح على الاقل أحمدوا ربكم أنتي وإياها أحسن من غيركم
العنود : ليش فيه أحد أتعس منا
ساره : أيه فيه أنتي يا منى تدرين أن راكان يحبك واللي صار شي كاتبه رب العالمين .و أنتي يالعنود عارفه أن بدر يحبك وهو ماراح الا علشانك . بس المشكله في اللي تحب واحد وعايشه معه وهي تدري أنه يحب وحده ثانيه بالله هذي وش ينقال عنها
العنود : ومن هي ذي
ساره : انا مع الاسف
العنود : وشو ؟
منى كانت واقفه تمسح دموعه عند الدريشه ويوم سمعت كلام ساره جت عندها وهي مستغربه
العنود : ساره وش قصدك تكلمي
ساره : أيه يالدنيا أنتي تحبين بدر وهي تحب راكان وأنا أحب سلطان وكل وحده أتعس من الثانيه الا أنتوا احسن مني على الاقل تدرون أنهم يحبونكم أنا أحب سلطان وأنا أدري أنه يحب وحده ثانيه
منى والعنود : كذااااااابه
ساره : والله العظيم
العنود : من قالك
ساره : هو بنفسه
منى : ومن هي هالبنت لاتكون هناء
ساره : لا وحده أمريكيه
البنات شوي وتطلع عيونهم من الصدمه
ساره : اللي بأقوله ما أبيه يطلع لأحد حتى ريم وهيفاء
العنود : توك تقولين سرك في بير , تكلمي وأنتي مطمنه
ساره قالت كلشي صار بينها وبين سلطان
العنود : معقوله ما أصدق كل هذا يطلع من سلطان
منى : وأنتي ليش ساكته
ساره ودموعها على خدها أحبه موبكيفي غصب علي
العنود : والعالم حاسدينك عليه وأنتي عايشه بعذاب
منى : لا ومسوين شهرين عسل وآخرته أنتي في وادي وهو في وادي
ساره : هذا اللي ربي كاتبه
العنود : وأهلك ما يدرون
ساره : لا وكل هاللي يصير قدامكم تمثيل بتمثيل وآخر السنه كل شي بينكشف
منى : ياصبرك ما قلتي لأحد أبد وساكته كل هالمده
ساره : محد يدري حتى فاطمه اللي معنى في نفس البيت ما تدري بس صديقتي نهى
منى : أجل وشلون عايشين
ساره : قاسمين الغرفه بستاره
العنود : كذااااااااابه
ساره : ههههههه لا هو ينام على السرير وأنا أنام على الكنب
منى : يا بردك وتضحكين بعد
ساره : وش أسوي هذاني من زود الخبال قمت أضحك وأصيح بنفس الوقت
العنود : بالله وش لاقيه فيه يومك متمسكه فيه
ساره : مثل اللي لقيتيه انتي في بدر ولقته منى في راكان وريم وفيصل هيفاء وفهد , يالعنود القلب يهوى غصب على الواحد يعني على بالك هالعيشه عاجبتني بس أقول الحمدلله أني قريبه منه
منى : والله ما توقعت سلطان حقير لهالدرجه
ساره : لا تقولين عنه حقير
العنود : وتدافعين عنه
ساره : أنتي تدافعين عن بدر
العنود : بدر يحبني
ساره : علشان كذا أقول أحمدوا ربكم أحسن من غيركم
العنود : وهالنايف اللي أبوي بلاني فيه
ساره : وكلي أمرك لله ما تدرين يمكن تحبينه . أنا ماكنت أحب سلطان ولا أطيقه وشوفي حالتي ألحين
العنود : مستحيل أحب واحد غير بدر
ساره : حنا ما نعلم الغيب مايندرى وش ربي كاتب
منى : أي والله
ساره : هذي حال الدنيا
العنود : يعني محد مرتاح كنت أحسب عمري أتعس وحده في الدنيا ما دريت أنكم مثلي
ساره : وفيه ناس حالتهم أشد وألعن من حالاتنا
منى : وهذا حنا عايله وحده وكا ندري عن أحوال بعض
ساره : هههههههههههه
العنود ومنى التفتوا مستغربين
العنود : وش فيك استخفيتي
ساره : لا والله اضحك على حالنا مجتمعين نخفف عن بعض وصرنا نتشكى على بعض , تهقون تتعدل أوضاعنا ؟

ممكن تتعدل أوضاع البنات والا الا ؟؟

يتبع

الجزء الخامس والاربعون
كملوا البنات سهرتهم وكل وحده كانت مشغوله وسرحانه مع أفكارها العنود وموضوع زواجها من نايف وبدر اللي مسافروماتدري متى بيرجع , منى ومستقبلها المجهول واللي ماله معالم , أما ساره حالتها حاله ماتدري وش نهاية حياتها مع سلطان
اليوم الثاني قاموا البنات وأفطرا وجلسوا يسولفون
ساره : كأنهم طولوا في المزرعه
منى : ما تدرين يمكن ينامون فيها اليوم بعد
ساره : تهقين ؟
العنود : حزات يسوونها
ساره : إن شاء الله يجون اليوم
منى : اشتقتي لسلطان ؟
ساره : آه بس مشتاقة له مره
العنود : كلميه شوفي إذا بينام هناك اليوم والا لا
ساره : ما أبي متهاوشه معه
منى :اقصري الشر وكلميه
ساره : كل مره أتنازل وأكلمه أنا بس هالمره مستحيل
العنود : ساره لا تدلعين المفروض أنتي تتقربين منه
ساره : العنود افهميني أنا ذليت عمري ووافقت على هالعيشه وكل مره نتهاوش فيها ارجع أكلمه وانسى اللي صار, لين متى بأذل عمري علشانه؟ هو كل ماله ويتمادى بعناده
منى : حاولي ياساره أنتي تحبينه المفروض تتمسكين فيه
ساره : أحبه أيه واتمسك فيه بعد أيه اما أني أدوره وهو مطنشني وأذب عمري عليه وهو مايبيني فلا وألف لا , كرامتي ما تسمح لي يكفيني مذله حتى ما كلف عمره يتصل يتطمن
العنود : براحتك أنتي أدرى بمصلحتك


في المزرعه
الرجاجيل جالسين يتقهوون الصباح
سلطان : هاه اليوم نرجع للرياض
أبو عبدالعزيز : والله اليوم الجو حلو سحاب يالله من فضلك ودنا نجلس وإذا جاء بكره رجعنا
فهد : وش تبي بالرياض هنا الجو حلو وجمعة هالوجيه الطيبه ما تتفوت
نواف : فهيدان ورى ما تنطم بس المفروض أنت نشوتك للرياض
فهد : وليش عاد
نواف : لانك نصاب أجل الجو حلو وجمعة هالوجيه الطيبه ما تتفوت وحنا من جينا وأنت خامر في الصاله مع هييف
فهد : وأنت وش اللي رافع ضغطك بعدين من خطبت أختك وأنت شايل علي وش سويت لك
نواف : صرت أغار حسوا فيني من أجلس مع أختي وهي تسولف عنك ومن أجلس معك وأنت تسولف عنها حومتوا كبدي
عادل : يا أخي أنت معطيهم وجه أسحب عليهم سيفون وقل ما عاد فيه مكالمات ولا شوفات الا بعد العرس يبون هلا وسهلا ما يبون الجدران واجده كل واحد منهم يمسك له جدار ويخبط راسه فيه لين ما يشبع
سلطان : وهو صادق عادل أسفههم بس
فهد : سلطان أنت آخر واحد تتكلم لو أنك مكاني كان سويت مثلي
عادل : هههههههه ما لقيت الا سلطان , سلطان خطب وملك وجاء يوم العرس وهو ما قد كلم حرمته ولا مره
فيصل : الا مره مدري مرتين
سلطان : وهي اللي داقه بعد
نواف : وهذا هو ساحب عليها وجاي معنا ومطنشها
سلمان : رجال ما شاء الله عليه تحطه على يمناك هو اللي يمشي الحرمه على كيفه
عادل : أجل وش رايك يا سلطان نجلس هنا زيادة يومين
سلطان كان ناوي يرجع العصر للرياض
نواف ما عطاه فرصه يتكلم والا يرد : أي والله طلبناك هالمره , حنا في إجازه ومافيه شغل لا تردنا ياسنايدي
سلطان : والله كنت ناوي أرجع للرياض بعد العصر
فهد : هههههههه ما يقدر يصبر عن المدام , هذا السنايدي واللي أحطه على يمناي
سلطان انقهر من أخوه : يا أخي ليش تقاطع خلني أكمل عاد
فهد : كمل يا سنايدي
سلطان : دامكم تبون تجلسون زود فأنا معكم لو تبون اسبوع أنا حاضر
سلمان : كفو ما خاب ظني فيك
عادل : أي والله أنك أرجل من أخوك
أبوسلطان : وتخلي حرمتك في الرياض أسبوع
سلطان أساساً ضايق صدره وماوده يجلس بس علشانهم اطلبوه وافق
فيصل : وش فيها يا عمي أنتوا ارجعوا عند البنات وخلوا طارق وناصر يجون عندنا كلها يومين ولا حقينكم
نواف : لا دام ناصر وطارق بيجون يومين ما تسوي شي خلوها اسبوع
فيصل : يومين والا اسبوع أهم شي نجتمع
سلطان : خلاص أجل اللي تشوفونه
أبوعبدالعزيز : نوافوه لا تخرب الرجاجيل ترى وراهم حريم وبيوت موب مثلك عزاب , وأنتوا ياالمعرسين لا تطاوعونه ترى موب نافعكم هو ماوراه شي
فيصل : أنا بأجلس يومين بس بعدين بأرجع
عادل : أنا بأجلس الاسبوع كله
سلمان : وأنا بعد
أبوعبدالعزيز : أنتوا معرسين من زمان وحريمكم يبون الفكه منكم أصلاً انا أقصد سلطان وفيصل اللي توهم متزوجين
سلطان يحاكي نفسه والله أنك صادق يبه نوافوه موب نافعنا سويره خلقه مستلجه عاد أن طنشتها أسبوع في بيت عمي وش بتسوي , الله يعين بس

