الجزء الثاني والاربعون

كانت واقفه قباله وحاسه ببراكين تتفجر داخلها ودها تصرخ وتكسر كل شي قدامها النار شابه في قلبها وهي ميب قادره تطفيها
وهو كان معصب في داخله لعن نفسه ولعن الساعه اللي صور فيها مع فيونا وكان وده يقوم ويشق هالصور والا يحرقها ويرتاح بس ما يدري وش اللي منعه وخلاه يوقف في وجه ساره ويتكلم بهالبرود كان كاره نفسه وكاره هاللحظه وهالموقف
ساره تمنت أن فيونا واقفه قدامها علشان تذبحها وبرود سلطان رفع ضغطها أكثر شدت على يدينها بقوه علشان ما تفضح نفسها وعطته ظهرها وطلعت من المكتب
مشى سلطان وراها وقبل لا تطلع الدرج تكلم ببرود يرفع الضغط : ما قلتي لي وش الحل في نظرك
ساره كان في بالها أمنيه وحده أنها تفسخ الشبشب وترميه عليه ومسكت نفسها بالقوه وتعوذت من أبليس والتفتت عليه وشافته متسند على الجدار ومكتف يديه ببرود
ساره وهي تتصنع الهدوء : لا تخاف بأفكر وإذا رسيت على حل يعجبني بأعطيك خبر وطلعت للغرفه بسرعه
سلطان كان في داخله نيران شابه وضغطه واصل ألف من القهر ورد ساره عليه خلاه يشوت الجدار من القهر وحس بألم فظيع بأصبع رجله وراح وهو يعرج وجلس في الصاله وهو مقهور من كل شي حوله وخصوصاً ساره وردها اللي يقهر
جلس شوي وهو يحس بألم في أصبعه دخلت عليه فاطمه
فاطمه : كني سمعت أصواتكم عاليه عسى مو متهاوشين
سلطان والله موب وقتها : لا بس ساره عندها بكره إمتحان ومابعد ذاكرت وقعدت استهبل عليها شوي وعصبت
فاطمه : طيب وش فيك عاقد وجهك
سلطان : جيت اطلع مع الدرج وطقت رجلي بالغلط في وحده من الدرجات واصبعي يعورني
فاطمه : طيب رح للمستشفى أخاف انكسر اصبعك
سلطان : بعد وأنا ناقص كسور
فاطمه بإستغراب : وش فيك
سلطان : أنا أدري عنك تتفاولين علي بالكسر والعيد ما بقي عليه الا اسبوعين
فاطمه : أنا أقول يمكن
سلطان : أقول روحي جيبي لي مرهم أدهن به أصبعي علشان يخف, روحي لغرفتي وقولي لساره تعطيك من الصيدليه اللي في الحمام المرهم حق الرضوض ومسكن
فاطمه : طيب ابشر
طلعت فاطمه وطقت على ساره الباب وساره على طول سحبت الكتاب وهي تقول : تعالي فاطمه
فاطمه فتحت الباب : وش دراك أنه أنا
ساره : سلطان يفتح الباب على طول والخدامات ما قد طقوا علي الباب ما فيه أحد غيرك
فاطمه : يقول سلطان عندك إختبار بكره
ساره شمت ريحة اللقافه في سؤال فاطمه : أي عندي بكره إختبار
فاطمه : أيه سلطان تحت يقول أنه قاعد يستهبل عليك
ساره : يا حبي له طنشته اليوم وقعد يستهبل عاد المسكين عصبت عليه, ما خلاني ادرس
فاطمه : المهم عطيني المرهم حق الرضوض والمسكن
ساره : سلامات وش فيك؟
فاطمه : ما فيني شي بس سلطان يبيهم
ساره بخوف : وش فيه ؟
فاطمه : أنتي اللي وش فيك مرتاعه يقول جاء بيطلع الدرج وخبط وحده من الدرجات وأصبعه يعوره
ساره كان ودها تنزل بسرعه تشوف سلطان بس هونت ماتبي تبين أنها مهتمه , وراحت للحمام واحتارت ماتدري اي مرهم يبي
وخذت المسكن وطلعت لفاطمه
ساره : أي مرهم يبي الاصفر والا الابيض؟
فاطمه : مدري والله دقي اسأليه تكفين
ساره وقفت وما تدري وش تقول وفاطمه تناظرها بشك وآخر شي خذت جوالها ودقت على سلطان
سلطان شاف رقم ساره وعلى طول رد
سلطان : آلو
ساره : هلا سلطان سلامات ؟
سلطان : الله يسلمك بس رجلي تعورني مره يمكن مكسوره
ساره : فاطمه تقول اصبعك بس, و حتى لو هي رجلك عادي صار عند خبره الحين
سلطان الشرهه على اللي يتشكى عليك : يعني جايبه شي جديد
ساره : فاطمه عندي وتقول أنك تبي المرهم أي واحد تبي الاصفر والا الابيض؟
سلطان : الاصفر احسن
ساره : طيب خلاص تبي شي ثاني بعد ؟
سلطان وده يقول انزلي تحت بعدين سكت لأنه عارف أنها بتفشله : لا شكراً ما أبي شي بس ياليت تكونين مرنه شوي وأنتي تكلميني علشان فاطمه بس موب علشاني
ساره وهي ماسكه أعصابها : تأمر أمر حبيبي
سلطان حس انها معصبه وحب يقهرها زياده : لا تبالغين عاد
ساره على طول صكت الجوال بدون ما ترد
سلطان : وجع ما عندها وقت؟
أما ساره كانت واصله حدها بس ماسكه نفسها بالقوه
فاطمه : وش فيكم؟
ساره وهي تحاول تبتسم : ولا شي بس أخوك يتميلح يبي يشغلني عن دراستي
فاطمه : هههههههه كل الرجاجيل كذا إذا الواحد شاف حرمته مشغوله تطلع مواهبه الكوميديه
ساره : أيه والله المهم روحي نزلي له المرهم لا يعصب علينا
فاطمه : ما ودك تنزلين تشوفينه؟
ساره : بعد شوي بأنزل , بس لا تخافين تراه خواف
فاطمه : من الخواف ؟ سلطان!! لا بالعكس سلطان عزمه قوي وصبور
ساره : تجيه حالات يحب يتدلع فيها
فاطمه : أنا بأنزل أعطيه المرهم
ساره : خلاص طيب
نزلت فاطمه وساره طلعت من الغرفه وراحت تطل مع الدرابزين تبي تشوف سلطان وتطمن عليه وما تبيه يشوفها وقفت عند أول الدرج وما قدرت تشوفه بس سمعت صوته وهو يسولف مع فاطمه
سلطان : ساره تدرس؟
فاطمه : إيه تقول شوي وتنزل
سلطان : إذا نزلت الله يحييها
فاطمه : أصبعك منتفخ يمكنه مكسور , رح للمستشفى خلهم يسون لك إشاعه
سلطان : والله يعورني مره
فاطمه : خلاص بأتصل على سالم يجي يوديك
سلطان تبيني أروح وساره بتنزل لا والله : لا ما يحتاج بأدهنه ألحين ووبأشوف وش يصير
فاطمه : لا تعاند يا سلطان
سلطان : خلاص عاد لا تعورين راسي تكفين, إذا ما خف بكره بأروح للمستشفى
فاطمه : على راحتك قبلك عنيد
سلطان : بأدهن رجلي و بأجلس في المكتب إذا خلص سحوركم علميني
فاطمه : وين بدري على السحور يمديك تنام
سلطان : لا عندي شغل واجد و أبي اخلصه
فاطمه : خلاص على راحتك , أنا بأروح أشوف سالم إذا بغيت شي اتصل علي
سلطان : طيب خلاص
راحت فاطمه لبيتها وساره رجعت للغرفه وهي مقهوره من سلطان لأنه ما راح للمستشفى وجلست تحاكي عمرها : يالله هالانسان عنيد بشكل يرفع الضغط
جلست ساره تفكر بحل لمشكلتهم وتعبت من التفكير وحطت راسها ونامت
سلطان جلس في المكتب وكل شوي يطلع للصاله وهو يعرج يبي يشوف ساره نزلت والا لا بعد ما تعب جلس في المكتب وهو متضايق من اللي صار ومن نفسه

********************
العنود راحت لغرفتها وقفلت على عمرها وهي تصيح تمنت أنها تموت وترتاح ما توقعت أن أبوها بيغصبها على الزواج في يوم من الايام
جلست طول الليل تدعي أن الله يخلصها من هالمشكله
جاء وقت السحور وجت أمها تطق عليها الباب
أم أصايل : العنود وأنا أمك قومي تسحري
العنود من بين دموعها : ما أبي شي يمه
أم أصايل : يمه ما يصلح تصومين على لحم بطنك
العنود : يمه تكفين خليني
أم أصايل : العنود أنتي وراك جامعه ودراسه أخاف تدوخين من التعب
العنود : ما أبي شي
أم أصايل : طيب أجيب لك شي تأكلينه
العنود : قلت لك ما أبي شي
أم أصايل : خلاص عى راحتك يمه
نزلت أم أصايل وجلست على السفره
أبو أصايل : وين العنود ؟
أم أصايل : تقول ما أبي شي , شكلها زعلانه
أبو أصايل : وش مزعلها ؟
أم أصايل : أكيد موضوع العرس
أبو أصايل : أيه خليها تزعل كم يوم ومصيرها ترضى
أم أصايل : أخاف نندم بعدين
أبو أصايل : لا إن شاء الله , نايف رجال متربي ومحترم وإن شاء الله بيسعدها
أم أصايل : ما ودي نغصبها على شي
أبو أصايل : هي عذرها الدراسه والدراسه مقدور عليها , أما أنها تقعد تدلع ما أبي فمعصي مهوب على كيفها البنت بتعنس وحنا نشوف
أم أصايل : الله يكتب اللي فيه الخير

