كاتب الموضوع :
شهووده
المنتدى :
الحوار الجاد
مساء الخير
آسف ع التأخير الدي إس إل فيه مشاكل ودوبي داخل عن طريق موبايلي مررررررررررة بطيء
اقتباس :-
المشاركة الأصلية كتبت بواسطة شهووده  |
اليوم موضوعنا يتكلم عن
بطاله العمل
حلو موضوع رائع ويستحق النقاش
نسمع كثير عن مواطن عاطل
ما يشتغل
ما يقدر يعيش نفسه
ولا يعيش اهله
مو لاقي لقمه عيش
اتمنى منكم اعزائي الجواب على الاسئله المطروحه بالاسفل
أوكي
1- من هو السبب الرئيسي بالبطاله ؟
طبعاً السبب الرئيسي للبطالة هوا الشخص نفسه إلي ما بيشتغل راح تقولوا كيف أنا أقلكم يعني العمل موجود بس إحنا إلي ما بدنا يعني شبابنا ما شاء الله عليه كل واحد بدو يتخرج من الجامعة بدو يتوظف مدير عام على مكتب وبراتب ما يقل عن مدري كم ألف ويبغى يومين إجازة في الإسبوع ومدري كم شهر آخر السنة وبدو بدل سكن وبدل مواصلات وتأمين طبي وأشياء ما تنتهي صح ولا أنا غلطان؟؟
تجي تكلم البني آدم هذا تقله في وظيفة في المطعم الفلاني براتب 2000ريال والواحد يبدأ صغير وأحسن لك بدل الفضاوة إلي إنت جالس فيها وكمان سنة و تترقى تصير مشرف على العمال ويصير راتبك 3000 وكمان سنة تصير نائب مدير ويصير راتبك 4000 ويعني 5 - 6 - 7 سنوات وتصير مدير المطعم ويصير راتبك 8000ولا 9000 آلاف يرفض وما بده يتعب يبغى صاروخ على فوق على الإدارة
وطبعاً إش سبب الرفض أنا ولد فلان الفلاني تبغاني أشتغل في مطعم لا لا لا هذا مو مقامي والمشكلة لو تراجع سجل أبوه مو بعيد تلاقيه في يوم من الأيام كان حمال ولا جرسون ولا حتى زبال ومع الوقت وصل للي هوا فيه عشان ولده يصير ولد فلان الفلاني
ومن ضمن الأشياء أيضاً العادات الإجتماعية يعني لو شخص أشتغل ب2000 ريال راح تكفيه لو حسبها صح بس أحيان ممكن بعد العادات الإجتماعية تخليه يشوف المبلغ قليل يعني من ضمن العادات عند بعض الناس إنه لو زارني ضيف لازم أذبحله خروف ولو ما ذبحتله ولا جبتله دجاج ولا سادويتشات ولا شي يعتبرها إهانه له طيب يا بني آدم أنا إنسان راتبي 2000ريال يعني على قدي طالما بدك تزورني لازم تقدر ظروفي صحيح الكرم شي طيب بس كدة هذا مو كرم هادي بلاهة
غير كدة مثلاً لو شخص مريض أو سوا عمليه أو عنده مناسبة ولا شي لازم أحضر وأقدم هدية بمبلغ وقدره ولا راح يتكلموا عني ويقولوا فلان ما جاب شي ولا شوفوا بالله إش جايب تعب نفسه لو ما جاب أحسن طيب يعني أنا راتبي على قدي إش أسوي
برضه ممكن نقول عادات الزواج والمهر إلي مدري بكم والشبكة إلي ما أدري بكم وقاعة الأفراح لازم تكون بالشي الفلاني وما إلي ذلك
طبعاً هادي كلها عادات المفروض نتخلى عنها يعني المفروض كل واحد وقدرتوا والمفروض نخفف على بعض مو نضغط على بعض
2- هل الشهاده لها سبب في ذلك ؟ ام لا يهم اذا كانت الخبره موجوده ؟
