المنتدى :
الحوار الجاد
مش هنغرق
مش هنغرق
إزيكم يا جماعه ؟عاملين إيه؟كويسين؟طيب الحمد لله
مقدمه مكرره ولابد منها مينفعش يا جماعه مسألش عليكم قبل ما أبدأ أتكلم معاكم ومع ذلك مفيش واحد ولا واحده فيكم بيقول الحمد لله كويس وانتي إيه اخبارك؟
المهم اللي يفتح الموضوع ده ومقراش الموضوع اللي قبله اللي اسمه هنغرق اللي كان من مده طويله ده
يجري بسرعه ويروح علي الموضوع اللي قبله اللي اسمه هنغرق وده اللينك علشان يفهم احنا بنتكلم عن ايه
هنغرق ؟
وطبعا مع ذكر العنوان اللي فات وانتم شايفين العنوان المره دي هلاقي العضو العزيز اللي دايما مهتم بكلامي
وبيحب اوي يحلل شخصيتي بيقول
أكيد همسات كانت مفكره نفسها ماسكه ورده وعماله تقطع ورقه وتقول هنغرق وبعدين تقطع ورقه تانيه وتقول مش هنغرق علي غرار بيحبني مبيحبنيش كده
بس مش مده طويله أوي بين هنغرق ومش هنغرق ده زمان الورده ماتت وشبعت موت
هرد انا واقوله لو صبر القاتل علي المقتول كان مات لوحده وان الصبر مفتاح الفرج وان انا جيالكم في الكلام
طبعا ظروف الامتحانات والكورسات وشويه النشاطات اللي الواحد شغال فيهم يأخروا بلد مش يأخروني انا بس
بلإضافه بقي لاني بقيت مدمنه
لا لا لا فكركم ميروحش لبعيد انا بقيت مدمنه حاجه كويسه مدمنه قرايه نفسي حد يشدني من قدام الجهاز
طول النهار والليل قاعده علي الجهاز أنزل في كتب وروايات وأقرا وأقرا وأقرا خايفه اوي عنيه هتوجعني حد يلحقني
يعني نداء إلي اصحاب القلوب الرحيمه إلحقوني بكتب ورقيه ملمس الورق وحشني تقليب الصفحات وحشني
المهم نرجع لموضوعنا الاساسي بقي علشان أكيد زهقتم من الرغي
أولا كده وعلشان نبقي علي نور انا شخصيتي سويه جدا ومعنديش ازدواج في الشخصيه ولا أي حاجه ممكن تخطر علي بالكم نتيجه لتضارب العناويين
الموضوع ومافيه إننا ممكن ممكن منغرقش وده إمتي بقي
لو اتبعنا شويه الحلول اللي ممكن نعملها فعلا بس الاول قبل ما أبدأ في الحلول عايزه أقول ان خطر ارتفاع درجه الحراره مش بس غرق المدن لا وكمان هيسود المناخ الاستوائي وهتنتشر أمراض المناخ الاستوائي الكتير جدا اللي منها الملاريا والكوليرا وشلل الاطفال وغيرهم ودي بيتاخد لها مصلات ولقحات طبعا وزاره الصحه مفكرتش انها هتقدر توفرها ولا لا في الوقت الصعب ده
غير انها لها تأثير علي سياحه السواحل من ناحيه تانيه لكن مش عايزه اطول عليكم علشان ادخل في هدف الموضوع الاساسي واللي هو ايه
الحلول
والحلول اللي تم نشرها لحد دلوقتي نوعين نوع ممكن نعتبره خيال علمي ونوع ممكن تنفيذه نبدأ بالنوع الاول
علشان تشوفوا الافكار الغريبه
1-واحد أسمه الكسندر ايبان قال ننسف القمر بالقنابل النوويه وإن ده هيؤدي الي حدوث ربيع دائم علي سطح الارض (إيه علاقه القمر بإرتفاع درجه حراره الارض او خفضها مش عارفه لكن هو فعلا حل اتقال )
2-واحد قال نحط مظلات من طبقه رقيقه تمتد مساحه55ألف كيلو متر مربع في مدار حول الارض علشان نقلل الاشعه فنبرد الغلاف الجوي(عالم رايقه)
3-واحد اسمه روبرت فروش أقترح ضخ كميه من الغبار في طبقات الغلاف الجوي بواسطه الطائرات النفاسه
لتبريد سطح الارض (غبار؟؟؟!!!!!!!!!!!!!!!!!)