***********************
في بيت سلطان
جت فاطمه وخلت الطباخه تجهز السحور وراحت تنادي ساره وسلطان دخلت على سلطان ولقته حاط راسه على طاولة المكتب
فاطمه : سلطان
سلطان رفع راسه ومبين عليه التعب : نعم
فاطمه : يلا قم علشان تتسحر
سلطان : طيب , ناديتي ساره
فاطمه : بأروح أناديها
سلطان : تسحرتي أنتي ؟
فاطمه : أيه تسحرتمع سالم
سلطان : خلاص روحي نادي ساره

فاطمه راحت لساره ولقتها نايمه على الكنب والكتاب طايح جنبها وقومتها
ساره جلست وهي تناظر السرير : وين سلطان ؟
فاطمه : تحت بس شكله تعبان الظاهر ما قدر يطلع الدرج
ساره : خلاص بأغسل وجهي وأنزل

نزلت فاطمه وناداها سلطان : هاه ساره بتنزل
فاطمه : أيه المسكينه لقيتها نايمه على الكتاب وأول ما قامت سألت عنك
سلطان : تسأل عنها العافيه
دخلت ساره : السلام عليكم
سلطان وفاطمه : وعليكم السلام
ساره : فاطمه اجلسي ليش واقفه
فاطمه : لا أناسبقتكم بالسحور
ساره : تسحري مره ثانيه
فاطمه : لا بالعافيه أنا بأروح أجلس في الصاله إذا بغيتوا شي نادوني
طلعت فاطمه وساره وسلطان سكتوا وبدوا يأكلون
ساره : رفعت راسها ولقت سلطان يناظرها وسلطان على طول نزل عيونه للصحن
ساره : ترى إذا طلعت من الجامعه بأروح لبيت اهلي
سلطان رفع راسه بسرعه : ليش ؟
ساره : ودي أكمل رمضان عندهم
سلطان مايدري ليه ضاق صدره : يعني ما راح ترجعين
ساره : والله أنا وعدتك أجلس معك سنه كامله وما عندي نيه أخلف وعدي بس إذا أنت ما تبيني أرجع فهذا شي ثاني
سلطان : لا ابيك ترجعين
ساره ناظرته وكأنها تقول تستهبل
سلطان حس أنها ما صدقته : و أنا بعد ما ودي أخلف الوعد اللي خذناه على أنفسنا
ساره : أيه الوعد
سلطان: وش قصدك ؟
ساره : ولا شي
سلطان : وإذا سألوا أهلي عنك ؟
ساره : قل خواتها مجتمعين وتبي تصوم معهم هالاسبوع والا سبوع الثاني بنلقى لهم عذر ثاني
سلطان : بس لو سمحتي إذا جاء العيد أبيك تعيدين معنا
ساره : يصير خير
***************************
الظهر طلعت ساره وراحت لبيت أهلها وسلمت على أمها
أم عبدالله شافت ساره جايه ومعها شنطتها
أم عبدالله : ساره عسى مو متهاوشه مع سلطان
ساره : يوه يمه كذا تستقبلين بنتك؟
أم عبدالله : سويره تكلمي متهاوشه مع سلطان
ساره ومتى صلحنا أصلا : لا يمه لا تفاولين علي
أم عبدالله : أجل وش عندك جايه
ساره : جايه بأصوم عندكم كم يوم
أم عبدالله : لا يا شيخه وش المناسبه
ساره : يمه بيتي هادي ما فيه الا أنا وسلطان وطفش مافيه وناسه وصرقعه صراحه ما حسيت برمضان عاد قلت لسلطان ودي أروح أصوم في بيتنا مع أهلي وأخواني ووافق
أم عبدالله : سويره لا تكذبين علي
ساره عارفه أن أمها ما راح تصدقها وطلعت جوالها وهي متضايقه واتصلت على سلطان
سلطان كان مشغول وعنده موظفين في المكتب ورجله تعوره وحالته حاله رن جواله وناظره وهو متضايق شاف رقم ساره ورد بسرعه
سلطان : آلو
ساره : هلا سلطان
سلطان : لحظه شوي والتفت على الموظفين اللي عنده : خلاص كل واحد يتفضل على مكتبه نكمل الشغل بعدين
تكلم السكرتير : طال عمرك اتصلت على المستشفى وموعدك الساعه 9.30 بعد التراويح مثل ما طلبت
سلطان : الله يعطيك العافيه
السكرتير : تأمر على شي طال عمرك
سلطان : لا مشكور
ساره كانت على الخط وسمعت سالفة المستشفى وخافت على سلطان
سلطان : هلا ساره
ساره : مشغول ؟
سلطان : لا
ساره : هذي أمي على بالها متهاوشين وما صدقتني يوم قلت لها أن ما فينا شي تكفى كلمها
سلطان أنقهر من برودها : ليش وحنا مو متهاوشين
ساره انصدمت من رده : نعم !!
سلطان : المهم عطيني خالتي اكلمها
ساره بخوف : لا هونت
سلطان ضحك غصب عنه : ههههههه ليش خفتي أمزح
ساره بعد ضحكت على ضحكته لأنها حست انها طالعه من قلب : هههههه خوفتني يقطع أبليسك
سلطان : خوافه
ساره : سخيف
سلطان حس نفسه مبسوط : كيفك ؟
ساره تحاكي نفسها أنتي يالمخفه اركدي شوي ما صدقتي عطاك وجه : أقول هذي أمي خذ كلمها
سلطان يالله وش فيها قلبت
كلم سلطان أم عبدالله وجلس يسولف معها وطمنها أن ما بينهم شي

مرت ثلاثة أيام وساره في بيت أهلها
والعنود تعبت من الصياح وحاولت تتكلم مع أهلها وما سمعوها تكلمت مع أصايل وترجتها تقنع اهلها بس أبوها منشف راسه ومصمم على رايه واخر شي وكلت أمرها لله

**************************
طفش سلطان من قعدته في البيت لحاله وراح يقعد في بيت أهله ويكمل صيامه عندهم
دخلت ريم الصاله في بيت أهلها وسلمت على أمها وعلى سلطان اللي كان جالس يقرى الجرايد
ريم : كيفكم ؟
أم سلطان : بخير الحمدلله
ريم : وش أخبارك سلطان ؟
سلطان : بخير الحمدلله أنتي كيفك . الا متى تولدين
ريم : توني باقي أربع شهور ونص
سلطان : أيه الله يرزقك الذريه الصالحه
ريم : عقبالك
أم سلطان : يلا عاد أنت وساره ما نبي تدور السنه الا وساره حامل والا عندكم بزر
سلطان سوا نفسه يقرى الجريده : يصير خير
ريم : الا أشوف سويره جاحدتك
أم سلطان : أيه سلطان يقول خواتها مجتمعين وودها تصوم معهم
ريم : والله حرمته مهويه بقوه لعبت في نفسها لعب اليوم كلنا انصدمنا بشكلها
أم سلطان : ليش ؟
ريم : الخبله حايسه عمرها. أمس صبغت شعرها وقصته وجايه اليوم بلوك جديد
أم سلطان : وش صبغته ؟
ريم : يوه طلع شعرها فاتح أرضية شعرها بني فاتح والخصل ذهبيه وقصته لين كتفها لا ومكملتها لابسه عدسات خضر صايره بنت روما على قولها
أم سلطان : هاو ميب صاحيه خربت عمرها
ريم : على أنها مغامره بقوه إلا أن شكلها يجنن
أم سلطان : وش يجنن يازين شعرها الاسود يهبل الصبغات ماوراها الا دمار الشعر
ريم : الله يهديك يمه هذا وأنتي راعية مشاغل تقولين هالكلام
أم سلطان : علشاني راعية مشاغل فأنا أبخص منكم
ريم : إذا شفتيها بيعجبك شكلها , حمستني والله بس إن شاء الله إذا ولدت صبغت شعري مثلها
سلطان كان يسمع سوالف ريم عن ساره وتحمس يشوفها باللوك الجديد
ريم : ما شفتها يا سلطان
سلطان سوى نفسه ما سمع : الا وش أخبار فيصل؟ من زمان عنه
ريم : وش نسوي فيك أنت قاطع ما تنشاف ومن دخل رمضان وأبوي سعود ما عاد جمعنا مثل أول عنده وماعاد صرنا نشوف بعض
سلطان وهو يفكر جبتيها ياريم وشلون راح عن بالي أبوي سعود مالي إلا هو
نزل أبو سلطان وسلمت عليه ريم وجلسوا يسولفون
أبو سلطان : وين فهد وناصر الحين بيأذن المغرب
سلطان : ناصر بيفطر عند طارق وفهد بيفطر في بيت أبوي سعود
ريم : لا ناصر وطارق معزومين عند خالد , اليوم ساره تقول تعالي أفطري عندنا مع ناصر
سلطان في نفسه يا حظكم لاقين من يعزمكم
أبوسلطان : وحرمتك مطوله عند أهلها ؟
سلطان : لا هالاسبوع وبترجع إن شاء الله
أبو سلطان : عسى مو متهاوشين بس
سلطان : لا ليش نتهاوش
ريم : تطمن يبه هو وسويره سمن على عسل أخبارهم كلها عندي
سلطان يناظر ريم وهو يفكر والله ياريم ما عندك ما عند جدتي
ريم الا على فكره وش فيه اصبعك ؟ توني أشوفه
سلطان : مكسور
ريم: وشو منه؟
سلطان : جيت أطلع مع الدرج وخبطت وحده من الدرجات بالغلط
أم سلطان : والله من الرجه
ريم : ما قالت لي ساره
سلطان بلاها ما تدري : ما تسوى كسر بسيط
أبو سلطان : أنتبه لنفسك وأنتي يا أم سلطان أنتبهي لأكل ولدك المكسور يبي له عنايه
أم سلطان : ترى كلها أصبع لا تكبر السالفه
أبو سلطان : الكسر كسر في الساق والا في الاصبع
سلطان يكلم نفسه يوم ساره ضلوعي متكسره ورجلي ومن عنايتها فيني جبرت بشهر وهذا أصبع بس وشكله مطول