في بيت أبو فيصل
ساره كانت قلقانه على سلطان واستحت تتصل عليه
ساره : منو تكفين اتصلي على ريم وشوفي ليش مارجعوا لين ألحين
منى : طيب أبشري
اتصلت منى على ريم وسولفت معها
ساره بصوت واطي أسأليها عن سلطان
منى وهي ماسكه السماعه : تستهبلين
ساره : تكفين علشاني
منى : أقول ريوم وشلون أبضايات العايله عسى ماسوو فيكم مقالب بس
ريم : لا أصلاً ما شفناهم من يصبحون لين ينامون وهم جالسين برى في الخيمه
منى : عساهم طيبين
ريم : هاو وش عندك تسألين عنهم
منى : والله عقب راكان صار كل شي يخوفني بعدين فيصل أخوي ويحق لي أسأل عنه والباقين بعد في حسبة أخواني
ريم : لا تطمني كلهم بخير
منى : زين الحمدلله
ريم : يلا أجل توصين شي
منى : سلامتك
ساره : متى بيرجعون؟
منى : ريوم لحظه , متى بترجعون
ريم : بكره إن شاء الله
منى : توصلون بالسلامه
ريم : يلا أجل فمان الله
منى : فمان الله

ساره : هاه متى بيرجعون ؟
منى : بكره
ساره : الله يحفظهم

اليوم الثاني رجعوا الحريم والرجاجيل الكبار والشباب جلسوا في المزرعه وناصر وطارق لحقوهم
ساره كانت معصبه لأن سلطان ما اتصل ولا سأل جلست تتقهوى مع البنات عند التلفزيون ودخلت عليهم ريم وهيفاء
ريم بصوت عالي : السلااااااااااااااام عليكم
البنات التفتوا
منى : وعليكم السلام
ساره : هلا والله بريوم تو ما نور البيت
هيفاء : لا والله وأنا وين رحت
ساره : وأنتي بعد منوره يا بعدي
هيفاء : أيه من ألحين حسني معاملتك فيني ترى بنصير سلايف
العنود : وين أصايل ؟
ريم : راحت لبيتها والله طلبناها تجي معنا هاليومين وعيت
هيفاء : خساره جمعتنا ما تتفوت
ريم : تقول يمكن أجي أسهر معكم بكره
هيفاء : الله يحييها
منى : وش السالفه ؟
ريم : لا سالفه ولا شي بس حنا بنقعد عندك كم يوم على بال مايجون رجاجيلنا
ساره ناظرته بإستغراب : ليش هم وينهم
ريم : هاو ما قالك سلطان
ساره ماتدري وش تقول
العنود تدخلت لأنها حست أن ساره منحرجه : وين رجاجيلكم جعلهم ماعادني بقايله
هيفاء : غريبه ما جتكم الاخبار من سلطان
منى : عاد سلطان من يبدى يسولف مع ساره تضيع علومه مدري وش يحكون فيه وإذا سألنا هالسنعه عن شي قالت مدري والا نسيت أسأله
ريم : يحق له يتغزل في ساره وينسى الدنيا
منى : المهم وينهم فيه
هيفاء : الشباب بيجلسون كم يوم في المزرعه يوسعون صدورهم وحنا بنجلس عند منى طبعاً إذا بتستضيفنا
منى : الله يحييكم
العنود : أجل روحوا غيروا ملابسكم وتعالوا تقهووا معنا
ريم : طيب دقايق ونازلين لكم
طلعت ريم وهيفاء يغيرون وساره كانت تغلي من القهر خصوصاً من الموقف اللي حطها سلطان فيه
العنود ومنى يناظرون بعض وهم متايقين علشان ساره
العنود : خلاص يا ساره هدي أعصابك هذا سلطان من عرفناه وهو ساحب على الدنيا
ساره : ما كلف نفسه يرسل رساله علشان يعلمني موع لشاني أنا علشان أهله إذا سألوني عنه
منى : خلاص السالفه عدت على خير هونيها وتهون
ساره : احس ودي أفجر فيه وافجر في عمري وارتاح , تعبت والله تعبت
العنود : تعوذي من أبليس واستهدي بالله لا يطق فيك عرق على شي ما يسوى
رن جوالها وناظرته ولقته سلطان
ضحكت بإستهزاء : زين ذكر أن عنده حرمه فيه الخير والله
منى : ساره لا تردين وأنتي معصبه
العنود : وهي صادقه ما أنتوا ناقصين هواش
ساره : علشان يمسكها حجه ويقول سفهتني هو خلقه يدور علي الزله
ردت سراه بدون نفس : آلو
سلطان : هلا ساره
ساره : وش تبي؟
سلطان : وش فيك؟
ساره : ما فيني شي أخلص وش عندك
سلطان : ترى بتأخر كم يوم في المزرعه الشباب مجتمعين وبنقعد اسبوع وقلت أعطيك خبر
ساره : باللهي , توك تذكر كلفت على عمرك والله
سلطان : وش فيك ليش نفسك خايسه
ساره : عالعموم أنت حر في اللي تسويه إن شاء الله تقعد سنه أنا مالي دخل سو اللي تبي , ويلا مع السلامه
سلطان : ساره لحظه
ساره صكت السماعه
منى : الله يصلحك كان تفاهمتي معه
ساره : وش أتفاهم معه وهو توه يذكر يقول لي عن جلسته في المزرعه
العنود : الله يصلح ما بينكم
ساره : خلاص غيروا السالفه ريم وهيفاء بينزلون ألحين

بعد يومين رجع فيصل وعادل وفهد وسلمان من المزرعه وريم وجواهر وحنان راحوا لبيوتهم وهيفاء راحت لبيت جدها علشان فهد كل يوم يزورها وساره حاسه بقهرها اتصلت على عبدالله
عبدالله : هلا والله هلا بنور الدنيا
ساره : وش ذا الحب اللي نزلت عليك فجأه
عبدالله : آفا عليك من زمان أحبك بس أنتي مو منتبهه
ساره : أيه هين لا بكثر
عبدالله : طيب وش عندها الشيفه داقه علي هالحزه
ساره : أي هذا عبود اللي أعرفه
عبدالله : وش عندك
ساره : أنت وينك في بيتك والا في بيت أهلي
عبدالله : في الشارع
ساره : أنا أقول أنت ووفاء هاليومين في بيتكم والا لين ألحين عند أهلي
عبدالله : في بيتنا ليش؟
ساره : تستضيفني عندك كم يوم
عبدالله بخوف : ليش وش فيك
ساره : ما فيني شي بس ودي أجي عندكم كم يوم وما أبي أهلي يدرون
عبدالله : متهاوشه مع سلطان
ساره : يعني هوشه بسيطه
عبدالله : أنتي قولي وش سوا لك وأنا أروح أسنعه لك
ساره : عبود خلنا في المهم بتستضيفني عندك والا لا
عبدالله : آفا عليك إذا ما شالك البيت تشيلك عيوني
ساره : تسلم عيونك الله لا يحرمني منك
عبدالله : تبيني أجي أخذك ؟
ساره : ياليت لأن ودي أمر على بيتي أخذ لي كم غرض أول
عبدالله : ليش أنتي وينك ؟
ساره : في بيت أبو فيصل
عبدالله : طيب نص ساعه وأكون عندك
ساره : خلاص أنتظرك

سكرت ساره السماعه وراحت تضف ملابسها دخلت عليها منى والعنود
منى : وش قاعده تسوين ؟
ساره : شوفة عينك أضف ملابسي
العنود : وليش إن شاء الله
ساره : عبدالله أخوي بيجي يأخذني بعد شوي
منى : بتروحين ؟
ساره : أيه
العنود : لا يالسخيفه والله مستانسين مع بعض
ساره : لا والله ثقلت عليكم لي اربعه أيام وأنا عندكم
منى : وش ذا الكلام البيت بيتك يا ساره أنتي راعية بيت
ساره : تسلمين يا قلبي ما تقصرين , بس والله فشيله عند أبوك وعند فيصل ريم خذها رجلها وعماتك بعد راحوا لبيوتهم وانا سلطان مهملني وساحب علي , لو أهلي يدرون أني قاعده عندكم بيجون يأخذوني بالغصب
منى : هاو حنا بعد أهلك
ساره : وأنا والله أعتبركم أهلي بس صعبه لي أربعه أيام نايمه في بيت عم زوجي
العنود : سارونه تكفين خليك والله من أجتمعنا وحنا مبسوطين نسينا همومنا كلها كم يوم ويرجع سلطان وتروحين معه
ساره : لا خلاص عبدالله جاي في الطريق
منى : طيب وش بتسوين مع سلطان ؟ تكفين ساره لا تتهورين
العنود : وأهلك وش بتقولين لهم أنتي من نص رمضان وأنتي عندهم
ساره نزلت دموعها : أدري علشان كذا بروح لبيت عبدالله وقلت له لا يقول شي لأهلي
منى ضمتها : خلاص يا ساره لا تصيحين
ساره : والله أصيح من القهر
العنود : قولوا آمين الله يفرجها علينا كلنا
ساره ومنى : آمين