والله على حسب الوظيفة يعني في وظايف لازملها شهادة وفي لأ يعني أنا مثلاً بدي أصير مهندس ولا بدي أقدم على وظيفة هندسية لازم تكون عندي شهادة بس والله أنا ما قدرت أكمل تعليمي أجلس أحط ايدي على خدي وأقول ما عندي شهادة يعني ما أقدر أشتغل لا طبعاً في مليون وظيفة ووظيفة بس للي يبغى أو ممكن أعمل لحسابي الخاص أشوف إش عندي مواهب وأبدأ أستغلها يعني أنا مثلاً شاطر في الفوتوشوب أحاول أعمل تصاميم للشركات للمؤسسات للمواقع وآخد عليها فلوس أنا بني آدم عندي سيارة أشتغل تاكسي كل يوم أوصل كم واحد تطلعلي فلوس أو أنقل بضايع بين المدن أو أي شي المهم الشغل مو شرط يعتمد على شهادة ولو تجي تشوفي كبار التجار العصاميين تلاقي كتير منهم ما عندهم شهادات جامعية وبعضهم حتى شهادة الثانوية مو معاه بس نجح ولو تشوفي ماضيه تلاقيه كافح وأشتغل في مليون وظيفة لحد ما وصل للي هوا فيه
3- نسمع كثير عن حالات السرقه في المجتمعات .. هل البطاله لها دور في ذلك ؟
مو كل شي نرميه على البطالة نغلط ونرمي غلطنا على البطالة والبطالة إلي في نظر الناس سببها الحكومات وفي الآخر تصير الحكومات هيا المسئولة عن أغلاطنا زي ما قلت فوق إلي بده شغل راح يلاقي بس هوا ضعف الشخصية وضعف الوازع الديني وسوء التربية ورفقاء السوء ممكن هوا إلي يأدي إلي السرقة وبعدين أي سرقة إلي بنتكلم عنها بالضبط لأنه في ناس ما شاء الله تبارك الله أصحاب مناصب وشغالين سرقة ما يشبعوا صح ولا أنا غلطان؟؟
4- مواطن يبحث باستمرار عن وظيفه , ولا يجد .. ما العمل وقتها ؟
صدقيني لو بده راح يلاقي والوظايف مالية البلد بس هوا شكله بيدور على وظيفة مو من مقاسه وظيفة أكبر منه مو راضي يقتنع بقدراته ويبدأ السلم من أوله
5- هل تعتمد ايجاد الوظيفه على (( الحظ )) ؟
أكيد لأ تعتمد على جدية الشخص في العمل وكفاحه ومثابرته في الحث عنها طبعاً ما أنكر إنه أحياناً تعتمد على الحظ يعني يكون عنده واسطه ولا حاجة زي كدة
6- نسمع الكثير بان اجيال تخرجت ومعها شهادتها ولم يجدو وظيفه ... ماذا تعمل الحكومه والوزارات حينها ؟
ما نحمل كل الغلط على الحكومات والوزارات أكيد هما عليهم غلط بس برضه صاحبنا غلطان قبل ما يتخصص يشوف هذا التخصص إش مستقبله هل له مستقبل ولا لأ ولو كان دخل هذا المجال هواية فعاد يتحمل نتيجة إختياره يعني مثلاً انا أحب الرسم ودخلت الجامعة وأخذت شهادة في الرسم طبعاً إحنا بلد ما تهتم بدرجة كبيرة بالرسم والفنانين فهادي مو مسؤولية الحكومة هادي مسئولية الشخص نفسه
7- ماذا تؤدي البطاله على نفسيه الشخص ؟ وما تجبره على الفعل ؟
إذا كان فيه شغل وهوا بيتشرط فهوا صاحب نفس مريضة أما إذا كان غصب عنه وهذا متهيألي نادراً ما يكون لأنه إلي بده يشتغل راح يلاقي شغل وأي شي يسويه غلط يتحاسب عليه وماله
8- عرف البطاله بنظرك ؟
البطاله: ظاهره أوجدها المجتمع بنظرته القاصرة على الأشياء وغالباً ما يقع فيها الناس الذين يحملون بعض الكبر في نفسهم أو الكسالى الذين لا يريدون العمل والإجتهاد يعني يبغوها على طبق من ذهب
9- ما الحل الذي يقضي عالبطاله ؟
الحل زرع حب العمل لدى شبابنا وأطفالنا وتعليمهم أن الشغل مو عيب وإنه صنعة في يد أمان من الفقر وتعليمهم أن الناس سواسية وأن الوظيفة ليست مجال للحكم على الناس
ناطره اجوبتكم اخواني ..
وهذه قضيه اساسيه وكبيره بمجتمعنا
عطونا حلولكم
تحياتي
|
ألف شكر أختي شهودة على تعبك معانا
وأعذروني مرة تانية ع التأخير
التعديل الأخير تم بواسطة شخابيط قلم ; 11-08-08 الساعة 12:54 AM
سبب آخر: الخط كان مررررررررررة صغير وكبرته
|
10-08-08, 01:26 AM
جديد مواضيع قسم الحوار الجاد
العرض العادي