************************

في بيت أبو عبدالله
نجوى : وش عندك ياسويره قاعده في بيت أهلي ؟
ساره : يا أختي احترميني وقولي اسمي زين ترى صرت مدام ألحين
هند : يلا يا مدام جاوبي طيب
ساره : ما عندي شي
نجوى : متهاوشه مع سلطان؟
ساره : ليش تفاولين علي
هند : أجل ليش قاعده هنا
سوسن : وش دخلكم وحده تبي توسع صدرها عند أهلها
هند : أنتي انطمي بس إذا انخرب بيت أختك ما أنتي نافعتها
ساره من قال أنه زين علشان يخرب : المهم خلونا نروح السوق اليوم
نجوى : ليش ما خلصتي ملابس العيد لين الحين
ساره : لا خلصتها بس ودي أشتري عيديات
سوسن : لمين ؟
ساره : خالي وخالتي وجدنا سعود وسلطان وأكيد لأمي وأبوي
هند : والله وتطورتي وصرتي تعيدين العالم من قدك حرم سلطان ولد عبدالعزيز
ساره : لا تطورت ولا شي بس اليوم ريم قالت لي أن عندهم عاده كل واحد يهدي أمه والا أبوه هديه يوم العيد وقدام الجميع وسألتني وش بأهدي خالي وخالتي عاد قلت مدري
هند : عاد قدام العالم وش ذا الطبع الشين يمكن الهديه موب ذاك الزود
ساره : وش أسوي يعني تبيني أشذ عنهم
نجوى : طيب بس خالك وخالتك وسلطان والباقيين ما تعطينهم فشله
ساره : مدري عن طبعهم المشكله أني أهديهم قدام الباقيين
سوسن : وش رايك تهدينهم كلهم
ساره : مشوار وش كثرهم ماشاء الله
هند : أعرف محل هدايا حلو يسوي لك علب مثل بعض وأنتي تعبينها براحتك ويسوي خصم على الكميات الكبيره سوي عنده الهدايا وخليها لهم كلهم وارتاحي
ساره على أنها زعلانه على سلطان إلا ان ودها تهديه هديه متميزه
ساره : طيب ودي أشتري لسلطان هديه غير عنهم
خوات ساره : أحلى يا حركات
ساره : ياشين البزران
نجوى : سويره تحبينه
ساره انحرجت : كلي تبن
هند : أكيد تحبه موب زوجها
سوسن : بالله سويره تحبينه
ساره : أيه أحبه عندك مانع
سوسن : كذااااااااابه
ساره : وشو اللي كذابه هي يا أم الشباب تراه زوجي
سوسن : وع وش تحبين فيه يروع هالمغرور والله طحتي من عيني
ساره : أنتي جاده والا تستهبلين
سوسن بغباء : لا جاده, سويره بالله سلطان وش فيه شي ينحب غير فلوسه وسفراته
ساره : يا مال الضربه اللي تضربك تراه رجلي يالكلبه لا تحشين فيه
هند : خبله تفكيرها تفكير مراهقات ما تفكر الا في فلوسه وسفراته
سوسن : لا والله بس مدري أحس ما فيه أحد يحبه وأنا بصراحه ما أحبه
ساره بعصبيه : وهو عاد يموت فيك
نجوى : سويره اسفهيها ذا البزر تحطين عقلك في عقلها
ساره : بالله لو هالكلام على صلاح بترضين
هند : يوه سوير ه خذتها الحميه وش بيسكتها الحين , خلاص يا أمي ترانا نمزح لا يطق فيك عرق
ساره : امزحوا بس لا تقربون من سلطان لو سمحتوا
نجوى : طيب خلاص ما راح نجيب طاريه بس وش تبين تهدينه؟
ساره : مدري
سوسن : عطر
هند : والا ساعه
ساره : لا ساعه بترو حموضتها وبينطلها والعطر بيخلص ودي بشي يبقى عنده ويذكره فيني
نجوى : وش رايك تهدينه عماره والا قطعة أرض
ساره : تطنزين؟
نجوى : أنا أدري عنك , تقولين أبي شي يبقى خلاص كل سنه عطيه هديه شكل وموب ناسيك
ساره آه يا نجوى أنا هالسنه وما أضمن إذا بنكملها والا لا
هند : إذا رحنا السوق بنلقى قدامنا كل شي

*************************************************

بعد صلاة التراويح في بيت أبو عبدالعزيز
كان فهد جالس مع هيفاء ونواف وجدهم سعود
نواف يناظر الساعه : يا أخوي ما مليت من صليت العصر وأنت ناشب لنا ترى ورانا أشغال ومشاوير
فهد : من ماسكك رح شف شغلك
نواف : وأخليك لحالك مع أختي
فهد : تراها حرمتي
نواف : حرمتك إذا راحت معك للبيت موب هنا
فهد : خلاص فهمت بس هذا أبوي سعود معنا يعني طس وأنت متطمن
نواف : لا يا شيخ بعد شوي بينام أبوي سعود وتقعد أنت وإياها لحالكم
فهد : بأكلها يعني
نواف : لا مو مسألة تأكلها بس الشيطان شاطر
هيفاء حمر وجهها واستحت
فهد : الشياطين مربطه يا أخوي لا تتعذر بهم
نواف : أيه بس أنت ما تربطت
فهد بعصبيه : يا أخي تراك أشغلتني في حياتي ضف وجهك شوي
دخل سلطان عليهم وسلم
سلطان : وش فيكم تتناقرون
نواف : أخوك ذا البثر ناشب لنا فيذا عجزت وأنا ألمح أبيه يطس وما نفع فيه طردته وبرضو ما فهم
سلطان : خلاص كلها كم أسبوع ويعرس وترتاح منه
فهد : لا وين كم أسبوع حنا أجلنا زواجنا
كلهم التفتوا عليه مستغربين
أبو عبدالعزيز بعصبيه : وشو ؟تبون تأجلون العرس وليش؟
فهد بخوف : اسأل هيفاء
هيفاء : يبه حنا اليوم قررنا وكنا ناوين نقولك بس نواف وبربرته ما خلانا نتكلم
أبو عبدالعزيز : وليش إن شاء الله
هيفاء : يبه وشلون تبيني أفرح ومنى بنت عمي لين ألحين في حزنها وما بعد خلصت العده
أبو عبدالعزيز سكت شوي بعدين تكلم : طيب توكم تذكرون بنت عمكم
فهد : حنا من زمان ناوين بس أنت تعرف ترتيبات العرس كل ما جينا نحدد يوم ثاني مالقينا شي يناسب ظروفنا حنا ناوين نأجله ونحطه في إجازة الربيع والا إجازة عيد الأضحى بس ما لقينا حجز في نفس القاعه مالقينا ألا في أول الصيف
أبوعبدالعزيز : لازم تعرسون في إجازه ؟ حطوه في حدى الايام العاديه
هيفاء : لا يبه ودراستي
أبوعبدالعزيز : من زين ذا الدراسه اللي تدرسينها دراسة بزران
(هيفاء تخصصها رياض أطفال)
هيفاء : يبه لا تستحقرني عاد
أبو عبدالعزيز : أهلنا ربونا بدون دراسه وهذاني قدامك رجال وأعرف المرجله وسلوم الرجاجيل
نواف : أموت الثقه يا شيخ
أبو عبدالعزيز : وش قلت ؟
نواف بخوف : أقول وأنت صادق يايبه
فهد : خلاص يبه وافقت على التأجيل
أبو عبدالعزيز : دامكم راضين ومتفقين انا ما عندي مانع
فهد : أنا مانيب راضي
ناظرته هيفاء بعصبيه وسكت
أبو سعود : ما أنت راضي ؟
فهد وهو يناظر هيفاء : لا أقول انا راضي
سلطان : وخلاص رسيتوا على الصيف
فهد : أييييييه يالدنيا وش نسوي بها
نواف بنذاله : يوه تو الصيف مخلص و تونا في أول الشتاء باقي الربيع ثم الصيف الله يعينكم
فهد : نصاب ما عندنا شي اسمه ربيع
نواف : الا فيه
فهد : يا أخي ليش أنت حقود ونذل كل كلها شهر ويدخل الصيف هون علي خلني أحس بقصر المده
نواف : ليش أكذب حبل الكذب قصير بكره يطول الشتاء ويجي الربيع بعدين تجي تلومني وتقول وش جابهم
سلطان : استغفرالله خلاص عاد بلا حركات بزران اعقلوا
هيفاء : أنا بأروح لمنى بنت عمي
فهد : بأوصلك
نواف : وصلني معها بعد
فهد : وش أبي فيك يا أخي ما أحبك
نواف : وأنا أحبك وش أسوي طيب
أبو عبدالعزيز : خلاص أنطموا كلكم واطلعوا كملوا صيحتكم برى
طلع فهد ونواف وهيفاء وجلس سلطان مع جده
أبو عبدالعزيز : وشلونك يا سلطان وشلون ساره
سلطان : بخير الحمدلله
أبو عبدالعزيز ما عاد تنشافون
سلطان : وش نسوي ماعاد جمعتنا عندك مثل أول
أبو عبدالعزيز : وش أسوي كل ما دقيت على أبوك والا حدى عمانك قال ما تصلح الجمعه في رمضان خلها بعد العيد
سلطان : وأنت تشاورهم أنت المفروض تامرهم أمر العشر بتدخل بعد بكره وبيجي العيد وحنا ما شفنا بعض
أبو عبدالعزيز : أي والله معك حق يلا أجل خلني أدق على أبو فيصل وأقوله بنجتمع عنده بكره
سلطان : ورى ما نجتمع عندك
أيو عبدالعزيز : دام منى في العده فكل جمعاتنا وعزايمنا حتى العيد بيصير عند عمك حرام البنيه ضايق صدرها لازم نخليها تستانس
سلطان : على راحتك يبه
اتصل أبو عبد العزيز على عياله وقال لهم عن الإجتماع في بيت أبو فيصل وسلطان كان مبسوط لأن الامور ماشيه مثل ما يبي
جاء ناصر وطارق وسلموا على جدهم وعلى سلطان وجلسوا معهم
أبو عبدالعزيز : ورى ما جيتوا اليوم تفطرون مع فهد
ناصر : يبه اليوم كنا معزومين على الفطور عند نسباء سلطان
سلطان : هاه كيف فطوركم اليوم
طارق : ماشاء الله فطورهم يهبل ما بقى شي ما حطوه وكله شغل بيت
أبو عبدالعزيز : الله يعافي ذا الخدامات اللي مالين البيوت
سلطان : لا يبه نسباي ما تطبخ لهم الخدامه
طارق : والله حريمهم سنعين ماشاء الله يا حظك ياسلطان هذي المره السنعه اللي تنوخذ بالله ما تخليني أجي أفطر عندك باقي هالشهر
سلطان : وش رايك تسكن عندي في البيت بعد
ناصر : وأنا معه
سلطان : ضفوا وجيهكم بس
طارق : أصلاً لو نحاكي حرمتك ونقول اطبخي لنا ميب قايله لا ماشاء الله عليها حبيبه يمدحونها الحريم
سلطان وده يكفخ طارق لأنه قاعد يتكلم على ساره : أقول ورى ما تنطم أنت وإياه
ناصر : وش فيك عصبت تراها مثل أختنا
طارق بمزح : يا أخي بديت أحسدك على هالحظ صدق الحظ للي ما يستاهلون
سلطان : ممكن تنثبرون
طارق رن جواله وكانت منى : طارق هلا والله هلا بالغاليه
منى : طروق ممكن طلب
طارق : عيون طروق أمري ياقلبي
ناصر وسلطان وجدهم يناظرون طارق ومستغربين من هالذوق وأنه قاعد يكلم وحده قدامهم
منى : طروق بكره إجتماع العايله عندنا ودي أجهز كم نوع من الحلا وناقصني أغراض والسواق مودي أمي وأروى للسوق ممكن تجيب لي هالاغراض
طارق : آفا عليك لو تبين روحي عطيتك إياها أنتي تأمرين أمر
منى : ما يأمر عليك عدو خلاص إذا وصلت السوبر ماركت اتصل علي ونقلك الطلبات
طارق : ابشري يابعدي دقايق بس وتكون عندك
منى : تسلم مل تقصر
طارق :أنا بالخدمه
منى : يلا مع السلامه
طارق : في حفظ الله ياقلبي