************************************************** **********

جاء عبدالله وركبت ساره معه وشاف شنطتها معها
عبدالله : وش ذا الشنطه
ساره : ملابسي
عبدالله : وش جاب ملابسك عند الناس
ساره : كنت نايمه عندهم
عبدالله : نعم
ساره : وش فيك الرجاجيل في المزرعه واجتمعنا كلنا يالبنات عند منى تدري توها مابعد طلعت من العده ونمنا عندها
عبدالله : ساره وش فيك أنتي وسلطان
ساره : هوشه بسيطه ما تسوى
عبدالله : أنتوا من رمضان وأنتوا متهاوشين وش صاير بينكم
ساره : لا وين أصلا في رمضان ما كنا متهاوشين بس كنا نعاند بعض
عبدالله : هالكلام موب علي
ساره : بالله لو كنا متهاوشين بأروح معه للعيد والا بأشتري له هديه ولأهله وبأكلمه وبيكلمني وفتحت شنطتها وطلعت الخاتم شف هذي عيديتي منه
عبدالله : أجل وش فيكم ليش تبين تجلسين عندي ليش مارحتي لبيت أهلي
ساره : أنت عارف أهلي كل شي يسون منه سالفه في رمضان رحت عندهم وهو راضي وأشغلوني بأسألتهم وما صدقوا الا يوم هو قالهم ما فينا شي تبيني أروح لهم ألحين وأنا معصبه عليه والله أن يمسكه أبوي وما يفكه الا وهو مسفل فيه
عبدالله : طيب ليش أنتي زعلانه وش سبب هالهوشه
ساره : عبود أنت متزوج وتعرف كل اثنين لازم يصير بينهم زعل بسيط . علشان كذا أنا اتصلت فيك وما اتصلت في خالد لأني عارفته مرجوج وعلى طول بيروح لسلطان ويتهاوش معه وبيتهاوش مع أهله
عبدالله : يعني ماودك تقولين لي وش فيك
ساره : عبدالله تكفى لا تضغط علي أنا عارفه وش قاعده أسوي لا تخاف علي بعدين ما سمعت بكيد النساء خلني ارفع ضغطه شوي وتراني زعلانه علشان شي بسيط
عبدالله : أكيد ؟
ساره : أيه أكيد
عبدالله : سارونه حبيبتي متى ما حسيتي أنك متضايقه وتبين تسولفين تراني حاضر لك
ساره : ما تقصر يا أخوي الله يخليك لي

دخلت ساره مع عبدالله وسلمت على وفاء
عبدالله : وفاء جهزي الغرفه لساره
وفاء بإستغراب : عسى ماشر وش عندك لا تكونين متهاوشه مع سلطان
عبدالله : بالله هذا بدال ما ترحبين فيها تقولين متهاوشه
وفاء بارتباك : موب قصدي والله بس من خوفي عليها
ساره : لا تطمني ما فيني شي
وفاء : ترى ما قصدت شي بس من خوفي عليك
ساره : أدري يا قلبي
وفاء : بروح أجهز لك الغرفه
ساره : بأجي معك
راحت ساره مع وفاء ورتبت معها الغرفه
وفاء : تعالي ننزل نتقهوى
ساره : بأتسبح وأغير ملابسي بعدين أنزل
وفاء : خلاص بنحتريك

نزلت وفاء ولقت عبدالله جالس في الصاله
عبدالله : وين ساره
وفاء : بتتسبح بعدين بتنزل وسكتت شوي بعدين تكلمت : عبدالله
عبدالله : نعم
وفاء : وش فيها ساره
عبدالله : مدري ما قالت لي شي
وفاء : زعلانه هي وسلطان؟
عبدالله : الظاهر , وفاء ساره ما تبي أحد من أهلي يدري أنها عندي علشان كذا انتبهي لا تزلين قدامهم
وفاء : لا تخاف بأمسك لساني
عبدالله : طيب غيري السالفه ترى بتنزل بعد شوي

نزلت ساره وجلست مع عبدالله و وفاء وتقهوت معهم وسولفت وهي من داخل شايله هم يوازي الجبال
بعد ما خلصوا من العشاء قامت ساره : يلا تصبحون على خير
عبدالله : بدري تو الناس
ساره : جاني النوم
عبدالله : أجل تصبحين على خير
ساره : وأنتوا من أهله
سلطان كان جالس مع الشباب وعقله موب معهم
ناصر : يالاخو يالحبيب
سلطان : هلا
ناصر : وين وصلت؟
سلطان : وشو؟
طارق : لا الرجال موب معنا أبد
سلطان : وش فيكم أنتوا
نواف : أنت اللي وش فيك من ساعه نسولف وأنت سرحان
ناصر : تصدق لنا ساعه نسب فيك وأنت ساكت
طارق : أي والله مابقي كلمه في القاموس تدل على الغباء الا وناديناك فيها وأنت تهوجس
سلطان : طيب الوقاحه موب شي جديد عليكم
ناصر : وش قصدك
سلطان : أنت بالذات وقح بالفطره
ناصر: وليش إن شاءالله
سلطان : يتطنزون على أخوك وساكت
ناصر : وأنت بعد ساكت
سلطان : أنا كنت سرحان بس أنت وش عذرك
ناصر : باللهي أنت تسرح وتبيني أتهاوش مع العالم , بعدين وش سرحان فيه أنت ووجهك
نواف : في المدام
طارق : لا وأنت الصادق في الشغل , هذا ما عنده إحساس أبد لو يحس كان راح مع الشباب اللي راحوا , والله ما ألوم حرمته لو تزعل عليه
سلطان : لا يا شيخ من اللي ناشب لي ويقول لا تروح وخلك معنى موب أنت وإياه
ناصر : عاد أنت ما عاندك مخ تفكر ما تعرف تقول لا
نواف : أي والله أنا لو متزوج كان سحبت عليكم كلكم
طارق : ما أحد كلها الا حرمة سلطان هالضعيفه
سلطان بعصبيه : تدرون الشرهه ميب عليكم علي أنا اللي جالس معكم وقام وراح لغرفته
نواف : هههههههههههههه طفرناه
طارق : يستاهل
ناصر : تلايط أنت وإياه
طارق : مسوي فيها فزعات
نواف : على باله يحب أخوه
ناصر : ورى ما تنطمون
************************************************** **
في بيت عبدالله
راحت وفاء تجيب جوالها من غرفتها وشافت النور مولع في غرفة ساره و راحت وفتحت الباب بهدوء
ساره كانت جالسه على السرير وحاطه راسها بين رجولها وتصيح
وفاء استغربت من منظرها
وفاء بصوت واطي : ساره ؟
ساره رفعت راسها بسرعه ومسحت دموعها : هلا
وفاء دخلت للغرفه وجلست على السرير : ساره وش فيك ؟
ساره : ما فيني شي
وفاء : ساره أعتبريني وحده من خواتك وقولي لي وش فيك صاير شي بينك وبين سلطان
ساره : أنتي وحده من خواتي يا وفاء وتطمني ما بينا شي
وفاء : أجل ليش تصيحين
ساره : متضايقه شوي
وفاء : وشو منه متضايقه ؟
ساره : وفاء تكفين مالي خلق أتكلم أعذريني يا قلبي
وفاء : خلاص على راحتك ومتى ما بغيتي تتكلمين وتفضفضين تراني موجوده
ساره : ما تقصرين يا قلبي
وفاء : تبين شي قبل لا أطلع
ساره : طفي النور
وفاء : إن شاء الله

نزلت وفاء وهي متضايقه علشان ساره
عبدالله : وينط طولتي بدأ الفيلم
وفاء : كنت عند ساره
عبدالله : مابعد نامت
وفاء : لا دخلت عليها ولقيتها تصيح
عبدالله بخوف : ليش وش فيها
وفاء : مدري ما قالت لي , بس الظاهر متهاوشه مع سلطان
عبدالله : هي تقول زعلانه منه علشان شي بسيط وما يسوى
وفاء : لا مستحيل تطلع من بيتها علشان شي بسيط
عبدالله : والسواة
وفاء : مدري
عبدالله : آه بس لو أعرف وش هالسلطان مسوي لساره
وفاء : وإذا عرفت وش بتسوي
عبدالله : بألعن جدفه إن كان مأذيها
وفاء : ليش ما تتصل عليه وتعرف منه السالفه
عبدالله : ما ودي أتدخل بينهم
وفاء : أنا ما قلت تدخل أنا أقول تعرف وش السالفه على الاقل تطمن , والله ساره دايم مبسوطه وتضحك بس اليوم شكلها حزينه
عبدالله كان محتار ومو مرتاح من كلام وفاء وطلع جواله واتصل على سلطان
سلطان شاف رقم عبدالله واستغرب مكالمته هالوقت
سلطان : آلو
عبدالله : هلا سلطان
سلطان : هلا فيك
عبدالله : سلطان فاضي؟ ودي أتكلم معك في موضوع
سلطان : آمر يالنسيب
عبدالله : سلطان ساره عندي اليوم اتصلت علي ورحت أخذتها من بيت عمك وسألتها وش فيه وقالت مافيني شي ويوم أصريت عليها قالت أنكم متزاعلين ممكن أعرف وش سالفتك معها
سلطان : ماقالت لك ؟
عبدالله : لا
سلطان حمد ربه أن ساره ما قالت شي : عبدالله مثل ماقالت لك ساره شي بسيط وما يسوى بعد
عبدالله : أكيد
سلطان : أيه أكيد أنت تعرف كل اثنين لازم يجي بينهم زعل فتره ويرضون بسرعه وأكيد أنت مجرب
عبدالله : أتمنى يكون كلامك وكلامها صدق . والله يا سلطان أن زعلت أختي والا غلطت عليها في يوم من الايام تأكد أني ماراح أخليك تعيش مبسوط
سلطان هذا لو يدري عن عيشتنا وش بيسوي موب رادني الا المقبره : آفا يا عبدالله وش ذا الكلام تطمن يا أخوي , بعدين أختك من يقدر عليها
عبدالله : لا بس حبيت أنبهك , المهم أنت متى بترجع من المزرعه
سلطان : بكره إن شاء الله
عبدالله : وش بتسوي مع ساره
سلطان : بأجي أخذها أول ما أرجع
عبدالله : زين يصير خير أجل ننتظرك بكره
سلطان : توصي شي من المزرعه
عبدالله : سلامتك
سلطان : الله يسلمك
عبدالله : فمان الله
سلطان : مع السلامه