4-اللجنه الامريكيه القوميه لتبسيط العلوم تقترح استخدام مدفع عملاق لإطلاق قذائف تحمل اتربه نحو طبقات الجو العليا لتقليل اشعه الشمس ويمكن تحقيق ذلك عن طريق الحفاظ علي 10 بلايين طن من التراب الناعم سابحه علي الدوام في طبقات الجو العليا لمده لاتقل عن سنتين ثم نحتاج الي اطلاق قذائف من التراب من جديد بواسطه المدافع العملاقه (مدافع عملاقه ؟ ياسلام علي عالم الكرتون )
طبعا كل حلول الخيال العلمي دي رغم ان مفيش مستحيل وانها ممكن تتحقق في يوم من الايام الا انها محتاجه حسابات دقيقه جدا غير انها مكلفه ومحتجه مليارات الدولارات وكمان ممكن تؤدي لدمار البشريه وفناءها لو كان فيه اي خطأ في الحسابات ممكن يؤدي الي انخفاض درجه الحراره في الطبقات العليا بدرجه كبير ويؤدي الي بروده شديده ونبقي بدل ما نحلها نكلكعها اكتر غير ان ممكن يؤدي الي تغير التركيب الكيميائي للغلاف الجوي ومنعرفش ساعتها إيه اللي ممكن يحصل
نسيب افلام الكرتون والخيال العلمي اللي بيفكروا فيها دي ونبدأ بقي نشوف الحلول الممكنه فعلا ودي متعلقه بمصر او مدن البحر المتوسط
1-عمل حواجز وسدود علي السواحل لحمايه المدن الساحليه ودي عمليه مكلفه جدا والدليل علي مدي تكلفتها إن التقديرات الاوليه لتكلفه حمايه الشواطئ الشرقيه للولايات المتحده الامريكيه ستكون أكتر من 100 مليار دولار وذلك لمواجهه إرتفاع البحار متر واحد فمبالك بمترين ؟
وللعلم طبعا مفيش تقديرات أوليه لشواطئنا وده لان الحكايه مش في دماغنا اصلا فيتري المسئولين هيستنوا لحد ما يكونوا قدام خيارين اما بناء السدود المكلف جدا أو الاستغناء عن المدن المهدده بالغرق خاصه مع قله مواردنا فيؤدي ذلك الي انتشار المجاعات وتشريد 10 ملايين انسان هم سكان الدلتا وكل المشاكل اللي ذكرناها في الموضوع اللي فات
2-في أقتراح تاني بيقول اننا ممكن نعمل سد عند مضيق جبل طارق يتحكم في منسوب المياه في البحر المتوسط وده طبعا حل مش ممكن مصر تعمله لوحدها لازم كل دول البحر المتوسط تتفق عليه وتشارك فيه وبالتالي اقول من دلوقتي ان الحل ده في المشمش
3-الحل الاخير والحل المثالي من وجهه نظري ومش بس لمصر او دول البحر المتوسط لا للعالم كله حل غير مكلف وعبقري وجمالي بس محتاج اننا نفوق ونشتغل مع بعض حكومات وافراد
الا وهو التــشـــجـــــــــــــيــر بيقولك ايه بقي ؟
ان معظم علماء العالم أكدوا ان التشجير يهدف إلي إنقاذ البشريه وإن زراعه مساحات كبيره من الاشجار يحد من إرتفاع درجه حراره الارض وإن في تجارب رائده في المجال ده تمت بواسطه اتحاد الإخراج الامريكي
زي زراعه 100 مليون شجره جديده في شتي المدن الامريكيه ومشروع آخر لإنشاء 100كيلو متر مربع من الغابات في جوانيمالا وهذه المساحه تعادي 14بليون طن من الكربون الذي يتسبب في ارتفاع درجه حراره الارض
وفي دراس اجراها عالم امريكي اسمه جريج مارولاند من المعهد القومي بأوك ريدج تينيسي بتقول ان زراعه الاشجار تخفض من تراكم ثاني أكسيد الكربون في الجو حيث تصل كميه الكربون التي ترفع درجه الارض نحو خمسه بلايين طن في العام وقدر مارولاند عدد الاشجار اللازم لتحويل مثل هذا القدر من الكربون الي الخشب كل عام إلي زراعه نحو سبعه ملايين كيلو متر مربع من الاشجار الشابه أي مايوازي مساحه استراليا
وإرتكزت حساباته علي شجره الجميز الامريكيه وهي شجره يرتفع معدل امتصاصها للكربون بشكل جيد
والعجيب بقي ان المساحه دي هي نفس مساحه الغابات الاستوائيه التي تم قطعها نتيجه الانشطه البشريه
وده طبعا ان دل علي شيء فيدل علي ان الطبيعه كانت متزنه والانسان خربها وبعدين يرجع يشتكي ويحاول يصلح بس ياريت بس نبدأ فعلا نحاول يعني احنا مثلا سمعنا عن مشروع تشجير القاهره ومشروع تشجير الساحل الشمالي سمعنا اه لكن عملنا لا طبعا
في النهايه احب اضيف حاجه واحده بس ان ديينا دين جميل وكان دايما سابق عصره في كل حاجه وفي موضوعنا ده الاسلام امرنا بزراعه الاشجار وممش فاكره نص الحديث بس فيما معنا ان إذا قامت الساعه وفي يد احدكم فثيله فليغرسها ده كان من أكتر من 1429 سنه ومش لاقيه حاجه تاني اقولها أكتر من كده يارب بس يعجبكم الموضوع ويجي بفايده وميكنش طويل وتكملوه للآخر
|
02-08-08, 05:59 PM
جديد مواضيع قسم الحوار الجاد
العرض العادي