ناصر وسلطان وجدهم في وقت واحد : من ذي اللي تكلمها
طارق : خويتي
أبو عبدالعزيز بعصبيه : لا ياللي ما تستحي يا قليل الحياء أبوك ما عرف يربيك يالهيس الاربد
طارق بخوف : لحظه لحظه أمزح ذي منى أختي
ناصر : كذاااااااااااب
طارق : والله العظيم منى
سلطان : ومن متى تكلم منى بذا الذرابه
طارق : من مات راكان , والله هالبنت تكسر الخطر مايمر عليها يوم ما تنزل دموعها المسكينه تحاول تخبي حزنها عنا بس كلنا دارين وساكتين
أبو عبدالعزيز : الله يعوضها ويخلف عليها
ناصر : يعني يوم مات رجلها صرت تعرف الذوق
طارق : والله صرت أرحمها
ناصر بتفكير : يعني لو يموت فيصل بأصير ذوق مع رويمه
طارق رجف ناصر وطيحه من على الكنب
ناصر : عمى إن شاء الله
طارق : لا تتفاول على أخوي
ناصر :أيه والله نسيت أن فيصل أخوك هذي مشكلة زواج الاقارب الواحد ما يقدر يحش في نسيبه قدام أخوياه
طارق : أقول أنا بأقوم أجيب لمنى أغراضها
ناصر : يلا أجل خذني معك
طارق : انقلع بس مانيب فاضي لك
ناصر : طويرق ما معي سياره نسيت أني جاي معك في نفس السياره
طارق : مالي دخل فيك التكاسي على قفى من يشيل
ناصر : طويرق ترى بألعن جدفك يا نذل
طارق وهو عند الباب : خل أخوك يوصلك وطلع وخلاهم
*************************************
بدر حالته حاله لا ليله ليل ولا نهاره نهار البعثه ما بقي لها الا شهرين وتنتهي ويرجع لأهله وعذابه وأهله مبسوطين لأنه بيرجع
حس بالدنيا ضايقه في وجهه وقرر أنه أول ما يرجع يطلب نقل من الشغل للشرقيه ماكان عنده إستعداد يعيش في نفس المدينه اللي عايش فيه أخوه مع حبيبته لا وفي نفس البيت بعد ...

************************

طلع سلطان من بيت جده وطلع معه ناصر
سلطان : أنا بأروح للبيت
ناصر : خذني معك تكفى
سلطان : كم تدفع
ناصر : وشو حقه
سلطان : حق التوصيل يا أبوي
ناصر : لا ياشيخ تراني أخوك
سلطان : الشغل شغل مافيه أخوي والا أختي
ناصر : سلطان لا تنكت
سلطان : من زينك علشان انكت معك
ناصر : كم تبي؟
سلطان : ميه
ناصر : ليش موديني الخرج ؟
سلطان : خلاص اركب لا صيح علي ناقص مبزره
ناصر ركب وهو ساكت وركب سلطان وشغل السياره وطلع جواله واتصل على ساره وحط جواله على السبيكر وطلع جوالها مقفل اتصل مره ثانيه وبعد مقفل وفي المره الثالثه بعد مقفل
ناصر : من تتصل عليه
سلطان : وش دخلك
ناصر : يا أخي مقفل ما تفهم
سلطان : وأنت وش حاشرك في السالفه
ناصر: يا أخي خايف عليك من التهزيئ
سلطان : ومن بيهزئني إن شاء الله
ناصر : شفت ذا اللي كل شوي يقول إن الهاتف المطلوب لايمكن الاتصال به الان
سلطان : وش فيه
ناصر : اتصل مره ثانيه وشف وش بيقول
سلطان : وش بيقول؟
ناصر : بيقول اشغلت أم أمي يادلخ الجوال مقفل ما تفهم
سلطان : تستخف دمك؟
ناصر : لا والله بس تراك نشبه وبثر
سلطان : إذا أنا بثر فأنت أستاذي اللي علمني البثاره
ناصر وهو يسوي يشخص : شكراً يا رعاك الله تالله وبالله أنها لشهاده أعتز بها
سلطان : الله يخلف على أمن جابتك بس وش ذا الحكي
ناصر : لا تلومني شهر فضيل تكثر فيه المسلسلات التاريخيه
سلطان : دامك تتأثر لا تشوفها أجل
ناصر : يا أخي أشوفها واوسع صدري عليها حايسين أم اللغه والا ممثلينهم طول السنه ردح وحركات اللهم يا كافي وفي رمضان يا أخ الاسلام و هداك الله والممثلات أنواع الحشمه بارك الله فيهن
سلطان : ههههههههه أكلتك أمك يا هذا
ناصر : باللهي , أكلتك أمك أنت يا ثور
سلطان : كل تبن داري وش نطق الكلمه بس ما أبي أدعي عليك يا الصتيمه
ناصر : أخوي سلطان أنت تحبني
سلطان : وش رايك يعني؟
ناصر بدلع : ياي أنا ماااارااا مبسوطه لأنك تحبني ياربي أنا فرحانه ماااارااا
سلطان : يا آنسه عدلي حكيك والا نزلتك في الشارع ترانا في شهر فضيل ما أتحمل إغراءات
ناصر : ههههههههه شكلك من أعرست تعودت على الدلع أخبر من أول تحوم كبدك من ذا الاسلوب وألحين خاق معي
سلطان جاء في باله ساره وأسلوبها ,ماكان فيها ذرة دلع أبد , بس حركاتها حلوه على انها عربجيه إلا أنه يحس بأنوثتها الطبيعيه ما تتصنعها ولا تدلع او تتميصل
ناصر : يا الاخو , يالطيب وين رحت
سلطان : معك ما رحت
ناصر : اللي مأخذ عقلك يتهنى به
سلطان بصوت واطي : الله يستر على عقلي منه
ناصر : وشو ؟
سلطان : ولا شي