سكر سلطان جواله وهو جالس يفكر ما يدري وش بتكون ردة فعل ساره إذا رجع

***********************************************

اليوم الثاني قام سلطان الصباح وطلع يفطر مع الشباب
سلطان : أنا اليوم بأرجع للرياض
نواف : حتى حنا ودنا نرجع ملينا
طارق : بدري خلونا نجلس كم بوم بعد
سلطان : تبون تجلس اجلس من ماسكك
طارق : تبيني اجلس بلحالي مع نويصر
ناصر : ترفق على عمرك يالزين . أنا بعد بأرجع للرياض اشتقت لخلودي ويناظر طارق وهو رافع حواجبه يبي يقهره
طارق : من زين هالخلود عاد وش لاقي فيه أنت
ناصر : مالك دخل احبه عندك مانع
طارق : وأنا ما تحبني
ناصر : وع وش أحب فيك يا جسرك تسأل مثل هالسؤال
نواف : تحمل يا طارق هذولا عيال عمك واحد اشتاق لخلودي والثاني اشتاق لأخت خلودي ويناظر سلطان
سلطان : يا شين ثقالة الدم
طارق : وش فيك تعصب إذا جبنا طاري حرمتك , اشوف فيصل وفهد ينبسطون وأنت تنقلب خشتك لا يكون ما تحبها بس
نواف : شكله ما يحبها والا ليش ساحب عليها
ناصر : سلطان ؟من جد ما تحبها ؟
سلطان : وأنتوا وش دخلكم
ناصر : لا أكيد يحبها والا ليش راجع بدري للرياض
سلطان قام من على السفره : أنا بأمشي يلا بس مع السلامه

رجع سلطان للرياض وعلى طول راح لبيت عبدالله ودخل وسلم وجلس في المجلس
سلطان : وين ساره ؟
عبدالله : دقايق أناديها
دخل عبدالله للصاله وشاف ساره ووفاء جالسين عند التلفزيون
وفاء : من اللي جاي
عبدالله : سلطان
ساره فز قلبها يوم سمعت اسم سلطان : وش سلطان
عبدالله : بعلك
ساره : وش جابه
عبدالله : هاه ؟ أكيد جاي يأخذك
ساره : أخبره بيكمل الاسبوع هناك
عبدالله : هون ورجع فيها شي ؟ ويمكن اشتاق لك
ساره : أيه هين . لحظه من قال له أني عندك
عبدالله : أنا
ساره : أنت ؟
عبدالله : أيه أمس كلمته وسألته عن اللي بينكم وقلت له أنك عندي
ساره عصبت : وليش تكلمه أنا قلت لك حنا كبار ونعرف مصلحتنا , بس لا يكون ثقلت عليك وتبي الفكه مني ترى بيت أبوي مفتوح لي
عبدالله ضاق صدره : آفا عليك يا ساره وش ذا الكلام والله أنا كنت خايف عليك وودي أتطمن بس
ساره : تقوم تتصل فيه وترخص فيني عنده وتقول له يجي
سلطان : كان في المجلس وسامع الهوشه اللي بين عبدالله وساره
عبدالله راح لساره ومسكها مع يدها وجلس جنبها على الكنب :ك ساره والله العظيم ماكان قصدي شي كنت أدور مصلحتك وأنا ما قلت له أرجع هو قال من نفسه وقسم بالله لو تجلسين العمر كله عندي ماراح أمل منك وموب أنا اللي أرخص فيك أنتي غاليه يا قلبي والله أغلى من نفسي طلبتك يا وخيتي لا تزعلين علي كل شي يهون الا زعلك على
ساره نزلت دموعها ومسحها عبدالله بسرعه : دموعك غاليه يابعدي وما أحب أشوفها
ساره ضمت أخوها وجلست تصيح
وفاء تبي تلطف الجو : هي هي خلاص عاد ترى أغار راعوا مشاعري عالاقل والا قولوا اطلعي شوي قبل لا تسوون هالحركات والافلام الهنديه حسوا على دمكم قدامكم وحده تتأثر بسرعه
عبدالله : لو تحترقين من الغيره ما حنا خالصين وروحي جهزي القهوه بس الرجال في المجلس
وفاء : طيب خلصوا فلمكم أول أخاف يفوتني شي
ساره بعدت عن عبدالله
عبدالله : هاه عساك راضيه عني بس
ساره : أزعل من نفسي وما أزعل منك
عبدالله : يناظر وفاء اسمعي تعلمي إذا قلت لك عساك راضيه قلتي خلني أفكر مالت عليك
وفاء : والله منتب أخوي علشان ارد مثلها
ساره : خلاص خلاص لا تتهاوشون
عبدالله : ساره غسلي وجهك وجهزي شنطتك وتعالي سلمي على سلطان
ساره بدون نفس : طيب

************************************************** *****

في بيت أبو أصايل

نزلت العنود وسلمت على أمها وعلى أبوها
أم أصايل : توك تقومين
العنود : عطله يمه خليني انبسط
أم أصايل : انبسطي ما قلت لا بس قومي كلي لك لقمه على الاقل من أمس ما طب بطنك شي
العنود : إذا جعت بأكل
أبو أصايل : ترى أبو نايف كلمني ويقول أن أهله بيجون بعد اسبوعين يشوفون العنود
العنود بعصبيه : يبه تكفى أبوس رجولك ما أبي
أبو أصايل : وحنا متى نخلص من هالسالفه . أم نايف وبناتها بيجون بعد أسبوعين ثم بيجي نايف يشوفك
العنود وهي شوي وتصيح : يبه أنت قلت بنأجل كل شي للصيف ليش غيرت رأيك
أبو أصايل : العرس بعد الصيف بس الولد يبي يملك عليك قبل
العنود : وأنا ما أبي
أبو أصايل : إذا شاورتك ذيك الساعه قولي ما أبي
العنود طلعت لغرفتها وجلست تصيح كالعاده
أم أصايل : الله يهديك ليش تحاكيها بذا الاسلوب
أبو أصايل : وش أسوي الطيبه ما تنفع معها تتدلع على غير سنع
أم أصايل : الله يهديكم أنتوا الاثنين

************************************************** **

غسلت ساره وجهها وحطت مكياج خفيف ونزلت وراحت للمجلس
أول ما دخلت وقف سلطان
ساره : السلام عليكم
سلطان وعبدالله : وعليكم السلام
ساره : جلست جنب الباب
وسلطان جلس وهو يناظرها : كيفك يا ساره
ساره : بخير
عبدالله : وراك جالسه عند الباب اقربي شوي
ساره وهي تحط رجل على رجل : لا مرتاحه هنا
عبدالله : بأروح أجيب القهوه ياويلكم أن رجعت وأنتوا على هالحاله
سلطان : وش بتسوي يعني
عبدالله : بأقفل عليكم في هالغرفه لين ما تتصالحون والا يموت أحد منكم والا تموتون اثنيناتكم
ساره : بسم الله علي
سلطان : بسم الله علينا وضغط على كلمة علينا علشان تنتبه ساره
ساره سمعت وطنشت لأنها عارفته قدام الناس يعاملها أحسن معامله
عبدالله : إذا خلصتوا عطوني خبر بأروح أشقر على المدام شوي
سلطان : خذ راحتك
طلع عبدالله من المجلس وسلطان يناظر ساره وهي جالسه تناظر أظافرها ببرود
سلطان : ساره عبدالله ما طلب مني أرجع والا أخذك هو بس سألني ليش متزاعلين
ساره : وقلت له السبب
سلطان : لا
ساره : وليش ؟
سلطان : لأنك ماقلتي له , ساره أدري أنك معصبه وزعلانه بس وش تبيني أسوي الشباب طلبوني أجلس معهم وجلست
ساره : طيب
سلطان : وشو طيب ؟ تكلمي قولي شي
ساره : حنا متفقين على سنه ياليت نكملها مع بعض بهدوء وقدام أهلنا بس يعني صداقه وما صادقه شلها من راسك هي كلمتين بأقولها لك يا حنا نعيش مع بعض وكل واحد حر بحياته وماله دخل في الثاني يا ننفصل ونرتاح
سلطان : وش الفايده من عيشتنا مع بعض وكل واحد له حياته الخاصه حنا قلنا نجرب ونتعود على بعض
ساره بدون نفس : هاهاها ضحكتني والله أي نجرب وأي خرابيط أنت مستحيل تجرب حتى أنا عقب الصور مستحيل أصدقك . عالعموم تبينا نكمل هالسنه علشان أهلك وأهلي أنا حاضره بس بالشرط اللي قلت ما تبي خلنا نتطلق ونرتاح
سلطان : طيب خلينا نتفاهم
ساره : أنا قلت اللي عندي
سلطان يناظرها ويفكر ما توقعتك قاسيه لهالدرجه يا ساره ما نسيتي سالفة الصور لين ألحين . بس وش أسوي ألحين أوافق والا لا ؟ خلني أوافق وش بيضرني عاد على الاقل ارتاح من أهلي
ساره كانت جالسه تتأمله وهي ماسكه عمرها لا تغلط وتقول أنا حاضره للي تبي كان شكله حوسه لابس بنطلون جينز وقميص أسود وعليه بالطو أسود صاير يشبه الممثلين الاجانب خصوصاً أنه طويل و جسمه رياضي
سلطان : طيب جيبي أغراضك خلينا نروح للبيت
ساره : طيب
راحت ساره ولقت عبدالله جالس مع وفاء
عبدالله : هاه خلصت الجلسه السريه
ساره : أيه خلصت
عبدالله : وش النتائج
ساره : أبد بأجيب شنطة ملابسي وأذلف معه
عبدالله : آفا شكلكم ما تصالحتوا
ساره : لا يا شيخ تبيني أروح معه وأنا زعلانه فشر
وفاء : أيوه طلع عرق المعلمه ساره
عبدالله : كباية شاي خمسينه يامعلمه
ساره : ههههههههههه والشيشه على حسابي
عبدالله : هي هي وش ذا الكلام هونا ما نبي شي ما بقى الا هي قال شيشه قال
وفاء : ترى الرجال في المجلس
عبدالله : خلاص بأروح له