**************************

ساره راحت للسوق سوت الهدايا عند المحل اللي قالت لها هند عنه وكتبت على كل هذيه أسم صاحبها وشرت هديه لسلطان ورجعت للبيت وهي كارهه عمرها من التعب
غيرت ملابسها ونزلت تتقهوى مع خواتها
نجوى : رجاجيلنا بيستغربون أول مره نعطيهم هدايا في العيد
ساره : بسم الله علي علمتكم السنع
سوسن : والله أنهم موب كفو
هند : هين يا سوسن بكره إذا أعرستي وخذتي ولد الشيطان بتقعدين تحوقينه وتلوقينه
سوسن : يخسى الا هو
نجوى : هالكلام قلناه قبلك وسويره توها قبل فتره قايلته واليوم ممشورتنا علشان سلطان وما عاد تسمع فيه ولا توحي
ساره : سلطان غير وعلى طول رن جوالها وناظرته واستغربت
هند : من اللي يدق؟
ساره وهي مرتاعه : سلطان
سوسن : لو أنك طالبه مليون أبرك
ساره خذت الجوال وطلعت من الغرفه وراحت لغرفتها وأول ما وصلت انقطع الخط قبل لا ترد
سلطان وهو يناظر جواله : هين يا سويره مسويه ثقل طيب نشوف
ساره وش ذا الحظ توني بأرد وانقطع بس وش يبي داق هالحزه؟ أدق والا أسفهه وجلست محتاره وآخر شي دقت عليه
رن جواله وهو بيطلع من الغرفه ورجع وشاف رقم ساره ورد بدون تفكير
سلطان : آلو
ساره آه يا سلطان اشتقت لصوتك والله العظيم اشتقت لك : السلام عليكم
سلطان : وعليكم السلام
ساره : قبل شوي ما انتبهت للجوال وهو يرن
سلطان : حصل خير وسكت
ساره سكتت بعد
سلطان : آلو
ساره : معك . نعم
سلطان : كيفك ؟
ساره تعبانه وانا بعيده عنك : بخير الحمدلله
سلطان : كيف الاهل؟
ساره : كلهم طيبين
سلطان : ساره
ساره عيون ساره وقلبها : نعم
سلطان : أنعم الله عليك , ممكن أطلب منك طلب
ساره لوتطلب روحي عطيتك إياها : سم
سلطان : سم الله عدوينك
ساره و أولهم فيونا : آمين
سلطان لا تكون تقصدني بس : أبوي سعود حاط جمعه للعايله وعازمنا , حاولت أعتذر منه وما رضى معزم الا نحضر
ساره ياحبي لي لأبوك سعود أخيراً بأشوفك : طيب والمطلوب مني
سلطان : ممكن أمر عليك علشان تروحين معي أنتي عارفه أبوي سعود وأسألته اللي ما تخلص
ساره يعني موب حب فيني بس ما يخالف دامني أقدر والله لأساعدك : طيب متى العزيمه؟
سلطان : بكره إن شاءالله
ساره تحطمت وانقهرت : يوه مشكله
سلطان : وش فيك؟
ساره : اليوم عماني متصلين على أبوي ويقولون بكره بيجون ويسلمون عليه سلام العشر
سلطان بقهر : لا تكفين لا تمزحين
ساره ضاق صدرك يا قلبي بس والله لعيونك كل شي يهون : أي والله بس تدري شلون أنا بأشوف متى بيجون عشاء والا فطور وأرد عليك
سلطان : عزيمة أبوي سعود فطور وعشاء يعني سهره
ساره : حلو يعني يمديني على الاثنين
سلطان : زين أنتي تأكدي من موعد عزيمتكم وردي لي خبر
ساره : خلاص إن شاء الله بسأل أبوي وأقولك
سلطان : أجل بأنتظر مكالمتك
ساره : أخاف أتأخر عليك يمكن ما أشوف أبوي الا وقت السحور بأرس
سلطان قاطعها : ما يخالف أنا ماعندي شي متى ما عرفتي أتصلي علي
ساره : طيب خلاص
سلطان : أخليك ألحين , توصين على شي
ساره : لا شكراً
سلطان مستكثره علي سلامتك يا ساره : مع السلامه
ساره : مع السلامه ......


يتبع .....

الجزء الثالث والاربعون

في بيت أبو سلطان كانوا مجتمعين على السحور ويسولفون وسلطان كان ينتظر مكالمة ساره وكل شوي يناظر جواله
أبو سلطان : وش فيك ما تأكل يا سلطان
سلطان : هذاني أكل
أم سلطان : الله يهديه عمي من وين طلع لنا بسالفة ذا الجمعه خلاص ما بقي الا كم يوم ونشوف بعض في العيد
ريم : هاو يمه وش فيك الله يهديك ترا ما تعودنا على القطاعه
رن جوال سلطان وكلهم ناظروه
أم سلطان : من ذا اللي داق هالحزه
سلطان : ساره يمه
ناصر : أيه لازم تدق تصبح عليه علشان يصير يومه حلو
فهد : لنا الله
سلطان خذ جواله وراح لغرفته
سلطان : آلو
ساره : هلا سلطان آسفه أزعجتك
سلطان : لا كنت جالس مع أهلي
ساره : ليش أنت عند أهلك
سلطان حب يطول السالفه : أيه وش يقعدني في البيت لحالي أخاف
ساره فديت الخواف ياناس : الواحد إذا قرى آية الكرسي يروح عنه الخوف
سلطان : طيب المره الجايه بأقراها
ساره : سألت أبوي وقال عماني بيجون بعد التراويح
سلطان : زين أجل تجين تفطرين معنا
ساره : إن شاء الله
سلطان : أمرك بعد العصر؟
ساره : لا بدري بعد العصر
سلطان : أجل متى تبين ؟
ساره : يعني قبل المغرب بساعه
سلطان : طيب فيه شي ثاني بعد
ساره : وشو ؟
سلطان : اصبعي مكسور إذا سألك أحد
ساره قاطعته : وشو ؟ متى ؟ ووين ؟
سلطان : وش فيك هبيتي شوي شوي
ساره : طيب تكلم
سلطان : أصبع رجلي مكسور ومجبسه واليوم ريم سألتني وقالت ليش ما علمتني ساره وقلت لها أن ساره تقول كسر بسيط مومهم
ساره : لا مهم تراه كسر موب لعبه
سلطان : إنا لله أدري بس أنا قلت كذا علشان ريم
ساره : طيب متى انكسر وليش ماقلت لي
سلطان : انكسر ذاك اليوم
ساره : وشو منه انكسر
سلطان : جيت اطلع مع الدرج وخبطت وحده من الدرجات بالغلط
ساره : انكسر من خبطة الدرج ؟
سلطان : إيه ليش مستغربه
ساره : طيب متى بتفك الجبس
سلطان : مدري
ساره : يعورك ؟
سلطان حب يشوف ردة فعلها : أيه
ساره عرفت أنه يكذب لأنه إذا عوره شي ما يعلم : كل مسكن
سلطان ياربي ترفع الضغط : باللهي ؟
ساره ببرود : والله
سلطان بقهر : طيب
ساره : يلا أجل أخليك ألحين بأروح أصلي الفجر سلم لي على الاهل
سلطان : يبلغ
ساره : مع السلامه
سلطان : مع السلامه


*************************************************
العصر ساره كانت قاعده تغير ملابسها ورن جوالها
ساره : هلا عبود
عبدالله وصوته متغير: ساره وين أمي؟ عجزت اتصل على البيت وعل جوالات البنات ما تردون
ساره : وش فيك؟ بعدين نجوى وهند راحوا لبيوتهم الظهر
عبدالله : ساره اليو صار لنا حادث وحنا في المستشفى
ساره بخوف : وشو ؟
عبدالله : لا تخافين ما فينا شي بس وفاء صارت حامل والدكتوره تقول لازم ينزلون الولد ودخلوها غرفة العمليات ومابعد طلعوها
ساره : وأنت فيك شي؟
عبدالله : جروح بسيطه ورضوض , بس وفاء وش أسوي خايف عليها
ساره : طيب اتصلت على أمها ؟
سلطان : أهلها في مكه
ساره : طيب تقدر تجي تأخذني؟
عبدالله : لا أخاف يطلعونها الحين
ساره : خلاص طيب أنت هد أعصابك وموب صايرالا الخير
عبدالله : تكفون تعالوا أنا ما أعرف لسوالف الحريم والله خايف يصير لها شي
ساره : خلاص طيب دقايق وأكون عندك
غيرت ساره ملابسها وخذت شنطتها وعبايتها ونزلت لأمها ولقت خالد توه جاي
ساره : يمه أنا بأروح لحمولتي ويمكن أتأخر وخالد بيوصلني
خالد : خير سواق عندك أنا
ساره تناظره بحقد : انثبر وامش معي
خالد : اقول طيري بس , وين رجلك والا سواقك
ساره بصوت واطي : خويلد عبود في المستشفى
خالد : هاه
ساره رجفته علشان يسكت : هاه بتوديني والا لا
خالد: خلاص بأوديك يلا امشي

طلعت ساره مع خالد وقالت له عن اللي صار
خالد : مسكين عبود مايدري أن حرمته حامل
ساره : أكيد هي بعد ما تدري
خالد : بس ليش ماقلتي لأمي
ساره : ليش اخوفها أنت عارف أمي على طول بيرتفع ضغطها وبسوي لنا سالفه خلنا نشوف أول وش السالفه بعدين نقول لها
وصلوا للمستشفى وراحوا للطوارئ ولقوا عبدالله جالس وهو ماسك رجله وحالته حاله
ساره : عبود ليش كذبت وقلت ما فيك شي
عبدالله : مافيني شي
خالد : كل هذا ومافيك شي طلع الدكتور من غرفته وشاف خالد وساره
الدكتور : خلاص يا أخ عبدالله دام أهلك وصلوا لازم تتفضل معنا
خالد : على وين يا دكتور
الدكتور : الاخ عبدالله عنده تمزق في الاربطه في رجله ولازم ندخله للعمليات وهو رافض
خالد يكلم عبدالله : أنت صاحي والا مجنون وجالس هنا عالفاضي
عبدالله : أبي أتطمن على وفاء أول
خالد : أقول خذوه يا دكتور ما عليكم منه
عبدالله : خالد لوسمحت
خالد يقاطعه بعصبيه : ورى ما تروح وانت ساكت لا أشيلك بالغصب وحنا بنقعد هنا ننتظر حرمتك وبنطمنك عليها إذا طلعت
ساره : عبدالله تكفى رح مع الدكتور الله يخليك وانا بأجلس هنا وما نيب رايحه لين ما تطلع وفاء وأتطمن عليها
رن جوال ساره وكان سلطان
ساره يوه نسيته
ردت ساره : هلا سلطان
سلطان : هاه خلصتي ؟ ترا بأطلع ألحين من البيت
ساره : سلطان آسفه ما أقدر أروح معك
سلطان بصدمه : ليش؟
ساره : سلطان بعدين أكلمك وأقولك
سلطان بعصبيه : ساره وش حنا متفقين عليه
ساره : سلطان خلاص بأقولك كل شي بعدين يلا عاد مع السلامه
سلطان : طيب وسكرت ساره الجوال بسرعه
سلطان عصب ورمى الجوال وطاح جواله وتفكك وجلس وهو يسب ويلعن الساعه اللي تزوج فيها كان متحمس للعزيمه علشان يشوف ساره و جلس يكلم نفسه وهو يفكر : وش فيك ليش عصبت؟ وإذا شفتها وش بيصير يعني. أصلاً من هي ساره علشان تتحمس لشوفتها بنت مثلها مثل غيرها , لابس ودي أشوفها باللوك الجديد . هين ياسويره انا تسوين فيني كذا وتصكين السماعه في وجهي وتفشليني عند أهلي . ليش ماقلتي من قبل ما أبي أروح معك وريحتيني

عبدالله بعد ما أقنعوه أخوانه راح مع الدكتور هو وخالد وساره جلست تنتظر وفاء طلعت الدكتوره وطمنت ساره على صحة وفاء وقالت لها أنهم بينقلونها لغرفه ثانيه علشان ترتاح
سلطان جمع قطع جواله وحطها فوق الطاوله وحط الشريحه في جيبه وطلع جهازه الثاني من الدرج وحطه في جيبه بدون ما يركب الشريحه وطلع من البيت وراح لبيت صديقه متعب
فتح متعب الباب ولقى سلطان واقف
متعب : هلا والله بسلطان
سلطان : تقدر تستضيفني عندك كم ساعه
متعب : آفا وانا أخوك البيت بيتك تفضل حياك الله
دخل سلطان ومتعب وجلسوا في المجلس
متعب : وش فيك يا سلطان عسى ماشر
سلطان وهو طفشان : مافيني شي
متعب : متهاوش مع المدام ؟
سلطان يناظره بملل : إيه
متعب : وش صار بينكم بعد
سلطان : متعب راسي يعورني وماودي أتكلم في هالسالفه ألحين
متعب : خلاص يا أخوي على راحتك بس متى ما بغيت تتكلم تراني حاضر
سلطان : ماتقصر
متعب : خلني أقول للأهل يجهزون الفطور أجل

**************************************************

عبدالله طلع من غرفة العمليات وحطوه في الملاحظه
اتصل خالد على ساره : آلو
ساره : هلا خلود
خالد : وينك ؟
ساره : أنا في قسم النساء والولاده طلعوا وفاء من العمليات وحطوها في غرفه فوق وتقول الدكتوره بتقعد اليوم بكره بيطلعونها
خالد : عبدالله بعد طلع وإحتمال يطلعونه اليوم في الليل والا بكره الصباح عمليته بسيطه
ساره : زين الحمدلله هو جنبك ودي أكلمه
خالد : عطوه منوم ونايم الحين
ساره : خلاص أجل أنت رح للبيت ألحين ترى تأخرت وإذا سألوك أهلي قل أفطرت عند طارق
خالد : أخاف يقوم عبدالله ويحتاج لشي
ساره : أنا بمر عليه كل شوي أنت بس رح للبيت ترى أهلي بيشكون في الموضوع , بعدين نسيت عزيمة عماني اليوم أبوي بيحتاجك
خالد : وإذا سألوا عن عبدالله وحرمته
ساره : قل عبدالله أسنانه تعوره ووجهه منتفخ وموب جاي وأكيد حرمته بتجلس معه
خالد : طيب خلاص إذا احتجتي شي دقي علي
ساره : إن شاء الله

أذن العشاء وساره حالتها حاله ما قدرت تفطر وكل شوي نازله وطالعه مابين غرفة عبدالله وغرفة وفاء حست أنها بتدوخ من التعب والجوع : ياربي تعبت أحس ما أقدر امشي خلني أدق على سلطان أقوله عن اللي صار وأخليه يجيب لي شي أكله على الطريق اتصلت على سلطان وجواله مقفل اتصلت مره ثانيه وبعد مقفل وآخر شي اتصلت على ريم
ريم ردت بسرعه : هلا ساره وينكم خوفتونا علينا
ساره : خوفناكم ؟
ريم : أيه نتصل على سلطان وجواله مقفل ونتصل عليك وبعد جواله مقفل
ساره بخوف : ليش سلطان ما جاكم؟
ريم : لا
ساره : احلفي
ريم : والله ما ندري عنه من العصر
ساره : وأنا بعد مدري عنه
ريم : ليش أنتي وينك ؟
ساره : أنا في المستشفى ومقفله جوالي
ريم : ليش وش فيك؟
ساره قالت لها عن اللي صار
ريم : الحمدلله على سلامتهم الله يقومهم بالسلامه
ساره : الله يسلمك ياقلبي , بس والله أني خايفه على سلطان
ريم : لا إن شاء الله مافيه شي يمكن ألحين يصلي التراويح
ساره : أنا دقيت عليه أبي أقوله عن اللي صار لأني ما عطيته التفاصيل كان الدكتور واقف يكلمنا وصكيتها في وجهه حتى قلت أبيه يجيب لي تمر أفطر عليه
ريم : مابعد أفطرتي ؟
ساره : لا وين أفطر في الاسعاف ؟ ومن زود السناعه ماجبت معي فلوس؟
ريم : خلاص بأجيك أنا والسواق بعد شوي
ساره : لا والله ما تجين
ريم : أقول لا تحلفين بس
ساره : قسم بالله أن جيتي لا أنا صديقتك ولا أعرفك
ريم : سويره ليش أنتي عنيده
ساره : كيفي أجل تبين تطقين مشوار علشان تجيبين تمر ومويه
ريم : وش فيها
ساره : خلاص هذا خالد جاء وجاب معه تمر ومويه وعصير
ريم : أكيد
ساره وهي تكذب : ودك تكلمينه علشان تتأكدين
ريم : لاخلاص مصدقتك
ساره : تكفين ريوم إذا كلمتوا سلطان طمننوني عليه
ريم : إن شاء الله وأنتي بعد
ساره : طيب
ريم : أجل ما أطول عليك , توصين شي
ساره : سلامتك
ريم : مع السلامه
ساره : مع السلامه

من جهه ثانيه كان أبوعبدالعزيز واقف هو وفهد وناصر في الشارع
أبوعبدالعزيز : ألحين وش بلا أخوكم ما جاء
فهد : والله مدري يبه عجزت أدق عليه ومقفل جواله
ناصر : حتى ريم تقول جوال حرمته مقفل
أبو عبدالعزيز : كان اتصلت على خالد نسيبه
ناصر : اتصلت ومايرد
فهد : عسى مافيهم شي فاطمه تقول من العصر وهو وطالع
أبو عبدالعزيز : الله يستر مابقي الا متعب خويه خلني اتصل عليه وأشوف