راحت ساره مع سلطان ورم عليهم اسبوعين وهم على نفس الحاله ما يتكلمون مع بعض الا قدام الناس وفي البيت كل واحد في حاله سلطان يا في غرفة المكتب يا نايم وساره أما تدرس أو جالسه عند التلفزيون وإذا جت فاطمه معهم قاموا يتكلمون في سوالف عاديه عن أهل سلطان والا عن الدراسه والا عن المباريات

في بيت أبو أصايل
العنود كانت جالسه تلبس ملابسها وتصيح تتمنى تموت قبل لا تطلع عليهم خلصت من لبسها وغسلت وجهها وتوها طالعه من الحمام ودخلت عليها أصايل
أصايل : يلا يالعنود الناس تحت وأنتي توك ما حطيتي مكياج
العنود الله يأخذ العنود وترتاح : ما أبي أحط مكياج يبوني يشوفوني على طبيعتي
أصايل : وش فيك أنتي وش تحسين به
العنود : ما فيني شي
أصايل : العنود أنا حاسه فيك أنتي لك فتره ما أنتي طبيعيه وش فيك
العنود : أصايل ما فيني شي خلينا ننزل بس
نزلت العنود ودخلت على أهل نايف وهي ماسكه نفسها تخاف ترمش وتنزل دموعها سلمت على أمه وعلى خواته وتوها بتطلع ونادتها أمه : العنود تعالي جنبي وأنا خالتك
العنود أكره مالها الحماة البثره : وراحت وجلست جنب أمها وأمها تناظرها بعصبيه
أم نايف : ماشاء الله قمر من حظ نايف والله
العنود الله ياخذك أنتي ونايف
ماجده أخت نايف : باقي لك هالسنه وتخلصين الدراسه صح
العنود هزت راسها لأن العبره خانقتها
أم نايف : أيه يتملكون هالفتره على الاقل وإذا جاء الصيف يتزوجون ولو أن ودنا يتزوجون قبل بس علشان العنود كل شي يهون
العنود طلعت بسرعه من المجلس
أم أصايل : بنيتي تستحي
ماجده : أيه واضح عليها
أم نايف : أجل الاسبوع الجاي بيزوركم نايف إن شاء الله
أم أصايل : الله يحيه