*************************************************

طلع سلطان من المسجد هو ومتعب
سلطان : يلا أجل أنا بأمشي ألحين
متعب : تو الناس تعال خلنا نتقهوى شاهي مابعد تقهوينا
سلطان : لا الله يسلمك من العصر وأنا عندك ماقصرت الله لايقصر بعمرك
متعب : يا أخي ساعه ميب ضاره
سلطان : لا والله أخاف تطلع علي حرمتك وتطردني
متعب : كان اقص راسها
سلطان : يا عيني يالشديد
متعب : أعجبك
فتح سلطان باب سيارته في نفس اللحظه اللي رن فيها جوال متعب
متعب شاف رقم أبو عبدالعزيز ورد وهو مسوي نفسه مايدري من اللي داق لأن سلطان بيستغرب معرفة متعب برقم جده
متعب : آلو
أبو عبدالعزيز : هلا متعب وشلونك وأنا أبوك
متعب : بخير الله يسلمك . من معي
أبو عبدالعزيز : آفا ما عرفتني
متعب : هاه ؟ إيه أبو عبدالعزيز هلا ياعم وشلونك عساك طيب وشلون العيال عساهم طيبين
أبوعبدالعزيز : سلطان عندك ؟
متعب : أيه
أبو عبدالعزيز : عطني أكلمه
متعب : لحظه شوي
متعب بصوت واطي : سلطان جدك يبيك
سلطان كشر : يالله وش يبي الله يهديه بعدين من وين جاب رقمك
متعب : مدري بس أكيد من أخوانك
سلطان خذ الجوال : هلا يبه
أبو عبدالعزيز : سلطان وينك فيه من العصر وحنا ندق عليك وجوالك مقفل خوفتنا عليك
سلطان : تطمن يبه مافيني شي بس جوالي خربان وتوني أنتبه له
أبو عبدالعزيز : طيب ليش ما جيت
سلطان : خلاص يبه إذا جيت بأقولك
أبوعبدالعزيز : طيب صلح جوالك
سلطان : إن شاء الله يبه
أبوعبدالعزيز : طيب خلاص لا تتأخر
سلطان : طيب يبه توصي شي
أبو عبدالعزيز : سلامتك , فمان الله
سلطان : مع السلامه
متعب : وش بتسوي ألحين
سلطان : مدري والله بس شكلي بأقول لأهلي عن كل شي وأرتاح
متعب : سلطان لا تتهور
سلطان : يا أخي تعبت
متعب : يا أخي هونها وتهون بعدين أهلك بيزعلون عليك وعلى ساره بعد ويمكن أهلها يدرون ويسوون لها سالفه
سلطان : وأهلها وش دخلهم
متعب : بالله لو أختك ترضى تعيش مثل عيشتها بتسكت عن فيصل,مافيه اهل يرضون لبنتهم هالعيشه
سلطان : أنا وإياها راضين
متعب : أقول فكر زين ولا تتهور
سلطان : الله يكتب اللي فيه الخير
متعب : صلح جوالك طيب
سلطان : إيه ذكرتني وطلع جواله وركب الشريحه . يلا أجل مع السلامه
متعب :مع السلامه سلم لي على الاخوان
سلطان : يبلغ
تحرك سلطان وكان ناوي يروح لبيته ويجلس يفكر له في عذر قبل لا يروح لبيت عمه
رن جواله وشاف رقم ساره وطنشه رن مره ثانيه وبعد طنشه وفي المره الثالثه رد بدون نفس
سلطان : نعم
ساره براحه : سلطان وينك فيك شي ؟
سلطان : وش تبين ؟
ساره : من المغرب وأنا أدق عليك وجوالك مقفل عسى ماشر
سلطان : وهذاني فتحته وش تبين
ساره ليش يكلمني كذا : ما أبي شي بس خوفتني عليك
سلطان : لهالدرجه أهمك
ساره بقهر : لا
سلطان : أجل ليش داقه؟
ساره : أبي أعتذر منك لأني مارحت معك للعزيمه
سلطان بإستهزاء : صباح الخير
ساره : وش أسوي تعبت وأنا أدق عليك وجوالك مقفل
سلطان : والله دامك تبين تعتذرين كان أعتذرتي يوم كنت أكلمك موب تصكين السماعه في وجهي
ساره ياربي هذا من جده زعلان : وأنت زعلان على شي تافه مثل هذا
سلطان : وتسمين قطع الخط في وجهي شي تافه
ساره : لا شي فظيع بس بالله لو انك لا قي صورة رجال في بوكي والا بين أغراضي وش بتسمي هالشي
سلطان سكت بعدين رد : لا تخلطين الأمور مع بعض
ساره : ما خلطت شي بس عالعموم أنا مضطره أقولك اللي صار موعلشان تعذرني , لا علشان تعرف أن عندي سبب وجيه
سلطان : ما أبي أسمع شي
ساره بعصبيه : لا بتسمع لأن أهلك يعرفون ولازم تعرف على الاقل إذا سألوك يصير عندك خبر وقالت له عن كل شي صار
سلطان ضاق صدره و حس أنه تسرع بزعله وتصرفاته الهمجيه واستحى يعتذر من ساره لأنه مو متعود يعتذر لأحد
سلطان : طيب هم وشلونهم ألحين
ساره : بخير
سلطان : بأي مستشفى أنتم ؟
ساره : ليش وش تبي بالمستشفى
سلطان : بأجيكم
ساره بإستهزاء : مشكور ما يحتاج
سلطان : ساره
ساره قاطعته : معليش سلطان مضطره أسكر الجوال ألحين وفاء تناديني تسمح لي
سلطان ياربي البنت خلقه زعلانه عقب الكلام اللي قلته أكيد مفرقعه : طيب اللي تشوفينه
ساره : مع السلامه
سلطان : مع السلامه

غير سلطان طريقه وراح لبيت عمه أبو فيصل
دخل على الرجاجيل وسلم عليهم
أبو عبدالعزيز : هاه ما قلت لنا وين كنت حرمتك وعرفنا وينها
سلطان : والله كنت عند متعب
أبو سلطان : ألحين عمك حاط الفطور وتروح تفطر عند خويك
سلطان : وش أسوي يبه الرجال شافني في الشارع وحلف علي علشان أفطر عنده
فهد : يا أخي فيه إختراع أسمه جوال
سلطان طلع جواله : أدري بس جوالي كان خربان وما انتبهت له وخذت هذا بداله واعذرني يا عمي ماكان قصدي اطنشك
أبو فيصل : حصل خير وإذا ما أفطرت معنا يمديك تتعشاء معنا
سلطان : الله يغنيك ياعمي
دخلت ريم عليهم وسلمت على سلطان
ريم : وينك الله يصلحك تعبنا وحنا نتصل عليك
سلطان : خلاص سويتوا فيها سالفه
ريم : اتصلت على ساره
سلطان : إيه تو دقت علي
ريم : المسكينه عجزت تدق عليك ويوم ما رديت دقت علي المسكينه , يوم تدق علي وهي توها مابعد أفطرت كانت تبيك تجيب لها فطور راحت للمستشفى مستعجله ولا خذت معها فلوس وأهلها عندهم عزيمه ومايدرون عن اللي صار لعبدالله
أبو سلطان : مارحت لها ياسلطان؟
سلطان : لا يبه توها قايله لي عن اللي صار
أبو عبدالعزيز : وجالس تخرط معنا , قم رح شف حرمتك وشف وش تبي وش محتاجه المسكينه مابعد أفطرت
ريم : قلت لها بأجيب لك فطور وقالت جاء خالد خلاص
أبوسلطان : ماشفت أحد أبرد منك ياسلطان
فهد : والله لو أني مكانك والله ما أخلي حرمتي ولا دقيقه البنت محتاجتك وأنت قاعد تفطر عند خويك
سلطان ضاق صدره لأن ساره كانت محتاجته وهو هزأها : طيب أنا بأروح أشوفها
طلع سلطان وركب السياره وهو مايدري وش يسوي ومايدري وش أسم المستشفى اتصل على خالد ومارد عليه ورجع اتصل عليه
ورد خالد : هلاسلطان
سلطان : خالد وينك ؟
خالد : في البيت عماني عندنا
سلطان : مارحت لساره ؟
خالد : لا والله من طلعت من عندها ماعاد رحت لها مره ثانيه
سلطان : يعني ماوديت لها فطور
خالد : أووووه نسيتها مسكينه , خلاص خلاص بأروح لها ألحين
سلطان : خلاص هي في أي مستشفى , سألتها وقالت ماله داعي تجي
خالد : في مستشفى .......
سلطان : خلاص أنا رايح لها ألحين
خالد : طيب تقدر تأخذ لها غيارات من بيتكم لأنها بتنام هناك اليوم
سلطان : ما أعرف وش تبي
خالد : خلاص أنت خلك عنده لين ما أجي واجلس عند عبدالله بعدين تطلع معك تجيب لنفسها ملابس وترجع
سلطان : خلاص طيب
خالد : خلاص أول ما يروحون ضيوفنا بأجيكم
سلطان : خلاص مع السلامه
خالد : مع السلامه