***********************************************
في بيت أبو سلطان
سلطان كان رايح يسلم على أهله وريم عندهم
ريم : وين سويره ورى ما جت معك
سلطان : أنا جيت وماقلت لها
ريم : توني داقه عليها وتقول في الطريق
سلطان : يمكن بتجي مع السواق
أبوسلطان : أنتوا عايشين مع بعض والالا ؟
سلطان : أيه وش فيك معصب
أبوسلطان : أنت ما تدري عنها وهي ماقالت أنك بتجي
سلطان : وراك مكبر السالفه أنا كنت طالع وقلت أمر أسلم عليكم وما قلت لها عادي يعني
ريم : بأروح أتصل على هيفاء أشوف وش فيها تأخرت
هيفاء : هذاني جيت لا تتصلين
ريم : بسم الله الرحمن الرحيم
أبو عبدالعزيز : وش فيك تسمين شايفه جني
ريم : لا يبه بس روعتني ما أمداني أتكلم الا وهي وراي
وصلت ساره : وتفاجأت أن سلطان عند أهله وسلمت عليهم وجت تجلس وكانت هيفاء جنب سلطان
هيفاء قامت بسرعه : تعالي أجلسي جنب رجلك بأجلس جنب ريم
ساره تتبتسم وتحاكي عمرها والله أنك بثره يا هيفاء
جلست ساره جنب سلطان وكلهم قاموا يسولفون
أم سلطان : ترى عشاكم عندنا اليوم
سلطان : أنتي تأمرين يمه
ريم : سلطان وش رايك اليوم ننام عند أهلي
ساره التفتت بسرعه على سلطان وسلطان كان وده بس خاف من ساره : وبيتك ؟
ريم : وهذا بعد بيتي
سلطان : لا فاضيه أنتي
هيفاء : هاه يبه وش رايك ودي أنام هنا اليوم
أبو عبدالعزيز : تبين تنامين عندهم بكيفك بس انتهبي نامي في غرفة ريم موب في غرفة فهد
هيفاء وجهها ولع من الفشيله
أبو سلطان وأم سلطان ما سكين أعمارهم علشان ما يحرجونها
بس ساره ماقدرت تمسك نفسها و على طول انفجرت هي وريم وسلطان وقاموا يضحكون عليها
أبو عبدالعزيز : وأنتوا بدال ماتضحك أنت وحرمتك ورى ما تجيبون لنا سعود صغير يوسع صدورنا
ساره حست كأن أحد رجفها على بطنها تبخرت ضحكتها التفتت على سلطان وكان هادي وطبيعي
سلطان التفت عليها وشافها متوتره وابتسم لها
سلطان : الله يهديك يبه وش فيك مستعجل حنا تونا متزوجين ما كملنا السنه بعدين أنا أبي احتفظ بساره لنفسي أول بعدين لاحقين على العيال نبي نستانس أول
ريم وهيفاء : أوووووووووووووووه حركات
ساره ماتوقعت أن سلطان بيرد بهالرد توقعته يقول ربي مابعد كتب والا يصير خير التفتت عليه وابتسمت له ابتسامة شكر ورد لها الإبتسامه و هو مبسوط
أبو عبدالعزيز : عاد موب قدامنا الله يصلحكم في بيتكم الله لا يهينكم
ساره أحمر وجهها وريم ما خلتها هي وهيفاء وقاموا يضحكون
سلطان إنا لله أبوي سعود يسوي حسنه ثم يخربها الله يهديه: وش فيك يبه ما سوينا شي
أبو عبدالعزيز : أدري بس قلت أنبهكم عاد , عبدالعزيز تعال معي شوي أبيك في المكتب
سلطان : ما تبوني ؟
أبو عبدالعزيز : لا أقعد عند حرمتك أحسن
سلطان : أحسن بعد , بس ترى أنتوا الخسرانين
قام أبو عبدالعزيز وأبوسلطان وراحوا للمكتب
ريم : الا ماقلت لكم
أم سلطان : وشو ؟
ريم : اليوم أنا وسويره سوينا مقلب في بنت
هيفاء : من هي؟
ريم : وحده في الجامعه ما نعرفها
ساره : خلاص انطمي عاد
هيفاء : لا تكلموا بلا نذاله
ريم : وحده جايه تخطب ساره لأخوها في الجامعه
هيفاء : ههههههههههههههههه كذاااااااااابه
ريم : والله لا وجايبه صورة المعرس معها
ساره : يا حليلها ساعه تسولف عن اخوها وتمدح فيه وأنا أناظرها و أحرك الدبله في اصبعي وما فهمت
ريم : عاد يوم شفناها كمخه غمزت لساره واستلمتها ومابقي سؤال ما سألتها وآخر شي سحبت يد ساره وحطيتها في وجهها وقلت البنت متزوجه يا عمتي
ساره : حسيتها حقدت علينا
ريم : بس والله أخوها مملوح
أم سلطان : والله أنكم ماتخافون من الله قاعدين تتمسخرون على البنت
ساره : يا خالتي ذا البنت لها اسبوع تمشي وراي في كل مكان حتى المحاضرات تحضر معنا خوفتني
ريم : ليش ما قلتي لي أنك خايفه
ساره : وأبين لك أني جبانه
هيفاء : يعني ألحين أنتي موب جبانه
ساره : لا كنت جبانه
هيفاء : المهم وش سوت يوم قلتوا أنها متزوجه
ساره : ههههههههههههههه تحطمت وقالت لريم طيب وش رايك تأخذينه أنتي
هيفاء : هههههههههههههه المسكينه مالقت الا ريم
ريم : هي هي وأنا وش قاصرني يعني سويره أحسن مني
ساره بدلع : وهل في ذلك شك
سلطان كان يناظرهم وساكت مقهور لأن ساره من دخلت وهي تضحك وتسولف معهم كلهم الا هو ما عبرته
ريم : أنتي مصدقه نفسك ترى
ساره : كيفي أصدق نفسي أكذب نفسي أنا حره
ريم : الحمدلله والشكر شاربه شي
ساره : لا تصرفين الموضوع بس خلني أكمل السالفه لهم
هيفاء :ليش ما خلصت
ساره تناظر ريم بقهر : لالا
ريم : سويره أنطمي
ساره : قلت لك أنطمي في الا ول وعاندتي
هيفاء : اخلصوا ما صارت
ساره : هي قالت لريم تأخذينه وريم قالت أيه عاد البنت قالت لا هونت هو يبي وحده حلوه
سلطان وهيفاء : هههههههههههههههههههه
ريم : تبي تنتقم مني والا هي شايفتني حامل بعدين أنت وإياها وش تضحكون عليه
ساره التفتت وشافت سلطان يضحك وانبسطت يالله يا سلطان من زمان ما شفت ضحكتك اشتقت لك يا قلبي
سلطان : ودي أني شايف وجهك يوم قالت يبي وحده حلوه
ساره : فاتك نص عمرك
سلطان انبسط لأن ساره عطته وجه : عسى ما طقت البنت بس
ساره : لا ما تقدر حامل المسكينه
ريم : هين يا سويره وأنت يا سليطين صدق أنكم همج
ساره التفتت على سلطان : كأنها سبتنا ؟
سلطان : أي والله , وش رايك أطقها ؟
ساره : لا سماح هالمره بس إذا ولدت لا تقصر
سلطان : ابشري بس
رن جواله وبغى يكسره من القهر ورد بسرعه : هلا يبه
أبو سلطان : تعال شوي نبيك في شغل
سلطان : قلت لكم ما تستغنون عني
أبو سلطان : طيب درينا أخلص
سلطان : طيب مع السلامه
أم سلطان : من ذا
سلطان : أبوي
أم سلطان : وش يبي ؟
سلطان : يبني في شغل
ريم : يا عجزه كان فتح باب المكتب وناداك
سلطان : بأروح أشوف وش عنده
راح سلطان للمكتب
ريم : هيوف أمس شفت كم شنطه في النت تجنن تعالوا شفوها يمكن تعجبكم ونطلبها مع بعض
ساره : روحوا أنتوا أنا بأروح للمجلس الثاني بأشوف المباراة
ريم : وش هي مباراته
ساره : الهلال والنصر
ريم : يا أنك فاضيه تونا مابعد صلوا العشاء
ساره : بأشوف التحليل
هيفاء : صبيه
ساره : كيفي
أم سلطان : أجل بأجي معك من زمان عن المباريات
ساره : خالتي تشجعين ؟
أم سلطان : أول كنت أشجع ألحين ما عاد أدري عن شي
ساره : والله أنك خطيره يلا أجل لا تفوتك حماس كل الفريقين كاملين
ريم : لا تفرحين أمي نصراويه
ساره : على الا قل أحسن منك تشجع
أم سلطان : خلي الشغاله تودي الشاهي والمكسرات للمجلس عندي كم مكالمه أخلصها وألحقك
ساره : طيب
راحت ساره وجلست في المجلس عند التلفزيون
خلص سلطان شغله مع أبوه وجده وراح يصلي العشاء
ورجع بعد الصلاة وما لقى أحد في الصاله وسأل الخدامه وقالت له ساره في المجلس وريم وهيفاء فوق
راح سلطان للمجلس ولقى ساره حاطه المركى ومتكيه عند التلفزيون
سلطان : هاه بدت
ساره : لا
سلطان سحب لها مركى وجلس قبالها : صبي شاهي جعلنا نفوز
ساره : آمين
صبت ساره الشاهي ومدت له البياله سلطان رفع راسه علشان يأخذ البياله وجت عينه في عينها اهتزت يد ساره و انصب عليها الشاهي
ساره : أخخخخخخخ حار
سلطان خذ البياله بسرعه وجطها على الارض وسحب المناديل ومسك يدها يمسحها ساره رفعت راسها وهي تناظره وتكلم نفسها : ياليتك تخاف علي صدق
سلطان رفع راسه وناظرها , جلسوا يناظرون بعض وهو ماسك يدها . سلطان مايدري وش فيه كل ما جاء يناظرها يحس أنه بيجيب العيد وساره ما يحتاج ترتبك بسرعه
ساره بلعت ريقها وسحبت يدها وتكلمت وصوتها يهتز: بتبدأ المباراة
سلطان يلا تكلم معها يمكن تسمعك هالمره : ساره
ساره خافت يقول شي مايعجبها وقاطعته وهي وجهها للتلفزيون : سلطان وش متفقين عليه
سلطان بقهر : طيب بس بأقولك صبي مويه بارده على يدك إذا هي تعورك
ساره والله قلبي اللي يعورني موب يدي : لا ما تعورني
أم سلطان : هاه بدت الكوره
سلطان : الله يهديك يمه أسمها مباراة قد شفتي كوره تبدأ
ساره : هههههههههه يا حبيلك يا خالتي متحمسه
أم سلطان : وش أسوي حمستيني , الا وش هي بطولته
سلطان : الدوري يمه
أم سلطان : جعل النصر يفوز
سلطان : هاه أنتي حمستيها وجت تدعي علينا
ساره : إن شاء الله ربي موب قابل دعوتها
أم سلطان : سويره تراني خالتك
ساره : وإذا صرتي خالتي تدعين علينا
سلطان : بدى شغل الخاله ومرة الولد وياليته على شي يسوى بعد
أم سلطان : سكت حرمتك يا سلطان
سلطان : ما أقدر يمه هي معها حق
أم سلطان : محد يبرد قلبي الا ناصر متى يجي بس
فهد من ورى الباب : فيه أحد والا أدخل
أم سلطان : لحظه شوي
ناصر : بسرعه والا بأدخل
سلطان : مافيك صبر
ناصر : سلطان هنا آسفين ما درينا
سلطان : انطم
ناصر : إن شاء الله
ساره خذت الجلال وتغطت
أم سلطان : يلا ادخلوا
ناصر : كم كم؟
سلطان : قل السلام عليكم أول , بعدين توهم نازلين للمعلب ما بعد بدت
ناصر : أشوى , السلام عليكم
ساره بصوت واطي : سلطان ما عندكم تلفزيون ثاني
سلطان : الا فيه
ساره : وينه
سلطان : ليش ؟
ساره : أبي أشوف المباراة
سلطان : وش يوديك خليك هنا
ساره : فشله أخاف ما أمسك نفسي
سلطان : هههههههه محد منتبه لك كلهم يتحمسون من تبدى
أم سلطان : ساره روحي ألبسي نقاب أحسن لك
ناصر : مرة أخوي وش تشجعين ؟
أم سلطان : هلاليه
ناصر : برى لو سمحتي
سلطان : أنت اللي برى لو سمحت
ساره : بعد المباراة بتشوفه برى غصب عنه

ناصر : بعد وتتمسخرين
ساره : ما قلت شي غلط وأذكرك
ناصر : مابقى الا هي
ساره : إذا فزتوا أنا بأطلع برى
ناصر :واثقه يعني
ساره إن شاء الله شوف تشكيلنا وشف تشكيلتكم أنتوا مسوين فاتحين الملعب وبتهاجمون وأهدافنا بتجي من مرتدات وإن جبتوا هدف بيكون بلنتي
فهد وسلطان : هههههههههههههههههههههههههههههه
ناصر معصب : مسويه خبير ه
ساره : طيب نشوف
فهد : مرة أخوي علمي هيفاء على الكوره تراها دبشه في الرياضه
هيفاء توها بتدخل المجلس : من هي الدبشه
فهد : هاه , ريم دبشه
ريم ورى هيفاء : باللهي
فهد : الشغاله مهوب انتوا
ناصر مسوي فلبينيه : مين دبشه بابا
فهد : كل تبن
سلطان : خلاص انطموا بدى الشوط
خلصت المباراة وفاز الهلال 2-1
فهد : نويصر قم اطلع برى
ساره : قلت لك بتجيبون هدف بلنتي تقول مسويه خبيره طلعت أخبر منك
ناصر: سليطين وشلون متحمل حرمتك هذي المفروض تجيب شطرطون وتحطه على فمها وتكتب عليه مغلق للأبد
سلطان : الظاهر الشطرطون بيكون على فمك أنت يلا برى
ريم : خخخخخخخخخ مسخروك يا الكمخه
أم سلطان : خلاص عاد أنتوا فزتوا وحنا انهزمنا ماصار شي
جت الخدامه ونادت أم سلطان
أم سلطان : يلا قوموا تعشوا أبوكم وجدكم يحترونا
ناصر : طيب
سلطان : يا أخي مهزوم ولك نفس تأكل
ناصر : مهزومين بظلم
سلطان يسايره : طيب
ريم : يلا قوموا
جلسوا على العشاء يسولفون
أبو عبدالعزيز : منى بتطلع من العده بعد اسبوعين ونبي نحط لها عزيمه في مزرعتك يا أبو سلطان مزرعتي فيها عمال يرممون
أبوسلطان : متى ؟
أبو عبدالعزيز : بعد أسبوعين بنحطها خميس
أبوسلطان : إن شاء الله يبه
سلطان : يمديني أحضر
أبو سلطان : إن شاءالله يمديك
أم سلطان : ليش أنت وين بتروح
أبوعبدالعزيز : عندنا شغل في جده وهالمره بنرسل سلطان مفاوض عن الشركه
فهد : لا يكون الشغل هو المجمع السكني اللي عالبحر حق أبوإياد
أبوسلطان : أيه هو
فهد : لا تتعبون أنفسكم لكم كم سنه وأنتوا وغيركم تحاولون فيه وهو رافع سعره عاد وشلون إذا صرتوا محتاجين للأرض حقت المجمع علشان تكملون مشروعكم لا وينافسكم عليها أبوبندر والله ما تطولونها
ناصر : قلت لكم خلوني عليه أفقع وجهه أنا وطويرق ما طعتوني
سلطان : ورى ما تأكل وأنت ساكت
أبوعبدالعزيز : هالمره غيرنا المفاوض بنجرب سلطان
فهد : انتبه يا سلطان ترى بياكلك لحم ويرميك عظم على قولهم
ناصر :وش دعوه سمكه
فهد : ياليل الغثاء أنت ورى ما تنطم
أبوسلطان : أبوفيصل قال بأروح بس قلنا بنخلي سلطان . أبيك تبيض وجهي وأنا أبوك , أبو إياد محد قدر عليه
سلطان : دعواتكم بس وإن شاء الله ما أرجع الا وصك الارض معي
ساره في نفسها : الله يوفقك ولا يخيب لك مطلب ويردك بالسلامه
أم سلطان : متى بتمشي
سلطان : بكره إن شاء الله
أم سلطان : الله يحفظك
الكل : آميييييين

راح سلطان لجده وساره قعدت في بيتها وضايق صدرها ما تقدر تتصل عليه كرهت نفسها علشانها أقترحت هالاقتراح تمنت أن لسانها انقطع قبل لا تقوله كانت تسمع أخباره من أهله وهم يسولفون بس ما تقدر تسأل عنه

العنود اليوم بيجي نايف يشوفها وهي حالتها حاله نفسيتها تعبانه وصحتها متدهوره وأبوها منشف راسه
غيرت ملابسها وهي تدعي أن الله يأخذها قبل ما تتزوجه
دخل عليها أبوها : هاه خلصتي
العنود وهي تبلع غصتها : أيه يبه
أبو أصايل : امشي معي أجل
نزلت ورى أبوها ودخلت للمجلس وهي حاسه أنها ضايعه كانت تمشي مثل العمياء وموب قادره تشوف شي قدامها
دخلت للمجلس والدموع مجتمعه في عيونها حتى ما قدرت ترفع راسها أو تشوف وجه نايف جلست وعيونها في الارض
نايف : ماشاء الله تبارك الله
العنود سمعت صوته كان خشن مره وعالي فرق بينه وبين بدر اللي صوته هادي حست أنها بتدوخ وقامت بسرعه وطلعت وعلى طول راحت لغرفتها وقفلت على عمرها
حدد أبو أصايل ملكة العنود بعد وخلاها بعد شهر والعنود بغت تموت يوم سمعت الخبروصارت كل يوم تدعي أن الله يريحها ويفكها من هالمصيبه

مر الاسبوعين وساره نفستها تعبانه كانت فاقده سلطان والاختبارات في الجامعه مسببه لها أزمه وحالتها حاله حتى وزنها نقص ووجهها شحب كل من سألها تعذرت بالامتحانات وأمها أتصلت عليها وخلتها تجي تجلس عندهم لين ما يجي سلطان
رجع سلطان يوم الاربعاء وأول ما وصل للبيت سأل عن ساره
فاطمه : ساره عند أهلها ما كان ودها تروح بس أمها ما خلتها تجلس لحالها
سلطان : طيب خلاص أنا بأروح أنام لي كم يوم مانمت زين
فاطمه : لا تنسى بكره عزيمة منى
سلطان : ذكرتيني
فاطمه : ترى كلهم بيمشون من الفجر
سلطان : خلاص موب مشكله
فاطمه : تبي شي قبل لا تنام
سلطان : لا ما ابي شي
فاطمه : تصبح على خير
سلطان : وأنتي من أهله
راح لسلطان لغرفته وأول ما ددخل شم ريحة عطر ساره جلس على الكنب اللي تنام عليها وتمدد طلع جواله واتصل عليها
وجوالها مقفل اتصل أكثر من مره وبعد مقفل آخر شي أرسل لها رساله وقفل جواله ونام
ساره كانت جالسه مع خواتها
وفاء : نحفتي ياسويره
ساره : خلاص الامتحانات النهائيه ما بقي عليها شي اسبوعين وتبدى
هند : ربي شاق بك , لو أنا منك فصلت وفتحت مشغل وارتحت
ساره : لا والله
هند : أي والله هذي خالتك ماشاء الله صار عنده محل ذهب بعد
ساره : الله يرزقها
نجوى : وين جوالي
هند : من ساعه عيالك يلعبون فيه
نجوى : دقوا علي أشوف وينه
ساره طلعت جواله ولقته مقفل : غريبه وش اللي قفل جوالي
سوسن : أيه ترى من ساعه وكل شوي يقول البطاريه ضعيفه تقلينه قفل من نفسه
ساره : بأروح أحطه في الشاحن
حطت ساره جوالها في الشاحن وأول ما فتحته لقت رساله من سلطان وكان كاتب
مساء الخير ...
اتصلت أكثر من مره وجوالك مقفل . عالعموم بأمر عليك بكره بعد صلاة الظهر علشان نروح للمزرعه جهزي أغراضك يمكن ننام فيها ..

ساره انقهرت لأنها ما كلمته بغت تكسر جوالها من القهر كانت مشتاقه له وتبي تسمع صوته على الاقل ومن قهرها وحزنها قامت تصيح

بعد الظهر كانت ساره جاهزه جاء سلطان وركبت معه
ساره : السلام عليكم
سلطان : وعليكم السلام
ساره : الحمدلله على السلامه
سلطان : الله يسلمك
ساره : متى وصلت
سلطان : أمس في الليل
ساره سكتت وهو سكت وطول الخط وهي تناظره بطرف عينها و ودها تسأله وش سوا في شغله
سلطان حس أن الهدوء خانقه وده يتكلم ووده يسولف بس يخاف تسكته
وصلوا للمزرعه ونزلت ساره وراحت لقسم الحريم وسلمت عليهم وجلست معهم وحست أنها طفشانه ومتضايقه اليوم مر سنه على وفاة جدتها وحزنها تجدد يوم ذكرتها ما تدري ليش . يمكن لأنها محتاجة لها في هالفتره بالذات كانت همومها توازي الجبال علاقتها مع سلطان من جهه وذكرى أمها ساره من جهه ثانيه
خلصوا من الغداء وصلوا العصر والحريم سوالف وقهوه وشاهي
أم فيصل : وش فيك نحفتي يا ساره عساك حامل
جواهر : أي مره حتى وجهها شاحب
أم سلطان : يا ليت الله يسمع منكم ويفكهم ربي من عنادهم
ساره شوي وتصيح : لا بس الامتحانات ذابحتنا هالايام
ريم : أي والله كرف يجيب أجل الواحد
العنود كانت ماسكه زاويه ونفسها في طرف خشمها والبنات ملاحظين وساكتين
أم أصايل : ترى حددنا ملكة العنود
البنات انصدموا وقاموا يناظرون بعض
أم فيصل : ماشاء الله متى
أم أصايل : الخميس
أصايل : لحظه يمه أي خميس خبري بها بعد اسبوعين
أم أصايل : أيه موب الخميس الجاي اللي بعده
أصايل : أشوى خوفتيني
أم أصايل : ليش وش فيك
أصايل : الخميس الجاي عند حمولتي عزيمه بدر ولدنا بيرجع الاربعاء
صدمه عذاب ألم قهر كل شي حسته العنود يوم سمعت الخبر حست الغرفه تلف فيها والدنيا سوداء حتى الاصوات اختفت
ساره كانت جالسه جنب العنود مسكت يدها بقوه وسحبتها : العنود تعالي معي برى ودي أمشي شوي مليت من الجلسه
العنود طلعت مع ساره وهي مثل المسبهه وطلعوا يتمشون في المزرعه وابعدوا عن البيت جلسوا على الكراسي والعنود ساكته
ساره : العنود صيحي يا قلبي صرخي سوي اللي تبين بس لا تكتمين شي
العنود على طول نزلت دموعها وطاحت في حضن ساره وجلسوا يصيحون مع بعض مر الوقت وهم غرقانين في أحزانهم
جت منى تدورهم : يوه وأخيراً لقيتكم وشافتهم يصيحون وهي أساساً دموعها في طرف عينها ونزلت دموعها على طول
ساره : خلاص اذكروا الله وتعوذوا من أبليس لا الصياح ينفع ولا الدموع تفيد
العنود : وش هالحظ اللي عندي قبل ملكتي بأسبوع يجي ليش ؟ والله ما أتحمل هالعذاب
منى : اذكري ربك وتعوذي من الشيطان كلنا ما نتحمل العذاب بس هذا حنا نتصبر
ساره : أي والله
العنود : ليتني اموت وارتاح
منى : ما يجوز هالكلام يا العنود استغفري ربك
العنود : استغفر الله العظيم
منى : خلاص اللي صار صار مانقدر نعترض على حكمة رب العالمين
ساره : صادقه يا منى ودموعنا ما تفيد بشي لوهي تفيد كان قعدت اصيح طول عمري
منى : وشلونك أنتي وسلطان
ساره : من جرف لدحديره
منى : آفا وأنا أقول يمكن استهديتوا
ساره : إلى الان الاوضاع تسؤ زياده
العنود : يارب فرج لنا كلنا
منى وساره آمين
ريم وهيفاء : وأخيراً لقيناكم
ريم : تعبنا وحنا ندوركم
منى : كان اتصلتوا
هيفاء : ما فيه إرسال
ريم : وش فيكم ليش عيونكم حمر العنود عنده عذرها أنتوا اثنتين وش دخلكم
ساره : مشاركه وجدانيه
هيفاء بإستهبال : أبي أشارك معكم كم القطه
ريم : يا ثقل دمك
هيفاء : تكفين موب جاي اثقل من دمك
منى : وش يبون ذا البزران
ريم : العنود هونيها وتهون ترى ما تضيق الا عند الفرج ما تدرين يمكن بكره تحبين نايف أكثر من نفسك
العنود : وع من زينه
هيفاء : شفتيه ؟ وشلون شكله ؟
العنود : ما شفته من دخلت وأنا منعميه سمعت صوته وحامت كبدي
منى : وش فيه صوته
العنود : يروع خشن وكريه يصم الاذن
ريم : هذا الله يسلمك علاجه سكر نبات خذي كسره منه وخليه يمصها وحده بوحده ما مثلها
البنات : هههههههههههههه تستهبلين
ريم : لا والله جاده من حملت وأنا صايره أقرا في كتب الاعشاب
ساره : اقري كتب الجامعه ابرك , تخيلوا امس بغت تسبب لي اعوجاج في العامود الفقري من كثر ما رجفتني تبيني أغششها في الامتحان
ريم : عاد فاد فيك سافهتني ولا عطتني وجه
ساره : شا يفتني خبله أبيع ديني علشان إختبار عسى عمرنا ما نننجح
هيفاء : أي والله صادقه
ريم : يلا بس امشوا خلونا ندخل ترى متت من البرد
منى : الله يرحمك الفاتحه على روحك
ريم : عمى إن شاء الله في اللي يكرهوني
هيفاء : امشوا بس ترى تأخرنا