خذ سلطان أغراض لساره وراح للمستشفى
راح لغرفة عبدالله وسلم عليه وتحمدله بالسلامه
سلطان : إلا وين ساره
عبدالله : عند وفاء بالدور الثاني المسكينه تعبناها اليوم
سلطان : وش ذا الكلام إذا ما وقفت معكم ألحين متى بتوقف
عبدالله : طول اليوم وهي طالعه ونازله شوي عندي وشوي عند وفاء
سلطان : مابعد أفطرت الظاهر
عبدالله : أيه صح ما أفطرت
سلطان : اتصل عليها خلها تنزل تأكل لها شي
عبدالله : ورى ما تتصل عليها أنت
سلطان : أصلا ً هي تقول وشو له تجي مافيهم الا العافيه وبكره بيطلعون و بتعصب إذا درت أني فيه ويمكن تعاند وما تنزل
عبدالله : خلاص طيب ودق على ساره
ساره كانت نازله لعبدالله وشافت سلطان وهو يدخل عنده و رجعت لغرفة وفاء لأنها معصبه عليه
ردت ساره : هلا عبدالله
عبدالله : ساره معليش تنزلين عندي شوي
ساره : عبود تعبت مافيني حيل
عبدالله : ساره طلبتك
ساره : عبود أدري وش تبيع لشان كذا بأختصر وأقول قل لسلطان مشكور ماقصر ومالي خلق أنزل أشوفه أخاف أتهاوش معه وموب ناقصين هواش قدام العالم
عبدالله وهو يناظر سلطان : وأنتوا متهاوشين
ساره : لا بس أنا معصبه عليه من العصر أدق عليه ومقفل جواله وخوفني عليه وآخر شي يقول وش تبين طيب
عبدالله : هههههه الله يرجك يا شيخه وهذا اللي رافع ضغطك
ساره : أيه
عبدالله : أحسب فيكم شي
ساره : لا تطمن بس قهرني وأبي أقهره شوي
عبدالله : الله يشفيك قولي آميين
ساره : آمين , ويلا بس مع السلامه
عبدالله : سارونه لحظه
ساره : وش تبي
عبدالله : بوسي لي وفاء
ساره الله لا يغير عليكم يا أخوي : طيب وش تبي بعد
عبدالله : بس
ساره : طيب مع السلامه
عبدالله : مع السلامه
سلطان : هاه وش قالت
عبدالله : داريه أنك عندي
سلطان : وش دراها؟
عبدالله : مدري , بس وراك رافع ضغط أختي
سلطان بخوف : أنا ؟ وش سويت ؟
عبدالله : الخبله تقول من العصر وأنا أتصل عليه ومقفل جواله وآخر شي يقول لي وش تبين
سلطان الحمدلله ماقالت شي : وش أسوي جوالي خربان وما انتبهت له حتى اهلي عصبوا علي
عبدالله : يعني أختي معها حق
سلطان : أي معها حق
عبدالله : أجل أعتذر منها
سلطان : ألحين معصبه بعدين بأتصل عليها إذا روقت
عبدالله : لا تزعلها مره ثانيه
سلطان أجل لو تعرف السالفه من أولها : سم طال عمرك
عبدالله : تطنز
سلطان : لا
عبدالله : عادي يا أخوي ترى توكم لاحقين عالهواش
سلطان : الله يعين
جلسوا يسولفون شوي وسلطان طفش لأنه كان يحتري ساره تنزل وهي مطنشته وآخر شي سلم على عبدالله وطلع
اليوم الثاني طلع عبدالله وزوجته وراحوا لبيت أبو عبدالله
وصلت ساره لبيت أهلها وهي تعبانه أفطرت مع أهلها بعدين راحت لغرفتها تسبحت وغيرت ملابسها وحطت راسها ونامت
قامت بعد صلاة التراويح وصلت وتوها طالعه من غرفتها وسمعت أمها تنادي سوسن
أم عبدالله : سوسن روحي قومي ساره عجزت وانا أدق عليها وجوالها مقفل
سوسن : يمه ساره تعبانه خلوها تنام وش عليكم منها
أم عبدالله : سلطان في المجلس ويسأل عنها
ساره سمعت اسم سلطان وعلى طول راحت لغرفته وسوت نفسها نايمه سمعت سوسن تطق الباب وماردت
سوسن فتحت الباب وراحت عند سرير أختها : سويره ساروه قومي
ساره تسوي نفسها نايمه : سويسن انقلعي عني أبي أنام
سوسن : سويره قومي بعلك تحت يسأل عنك
ساره : سوسن أبي أنام تكفون مالي خلق أحد
سوسن : قبل أمس مزعجتنا رجلي وأحبه وألحين تقولين صرفوه
ساره : سوسن يرحم أمك خليني في حالي راسي بينفجر من الوجع
سوسن : تبين بنادول
ساره : ياليت
سوسن : طيب بأقول لأمي تصرف رجلك بعدين بأجيب لك بنادول
راحت سوسن وقالت لأمها
دخلت أم عبدالله على سلطان وكان جالس مع عبدالله وخالد وأبوعبدالله
أبو عبدالله : وين ساره لين ألحين نايمه
أم عبدالله : تعبانه تو سوسن نازله تأخذ له حبتين بنادول تقول رأسها بينفجر
خالد : يوه عاد سويره إذا مانمت زين تسوي لنا سالفه
أبو عبدالله : أي والله تنكد على نفسها وعلى اللي حولها
سلطان صفقوني إن كان راسها يعورها : الله يشفيها
عبدالله بصوت واطي الظاهر مابعد رضت عنك
سلطان : لا بس أختك في النوم لا أحد يحاكيها المفروض أنت أخبر مني فيها
عبدالله : أمداك تعرف طبايعها
سلطان : خمس شهور ميب سهله
أبو عبدالله :وش فيكم تتساسرون
سلطان : مافينا شي
جلس سلطان معهم شوي بعدين طلع وراح لبيتهم وهو معصب من الدنيا ومن نفسه ومن ساره وحركاتها
خلص رمضان وبكره العيد والناس يدهرون وساره مقفله على نفسها الغرفه وجالسه تصيح : ليش ياسلطان ليش سويت فينا كذا حتى العيد ما أدري إذا بأتعيد معك والا لا. يمكن أنا غلطت بس أنت بعد غلطت
طقت عليها سوسن الباب : ساره يلا الكوافيره تحت انزلي بسرعه جاء دورك
ساره : طيب بأنزل ألحين
نزلت ساره بدون نفس كانوا خواتها جاين ومعهم وفاء وكلهم مبسوطين ويسولفون وهي مكتئبه ما تدري وش ناوي عليه
نجوى : سويره وش فيك محزنه
ساره : ولا شي
هند : الا سويره بكره متى عيدكم
ساره ماتدري وش تقول ريم تقول بيجتمعون طول اليوم في بيت أبو فيصل : عندهم بكره أكثر من عيد شي في الليل وشي صبح
نجوى : ومتى بتروحين لحمولتك
ساره تبي تصرفها : وأنتي متى بتروحين
نجوى : مثل العاده الصبح بأعيد مع عماني والظهر عند حمولتي
ساره : وأنتي يا هند
هند : أنا بأجلس هنا لين العصر بعدين بأروح لحمولتي عيدهم في الليل
ساره رن جوالها وناظرته وبغت تطير من الوناسه وأخيراً سلطان تكرم عليها ودق خذت جوالها وطلعت من الصاله
وردت وهي في الدرج قبل لا ينقطع الخط
ساره : آلو
سلطان : السلام عليكم
ساره : وعليكم السلام
سلطان : كيفكم ؟
ساره : بخير , أنتوا كيفكم ؟
سلطان : حنا بخير بعد , ترى بكره العيد في بيت عمي أبو فيصل
ساره : أدري قالت لي ريم
سلطان : إذا تبين بأمرك بكره بعد صلاة الفجر
ساره : ماراح تصلي العيد
سلطان : إلا أمر عليك ونروح نصلي العيد بعدين نروح لبيت عمي
ساره : طيب خلاص
سلطان : بعد الفجر مباشره تكونين جاهزه
ساره : إن شاء الله
سلطان : يلا أجل مع السلامه
ساره وهي متحطمه : مع السلامه
سكرت السماعه وهي متضايقه حست أنه قاعد يتصدق عليها لأنه بيوديها معه فكرت تتصل عليه وتقول هونت بعدين تعوذت من الشيطان وبلعت قهرها ونزلت تحت مع خواتها

سلطان كان جالس في بيته عند التلفزيون وطفشان الناس مستانسين وهو منكد على نفسه ومنكد على ساره معه رن جواله وكان فهد
سلطان : هلا فهيد
فهد : وينك ؟
سلطان : في البيت
فهد :سلطان ودي أسألك سؤال
سلطان : أسأل
فهد : وين شريت هدية ساره منه
سلطان : أي هديه ؟
فهد : هدية العيد , أنا بأروح أشتري لهيفاء هديه تعرف هذا أول عيد من تملكنا بس محتار قلت خلني أسأل سلطان أخاف أسأل أمي والا رويمه ويفضحوني ويعلمون هيفاء عن المحل
سلطان : ذكرتني والله ما شريت شي لا أحد أبد
فهد : تمزح ؟
سلطان : لا والله جاد
فهد : فيه أحد ينسى هالمناسبه
سلطان : يا أخي مشاغل الدنيا
فهد : وش رأيك أمر عليك ونروح مع بعض
سلطان : يمدينا ألحين
فهد : أيه تو الساعه 11 المحلات ما تسكر الا الفجر
سلطان : خلاص انا أنتظرك
فهد دقايق وأكون عندك
راح سلطان مع فهد للسوق وشروا هدايا لأهلهم وجدهم ووصلوا لهدايا البنات واحتاروا
فهد : خلاص بأشتري لهيفاء ساعه ألماس
سلطان كان واقف وساكت مايدري وش يشتري أصلاً كان خايف أن ساره تفشله وما تقبل هديته
فهد : وأنت وش بتشتري
سلطان : مدري؟
فهد : حرمتك وش تحب
سلطان : مدري
فهد : أجل أنت وش تدري عنه
سلطان : وأنت وش فيك معصب
فهد : معقوله أنت سلطان الدقيق ما لاحظت وش حرمتك تحب
سلطان : الا تحب الكت كات
فهد : باللهي تنكت
سلطان : لا والله جاد
فهد : يعني بتهديها كت كات أنت ووجهك
سلطان : لا بس أعلمك أني ملاحظ
فهد : أنا قصدي تحب العطورات الساعات ملابس ذهب يعني شي عليه القيمه
سلطان : كل اللي قلت عندها
فهد : بعد أهلي عندهم كل شي وهذا حنا شرينا لهم هدايا
سلطان : طيب خلنا ندخل محل الذهب هذا ونشوف
فهد : الله يفشلك هذا كله ألماس وأحجار كريمه
سلطان : يعني فرقت كلها أشياء تنلبس
دخلوا المحل وجلسوا ساعه يدورون فهد لاقى ساعه حلوه لهيفاء وخذها وسلطان عجبته أكثر من قطعه واحتار عندها
فهد : ما خلصت ؟
سلطان : وش رأيك وش أحسن الخاتم والا الحلق
فهد : أنت وش عاجبك , ودك تشوفها لابسه الحلق والا الخاتم ؟ بعدين تعرف قياس أصابعها ؟
سلطان : أيه اعرف قياسها ويحاكي نفسه شهر كامل توكلني وتشربني وتغير ملابسي وتبيني ما أعرف قياسها
سلطان جلس يناظر القطعتين بعدين خذ الخاتم كان خاتم ألماس وفيه أحجار سود شكله مره حلو وسعره غالي
فهد بعد ما ركبوا السياره : الحين كسرة ذا الخاتم أغلى من ساعة هيفاء
سلطان : نوع الالماس يختلف يا أبو الشباب
فهد : وأنت مخفه تطق لك ذا الخاتم بتسعه ألاف وهو صغير كان شريت عقد والا اسواره شي يواجه
سلطان : عادي أهم شي يجوز له
فهد : يا حركات يا سلطان أجل أهم شي رضى المدام
سلطان : لا والله بس يمكن ما يعجبها تعرف الحريم أذواقهم صعبه
فهد : أن ما جاز له رح حط الفاتوره في وجهها وصدقني بتنبسط
سلطان : ياشين البخل
فهد : موب بخل بس الهديه صغيره
سلطان : وأنت وش علمك يالقروي انطم أحسن لك
فهد : يارب تفشلك وما يجوز لها
سلطان بعصبيه : إذا فشلتني بأذبه في الزباله ارتحت
فهد عرف أن سلطان معصب وسكت ومارد عليه

********************************************