في الليل البنات اجتمعوا علشان ينامون مع بعض والشباب مع بعض لأن مزرعة أبو سلطان صغيره شوي
البنات كلهم ناموا لأنهم جايين من الفجر ساره ما جاها النوم وخذت جلالها ونزلت للمطبخ تشرب مويه
دخلت للمطبخ وما ولعت الانوار لأن الشباك مفتوح وفيه إضاءه خفيفه داخله مع الشباك شربت مويه وجت تطلع وسمعت صوت وحطت الجلال ورجعت داخل
دخل سلطان للمطبخ وشافها واقفه ومتغطيه ورجع
ساره : سلطان
سلطان سمعها ودخل وساره رفعت الجلال عن وجهها
سلطان فتح النور وشافها واستغرب منها لأنها ناحفه ووجهها أصفر
ساره : تبي شي ؟
سلطان : لا كنت في الصاله وسمعت الصوت قلت أجي أشوف
ساره : نزلت أشرب مويه
سلطان : ليش ما نمتي ؟
ساره كانت حاسه بعذاب ودها تصيح وتقول أنا أحبك بس خايفه من ردت فعله خايفه يتركها لأنه إلى الان يحب وحده غيرها
ساره بغصه : ألحين بأروح أنام مرت من جنبه ومسك يدها
ساره ما رفعت راسها وقفت وهي ساكته
سلطان : إذا ما فيك النوم تعالي نتمشى برى
ساره ما صدقت ووافقت : طيب
طلعت معه وقاموا يتمشون وهم ساكتين وصلوا لأخر المزرعه
سلطان : تعبتي ؟
ساره : شوي
سلطان : تعالي نجلس
كان فيه كرسي واحد كبير جلس سلطان وجلست ساره بعيده عنه شوي
سلطان : وش فيك شكلك تعبانه فيه شي يعورك ؟
ساره : لا بس أنا إذا جت الامتحانات أتعب شوي
سلطان : الصحه أهم من الدراسه
ساره : غصب علي مو بكيفي
سلطان : فيه شي مضايقك صح
ساره غيرت السالفه : وش سويت في جده
سلطان حس أنها مهتمه وما نسته وانبسط : أبشرك رجعت بالصك لأبوي
ساره بفرح : من جدك ؟
سلطان : أي والله
ساره : مبروك
سلطان : الله يبارك فيك
ساره : طول الاسبوع وأنا أفكر وأقول عساك ترجع بالصك
سلطان : لو أنك متصله كان قلت لك
ساره سكتت وما ردت
سلطان : ليش ياساره خربتي صداقتنا كنا عايشين ومبسوطين
ساره رفعت راسها كانت تتمنى أن فيه أنوار علشان تشوف وجهه زين : كنت مبسوط
سلطان : أيه كنت أسولف إذا طفشت اتكلم ألقى أحد يسمعني وحتى الاكشنات اللي نسويها على أهلي كانت ضابطه
ساره فرحت لأنه قال مبسوط : بس كنا نتهاوش ألحين لنا شهر ما تهاوشنا إنجاز صح
سلطان : هههههههههههه بس والله ملل
ساره : صح ملل
سلطان : خلينا نرجع مثل أول ووعد مني أن هوشاتنا تكون مرتين بالشهر بس
ساره : هههههههههههههههههه شويه
سلطان : كم تبين ؟
ساره : كل اسبوع مره
سلطان : من جدك ؟
ساره : لا أمزح
سلطان : خلاص اتفقنا
ساره : اتفقنا
سلطان : بما أننا اتفقنا وصرنا أصدقاء ممكن تقولين وش اللي مضايقك
ساره يالله ياسلطان ما صدقتنا لهالدرجه أنا مفضوحه : مافيني شي قلت لك شوي ارهاق على تعب إمتحانات
سلطان : هالكلام موب علي
ساره بدت ترتجف ما تدري من البرد والا من الخوف أنه يضغط عليها ويخليها تتكلم
تكلمت وأسنانها تصتك : سلطان ما فيني شي صدقني
سلطان : وش فيك بردانه
ساره : شوي
سلطان فسخ الجاكيت اللي عليه وقرب جنبها وحطه عليها
ساره : لا وأنت
سلطان : لا أنا لابس كم قطعه لاتخافين
ساره حست بالدفا والراحه لأنها قريبه من سلطان على أن الظلام مغطي المكان والجو بارد بس كانت مرتاحه شدت الجاكيت عليها كانت تشم ريحة عطره في الجاكيت وهالشي حسسها انها قريبه منه سلطان كان قريب منها مد يده وحطها على كتفها وهي حست أن هاللحظه ما راح تتكرر وقربت منه
سلطان بصوت هادي : ما ودك تتكلمين وتقولين وش فيك
ساره حست أن دفعاتها تنهار وأنها لو تكلمت يمكن ماعاد تشوفه مره ثانيه حاولت تتماسك وتدور لها عذر وآخرشي تكلمت : اليوم مر سنه على وفاة أمي ساره ونزلت دموعها
سلطان : الله يرحمها ويغفر لها ادعي لها بالرحمه
ساره : أحس أني مشتاقة لها ودي اسولف معها محتاجتها ابيها تسمعني
سلطان حس أنها ضعيفه وضايعه : الله يجمعك بها في الجنه قولي آمين . بعدين أنا وين رحت ؟ أنا موجود قولي اللي في خاطرك أنا مستعد اسمعك
ساره تأثرت من كلامه و انفجرت بالصياح
ضمها لصدره وهي على طول دفنت راسها في رقبته وجلست تصيح كانت فرحانه ومتضايقه في نفس الوقت ماقدرت تحدد شعورها ولا قدرت توصفه كل اللي تحسه فيه هو الامان
سلطان مايدري وش صارله كان يتمنى هاللحظه تدوم وما تنتهي حس براحه وهي في حضنه حتى الكلام ما قدر يتكلم ولا ينطق مسح شعرها بخده وشم ريحة المسك في شعرها غمض عيونه وهو يدعي أن الله يريح باله لأنه ما كان عارف وش اللي قاعد يصير معه
تحركت ساره وسلطان ماكان وده يتركها بس ما حب يضايقها وبعد يدينه عنها
ساره ارتبكت واستحت مسحت دموعها تنحنحت شوي علشان تجلي حنجرتها : آسفه ما كان قصدي اضيق صدرك وانكد عليك
سلطان حس أنها مستحيه وحس انه متهور لأنه ضمها : لا عادي موب حنا أصدقاء إذا ما خففت عنك ألحين متى أخفف عنك هذا أنتي وريم تسمعون لبعض وأنا ومتعب ترى مافيها الشي
ساره الله يخسف بالصداقه اللي مثل هذي : معك حق
سلطان : خلينا نمشي تأخر الوقت
ساره : خليتك تجلس في البرد وجاكيتك علي وجت تسحبه ومنعها سلطان
سلطان : خليه عليك لا تمرضين
مشوا وهم ساكتين وكل واحد سرحان مع أفكاره
دخلوا للبيت ووقفوا في الصاله ساره عطته الجاكيت : مشكور
سلطان : أنا في الخدمه
ساره : تصبح على خير ووقفت وهي ما ودها تتركه آخر شي جرت عمرها بالغصب ودخلت للغرفه
سلطان وقف شوي وهو يناظر الباب بعدين راح للغرفه الثانيه


يتبع ..........